Asomi a Itheneeri Yaahimuxukurya Yesu

Yaahikhala alopwana vakhaani yaarwa Onikhuma Nsuwa. Awo yaari asomi a itheneeri, eyo piiyo, yaasoma makhalelo a itheneeri, yuupuwelaka wira eyo yaanaakhaliherya waaleela atthu, ele yaarowa okhumelela mookumi mwaya. (Yesaya 47:13) Ari ene owannyeya mpantta Onikhuma Nsuwa, asomi ale yaahoona “etheneri”. Nto yaahitthara etheneeri ele, ikiloomo sinceene yaaroihaka oYerusalemu, ohiya oBethelehemu.

Nuumala asomi ale ophiya oYerusalemu, yaahikoha wira: “Ori vai mwené àYuda oyariwe nanano? Nrimona etheneri awe Onikhuma Nsuwa, nrwenlé omukokhorela”.​—Matheyo 2:1, 2.

Nuumala Mwene Herodi yoowo aalamulela oYerusalemu wiiwa, aahinanariwa vanceene. Tivonto, aahimwiitthana mukhulupale aanamukuttho ni akhulupale akina a etiini ya aYuda, khwaakoha opuro aarowa awe oyariwa Kristu. Alavulaka ele Soolempwa sinihimya aya, awo yaamwaakhunle wira: “O Bethelehemu w’oYudeya”. (Matheyo 2:5; Mikeya 5:1) Nto Herodi aahiwiihana asomi ale wiiphiini, khwaaleela wira: “Rowakani, mwakohakohe orattene sa mwan’owo. Mwamphwanyá vale, murwé, mukihimerye, wira ni miyo-tho kirowé, kamukokhorele”. (Matheyo 2:8) Masi, Herodi aaphavela omwiiva mwaana ole!

Nuumala asomi ale okhuma, yaahiiraneya etthu yootikiniha. “Etheneri” yeele yaawenha aya ari ene mpantta Onikhuma Nsuwa, yaahaahoola. Mwekeekhai, ele khahiyo yaari etheneeri pure, masi ookhala aakumihenrye wira yaahooleke. Attharaka siisaale, etheneeri ele yaaheemela vasulu va empa aakhala awe Yosefe, Maria ni mwanaya.

Nuumala asomi ale okela mpaani, yaahimphwanya Maria ni mwaana, eyo piiyo, Yesu. Nto asomi ale yaahikokhora amuttittimihaka Yesu. Nave yaahinvaha Yesu eweero, erupani ni miira. Nuumala-vo, aphavelaka otthikela wa Herodi, moolohani, Muluku aahaalopola wira ahitthikele wa Herodi. Tivonto, yaahitthikela elapo aya aviraka ephiro ekina.

Munoona wira ti pani aakumihenrye “etheneri” ele yaahoola asomi? Muupuweleke wira, wanipacerya khiyaaroihale oBethelehemu, opuro aari Yesu. Masi, yaaroihale oYerusalemu, weiwo yaakumanne aya ni Mwene Herodi, yoowo aaphavela omwiiva Yesu. Nto, Herodi ammwiiva Yesu vaakhanle wira Muluku khaaloponle asomi ale wira ahimuleele Herodi, opuro aari awe Yesu. Tthiri, aari Satana nwanani a Muluku yoowo aarumenle etheneeri ele wira omwiivihe Yesu, ophavelaka omaliherya yoophavela awe.