YOOSOMA 8

Malikanyiho Aniixuttiha

Matheyo 13:34, 35

MALAKIHERYO: Okathi muniixuttiha anyu, murumeeleke malikanyiho ookhweya wiiwexexa anrowa ovara murima wa alipa-oowiriyana ni wiixuttiha itthu sootthuneya.

MOOTA WOOPAKA:

Murumeeleke malikanyiho ookhweya wiiwexexa. Ntoko Yesu, murumeeleke itthu saamukhaani wira mwiiwanyeihe itthu suulupale, nave itthu sookhweya wira mwiiwanyeihe itthu soovila. Okathi munipaka anyu nlikanyiho, muhaaceryeke itthu sihinitthuneya seiyo sinrowa owaakanyerya alipa-oowiriyana paahi. Okathi munirumeela anyu malikanyiho, ahikhaleke ootepexa orakama ni oowaatta itthu sihinivarihana ni mwaha owo onithokoreriwa.

Nwehaweheke. Nweheke itthu siniiraneya moolumwenkuni, musomeke iliivuru sahu, ni mwaawiriyaneke atthu oosuwela wiixuttiha. Wira mpake eyo, pooti okuxa malikanyiho oolempwa wira mwarumeeleke okathi muniixuttiha anyu. Mulepeke malikanyiho awo ni musukeke.
Nwuupuweleke alipa-oowiriyana. Muthanleke malikanyiho anivareleya muteko ni asuweliwe ni alipa-oowiriyana. Mukhalane ephoole wira malikanyiho anyu ahaaveehe wala owuulihiha muru alipa-oowiriyana.
Mwiixuttiheke eponto yuulupale. Malikanyiho munirumeela anyu atthokiheryeke iponto suulupale, ohiya khula etthu. Alipa-oowiriyana ahaana wuupuwelaka eponto yiixuttinhe anyu, ohiya paahi nlikanyiho-ru.