Mweemererye Olokiheriwa ni Malakiheryo a Yehova

‘Nuwo munnikettiha ni miruku sanyu, numalá munokittittimiha n’uvuwa’.​—ESAL. 73:24.

MWAAROWA WAAKHULA SAI?

Exeeni enooniherya wira Mulipa-Onuupa Muulupale khahiyo mulipa a nthalu okathi onnipwapwela awe?

Xeeni ninxukhurela ahu osuwela wira Mulipa-Oonuupa onnithanalela ehukhumu?

Ninrowa weemya sai miruku wala opwapweliwa ni Yehova?

1, 2. (a) Itthu xeeni sinitthuneya wira naataane saana ni Yehova? (b) Mureerelo xeeni oniphwanya ahu otokosa sowiiraneya sa atthu atthanre yoolaka ya Muluku?

‘VANO miyo, oreriwa waka owattamelani [nyuwo Yehova], miyo kinnotthyawelelani’. (Esal. 73:28) Ni masu ala, nasaalimo onnooniherya omuroromela Muluku. Exeeni yaamwiirinhe olavula siisa? Okathi oonale awe okhalaka wira atakhali tarina murettele, wanipacerya murima awe waaninwereya. Nto aahiikhupanyerya ariki: ‘Vano-nto miyo kirènre murima mahalene? Kisunke síyo matat’aka òrera?’ (Esal. 73:2, 3, 13, 21) Nto ovolowa mpaani mwa Muluku, ti etthu yamwiirinhe orukunuxa muupuwelo awe. (Esal. 73:16-18) Yowiiraneya ela, yaahimwiixuttiha mulopwana ole oowaamini etthu yuulupale: Okhala eriyari ya atthu a Muluku, ni wiiwelela miruku, ni weettela, ti etthu yuulupale enimwaataaniha mutthu ni Yehova.​—Esal. 73:24.

² Nave hiyo, ninniphavela wataana vanceene ni Muluku ahu mukumi ni a ekeekhai. Wira naataane nuuwo, nihaana wiiwelelaka miruku sawe ni onilaka wawe wira nikhale atthu animusiveliha! Khalai, Muluku aanimmorela ikharari khula mwIsarayeli ni maloko makina, vaavo aavaha awe okathi wira yeetteleke soolakiherya sawe. Sowiiraneya sinooniherya moota yeettenle aya miruku iyo siri mBiibiliyani “wira nixuttihiwe”, ni “wira sinilopole hiyo, okhala wira omala wa mahiku wonáttamela”. (aRom. 15:4; 1 aKor. 10:11) Otokosa saana sowiiraneya iyo, sinoniiriha osuwela saana mikhalelo sa Yehova, ni woona enamuna ekhanle ahu ooweemya olokiheriwa nuuwo.

MOOTA MULIPA-ONUUPA OLOKO ONOONIHERYA AWE OKHULUPALE AWE

3. Yoolepa ya Yesaya 64:8 ni Yeremiya 18:1-6, enooniherya sai okhulupale wa Yehova? (Moone elatarato eri wanipacerya wa mwaha.)

³ Alavulaka mwa nthoonyeryo okhulupale Yehova orina awe wa khula mutthu ni maloko, Yesaya 64:8 onihimya so: ‘[Nyuwo Yehova], mwá Tith’ihu, hiyo nri ntoko oloko, ti nyuwo munùpalé, othene hiyo nùpiwé ni nyuwo!’ Mulipa-onuupa oloko, ookhalana owerya wa wiiriha oloko ole etthu eniphavela awe wira apake mwaapu onimusivela. Oloko owo, khoniwerya okhootta. Nto pinaatamu ori siiso ohoolo wa Muluku. Pinaatamu, kharina ehakhi ya onyakulihana ni Muluku, ntoko oloko ohiniwerya aya onvaanyiha ole onuupa.​—Mmusome Yeremiya 18:1-6.

4. Niireke Muluku onniwiiriha atthu wala maloko, okhala ooloka akina oohiloka? Mutthokiherye.

⁴ Yehova aahiwooniherya aIsarayeli osuwela wawe weettiha itthu ntoko siisaale mulipa-onuupa miyaapu siniiriha awe oloko. Masi yookhala etthu emosa eri yoovirikana. Mulipa onuupa miyaapu, onniwerya wuupa miyaapu sa khula enamuna, arumeelaka nipuro noophwanelela wuupa. Masi niireke Yehova onnaapaka atthu wala maloko, akina ooloka akina oohiloka? Biibiliya onnaakhula wira nnaari. Yehova ohaavaha etthu ya efaita yuulupale: othanla opaka etthu mootaphuwa. Moota Yehova oneettiha awe okhulupale awe, khonimaliha edireito khula mutthu orina awe. Apinaatamu tanithanla olokiheriwa ni Mpattuxa, Yehova.​—Mmusome Yeremiya 18:7-10.

5. Akhala wira apinaatamu annikhootta wuupiwa ni Yehova, owo onirumeela sai okhulupale awe?

⁵ Exeeni eniiraneya akhala wira apinaatamu annikhootta olokiheriwa ni Mulipa-Oowuupa Muulupale? Nto owo onivarihela sai muteko okhulupale awe? Nkahaya muupuwele ele eniirihiwa aya oloko akhala wira ele enuupiwa khekhumale ntoko saaphavela awe mulipa-oowuupa. Mulipa-oowuupa onnirumeela oloko ole wira opake enamuna ekina ya mwaapu, aahiiso ononyaanya paahi mwaapu ole! Okathi oloko ohinivareleya aya muteko, ikwaha sinceene orina nthowa ti mulipa-owuupa. Nto eyo kheniiraneya ni Mulipa-Oonuupa, Yehova. (Otum. 32:4) Okathi mutthu ohiniphavela awe wuupeya saana mmatatani mwa Yehova, nthowa ninkhala na mutthu yoowo ohinuupeya. Moota Yehova onivarihela awe okhulupale awe, ontthariha moota apinaatamu aneemererya aya orukunuxa makhalelo aya, wira elokiheriwe. Ale aneemererya, annuupiwa wala olokiheriwa saana. Mwa ntakiheryo, maKristau oowoottihiwa ti ‘miyapu sa omoreliwa ikharari’ yuupiwe ntoko miyaapu ‘sovuwa wulupale’. Nave-tho, ale anikhootta wuupiwa, annimunyokha Muluku, khiyakhala miyaapu sipakeliwe ‘opwetexiwa’.​—aRom. 9:19-23.

6, 7. Mwene Davidi ni Mwene Sawuli yaavirikanne sai voohimya sa wiiwelela soolopola sa Yehova?

⁶ Enamuna emosa Yehova oniwuupa awe atthu, ori waavaha miruku aahiiso waapwapwela. Hiyo pooti oweha moota owo oonihenrye awe okhulupale awe nivareryaka ele yiiranen’ye ni mamwene manli oopacerya a Isarayeli, Sawuli ni Davidi. Okathi Davidi aararunwe awe ni Bathi-Xeba, yoottheka ele yaahimuhaaxa owo ni atthu akina. Nnaamwi Davidi aari mwene, Yehova khaahin’ye ompwapwela Davidi. Muluku aahimuruma profeta awe Natani wira alavule moolumo a opwapwela wuulupale. (2 Sam. 12:1-12) Nto Davidi oonenle sai? Masu ale yaahivara murima awe, mpakha wiittaruxa. Davidi aahimoreliwa ikharari ni Muluku.​—Mmusome 2 Samuweli 12:13.

⁷ Moovirikana ni Davidi, Mwene Sawuli khiiwelenle miruku sa Muluku. Yehova aahimuruma profeta Samuweli wira amuleele Sawuli wira aapwetexe Amalekhi otheene ni mihuwo saya. Sawuli aahikhootta wiiwelela yooruma ela ya Muluku. Owo aahimuhiya mukumi Agagi mwene a esidade ele, nave aahikuxa mihuwo sinceene sa inama. Mwaha wa xeeni? Woonasawe owo aaphavela wiivuwiha paahi. (1 Sam. 15:1-3, 7-9, 12) Okathi aavahiwa awe miruku, vaamuloka aakhanle wira Sawuli aahiphavela weettela miruku iye wira uupiwe ni Mulipa-Onnuupa Muulupale. Moovirikana ni vo, Sawuli aahikhootta wuupiwa wala olokiheriwa. Owo aahipacerya woothererya itthu saapanke awe. Nto aahimya wira khaatthenke maana axinama ale yaarowa opaheriwa mukuttho, nto khuhicalela soolopola sa Samuweli. Yehova aahimukhootta Sawuli okhala mwene, nto owo khaatthikenle-tho wataana ni Muluku ekeekhai.​—Mmusome 1 Samuweli 15:13-15, 20-23.

MULUKU KHARINA NTHALU

8. Exeeni eniixutta ahu voohimya sa moota nloko na Isarayeli noonela aya wuupiwa ni Yehova?

⁸ Yehova, khahiyo paahi onivaha malakiheryo awe wa khula mutthu, masi-tho onnivaha maloko ntero wira yuupiwe nuuwo. Eyaakha ya 1513 A.E.C., aana a Isarayeli yaahoopoliwa wEgitu, khupaka nivarihano na wataana ni Muluku. Nto aIsarayeli, yaahipakeya nloko na Muluku khukhalana eparakha ya wuupiwaka nuuwo ntoko Mulipa-Oowuupa Muulupale. Masi, atthu yaahivikaniha opaka itthu sootakhala vamaithoni va Yehova, nave yaanaakokhorela amuluku a maloko yaarukurenrye. Khula okathi, Yehova aanaaruma maprofeta wira aalopole, masi anaIsarayeli khiyaaphavela wiiwelela. (Yer. 35:12-15) Mwaha wa ohiiwelela waya, anaIsarayeli yahaana opwapweliwa ni olakiwa vanceene. Ntoko mwaapu oniphwanela opwetexiwa, maloko 10 a epantta ya onikela epheyo, yaahixinttiwa ni Asiiriya, ohiya-vo, omwene wa maloko manli a okuusini waanihaaxiwa ni aBabilônia. Sowiiraneya iya sihaana oniixuttiha etthu yuulupale! Hiyo ninrowa wuupeya akhala wira ninneemya saana soolopala sa Yehova.

9, 10. Atthu oNiinive yoonenle sai olopola wa Muluku?

⁹ Yehova nave aahaavaha-tho atthu a wAsiiriya ekapitaali ya oNiinive, eparakaha ya wiiwelela soololpola. Yehova aahimuleela Yona wira: “Nvenyé, murowe oNínive, muttetthe mulupale, mwàlalèrye atthu a weiwo mutthaka wowalopola: tthiri otakhala waya murima ti wulupale. Miyo kosuwela orattene”. Ttthi mwaha wootakhalexa Niinive aaphwanela opwetexiwa.​—Yona 1:1, 2; 3:1-4.

¹⁰ Nto, okathi Yona aalalen’ye awe opwetexiwa wa Niinive, “Atthu othene a oNínive yahimwìwelela Muluku, yahilaleya otthuka, yahiwara mattapwatta, okhuma alupale mpakha axikhani”. Nto mwene aya, “ahìwa ehal’ile, owo ahivenya vehijeni vawe, ahirula ikuwo sawe s’omwene, ahiwara mattapwatta, khukilathi vatturwani”. Atthu oNiinive yahiiwelela soolopola sa Yehova, khuttharuwa otakhala waya, tivonto Yehova khaapwetenxe.​—Yona 3:5-10.

11. Mukhalelo xeeni Yehova ooniherye awe mmoota aathokorenrye awe atthu aIsarayeli ni atthu oNiinive?

¹¹ Nnaamwi yaari nloko nothanliwa aIsarayeli yaanilakiwa. Moovirikana ni aIsarayeli, atthu a oNinive khiyaarina nivarihano na wataana ni Muluku. Hata vari siiso, Yehova aahilaleya mihupi sawe sa maphukelo, nto khwaamorela ikharari okathi yoonihenrye aya okhala ntoko oloko onuupeya mmatatani mwawe. Tthiri matakiheryo ala manli annooniherya wira Muluku ‘khonathanla atthu’!​—Otum. 10:17.

YEHOVA TOREERELA MURIMA NI ONNIRUKUNUXA MUUPUWELO AWE

12, 13. (a) Xeeni Yehova onihiya awe waahukhumu ale aneemya wuupiwa nuuwo? (b) Nuulumo noowi ‘Yehova [aahithanana]’ nnooniherya exeeni voohimya sa Sawuli ni oNinive?

¹² Moota Muluku oniphavela awe onilokiherya, onooniherya wira toreerela murima ni onnirukunuxa muupuwelo awe. Eyo ennooneya vaavale Yehova aaphavela awe opaka maphukelo, masi khirukunuxa yoolakela awe okhala wira atthu awo yaahaakhulela soolopola sawe. Soolempwa sinnilavula voohimya sa mwene oopacerya a wIsarayeli, wira Yehova ‘[aahithanana] omukhaliha Sawuli mwene’. (1 Sam. 15:11) Vaavo atthu a oNinive yaattharunwe aya miteko saya soohiloka, Biibiliya onnilavula ariki: ‘Muluku [ekekhai] ahòna miteko saya s’ottharuwa, ehiyaka iphiro saya sotakha. Tivo ahihiya ehukhumu yalakenlyawe wakumiherya, khuhahukhumu’.​—Yona 3:10.

¹³ Nuulumo na eHeeberi noowi ‘[aahithanana]’, nintaphulela orukunuxa moonelo wala yoophavela awe. Moonelo wa Yehova voohimya sa Sawuli, waahirukunuwa nto amukhootta okhala mwene. Yehova aahirukunuxa mukhalelo awe ohiya wira owo aaroovonya omuthanla Sawuli, masi mwaha woowi Sawuli aahithoiwa waamini, khuhiiwelela sooruma sa Muluku. Muluku ekeekhai aahihiya waakumiherya ehukhumu atthu a oNiinive; niire so, owo aahirukunuxa muupuwelo awe aahiiso yoolakela awe. Ela tthiri enninlipiha osuwela wira Yehova yoowo ori Mulipa-oonuupa, toreerela murima ni onnirukunuxa muupuwelo awe, ni toolevelela, oomoriwa ikharari ni onnihiya omuhukhumu mutthu akhala wira ole otthenke onnaakhulela soolopola.

NIHIKHOOTTEKE OLAKIWA NI YEHOVA

14. (a) Yehova onnuupa sai olelo-va? (b) Nooneleke sai malakiheryo a Muluku?

¹⁴ Yehova onninuupa wala onilokiherya olelo-va orweela mwa Nuulumo nawe, Biibiliya ni mulokiheryo awe. (2 Tim. 3:16, 17) Nto nihaana weemererya malakiheryo otheene anaakhela ahu mwa inamuna iyo! Moohicala etthu sa waatta wa iyaakha sibatiziwe ahu, wala iparakha sirina ahu sa orummwa, nihaana ovikaniha waakhulela soolopola sa Yehova, neemyaka wira miruku sawe sinuupe wira nikhale miyaapu soovuwa.

15, 16. (a) Muupuwelo xeeni woohiloka onikhumelela akhala wira mutthu oopwapweliwa khuyeleela miritti sawe? Nvahe ntakiheryo. (b) Exeeni enirowa onikhaliherya okathi onipwapweliwa ahu?

¹⁵ Malakiheryo makina, pooti orwa mwa enamuna ya wiixuttihiwa wala opwapweliwa. Ikwaha sikina, vannitthuneya olakiwa mwaha wa etthu yoohiloka epanke ahu. Opwapweliwa iwo pooti ohela muhina oyeleela miritti saarina ahu mmulokoni. Nkawehani ntakiheryo na Diniza yoowo aari mutokweene. Owo aahipaka etthu yoohiloka mwaha wa anakoso aapaka awe yahaalonke, nto aahipwapweliwa wiphiini. Nto Diniz oonenle sai okathi aalaleiwa awe ohiyu yoole omuthukumanoni wira owo khahiyo-tho mutokweene? Owo onihimya so: “Koona ntoko wira kaari mutthu oohifai. Iyaakha saavinrye 30 kaahikhalana miritti sinceene. Kaari, pioneero a okathi wotheene, kaahirumeela oBetheli, kaahikhalihiwa murumeyi oorumeela nuumala-vo kikhala mutokweene. Kiira-tho kilavunle ene ninaano mwaha aka wooopacerya okongresuni. Nto mootutuxerya sotheene iya saahimala khuluyi. Ohiya-tho vo, muru waahikuula vanceene ni oxankiheya, miyo kuupuwela wira nkirina-tho nipuro mmulokiheryoni mwa Muluku”.

¹⁶ Diniz ahaana orukunuxa mukhalelo awe, wira ahiye mweettelo awe woohiloka; tivonto vaatthuneya aya olokiheriwa. Masi exeeni yaamukhalihenrye osyaka muupuwelo woohiloka? Owo onitthokiherya so: “Miyo kaahilakela ovikaniha okhalana mukhalelo wooloka wa omunepani. Nto etthu yuulupale yaakilipinhe waari okhaliherya wa anna mmuloko wa eeKristau, ni malakiheryo ari muliivuruni mwahu. Mwa ntakiheryo, mwaha wa A Sentinela 15 de Agosto 2009, oni: ‘Mootoko Orumeela Khalai? Munniwerya Otthikela Orumeela?’ waari ntoko ewarakha yaalepeliwa aka yaakhula mavekelo aka. Miruku kaavaha aka efaita yuulupale tiiya: ‘Akhala wira khamurina miritti sikina mmulokoni, muhaana wiimananihaka olipiha omunepani wanyu’”. Nto Diniz aattottenle sai mureerelo olopoliwa wawe? Nuuvira iyaakha, owo onihimya so: “Yehova ookireeliha-tho, khukhala murumeyi oorumeela”.

17. Moota xeeni mutthu okumihiwa mmulokoni onimukhaliherya aya omutthikela Muluku? Nvahe ntakiheryo.

¹⁷ Okumihiwa mmulokoni ori enamuna ekina ya opwapweliwa. Eyo ennaakiherya muloko mikhalelo soohiloka, ni ennimukhaliherya namattheka wira olokiherye mukhalelo awe. (1 aKor. 5:6, 7, 11) Robert aahoomoliwa mmulokoni etthu yowiiraka iyaakha 16, nto okathi owo, amusi awe ni axihima awe, yahiiwelela Nuulumo na Muluku voohimya sa oheetta ni ohilavula ni atthu akumihiwe mmulokoni. Nuuvira iyaakha, Robert aahittikiheriwa mmulokoni, nto onninnuwela momunepani. Okathi aakohiwe awe etthu yaamwiirinhe omutthikela Yehova ni wataana ni atthu Awe nuuvira okathi ole munceene, owo aahaakhula wira ororomeleya wa emusi awe waahimukhaliherya. Owo aahimyale so: “Vaakhanle wira emusi aka yaanilavula ni miyo hata okathi vakhaani, eyo yaarowa okiiriha ohiphavela-tho otthikela mmulokoni mwa Muluku”.

18. Enamuna xeeni ya oloko eniphavela ahu okhala mmatatani mwa Mulipa-Onuupa Muulupale?

¹⁸ Woonasawene khaninrowa opwapweliwa mmoota owo; masi nihaana wiikohaka so: Enamuna xeeni ya oloko eniphavela aka okhala mmatatani mwa Mulipa-Owuupa Muulupale? Kinrowa woonela sai okathi onkela aka opwapweliwa? Niireke ninrowa okhala ntoko Davidi, wala Sawuli? Mulipa-Oonuupa Muulupale ti Tiithi ahu. Muhiliyale wira ‘[Yehova] onnimpwapwela ole onimphentawe, ntoko tithi onimuttaruxawe mwanawe onimphentexawe’. Nto, ‘muhikhotté ottaruxiwa ni [Yehova]’.​—Mir. 3:11, 12.

[Enoota]

[Elatarato epaaxina 24]

[Elatarato epaaxina 26]

Sawuli khaacalenle soolopola, owo aahikhootta. Nto khaaphavela wuupiwa! (Moone ettima 7)

Davidi aahivariwa murima, nto aheemererya soolopola. Aheemya wira Muluku amuupe. Nyuwo munneemya? (Moone ettima 6)