ALE ANISOMA ILIIVURU SAHU ANNIKOHA . . .

Ti pani ompanke Muluku?

Nilikanyihe wira tiithi onilavula ni mwanawe a iyaakha 7. Owo onimuleela so: “Khalai, khalaixa, Muluku aahipattuxa elapo ni itthu sotheene siri mulaponi; nave aahipaka nsuwa, mweeri, ni itheneeri”. Mmiravo owo, onnuupuwela mwa okathi vakhaani, nto khiyaakoha atithi awe oriki: “Paapa, nto ti pani ompanke Muluku?”

Tiithi ole onaakhula so: “Khuuvo ompanke Muluku. Owo khorina ephattuwelo awe”. Nto masu awo vakhaani paahi annimuhakalaliha mwaana ole. Masi okathi oninnuwa awe, nikoho nle ninnivikaniha omutikiniha. Owo oninvila wiiwexexa wira Muluku khopattuxiwe. Owo onniikoha so: ‘Kiira erimu ni elapo eroopattuxiwa? Nto Muluku onikhuma woowi?’

Biibiliya onaakhula sai? Owo onnaakhula moolikanasa ni ntakiheryo nahu na tiithi ole. Profeta Moise, aalempe so: ‘Yehova, myako sihinatthi okhala, muhinatthi opattuxa elapo n’ulumwenku, nyuwo mwá Muluku mmahiku othene’. (Esalimo 90:1, 2) Nave, profeta Yesaya aahilavula iiraka: ‘Nyuwo khamusuwenle? Walá khamwixuntte? Yehova ti Muluku a mahiku othene: owo topattunxe ilapo sothene sa vathí’. (Yesaya 40:28). Moolikanasa, epaphelo ya Yuda ennimuhimya Muluku okhala a “mahiku othene”.​—Yuda 25.

Soolepa iyo sinooniherya wira Muluku ti “Mwené a mahiku òhimala”. (1 Timótheyo 1:17) Eyo enitaphulela wira Muluku khorina ephattuwelo, hata nimananihaka osuwela makhalelo awe. Nave, owo onrowa ovikaniha okhala a mahiku otheene. (Wisupulula 1:8) Tthiri, Muluku okhala wawe a mahiku otheene onooniherya wira owo Toowerya Sotheene.

Xeeni onnivila aya wiiwexexa muupuwelo ola? Mwaha woowi okumi ahu khonipisa, onniniiriha ohiiwexexa moota Yehova sinoonela awe okathi. Muluku ta okathi wotheene, iyaakha ekonto emosa niri nihiku nimosa mmuupuweloni mwawe. (2 Pedru 3:8) Nilikanyihe so: Niireke esoope yeeyo okumi aya onimalela mahiku 50, yanwerya wiiwexexa ovirikana orina aya ni ekumi ahu enimalela iyaakha 70 wala 80? Nnaari! Nave Biibiliya onnihimya wira hiyo niri ntoko isoope nilikanyihiwaka ni Mpattuxa ahu Muulupale. Hata muupuwelo ahu ti woovirikana ni wa Muluku. (Yesaya 40:22; 55:8, 9) Tivonto apinaatamu ahinwerya aya wiiwexexa mikhalelo sotheene sa Muluku.

Nnaamwi muupuwelo owo ovilaka wiiwexexa, masi ninnoona wira owo ti wookhalela. Niire so: Aakhanle wira ohaavo mutthu ompanke Muluku, mutthu owo aarowa okhala Mpattuxa. Masi Biibiliya onihimya wira Yehova tori ‘mpattuxa a itthu sothene’. (Wisupulula 4:11) Tthiri hiyo ninnisuwela wira ohaavo okathi erimu ni elapo yahaakhanle aya. (Maphattuwelo 1:1, 2) Nto sikhumme woowi? Ole Opattunxe, aahaana opacerya okhala. Nave-tho, owo aahaana okhala ohinatthi waapattuxa atthu oowerya ntoko Mwanawe mmoseene, ni malaikha. (Yobi 38:4, 7; aKolosi 1:15) Tivonto, wanipacerya owo aari mekhawe. Owo khahiyo aaroopattuxiwa; maana khiyaakhanle etthu yaawerya ompattuxa yena.

Ekumi ahu ni mikhalelo sotheene sa molumwenkuni sinnooniherya okhala wa Muluku a mahiku otheene. Ole oniiriha erimu ni elapo ahu wira yeetteke, Ole opanke malamulo aneettiha erimu ni elapo, tthiri khorina ephattuwelo. Owo paahi tovanhe ekumi itthu sotheene sinimumula.​—Yobi 33:4.