Niireke Vannireerela Oturuka Muupuwelo Anyu?

EGRUPU emosa ya amiravo maKristau, annivarihana orowa oweha efilme emosa. Etthu yaawiirinhe olakela orowa oweha efilme ele, mwaha woowi yaaniwiiwa apatthani aya a oxikola alavulasaka saana sa efilme ele. Nuumala owehasa ekartaaxi ya eviidiyu ele, yaahoona ikapwitthi suulupale ni ilatarato sa axithiyana oohiwara saana. Etthu xeeni nto yaarowa aya opaka? Nto niireke awo yanvolowa yoonale ene ikapwitthi iyo ni ilatarato iye sa axithiyana oohiwara saana?

Yowiiraneya ela enooniherya wira sookhala soothanla sinceene sinireerela ahu opaka, sookhala soothanla sooloka ni soohiloka, sikina sinivarihana ni mukhalelo ahu a omunepani, ni ompatthani ahu ni Yehova. Okathi mukina nyuwo pooti olakelaka opaka etthu, masi nuumala wuupuwelela saana nto munarukunuxa muupuwelelo anyu. Niireke opaka eyo yaarowa otaphulela ohisuwela yoowiira wala vannireerela tthiri?

Okathi Ohinireerela Oturuka Muupuwelelo Anyu

Omphenta wahu Yehova, toniirinhe ovahererya okumi ahu ni obatiziwa. Eyo ennooniherya wira hiyo ninniphavela ovikaniha omuroromela Muluku. Hata vari siiso, nwanani ahu Satana, onnimananiha ohonona waamini wahu. (Wis. 12:17) Hiyo noopaka yoothanla ya omurumeela Yehova ni weettela sooruma sawe. Nto oturuka muupuwelo ahu voohimya sa omurumeela wahu Yehova yaarowa okhala etthu yooriipiha murima! Eyo pooti oniiriha oyeleela ekumi ahu.

Wa iseekulu soovikana 26 sivinre, mwene oBabilonia Nabukhodonosori aahipaka elatarato ya eweero ni khwaaruma atthu otheene wira akokhoreleke. Khula mutthu aarowa okhootta opaka eyo anvonyeriwa nlitti na mooro. Amiravo araru Xadraki, Mexaki, ni Abedi-Nego yaawo yaamurumeela Yehova, yaahikhootta okokhorela elatarato ele. Mwaha wookhootta okokhorela elatarato ele, yaahivonyeriwa mulittini mwa mooro. Mwa miiriirya awosa yahoopoliwa ni Yehova nto yaaheemererya ohaaxiwa masi ahinanarinhe yoothanla aya ya omurumeela Yehova.​—Dan. 3:1-27.

Ohoolo waya profeta Daniyeli moolipa murima, aahivikaniha opaka mavekelo, vanaamwi aasuwela wira opaka eyo waarowa omwiiriha oriheliwa mulittini mwa akharamu. Owo aahivikaniha opaka nivekelo wa Yehova imaara tthaaru khula nihiku. Daniyeli khaarukununxe yoolakela awe ya omukokhorela Muluku ekeekhai. Mwaha woopaka eyo profeta ole ahoopoliwa “mwano mw’akharamu”.​—Dan. 6:1-27.

Arumeyi a mahiku ala, anniivahererya ni murima aya wotheene omurumeela Muluku. Egrupu emosa ya Anamoona a Yehova yaasoma oxikola wAfrica, yaahikhootta okokhorela itthu saattittimihiwa elapo aya. Awo yahoopopihiwa wira yaamoomoliwa oxikola iwe akhala wira yaamukhootta wiirela mpantta meera ale yaapakiwa ni anaxikola akhwaaya. Moohipisa opuro ole waahixukuriwa ni ministro a educação ni aahilavula ni anaxikola ale yaari Anamoona a Yehova. Alavulaka moohoova, amiravo ale Anamoona yaahimutthokiherya mukhulupale ole voohimya sa ele yaakupali aya. Okhuma vaavale khonalavuliwe-tho mwaha ole. Nto annihu ni axirokorihu awo, anniwerya orowa oxikola voohoova wira anrowa okhanyererihiwa ovara ele ehinivarihana ni malakiheryo a Yehova.

Muthokorerye yowiiraneya ya Joseph, yoowo amwaarawe yaawereiwa kanser khukhwa mootutuxerya. Amusi awe yaahimuttittimiha ni ottharihela yoothanla awe voohimya sa masikho. Masi amusi a amwaarawe khahiyo Anamoona, nto yaanimananiha wira apake masikho yaahela muhina soowiira ni soolema saya sahaamusivela Muluku. Joseph onihimya so: “Okhala wira awo yaahoona wira miyo nkaarowa oturuka muupuwelelo aka, nto yaaheererya waakhanyererya anaaka, nave awo yahikhoottasa. Nto amusi ale yaaheererya opaka niira orupelela murutthu vatthokoni vahu, masi kaahaahimeerya wira khiyaarowa weemereriwa opaka soolema saya soohiloka voohimya sa masikho vate vaka. Awo yaahoona wira orupelela murutthu etthu yahaakisivela ni hata mwaaraka aahaaleela khalairu wira kheemererya, nto yaahirowa opaka eyo nipuro nikina.

“Eriyari wa muxankiho owo, kaahinvekela Yehova evaasiisu yotheene wira okhaliherye emusi ahu ohitthekela malamulo awe. Nto Yehova aahaakhula mavekelo ahu ni naahikhala oolipa nnaamwi naakhanyereriwa vanceene”. Nto ela enooniherya wira Joseph ni anaawe khiyaatthuneya oturuka muupuwelelo aya voohimya sa omukokhorela waya Muluku.

Okathi Onoona Anyu Orerela OTURUKA MUUPUWELO ANYU

Okathi vakhaani nuumala Paasikha a 32 EC, muthiyana mmosa a oSiria muttetthe wa oFenicia aahimphwanya Yesu oryeene muttetthe wa oSidoni. Owo aanikhanyererya onvekela Yesu wira woomole munepa wootakhala waamuhasula mwanawe mwaamuthiyana. Wanipacerya Yesu khaamwaakhunle etthu muthiyana ole. Owo aahaahimeerya awiixutti awe wira: “Miyo nkirumiheliwe w’atthu akina ehikhanle atthu a Isarayeli, ari ntoko ipwittipwitthi sirimenle”. Nto okathi muthiyana ole aamunyesererya awe, Yesu aakhunle so: “Khivarenre owakha anamwane yolya, khwarihela axana àlapwa!”. Wooniheryaka ororomeleya wawe, muthiyana ole aakhunle so: “Ayo, Pwiya! Nto, axana àlapwa yawo annolya itathela simmora vamesa v’axipwiy’aya!” Nto Yesu ahaakhulela onvoniha mwanawe muthiyana ole.​—Math. 15:21-28.

Okathi waapanke awe eyo, Yesu aamutakiha Yehova yoowo okathi onoonawe oreerela ohinoovelela oturuka muupuwelelo awe. Mwa ntakiheryo, Muluku aahilakela waapwetexa aIsarayeli okathi yampanke aya mwaanyompe a eweero, masi aahiiwelela masu a Moise yoowo anvekenle wira otthikele ovarerya mwaha ole ni yoothanla awe eyo.​—Okhum. 32:7-14.

Murummwa Paulo aanimutakiha Yehova ni Yesu. Okathi omosa, Paulo aahoona wira khivaareerela omukuxa Yohani Marko arowaka mukwaha aya wa omisionaario, okhala wira Marko aahitoko omutthyawa Paulo ni Baarnaba okathi yaapaka aya mukwaha aya woopacerya wa omisionaario. Muhoolo mwaya Paulo aahoona wira Marko aahilokiherya makhalelo awe ni aarowa okhala mutthu ookhaliherya vanceene. Tivonto Paulo vaamuhimeeryale awe Timootheyo wira: “Mmukuxe Marko, mmurwane hothe, owo onowerya okikhaliherya mmutekoni mwaka”.​— 2 Tim. 4:11.

Ankhi hiyo niireke sai? Vakhala wira nnoomutakiha Tiithi ahu a wiirimu yoowo ori oomoriwa ikharari, oopixa murima, ni oophenta onaamukhala okathi onrowa ahu woonaka okhala wooreerela oturuka muupuwelelo ahu. Mwa ntakiheryo hiyo pooti oturuka moonelo ahu voohimya sa akina. Moovirikana ni Yehova wala Yesu, hiyo naatthu oohimalela. Vakhala wira awo yaanituruka muupuwelelo aya, nto khamunoona oreerela hiyo othokorerya makhalelo a khula mwaha wira noone vaaweryaneyaka oturuka muupuwelelo ahu?

Vanooreerela oturuka muupuwelo ahu okathi onithokorerya ahu soolakela sahu mmutekoni mwa Muluku. Anamunceene animusoma Biibiliya ni anirwa omuthukumanoni mwa iyaakha sinceene pooti woovelelaka obatiziwa. Wala anna akina pooti woovelelaka okela muteko wa opioneero, hata awo arineene makhalelo aniweemererya wunnuuherya muteko oninvarela aya Muluku mwa enamuna eyo. Woonasa wene pooti wiiraka munnimusuwela munna ohiniphavela waakhelela miritti mmulokoni. (1 Tim. 3:1) Niireke yookhala etthu emosa mwa iya siromoliwe osulu iwe eniwiirani? Yehova onnoolattulani wira mulawihe iparakha iyo sa orumeela wira moone oreera wawe murima. Nto xeeni ohiturukaka muupuwelelo anyu wira mphwanye mareeliho anikhumelela mwaha wa wiivahererya wira mmurumeele Yehova mwaakhaliheryaka atthu akina?

Ella olavulaka sa eparakha yaarina awe ya orumeela efiliyaali emosa ya Anamoona a Yehova wAfrika onihimya so: “Wanipacerya nkaakupali wira kanwerya oviriha iyaakha sinceene kirumeelaka oBetheli. Kaahikhalana yoolakela ya omurumeela Yehova ni murima aka wotheene, masi waanikisivela-tho vanceene okhala ni amusi aka owaani. Wanipacerya amusi aka yaanikinkhela vanceene! Masi mwaapara aka aakhalanaka aahikilipiherya wira kihitthikele owaani. Nuuviriha iyaakha 10 kiryeene oBetheli, vano kiniphavela ovikaniha okhala wenno mpakha vaniwerya aka, kirumeelaka vamosa ni anna ni arokora ni ovikaniha ovara muteko ovahiwe aka”.

Okathi ONIREERELA AYA TTHIRI OTURUKA MUUPWELO ANYU

Munnuupuwela okathi yoole Kayini vaapacenrye awe omukhalela nrima munnawe ni khuviheriwa mwaha wa isara? Muluku aahimuhimeerya mutthu ole ootakhala wira aamutthikela ophentiwa ni yena vakhala wira aamuttharuwa ele yootakhala yaaphavela awe opaka. Muluku aahimulakiherya Kayini wira oxintte etampi ele “yamwipithenle vamukhora”. Okathi ole Kayini anwerya oturuka muupuwelelo awe, masi owo khaaphavenle wiiwelela miruku sa Yehova. Mooriipiha murima, Kayini aahimwiiva munnawe, ni khukhala nawiive oopacerya!​— Maph. 4:2-8.

Muthokorerye-tho ntakiheryo nikina nle na Mwene Oziya. Wanipacerya owo aanipaka itthu sooloka ohoolo wa Yehova ni aanivikaniha omwiiwelela Muluku. Etthu yooriipiha murima okhala wira Oziya aahipahula makhalelo awe ooloka mwaha wa wiixinnuuha. Owo aahikela mpaani mwa Muluku orowa opaha erupani, nnaamwi ahaakhanle namukuttho. Niireke okathi anamukuttho yaamuloponle aya wira ohipake etthu ele yootakhala, owo aahituruka muupuwelelo awe? Nnaari. Biibiliya onihimya wira Oziya “ahinanariwa vanjene”, ni khaatthunne owiiwelela atthu ale. Nto eyo yaahimphwanyiha makuttula yaakumiheriwe ni Yehova.​— 2 Wah. 26:3-5, 16-20.

Tthiri wookhala okathi onitthuneya ahu vanceenexa oturuka muupuwelo ahu. Masi nookhala ntakiheryo na mahiku ahu yaala. Joaquim aabatiziwe mwaakha wa 1955, masi mwaakha wa 1978 aahikumihiwa mmulokoni. Iyaakha 20 muhoolo mwaya, owo aahooniherya wira aahittharuwa ni aahittikiheriwa mmulokoni mwa Anamoona a Yehova. Mutokweene mmosa aahimukoha wira xeeni muhalaka opisa ovekela ottikiheriwa mmulokoni. Joaquim aakhunle so: “Mwaha wa esara ni wiixinnuuha. Kinniikhupanyerya mwaha wa opisa waka otthikela mmulokoni. Okathi ole kiiraka kikumihiwe, kaanisuwela nlelo wira ele Anamoona a Yehova aniixuttiha aya yaari ekeekhai”. Owo aahaana tthiri oturuka muupuwelo awe ni ottharuwa ele yoohiloka yaapanke awe.

Hiyo pooti okhalanaka muxankiho onnivekela oturuka muupuwelo ni mweettelo ahu. Nto nihaana weemererya wiira siiso, moophavela ovikaniha wooniwaka okhala ooloka vamaithoni va Yehova.​— Esal. 34:9.