Ceeriyaa

Ceeriyaa kaaꞌiyoogee balee?

ASAY YOOTIYOOBAA

Higgiyan paqqadetida ceeriyaa kaassay ufayssiyaabanne qohennaba giidi daro asay qoppees. Lotoriyaa mala higgiyan paqqadettida issi issi ceere qommotuppe demmiyo miishshaa kawotettay asaa maaddiyaabaa oottanawu goꞌettees.

GEESHSHA MAXAAFAY YOOTIYOOBAA

Geeshsha Maxaafay ceeriyaabaa qonccissidi yootenna. SHin, ceeriyaa xeelliyaagan Xoossaa qofay aybakko bessiya amarida maarata yootees.

Ceeree hara ura xoonidi A miishshaa miyoogaa; hegee qassi Geeshsha Maxaafay ‘duretetta amo ubbaappe inttena naagite’ giidi zoriyoobaa phalqqees. (Luqaasa 12:15) Daroti ceeriyaa kaaꞌiyoy yaaretiyo gishshataassa. Ceeriyaa kaassiyaageeti duretettaa amoy issi uri daro miishshaa oyttidi kaaꞌanaadan denttettanaagaa eriyo gishshawu, daro miishshaa demmana danddayiyoogaa yootoosona, shin xoonana qaaday ay keenakko genttoosona. Ceeree issi uri duretanawu amottennaadan maaddiyoogaappe, sohuwaara miishshaa demmanawu amottanaadan oottees.

Ceeriyaa kaaꞌiyaageeti haratu miishshaa maanawu koyiyo gishshawu, hegee yaaretiyoogaa bessiyaaba. SHin Geeshsha Maxaafay, “Ooninne hara asa go77iyaabaa qoppoppe attin, harai atto issoinne bana go77iyaabaa qoppoppo” yaagees. (1 Qoronttoosa 10:24) Qassi Tammu Azazotuppe issoy, ‘Ne shooruwaayyo deꞌiyaabaa aybanne amottoppa’ yaagees. (Kessaabaa 20:17) Ceeriyaa kaaꞌiya uri xoonanawu qoppiyo wode, harati bantta miishshaa meetettana mala amottees.

Nuuni qaaday loꞌꞌobaa demmanaadan oottiyaaba giidi qoppennaadankka Geeshsha Maxaafay zorees. Beni Israaꞌeelan issi issi asati Xoossaa ammaniyoogaa aggidi, ‘qaada giyo eeqaayyo maaddaa giigissidosona.’ Eti “qaada giyo eeqaayyo” goynnidoogan Xoossay ufayttidee? CHiikka. Xoossay etawu, “Intte ta sinttan iitabaa oottideta; taani dosennabaakka doorideta” yaagiis.—Isiyaasa 65:11, 12.

Alamiyan issi issi heeran higgiyan paqqadettida ceeriyaappe demmiyo miishshaa timirttiyawu, deretettaa dichchawunne hegaadan maaddiya harabawu goꞌettiyoogee tuma. SHin hegee yaaretanaadaaninne ba xallaa siiqanaadan, qassi daafurennan coo issibaa demmanaadan minttettiya oosotun he miishshay beettiyo ogiyaa laammenna.

‘Ne shooruwaayyo deꞌiyaabaa aybanne amottoppa.’—Kessaabaa 20:17.

Issi uri ceeriyaa kaaꞌiyoogee A waati qohana danddayii?

GEESHSHA MAXAAFAY YOOTIYOOBAA

Geeshsha Maxaafay, “Duretanau koyiyaageeti paaciyaaninne piriyan geloosona; qassi daro asaa bashshaunne xayuwau goochchi efiya daro eeyyanne qohiya amuwan kunddoosona” yaagees. (1 Ximootiyoosa 6:9) Issi uri ceeriyaa kaaꞌanaadan denttettiyay miishshaa amuwaa; qassi Geeshsha Maxaafay nuussi mule deꞌenna mala yootiyo keehi qohiya eeshshatuppe issoy ‘miishshaa amottiyoogaa.’—Efisoona 5:3.

Ceeriyaa kaaꞌiyoogee daafurennan aquwaa shiishshanaadan denttettiyo gishshawu, Geeshsha Maxaafay “iitatetta ubbau pultto” giyo miishshaa siiquwaa yaa gujjees. Miishshaa amottiyoogee issi ura deꞌuwaa omooddidi, I keehi unꞌꞌettanaadaaninne Xoossan kaseegaadan ammanettennaadan oottana danddayees. Geeshsha Maxaafay yootiyoogaadan, miishshaa siiqiya asati “daro metuwan banttana qohidosona.”—1 Ximootiyoosa 6:10.

Miishshaa siiqiya asi bawu deꞌiyaabay gidana geenna gishshawu, ubbatoo asatettaaban bawu issibi paccidabadan qoppidi ufayssa xayees. “Bira dosiya uraassi biri gidi erenna; duretanau siiqiya uraikka miishshaa kaalli erenna.”—Eranchchaa 5:10.

Ceeriyaa kaaꞌiyoogaa doommida daro miiloone asatuyyo hegee amale gidiis. He amalee kumetta saꞌaa gakkida meto; ubba xinaateti bessiyoogaadan, Amarkka xallan ceeriyaa kaassay amale gidido miilooniyan qoodettiyaageeti deꞌoosona.

Issi leemisoy, “Koiroora eesuwan shiiqida aqoi wurssettan anjjettenna” yaagees. (Leemiso 20:21) Ceeriyaa kaassay amale gididoogeeti acotoosonanne kasaaroosona; qassi bantta oosuwaappe, aqo deꞌuwaappenne laggetuppe mela attoosona. Nuuni Geeshsha Maxaafay yootiyoogaadan oottiyo wode, ceeree kaalettiyo azzanuwaappenne deꞌuwan gakkiya hara qohuwaappe shemppoos.

“Duretanau koyiyaageeti paaciyaaninne piriyan geloosona; qassi daro asaa bashshaunne xayuwau goochchi efiya daro eeyyanne qohiya amuwan kunddoosona.”—1 Ximootiyoosa 6:9.