Bolla Gididi Heemmiyaagaa Dabddaabbiyaa

Yihoowa Siiqiyaagoo:

Yesuusi: “Intte tumatettaakka erana; qassi tumatettai inttena ailletettaappe kessana” yaagiis. (Yohaannisa 8:32) He qaalay ay keena minttettiyaagee! Ee, tumatettay baynna hanotay darido ha waayssiya ‘wurssetta gallassankka,’ tumaa eriyoogee danddayettiyaaba. (2 Ximootiyoosa 3:1) Xoossaa qaalan deꞌiya tumaa neeni erido koyro gallassaa hassayay? Hegee ay keena keehippe ufayssidabee!

Tumaa xeelliyaagan tumu eraa demmiyoogeenne hegaabaa ubbatoo haratuyyo yootiyoogee keehippe koshshiyaaba gidikkonne, nu huuphe nuunikka tumaara moggidi deꞌana bessees. Hegaadan oottanau, nuuni Xoossaa siiquwan deꞌana koshshees. Hegee ay gujjii? Yesuusi hayqqanaappe kase qammi yootidobay he oyshaa zaarees. I ammanettida ba kiittidoogeetuyyo: “Taani ta Aawaa azazuwaa naagada a siiquwan de7idoogaadan, inttekka ta azazuwaa naagikko, ta siiquwan de7ana” yaagiis.—Yohaannisa 15:10.

Yesuusi ba Aawaa azazuwaa naagidi Xoossaa siiquwan deꞌidoogaa akeeka. Ha wodiyan nuuppekka hegaa mala hanotay koyettees. Xoossaa siiquwan deꞌanau ubba galla nu deꞌuwan tumaara moggidi deꞌana koshshees. He galla qammi Yesuusi: “Intte hegaa eridi oottiyaabaa gidikko anjjettidaageeta” yaagiis.—Yohaannisa 13:17.

Neeni tumaara ubbatoo moggada deꞌanaunne ‘merinaa deꞌuwaa naagaydda, Xoossaa siiquwan’ deꞌanau ha maxaafay nena maaddanaadan wozanappe amottoos.—Yihudaa 21.