Masqqala

Abrahaami banaaranne Yisaaqaara biida ashkkaratuppe shaahettanaappe kase eta, “Ha hariyaara hagan de7ishshite; taaninne ta na7ai yaa biidi Xoossaassi goinnidi, inttekko simmana” yaagiis. (Doo. 22:5) Abrahaami woygana koyidee? I Yisaaqa yarshshanaagaa eriiddi, aara etakko simmana giidi etawu wordduwaa yootidee? CHii. Abrahaami qoppidobay aybakko nuuni akeekanawu maaddiyaabaa Geeshsha Maxaafay yootees. (Ibr. 11:19) “Abrahaami Xoossai Yisaaqa harai atto, haiquwaappekka pattanau danddayiyoogaa eriis.” Ee, i hayqqidaageeti denddanaagaa ammanees. Inne Saara keehi cimikkokka, eti yelanaadan Yihooway oottidoogaa Abrahaami erees. (Ibr. 11:11, 12, 18) Yihooway ubbabaa danddayiyoogaa Abrahaami akeekiis. He gallassi aybi hananaakko i eribeenna; shin koshshiyaaba gidikko, Xoossay gelido qaala ubbay polettanaadan Yihooway Yisaaqa hayquwaappe denttanaagaa ammaniis. Abrahaami ‘ammaniya ubbawu aawa’ geetettidoogee bessiyaaba!—Roo. 4:11. w16.02 1:3, 13

Xoossay Saaꞌooli kawo gidanaadan tiyikkokka, guyyeppe i azazettennan ixxin Yihooway a aggibayiis. (1 Sam. 15:17-23) Xoossay Saaꞌoola sohuwaara araataappe wottibeenna gishshawu, a iita eeshshaappe denddidaagan i haariyo asaynne ayyo mata gidida asati qohettidosona. “GODAA kawotaa araatan” uttida kawoy iitabaa oottiyo gishshawu, asay Xoossaassi ammanettanawu metootiis. (1 Odi. 29:23) SHin, Saaꞌoola naꞌay Yonaataani Yihoowayyo ammanettiyoogaa bessiis. Nuunikka, Yonaataanaagaadan, danddayettiyaaba gidikko nu biittaa haariyaageetussi azazettiyoogan Yihoowawu ammanettana danddayoos. Leemisuwawu, sunttati bantta aawatettaa maara goꞌettennaageeta gidana danddayoosona; gidikkokka, nuuni “deriyaa heemmiyaageetuyyo” azazettiyo gishshawu eta maataa bonchoos. (Roo. 13:1, 2) Qassi, nuuni ubbay Yihooway sunttidoogeeta bonchiyoogan ayyo ammanettana danddayoos.—1 Qor. 11:3; Ibr. 13: 17. w16.02 3:5, 6, 8

Geeshsha Maxaafay yelagata gujjin, Yihoowa asay ‘eeno giidi’ awu haggaazanaagaa yootees. Hegaa gishshawu, xammaqettanawu qoppiya uri hegaa i wozanappe koyiyaakkonne akeekana bessees. Neeni hegaadan oottanawu ne huuphiyaa qorana bessees. Aybissi? Ne hanotay dumma gidana danddayiyo gishshataassa. Leemisuwawu, neeni tumaa tamaarada diccennan aggakka. Ne laggetuppe amaridaageetanne ne ishantta woy michontta gujjin, daroti xammaqettishin amarida layttawu beꞌennan aggakka. Yaatikko, neeni naageettana bessiyaabay aybee? Yelagati ubbay gasttiyo wode xammaqettiyaabadan neeni qoppenna mala naagetta. Yihooway giigissido xinqqatiyaa neeni bessiyaagaadan xeelliyaakkonne eranawu ay oottana danddayay? Xammaqettiyoogee keehi koshshiyoy aybissakko ubbatoo qoppa. w16.03 1:11, 12

Nuuni he oosuwaa oottana danddayiyoy ‘issoi issuwaara gayttidabadan’ Kiristtaane gubaaꞌiyan maayettidi hasheti oottiyoogaa xallaana. (Efi. 4:16) Xoossaa Kawotettaa mishiraachuwaa nuuyyo danddayettida keenan daro asawu yootanawu, he oosuwaa oottanawu darajjayettana bessees. Hegaa gishshawu, kaaletoy nuussi imettees. Kumetta saꞌan deꞌiya gubaaꞌetu baggaara imettiya kaaletoy nuna hegawu maaddees. Haggaazuwawu shiiqiyo shiiquwaappe simmin, Kawotettaa mishiraachuwaa asa ubbawu yootanawu boos. Nu doonaaninne Geeshsha Maxaafaa qofay deꞌiyo, miilooniyan qoodettiya xuufeta goꞌettidi mishiraachuwaa yootoos. Dumma zamachan sabbakanaadan odettiya kaaletuwaa kaallay? Kaallikko, Ajjuutaa 14:6n odettida ‘bolla saluwan paalliya kiitanchay’ odiyoobaa miilooniyan qoodettiya haratuura issippe awaajjaasa. w16.03 3:4, 5

Ooratta alamiyaa deꞌuwawu nuussi kaaletoy imettiyo maxaafati dooyettanaagaa Geeshsha Maxaafay qonccissees. Hayquwaappe denddiyaageeta gujjin, asay ubbay he maxaafata xannaꞌidi, Xoossay etappe koyiyoobaa akeekana. He maxaafati nuuni Yihoowa qofaa loytti akeekanaadan maaddanaagee erettidaagaa. Saꞌay Gannate gidiyo wode deꞌana asay Xoossaa ayyaanaa kaaletuwan xaafettida a Qaalaanne he maxaafatun qonccanabaa loytti akeekidi, hara asaa siiqanaageenne bonchanaagee qoncce. (Isi. 26:9) Kawoy Yesuus Kiristtoosi kaalettin nuuni he wode tamaaranabaa qoppa! ‘Maxaafatun xaafetti uttidaagaadan’ oottiyaageeti merinaa deꞌuwaa demmana. Xoossawu ammanettidi wurssetta paaciyaa xooniyaageetu sunttay merinawu xayennaadan Yihooway ‘deꞌo maxaafan’ xaafana. Nu sunttaykka hegaadan xaafettana danddayees! w16.03 4:19, 20

Ayyaanaaban kaymida cimati ishantti bantta layttawu haniya oosuwaa naatettaappe doommidi gubaaꞌiyan oottanaadan immiyoogan eta loohissiyoogee keehi koshshiyoogaa yootoosona. Hegaadan naatettan loohissiyoogaa doommiyoogee naati panttatettaa layttan eta qofay shaahettanaadan oottiya darobay deꞌishinkka, ubbatoo ayyaanaabaa halchanaadan maaddees. (Maz. 71:17) Issi cimay tamaariya uri haggaazanawu koyanaadan oottanabaa xallaa ayyo yootiyoogee gidenna; hegaadan oottiyoogee keehi koshshiyoy aybissakkokka yootana koshshees. Hegee koshshiyo gaasuwaa yootiyoogan, cimati Gita Asttamaariyaa Yesuusa leemisuwaa kaalloosona. Leemisuwawu, Yesuusi i kiittidoogeeti asaa erissiyo ashkkara oottanaadan yootanaappe kase, eti ayssi azazettana koshshiyaakko odiis. I, “Maata ubbai saluwaaninne sa7an taayyo imettiis” yaagiis. Gujjidikka, “Hegaa gishshau, intte biidi, asa ubbaa tana kaalliyaageeta oottite” yaagiis.”— Maa. 28:18, 19. w15 4/15 2:5, 6

Roomen deꞌiya Kiristtaanetussi hanotay keehi iita. He wode Roometi Kiristtoosa kaalliyaageeti 64 M.Ln katamaa xuuggidosona giidi eta mootoosona. Qassi eta yedettoosona. Kiitettida PHawuloosi Roomen naaꞌꞌanttuwaa qashettidoy keehi wayssiya he wodiyaana gidennan aggenna. Hara Kiristtaaneti a maaddanee? PHawuloosa koyro hegee hirggissennan aggenna; ayssi giikko, i Ximootiyoosayyo, “Koiro tana mootiyo wode, ubbaikka aggi bayidoogaappe attin, tana ooninne maaddibeenna” yaagidi xaafiis. (2 Xim. 4:16) Gidikkokka, PHawuloosi bana maaddiya uri deꞌiyoogaa akeekiis. I bana gakkiyaanne sinttaappe gakkana danddayiya metuwaaninne paaciyan Yihooway bawu wolqqaa immanaagaa ammanettanaadan oottiis. PHawuloosi hegaa ammanettido gishshawu, ‘Goday tana iitabaa ubbaappe ashshana’ yaagiis. (2 Xim. 4:18) Ee, asay maaddenna wodekka, Yihoowaynne a Naꞌay maaddiyoogee sirissennaagaa PHawuloosi tamaariis! w15 4/15 4:1-3

Yesuusi yelettiyo wode, he yelettida naꞌay diccidi yaana geetettida Mase gidanaagaa Seexaanay erees. Naꞌa woriyoogee keehi meqettaa iita gidiyoobaa giidi Seexaanay qoppanee? CHii, Seexaanay aybi likkee woy aybi balee giidi qoppenna. I sohuwaara guutta naꞌaa Yesuusa woranawu maliis. Waatidi? Xoolinttiyaa paydiyaageeti “Aihuda kawo gidanau yelettida” naꞌaabaa oychido wode, Kawuwaa Heeroodisi hanqquwaa suullidi he naꞌaa woranawu murttiis. (Maa. 2:1-3, 13) I yaatanawu, Beetaliheemaaninne hegaa heeran deꞌiya naaꞌꞌu laytta attuma naatanne hegaappe guuxxiya attuma naata ubbaa woranaadan azaziis. (Maa. 2:13-18) Hegaadan busakkidi woriyoogaappe Yesuusi attiis; shin hegee nu morkkiyaa Seexaanaabaa ay qonccissii? Dabloosa asaa deꞌoy qofissennaagee erettidaagaa. I naatussi qarettenna. Seexaanay tumukka ‘gudiya gaammo.’ (1 PHe. 5:8) I meqettaa iita gidiyoogaa mule xaasayada xeelloppa! w15 5/15 1:10, 12, 13

Nuuni beꞌibeennabaa qoppana danddayiyoogee Xoossaa imota. Hegee nuuni loꞌꞌobaa halchanaadaaninne loꞌꞌobaa hidootan naaganaadan maaddees. Yihooway sinttanaabaa kasetidi beꞌana danddayees; qassi Geeshsha Maxaafan darotoo i sinttappe hananabaa kasetidi nuussi yootees. Nuuni sinttappe hananabaa qoppana danddayoos. Nuuni beettennabaa akeekana danddayiyoogee ammanuwan minnanaadan maaddees. (2 Qor. 4:18) Haanna ba naꞌay Sameeli gayttiyo dunkkaaniyan haggaazanaadan a efaana gallassabaa wotta denttada qoppiyo wode, coo mela aymottabeykku. Hegee a oottanawu murttidoba; a murttidoogee ba halchuwaa ubbatoo qoppanaadan maaddiis. (1 Sam. 1:22) Nuuni Xoossay oottanawu qaalaa gelidobaa qoppikko, polettennan attennabaa qoppoos. (2 PHe. 1:19-21) Beni deꞌida ammanettida daro asati Xoossay immana giidobaa qoppidoogee erettidaagaa. w15 5/15 3:1-3

Xoossaabaa aynne qoppennan keehi duretanawu qoppiyoogee qohiyaaba. Issi uri ba deꞌuwan Yihoowa ubbatoo kaseyennan aggidi bawu daro miishshaa shiishshikko, he uri eeyya gidiyoogaa Yesuusi yootiis. He uri ‘Xoossaa matan dure gidenna.’ (Luq. 12:16-21) Nuuni a ufayssiyaabaa oottiyo wode Yihooway ufayttees. (Lee. 27:11) Nuuni “saluwan miishsha” dagayido gishshawu Yihooway nuna nashshiyoogan keehi ufayttoos! (Maa. 6:20) Nuuni Yihoowaara dabbotiyoogee aybippenne aadhiya alꞌꞌo aqo. ‘Saꞌan miishsha dagayanawu’ nuuni keehi baaxetikko ay keena hirggiyaakko qoppa. (Maa. 6:19) “Ha sa7aa de7uwau hirggiyoogeenne duretetta siiqiyoogee” issi uri Xoossaa Kawotettaabaa siyido qaalaa cuullana danddayiyoogaa Yesuusi leemisuwan yootiis.—Maa. 13:18, 19, 22. w15 5/15 4:15, 16

Xoossay immido wolqqan Yesuusi keehi maalaalissiya darobaa oottiis. I inchirichaa xallappe gidennan, hargge ubbaappenne saho ubbaappekka asaa pattiis. Yesuusi qarettidi hegaa malabaa oottanawu, bollaa qommuwaa issuwaagaa harawu immana koshshibeenna. I sahettida bollaa qommuwaa pattiis! I asaa sohuwaara pattiis; ubba issi issitoo haahuwan deꞌiyaageetakka pattiis. (Yoh. 4:46-54) Ha maalaalissiyaabati ay qonccissiyoonaa? Hegee saluwan Kawo gididi haariiddi deꞌiya Yesuusawu asaa merinawu pattanawu wolqqa xalla gidennan, koshshaykka deꞌiyoogaa bessees. Yesuusi asaa waati oyqqidaakko eriyoogee Geeshsha Maxaafay, “Hiyyeesatussinne manqqotussi i qarettees” yaagidi kaseti yootidobay ooratta alamiyan polettanaagaa nuuni ammanettanaadan oottees. (Maz. 72:13) Ee, he wode Yesuusi waayettiyaageeta ubbaa wozanappe maaddana. w15 6/15 2:6

Yesuusi tamaarissido woosaa daro asay muleera hassayees. Nuuni sooppe soo biidi haggaaziiddi Xoossaa Kawotettay mata wode saꞌan ufayssiya darobaa oottana, tumuppe deꞌiya haaro gidiyoogaa asay akeekanaadan maaddanawu darotoo he woosaabaa yootoos. Qassi Xoossaassi sunttay deꞌiyoogaanne nuuni he sunttaa geeshsha ootti xeellana bessiyoogaa yootanawu, “ne geeshsha sunttai anjjetto” yaagiyaagaa goꞌettoos. (Maa. 6:9) Yesuusi banttana Kiristtaane giya darotuugaadan nuuni woossiyo wode ubbatoo he woosan deꞌiya qofa ubbaa zaarettanaadan koyidee? CHii koyibeenna. Yesuusi he woosaa tamaarissanaappe kase, “Intte woossiyo wode, . . . mela [issibaa zaari zaaridi] biddoppite” yaagiis. (Maa. 6:7) Guyyeppe, i he woosaa zaarettidi tamaarissikkokka, kaseegaappe dummatiya qaalaa goꞌettiis. (Luq. 11:1-4) Hegaa gishshawu, nuuni ay oychana koshshiyaakkonne awugaa kaseyanaakko akeekanaadan maaddiya woosaa Yesuusi tamaarissiis. w15 6/15 4:1, 2

Nuuni paaciyaa eqettanaadan minttettananne maaddana danddayiya ba geeshsha ayyaanaa Yihooway nuussi immees. Qassi koshshennaban daro wodiyaa, daro miishshaanne daro wolqqaa wurssiyoogaa mala, nuuni naagettana bessiyo hanotaabaa Xoossay ba Qaalaa baggaaranne gubaaꞌiyaa baggaara kasetidi nuna zorees. Espeninne Yaana kase aqinye gididi haggaazidaageeti etayyo naaꞌꞌu naati deꞌees. Espeni hagaadan giis: “Nuuni Xoossaa oosuwaa kaseegaadan daro saatiyaa oottana danddayenna gishshawu, paaciyan gelennaadan darotoo Yihoowa woossoos. Nuuni ayyaanaaban minni deꞌanaadaaninne mishettidi haggaazanaadan Yihooway nuna maaddana mala woossoos.” Ha wodiyan asaa paacciya harabay pokkobaa beꞌiyoogaa. Issoti issoti iitabaa qoppiyoogan he paaciyan gelidosona. Nu ishanttuppe daroti hegaa eqettidoogaadan, nuunikka eqettana danddayoos.—1 Qor. 10:13. w15 6/15 5:15, 16

Worddo haymaanootiyaa dirijjiteti xayi simmin aybi hananee? Hegee nu wozanan deꞌiyaabay qonccanaadan oottana. Asaappe dariya baggay ‘deretuuninne shuchan’ leemisettida asa dirijjitiyan qosetti attanawu koyana. SHin Xoossaa asay Yihooway giigissido qosetti attiyo soho malabaakko baqatana. Koyro xeetu layttan, guuttaa takki giido wodee daro Ayhudati Kiristtaane gidido wode gidenna. He wodee Kiristtaane gididaageeti azazettiyoogaa bessiyo wode. Hegaadan, iita waayiyaa wode guuttaa takki giyo wodiyan daro asay Kiristtaane gidees giidi qoppana koshshenna. SHin he wode tumu Kiristtaaneti ubbay Yihoowa siiqiyoogaanne Kiristtoosa ishantta maaddiyoogaa bessana danddayiyo hanotay merettana.—Maa. 25:34-40. w15 7/15 2:7

Ne diccido hanotay woy heeray ne biittawu woy ne heerawu ammanettanaadan oottidee? Hegaa mala qofaa haꞌꞌikka aggabeykkii? Asay ba zariyan ceeqettiyoogee Kiristtaaneti harata iita ayfiyan xeellanaadan oottana bessenna. SHin hara wogan diccida, hara qaalaa haasayiya, hara zariyaa, woy hara sheeshshaa asaabaa bessennabaa neeni qoppiyoogaa akeekikko waatuutee? Yaatikko, zariyan ceeqettiyoogaanne hara zariyaa ixxiyoogaa Yihooway waati xeelliyaakko wotta denttada qoppiyoogee loꞌꞌo. He qofaa loytta pilgga. Yaatada he yohuwaa Yihoowagaadan xeellanawu nena maaddana mala a woossa. (Roo. 12:2) Yihoowa asay ubbay etaara oottiyaageetuppe, etaara tamaariyaageetuppe, shoorotuppe, dabbotuppe, woy hara asatuppe dummatanaadan oottiyaabay merettiyoogee attenna gishshawu sohuwaara hegaadan oottana koshshees. Gidoppe attin, nuuni dummatana bessees! w15 7/15 3:14, 15

Yihooway nu woosaa siyees; qassi ooninne akeekenna wodekka nu hanotaa akeekees. I nu woosaa zaariyoogee aggennan nuna siiqiyoogaa loytti qonccissees. Xoossaa Qaalan odettida woosaappe nuuni darobaa tamaarana danddayoos. Hegaa gishshawu, issi issitoo hegaa mala woosaa so asaa goynuwaa wode xannaꞌiyoogan keehi maadettana danddayoos. Beni Yihoowa ashkkarati banttana wozanappe qofissidabaa waatidi Xoossawu yootidaakko wotti denttidi qoppiyoogee, nuuni kaseegaappe loyttidi woossanaadan maaddana danddayees. Leemisuwawu, Yoonaasi gita moliyaa uluwan deꞌiyo wode zilꞌꞌettidi woossido woosaa qoppa. (Yona. 1:17–2:10) Beeta maqidasiyaa anjjissiyo wode Solomoni Yihoowa wozanappe woossido woosaa hassaya. (1 Kaw. 8:22-53) Yesuusi tamaarissido, nuna maaddiya woosaabaa wotta dentta qoppa. (Maa. 6:9-13) Ubbaappe aaruwan, ubbatoo ‘Xoossaa woossa.’ Yaatikko, ‘asa eratettaa ubbaappe aadhiya Xoossaa sarotettay ne wozanaanne ne qofaa naagana.’—Pili. 4:6, 7. w15 8/15 1:11, 12

Nuuni ooratta alamiyan saꞌaa loyttiyoogan, hayquwaappe denddidaageeta tamaarissiyoogaaninne Yihooway asaayyo halchidobaa oottiyoogan ayyo haarettanaagee ufayssiyaaba. Gidoppe attin, nuuni dosennabaa oottanaadan azazoy imettikko shin? Nuussi imettidabaa ufayttidi polanawu danddayettida ubbabaa oottiyoogan he azazuwawu azazettanee? Nu giddoppe daroti ee giidi zaarana! Yaatin, ha wodiyan Xoossay azaziyoobaa ubbatoo poliyoo? Hegaadan oottikko, Yihoowa haaruwan merinawu deꞌanawu giigettoos. Yihooway ha wodiyan azaziyoobawu azazettiyoogaa xallan gidennan, hashetidi ufayttidi oottiyoogankka ooratta alamiyaa deꞌuwawu giigettana danddayoos. Nuuyyo ooratta oosoy imettiyo wode ufayttidi oottiyoogan sintta xeera gididi kaalettiyaageetuura ha wodiyan hashetikko, ooratta alamiyankka hegaadan oottana danddayoos. w15 8/15 3:6, 7

Iita laggetettay Solomoni Yihoowayyo goynniyoogaa agganaadan oottiis. (1 Kaw. 11:1-6) Yihoowa siiqenna uraa ekkanawu woy gelanawu koyiya Kiristtaanetussi hegee wolqqaama seera! Yihoowa Markka gidenna aqo laggetuppe issoy guyyeppe Yihoowawu goynniyoogaa doommikko shin? Geeshsha Maxaafay, “Maccaasatoo, intte azinatuppe Xoossaa qaalau azazettenna issooti issooti de7ikkokka, intte palamettennan, eti . . . ammanana mala, etau haarettite” yaagees. (1 PHe. 3:1) Ha qofay Kiristtaane machotussi odettidaba gidikkonne, Yihoowawu goynnenna macheera deꞌiiddi Yihoowa Markka gidida azinawukka hanees. Geeshsha Maxaafay loꞌꞌo aqo lagge gidanaadaaninne Xoossay aqo deꞌuwawu kessido maaraadan deꞌanaadan zorees. Azinay woy machiyaa Xoossay banttappe koyiyoobaa polanawu giidi laamettiyoogaa beꞌidi, ammanenna daro aqo laggeti Yihoowa Markka gididosona. w15 8/15 4:15, 16

Issi issi harggiyawu xalee erettennan aggana danddayees. Yaatiyo gishshawu, xallees geetettiyaaba gidikkonne, hegawu naqaashi baynna akkamuwaappe naagettiyoogee loꞌꞌo. PHawuloosi, “Asai ubbai intte ashkketettaa [bessiyaabaa qoppiyoogaa] ero” yaagiis. (Pili. 4:5) Bessiyaabaa qoppiyoogee nuuni akkamuwaaban daro wodiyaa wurssiyoogaappe ayyaanaabaa kaseyanaadan maaddees. Nuna qofissiya waannabay payyatettaa naagiyoogaa gidikko, nubaa xallaa qoppiyaageeta gidoos. (Pili. 2:4) Keehi koshshiyaabay ayyaanaabaa; qassi payyatettaara gayttidaagan nuuni qoppiyoobay bessiyaaba gidana koshshees. (Pili. 1:10) Payyatettaa naagiyoogaa malaban, nuuni ubbay nu huuphen kuuyananne hegaa gaasuwan gakkiyaabaa danddayana koshshees. w15 9/15 2:8, 10

Yihooway ‘tumaa Xoossaa.’ (Maz. 31:5) I ba naata siiqees; qassi eta deꞌo ubban, ubba qassi goynuwan eta kaalettanawu ba tumay pooꞌanaadan oottiyoogan ufayttees. Yihooway nuuyyo qonccissido tumay aybee, qassi hegee i nuna siiqiyoogaa waati bessii? Ubbaappe koyruwan, Yihooway babaa tumaa qonccissees. I ba sunttaa nuuyyo qonccissees. He sunttay hara ay sunttaappekka aaruwan Geeshsha Maxaafan deꞌees. Yaatiyoogan, Yihooway nuukko shiiqees; hegee nuuni a eranaadan oottees. (Yaaq. 4:8) Yihooway i ay mala Xoossakko ba eeshshaakka qonccissees. Saloynne saꞌay a wolqqaanne aadhida eratettaa bessikkokka, Yihooway Geeshsha Maxaafankka ba suure pirddaanne ubba qassi zawi baynna ba siiquwaa qonccissees. (Roo. 1:20) Yihooway minonne aadhida erancha aawaa mala xalla gidennan, i siiqiyaanne loꞌꞌo aawaa mala; hegee a naati aara dabbotaa minttanawu metootennaadan maaddees. w15 9/15 4:8, 9

Daro asati eti oottiyoobay Xoossaa qofissenna giidi qoppoosona. Eti bantta bolli gakkiyaabay Xoossaa darin qofissennabadan xeelloosona. Hidaare 2013n keehi wolqqaama gotee Pilippinsse biittan daro heeraa keehi qohi simmin, issi gita katamaa kantibay, “Xoossay harasaa beennan waayi aggana” yaagiis. Harati qassi eti oottiyoobaa Xoossay beꞌana danddayenna giidi qoppoosona. (Isi. 26:10, 11; 3 Yoh. 11) Eti kiitettida PHawuloosi, ‘Xoossaa eranawu dosennan ixxidosona’ yaagido asatu mala. Hegaa mala asatun “geellatettai, iitatettai, yiiqeenne iita hanotai kumiis.” (Roo. 1:28,29) Nuuni shin? Qommoora denttido asatuugaappe dumma hanotan, nuuni oottiyo ubbabaa Yihooway beꞌiyoogaa eroos. SHin i nuussi qoppiyoogaanne ba kushiyan nuna maaddiyoogaakka akeekiyoo? w15 10/15 1:1-3

Mishiraachuwaa asawu yootiyoogee nu ammanuwaa bessiyo keehi loꞌꞌo oge. Ayssi giikko, nuuni mishiraachuwaa yootiyo wode, wurssettay matattidoogaanne hegee ‘gamꞌꞌennaagaa’ ammaniyoogaa bessoos. (Imb. 2:3) Nuuni ay keena minnidi haggaazanawu koyiyaakko qoriyoogee nu ammanoy minokkonne shaakki eranaadan maaddees. Nuussi danddayettida ubbabaa oottanawu, ubba qassi kaseegaappe aaruwan haggaazanawu baaxetiyoo? (2 Qor. 13:5) Ee, ‘attanawu markkattiyoogee’ nu wozanan ammaniyoogaa bessiyaaba. (Roo. 10:10) Galla galla deꞌuwan metiyaabaa xoonanawu baaxetiyo wodekka nu ammanuwaa bessana danddayoos. Nuna sahoy, hidootaa qanxxiyoogee, unꞌꞌettiyoogee, hiyyeesatettay woy hara metoy baaxeyiyaaba gidikkonne, “koshshiyo wode” Yihoowaynne a Naꞌay nuna maaddanaagaa ammanettoos. (Ibr. 4:16) Nuuni Yihooway nuna maaddanaadan woossiyo wode, an ammaniyoogaa bessoos. w15 10/15 2:12-14

Neeni Geeshsha Maxaafaa goꞌettennaadan digettadasa giidi qoppoos, gidikkokka, neeni dosiyo xiqiseta, Kawotettaa mazamuretanne ne qofan wottido hegaa malabaa wotta dentta qoppennaadan diggiyaabi baawa. (Oos. 16:25) Xoossaa ayyaanay qassi neeni kase tamaarido loꞌꞌobaa hassayanaadan maaddana danddayees. Hegaa gishshawu, saaminttan saaminttan nabbabiyo Geeshsha Maxaafaa nibaabiyaa nabbabanawunne wotta dentta qoppanawu amarida gallassaa bazzana danddayaasa. Qassi hara gallassaa, Yesuusi tamaarissidobaanne oottidobaa wotta dentta qoppanawu bazzana danddayaasa. Yesuusa deꞌuwaabaanne haggaazuwaabaa yootiya Wonggeleti Geeshsha Maxaafan keehi erettiya maxaafatuppe amaridaageeta gidiyoogaa neeni maayettiyoogee tuma. (Roo. 10:17; Ibr. 12:2; 1 PHe. 2:21) Yesuusi saꞌan oottidobaanne a deꞌuwaabaa kasiyaa kaallidi yootiya xuufee Xoossaa asawu giigiis. Issi mala taarikiyaa yootiya, Wonggeletun deꞌiya xiqiseta ubba shemppuwan akeekan nabbabiyoogeenne wotti dentti qoppiyoogee keehi maaddees.—Yoh. 14:6. w15 10/15 4:11, 12

Yesuusi siiqiyaanne ammanettiya lagge. Beni wode godi ba qofaanne bawu siyettiyaabaa ba ashkkaratussi yootenna. SHin Yesuusi i kiittido ammanettidaageetussi godakka laggekka gidiyoogaa bessiis. I etaara wodiyaa aattees, bawu siyettiyaabaa etawu yootees, qassi eti bantta wozanan deꞌiyaabaa yootiyo wode loytti ezggees. (Mar. 6:30-32) Siiquwan hegaadan haasayiyoogee Yesuusi kiittidoogeeti aara dabbotaa minttanaadaaninne sinttappe Xoossawu haggaaziyo wode oottanabawu giigettanaadan maaddiis. Yesuusi baayyo lagge gidida i siiqiyo erissiyo ashkkarati Yihoowawu mishettidi haggaaziyoogan demmiyo ufayssaa beꞌanaadan koyiis. Hegaa gishshawu, ayyaanaaban eti mishettidi oottanaadan amottiis. Yesuusi eti minnidi asaa erissiyo ashkkara oottanaadan koyiis! Qassi i eta he oosuwan maaddanaagaa ba erissiyo ashkkaratussi siiquwan yootiis.—Maa. 28:19, 20. w15 11/15 2:3, 5

Siiqoy Xoossaa Yihoowa waanna eeshsha. (1 Yoh. 4:16) I koyro medhidoy saluwan zawi baynna layttaa aara deꞌidi, Xoossay siiquwan oottiyo ogiyaa tamaarida Yesuusa. (Qol. 1:15) Yesuusi saꞌan deꞌido deꞌuwaa gujjin, ba deꞌido wode ubban Yihooway keehi siiqiya Xoossa gidiyoogaa loytti akeekiyoogaa bessiis; qassi aagaadan siiqees. Hegaa gishshawu, Yihoowaynne Yesuusi merinawu siiquwan haariyoogaa ammanettana danddayoos. Higgiyaa giddon ubbaappe aadhiya azazoy awugaakko Yesuusa oychin, i hagaadan giis: “‘Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa’ yaagiis. Hegee ubbaappe gitatiya azazonne qassi ubbaappe aadhdhiya azazo. Qassi naa77antto azazoikka a mala; hegee, ‘Neeni ne shooruwaa ne huuphedan siiqa’ giyaagaa.” (Maa. 22:37-39) Yihoowa siiqiyoogaappe kaalliyay shooruwaa siiqiyoogaa gidiyoogaa Yesuusi yootidoogaa akeeka. Nuuni ubba asaa siiqiyoogee keehi koshshiyoogaa hegee qonccissees. w15 11/15 4:1-3

Hanotay laamettido wode, Xoossay asaara Ibraawetto xallan haasayibeenna. Baabiloona omooduwaappe simmin, Aramayke qaalay Xoossaa asaappe amaridaageeti ubbatoo haasayiyo qaala gidiis. Yihooway hananabaa yootiya Daaneelinne Ermmaasi, qassi qeesiyaa Iziri eti xaafido Geeshsha Maxaafaa kifiletuppe amaridaageeta Aramayke qaalan xaafanaadan oottidoy hegaassa gidennan aggenna. Guyyeppe, Gita Iskkinddiri he wode alamiyaappe dariya baggaa xoonin, daro asay haasayiyo Koyne giyo Giriikettoy ubba biittan haasayiyo qaala gidiis. Daro Ayhudati he qaalaa haasayiyoogaa doommido gishshawu, Ibraawetto Geeshsha Maxaafay Giriiketto qaalan birshshettiis. Ha birshshettay Septujentte geetettiis; qassi 72u asati hegaa birshshidabadan qofettees. Koyro birshshettida Geeshsha Maxaafay hegaa; hegee keehi maaddiya birshshettatuppe issuwaa. He asatuppe issoti issoti issi qaalaa hara qaalan birshshidosona, shin harati hegaadan oottibookkona. Gidikkokka, Giriikettuwaa haasayiya Ayhudatikka, guyyeppe qassi Kiristtaanetikka Septujentte birshshettaa Xoossaa Qaalaadan xeellidosona. w15 12/15 1:4-6

Yaaqoobi yootido leemisuwaa qofay paydo 6n qoncciis. “Inxxarssaikka tama.” Inxxarssay nuuni haasayiyo haasayaa imotaa leemiso. Tamaadan, nuuni haasayiyo haasayay keehi qohana danddayees. Geeshsha Maxaafay, “Neeni haasayidoogee nena wottees woikko worees” yaagees. (Lee. 18:21) Nuuni tamay qohana danddayiyo gishshawu yayyidi goꞌettennan aggennaagaadan, harata qohana danddayees giidi haasayennan ixxennaagee qoncce. Waannabay naagettiyoogaa. Tamaappe naagettidi, qumaa kattanawu, hoꞌꞌanawunne qammi pooꞌissanawu a goꞌettana danddayoos. Nuuni haasayiyoobawu naagettikko, Xoossaa bonchanawunne harata maaddanawu he imotaa goꞌettana danddayoos. (Maz. 19:14) Nuuni cenggurssaa sissidi gidin woy malaata qaalaa goꞌettidi gidin, nu qofaanne nuuyyo siyettiyaabaa haratussi yootiyoogee Xoossay immido maalaalissiya imota. He imotaa nuuni harata qohanawu gidennan, minttettanawu goꞌettana bessees.—Yaaq. 3:9, 10. w15 12/15 3:1-3

Akkamettiyoogaara gayttidaban PHawuloosanne misoonaawe oosuwawu aara biya harata Luqaasi zoriisinne maaddiis giidi qoppiyoogee bessiyaaba. Luqaasi hegaadan oottana koshshiyoy aybissee? Haray atto PHawuloosikka manddariiddi sahettido gishshataassa. (Gal. 4:13) Yesuusi, “Hargganchchatuppe attin, payyatuyyo aakimee koshshenna” yaagidoogaara maayettiya ogiyan, Luqaasi akkamiyoogan maaddana danddayees. (Luq. 5:31) Luqaasi aakime gidanawu tamaarido sohuwaanne wodiyaa Geeshsha Maxaafay yootenna. Luqaasi oottiyo akkamuwaa oosuwaabaa PHawuloosi Qolasiyaasa Kiristtaanetussi yootidoy eti a eriyo gishshataassa gidiyoogaa issoti issoti yootoosona. Hegaa heeran deꞌiya Lodooqiyan he wode akkamuwaa timirtte keettay deꞌees. Aybakka gidin, Luqaasi dottoreppe attin, akkamuwaaban coo mela zoriya loohibeenna asa gidenna. Luqaasi xaafido Wonggeliyaaninne Oosuwaa maxaafan goꞌettido akkamuwaara gayttida qaalaappe, qassi Yesuusi harata pattidoogaa yootiyo wode i qonccissidobaappe hegaa akeekana danddayoos. w15 12/15 4:11, 12

Yihooway ba mexi issi Naꞌaa ha saꞌaa kiittido wode, aybippenne aadhiya siiquwaa bessiyaaba gidana imotaa immiis! (Yoh. 3:16; 1 Yoh. 4:9, 10) Kiitettida PHawuloosi he imotaa “zawai bainna Xoossaa aaro kehatettaa” yaagiis. Wottiyoobi baynna Kiristtoosa yarshshoy Xoossay qaalaa gelido maalaalissiya ubbabay polettanaagaa ammanttiyaaba gidiyoogaa PHawuloosi eriis. (2 Qor. 1:20) Hegaa gishshawu, Yihooway Yesuusa baggaara nuussi immiyo loꞌꞌobaynne aggenna siiqo ubbay “zawai bainna” he imota. He imotay asi odi wurssana danddayenna keehi maalaalissiyaaba. Ha maalaalissiya imotaa ekkidi nuuni waatana koshshii? Ay oottanaadan hegee nuna denttettana koshshii? Neeni oottiyoobaa xeelliyaagan loytti qoppanaadaaninne ne deꞌuwan issi issibaa laammanawu murttanaadan hagee denttettennee? Kaseegaappe aaruwan kehanaadaaninne harata siiqanaadan ubba qassi haratu mooruwaa atto gaanaadan murttadii? Yihooway Yesuusa baggaara nuussi immido gita imotaa qoppa.—1 PHe. 3:18. w16.01 2:1, 2, 4, 5

Saluwaa baanaadan xeesettidaageeti, ‘Taani doorettidoy aybissee? Harati deꞌishin aybissi doorettidanaa?’ yaagidi qoppana danddayoosona. Eti doorettana bessennabadan qoppana danddayoosona. Gidikkokka, eti doorettidoogaa aynne sirokkona. Eta wozanay keehi ufaytteesinne eti keehi galatoosona. PHeexiroosi kaallidi giidoogaadan etawu siyettees: “Nuuni Xoossaa, nu Godaa Yesuus Kiristtoosa Aawaa, ba maarotettaa daruwaadankka nuna naa77anttuwaa yelidaagaa, Yesuus Kiristtoosa haiquwaappe denttidoogan nuuyyo de7uwaa immana giidaagaa galatoos. Qassi Xoossai intteyyo immana daro laataa wooqqennasan, moorettennasan, woi xayennasan saluwan naagees.” (1 PHe. 1:3, 4) Ayyaanan tiyettidaageeti ha xiqisiyaa nabbabiyo wode, saluwan deꞌiya eta Aaway eta haasayissiyoogaa aynne sirokkona. w16.01 3:11, 12