Xiqimita

Yesuusi hayquwaappe denddi simmin, Yihooway ayyaanan tiyiyoogeeta dooriyoogaa doommiis; koyro xeetu layttan deꞌiya tumu Kiristtaaneti ubbay ayyaanan tiyettidaageeta gidennan aggokkona. Koyro xeetu layttaappe doommidi wurssetta gallassay doommanaashin deꞌiya wodiyan, banttana Kiristtaane giyaageetuppe daroti tumuppe Kiristtoosa kaalliyaageeta gidokkona; Yesuusi eta ‘zardduwan’ leemisiis. Yihooway he layttatunkka tumu Kiristtaane gidida amarida asata ayyaanan tiyiyoogaa aggibeenna; he asati Yesuusi giidoogaadan ‘gistte’ mala gidiyoogaa bessidosona. (Maa. 13:24-30) Wurssetta gallassatunkka, Yihooway 144,000tu yarata dooriiddi deꞌees. Wurssettay wuranaappe guuttaa kasetidi Xoossay amaridaageeta tiyanawu dooriyaaba gidikko, i suurebaa oottiyoogaa ammanettana danddayoos. (Isi. 45:9; Dane. 4:35; Roo. 9:11, 16) Tammanne isiini saatiyan oottiyoogaa doommida oosanchatussi bantta goday oottidoban ufayttibeenna oosanchatudan hanenna mala nuuni naagettana bessees.—Maa. 20:8-15. w16.01 4:15

Nuuni hegaadan oottanaadan Xoossay azazennaagee erettidaagaa. SHin nuuni azazettanawu metiyaabaa woy i hegaa ayssi yootidaakko akeekanawu deexxiyaabaa nuuni oottanaadan azazana danddayees. Neeni oottanaadan Xoossay azazido issi issibay deexxiyaabadan qoppay? Sabbakiyoogee issotu issotuyyo deexxana danddayees. Eti dungguuxa gidiyo gishshawu, erenna asawu mishiraachuwaa yootanawu metootana danddayoosona. Issotu issotuyyo timirtte keettan woy ooso sohuwan haratuppe dummatidi deꞌiyoogee deexxana danddayees. (Kes. 23:2; 1 Tas. 2:2) Neeni Abrahaamaagaadan, issi deexxiyaabaa oottanawu Mooriya pudettaa kiyaydda deꞌiyaabadan qoppa eray? Hegaadan gidikko, xalanne mino ammanoy deꞌiyo Abrahaama leemisuwaa qoppa! Ammanettida asatu leemisuwaa wotti dentti qoppiyoogee eta milatanaadaaninne Yihoowa nu mata Dabbo oottidi akko shiiqanaadan denttettana danddayees.—Ibr. 12:1, 2. w16.02 1:3, 14

Saaꞌooli Daawita woranawu qofaa qachido gishshawu, Yonaataani oossi ammanettana bessiyaakko paacettiis. Yonaataani Daawitaara maacetti uttikkokka, ba aawaassi haarettiis. SHin Yonaataani Xoossay Saaꞌoolaara gidennan Daawitaara deꞌiyoogaa eriis. Hegaa gishshawu, Yonaataani Saaꞌoolawu ammanettiyoogaappe Daawitawu ammanettiyoogaa kaseyiis. I Daawiti qosettanaadan zoriis; qassi Saaꞌoolawu Daawitabaa nashshidi yootiis. (1 Sam. 19:1-6) Nuuni naageettana xayikko, issi biittawu, issi timirtte keettawu, woy issi ispportte citawu ammanettidi, Xoossawu ammanettennan aggana danddayoos. Leemisuwawu, Heneri, cheez giyo kaassaa kaaꞌiyoogaa dosees. Eta timirtte keettay annaaciyan darotoo xooniyo gishshawu, i bawu danddayettidabaa oottanawu koyiis. I hagaadan giis: “Loddan loddan, Xoossawu ammanettiyoogaappe aattada timirtte keettawu ammanettiyoogaa doommaas. Qeeraanne Woggaa cheeziyaa annacettiyoogee taani haggaazennaadan diggiis. Hegaa gishshawu, taani nu timirtte keettaa citawu cheeziyaa kaaꞌiyoogaa agganawu qofaa qachaas.”—Maa. 6:33. w16.02 3:10, 12

Yelagati xammaqettanawu wozanappe koyiyaakkonne erana danddayiyo ogee deꞌees. Leemisuwawu, ne woosay neeni Yihoowawu haggaazanawu wozanappe koyiyaakkonne qonccissees. Darotoo woossiyoogeenne issibaa qonccissada woossiyoogee neeni Yihoowawu mata dabbo gidiyoogaa bessees. (Maz. 25:4) Yihooway darotoo nuuni Geeshsha Maxaafaappe nu woosawu zaaruwaa demmanaadan maaddees. Hegaa gishshawu, Geeshsha Maxaafaa xannaꞌanawu baaxetiyoogee nuuni kaseegaappe aattidi Yihoowakko shiiqanawunne wozanappe ayyo haggaazanawu koyiyoogaa bessiyaaba. (Yaas. 1:8) Yaatiyo gishshawu, nena hagaadan gaada oycha: ‘Woossiyo wode issibaa loytta qonccissiyaanaa? Geeshsha Maxaafaa ubbatoo xannaꞌiyaanaa?’ Qassi, intte soo asay issippe goynniyo So Asaa Goynuwaa omarssay deꞌikko, hagaadan gaada nena oycha: ‘He omarssan nu soo asaara ta dosan goynniyaanaa?’ Neeni ha oyshatuyyo zaariyoobay, wozanappe koyiyo gishshawu xammaqettanawu kuuyidaakkonne akeekanaadan nena maaddees. w16.03 1:11, 13

Nuuni issippe oottidobaa ayfiyaa Laytta Maxaafaappe nabbabiyoogee keehi ufayssees! Gita shiiquwawu nuuni issippetettan waati oottiyaakkokka qoppa, he shiiquwan Geeshsha Maxaafaappe minttettiya haasayaa siyoos, qassi diraamaanne ootti-besuwaa beꞌoos. He ubbaban, nu kumetta wozanaappe ayyo oottanaadan Xoossay nuna shoobbiyoogee darotoo qonccees. Nu issippetettay qoncciyo harabay Yesuusa hayquwaa hassayiyo baalaa. Nuuni Xoossaa aaro kehatettaa nashshiyo gishshawunne Yesuusawu azazettiyo gishshawu, layttan layttan Niisaana 14n away wulli simmin he baalaa bonchanawu ubbasan shiiqoos. (1 Qor. 11:23-26) Qassi Godaa Kahuwaa baalaappe kasetiya amarida saaminttatun, nuuyyo danddayettida keenan nu gubaaꞌiyaa moottan deꞌiya daro asay ha keehi koshshiya baalaa nunaara bonchanaadan shoobboos. Nuuni huuphiyan huuphiyan oottiyoobay pattennaba milatana danddayees. SHin nuuni issippetettan oottiyoogan, miilooniyan qoodettiya asay saba ubbaynne boncho ubbay bessiyo Yihoowa eranaadan maaddoos! w16.03 3:4, 6, 7

Gubaaꞌiyawu oottiyoobaa tamaariya ishantti Geeshsha Maxaafaa maaraadan qoppana mala tamaarissana koshshees. Leemisuwawu, Kawotettaa Addaraashaa geliyoosay geeshshanne hemettiya ura qohennaagaa gidanaadan issi ishay giigissanaadan issi cimay yootiis giidi qoppoos. Tiitu 2:10n deꞌiya qofaa qoppana danddayaasa, ishay Kawotettaa Addaraashaa giigissanawu oottiyoobay ‘Ashshiya Xoossaabaa tamaarissiyoogaa ubbaban’ waatidi galatissiyaakko qonccissana danddayaasa. Tamaariyaagee gubaaꞌiyan deꞌiya cima asatubaanne i oottiyoobay eta maaddiyo ogiyaabaa qoppanaadan oychanakka danddayaasa. Hegaadan tamaariyaara haasayiyoogee i higgiyaappe aaruwan asaabaa qoppanaadan maaddees. I oottiyoobay gubaaꞌiyan deꞌiya ishanttanne michontta waati maaddiyaakko beꞌiyoogee a ufayssees. Hegaa bollikka, tamaariyaagee neeni yootidobaa polanawu baaxetiyo gishshawu galata. Haattay ataakilttee diccanaadan maaddiyoogaadan, galataykka tamaaree ayyaanaaban diccanaadan maaddees. w15 4/15 2:7, 8

Metiya hanotan issi issitoo nena maaddiyaabi baynnabadan qoppa eray? Hegeetuppe amaridaageeti ooso xayiyoogaa, timirtte keettan gakkiya metuwaa, sahuwaa woy hara azzanttiyaabaa gidana danddayoosona. Nena maaddanaadan harata oychennan aggakka; shin koshshiyaaban eti nena maaddibeenna gishshawu azzanadasa. Issi issi metoy asi maaddin qaarettana danddayennaagee qoncce. He wode neeni ay oottana koshshii? Geeshsha Maxaafay nuuni ‘Yihoowan ammanettanaadan’ yootees. (Lee. 3:5, 6) SHin i nena maaddanaagaa ammanettana danddayay? Ee, danddayaasa! Yihooway ba asaa tumuppe maaddiyoogaa nuuni ammanettanaadan oottiya darobaa Geeshsha Maxaafan demmana danddayoos. Hegaa gishshawu, asi maaddennan aggiyo wode uluwan lancce oyqqiyoogaappe, hegaa mala hanotaa PHawuloosaagaadan Yihoowan wozanappe ammanettada siiquwan i maaddiyoogaa beꞌana danddayiyoobadan xeella. Hegee neeni an mintta ammanettanaadaaninne awudeegaappenne aaruwan ayyo mata dabbo gidanaadan oottees. w15 4/15 4:3-5

Seexaanay asay siiqo Xoossaa Yihoowa eqettanaadan oottana danddayiyoy cimmiyoogaa xallaana. (1 Yoh. 4:8) Seexaanay asaa cimmiyoogan, eti ayyaanaaban “hiyyeesa” gidiyoogaa erennaadan oottees. (Maa. 5:3) I hegaadan oottiyoogan “ammanenna asatu qofaa jallissiis; jallissidi Kiristtoosa bonchchuwaa, wonggeliyaa mishiraachchuwaa poo7uwaa banttau poo7iyaagaa, Xoossaa milatiyaagaa eti be7enna mala, eta diggiis.” Seexaanay cimmanawu goꞌettiyo waannabaappe issoy worddo haymaanootiyaa. Asay a xallawu goynnanaadan koyiya woykko “qanaatiya” Yihoowawu goynniyoogaa aggidi, bantta mayzzatussi, woy merettidabawu woy mehiyawu doꞌawu goynniyoogaa beꞌidi Seexaanay ay keena ufayttanee! (Kes. 20:5) Haray atto, Xoossawu suure goynnoos giidi qoppiya daroti worddo ammanuwaanne pattenna meeziyaa kaalloosona. Yihooway, “Kalissennaban intte wolqqaa aibissi wursseetii? Ane loittidi, taani odiyoogaa ezggite . . . modhdhuwan intte asatettaa ufaissite” yaagidoogeetuugaadan, eta hanotay keehi azzanttees.—Isi. 55:2. w15 5/15 1:14, 15

Aabeeli he hidootaabaa loytti qoppennan aggenna; qassi Addaameenne Hewaana nagaraa oottanaappe kase deꞌidoogaa mala wotoy baynna deꞌuwaa asay deꞌanaadan, issi ura ‘qirbbee dukettanaagaa’ i akeekennan aggenna. Aabeeli Xoossay gelido qaalaa ammaniis; hegaa gishshawu, Yihooway a yarshshuwaa ekkiis. (Doo. 4:3-5; Ibr. 11:4) Nohee ammaniyo gishshawu, Bashshaa Haattaappe attiis. (Ibr. 11:7) Bashshaa Haattaappe simmin, i ammanuwan mehiyaa yarshshiis. (Doo. 8:20) Aabeelaagaadan, i asay wurssettan nagaraanne hayquwaa aylletettaappe kiyanaagaa ammanidoogee qoncce. Bashshaa Haattaappe simmin, kumetta saꞌay zaarettidi iita gidiis. Naamiruudi haariyoogaa doommidi, asay Yihoowa bolli makkalanaadan oottanawu koyiis. (Doo. 10:8-12) SHin Nohe ammanoy he wodekka mino. Asay huqqunniya haaruwaappe, nagaraappenne hayquwaappe laꞌa kiyiyo wodiyaa qoppiyoogee a minttettidoogee erettidaagaa. Nuunikka hegaa mala keehi loꞌꞌo wodiyaa “beꞌana” danddayoos; qassi he wodee matiis!—Roo. 6:23. w15 5/15 3:4, 6

Keehi hirggiyoogee asatettaaninne ayyaanaaban nuna qohana danddayees. Nuuni Yihoowan ammanettoosinne hachi gallassa xiqisiyaa qoppoos; qassi nu hanotaa akeekiya uray haasayiyo minttettiya qaalaa hassayiyoogee nu wozanaa ufayssana danddayees. Nuuni Yihoowawu haggaaziya aawawu woy aayeessi woy aqo laggiyawu woykko ammanettiya laggiyawu nuna hirggissiyaabaa yootiyoogee woppissana danddayees. Nuna hirggissiyaabaa Yihoowagaa keena akeekiya asi baawa. PHawuloosi hagaadan giis: “Xoossaa intte woossiyo woosa ubban a keehi galatiiddi, inttena koshshiyaabaa ubbau woossiteppe attin, issibaukka hirggoppite. Qassi asa eratettaa ubbaappe aadhdhiya Xoossaa sarotettai intte wozanaanne intte qofaa Godaa Yesuus Kiristtoosa baggaara naagana.” (Pili. 4:6, 7) Ayyaanaaban qohettennaadan nuna naagiya nu mala Kiristtaanetubaa, cimatubaa, ammanettida ashkkaraabaa, kiitanchatubaa, Yesuusabaanne Yihoowabaa qoppa. w15 5/15 4:16, 17

Yerusalaamen deꞌiya Beeta maqidasiyaappe huuphessa baggan Beetasayda giyo dagatti uttida haattay deꞌees. Sahettiyaanne harggiya cora asay paxees giidi yan shiiqees. Yesuusi issi bitaniyawu qarettidi a haasayssiis; he bitanee Yesuusi yelettanaappe kase doommidi sahettees. (Yoh. 5:6-9) Yesuusi bitaniyaa ‘Paxanau koyakko’ oychiis. Bitanee sohuwaara zaariis. I paxanawu koyees; shin haattaa giddo gelanawu a maaddiya uri baynna gishshawu, i paxana danddayennabadan qoppiis. Yesuusi i ba arssaa tookkidi baanaadan azaziis; hegee ayyo danddayettennaba. Hegaa gishshawu bitanee ba arssaa tookkidi hemettiyoogaa doommiis. He ufayssiyaabay Yesuusi ooratta alamiyan oottanabawu xeera beso. Yesuusi asawu qarettiyoogaakka he maalaalissiyaabaappe akeekoos. I metootidaageeta koyanawu bees. Yesuusi oottidobay ha alamiyan gakkiya metuwaa gaasuwan unꞌꞌettidaageeta nu moottan ubbatoo koyanaadan nuna denttettana koshshees. w15 6/15 2:8-10

“Ta aawawu” giyoogaappe “Nu aawau” giyoogee, nuuni issoy issuwaa wozanappe siiqiya ‘ishanttu’ maabaraa yame gidiyoogaa hassayissees. (1 PHe. 2:17) Hegee keehi gita maata! Saluwan deꞌanaadan Yihooway dooridoogeeti ayyo naata gidido gishshawu, dumma hanotan i eta Aawa. (Roo. 8:15-17) Saꞌan deꞌanawu hidootan naagiyaageetikka Yihoowa “Ta Aawau” gaana danddayoosona. I etawu Deꞌuwaa Immidaagaa gidiyo gishshawu, baassi tummuppe goynniya ubbatussi koshshiyaabaa siiquwan immees. Saꞌan deꞌanawu hidootan naagiyaageeti nagaraappe geeyidi, wurssetta paaciyaa xooni simmidi, kumetta hanotan Xoossaa naata gidana. (Roo. 8:21; Ajj. 20:7, 8) Aawaynne aayyiyaa bantta naati woossanaadan tamaarissiyo wodenne eti saluwan deꞌiya, etassi qoppiya Aawadan Yihoowa xeellanaadan maaddiyo wode, etassi loꞌꞌo imotaa immoosona. Aawaynne aayyiyaa bantta naati Yihoowaara mata dabbo gidanaadan maaddiyoogaappe aadhiya imotaa etassi immana danddayokkona. w15 6/15 4:4-6

‘Iitaappe nuna ashshanaadan’ woossiyoogaara maayettidi deꞌanawu, nuuni Seexaanaa alamiyaabaa woy ‘saꞌaabaa gidennan’ deꞌana bessees. Nuuni “sa7aa woi sa7an de7iya aibanne” siiqana bessenna. (Yoh. 15:19; 1 Yoh. 2:15-17) Yaatanawu ubbatoo baaxetana koshshees. Yihooway Seexaanaa diggirggidi a iita alamiyaa xayssiyoogan he woosaa zaariyoogee keehi woppissiyaaba gidana! SHin Seexaanay saluwaappe duge olettido wode, baayyo guutta wodee attidoogaa eriyoogaa nuuni hassayana bessees. I hanqquwaa suullido gishshawu, nuuni ammanettennaadan oottanawu bawu danddayettida ubbabaa oottees. Hegaa gishshawu, appe nuna ashshanaadan muletoo woossana koshshees. (Ajj. 12:12, 17) Seexaanay baynna alamiyan deꞌanawu koyay? Koyikko, Xoossaa Kawotettay Xoossaa sunttaa geeshshidi, a shenee saꞌan hananaadan oottana mala woossiyoogaa aggoppa. Yihooway ayyaanaabaaninne asatettan nuussi koshshiyaabaa immana mala woossa. Ee, Yesuusi tamaarissido woosaadan deꞌanawu murtta.—Maa. 6:9-13. w15 6/15 5:12, 17, 18

Nuuni he paaciyaa wodiyan aybi hananaakko erana xayikkonne, issi issibaa aggi bayana koshshiyoogaa qoppana danddayoos. Koyro xeetu layttan, Kiristtaaneti bashshaappe attanawu bantta aquwaa aggi bayidi, metuwan genccana koshshiis. (Mar. 13:15-18) Nuna hagaadan oychana koshshees: ‘Aquwaa agga bayanawu giigetta uttidanaa? Yihoowayyo ammanettada deꞌanawu koshshiyaaba aybanne oottanawu eeno giyaanaa?’ Ane hagaa qoppa! He wode, beni wode deꞌida hananabaa yootiya Daaneelaagaadan aybi gakkikkonne aggennan Xoossawu goynniyaageeti nu xalaala. (Dane. 6:10, 11) He wodee ‘kawotettaa wonggeliyaa mishiraachuwaa’ yootiyo wode gidenna. Hegaa yootiyo wodee aadhiichiis. “Wurssettai” he wode gakkiichiis! (Maa. 24:14) Xoossaa asay wolqqaamaa pirddabaa awaajjanaagee sirissenna. He awaajjoy Seexaanaa iita alamee muleera xayana haniyoogaa yootiyooba gidana danddayees. w15 7/15 2:3, 8, 9

Nuuni dummatiyo gishshawu alamee nuna ixxikko garamettana bessenna; ayssi giikko, hegee hananaagaa Yesuusi kasetidi yootiis. Kiristtaaneti alamiyaaban oossinne exatennaagee keehi koshshiyoogaa nu morkketi daroti akeekokkona. SHin nuussi he yohoy keehi koshshiyaaba. Yashshiyaabay gakkiyo wode nuuni Yihoowayyo ammanettanawu xalana koshshees. (Dane. 3:16-18) Ooninne asa yayyana danddayees; shin yelagati hara asaappe dummatanawu keehi metootana danddayoosona. Banddiraa siraataa bonchanaadan, woy asay ba biittaa siiqiyo gishshawu bonchiyo baalaa bonchanaadan ne naati paacettikko sohuwaara eta maadda. He paacee gakkiyo wode naati xoonanawu xalana mala, hegaara gayttidabaa eti loytti akeekanaadan maaddanawu So Asaa Goynuwaa prograamiyaa goꞌetta. Eti ammaniyoobaa bonchuwan loytti qonccissana mala maadda. (Roo. 1:16) He allaalliyaabaa eta asttamaaretussi yoota. w15 7/15 3:15, 16

Nuuni “de7uwaa demmana mala,” Yesuusa wozuwaa yarshshoy kehatettan imettiis. (1 Yoh. 4:9) Xoossay siiqido aybippenne aadhiya he siiquwaabaa kiitettida PHawuloosi hagaadan giis: “Xoossai doorido wodee gakkin, Kiristtoosi nagaranchchatu gishshau haiqqiis. Xillo uraa gishshau, issi urai haiqqanaagee daro metobaa shin, keha asa gishshau haiqqanau, ‘Eeno’ giya uri ooni erii beettennan aggenna. SHin nuuni biron nagaranchcha gididi de7ishin, Kiristtoosi nu gishshau haiqqiis; hegee Xoossai nuna ai keenaa siiqiyaakkonne a siiquwaa erissees.” (Roo. 5:6-8) Xoossay siiqido ha gita siiqoy asay Yihoowaara dabbotaa medhanaadan maaddiis. Wozuwaa yarshshuwaa baggaara Yihooway asaa siiqiyoogaa bessiis. Nuuni saꞌan merinawu deꞌanawu koyiyaabaanne Yihoowawu ammanettidi ubbatoo haggaaziyaaba gidikko, ooratta alamiyan ufayttidi deꞌanaadan i oottanaagaa ammanettana danddayoos. Wozuwaa nuuni Xoossay nuna aggennan siiqiyoogaa bessiya gitaba ootti xeelliyoogee bessiyaaba. w15 8/15 1:13, 15

Kawotettaa haaruwan deꞌiyo maataa demmanawu nuuni Yihoowa dirijjitiyaara hashetidi oottanawu baaxetiyoogeenne Xoossay immiyo oosuwaa poliyoogee bessiyaaba. Nu hanotay laamettana danddayees. Leemisuwawu, Amarkkan Beeteele keettaa asaappe amaridaageeti aqinye gididi maddabettidi, haꞌꞌi hara qommo kumetta wode haggaazuwan daro anjjuwaa demmiiddi deꞌoosona. Yuuyidi xomoosida harati cimatettaa woy harabaa gaasuwan haꞌꞌi dumma aqinye gididi oottoosona. Nuuni imettidabaa ufaytti oottiyoogaa tamaarikko, maaduwaa demmanawu Xoossaa woossikko, qassi ayyo haggaazanawu danddayettida ubbabaa oottikko, wayssiya ha wurssetta gallassankka ufayttananne daro anjjuwaa demmana. (Lee. 10:22) Sinttappe nuuni demmanabay shin? Ooratta alamiyan nuuni deꞌanawu koyiyo heeri deꞌikkokka, harasan deꞌanaadan nuuyyo odettana danddayees. Nuuni he wode awan haggaazikkonne, qassi ay oottikkonne, ufayssan poocu giidi galatiiddi deꞌanaagaa ammanettoos. w15 8/15 3:8

Nohee iita alamiyan deꞌikkokka, he wode deꞌiya asaara mata lagge gidanawu koyibeenna. Nohee Xoossaa dosenna asaara laggetanawu koyibeennaagee qoncce. Inne a so asay laappunay markkabiyaa keexxiyoogaa gujjin, Xoossay etawu immido oosuwaa minni oottidosona. He wode, Nohee ‘xillotettaabaakka yootees.’ (2 PHe. 2:5) Sabbakiyoogee, markkabiyaa keexxiyoogeenne ba so asaara wodiyaa aattiyoogee, Nohee ubbatoo Xoossaa ufayssiya loꞌꞌobaa minni oottanaadan maaddiis. Hegaappe denddidaagan, Noheenne a so asay Bashshaa Haattaappe attidosona. Nuuni ubbay Yihoowawu goynniya ammanettida Nohe, Nohe machee, a naatunne eta maccaasatu zeretta gidiyo gishshawu, eta galatana koshshees. Hegaadankka, ammanettidanne azazettiya koyro xeetu layttaa Kiristtaaneti Xoossawu azazettenna asaappe dummatidi, Yerusalaame katamaynne Ayhuda siraatay 70 M.Ln xayiyo wode attidosona.—Luq. 21:20-22. w15 8/15 4:17, 18

Wodiyaa aattiyo amaridabay maaddiyaaba, ufayssiyaaba woy gazddissiyaaba gidenna; woy qassi keehi allaxxiyoogee woykko muletoo allaxxiyoogee loꞌꞌo gidenna. Ufayssiyaaban allaxxidi goꞌettanaadan nu kahay waatidi maaddana danddayii? Geeshsha Maxaafay ‘asatettaa oosuwaa’ oottennaadan yootees. He oosoti “shaaramuxiyoogaa, tunatettaa, yeellaa xayiyoogaa, Eeqau goinniyoogaa, bitiyoogaa, morkketettaa, palamaa, qanaatiyoogaa, hanqquwaa, bana xoqqissiyoogaa, ooyettiyoogaa, issoi issuwaappe shaahettiyoogaa, miqqainniyoogaa, woriyoogaa, mattottiyoogaa, yettanchcha kiyiyoogaanne hageeta milatiyaageeta.” PHawuloosi, “Hageeta milatiyaageeta oottiyaageeti Xoossaa kawotettaa laattokkona” yaagiis. (Gal. 5:19-21) Hegaa gishshawu, nuna hagaadan oychana danddayoos: ‘Qohiya woy keesettiyo woy ba biittan ceeqettiyoogaa bessiya ispporttiyaa ixxanaadan ta kahay tana denttettii? SHori baynnabaa, mattottiyoogaa, woy iita ayyaanaa oosuwaa xaasayi xeellanaadan oottiya woy pokkobaa bessiya pilimiyaa beꞌanawu taani paacettiyo wode, ta kahay tana diggii?’ w15 9/15 2:11, 12

Asay Xoossaappe shaahettidi banttana banttarkka kaalettanaadan merettibeennaagaanne he tumaa ixxiyoogee azzanttiyaabaa kaalettiyoogaa Geeshsha Maxaafaappe tamaaroos. Yihooway nuussi aybi loꞌꞌokko erees. Nuuni sarotettaanne issippetettaa demmana danddayiyoy Xoossawu haarettiyoogaa xallaana. Yihooway ha keehi koshshiya tumaa qonccissiyoogee i ay keena siiqiyaakko bessiyaaba! Siiqiya aaway ba naati sinttappe deꞌana deꞌuwaabawu keehippe qoppees. I eti ufayttidi deꞌanaadan koyees. Ha wodiyan daro asay sinttanaabawu hirggiyoogee woy eti goꞌꞌennaabaa oottiiddi bantta wodiyaa wurssiyoogee azzanttiyaaba. (Maz. 90:10) Nuuni Xoossaa naata gidiyo gishshawu, i nuna tumuppe siiqiyoogaa eroos; ayssi giikko, Yihooway sinttappe loꞌꞌobaa ehanawu qaalaa geliis. Hegee nuuni nu deꞌuwan ufayttanaadan maaddees. w15 9/15 4:10, 11

Beni Israaꞌeelatu taarikiyaa doomettan, Xoossay Israaꞌeelata waati maaddidaakko asay beꞌiisinne siyiis. Yihooway maalaalissiya ogiyan ba asaa Gibxxeppe kessidi, hegaappe simmin daro kawota eti xoonanaadan maaddiis. (Yaas. 9:3, 9, 10) Israaꞌeelatu morkketi Xoossay Israaꞌeelatussi olettiyoogaa akeekennan ixxido gishshawu, xoonettidosona. Guyyeppe, iita Kawoy Akaabi Xoossaa kushiyaa beꞌana danddayiyo darobay haniis. Eelaasi ba yarshshuwaa tamay maanaadan woossido wode, saluwaappe tamay wodhishin Akaabi beꞌiis. He wode, Eelaasi Akaaba, “Irai nena beettaa diggennaadan, . . . duge ne soo wodhdha” yaagidi, Yihooway iraa bukissanaagaa yootiis. (1 Kaw. 18:22-45) Akaabi he ubbabay haniyoogaa beꞌikkokka, hegee Xoossaa gita wolqqaa qonccissiyaabaa gidiyoogaa ammanennan ixxiis. Yihoowa kushee oottiyo wode nuuni akeekana bessiyoogaa hagaappenne hara leemisuwaappe tamaaroos. w15 10/15 1:4, 5

Nuuni Yihoowa kaaletuwaa kaalliyaabaa gidikko, i nuna maaddanaagaa mule sirana koshshenna. Tumuppe nuna maaddana danddayiyaagaa ammaniyoogee keehi koshshiyaaba. Xoossay “nu giddon oottiya ba wolqqaa baggaara nuuni woossiyoobaa woi qoppiyoobaa ubbaappe keehi darissi oottanau” danddayiyaagaa gidiyoogaa PHawuloosi yootiis. (Efi. 3:20) Yihoowa ashkkarati Xoossay koyiyoobaa oottanawu banttawu danddayettida ubbabaa oottoosona; shin eti bantta abbiyaa pacaa akeekidi Yihooway anjjanaagaa ammanettoosona. Nu Xoossay nunaara deꞌiyo gishshawu ufayttokkoo? Ammanuwaa gujjanaadan nuuni woossiyo woosaa Xoossay zaarana giidi naagana danddayiyoo? Nuuni “Xoossai koyiyoogaadan” woossikko, i zaarana giidi naagana danddayiyoogaa Geeshsha Maxaafay yootees. (1 Yoh. 5:14) Yihooway banan wozanappe ammanettiyaageetun ufayttiyoogee qoncce. Ammanuwaa gujjanaadan nuuni woossiyo woosaa Yihooway zaarananne nu ammanoy keehi minnana; hegee qassi nuuni “Xoossaa kawotettaayyo bessiyaageeta gididi qoodettana mala” oottana.—2 Tas. 1:3, 5. w15 10/15 2:16-18

Ayyaanaabaa wotti dentti qoppiyoogee issi uray ayyaanaaban kayma gidanaadan maaddees. (Ibr. 5:14; 6:1) Yihoowabaanne Yesuusabaa loyttidi wotti dentti qoppenna uray ammanuwan minnidi deꞌenna. Hegaa mala asi tumaappe wora baana woy shaahettana danddayees. (Ibr. 3:12) Nuuni Xoossaa Qaalaa “lo77o wozanaappenne tumu wozanaappe” siyennaba woy ekkennaba gidikko, nuuni hegaa ‘naagennaagaa’ Yesuusi yootiis. SHin, deꞌuwawu hirggiyoogee ‘duretettaynne loꞌꞌo deꞌoy’ nu wozanaa bashshin ‘nu ayfee bootennan atti aggana’ danddayees. (Luq. 8:14, 15) Yaatiyo gishshawu, Xoossaa Qaalaa ubbatoo mintti qoppoos. Hegee nuuyyo Yihoowaagaa mala eeshshay deꞌanaadan nuna denttettees. (2 Qor. 3:18) Nuuni saluwan deꞌiya siiqiya nu Aawaabaa gujjidi tamaarananne merinawu a milatana danddayoos. Hegaappe aadhiya bonchobi baawa!—Era. 3:11. w15 10/15 4:13, 14

Intte aawaanne aayyiyoo gididoogaadan, intte yelaga naati ayyaanaaban payya gidanaadan koyeeta. Xoossaykka intte intte naata Yihoowa “seeraaninne zoriyan” dichanaadan koyees. (Efi. 6:4) Yaatiyo gishshawu, ayyaanaabaa meeze oottidi aggennan kaallanawu Xoossay intteyyo immido aawatettaa goꞌettite. Leemisuwawu, timirttee intte naatussi keehi koshshiyo gishshawu, eti tamaaranaadan koyeeta; qassi eti tamaariyoogaa dosanaadan maaddanawukka koyeeta. Hegaadankka, siiqiya aawaynne aayyiyaa gubaaꞌe shiiquwaaninne ayyaanaaban hara prograamiyan bantta naati Yihoowa “zoriyan” goꞌettanaadan koyoosona. Xoossay tamaarissiyoobay keehi maaddiyo gishshawu, intte naati ayyaanaabaa siiqanaadaaninne aadhida eratettaa nashshanaadan oottanawu baaxeteeta. Yesuusi ba erissiyo ashkkarata maaddidoogaadan, intte yelaga naati Xoossaa Qaalaappe tamaariyoobaa siiqanaadaaninne ubbatoo haggaazanaadan maaddiyoogan, eti haggaazuwan qara gidanaadan baaxeteeta. w15 11/15 2:6

So asawu huuphe gidana koshshiyay oonakko Yihooway kuuyiis. SHin huuphe gidida uri he maataa siiquwan goꞌettana koshshees. Azinay ba macheessi huuphe gidikkokka, ‘o bonchanaadan’ Geeshsha Maxaafay azazees. (1 PHe. 3:7) Azinay ba machiyo bonchana danddayiyo issi ogee iyyo koshshiyaabaa qoppiyoogaanne issi issiban a dooriyoobaa kaseyiyoogaa. Xoossaa Qaalay, “Azinatoo, Kiristtoosi woosa keettaa siiqidi, ba huuphiyaa ayyo immidoogaadan, inttekka intte maccaasata siiqite” yaagees. (Efi. 5:25) Ee, Yesuusi bana kaalliyaageetussi haray atto ba shemppuwaakka aattidi immiis. Azinay huuphe gidiyo maataa Yesuusaagaadan siiquwan goꞌettikko, a machiyaa a siiqanawu, bonchanawunne ayyo haarettanawu metootukku.—Tii. 2:3-5. w15 11/15 4:6, 7

Mishiraachoy darosaa gakkin, daro Kiristtaaneti haasayiyoy Ibraawettuwaa gidennan, Giriikettuwaa. Maatiyoosi, Marqqoosi, Luqaasinne Yohaannisi Yesuusi tamaarissidobaanne oottidobaa ayyaanaa kaaletuwan xaafido Wonggeleti Giriikettuwan darosaa gakkidosona. Qassi kiitettida PHawuloosi xaafido dabddaabbetinne ayyaanay kaalettin xaafetida hara maxaafati Giriikettuwan asawu gakkidosona. Giriiketto Geeshsha Maxaafaa xaafidaageeti Ibraawetto Geeshsha Maxaafaa qofaa yootiyo wode, darotoo Septujenttiyaappe xaafiyoogee akeekana koshshiyaaba. Issi issisan Ibraawettuwaappe guuttaa dummatiya he qofay Geeshsha Maxaafan haꞌꞌikka deꞌees. Yaatiyo gishshawu, nagarancha asay birshshidoogee ayyaanaa kaaletuwan xaafettida Xoossaa Qaalaa shaaho gidiis; Xoossay issi wogaa woy qaalaa haraappe aatti xeellenna.— Oos. 10:34. w15 12/15 1:8, 9

Nuuni ubba galla haasayikkokka, haasayana koshshenna wodeekka deꞌees. Geeshsha Maxaafay “co77u gaanau wodee” deꞌiyoogaa yootees. (Era. 3:7) Harati haasayiyo wode coꞌꞌu giyoogee eta bonchiyoogaa bessiyaaba gidana danddayees. (Iyy. 6:24) Xuura yohuwaa haasayennaadan naagettiyoogee akeekancha gidiyoogaa bessiyaaba. (Lee. 20:19) Asi nuna hanqqetissiyo wode nu inxxarssaa naagiyoogee aadhida erancha gidiyoogaa bessees. (Maz. 4:4) SHin, Geeshsha Maxaafay “haasayanaukka wodee” deꞌiyoogaa yootees. (Era. 3:7) Ne laggee neeyyo loꞌꞌiya imota immiyaakko, neeni waaya qosa wottana. Ubba loyttada goꞌettiyoogan hegaa nashshiyoogaa bessaasa. Yihooway immido haasayiyo imotaa loytti goꞌettiyoogan a galatiyoogaa bessoos. Nuuyyo siyettiyaabaa, nuussi koshshiyaabaanne minttettiyaabaa yootiyoogan, qassi Xoossaa sabbiyoogan hegaadan oottana danddayoos. w15 12/15 3:4, 5

Issi Kiristtaanee “hargganchchaa pattiyo wolqqaa” goꞌettidi nuna pattana danddayiyo wodiyan deꞌokko. (1 Qor. 12:9) SHin issi issi ishati eta oychiday baynnan akkamuwaara gayttidaban kehatettan zorana danddayoosona. Issoti issoti yootiyoobay qohennaba gidiyoogee qoncce. Geelladan heeran deꞌiya haattay moorettido gishshawu, Ximootiyoosa uloy sakkin PHawuloosi hegaadan oottiis. SHin maaddana danddayenna woy issi issitoo ubba qohana danddayiya xale woy miyoobaa goꞌettanaadan nu mala Kiristtaaniyaa ammanttanawu maliyoogaappe hegee keehi dummatees. Issoti issoti, ‘Ta dabbuwaakka hegaadan sakkin hagaa ekkiis . . . Yaatidi paxiis’ giidi, issi issitoo harata ammanttanawu malidosona. Hegaa mala zoree wozanappe zoridoba gidikkonne, daro asay xalettiyo xaleekka qohana danddayiyoogaa nuuni hassayana koshshees.—Lee. 27:12. w15 12/15 4:13

Laattido nagaraa gaasuwan nuuni ubbaykka hayqqoos. (Roo. 5:12) Yesuusi saꞌaa yiidi “asa ubbau haiqqana mala” Yihooway siiquwan giigissiis. (Ibr. 2:9) Yihooway ha wodiyan nu deꞌuwaa ashshiyoogaa xalla gidennan, hayquwawu gaaso gididabay merinawu xayanaadan oottiyaabaa giigissiis. (Isi. 25:7, 8; 1 Qor. 15:22, 26) Yesuusa ammaniya ubbay saꞌan Kiristtoosi ayssiyo Xoossaa Kawotettawu haarettidi woy he Kawotettan Kiristtoosaara issippe haariiddi, merinawu sarotettaaninne ufayssan deꞌana. (Roo. 6:23; Ajj. 5:9, 10) Yihooway immiyo he imotay demissiyo hara anjjoy aybee? Saho ubbaappe paxiyoogee, saꞌay gannate gidiyoogeenne hayqqidaageeti denddiyoogee Yihoowa imotaappe amaridaagaa. (Isi. 33:24; 35:5, 6; Yoh. 5:28, 29) “Zawai bainna” imotaa nuussi coo immiyo gishshawu, Yihoowanne a siiqo Naꞌaa keehi siiqoos.—2 Qor. 9:15. w16.01 2:5, 6

He Kiristtaaneti saluwaa baanaadan Yihooway dooranaappe kase, eti saꞌan merinawu deꞌanawu hidootan naagoosona. Eti kase, Yihooway saꞌaa geeshshiyo wodiyaa yeemotti naagoosona; qassi he keha wodiyan deꞌanawu amottoosona. Siiqiyo uri duufuwaappe denddiyo wode mokkanawukka amottennan waayi aggana. Eti bantta keexxido keettan deꞌanawunne bantta tokkido mittaa ayfiyaa maanawu yeemottoosona. (Isi. 65:21-23) SHin eta qofay laamettidoy aybissee? Eti he hidootan ufayttennan aggido gishshataassa gidenna. Qassi unꞌꞌettido gishshataassa woy metootido gishshataassa gidenna. Merinawu saꞌan deꞌanaagee salettiyaaba gi qoppidi, saꞌan deꞌanawu hidootiyoogaa aggiigibookkona; woykko saluwaa deꞌoy ay malakko eranawu koyibookkona. Eta qofay laamettidoy, Xoossay ba ayyaanaa baggaara eta xeesido gishshataassa xalla gidennan, eta qofaynne eti hidootan naagiyoobay laamettanaadan oottido gishshataassa. w16.01 3:11, 13

Yihooway Ubbaappe Xoqqiyaagaa; i ubbabaa Medhidaagaa; qassi zawi baynna aadhida eratettaynne wolqqay deꞌiyoogaa. Iyyoobi hegaa akeekiis. Yihooway ba medhidobaa xeelliyaagan a oychin Iyyoobi, “Neeni ubbabaa oottanau danddayiyoogaanne ne halchchuwaakka halissanau danddayiyaabi bainnaagaa taani erais” yaagiis. (Iyy. 42:2) Yihooway oottana koyiyo aybanne ooninne maaddennan oottana danddayiyaaba gidikkokka, i ba halchuwaa polanawu harati banaara oottanaadan koyroppekka doommidi shoobbiis. Xoossay hara ubbabaa medhanaappe kase, ba Naꞌaa Yesuusa medhiis. Hegaappe simmin, Yihooway hara ubbabaa medhiyo wode ba Naꞌay bana maaddanaadan shoobbiis. (Yoh. 1:1-3, 18) Hegaa gishshawu, Yihooway ba Naꞌay banaara medhanaadan shoobbiyoogaaninne harati a maataa eranaadan oottiyoogan ba Naꞌaa bonchiis.—Qol. 1:15-17. w16.01 5:1, 2