Isiine

Yofttaahee naꞌiyaa tumu goynuwawu maaddiyaabaa oottanawu azinaa gelada naata yelanawu amottiyo amuwaa aggabayaasu. Nuuni waatidi iigaadan nu goꞌꞌaa aggibayana danddayiyoo? SHaꞌan qoodettiya yelaga Kiristtaaneti Yihoowawu loytti oottanawu, guutta wodiyawu gidikkonne aqo oyqqennan woy naꞌa yelennan deꞌoosona. Gasttatikka bantta naatuura woy bantta naatu naatuura aattana danddayiyo wodiyan Xoossaa oosuwawu maaddiyaabaa keexxoosona, woy Kawotettaa Mishiraachuwaa Yootiyaageetu Timirtte Keettan tamaaroosonanne Kawotettaabaa aassiyaageeti keehi koshshiyoosaa biidi haggaazoosona. Harati qassi zamachan haggaazanawu bantta allaalliyaa aggibayoosona. Hegaadan wozanappe oottiyoogee Yihoowa keehi ufayssees; i eti oottido oosuwaanne a siiqido siiquwaa mule dogenna. (Ibr. 6:10-12) Neeni Yihoowawu kaseegaappe loytta oottanawu issi issibaa aggabayana dandday? w16.04 1:16, 17

Yesuusi bana henttanchan, bana kaalliyaageeta qassi dorssaa wudiyan leemisiis. Ane hagaa qoppa: Naaꞌꞌu dorssati deriyaa huuphiyan, naaꞌꞌu dorssati wombban, haray qassi harasan maataa miyaaba gidikko, ha ichashu dorssata wude gaana danddayettii? Akkay; ayssi giikko, dorssaa wudee issippetettan deꞌeesinne henttanchaa geeduwaa kaallees. Hegaadankka, nuuni eriiddi gubaaꞌiyaa baana xayikko, nu Henttanchaa kaallana danddayokko. Nuuni nuna ‘heemmiya issuwaa’ kaalliya ‘issi wude’ gidanawu nu mala Kiristtaanetuura shiiqana bessees. Nuuni gubaaꞌe shiiquwaa biyo wode, nu issippetettawu maaddiyaabaa oottoos. (Maz. 133:1) Nu mala Kiristtaanetuppe amaridaageetu aawati, aayoti, ishanttinne michontti eta yedettidosona. SHin Yesuusi ayyaanaaban etassi so asa mala gidida, eta siiqiyaanne etawu qoppiyaageeta immanawu qaalaa geliis. (Mar. 10:29, 30) Neeni ubbatoo shiiquwaa shiiqiyaaba gidikko, he siiqo asatuyyo aawa, aayo, isha woy micho gidiyoogaa bessana danddayaasa! Hegee nuuni danddayido keenan ubbatoo shiiqanaadan denttettees. w16.04 3:9, 10

Nuuni haratuura sarotettaa medhanawu koyennaba gidikko, Xoossaayyo oottanawu nuuni woossiyoogee, shiiqiyoogee, haggaaziyoogeenne hegaa mala harabaa oottiyoogee aynne maaddenna. Nuuni haratu mooruwaa atto gaanawu koyennaba gidikko, Xoossaa dabbo gidana danddayokko. (Luq. 11:4; Efi. 4:32) Kiristtaaneti ubbay haratuyyo atto gaanawunne etaara sarotettan deꞌanawu wozanappe akeekan qoppana koshshees. Neeni ne ishanttussi coo atto gay? Etaara laggetiyoogee nena ufayssii? Yihooway ba ashkkarati issoy issuwawu atto gaanaadan koyees. Hegaara gayttidaagan neeni giigissana bessiyaabi deꞌiyoogaa akeekikko, giigissanaadan Yihooway nena maaddana mala woossa! Saluwan deꞌiya nu Aaway hegaa mala woosaa siyidi zaarees.—1 Yoh. 5:14, 15. w16.05 1:6, 7

Mishiraachoy ay keena wodiyawu odettana bessii? Kumetta saꞌan oottiyo ha oosoy wurssetta gallassatu ubban oosettin, hegaappe guyyiyan ‘wurssettay gakkanaagaa’ Yesuusi yootiis. Mishiraachuwaa yootiyoogaara gayttidaagan hara haymaanooteti ha wurssetta gallassatun ay oottiyoonaa? Nuuni haggaazuwan demmiyo issi issi asati, “Geeshsha ayyaanay nuussi imettiis; shin oosuwaa oottiyay inttena” gaana danddayoosona. SHin nuuni he oosuwan gencciyoogeekka nuussi Xoossaa ayyaanay deꞌiyoogaa bessiyaaba gidennee? (Oos. 1:8; 1 PHe. 4:14) Yihoowa Markkati ubba wode oottiyoogaadan, amarida haymaanootetikka issi issitoo oottanawu maloosona; shin hegee darotoo etawu hanenna. Issoti issoti amarida wodiyawu misoonaawe gididi oottanawu malidi, bantta oosuwawu simmi aggoosona. Harati qassi sooppe soo biidi sabbakanawu malana danddayoosona; shin ay sabbakiyoonaa? Ha oyshaa zaaroy, eti Kiristtoosi doommido oosuwaa oottiiddi deꞌennaagaa bessees. w16.05 2:13, 16

‘Bali baynnan deꞌanawunne’ “ooratta asatettaa” maayanawu ubbatoo baaxetana koshshees. Kiitettida PHawuloosi ba mala Kiristtaaneta hagaadan giis: “Intte kase de7iyo de7uwaa aggite; qassi ba cimmiya amuwan xayiya intte ceega asatettaa xaissite. Intte wozanainne qofai muleera ooraxxanau bessees. Tumu xillotettaaninne geeshshatettan Xoossaa leemisuwan merettida ooratta asatettaa maayite.” (Efi. 4:22-24) ‘Ooraxxite’ giya qaalay ooratta asatettaa maayiyoogee ubba wode oottana koshshiyaaba gidiyoogaa bessees. Nuuni ay keena wodiyawu Yihoowassi haggaazidaba gidikkokka, nuuni ooratta asatettaa maayidoogaa bessiya, Kiristtaanetuppe koyettiya loꞌꞌo eeshshati ubbatoo deꞌiyoogeeta gidana danddayiyoogaa ammanettanaadan oottiyo gishshawu, hegee minttettiyaaba. Ee, Geeshsha Maxaafay nuuni ubba wode laamettanaadan maaddana danddayees. w16.05 4:8, 9

Nuuni ayyaana gannatiyan deꞌoos. Hegee nuuni laamettanaadan Yihooway ha wodiyan giigissido dumma hanotaa. (Isi. 64:8) Nu yuushuwan deꞌiya alamee iita gidikkokka, nuuni sarotettan woppu giidi deꞌanaadan he hanotay maaddees. Nuuni Yihoowa eridi i nuna aawadan siiqiyoogaa beꞌida. (Yaaq. 4:8) Ooratta alamiyan ayyaana gannatiyaa anjjuwan nuuni muleera goꞌettana. Qassikka Xoossaa Kawotettay haariyo gannate gidiya saꞌan nuuni ufayttidi deꞌana. He wodekka Yihooway nuuni haꞌꞌi qoppana danddayenna hanotan kumetta saꞌan deꞌiya asaa tamaarissiyoogan eti laamettanaadan maaddana. (Isi. 11:9) Hegaadankka, nuuni i tamaarissiyoobaa loytti akeekanaadaaninne a sheniyaa muleera polana mala, Xoossay nu guuggiyaanne nu bollaa wotoy baynna tilla oottana. Hegaa gishshawu, ubbatoo Yihoowawu haarettanawu murttoos; yaatiyoogan nuuni laamettanaadan i maaddiyoogaa a siiquwaa qonccissiyaabadan xeelliyoogaa bessoos. w16.06 1:8, 9

Muusee hayqqanaappe kase, 1473n K.K. Mooꞌaaba dembban shiiqida Israaꞌeelatuyyo yootidobaappe issoy he qofaa. Israaꞌeelati he wode Hidootaa Biittaa laattanawu Yorddaanoosa shaafaa pinnana hanoosona. (Zaa. 6:1) Eta 40 layttawu kaalettida Muusee eti banttana gakkana paaciyaa xalidi xoonanaadan koyiis. Eti Yihoowan ammanettananne bantta Xoossawu ammanettiyaageeta gidana bessees. Muusee haasayido wurssetta haasayay eta keehi maaddidoogee qoncce. Muusee Yihooway he deriyawu immido Tammu Azazotanne hara higgeta yooti simmidi, Zaarettido Wogaa 6:4, 5n deꞌiya gita azazuwaa odiis. Muuseera he sohuwan shiiqida Israaꞌeelati bantta Xoossay Yihooway ‘Issi Yihoowa’ gidiyoogaa erokkonaa? Geeshshidi eroosona. Ammanettida Israaꞌeelati bantta mayzza aawatu Abrahaama, Yisaaqanne Yaaqooba Xoossaa gidida issi Xoossaa xallaa eroosonanne awu goynnoosona. w16.06 3:2, 3

Yesuusi hegaadan giidoy i saꞌan deꞌiyo wodiyaana. SHin Kiristtoosayyo Seexaanaa alamiyaa xayssiyo maatay imettiis. (Ajj. 19:11-16) Hegaa gishshawu, Armmageedoona olay awude doommanaakko Yesuusi haꞌꞌi erees giidi qoppana danddayoos. SHin, nuuni erokko. Gita waayee doommana gakkanaassi nuuni beegottidi deꞌana bessees. SHin Yihooway hegee polettana wodiyaa awudekka erees. Gita waayee doommana wodiyaa i keeri wottiis. He gallassay mati mati bees, qassi “gam77enna.” (Imb. 2:1-3) Nuuni hegaa ammanettiyoy aybissee? Yihooway hanana giidobay awudekka gidin i keerido wodiyan polettiis! Yihooway gita waayiyaappe nuna ashshanawu gelido qaalaykka polettennan attennaagaa ammanettoos. Gidoppe attin, ha alamee xayiyo wode attanawu nuuni naagi uttana bessees. w16.07 2:4-6

Kiitettidaageeti Yesuusa maaddana bessiyo wodiyan a yeggibayidi biidosona. Harati Yesuusa yeggibayidi baqatikkonne PHeexiroosi hegaadan oottennaagaa kasetidi yootiis. (Mar. 14:27-31, 50) Gidikkokka, asay Yesuusa oyqqido wode, PHeexiroosa gujjin, kiitettidaageeti ubbay a yeggibayidi baqatidosona. PHeexiroosi Yesuusa erennaagaa zaari zaaridi yootiis. (Mar. 14:53, 54, 66-72) SHin, PHeexiroosi ba nagaraappe simmido gishshawu, i kaseegaadankka ayyo haggaazanaadan Yihooway oottiis. Neeni he wode Yesuusa kaalliyaagaa gidiyaakko, PHeexiroosa hanotay neeni Yihoowawu ammanettennaadan oottanee? Ha wodiyan, Yihooway nagaranchati bantta nagaraappe simmanaashin guuttaa naagana danddayiyoogaa, qassi wurssettan he mooruwaa suurissanaagaa akeekay? Hara baggaara qassi, gita nagaraa oottida issoti issoti Yihoowa maarotaa koyennan ixxidi bantta nagaraappe simmokkona. Hegaa mala hanotan, he moorobaa oottiyaageeta Yihooway guyyeppe geelladan gubaaꞌiyaappe bohiyoogan eta bolli pirddanaagaa ammanettay? w16.06 4:8, 9

Yihoowa aaro kehatettaappe denddidaagan nuuni demmiyo gita anjjoy unꞌꞌettida wozanaa minttettiyoogaa. (Maz. 51:17) Yedetay gakkiiddi deꞌiyo Tasalonqqe Kiristtaanetuyyo PHawuloosi hachi gallassa xiqisiyan deꞌiya qofaa xaafiis. Yihooway nuna siiqiyoogaanne nuuyyo qoppiyoogaa eriyoogee ay keena minttettiyaabee! Nuuni nagarancha gidiyo gishshawu, Yihooway maaddennaakko nuuyyo hidooti deꞌenna. (Maz. 49:7, 8) SHin Yihooway nuuyyo keehi ufayssiya hidootaa immiis. Yesuusi bana kaalliyaageeta, “Ta Aawai koyiyoogee hagaa; tana Na7aa be7idi, ammaniya ubbati merinaa de7uwaa ekkana” yaagiis. (Yoh. 6:40) Ee, merinaa deꞌuwaa hidootay Xoossay ba aaro kehatettan immido gita imota. PHawuloosi hegaa loytti akeekido gishshawu, “Xoossai asa ubbaa ashshiya ba aaro kehatettaa qonccissiis” yaagiis.—Tii. 2:11. w16.07 3:14, 15

Ha wodiyan, Yihoowa asay aqo laggiyawu ammanettees; shin ammanettennaagaa bessiyaabay yeddi yeddidi hanees. Gidoppe attin, aqo oyqqida xammaqettida uri hara uraa aqo laggiyaa laggettidi ba aqo laggiyaappe paraman shaahettidi, he ura ekkiis giidi qoppoos. He uri ba nagaraappe simmennan ixxikko, gubaaꞌee geeshsha gidanaadan i bohettees. (1 Qor. 5:11-13) I woy a gubaaꞌiyaa yame gidanaappe kase, ba “nagaraappe simmidoogaa erissiyaabaa” oottana koshshees. (Luq. 3:8; 2 Qor. 2:5-10) He uri gubaaꞌiyaa simmanaashin hagaa keena wodee aadhana bessees giyoobi baawa. Nagaraa oottida uri tumuppe ba nagaraappe simmidoogaa bessanawunne zaarettidi gubaaꞌiyaa yame gidanawu issi woy naaꞌꞌu layttaa koshshana danddayees. He uri zaarettidi gubaaꞌiyaa yame gidikkonne, “Xoossaa pirddaa araataa sinttan” babaa yootana bessees.—Roo. 14:10-12. w16.08 1:12, 13

“Koyikko” geetettidi birshshettida Giriiketto qaalay gattennasan deꞌiyaabaa oyqqanawu zaatturiyoogaa qonccissiya qaala. Kiitettida PHawuloosi he qaalaa goꞌettiyoogan ayyaanaaban diccanawu baaxetana bessiyoogaa qonccissiis. Sinttappe gubaaꞌiyan i oottanabaa qoppiya ishaabaa qoppa. I haꞌꞌi gubaaꞌiyawu oottiyaagaa gidennan aggana danddayees, shin i ayyaanaaban giigissana koshshiyo eeshshati deꞌiyoogaa akeekees. Koyruwan, i gubaaꞌiyawu oottiyaagaa gidanawu baaxetees. Guyyeppe, gubaaꞌe cima gididi oottanawu ayyaanaaban diccanaagaa qoppees. He naaꞌꞌu hanotankka, i gubaaꞌiyan hara aawatettaa ekkanawu baappe koyettiyaabaa kunttanawu minnidi oottees. Hegaadankka, aqinye gidanawu, Beeteelen oottanawu woy Kawotettaa Addaraashaa bantta dosan keexxanawu amottiya ishanttinne michontti bantta halchuwaa polanawu baaxetana bessees. w16.08 3:3, 4

Nahimee Yerusalaame biido wode ayyo aybi siyettana danddayiyaakko qoppa. Katamaa naagiyaabi baawa; qassi Ayhudati keehi hidootaa qanxxi uttidosona. Hara biittaa asay yashissido gishshawu, Ayhudatu kushee oosuwawu daafurin eti Yerusalaame gimbbiyaa zaarettidi gimbbiyoogaa aggidosona. He hanotay a hidootaa qanxxissin, Nahimiyaa kusheekka arggaacidee? CHii! Muusedan, Asadaaninne ammanettidi Yihoowawu oottiya haratudan, Nahimee ubbatoo Yihoowan ammanettees. (Kes. 17:8-13; 2 Odi. 14:8-13) Ha hanotankka Nahimee Yihooway maaddanaadan woossin, Yihooway a woosaa siyiis. Xoossay ba ‘gita wolqqaaninne mino qesiyan’ daafurida Ayhudata minttettiis. (Nah. 2:17-20; 6:9) Yihooway ha wodiyan ba ashkkarata maaddanawu ba ‘gita wolqqaanne mino qesiyaa’ goꞌettiyoogaa ammanay? w16.09 1:9

Dache biittaa gaazeexay haymaanootiyaa kaalettiyaageeti shiiqido issi shiiquwaabaa hagaadan giis: “Saꞌay hoombbiyo wode daro asay ubbatoo maayiyoogaadan maayidaagaa beꞌaasa. Yihoowa Markkatu gita shiiquwan hegaa mala gidenna.” Yihoowa Markkati “bessiya maayuwaa kiphataaninne banttana shiishshi ekkiyoogan . . . Xoossau yayyais giya maccaasau bessiyoogaadan” maayiyo gishshawu, eta darotoo asay galatees. (1 Xim. 2:9, 10) Kiitettida PHawuloosi maccaasaabaa yootidaba gidikkonne, ha maaray Kiristtaane attuma asawukka hanees. Nuuni Yihoowa asa gidiyo gishshawu, bessiyaagaadan maayiyoogaa xoqqu oottidi xeelloos; qassi hegee nuuni awu goynniyo Xoossaykka xoqqu ootti xeelliyooba. (Doo. 3:21) Maayiyoobaanne alleeqettiyoobaa xeelliyaagan Geeshsha Maxaafay yootiyoobay Ubbabaa Haariya Xoossay ayyo goynniyaageeti maayanaadan koyiyoobawu maaraa kessidoogaa qonccissees. Hegaa gishshawu, nuuni maayiyoobaanne alleeqettiyoobaa Ubbabaa Haariya Godaa Yihoowa ufayssiyaakkonne qoppana koshshees. w16.09 3:1, 2

Issoti issoti Geeshsha Maxaafan odettida hiraagaa xannaꞌiyoogan ufayttoosona. Woy qassi eti Geeshsha Maxaafay yootiyoobaa taarikiyaa eranchati, saynttistteti, woy arkkiyolojistteti yootiyoobaara geeddarssiyoogaa dosennan aggokkona. Xannaꞌana koshshiya issi hiraagay Doomettaabaa 3:15n deꞌiyaagaa. He xiqisee Geeshsha Maxaafaa waanna qofaa qonccissees; hegeekka Xoossaa Kawotettay Xoossaa haaroy suure gidiyoogaa qonccissanaagaanne a sunttay geeyanaadan oottanaagaa. Edeneppe doommidi asaa bolli gakkida meto ubbaa Yihooway waati xayssanaakko he xiqisee leemisuwan yootees. Doomettaabaa 3:15 neeni waata xannaꞌana danddayay? Issi ogee odettidabaa kasiyaa kaallidi xaafiyoogaa. Hegee he xiqisiyan odettidaageetanne Yihooway ba giigissiyoobaa loddan loddan waati qonccissidaakko bessiyaanne he hiraagay polettanaagaa qonccissiya waannatiya xiqiseta xaafidoba gidana danddayees. Xiqiseti maayettiyo hanotaa neeni akeekiyo wode, Geeshsha Maxaafan hananabaa yootidaageetanne a xaafidaageeta ‘geeshsha ayyaanay kaalettidoogaa’ neeni eranaagee qoncce. w16.09 4:8

Kiitettida PHeexiroosi Ayhuda gidennaageeta amarida wodiyawu ba wozanan ixxiis; shin he iita qofaa ba wozanaappe loddan loddan xayssiis. (Oos. 10:28, 34, 35; Gal. 2:11-14) Hegaadan, nuuni coo ixxiyoogaa woy nu zariyan ceeqettiyoogaa akeekikko, hegaa nu wozanaappe xayssanawu keehi baaxetana koshshees. (1 PHe. 1:22) Nuuppe ooninne nu ooson atotettaa demmana bessennaagaa qoppana danddayoos; nu zaree ayba gidikkonne, nuuni ubbaykka nagarancha. (Roo. 3:9, 10, 21-24) Hegaa gishshawu, nuuni ooppenne aadhoos giidi qoppanaadan oottiyaabi baawa! Ba mala tiyettida Kiristtaaneta, “Hagaappe sinttau allaga woi imatta gidekketa; . . . qassi Xoossaayyo intte so asa” yaagidi zorida, kiitettida PHawuloosaagaa mala qofay nuuyyo deꞌana koshshees. (Efi. 2:19) Nuuppe wogan dummatiya asaa coo ixxiyoogaa agganawu wozanappe baaxetiyoogee nuuni ooratta asatettaa maayanaadan maaddees.—Qol. 3:10, 11. w16.10 1:9

Nu ammanoy mino gididi deꞌanaadan Yihooway ba kehatettan ba Qaalaa, Geeshsha Maxaafaa nuussi immiis. Nuuni ufayttanawu ay oottana koshshiyaakko i Geeshsha Maxaafan yootiis. Nuuni Geeshsha Maxaafaa galla galla nabbabiyoogeenne a kaaletuwaa kaalliyoogee loꞌꞌo gidiyoy hegaassa. (Maz. 1:1-3; Oos. 17:11) Qassi, Kiristtaanetu wodiyaappe kase Yihoowayyo goynnidaageetudan, nuuni Xoossay qaalaa gelidobaa wotti dentti qoppananne a azazota azazettana koshshees. Yihooway ‘ammanettida wozannaama ashkkaraa’ baggaara gidi palahiya ayyaanaabaa qumaa giigissiyoogankka nuna anjjiis. (Maa. 24:45) Beni wode deꞌida Xoossaa asatuugaadan, nuuni Xoossay qaalaa gelidobaa muletoo nabbabananne hegaa wotti denttidi qoppana koshshees. Yaatiyoogee nuuni Xoossawu ammanettidi deꞌanaadaaninne a Kawotettay kumetta saꞌaa haariyo wodiyaa hidootan naaganaadan maaddees. (Ibr. 11:1) Kiristtaanetu wodiyaappe kase deꞌida markkati ammanuwan mino gididi deꞌanaadan woosaykka keehi maaddiis. Xoossay eta woosaa zaariyoogaa eti akeekido wode, eta ammanoy minniis.—Nah. 1:4, 11; Maz. 34:4, 15, 17; Dane. 9:19-21. w16.10 3:7, 8

“Higgiyaa giddon ubbaappe aadhdhiya azazoi augee?” giya oyshaa zaariyo wode, Yesuusi ubbaappe aadhiya, Xoossaa siiqiyo eeshshaabaa qonccissiis. (Maa. 22:35-40) Ammanoykka siiqoykka keehi koshshiya eeshsha; qassi Geeshsha Maxaafaa xaafeti darotoo eta issippe qonccissidosona. PHawuloosi ba ishantti “ammanuwaanne siiquwaa tiran wottiyo ola miishshadan” oyqqanaadan zoriis. (1 Tas. 5:8) Yohaannisi, “Xoossaa Na7aa Yesuus Kiristtoosa sunttan nuuni ammananaadaaninne issoi issuwaara siiqettanaadan Xoossai nuna azaziis” yaagiis. (1 Yoh. 3:23) Ammanoy keehi koshshiyaaba gidikkonne, Xoossay qaalaa gelidobay polettiyoogaanne Kiristtaaneti hidootan naagidobay qoncciyoogaa beꞌiyo wode, hegaara gayttidaagan ammaniyoogee attees. SHin nuuni Xoossaanne nu shooruwaa kaseegaappe aaruwan siiqana koshshiyoogee mule attenna. Yaatiyo gishshawu, PHawuloosi, “SHin hegaa gidikko, ammanoi, hanana giidi ufaissan naagiyoogeenne siiqoi, hageeti heezzai minnidi de7oosona. De7inkka hageetuppe aadhdhiyaagee siiquwaa” yaagiis.—1 Qor. 13:13. w16.10 4:15-17

Bolla gididi heemmiyaagaa gishshaa issisaappe harasaa biya ishantti “Yesuusi kiittido Yerusalaamen de7iyaageetinne cimati wottido higgiyaa” woy kuuyidobaa yootidosona. (Oos 16:4) Gubaaꞌeti he kuuyidobaa naagiyo wode, “ammanuwan minnidi, qoodankka gallassappe gallassan dari dari biidosona.” Xoossaa dirijjitiyaappe kaaletoy imettiyo wode waatana koshshii? Nuuni ubbay azazettanaadaaninne haarettanaadan Yihoowa maxaafay yootees. (Zaa. 30:16; Ibr. 13:7, 17) Boriyaageetussi woy makkaliyaageetussi Xoossaa dirijjitiyan sohoy baawa; hegaa mala eeshshay nu siiquwaa, nu sarotettaanne nu issippetettaa moorana danddayees. Ammanettida Kiristtaanee Diyotirefeesadan bonchennanne ammanettenna asa gidanawu koyenna. (3 Yoh. 9, 10) Nuuni nuna hagaadan oychana danddayoos: ‘Taani harata ayyaanaaban maaddiyaanaa? Gubaaꞌiyaa cimati immiyo kaaletuwaa eesuwan siyiyaanaanne kaalliyaanaa?’ w16.11 2:10, 11

Yihoowa azazuwaa azazettida omoodettidi biida Ayhudati Baabiloonen maara deꞌidosona. Baabilooneti Ayhudati bantta allaalliyaappe dariya baggaa banttawu polanaadaaninne he biittan laꞌatettan issisaappe harasaa baanaadan oottidosona. Beni wode alamiyan Baabiloonee zalꞌꞌiyawu waanna soho; qassi yan daro Ayhudati waati shammiyaakkonne waati bayzziyaakko tamaaridoogaanne harati gooba hiillancha gididoogaa bookki demmido naqaashay qonccissees. Ubba amarida Ayhudati duretidosona. Baabiloonen omoodettidi deꞌiyoogee Israaꞌeelati daro xeetu layttaappe kase Gibxxen aylle gididi deꞌidoogaa mala gidenna. (Kes. 2:23-25) SHin Israaꞌeelati zaarettidi Xoossay koyiyoogaadan kumetta hanotan ayyo goynnana danddayiyoonaa? He wode, eti danddayennaba milatees. Baabilooneti omooddidoogeeta mule yeddokkona. SHin, Yihooway ba asay laꞌa kiyaanaagaa qaalaa gelidoogaadan, eti laꞌa kiyidosona. Xoossay qaalaa gelidobay polettennan attenna.—Isi. 55:11. w16.11 4:3, 5

Kiristtaaneti saꞌan paxa deꞌiiddi waanidi hagaadan geetettii? Xoossay wozuwaa baggaara PHawuloosaagaa gujjin, he wode deꞌiya hara Kiristtaanetu nagaraa atto giis. Hegaa gishshawu, eti awu ayyaana naata gidanaadan Yihooway geeshsha ayyaanan tiyiis. Hegaappe denddidaagan, etawu saluwaa biyo hidootay deꞌees. Eti ammanettidi deꞌikko, saluwan Kiristtoosaara issippe haarana. SHin PHawuloosi eti saꞌan Xoossawu oottiiddikka, ‘nagarawu hayqqiichidoogaa’ yootiis. I hegaa qonccissanawu asatettan hayqqidi, hayqqenna ayyaana mereta gididi saluwan deꞌanawu denddida Yesuusa leemisuwaa goꞌettiis. Hayqoy naaꞌꞌantto Yesuusa haarenna. ‘Nagaraa oottennaadan hayqqidabadan, qassi Kiristtoos Yesuusa baggaara Xoossawu paxa deꞌiyaabadan qoppiya’ ayyaanan tiyettida Kiristtaanetu hanotaykka hegaa mala. (Roo. 6:9, 11) Eta deꞌoy kaseegaa mala gidenna. Eti nagaraa oottanaadan denttettiya amuwawu haarettiyoogaa aggidosona. Eti bantta kase deꞌuwawu hayqqidosona. w16.12 1:9, 10

Hegee Geeshsha Maxaafaabaa, Xoossaa siiqiyoogaabaanne i sinttappe immana giidobaa xallaa qoppiyoogaanne haasayiyoogaa gidenna. PHawuloosinne Xoossaa ufayssida koyro xeetu layttan deꞌidaageeti hara asaagaappe dumma deꞌuwaa deꞌibeennaagaa hassayoos. Eti miidosonanne uyidosona. Daroti machidi woy gelidi bantta so asaara deꞌidosona, qassi banttawu koshshiyaabaa demmanawu oottidosona. (Mar. 6:3; 1 Tas. 2:9) SHin Xoossawu oottida he asati asatettawu koshshiya he allaalleta bantta deꞌuwan koshshiya waannaba oottidi qoppibookkona. Geeshsha Maxaafay PHawuloosi bawu koshshiyaabaa demmiyoy dunkkaaniyaa sikiyoogaana gidiyoogaa yootikkokka, a waanna oosoy sabbakiyoogaanne tamaarissiyoogaa gidiyoogaakka qonccissees. (Oos. 18:2-4; 20:20, 21, 34, 35) Qassi i Roomen deꞌiya Kiristtaaneti hegaadan oottanaadan minttettiis. Ee, PHawuloosi ubbatoo ayyaanaabaa qoppiisinne oottiis. Roomen deꞌiya ishatinne michoti a leemisuwaa kaallidosona; nuunikka hegaadan oottana koshshees.—Roo. 15:15, 16. w16.12 2:5, 15, 16

Yihooway nuuni ayyo haggaazanawu oottiyo ubbabaa nashshiyoogaa ammanettana danddayoos. I nuuni hirgganaadan woy siranaadan oottiya ubbabaa akeekees. Nuna miishshi metiyo wode woy nuuni harggidi woy unꞌꞌettidi kaseegaa keenaa haggaazennan aggiyo wode, i nuussi qarettees. A ashkkarati ayyo ammanettidi deꞌanawu oottiyoobaa, Yihooway nashshiyoogaa ammanettana danddayoos. (Ibr. 6:10, 11) Nuna qofissiyaabaa i siyanaagaa ammanettidi ‘woosaa siyiyaagaakko’ shiiqana danddayiyoogaakka hassaya. (Maz. 65:2) ‘Maarotettaa Aawaynne minttetto ubbaa Xoossay’ qofaaninne ayyaanaaban nuussi koshshiyaabaa kehatettan immees; i yaatiyoy nu mala Kiristtaanetu baggaara gidana danddayees. (2 Qor. 1:3) Nuuni haratuyyo qarettiyo wode Yihooway ufayttees. (Maa. 6:3, 4) Hegaadan kehiya uraa i woytanawu qaalaa geliis. w16.12 4:13, 14

Yesuusi saꞌan deꞌiyo wode, ba koyidobaa dooriyo maataa goꞌettidi gita Morkkiyaa paaciyaa eqettiis. (Maa. 4:10) Hayqqanaappe kase qammi, Yesuusi wozanappe woossido woosan Xoossaa sheniyaa oottanawu murttidoogaa qonccissiis. I, “Ta Aawau, neeni koyiyoobaa gidikko, ha burccukkuwaa taappe digga; shin neeni koyiyoobai hanoppe attin, taani koyiyoobai hanoppo” yaagiis. (Luq. 22:42) Koyidobaa dooriyo maataa goꞌettidi Yihoowa bonchissiyoogaaninne a sheniyaa oottiyoogan Yesuusa milatiyaageeta gidoos! Hegaadan oottana danddayettii? Ee, Yesuusa milatana danddayoos; ayssi giikko, nuunikka Xoossaa leemisuwan a milatidi merettida. (Doo. 1:26) Nu hanotay Yihoowagaappe dumma; nuuni ubbaban laꞌa gidokko. Nuuni laꞌa gidennabay deꞌiyoogaa, qassi eeno giidi hegaa azazettanaadan Yihooway koyiyoogaa Geeshsha Maxaafay yootees. Qassi, machoti bantta azinatuyyo, naatikka bantta aawaayyoonne aayeeyyo haarettana koshshees.—Efi. 5:22; 6:1. w17.01 2:4, 5

Keehi ufayssiya wodiyan deꞌoos. Yihoowa dirijjitiyawu saꞌaa baggay daro ogiyan dicciiddi deꞌees; shin dichay laamee koshshanaadan oottees. He laamee nunaara gayttidaba gidiyo wode, nu koshshaappe Yihooway koyiyoobaa loytti qoppiyoogan, nu huuphiyaa kawushshiyaageeta gidoos. Yaatiyoogee issippetettaa minttees. PHawuloosi Roome Kiristtaanetussi hagaadan giidi xaafiis: “Nu issi bollaa giddon, daro bollaa qommoti de7oosona; he qommotu ubbaukka dumma dumma oosoi de7ees. Hegaadan, nuuni daro asa gidikkokka, Kiristtoosa baggaara issi asa.” (Roo. 12:3-5) Simi nu hanotay ayba gidikkokka, ubbaykka maalaaliya Yihoowa Kawotettawu koshshiyaabaa oottiyaageeta gidoos. Cima ishanttoo, yelagati intte oottiyoobaa oottanaadan loohissite. Yelagatoo, aawatettaa ekkite, ashkke gidite, qassi cimidaageeta bonchite. Qassi machotoo, eta hanotay laamettiyo wode Aqiila miyyiyan eqqidanne a maaddida a machee PHirisqqili leemisuwaa kaallite.—Oos. 18:2. w17.01 5:15, 16

Yihoowa kiitanchay awu koyro qonccido wode, Geedooni a yeletaynne i oottidobay laafa gidiyoogaa sohuwaara yootiis. Geedooni baayyo Yihooway immido oosuwaa ekki simmidi, hegaa loytti akeekidoogaa shaakki eranawu koyiis, qassi kaaletuwawu Yihoowakko xeelliis. (Daan. 6:36-40) Geedooni xalanne mino asa. SHin i ba oottiyooban naagettiyaanne cincca asa. (Daan. 6:11, 27) I bawu imettida oosuwan erettida asa gidanawu koyibeenna. SHin simmana danddayiyo wode, ufayttidi ba kase sohuwaa simmiis. (Daan. 8:22, 23, 29) Ashkke gidiyoogaa giyoogee nuuni hara haggaazo maataa demmanawu baaxetana koshshenna woy he maataa ekkana koshshenna giyoogaa gidenna. Nuuni ubbay diccanaadan Geeshsha Maxaafay minttettees. (1 Xim. 4:13-15) SHin oosoy laamettiyoogee diccanawu ubbatoo koshshiyaabee? Koshshennan aggana danddayees. Nuuni haꞌꞌi ay oottikkokka, Yihooway anjjin ayyaanaaban diccana danddayoos. Xoossay immido eraa gujjananne loꞌꞌo oosuwaa darissidi oottana danddayoos. w17.01 3:15, 16

Yihooway keehi qohettidi wozuwaa giigissiis. (1 PHe. 1:19) I asaa alꞌꞌobadan xeelliyo gishshawu, ba mexi issi Naꞌay nu gishshawu hayqqanaadan ba dosan immiis. Hegee Yesuusi Addaame gishshaa nuussi aawa gidiis giyoogaa mala. (1 Qor. 15:45) Hegaadan oottiyoogan, Yesuusi nuuni merinaa deꞌuwaa demmiyoogaa xalla gidennan, wurssettan Xoossaa keettaa asa gidanaadankka oottiis. Yesuusa yarshshuwaa baggaara, Yihooway ba xillotettaa maaraa kanttennan asaa ba so asa oottana danddayees. Ammanettida ubbay nagari baynna asa gidiyo wodiyaabaa qoppiyoogee keehi ufayssiyaaba! He wode, saluwankka saꞌankka deꞌiya Xoossaa keettaa asaa giddon polo issippetettay deꞌana. Nuuni ubbay Xoossaa naata gidana. (Roo. 8:21) Nuuni wozuwaa nashshiyoogee, he alꞌꞌo imotay banttana goꞌꞌana danddayiyoogaa akeekanaadan harata maaddanawu nuuyyo danddayettida ubbabaa oottanaadan denttettana bessees. w17.02 1:17, 19

Isiine 15, 2013, Wochiyo Keelay ‘ammanettida wozannaama ashkkaray’ Bolla Gididi Heemmiyaagaa yame gidida ayyaanan tiyettida amarida ishanttu cita gidiyoogaa qonccissiis. Bolla Gididi Heemmiyaagee keehi koshshiyaabaa issippe kuuyees. Waatidi? A yameti saaminttan saaminttan shiiqiyoogee, eti issippe maayettidi haasayanaadaaninne issippetettan oottanaadan maaddees. (Lee. 20:18) Bolla Gididi Heemmiyaagaa yameti issoy issuwaappe aadhenna gishshawu, eti layttan layttan he shiiqotun kayan kayan liqambbare gidoosona. (1 PHe. 5:1) Bolla Gididi Heemmiyaagaa usuppun konttetunkka hegaadan kayan kayan liqambbaree laamettees. He citaa yameti ubbaykka banttana bantta ishantta kaalettiyaabadan gidennan, ammanettida ashkkaray miziyoonne kaalettiyo ‘so asa’ yamedan xeelloosona. Bolla Gididi Heemmiyaagee Xoossaappe ajjuutaa beꞌenna woy qassi bali baynnaagaa gidenna. Hegaa gishshawu, tamaarissiyooban woy dirijjitiyaa kaalettiyo ogiyan balana danddayees. w17.02 4:10-12

Wozuwaa nashshiyoogaa bessiyaabaa oottiyo issi ogee wozuwaa ammanidi nu huuphiyaa Yihoowayyo geppidi xammaqettiyoogaa. Xammaqettiyoogee ‘nuuni Yihoowassa’ gidiyoogaa bessees. (Roo. 14:8) Yihooway ubbabaa oottanaadan denttettiyay siiqo gidiyo gishshawu, i baassi goynniya ubbatuyyo siiqoy waanna eeshsha gidanaadan koyees. (1 Yoh. 4:8-11) Nuuni nu shooruwaa siiqiyoogan “saluwan de7iya [nu] Aawau naata” gidanawu koyiyoogaa bessoos. (Maa. 5:43-48) Nu shooruwaa siiqiyoogee Yihoowa siiqiyoogaappe kaalliya azazo. (Maa. 22:37-40) Xoossaa Kawotettaa mishiraachuwaa asawu yootanaadan imettida azazuwaa azazettiyoogan nu shooruwaa siiqiyoogaa bessana danddayoos. Nuuni asaa siiqiyo wode Xoossaa bonchuwaa qonccissoos. Nuuni hara asaa, ubba qassi nu ishantta siiqiyo wode, Xoossaa siiqiyoogee ‘nu giddon polettees.’—1 Yoh. 4:12, 20. w17.02 2:13, 14

Yihoowawu oottiyoogee awudenne gidin eratetta, qassi maaddiyaaba gidiyo gishshawu hegee dooranawu metennaba gaada qoppana danddayaasa. Suure qoppiya uri Baꞌaala goynuwaa dosana bessennaagee erettidaagaa. SHin, Israaꞌeelati he wodiyankka ‘naaꞌꞌu qofan boosona.’ Eelaasi eti tumu Xoossawu Yihoowawu goynnanawu dooranaadan zoriis. He Israaꞌeelati eratettan kuuyanawu keehi metootidoy aybisee? Koyruwan, eti Yihoowa ammaniyoogaa aggidosonanne a cenggurssaa siyanawu ixxidosona. Eti Yihoowan ammanettibookkona, qassi abaanne a aadhida eratettaabaa wodiyaa bazzidi tamaaribookona. Tamaaridabaa gidiyaakko hegee eti eratettan kuuyanaadan maaddana shin. (Maz. 25:12) He biittan deꞌiya Yihoowawu goynnenna asati banttaagaadan eeqawu goynnanaadan oottiyoogan Israaꞌeelatu qofaa mooridosona. Hegaa malabay hanana danddayiyoogaa Yihooway daro wodiyaappe kasetidi yootiis.—Kes. 23:2. w17.03 2:6, 7

Hizqqiyaasa hanotaa wotti denttidi qoppiyoogan Xoossaara deꞌiya nu dabbotaa mooriyaabay woy tumu goynuwaappe nuna haassiyaabay deꞌikko hegaa giigissana koshshiyoogaa akeekana danddayoos. Interneettiyan daro asaara gayttiyo ogeta goꞌettidi asawu goynniyoogaa keena eta xoqqu ootti xeelliya ha alamiyaa asaa milatana koyokko. Issi issi Kiristtaaneti hegaa malaban bantta soo asaaranne mata laggetuura haasayiyoogaaninne gayttiyoogan ufayttana danddayoosona. SHin ha alamiyan deꞌiya daro asati eti mule erenna asaa kaallanawu Interneettiyan daro asaara gayttiyo ogeta keehi daro saatiyawu goꞌettoosona. Eti he asatu pootuwaa beꞌiyoogan woy he asatubaa nabbabiyoogan keehi daro wodiyaa aattoosona. Hegaadan oottiya uri darin koshshennaban ba wodiyaa wurssana danddayees. Issi Kiristtaanee a pootuwaa woy i xaafidobaa daro asay dosido gishshawu otorettana danddayees; woy eti a kaalliyoogaa aggikko yiillotana danddayees. Nuuni hagaadan giidi nuna oychana danddayoos: ‘Haratuyyo goynniyoogaa keena eta xoqqu ootta xeellennan agganawu naagettiyaanaa woy ta alꞌꞌo wodiyaa darin koshshennaban aattennan agganawu murttidanaa?’—Efi. 5:15, 16. w17.03 3:14, 17