Hidaare

Nu huuphiyaa naagiyoogee nu eeshshaanne nu qofaa loyttanawu nuna seeriyoogaakka bessiyaaba. Nuuni nu huuphiyaa naagiyaageeta gididi yelettibookko. Nuuni hegaa tamaarana koshshees. Yelidaageeti danddayidi ubbatoo bantta guutta naata “Godaa seeraaninne zoriyan” loohissiyo wode, naati bantta huuphiyaa naaganaadaaninne aadhdhida eranchcha gidanaadankka eti maaddoosona. (Efi. 6:4) Gitaa gididi Yihoowa eridaageetussikka he maaray hanees. Eti amarida hanotan bantta huuphiyaa naagidoogee qoncce. SHin, mati erissiyo ashkkara gididaageeti ayyaanaaban kayma gidibookkona. Gidoppe attin, eti Kiristtoosa milatidi “ooratta asatettaa” maayiyoogaa tamaariyo wode, loddan loddan kayma gidana danddayoosona. (Efi. 4:23, 24) Hegaadan diccanawu ba huuphiyaa naagiyoogee keehi koshshiyaaba. w18.03 29 ¶3-4

Nuuni ayyaanaa qumaa nunaara shoobettidi nu shiiquwaa yiya ubbata mokki ekkoos. Nuna imattiyaageeti Yihoowanne A dirijjitiyaa. (Roo. 15:7) Imattati shiiquwaa yiyo wode nuunikka eta imattoos. Eta maayoy woy alleeqoy aybanne gidin, nuuni eta mokki ekkana koshshees. (Yaaq. 2:1-4) Imatta asa shoobbiyay xayikko, I ne matan uttanaadan oychchuutii? I shiiquwaa kaallanaadaaninne geella xiqisiyaa beꞌanaadan neeni maaddin nashshana danddayees. Hegee ‘imattaa mokkiyo’ loꞌꞌo oge. Dere haasayaa haasayiya hara gubaaꞌiyaa ishati, woradaa xomoosiyaageetinne issi issitoo, macaraa biiruwaappe kiitettidaageeti yiyo wode nuuni he ishantta imattana danddayoos. (3 Yoh. 5-8) Miyoobaanne uyiyoobaa shoobbiyoogee hegaadan oottiyo loꞌꞌo oge. Ne hegaadan shoobbana danddayay? w18.03 15 ¶5, 7

Kase Kiristtaaneta yedettiya Ayhuda bitaniyaa leemisuwaa qoppa. I Xoossawu aqida deretettan yelettiis. SHin Ayhudati Yihoowaara dumma dabbotettan deꞌiyoogaa aggidosona. He bitanee Ayhuda wogaa mintti kaallikkonne, hegaappe kehiya ogiyaabaa tamaariis. Hayquwaappe denddidanne bonchchettida Yesuus Kiristtoosi ayyo markkattiis. He bitanee waatidee? I Kiristtaane gidida Hanaaniyaa maaduwaa eeno giidi ekkiis. Geeshsha Maxaafay I ‘denddidi xammaqettidoogaa’ yootees. (Oos. 9:17, 18; Gal. 1:14) Guyyeppe PHawuloosa geetettida he Ayhuda bitaniyaa neeni eriyoogee qoncce. SHin, Xoossaa sheniyaa poliyoogan Yesuusawu deꞌiya maataabaa tumaa akeekidi, PHawuloosi baappe koyettiyaabaa oottidoogaa akeeka. I sohuwaara xammaqettiis. Geeshsha Maxaafaa tamaariya yelaga woy gastta asatu hanotaykka hegaa mala.—Oos. 22:12-16. w18.03 5-6 ¶9-11

Yaaqooba deꞌoy metiis. A worana koyiya, asatettaabaa qoppiya A ishaa Eesawa I danddayana koshshiis. Hegaa bollikka, A bolloy A darotoo cimmiis. SHin Yaaqoobi asatettaabaa qoppiya asaa giddon deꞌiiddi ayyaanaabaa qoppiis. (1 Qor. 2:14-16) I Yihooway Abrahaamayyo gelido qaalaa ammaniis; qassi Yihoowa halchchoy eta baggaara polettiyo ba keetta asawu koshshiyaabaa kunttiis. (Doo. 28:10-15) Yaaqoobi haasayidobaynne oottidobay Xoossay kessido maaraanne A sheniyaa I akeekiyoogaa bessees. Leemisuwawu, Yaaqoobi Eesawa yayyido wode Xoossaa hagaadan giis: “Taani nena woossais; . . . tana ashsha; . . . neeni tana, ‘Taani neeyyo tumu lo77obaa oottana; taani ne zerettaanne . . . abbaa shafiyaa keena oottana’ giidoogaa qoppa.” (Doo. 32:6-12) I Yihooway qaalaa gelidobaa ammanidoogeenne Xoossaa sheniyaaraanne A halchchuwaara maayiyaabaa oottanawu koyidoogee qoncce. w18.02 20 ¶9-10

Iyyooba deꞌoy phalqqetta hanotati kumidobaa xannaꞌiyooba. Paacee gakkanaappe kase “arshsho baggaara de7iya asa ubbaappe i aadhdhida dure asa.” (Iyy. 1:3) I keehi dure, keehi erettidanne bonchchettida asa. (Iyy. 29:7-16) SHin he ubbabay deꞌikkonne, Iyyoobi bana xoqqu xoqqu oottibeenna woy Xoossay baassi koshshennabadan xeellibeenna. Yihooway A “ta ashkkaraa” yaagiis. Seexaanay dumma dumma qohuwaa ziiriyaa oyttidi Iyyooba bolli gattin, Iyyoobi hegan Xoossaa amassaliis. (Iyy. 1:13-21) Hegaappe simmin minttettiyaaba milatidi heezzu asati Xoossay Iyyoobawu A kushiyaa zaariis giidi hanttaara qaalatun A qohidosona! (Iyy. 2:11; 22:1, 5-10) SHin Iyyoobi Xoossan ammanettidi deꞌiis. Paacee wurin, Iyyoobawu hegaappe kase deꞌiyaabaappe dakko daruwaa Yihooway ayyo immidi, A bariyaa bolli 140 layttaa gujjiis. (Yaaq. 5:11) He wodiyan, I Yihoowa xallawu aqidi deꞌiis. w18.02 6 ¶16; 7 ¶18

Hegaa mala eeshshay deꞌiyo asati nashettanawunne sabettanawu keehi koyoosona. Issi eranchchay hegaa mala asa xeelliyaagan, “A wozanaa giddon I A sinttan goynniyo guutta yarshsho sohoy deꞌees” yaagiis. Likkiyaappe aattidi otorettiyoogee sheneyiyaaba gidiyo gishshawu, otorettiya uraykka harati otorettiyo wode dosennaagaa issoti issoti yootoosona. Otoroy Yihoowa sheneyiyaaba gidiyoogee qoncce. I “karidi xeelliya aifiyaa” ixxees. (Lee. 6:16, 17) Otoroy issi uri Xoossaakko shiiqennaadan diggees. (Maz. 10:4) Hegee Dabloosa eeshsha. (1 Xim. 3:6) SHin, Yihoowayyo ammanettida ashkkaratuppe amaridaageetikka otorettidoogee azzanttiyaaba. Yihudaa kawoy Ooziyaani daro layttawu ammanettiis. “SHin Ooziyaani minnido wode otorettiis; otoroi A kunddettau kaalettiis. Ooziyaani GODAA ba Xoossaa naaqqiis; . . . ixaanaa cuwayanau GODAA Beeta Maqidasiyaa geliis” yaagidi Geeshshaa Maxaafay yootees. Guyyeppe, Kawuwaa Hizqqiyaasikka guutta wode xallawu gidikkonne, otorettiis.—2 Odi. 26:16; 32:25, 26. w18.01 28 ¶4-5

Issi uri ba aquwaappe immiyoogee Geeshsha Maxaafay loytti yootiyooba. Issi issi hanotan, Yihoowa asay keexxiyoobawu immiis. (Kes. 35:5; 1 Odi. 29:5-9; 2 Kaw. 12:4, 5) Namisaa gaasuwan maadoy koshshiyo ishantti deꞌiyoogaa koyro xeetu layttaa Kiristtaane gubaaꞌee akeekidi, eti “huuphiyan huuphiyan bantta wolqqaa keenaa miishshaa peeridi, Yihudan de7iya bantta ishanttussi maaduwaa yeddanau qofaa qachchidosona.” (Oos. 11:27-30) Koyro xeetu layttan, issi issi Kiristtaaneti bantta aquwaa, hegeekka gadiyaa woy keettaa bayzzidi miishshaa kiitettidaageetuyyo ehiidosona. Kiitettidaageeti he miishshaa maadoy koshshiyoogeetuyyo immidosona. (Oos. 4:34, 35) Harati qassi miishshaa dagayidi oosuwaa maaddanawu ubbatoo immoosona. Hegaa gishshawu, dureekka hiyyeesaykka ubbay immiis.—Luq. 21:1-4. w18.01 18 ¶7; 19 ¶9

Nuuyyo ay keena eray deꞌiyaakkokka, nuuni nu wolqqan oottana danddayiyoobay keehi guutta. Hegaa nuuni ubbay akeekana bessees. Kiitettida PHawuloosi darobaa oottidaba gidikkonne, I koyiyoobaa ubbaa oottana danddayibeenna. I bana qofissidabaa Xoossawu odin Xoossay, “Ta wolqqai daafuran polettees” yaagiis. PHawuloosi he qofaa akeekiis. I, “Taani daafuriyo wode, he wode minnais” yaagiis. (2 Qor. 12:7-10) Hegee woygiyoogee? PHawuloosi baappe keehi wolqqaamiya uri maaddana xayikko, barkka oottana danddayiyoobi keehi guutta gidiyoogaa akeekiis. PHawuloosawu paccida wolqqaa Xoossaa ayyaanay kunttana danddayees. Hegaa xalla gidennan, PHawuloosi ba wolqqan mule oottana danddayennaba oottanaadan Xoossaa ayyaanay maaddana danddayees. Nu hanotaykka hegaa mala. Wolqqaa Yihoowappe demmiyo wode, nuuni minnana! w18.01 9 ¶8-9

Intte naꞌay xammaqettanawu koyiyoogaa yootikko, Yihoowa dirijjitee yelidaageetussi giigissidobata loytti goꞌettite. Yaatiyoogee, naꞌay ba huuphiyaa Yihoowawu geppiyoogeenne xammaqettida Kiristtaane gidiyoogee keehi gitaba, qassi anjjuwaa demissiyaaba gidiyoogaa ayyo qonccissanawu maaddees. Aawatoonne aayetoo, intte naata “Godaa seeraaninne zoriyan” dichiyo gita aawatettaynne matay intteyyo deꞌees. (Efi. 6:4) Hegaadan oottanawu Geeshsha Maxaafay yootiyoobaa tamaarissiyoogaa xalla gidennan, eti tamaaridobaa mintti ammananaadan maaddanakka koshshees. Eta ammanoy eti bantta huuphiyaa Yihoowawu geppanaadaaninne ayyo kumettaa wozanappe haggaazanaadan denttettiyaagaa keena mino gidana koshshees. Yihoowa Qaalay, a ayyaanay, qassi intte oottiyoobay intte naati ‘aadhida erancha gididi attanaadan’ maaddana mala amottoos. w17.12 22 ¶17, 19

Daaneeli bawu layttay 100 heera gidiininne i hayqqiyo wodee matiis. Daaneela maxaafaa wurssettan Yihooway ayyo, “Nena gidikko, neeni wurssettai gakkanaashin ba. Neeni shemppana” yaagidi qaalaa geliis. Cimida Daaneeli “Halchchoi, woikko eri, woikko aadhdhida eratetti” baynnan, hayqqidaageeti duufuwan shemppiyoogaa i erees. (Era. 9:10) SHin, hegee awu wurssetta gidenna. I sinttappe ufayssiya hidootaa demmanaagaa Yihooway yootiis. Hananabaa yootiya Daaneeli denddanaagee awu odettidoogaa hachi gallassa xiqisiyan qoncciis. SHin he gallassay woy wodee awu odettibeenna. Daaneeli hayqqidi shemppanawu deꞌees. Gidoppe attin, i sinttappe “laataa ekkanau denddana” geetettidoogee hayqqoosappe daro wodee aadhin i denddana hidootaa qonccissees. Hegee “gallassatu wurssettan” hanana. Daaneelayyo odettida he qaalaa issi Geeshsha Maxaafaa birshettay, “Nena gakkiya shaahuwaa ekkanawu neeni wodiyaa wurssettan denddana” yaagees. w17.12 7 ¶17-18

Yihooway Israaꞌeela cimati i kessido suure pirddaa maaraa kaallanaadan azaziis. Koyrottidi cimati hanidabaa wurssi akeekana koshshees. Hegaa bollikka, eti asa worida ura maarana bessiyaakkonne shaakki eranawu a koshshaa, a qofaanne a kase eeshshaa loytti yiggi xeellana koshshees. Eti Xoossaagaadan suure pirddanawu bitanee “morkkidi,” qassi “zuggidi” asa woridaakkonne shaakki erana bessees. (Qoo. 35:20-24) Izaawu bolli pirddanaappe kase naaꞌꞌu woy hegaappe daro markkati markkattana koshshees. Cimati hanidabaa loytti akeeki simmidi, bitanee oottidobaa xallaa gidennan, abaakka qoppana koshshees. Eti qoncce gididabaappe aadhiyaabaanne hanidabawu gaaso gididabaa akeekana koshshees. Ubbaappe aaruwan, Yihoowagaadan akeekanawu, maaranawunne suure pirddanawu etawu a geeshsha ayyaanay koshshees.—Kes. 34:6, 7. w17.11 16 ¶13-14

Nuuni Xoossaa asaara koyro gayttiyoogaa doommido wode, keehi alꞌꞌo gidida amarida tumaa erida. Nuuni Yihooway nuna Medhidaagaanne nuuyyo Deꞌuwaa Immidaagaa gidiyoogaa, qassi i asawu halchidobaa tamaarida. Nuuni nagaraappenne hayquwaappe laꞌa kiyana mala Xoossay ba Naꞌaa wozuwaa yarshshuwaa siiquwan giigissidoogaakka tamaarida. A Kawotettay meto ubbaa xayssanaagaa, qassi he Kawotettaa haaruwan sarotettaaninne ufayssan merinawu deꞌiyo hidootay nuussi deꞌiyoogaakka tamaarida. (Yoh. 3:16; Ajj. 4:11; 21:3) Issi issitoo, Geeshsha Maxaafaa hiraagaa woy amarida xiqiseta nuuni akeekiyo ogee laamettana danddayees. Laamettida qofay qoncciyo wode, nuuni he qofaa loytti xannaꞌanawunne hegaa wotti dentti qoppanawu wodiyaa bazzana koshshees. (Oos. 17:11) Nuuni kase eriyoobaappe haꞌꞌi laamettida gitabaa xalla gidennan, he laamettida ooratta qofaa loyttidi akeekana koshshees. Hegaadan loytti xannaꞌikko, he ooratta tumay nuuni Geeshsha Maxaafaappe minjjido tumaappe issuwaa gidees. w17.06 12-13 ¶15-16

Yihooway kessido kandduwaa maaraa kanttanaadan paacciyaabay gakkiyo wode, nuuni keehi naagettana koshshees. Leemisuwawu, ekkanawunne gelanawu qoppiyaageeti issippe wodiyaa aattiyoogaa doommiyo wode, issoy issuwaa bollaa bochiyoogaa, yeriyoogaanne asi baynnasan takkiyoogaa mala hanotaa xeelliyaagan haasayana bessees. (Lee. 22:3) Issi Kiristtaanee oosuwawu sooppe haakkidi biyo wode woy mattuman baappe dummatiya uraara oottiyo wode, shori baynnabaa oottanaadan paacettana danddayees. (Lee. 2:10-12, 16) Hegaa bollikka, nuuni azzaniyaaba woy boorasiyaaba gidikko, naagettana bessees. Nuuni keehi unꞌꞌettidi, nuussi qoppiya ookkonne shiiqana danddayoos. Nena hegaa malabay gakkikko, maaduwaa demmanawu Yihoowakkonne a asaakko shiiqa.—Maz. 34:18; Lee. 13:20. w17.11 26 ¶4-5

Beni Israaꞌeela biittan asa woriyoogaa Yihooway xaasayi xeellibeenna. Hayqqida urawu mata dabbo gidida, ‘suuttaa achiyaagaa’ geetettiya attuma asi eriiddi asa woridaagaa worees. (Qoo. 35:19) Hegee aynne moorennan worido ura suuttaa gishsha qanxxettiyaaba. He uraa sohuwaara woriyoogee Hidootaa Biittay tunennaadan oottees. Ayssi giikko, Yihooway, “Intte de7iyo biittaa tunissoppite. Aissi giikko, suuttaa gussiyoogee biittaa tunissees” yaagiis.(Qoo. 35:33, 34) SHin issi uri erennan asa worikko, Israaꞌeelati waatiyoonaa? I akeekennan worikkokka, aynne mooribeenna asa suuttaa Xoossay appe achees. (Doo. 9:5) Gidoppe attin, i suuttaa achiyaagaappe baqatidi attiyo usuppun katamatuppe issuwaa baana danddayees. Yan, i hirggennan deꞌana danddayees. Erennan asa worida uri qeese ubbatu halaqay hayqqana gakkanaashin he kataman takkana bessees.—Qoo. 35:15, 28. w17.11 9 ¶3-5

Awusttiraaliyan deꞌiya issi michiyaa hagaadan gaasu: “Ta azinaa aawantti tumaa keehi eqettidosona. Eta oychanawu baanaappe kase, hanqqetissiyaabay merettiyo wode hanqqettidi zaarennaadan maaddana mala ta azinaynne taani Yihoowa woossoos. Daro saatiyaa haasayiiddi haymaanootiyaabaa palamettenna mala, ay keena wodiyaa tobbanaakko kasetidi kuuyoos.” Neeni ne dabbota keehi siiqiyaabaa gidikko, eta ufayssanawu ubbatoo baaxetiyo gishshawu, hegaa malabay merettiyoogee nena keehi azzanttana danddayees. SHin, ne soo asaa siiqiyoogaappe aattada Yihoowawu ammanettanawu baaxeta. Ne dabboti hegaa beꞌiyo wode, Yihoowawu oottiyoogaa neeni keehi xoqqu oottada xeelliyoogaa akeekana. Ooninne tumaa siyanaadan giddana danddayakka. Yaatiyoogaappe, Yihoowa ogiyaa kaalliyoogee nena maaddidoogaa bessana danddayaasa. Siiqo Xoossay, awu oottanaadan nuna shoobbidoogaadan, etakka shoobbees.—Isi. 48:17, 18. w17.10 15-16 ¶15-16

Siiqiyoy coo haasaya xalla gidennan, maaddana koshshiyo wode maaddana bessiyoogaa qonccissees. Leemisuwawu, issi Kiristtaaniyawu deꞌuwawu koshshiyaabay pacciyo wode, ayyo loꞌꞌobaa amottiyoogaappe aadhiyaaba koshshees. (Yaaq. 2:15, 16) Hegaadan, nuuni Yihoowanne nu shooruwaa siiqiyoogee ‘kattaa cakkanawu Xoossay oosanchata yeddana mala’ woossiyoogaa xalla gidennan, sabbakiyo oosuwaa loytti oottanaadankka denttettees. (Maa. 9:38) Kiitettida Yohaannisi nuuni “oosuwaaninne tumatettan” siiqana koshshiyoogaa yootiis. Hegaa gishshawu, nu siiqoy ‘asa bessanawu siiqettiyoobaa gidennan,’ ‘tumu siiqo’ gidana bessees. (Roo. 12:9; 2 Qor. 6:6) Issi issitoo issi uri siiquwaa bessiyaaba milatana danddayees. SHin i tumu wozanappe siiqii? Wozanappe gidenna. Hegee siiqo gidenna; shin coo milatissiyooba. w17.10 8 ¶5-6

Xoossaa Qaalay nuna maaddanaadan koyikko, nuuni aggennan, danddayettikko galla galla a nabbabana koshshees. Nuuppe daroti oosuwawu bichaaroos. Gidikkokka, nuuni aggennan Geeshsha Maxaafaa nabbabiyoogaa aybikka, haray atto, kiyana bessiyo nuussi deꞌiya hara aawatettaykka diggana koshshenna. (Efisoona 5:15, 16) Yihoowa Markkatuppe daroti galla galla Geeshsha Maxaafaa nabbabanawu wodiyaa bazzoosona; eti guuran, gallassan woy omarssan nabbaboosona. Etassi, “Taani ne higgiyaa aiba siiqiyaanaa! Gallassaa kumettaa taani qoppiyoogee a” yaagida mazamuraawiyaagaadan siyettees. (Maz. 119:97) Nuuni Geeshsha Maxaafaa nabbabiyoogaa xalla gidennan, nabbabidobaa wotti denttidi qoppana koshshees. (Maz. 1:1-3) Ubba wode maaddiya he zoriyaappe nuuni goꞌettana danddayiyoy hegaadan oottiyoogaa xallaana. Nuuni Geeshsha Maxaafaa nabbabiyoy attamettidaagaappe gidin woy elektiroonike miishshaappe gidin, Xoossaa Qaalay nuna laammanaadaaninne denttettanaadan koyoos. w17.09 24 ¶4-5

Nuuni ubba hanotan qarettana bessees giyoogaa gidenna. Leemisuwawu, Kawuwaa Saaꞌooli qarettaas gi qoppidi oottidoba milatiyaaban azazettennan ixxiis. I Xoossaa asaa morkkiyaa, Agaaga ashshiis. Hegaappe denddidaagan, Yihooway Saaꞌooli Israaꞌeela kawo gidennaadan diggiis. (1 Sam. 15:3, 9, 15) Yihooway asaa wozanaa beꞌana danddayees. I xillo Daanna gidiyo gishshawu, awude qarettana bessennaakko erees. (Zil. 2:17; Hiz. 5:11) I bawu azazettanawu koyenna ubbaa bolli pirddiyo wodee matattiis. (2 Tas. 1:6-10) Hegee, i iita giidi pirddidoogeetussi qarettiyo wode gidenna. Ubba eta xayssiyoogee, i ashshana xillotussi qarettiyoogaa bessiyo oge. Asay xayana woy attana bessees giidi pirddiyay nuna gidokko. SHin, haꞌꞌi nuuni asaa maaddanawu danddayiyo ubbabaa oottana bessees. w17.09 10-11 ¶10-12

Xoossaa ufayssiya eeshshatuppe issoy asay ba huuphiyaa naagiyoogaa. Ba huuphiyaa naagiyoogan Yihooway wottiyoobi baynnaagaa. SHin asay nagarancha gidiyo gishshawu, ba huuphiyaa naaganawu baaxetana koshshees. Ha wodiyan, daro metoy asay ba huuphiyaa naagennaagaappe denddidaagan merettees. Hegee asay issibaa oottanawu haganaa suganaadan, qassi timirtte keettan woy oottiyoosan murutennaadan oottana danddayees. Qassi asay ba huuphiyaa naagennaagee cayanaadan, mattottanaadan, aqo laggiyaappe paraman shaahettanaadan, koshshennan acotanaadan, issibay amale gidanaadan, qashettanaadan, qofan waayettanaadan, asho gaytotettaa gaasuwan oyqqiya harggiyan oyqettanaadaaninne koyennan shahaaranaadan oottana danddayees. (Maz. 34:11-14) Qassi asay ba huuphiyaa naagennan aggiyo metoy gujji gujji bees. Asay ba huuphiyaa naagiyoogaara gayttidaagan 1940 heeran eranchati xannaꞌisosona; shin asay kaseegaappe aaruwan bana naagennaagaa mata wode xannaꞌidobay bessees. Xoossaa Qaalaa tamaariyaageeti hegan garamettokkona; aybissi giikko, Geeshsha Maxaafay nuuni ‘wurssetta gallassan’ deꞌiyoogaa bessiyaabatuppe issoy asati “banttana naagennaageeta” gidiyoogaa yootees.—2 Xim. 3:1-3. w17.09 3 ¶1-2

Nuuyyo “Xoossaa sarotettai” deꞌikko, nu wozanaynne nu qofay woppu gees. Yihooway nuussi qoppiyoogaanne nuuyyo injjetanaadan koyiyoogaa eroos. (1 PHe. 5:10) Hegaa eriyoogee nuuni hirggaa maashennaadan woy hidootaa qanxxennaadan naagees. Hegaappe simmin saꞌan mule hanenna iita waayee mata wode asaa gakkana. (Maa. 24:21, 22) Nu bolli gakkanabaa erokko. SHin nuuni keehi hirggana bessenna. Nuuni Yihooway oottana ubbabaa erana xayikkonne, nu Xoossaa eroos. Aybi hanikkokka, Yihooway ubba wode ba halchuwaa polanaagaa i beni wode oottidobaappe akeekoos; qassi asi qoppibeenna ogiyan issi issitoo hegaa polees. Yihooway nuuyyo hegaa oottiyo wode ubbatoo nuuni ‘eratettaa ubbaappe aadhiya Xoossaa sarotettaa’ kaseegaappe dumma ogiyan demmana danddayoos. w17.08 12 ¶16-17

“Awude gakkanaashin?” Hegee hananabaa yootiya ammanettida Isiyaasinne Imbbaaqoomi oychido oysha. (Isi. 6:11; Imb. 1, 2) Nu Godaa Yesuus Kiristtoosikka ammanoy baynna asatuura gayttiyo wode ha oyshaa oychiis. (Maa. 17:17) Ha wodiyan nuunikka hegaadan oychana danddayoos. Geella nuna naaqoy gakkana danddayees. Cimatettaynne sahoy woy nuuni deꞌiyo ‘wayssiya wodiyaa’ metoy nuuni genccanaadan oottana danddayees. (2 Xim. 3:1) Woy qassi nu heeran deꞌiya asatu iita qofay nuna shugissana danddayees. Gaasoy aybanne gidin, beni ayyo ammanettidi haggaazidaageeti he oyshaa oychido gishshawu Yihooway eta seeribeennaagaa eriyoogee keehi minttettiyaaba! Genccanawu metiyaabay nuna gakkiyo wode aybi maaddana danddayii? Hegaa zaaruwaa erissiyo ashkkaray Yaaqoobi hachchi gallassa xiqisiyan qonccissiis. w17.08 3-4 ¶1-3

Yesuusi bana kaalliyaageeti ‘worddo miishshan’ banttawu dabbo gidiya ura demmanaadan zoriis. Miishshaara gayttidaagan ammanettiyoogaa bessiyo ogiyaappe issoy Yesuusi kasetidi yootido sabbakiyo oosuwaa nu aquwan maaddiyoogaa. (Maa. 24:14) Hindden deꞌiya issi guutta naꞌiyaa qeeri saaxiniyan daro wodiyawu santtiyaa yeggawusu; ubba a bawu ashanguluutiyaa shammiyo miishshaakka hegan yeggaasu. He saaxinee kumiyo wode, a he miishshaa sabbakiyo oosuwawu goꞌettanaadan immaasu. Hindden deꞌiya issi ishawu kokkonaatiyaa giyo mitta ayfiyaa gadee deꞌees; I Malayalama qaalan xuufiyaa birshshiyo biiroy kokkonaatiyaa shammiyoogaa eridi, i miishshaa immiyoogaappe he miitta ayfiyaa immiyoogee loꞌꞌo gidiyoogaa akeekidi daro kokkonaatiyaa ayfiyaa he biiruwawu efees. Hegee eratetta. Hegaadankka, Giriiken deꞌiya ishantti wogaraa zaytiyaa, pilaanne hara kattaa Beeteele keettawu ubbatoo immoosona. w17.07 8 ¶7-8

Baabiloonen omooduwan deꞌiya Ayhudati yexxanawu koyibookkona. Eta wozanay meqqido gishshawu, etawu minttettoy koshshiis. SHin, Xoossaa qaalan kasetidi odettidaagaadan Parsse Kawoy Qiiroosi eta laꞌa kessiis. I Baabiloona xooniis; qassi hagaadan giis: “GODAI, . . . Yerusalaamen taani ayyo Beeta Maqidasiyaa keexxanaadan tana sunttiis. Xoossaa asaa gidida ooninne yaa bo. GODAI a Xoossai aara gido.” (2 Odi. 36:23) Hegee Baabiloonen deꞌiya Israaꞌeelata minttettiis! Yihooway Israaꞌeela deriyaa kumettaa xalla gidennan, eta ubbaa huuphiyan huuphiyan minttettiis. I ha wodiyankka hegaadan oottees. “Wozanai meqqidoogeeta [Xoossay] pattees; eta mazunttaakka i qachchees” (Maz. 147:3) Ee, Yihooway sahettidaageetussinne unꞌꞌettidaageetussi qoppees. I nuna minttettanawunne meqqida nu wozanaa pattanawu keehi koyees. (Maz. 34:18; Isi. 57:15) Nu bolli gakkiya ay metuwaakka genccanaadan i aadhida eratettaanne wolqqaa nuussi immees.—Yaaq. 1:5. w17.07 18 ¶4-5

Yihooway saluwaaninne saꞌan ooppenne aadhiya dure. (1 Odi. 29:11, 12) I keha Aawa gidiyo gishshawu, ayyaanaabaa duretettay ubbabaappe keehi aadhiyoogaa akeekiya ubbawu hegaa immees. Yihooway nuussi ayyaanaabaa aquwaa, hegeekka, (1) Xoossaa Kawotettaa, (2) shemppo ashshiya haggaazuwaanne (3) a Qaalan deꞌiya alꞌꞌo tumaa immido gishshawu, nuuni a keehi galatoos! SHin, nuuni naagettana xayikko, nu aquwaa nashshennan aggana, ubba qassi hegaa wora oliyoogaa malabaa oottana danddayoos. Hegaa nashshanawu, nuuni a loytti goꞌettananne kaseegaappe loytti siiqana bessees. Xoossaa Kawotettawu haarettanawu, nuuppe daroti nu deꞌuwan gitaban laamettida. (Roo. 12:2) SHin, nuuni oottana koshshiya harabaykka deꞌees. Aquwaabaanne pokkobaa amottiyoogaa gujjin, nu siiqoy shugganaadan oottiyaabaa minnidi eqettana koshshees.—Lee. 4:23; Maa. 5:27-29. w17.06 9 ¶1; 10 ¶7

Xoossay Iyyooba bolli gakkiiddi deꞌiya metuwawu gaasoy aybakko yootibeenna. Yihooway hegaa yootido waanna gaasoy Iyyooba bolli waayiyaa gattiday Xoossaa gidennaagaa, qassi Iyyooba bolli metoy gakkido gaasuwaa yootanaassa gidenna. SHin, Xoossaa gitatettaara gatti xeelliyo wode Iyyoobi ay keena guuttakko akeekanaadan maaddanawu koyiis. Qassi Iyyoobi loytti qoppana koshshiya gitabay deꞌiyoogaa akeekanaadan i maaddiis. (Iyy. 38:18-20) Hegee Iyyoobi ba qofaa laammidi suure qoppanaadan oottiis. Iyyoobi keehi wolqqaama metuwaa gencci simmin Yihooway a seeridoogee Xoossay qarettennaagaa bessiyaabee? Xoossay qareti baynnaagaa gidenna; Iyyoobikka hegaadan qoppibeenna. Daro metoy Iyyooba gakkikkokka, guyyeppe Yihoowaabaa nashshidi haasayiis. I ubba, “Taani haasayidobai tana yeellayiis. Yaatin, taani bidinttaaninne baanan uttada paaxais” yaagiis. (Iyy. 42:1-6) Iyyoobi Xoossaa seeraa siyidi ba qofaa laammi simmin, i waayettiiddikka awu ammanettido gishshawu Xoossay a nashshiyoogaa haratuyyo yootiis.—Iyy. 42:7, 8. w17.06 24-25 ¶11-12

Nuuni oosuwaa bessiyaagaadan xeelliyaakkonne waati eranee? Nuna hagaadan oychana danddayoos: ‘Taani ta oosuwan keehi ufayttaydda, Xoossawu haggaaziyoogaa pattennabadan woy salettiyaabadan xeelliyaanaa?’ Nu hegaa xeelliyaagan nuussi siyettiyaabaa yuushshi qoppiyoogeenne wotti denttidi qoppiyoogee nuuni ay siiqiyaakko akeekanaadan maaddana danddayees. Nuuni nu deꞌuwan ay sinttayana koshshiyaakko Yesuusi tamaarissiis. Issi wode, Yesuusi Mayraamonne i michiyo Martto oychanawu eta soo biis. Martta qumaa kattiyoogaa eesuwan doommaasu, shin Mayraama Yesuusa tohuwaa achan uttanawunne i yootiyoobaa siyanawu dooraasu. Mayraama maaddukku gaada Martta amassalido wode, Yesuusi iyyo hachchi gallassa xiqisiyan deꞌiya qofaa yootiis. (Luq. 10:38-42) Yesuusi koshshiyaabaa Martto tamaarissiis. Nuussi koshshiyaabay nu qofay shaahettennaadaaninne Kiristtoosa siiqiyoogaa qonccissanawu nuuni ayyaanaabaa sinttayiyoogan ubbatoo “lo77obaa” doorana koshshees. w17.05 24 ¶9-10

Yihooway aawaassanne aayeessappe attin, eta yelidaageetuyyo woy hara ooyyoonne naata tuman dichiyo maataa immibeenna. (Lee.  31:10, 27, 28) SHin bantta deꞌiyo biittaa qaalaa erenna aawatussinne aayetussi naatu wozanaa denttettanawu maadoy koshshennan waayi aggana. Hegaadan maaddana mala giigissiyoogee eti bantta maataa aggi bayiyoogaa bessenna; shin hegee naata “Godaa seeraaninne zoriyan” dichiyoogaa gidana danddayees. (Efi. 6:4) Leemisuwawu, aawatinne aayeti so asaa goynuwaa kaalettiyoogaanne bantta naati loꞌꞌo laggeta dooranaadan maaddiyoogaa xeelliyaagan qofaa immanaadan gubaaꞌiyan deꞌiya cimata oychana danddayoosona. Qassi bantta so asaa goynuwan hara keettaa asaa issi issitoo shoobbana danddayoosona. Ayyaanaaban mino laggeti etaara haggaaziyo wodenne loꞌꞌoban allaxxiyo wode yelagati ayyaanaaban diccoosona.—Lee. 27:17. w17.05 11-12 ¶17-18

Kawuwaa Heeroodisi Yesuusa woranawu qoppidoogaa Yihoowa kiitanchay Yooseefawu yooti simmin, guutta naꞌay Yesuusinne a aawaynne aayyiyaa betidi Gibxxe biidosona. Heeroodisi hayqqana gakkanaassi eti yan deꞌidosona. (Maa. 2:14, 19-21) Daro layttaappe guyyiyan, Yesuusi erissiyo ashkkarati beniigeeti yedetaa gaasuwan “Yihudaa biittaaninne Samaariyaa biittan laalettidosona.” (Oos. 8:1) Yesuusi bana kaalliyaageetuppe daroti bantta sooppe wolqqan yedetettanaagaa kasetidi yootiis. I, “Eti inttena issi katamaappe yedettikko, hara katamaa baqatite” yaagiis. (Maa. 10:23) Qassi shaꞌan qoodettiya Yihoowa Markkata hegaa malabay gakkiis. Etappe darotussi siiqiyoogeeti hayqqidosona; qassi eta aquwaappe attidabay guutta. Amaridaageeti eti baqatiyo wode woy bete kambbiyan etaara deꞌiya asay zigiriya, mattottiya, ceeriyaa kaaꞌiya, wuuqqiyaanne shori baynnabaa haniya asay deꞌiyo gishshawu, qohiyaabay eta gakkiis. Gidikkokka, eti kambbiyan deꞌiyo wodee Israaꞌeelati bazzuwan hemettido wodiyaadan wuranaagaa hassayidi, loꞌꞌobaa qoppidi deꞌidosona.—2 Qor. 4:18. w17.05 3-4 ¶2-5

Awugankko issi issitoo, naaqo ga qoppidobi gubaaꞌiyan ne bolli woy neeni eriyo ura bolli gakkana danddayees. Hegan xubettoppa. SHin Xoossawu ammanettida ashkkaratudan nuuni an ammanettidi woosan a bolli zemppoos. Qassikka nu huuphiyaa kawushshidi, nuuni hanotaa wurssi erennan aggana danddayiyoogaa ammanoos. Nuuni yohuwaa balan akeekidoogee he metuwawu gaaso gidana danddayiyoogaa akeekoos. Nuuni qohiya haasayay hanotay yaa iitanaadan oottana danddayiyoogaa eridi, hegaa malabaa haasayanawu koyokko. Wurssettan, yohuwaa nu huuphen giigissanawu maliyoogaappe, Yihoowan ammanettidi, i giigissana gakkanaashin danddayan a naaganawu murttoos. Hegaadan oottiyoogee, Yihoowan nashettanaadaaninne a anjjuwaa demmanaadan oottanaagee erettidaagaa. Ee, ‘saꞌaa ubbaa Daannay,’ Yihooway ubbatoo suurebaa oottanaagaa ammanettoos; ayssi giikko, “a oge ubbaikka suure.”—Doo. 18:25; Zaa. 32:4. w17.04 22 ¶17

Laamettennan ixxidi, iita waayiyaa wodee gakkanaashin ha alamiyaa exa gidiyaageeti waananee? Yihooway iitata ha saꞌaappe merinawu xayssanawu qaalaa geliis. (Maz. 37:10) Iitati ha pirdday banttana bochennabadan qoppana danddayoosona. Daroti bantta oottidobaa genttiyoogaa tamaaridosona; qassi ha alamiyan eti darotoo pirddappenne bantta oosuwaa daafaappe attiyaabaa milatoosona. (Iyy. 21:7, 9) Gidikkonne, Geeshsha Maxaafay hagaadan gees: “Xoossai asaa hemetaa xeellees; a tanggo ubbaakka wochchees. Iitaa oottiyaageeta Xoossaappe genttanau danddayiya sakkana xumi baawa.” (Iyy. 34:21, 22) Xoossaa Yihoowappe qosettana danddayettenna. A cimmana danddayiya asi baawa; laggetiyaabi baynna Xoossaa ayfee issibaa beꞌennaadan genttana danddayiya xuma shaari baawa. Yaatiyo gishshawu, Armmageedoonappe simmin, nuuni iitati kase deꞌiyoosan eta koyana danddayoos; shin demmokko. Eti merinawu xayana!—Maz. 37:12-15. w17.04 10 ¶5