Tisaase

Beni wode, asay issi ura imattiyoy ba son qumaa shoobbiyoogaana. (Doo. 18:1-8; Daan. 13:15; Luq. 24:28-30) Qumaa issippe maanaadan shoobbiyoogee laggetettaanne sarotettaa bessiyaaba. Nuuyyo waanna imattata gidana bessiyay oonee? Nu deꞌuwan nuuni darotoo gayttiyo nu gubaaꞌiyaa ishanttanne michchontta. Metiya wodiyan, nuuni issoy issuwaara maadettanawu koyokkoo? Nuuni ubbay issoy issuwawu ammanettiya lagge gididi sarotettan deꞌana koshshees. Woradaa xomoosiyaageetussi, dumma dumma tiꞌokiraase timirtte keettan tamaariyaageetussinne bantta dosan keexxiyaageetussi shemppiyo sohoy koshshana danddayees. Daafabay eta keettaa xayssido issi issi so asatussi hegaa mala wodiyan maaddiyaageeti zaaretti keexxana gakkanaashin, shemppiyo sohoy koshshees. Hegaa mala wodiyan, injjetiya keetti deꞌiyoogeetu xallay maaddana giidi nuuni qoppana koshshenna; eti darotoo hegaadan oottennan aggokkona. Intte keettay sima gidikkokka, harata intte son shemppissana danddayeetii? w18.03 15-16 ¶6, 9

Kunddida uri ‘denddanaadan’ aybi maaddanee? Maaddiyay Xoossaa ayyaanaappe attin, nu wolqqaa gidenna. (Isi. 12:2) Nu huuphiyaa naagiyoogee he ayyaanaa ayfe. Qassi wozanappe woossiyoogaa, Geeshsha Maxaafaa xannaꞌiyoogaanne wotti dentti qoppiyoogaa koshshees. Xoossaa Qaalaa xannaꞌiyoogee nena metikko shin? Neeni xannaꞌiyoogaa dosikke gaana danddayaasa. SHin, neeni eeno giikko Yihooway nena maaddanaagaa hassaya. A Qaalaa neeni ‘laamotanaadan’ I nena maaddana danddayees. (1 PHe. 2:3) Koyruwan, ne huuphiyaa naagada A Qaalaa xannaꞌanawu Yihoowa woossa. Yaatada, ne woosaara maayiyaabaa ootta, guutta wodiyawu gidikkonne, ubbatoo xannaꞌana danddayaasa. Guyyeppe, xannaꞌiyoogee metennabanne ufayssiyaaba gidana! Neeni Yihoowabaa woppu giida sohuwan wotta dentta qoppiyo wode ufayttana.—1 Xim. 4:15. w18.03 29 ¶5-6

Xannaꞌiya uri xammaqettanaappe kase, Xoossaabaa, A halchchuwaabaanne I atotettawu giigissidobaa suure eraa demmidi ammanana bessees. (1 Xim. 2:3-6) Hegaa mala ammanoy he tamaaree Xoossaa ufayssenna eeshshaa aggidi, A maaraara maayiyaabaa oottanaadan denttettees. (Oos. 3:20) Issi uri Xoossaa Kawotettaa laatissennabaa oottiiddi Xoossaayyo bana geppana danddayennaagee qoncce. (1 Qor. 6:9, 10) SHin Yihooway kandduwaaban kessido xoqqa maaraa kaalliyoogaa xallay gidenna. Xillotettaa kaalliya uri gubaaꞌe shiiquwaa shiiqana, minnidi sabbakananne asaa erissiyo ashkkara oottanakka koshshees. (Oos. 1:8) Mati erissiyo ashkkara gidida uri hegeeta ootti simmidi woosan bana Yihoowawu geppananne asaa sinttan xammaqettiyoogan geppidoogaa bessana danddayees. w18.03 6 ¶12

Ane haꞌꞌi Mayraama leemiso gididobaa beꞌoos. Yihooway Mayraama Yesuusa aayo gidanaadan dooridoy A ayyaanaabaa qoppiya asa gidiyo gishshataassa. A ba dabbota Zakkaariyaasanne Elssaabeexo oychchanawu eta soo biido wode Xoossaa sabbido ufayssiyaabay A ayyaanaabaa qoppiya asa gidiyoogaa qonccissees. (Luq. 1:46-55) Mayraama haasayidobay A Xoossaa Qaalaa wozanappe siiqiyoogaanne Ibraawetto Geeshsha Maxaafaa loytta eriyoogaa bessees. (Doo. 30:13; 1 Sam. 2:1-10; Mil. 3:12) Yooseefi Mayraamo ekki simmin, Yesuusi Yelettana gakkanaashin I ba machcheera gayttibeennaagaakka hassaya. Eta keehi qofissidabay Yihoowa sheniyaappe attin, bantta koshshaa poliyoogaa gidenna. (Maa. 1:25) Guyyeppe, Mayraama Yesuusa deꞌuwan hanidabaa loytta akeekaasunne I aadhdhida eratettan haasayidobaa hassayaasu. A Masiyaara gayttidaagan Xoossaa shenee aybakko eranawu koyidoogee qoncce. Mayraami leemisoy Xoossaa sheniyaa nu deꞌuwan waati sinttayana danddayiyaakko qoppanaadan nuna maaddees. w18.02 21 ¶11

Ammanuwaaninne azazettiyoogan Iyyooba leemisuwaa waatidi kaallana danddayiyoo? Nu hanotay ay mala gidikkokka, nuuni Yihoowan muleera ammanettiyoogaaninne kumetta wozanaappe ayyo azazettiyoogan, ubbatoo nu deꞌuwan A sinttayana bessees. Yaatanawu, nuuyyo Iyyoobaagaappekka aadhdhiya gaasoy dees! Hagaa qoppa: Seexaanaabaanne A hiillaabaa nuuni darobaa eroos. (2 Qor. 2:11) Qassi waayee deꞌanaadan Xoossay aybissi eenidaakko eroos; hegawu nuna maaddida issoy Iyyooba maxaafaa. Xoossaa Kawotettay Kiristtoos Yesuusi kumetta alamiyaa ayssiyo haaro gidiyoogaa Daaneela hiraagaappe akeekoos. (Dane. 7:13, 14) Hegaa bollikka, ha Kawotettay waaye ubbaa mata wode muleera xayssanaagaa eroos. Nuuni metuwan gencciya nu mala Kiristtaanetussi qarettana koshshiyoogaakka Iyyooba gakkidabay qonccissees. Amaridaageeti issi issitoo Iyyoobaagaadan loꞌꞌennabaa haasayana danddayoosona. (Era. 7:7) SHin nuuni eta amassaliyoogaappe akeekananne qarettana bessees. Yaatiyoogan, siiqiyaanne maariya nu Aawaa, Yihoowa milatoos.—Maz. 103:8. w18.02 6 ¶16; 7 ¶19-20

Issoti issoti meraa loꞌꞌo, daro asay dosiyoogeeta, yettan gooba, wolqqaama woy nashettidaageeta gidiyo gishshawu otorettoosona. Daawitayyo hegeetuppe issuwaa xalla gidennan, ubbaykka deꞌikkokka, I ba deꞌo laytta ubban ba huuphiyaa kawushshidi deꞌiis. I Gooliyaada wori simmin Kawuwaa Saaꞌoola naꞌiyaa assi machcho gidanaadan imettin, Daawiti hagaadan giis: “Kawoora bollotanau taani oonee?” (1 Sam. 18:18) Daawitadan, Yihoowa asay ba huuphiyaa kawushshanawu ha wodiyan baaxetees. Saluwaaninne saꞌan Ubbaappe Xoqqiya Yihooway ‘ba huuphiyaa kawushshiyoogaa’ eriyoogan nuuni maalaalettoos. “Maarotettaa, qaretaa, kehatettaa, intte huuphiyaa kaushshiyoogaa, ashkketettaanne danddayaa maayite” giya zoriyaa nuuni oosuwan peeshshanawu baaxetoos. (Qol. 3:12) Nuuni siiqoy ‘ceeqettennaagaakka otorettennaagaakka’ eroos. (1 Qor. 13:4) Harati nuuni nu huuphiyaa kawushshiyoogaa akeekiyo wode, eti Yihoowa eranawu koyana danddayoosona. w18.01 28 ¶6-7

Ha wodiyan, nuunikka halchchido issibawu miishshaa immanaadan oyshettana danddayoos. (Oos. 4:34, 35; 1 Qor. 16:2) Leemisuwawu, intte gubaaꞌee oorattaa SHiiquwaa Addaraashaa keexxanawu halchchidee? Gita shiiquwaa shiiqiyo sohuwawu, woy meretay gattido daafabaa gaasuwan qohettida ishantta maaddanawu miishshaa koshshiyoogaa akeekana danddayoos. Waanna biiruwaaninne kumetta saꞌan deꞌiya macara biirotun oottiyaageeta maaddanawukka miishshaa immoos. Nu immiyo miishshay misoonaaweta, dumma aqinyetanne woradaa oosuwaa oottiyaageeta maaddees. Yihooway ha wurssetta wodiyan oottiiddi deꞌiyo oosuwaa nuuni ubbay maaddana danddayoos. Imettiya imotaappe dariya baggay odettenna. Nuuni miishshaa SHiiquwaa Addaraashan deꞌiya saaxiniyan yeggana woy Interneettiyan jw.org saytiyaa baggaara immana danddayoos. Nuuni immiyo guutta miishshay aynne maaddenna giidi qoppana danddayoos. SHin, ha wodiyan nuuyyo deꞌiya miishshaappe dariya baggay amaridaageeti immido daro miishshaa gidennan, daroti immido guutta miishshaa. w18.01 19 ¶10-11

Xammaqettiyoogee Kiristtaanetuppe koyettiyaabaa; qassi atotettaa demissiya ogetuppe issuwaa. (Maa. 28:19, 20) Neeni xammaqettidoogee ne huuphiyaa Yihoowawu geppidoogaa bessees. Hegee neeni Yihoowa siiqanawunne hara aybippenne sinttayada a sheniyaa oottanawu awu qaalaa gelidoogaa bessiyaaba. Yihooway nena kaalettanaadan eeno giidoogan mule zilꞌꞌettakka. Yihoowa erennaageeti Seexaanawu haarettoosona! Dabloosi etawukka neeyyookka mule qoppenna. Neeni awu exatada Yihoowa haaruwaa eqettin neeppe merinaa deꞌoy halikko, Dabloosi ufayttana. SHin Dabloosawu exatiyoogaappe, ne huuphiyaa Yihoowawu geppada xammaqettida Kiristtaane gidiyoogan demmiyo anjjuwaa qoppa. Neeni ne deꞌuwaa Yihoowawu immido gishshawu, awudeegaappenne aaruwan an ammanettada hagaadan gaana danddayaasa: “GODAI tanaara de7iyo gishshau, taani yayyikke. Asi tana ai oottii?” (Maz. 118:6) Xoossaa bagga gidiyoogeenne an nashettiyoogee neeni demmana danddayiyo maata ubbaappe aadhiyaaba. w17.12 23-24 ¶1-3

Issi issitoo, nu ishanttinne michchontti haasayidoban woy oottidoban nuuni yiillotana danddayoos; woy qassi nu hanotay eta yiilloyana danddayees. Hegee nuuyyo paace gidana danddayees. Hara paaciyaagaadan, bantta huuphiyaa Yihoowayyo geppida, qassi nagaranchcha gidikkokka i siiqiyo ishanttuuranne michchonttuura issippe oottiyoogan, awu ammanettiyoogaa bessanaadan Yihooway koyees. Yihooway ba ashkkarata paacee gakkennaadan oottennaagaa Yooseefa hanotay bessees. Yelagatettan Yooseefa aawaa naati A qanaatidi aylletettawu bayzzin A Gibxxe efiidosona. (Doo. 37:28) Haniyaabaa Yihooway beꞌiis; qassi A dabbuwaa, xillo Yooseefa bolli gakkidabay Xoossaa azzanttidoogee qoncce. SHin, Yihooway kelttiyaa gelibeenna. Guyyeppe, PHoxiifaara machcheera wolqqan zinꞌꞌanawu maliis gi mootidi A qachchido wodekka, Yihooway kelttiyaa gelibeenna. SHin Xoossay Yooseefa aggibayidee? CHii aggibeenna. Yihooway “[Yooseefi] oottiyoobaakka ubbaa ayyo injjeyiis.”—Doo. 39:21-23. w18.01 9-10 ¶12-14

‘Intte ammanuwawu waanna timirtteti awugeetee?’ Yihooway Medhidaagaanne Deꞌuwaa Immiyaagaa gidiyoogaa neeni yootanaagee erettidaagaa. Qassi nuna wozanawu hayqqida Yesuus Kiristtoosa ammaniyoogaa yootennan aggakka. Hegaa bollikka, saꞌay sinttappe Xoossaa asay merinawu deꞌiyo gannate gidanaagaakka neeni ufayssan yootana. SHin denddoy neeni keehi nashshiyo ammanuwaappe issuwaa gidiyoogaa yootuutee? Nuuni gita waayiyaappe attidi saꞌan merinawu deꞌanawu hidootikkokka, denddoy nu ammanuwawu waanna timirttetuppe issuwaa gidiyoogaa ammaniyo loꞌꞌo gaasoy deꞌees. Denddoy nu ammanuwawu waanna timirtte gidiyoogaa qonccissiis. Kiristtoosi denddibeennabaa gidiyaakko, i nuna haariya Kawuwaa gidana danddayenna, qassi nuuni Kiristtoosa haaruwaabaa tamaarissiyoogeekka hada. (1 Qor. 15:12-19) SHin, nuuni Yesuusi hayquwaappe denddidoogaa eroos; qassi dendduwaa mintti ammanoos.—Mar. 12:18; Oos. 4:2, 3; 17:32; 23:6-8. w17.12 8 ¶1-2

Parisaaweti nagaraa oottida asa wozanan deꞌiyaaba gidennan, i oottidobaa xallaa qoppoosona. Parisaaweti Yesuusi Maatiyoosa son qumaa miyaagaa beꞌidi, i erissiyo ashkkarata, “Inttena tamaarissiyaagee giiraa ekkiyaageetuuranne nagaranchchatuura qumaa aissi issippe mii?” giidi oychidosona. Yesuusi hagaadan giidi zaariis: “Hargganchchatussippe attin, payyatuyyo aakime koshshenna. SHin intte biidi, Xoossaa maxaafai, ‘Taani maarotettaa koyaisippe attin, yarshshuwaa koyikke’ giyoogee woigiyoogaakkonne erite; aissi giikko, taani nagaranchchata xeesanau yiidoogaappe attin, xillota xeesanau yabeikke.” (Maa. 9:9-13) Yesuusi wolqqaama nagaraa issiban gaasoyanawu hegaa giidee? CHii gaasoyanaassa gidenna. I eti bantta nagaraappe simmanaadan koyiis. Hegee i sabbakido waannatiyaabaappe issuwaa. (Maa. 4:17) ‘Giiraa ekkiyaageetuppenne nagaranchatuppe’ issoti issoti laamettanawu koyidoogaa Yesuusi eriis. Eti Maatiyoosa soo biidoy qumaa maana xallaassa gidenna. Eti Yesuusa kaalliyo gishshawu yaa biidosona. (Mar. 2:15) Parisaawetuppe daroti asaa Yesuusaagaadan xeellibeennaagee azzanttiyaaba. w17.11 13 ¶2; 16 ¶15

Kiristtaane gubaaꞌiyaa yame gidiyoogee gita anjjo gidiyoogaa nu ubbaykka maayoos. Nu shiiquwan Xoossaa Qaalaa xannaꞌiyoogee, qassi issoy issuwaa kehatettaaninne siiquwan minttettiyoogee nuuni woytuwaa ubbatoo qoppanaadan maaddees. SHin, issi issitoo nu ishanttunne michonttu qofaa akeekennan aggiyoogee etaara maayettennaadan oottana danddayees. Hegaa giigissana xayikko, eti sohuwaara lanccana danddayoosona. (1 PHe. 3:8, 9) Lanccee nuuppe woytuwaa halissennaadan waatana danddayiyoo? PHawuloosi Qolasiyaasa Kiristtaaneta hagaadan giidi zoriis: “Xoossai dooridoogeetudan, geeshshanne siiqidoogeeta gididi, maarotettaa, qaretaa, kehatettaa, intte huuphiyaa kaushshiyoogaa, ashkketettaanne danddayaa maayite. Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago. Kiristtoosi intteyyo atto giidoogaadan, inttekka atto giite.”—Qol. 3:12, 13. w17.11 27 ¶7-8

Erennan asa woridi baqati biida uri i biido katamaa penggiyan deꞌiya ‘he katamaa cimatuyyo hanidabaa yootana’ bessees. Eti a loytti mokkoosona. Guyyeppe, i asa worido katamaa eti a yeddin, yan deꞌiya cimati he yohuwaa pirddoosona. (Qoo. 35:24, 25) He uri baqati attiyo katamaa simmana danddayiyoy cimati i erennan asa woriis giidi pirddiyo wode xallaana. Cimati pirddana koshshiyoy aybissee? Eti Israaꞌeela gubaaꞌee geeshsha gididi deꞌanaadaaninne erennan asa worida uri Yihoowa maarotaa demmanaadan pirddoosona. Geeshsha Maxaafaa erancha issoy baqatida uri cimatukko baana xayikko, ‘hegee a keehi qohiyoogaa’ yootiis. “I nagettanaadan Xoossay giigissidobaa koyibeenna” yaagiis. I baqatidi Yihooway giigissido katamatuppe issuwaa baana xayikko, hayqqida urawu mata dabboy a worikko oyshettenna. w17.11 9 ¶6-7

Zakkaariyaasa wodiyaagaadan, ha wodiyankka Yihooway olancha gidida ba kiitanchatun ba asaa minttetteesinne naagees. (Mil. 3:6; Ibr. 1:7) Ayyaana Israaꞌeelati leemiso hanotan Gitaa Baablooni omooduwaappe 1919n kiyi simmin, eqettiyaageeti ubbatoo deꞌishinkka tumu goynoy aakki aakki biis. (Ajj. 18:4) Nuna kiitanchati naagiyo gishshawu, Yihoowa dirijjitee zaarettidi ayyaanaaban omoodettana giidi yayyana bessenna. (Maz. 34:7) Ubba kumetta saꞌan Xoossaa ashkkarati ayyaanaaban gujji gujjidi ishalanaagaa ammanettana danddayoos. Yihoowa olanchati nu miyyiyan deꞌoosona. Gita waayiyaa wode, Yihoowa olancha gidida kiitanchati Xoossaa asaa ashshanawunne Yihoowa haaruwaa eqettiyaageeta xayssanawu issippe denddana. (2 Tas. 1:7, 8) Hegee keehi ufayssiya wode gidana! w17.10 28 ¶10-11

So asaappe issoy gubaaꞌiyaappe bohettikko woykko bana shaakkikko, hegee issi uri nena tooraa xeeran caddiyoogaadan keehi seelliyaaba. He keehi seelliyaabaa waana genccana danddayay? Ayyaanaabaa oosuwaa ubbatoo ootta koshshees. Ubbatoo Geeshsha Maxaafaa nabbabiyoogan, shiiquwawu giigettada biyoogan, haggaaziyoogaaninne genccanawu woossiyoogan ne ammanuwaa mintta. (Yih. 21) SHin neeni hegaa ubbaa oottayddakka haꞌꞌikka azzanikko shin? Hidootaa qanxxoppa! Ayyaanaabaa oosuwaa ubbatoo oottiyoogee ne qofaynne neessi siyettiyaabay suure gidanaadan maaddana danddayees. Mazamure 73 xaafida uraabaa qoppa. I balabaa qoppiyoogaa doommido gishshawu keehi metootiis; shin Xoossawu goynniyo sohuwaa i gelido wode ba qofaa suurissiis. (Maz. 73:16, 17) Ammanettada Yihoowawu goynniyoogee neenikka hegaadan oottanawu maaddana danddayees. w17.10 16 ¶17-18

Tumu gidenna siiquwaa bessida amaridaageetubaa beꞌa. Edene ataakiltte sohowan, Seexaanay Hewaanissi keehi koshshiyaaba qoppiyaaba milatiis; shin i oottidobay ba xallaa siiqiyoogaa bessiyaabanne milatisso. (Doo. 3:4, 5) Daawita wode, Akixoofeeli baayyo kawuwaara deꞌiya laggetettay worddo gidiyoogaa bessiis. Akixoofeeli bana goꞌꞌiyaabaa demmiyaabadan qoppido wode kaddiis. (2 Sam. 15:31) Ha wodiyankka, gubaaꞌee shaahettanaadan oottiya kaddidaageetinne harati “mal77iya haasayaaninne qiriyan,” asaa siiqiyaaba milatoosona, shin eti bantta xallaa siiqoosona. (Roo. 16:17, 18) Asa bessanawu siiqiyo siiqoy Xoossaa eeshsha gidida ba goꞌꞌaa aggibayanaadan oottiya siiquwaappe dummatiyo gishshawu yeellayiyaaba. Hegaa mala siiqoy asaa cimmana danddayees; shin Yihoowa cimmenna. Loꞌꞌo milatiya iita asatudan oottiyaageeti ‘keehi qaxxayettanaagaa’ Yesuusi yootiis. (Maa. 24:51, NW) Hegaa gishshawu, nuuni nuna hagaadan oychoos: ‘Taani ubbatoo tumuppe siiqiyaanaa? Qassi ta xallaa siiqiyaanaa, qassi cimmiyaanaa?’ w17.10 8 ¶6-8

I hagaadan gaanawu koyiis: Nuuni haggaazuwan Xoossaa Qaalaappe nabbabiyo wode, keettaawaayyo Yihooway haasayanaadan oottoos. Loytti doorido xiqisee nuuni haasayana danddayiyo aybippenne aadhees. (1 Tas. 2:13) Nena hagaadan oycha: ‘Taani mishiraachuwaa yootiyo asawu Xoossaa Qaalaappe nabbabanawu danddayettida keenaa maliyaanaa?’ Nuuni haasayissiyo urawu Geeshsha Maxaafaappe nabbabiyoogaa xallay gidenna. Aybissi? Daroti Geeshsha Maxaafay yootiyoobaa darin akeekenna woy mule erenna gishshataassa. Koyro xeetu layttankka ha wodiyankka hanotay hegaa mala. Hegaa gishshawu, nuuni issi xiqisiyaa nabbabido gishshawu issi uri qofaa akeekees giidi qoppana koshshenna. Nuuni nabbabido xiqisiyaappe koyettiya qaalaa woy qofaa zaaretti nabbabidi, hegee woygiyaakko qonccissana koshshees. Yaatiyoogee, Xoossaa Qaalay yootiyoobay nu haasayissiyo uraa qofaanne wozanaa denttettanaadan maaddees.—Luq. 24:32. w17.09 25 ¶7-8

Issi uri ba shooruwaassinne ayyaana ishatussi qarettiyoogee Yesuusa kaalliyo waanna ogetuppe issuwaa. (Yoh. 13:34, 35) Qarettiyoogawu issi birshshettay “issippe waayettiyoogaa.” Qarettiya uri metootida uraa maaddiyoogan a waayiyaappe a shemppissees. Hegaadan maaddiyo hanotaa akeeka! Daafaban qohettidaageetuyyo daro asay qarettees. Yihoowa asay hegaa mala wodiyan harata maaddiyoogan erettees. (1 PHe. 2:17) Jaappaane biitta asa gidida issi michiyaa 2011n biittaa qaattaynne sunaami keehi qohido heeran deꞌawusu. Keettaanne SHiiquwaa Addaraashaa loyttanawu Jaappaanen dumma dumma heeraappenne kare biittaappe yiida daro ishati oottidoban a “keehi minettidoogaa” yootaasu. A hagaadan gaasu: “Ha hanotay Yihooway nuussi qoppiyoogaa, Yihoowa Markkati issoy issuwawu qoppiyoogaa, qassi kumetta saꞌan deꞌiya daro ishanttinne michontti nuussi woossiyoogaa taani akeekanaadan maaddiis.” w17.09 11 ¶12-13

Nuuni nu huuphiyaa naagana koshshiyoy aybissee? Hegee koshshiyaaba gidiyoogaa bessiya naaꞌꞌu gaasuwaa beꞌa. Koyruwan, bantta huuphiyaa naagiyaageeti daro metuwan gelokkona. Eti woppu giidi deꞌananne asaara saruwan deꞌana danddayoosona, qassi bantta huuphiyaa naagenna asatuugaadan hanqqettokkona, koshshiya koshshennaban hirggokkonanne unꞌꞌettokkkona. Naaꞌꞌanttuwan, paaciyaa eqettiyoogeenne bessenna amuwaa aggiyoogee Xoossan nashettanaadan oottees. SHin Addaameenne Hewaana hegaadan oottibookkona. (Doo. 3:6) He wodeppe haa simmin deꞌida daro asatikka etaagaadan bantta huuphiyaa naagibeenna gishshawu, eta bolli daro metoy gakkiis. Nagarancha asi ba huuphiyaa naagiyoogee polo gidana danddayenna. Yihooway ba ashkkarati hegaara gayttidaagan baaxetiyoogaa erees; qassi eti nagaraa amuwaa xoonanaadan i maaddanawu koyees.—1 Kaw. 8:46-50. w17.09 3-4 ¶3-4

Issi wode, Tohossa Afirkkan deꞌiya meray karettanne bootta gidido Yihoowa Markkati issippe shiiqana danddayokkona. SHin, Johansberge kataman deꞌiya ubbaappe gita isttaademiyan Woggaa galla, Tisaase 18, 2011n, 78,000⁠ppe dariya dumma dumma zare gidida, Tohossa Afirkkaanne shooro biittaa ishantti ayyaanaabaa prograamiyan issippe shiiqidoogaa beꞌiyoogee keehi ufayssiyaaba. Isttaademiyaa halaafetuppe issoy hagaadan giis: “Taani ha isttaademiyan hanno gakkanawu beꞌidoogeetuppe intte keehi loꞌꞌo eeshshay deꞌiyoogeeta. Intte maara maayuwaa maayideta. Intte isttaademiyaa loytti geeshshideta. SHin ubbaappe aaruwan, intte tumukka dumma dumma sheeshsha.” Yihoowa Markka gidenna asay hegaadan yootiyoogee kumetta saꞌan deꞌiya nu ishanttu maabaray dumma gidiyoogaa bessiyaaba. (1 PHe. 5:9) SHin nuna hara dirijjitiyaappe dummayiyaabay aybee? Xoossaa Qaalaynne a geeshsha ayyaanay maaddin nuuni ‘ceega meretaa xayssanawu’ woy qaaridi oli bayanawu baaxetoos. Hegaa sohuwan, nuuni ‘ooratta meretaa maayoos.’—Qol. 3:9. w17.08 17-18 ¶2-3

Geeshsha Maxaafay yootiyoogaadan, danddayay geeshsha ayyaanaappe demmiyooba; nagarancha asi Xoossay maaddennan koyettiyaagaa keena danddayancha gidenna. Danddayay Xoossaa imota; qassi nuuni danddayiyoogee a siiqiyoogaa bessiyo waanna oge. Danddayay nuuni harata siiqiyoogaakka bessiyaaba. Nuuni danddayancha gidana xayikko, issoy issuwaara mintti siiqettokko. (1 Qor. 13:4; Gal. 5:22) Danddayay Kiristtaanetuppe koyettiya hara waanna eeshshatu darotuura gayttidaba. Leemisuwawu, hegee metiya hanotan loꞌꞌobaa qoppidi gencciyoogaara gayttidaba. (Qol. 1:11; Yaaq. 1:3, 4) Danddayay aybi gakkikkonne yeeqennaaninne haluwaa kiyennan metootiyoogaarakka gayttidaba gidana danddayees. Qassi, Geeshsha Maxaafay nuuni naagana koshshiyoogaa nu dosan akeekanaadan zorees. Danddayaara gayttida he qofay Yaaqooba 5:7, 8n odettiis. w17.08 4 ¶4

Yelagatoo, manddaranaappe kase biyoosaa halchana koshshiyoogaa akeekennan aggekketa. Deꞌoy manddaraa mala; qassi intte baanasaa halchana koshshiyoy yelagatettaana. Halchiyoogee metana danddayees. Yihooway neeni sinttanaabaa eratettan halchanaadan minttettees. (Era. 12:1; Maa. 6:20) Neeni ufayttanaadan i koyees. I medhido, beꞌanawu, siyanawunne maanawu ufayssiyaabay hegaa bessees. I nuussi qoppiyoogaanne nuuni keehi ufayssiya deꞌo deꞌanaadan tamaarissiyoogaakka akeeka. I ba zoriyaa siyibeennaageeta, ‘Taani dosennabaa doorideta. Hegaa gishshawu, beꞌite, ta ashkkarati ufayttana; shin intte yeellatana. Beꞌite, ta ashkkarati wozanan ufaittidi yexxana’ giis. (Isi. 65:12-14) Yihooway ba asay loꞌꞌobaa kuuyiyo wode bonchettees.—Lee. 27:11. w17.07 22 ¶1-2

Xoolintte ubbay awan deꞌiyaakko eriya Xoossay, neeni deꞌiyoosaa, neeyyo siyettiyaabaa, qassi neessi koshshiyaabaa ubbaa loytti erees! Yihooway neeyyo qoppiyoogaa xalla gidennan, qarettidi ne metuwan maaddanawu awu wolqqay deꞌees. (Maz. 147:5) Ne hanotay keehi deexxiyaabadan, qassi hegaa genccana danddayennabadan qoppana danddayaasa. Xoossay ‘neeni biitta gidiyoogaa akeekiyo’ gishshawu, oottana danddayennabay deꞌiyoogaa erees. (Maz. 103:14) Nuuni nagarancha gidiyo gishshawu, bala gidida issi issibaa zaari zaaridi oottoos; hegee hidootaa qanxxissana danddayees. Issibaa haasayido, iitabaa amottido woy asabaa qanaatido gishshawu keehi zilꞌꞌettoos! Yihooway hegaadan balabaa oottenna; shin i nubaa loytti erees! (Isi. 40:28) Metoy ne bolli gakkido wode, xoona kiyanaadan Yihooway ba wolqqaama kushiyan nenakka maaddidoogaa hassayennan aggakka.—Isi. 41:10, 13. w17.07 18-19 ¶6-8

Siri Lankka biittaappe kare biitti biida issi ishay, Siri Lankkan deꞌiya ba keettaa gubaaꞌe shiiquwawunne gita shiiquwawu goꞌettanaadan, qassi kumetta wodiyaa haggaaziyaageeti deꞌanaadan immiis. He ishay hegaadan oottanawu miishshaara gayttidaagan ba goꞌꞌaa aggibayiis; shin i yaatidoogee he biittan deꞌiya hiyyeesa ishantta keehi maaddiis. Sabbakennaadan digettido issi biittan ishantti bantta keettaa Kawotettaa Addaraashadan goꞌettanaadan immidosona; yaatidoogee daro aqinyetinne harati miishsha qanxxennan shiiqiyoosaa demmanaadan maaddiis. Issi michiyaa Kawotettaa oosuwaa ubbatoo miishshan maaddawusu. Keha gidiyoogee a kase hana erennaba amarida layttaa giddon hananaadan maaddidoogaa yootaasu. A hagaadan gaasu: “Taani miishshaa immiyoogan kaseegaappe kehiyo wode harabankka asawu kaseegaappe aaruwan kehiyoogaa akeekaas. Taani kaseegaappe aaruwan asawu atto gays, etabaa danddayays, qassi zoriyaa siyaysinne azzanttiyaabaakka genccays.” w17.07 9 ¶9-10

A bolli metoy gakkido gaasuwaa i guyyeppe loytti akeekidaba gidikkokka, hegaa keenaa metoy a gakkidoy aybissakko issi issitoo i qoppana danddayees. I qoppidobay aybanne gidin, Xoossay a zoridobaa wotti denttidi qoppana danddayees. Hegaadan oottiyoogee, i ubbatoo bessiyaabaa qoppanaadaaninne minettanaadan maaddana. (Maz. 94:19) Iyyooba taarikee nuunikka bessiyaagaadan qoppanaadaaninne minttettuwaa demmanaadan maaddana danddayees. Qassi “Xoossaa maxaafai nuuyyo immiyo genccaaninne minttettuwan nuuni demmana giidi ufaissan naagi uttidoogee de7ana mala” Yihooway a taarikiyaa nuussi xaafissi wottiis. (Roo. 15:4) Hegaappe nuuni ay tamaariyoo? Nu tamaariyo waannabay, ubbatoo nubaa qoppiyoogaa gidennan, keehi koshshiya ha gita allaalliyaabaa, hegeekka Yihoowa haaroy suure gidiyoogee erettiyoogaa dogana bessennaagaa. w17.06 24 ¶9; 25 ¶13-14

Issi issitoo shemppana koshshiyoogaa Yesuusi erees. Eti mishiraachuwaa yootiyoogan daafuri simmin, Yesuusi ba erissiyo ashkkaratussi hachchi gallassa xiqisiyan deꞌiya qofaa yootiis. Allaxxiyoobaynne wodiyaa aattiyoobay nuuni shemppanaadaaninne minettanaadan maaddana danddayees. SHin, nuna ufayssiyaabaa oottiyoogaa nu deꞌuwan keehi xoqqu ootti xeellennaadan nuuni naagettana koshshees. Koyro xeetu layttan, daroti hagaadan gidoosona: “Simmi moosinne uyoos; aissi giikko, nuuni wontto haiqqana.” (1 Qor. 15:32) Ha wodiyan hegaa mala hanotay alamiyan darosan deꞌees. Nuuni allaxxiyoobaa bessiyaagaadan xeelliyaakkonne waati erana danddayiyoo? Saaminttaa giddon, nuuni ayyaanaabaa oosuwaa oottido saatiyaa xaafi oyqqana danddayoos. Yaatidi, he saaminttan ispporttiyaanne ufayssiyaabaa oottiyoogaa, televizhiiniyaa beꞌiyoogaa, woy biiduwaa kaassaa kaaꞌiyoogaa mala allaxxiyooban aattido saatiyaara geeddarssana danddayoos. Nuuni issi issibaa laammana koshshii?—Efi. 5:15, 16. w17.05 24-25 ¶11-13

Yesuusi yootido leemisuwan zalꞌꞌanchchay keehi alꞌꞌo inqquwaa demmiis. Gidoppe attin, hegaa shammanawu i ba aqo ubbaa bayzzana koshshees. I he alꞌꞌo shuchaa ay keena xoqqu oottidi xeellidaakko qoppa. Xoossaa Kawotettaa tumay he zalꞌꞌanchay demmido, inqquwaa giyo he keehi alꞌꞌo shuchaa mala. Zalꞌꞌanchay he inqquwaa dosidoogaadan nuuni Xoossaa Kawotettaa dosikko, he Kawotettawu ubbatoo haarettidi deꞌennaadan oottiyaabaappe haakkanawu nu dosan eeno goos. (Mar. 10:28-30) Leemisuwawu, Zakkiyoosi giiraa shiishshiyaageetu alaafe. I wordduwan miishshaa asaappe shiishshidi dure gidiis. (Luq. 19:1-9) SHin, he nagarancha bitanee Yesuusi Xoossaa Kawotettaabaa sabbakiyoogaa siyido wode, i siyidobay ubbabaappe keehi aadhiyoogaa akeekidi sohuwaara issibaa oottiis. I hagaadan giis: “Ta Godau, taani taassi de7iya ubbabaappe baggaa hiyyeesau immana; qassi ooppenne wordduwan ekkidobaa gidikko, bashshido mehiyaassi oiddu kushiyaa ayyo zaarana.” Zakkiyoosi asaappe ekkido miishshaa zaariis; qassi yaaretiyoogaa aggiis. w17.06 10 ¶3-5

Bantta naata maaddanaadan dooriyoogeeti eta maataa banttawu ekkennan, etabaa loꞌꞌobaa haasayiyoogan naati bantta aawaanne aayyiyo bonchanaadan ubbatoo maaddana koshshees. Qassi, maaddiyaageeti gubaaꞌiyan deꞌiyaageetuppe woy haratuppe amaridaageeti kandduwaaban siranaadan oottiya aybippenne naageettana bessees. (1 PHe. 2:12) Aawatinne aayeti bantta naata haratu xallay ayyaanaaban loohissanaadan aggi bayana koshshenna. Eti laggeti maaddiyoode kaallananne bantta naata ubbatoo tamaarissana koshshees. Yelidaageetoo, Yihooway inttena maaddanaadan woossite; qassi intteyyo danddayettidabaa ubbaa oottite. (2 Odi. 15:7) Intte koyiyoobaa qoppiyoogaappe intte naati Yihoowaara dabbotanaadan oottite. Intte naꞌay Xoossaa Qaalaa wozanan wottanaadan maaddanawu intteyyo danddayettida ubbabaa oottite. Intte naꞌay Yihoowayyo loꞌꞌo ashkkara gidana danddayiyoogaa awudenne siroppite. w17.05 12 ¶19-20

Ane hagaa qoppa. Issi bitanee hayquwan pirddettanaadan asay wordduwan mootiis. Ubba qassi, pattenna asati a bolli wordduwan markkattin he i mooranchadan qoodettidoogee, a soo asaanne a laggeta keehi azzanttiis. Aynne mooribeenna he bitaneenne a naati hayquwan qaxxayettishin beꞌiyoogee suure pirddaa dosiyaageeti azzananaadan oottiis. Hagee issi wode hanida taarike. Hagee Kawuwaa Akaabi Israaꞌeela haariyo wode deꞌida, ammanettidi Yihoowayyo oottida Naabute bolli gakkidaba. (1 Kaw. 21:11-13; 2 Kaw. 9:26) Akaabi Naabute woyniyaa gadiyaa shammanawu woy a gishshaa hara loꞌꞌo woyniyaa gadiyaa immanawu koyidi oychin, Naabutee ixxis giis. Naabutee ixxis giidoy, Israaꞌeelati bantta mayzza aawatuppe laattido biittay naaꞌꞌantto simmennaadan bayzzenna mala yootiya Yihoowa higgiyaa azazettanaassa. (Wog. 25:23; Qoo. 36:7) Naabutee hanotaa Yihoowaagaadan xeelliis. w17.04 23 ¶1; 24 ¶4

Iita asatu sohuwan ooni deꞌanee? Yihooway ha ufayssiyaabaa oottana giis: “Ashkketi biittaa laattana; eti sarotettaaninne duretettaani ufaittidi daana.” He mazamuree guuttaa takkidi, “Xilloti biittaa laattananne yan merinau de7ana” yaagees. (Maz. 37:11, 29) ‘Ashkketinne’ “xilloti” oonee? Ashkketi Yihoowa timirttiyaanne kaaletuwaa banttana kawushshidi ekkiyaageeta; xilloti Yihoowa sinttan suure gididabaa oottiyoogaa dosiyaageeta. Ha alamiyan iitati xillo asaappe keehi daroosona. SHin mati yaana ooratta alamiyan ashkketinne xilloti asaappe dariya bagga woy guuttata gidennan, he wode deꞌana asati eta xalaala. He asay kumido saꞌay tumukka gannate gidana! w17.04 10-11 ¶5-6

“Xoossaa siiqoi” nuuni meto wodiyankka harata siiqanaadan denttettees. (1 Yoh. 3:17, 18) Koyro xeetu layttan Yihudan deꞌiya Kiristtaaneta namisay hirggissin, gubaaꞌee etawu maaduwaa giigissiis. (Oos. 11:28, 29) Kiitettida PHawuloosikka PHeexiroosikka Kiristtaaneti issoy issuwaa mokkanaadan zoridosona. (Roo. 12:13; 1 PHe. 4:9) Kiristtaaneti xomoosiya ishantta mokkana koshshikko, eta deꞌuwawu hirggissiyaabay gakkido woy bantta ammanuwaa gaasuwan yedetettida ishantta hegaappe aaruwan mokkana koshshees! SHaꞌan qoodettiya Yihoowa Markkati arshsho bagga Yukireeneppe mata wode olaanne yedetaa gaasuwan baqatidosona. Amaridaageeti hayqqidoogee azzanttiyaaba. SHin etappe darota Yukireeneeninne Ruusiyan harasan deꞌiya ishantti mokkidosona. Eti naaꞌꞌu biittankka ‘saꞌaabaa gidennan’ ixxidi, polotikaaban oossinne exatennan deꞌidosona; qassi mishettidi ‘qaalaa yootiyoogaa’ aggibookkona.—Yoh. 15:19; Oos. 8:4. w17.05 4 ¶6-7