Usuppune

Yesuusi asawu keehi qarettees. I eta siiqidoogaa akeekida asay Kawotettaa mishiraachchuwaa siyiis. Nuuni hegaadan wozanappe asawu qarettiyoogee, etawu sabbakiyo wode kaseegaappe aaruwan eta maaddanaadan oottees. Nuuni etawu sabbakiyo asatussi siyettiyaabaa akekanaadan nuna aybi maaddana danddayii? Nunaara gayttiya asay waati qoppiyaakkonne etawu aybi siyettiyaakko nuuni qoppana koshshees; qassi yaatidi nuuni eta gidiyaakko asi nuna oyqqanaadan koyiyo ogiyan, nuunikka eta oyqqana koshshees. (Maa. 7:12) Ubba asawu huuphiyan huuphiyan koshshiyaabaa qoppa. Nuuni haggaazuwan demmiyo asa ubbaara issi mala ogiyan haasayaa doommana koshshenna. Nuuni ubba asaa hanotaanne qofaa akeekanawu baaxetana koshshees. Eti ammaniyoobaa eranawu hiillan oyshata oychcha. (Lee. 20:5) Nuuni harata oychchiyo wode, eti banttassi mishiraachchoy koshshiyoy aybissakko yootanaadan oottoos giyoogaa mala. Yesuusaagaadan, nuuni eta gidiyaakko giidi etawu koshshiyaabaa qoppananne eta maaddana danddayoos.—1 Qor. 9:19-23. w19.03 20 ¶2; 22 ¶8-9

Addaameekka Hewaanakka Yihooway etayyo oottido loꞌꞌobaa ubbaa gishshawu nashshennaagaa bessidosona. Nuuni ubbay eta mala gidennaagaa bessana danddayoos. Yihooway nuussi oottiyo ubbabaa gishshawu, nuuni A galatoos. Nuussi aybi loꞌꞌokko, qassi aybi iitakko maaraa kessanawu maatay deꞌiyoy Yihoowa gidiyoogaa ammaniyoogaa xammaqettiyoogan bessoos. Nuuni nu Aawaa siiqiyoogaanne an ammanettiyoogaa bessoos. Nuuni xammaqetti simmidi nu koyiyoogaa gidennan, Yihooway koyiyoogaa ubbatoo oottana koshshees. Xoossaa ashkkarati miilooniyan qoodettiyaageeti hegaadan deꞌoosona. Intte ubbatoo Xoossaa Qaalaa, Geeshsha Maxaafaa loytti akeekikko, eta mala gidana danddayeeta; intte ishanttuuranne michchonttuura ubbatoo shiiqite; qassi inttena siiqiya Aawaabaa intte tamaaridobaa haratussi minnidi yootite. (Ibr. 10:24, 25) Intte issibaa kuuyiyo wode, Yihooway ba Qaalaanne ba dirijjitiyaa baggaara immiyo zoriyaa siyite. (Isi. 30:21) Yaatiyo wode intte oottiyo ubbabay injjetana.—Lee. 16:3, 20. w19.03 7 ¶17-18

Yihooway kumi palahiya ayyaanaabaa qumaa nuussi immees. Leemisuwawu, nuuni nu shiiqotuppe, nu maxeetetuppenne nu weybsaytetuppe maaddiyaabaa tamaaroos. Neeni issi haasayaa siyada, issi huuphe yohuwaa nabbabada, woy issi brodkastingiyaa beꞌadanne qoppada, ‘Hegee tawu koshshiyaaba’ ga eray? Nuuni Yihoowa galatiyoogaa waati bessana danddayiyoo? (Qol. 3:15) Issi ogee he loꞌꞌo imotaa gishshawu ubbatoo woosan A galatiyoogaa. Nuuni nu goynuwaa sohuwaa geeshshidi maara oyqqiyo wodekka Yihoowa galatoos. Nuuni ubbatoo SHiiquwaa Addaraashaa geeshshoosinne loytti oyqqoos; qassi cenggurssaanne biiduwaa miishshata goꞌettiyaageeti he miishshati moorettennaadan naagettoosona. Nuuni nu SHiiquwaa Addaraashata maara oyqqikko, eti daro wodiyaa takkananne giigissana koshshiyoobay darenna. Yaatiyoogan, kumetta saꞌan hara SHiiquwaa Addaraashata keexxanawunne bottokonanawu miishshaa demmoos. w19.02 18 ¶17-18

Iyyoobi maalaalissiya Yihoowa meretata wotti denttidi qoppanawu wodiyaa bazziis. (Iyy. 26:7, 8) I saꞌaabaa, saluwaabaa, shaaraabaanne dadaabaa qoppido wode keehi maalaalettikkonne, Yihooway medhdhido ubbabaara gayttidaagan I darobaa erennaagaa akeekiis. Qassi I Yihooway yootidobaa xoqqu oottidi xeelliis. Iyyoobi ‘Xoossaa qaalaa ta wozanan wottaas’ yaagiis. (Iyy. 23:12) I Yihoowan maalaalettidi A keehi bonchchiis. Iyyoobi ba Aawaa keehi siiqeesinne A ufayssanawu baaxetiis. Hegaappe denddidaagan, Iyyoobi ba suuretettaa naagidi deꞌanawu yaa murttiis. Nuunikka Iyyoobaagaadan oottana koshshees. Nuuni maalaalissiya meretatubaa Iyyooba wode deꞌida asaagaappe aaruwan eroos. Nuuyyo Yihoowabaa aaruwan eranawu maaddiya, ayyaanay kaalettin xaafettida kumetta Geeshsha Maxaafay deꞌees. Nu tamaariyo ubbabay nuuni wozanappe maalaalettanaadan maaddana danddayees. Nuuni Yihoowan maalaalettidi A keehi bonchchiyoogee, nuuni A siiqanaadaaninne ayyo azazettanaadan, qassi nu suuretettaa ay wodenne naagidi daanaadan nuna denttettees.—Iyy. 28:28. w19.02 5 ¶12

Asaa taarikiyan Yihoowa asata yedetay gakkibeenna wodee baawa. Deriyaa haariyaageeti iitabaa oottidobadan nuna mootana danddayoosona, shin eti hanqqettiyo tumu gaasoy nuuni “asau azazettanaappe Xoossau azazettanau” dooridoogaa. (Oos. 5:29) Nuna asay qilliiccanawu, qasho keettaa gelissanawunne garafidi daro qohuwaa gattanawu danddayees. Gidikkokka, Yihoowa maaduwan haluwaa kiyanawu qoppennan deꞌanawunne, paacee gakkiyo wode woppu giidi deꞌanawu danddayoos. Ane Baabiloonen omooddettidi biida heezzu Ibraawe yelagatu Hanaaniyaa, Mishaaꞌeelanne, Azaariyaa leemisoy nuna ay ogiyan maaddiyaakko pilggoos. Eti qassi ha worqqaa misiliyaassi goynnennay aybissakkonne ashkketettan kawuwaassi zaaridosona. Yihooway eta bolli gakkanaadan eeno giyo aybakka ekkanawu eti qofaa qachchidosona. (Dane. 3:1, 8-28) Nuuni Xoossaassi ammanettiyoogee paacettiyo wode, ha heezzu Ibraawetu leemisuwaa waanidi kaallana danddayiyoo? Nu huuphiyaa ziqqi oottidi Yihooway nuna maaddanaagaa ammanettoos. (Maz. 118:7) Nuna wordduwan coo mootiyaageetussi bonchchuwaaninne ashkketettan zaaruwaa immana danddayoos. (1 PHe. 3:15) Ee tumakka, nuna siiqiya saluwaa Aawaara dabbotido dabbotaa mooriyaaba aybanne oottokko. w19.02 10-11 ¶11-13

Kiristtoosa wozuwaa yarshshuwaa baggaara nuuni demmanabaa qoppiyoogan kaseegaappe aaruwan xalana danddayoos. (Yoh. 3:16; Efi. 1:7) Godaa Kahuwaappe kasetiya saaminttatun, nuuni wozuwaa loytti nashshana danddayoos. He wode, Godaa Kahuwaa wodiyan nabbabiyo Geeshsha Maxaafaa xiqiseta nabbabidi Yesuusa hayquwaara gayttida hanotaa wotti dentti qoppite. Yaatidi nuuni Godaa Kahuwaa baalawu shiiqiyo wode, hegan goꞌettiyo oyttaynne woynee keehi koshshiyaaba gidiyoogaanne, eti leemiso gidido he dumma yarshshuwaa nuuni loytti akeekana. Yihoowaynne Yesuusi nu gishshawu oottidobaa nuuni nashshikko, qassi hegee nunanne nuuni siiqiyoogeeta keehi maaddiyoogaa akeekikko, nuuni wurssettay gakkanaassi xalidi genccana. (Ibr. 12:3) Saluwan deꞌiya Qeese Ubbatu Halaqay Yesuusi he eeshshata muletoo bessiyoogawu nuuni keehi galatoos! (Ibr. 7:24,25) Nuuni wozanappe galatiyoogaa bessanawu, Yesuusi azazidoogaadan, aggennan A hayquwaa hassayana koshshees.—Luq. 22:19,20. w19.01 22 ¶8; 23-24 ¶10-11

Nuuni A sabbanaadan Yihooway nu ubbawu maataa immiis. Nuuni shiiqotun zaariyoobay “galataa yarshshuwaa” bagga, qassi nu gishshaa ooninne yarshshana danddayenna. (Ibr. 13:15) Yihooway nuuni ubbay issi mala yarshshuwaa yarshshanaadan woy zaaruwaa zaaranaadan koyii? CHii, koyenna! Gubaaꞌiyaa shiiqota neeni loꞌꞌo laggetuura miyo qumadan xeella. Gubaaꞌiyan deꞌiya amarida laggeti qumaa issippe maanawu halchchidi, amarida qumaa kattanaadan nena oychchidosona gaada qoppa. Neeni waatuutee? Neeni guuttaa hirggikkonne, ubba asay dosiyo qumaa ehaanawu neessi danddayettida ubban baaxetana danddayaasa. Nuna shoobbida Yihooway gidi palahiya loꞌꞌo qumaa nu shiiqotun giigissi uttiis. (Maz. 23:5; Maa. 24:45) Qassi nuuni immana danddayiyo ubbabaappe loꞌꞌo imotay guutta gidinkka hegaa immiyo wode I ufayttees. Yaatiyo gishshawu, loytta giigetta; qassi neeni danddayiyoogaa keenaa zaara. He wode neeni Yihoowa masoofiyaappe miyoogaa xalla gidennan, ne imotaa gubaaꞌiyawu ehaasa. w19.01 8 ¶3; 13 ¶20

Beni wode, worddo goynoy shaaramuxiyoogaara gayttidaba. (Hoo. 4:13, 14) Daro asay shaaramuxiyoogan ufayttiyo gishshawu, worddo goynuwaa dosees, shin he goynoy eti ufayttanaadan oottidee? Mulekka oottibeenna! Daawiti, ‘worddo xoossata kaalliyaageeti bantta bolla metuwaa darissiyoogaa’ yootiis. Eti zawi baynna naati daroppe waayettanaadankka oottidosona. (Isi. 57:5) Meqettaa iita gidiyoogaa bessiya hegaa mala hanotaa Yihooway ixxees! (Erm. 7:31) Ha wodiyankka, shaaramuxiyoogaa, haray atto mattuman issi mala gididaageeti mattumaa gayttiyoogaakka worddo goynoy darotoo xaasayidi xeellees. SHin kandduwaa laꞌatetta giyooban ufayttiyoogee kaalettiyoobay beniisappe doommidi laamettibeenna. (1 Qor. 6:18, 19) Asay ‘ba bolli metuwaa darissiyoogaa’ intte beꞌennan aggekketa. Hegaa gishshawu, yelagatoo, saluwan deꞌiya intte Aaway yootiyoobaa siyite. Ayyo azazettiyoogee inttena goꞌꞌiyoogaa loytti ammanite. Iitabaa oottidi guutta wodiyawu ufayttiyoogaappe he iitabaa gaasuwan gakkiya qohoy wolqqaama gidiyoogaa akeekite.—Gal. 6:8. w18.12 27-28 ¶16-18

Issi Kiristtaane aqo laggee wodiraa laammikko, mooribeenna Kiristtaanee kuuyana bessees. Aynne mooribeenna aqo laggee paraman shaahettananne haranttuwaa ekkana woy gelana danddayiyoogaa Yesuusi yootiis. (Maa. 19:9) Hara baggaara qassi, mooribeenna aqo laggee atto gaana danddayees. Hegee bala gidenna. Hooseꞌi Goomero zaariis. Goomera Hooseꞌa soo ya simmada, hara uraara mattumaa gayttana bessenna. Hooseꞌi amarida wodiyawu Goomeriira ‘mattumaa gayttibeenna.’ (Hoo. 3:1-3) SHin, guyyeppe Hooseꞌi zaarettidi iira gayttennan waayi aggana. Hegee Xoossay Israaꞌeelata baakko zaaranawunne etaara dabbotidi deꞌanawu eeno giidoogaa bessiyaaba. (Hoo. 1:11; 3:4, 5) Hegee aqo deꞌuwaabaa nuna ha wodiyan ay tamaarissii? Mooribeenna aqo laggee shaahettennan agganawu kuuyikko, zaarettidi mattumaa gayttiyoogee atto giidoogaa bessees. (1 Qor. 7:3, 5) Yaatiyoogee paraman shaahettanaadan oottiyaabay attidoogaa bessiyaaba. Hegaappe simmin eti azinanne machcho gididi aqo deꞌuwaa Xoossaagaadan xeellanawu baaxetana koshshees. w18.12 13 ¶13

Nuuni xannaꞌiyo wode, Yihooway issibaa waati xeelliyaakko nuuni qoppana koshshees; ayssi giikko, nuuni sinttappe akeekan kuuyanaadan hegee nuna maaddana danddayees. Yaatiyoogan, sohuwaara kuuyana koshshiyaabay merettiyo wode, oottanabay nuussi kirqqi geenna. (Lee. 22:3) Yooseefi bana PHoxiifaara machchiyaa lambbeechchanawu malido wode sohuwaara eqettiyoogan, aqo deꞌuwan ammanettiyoogaa Yihooway waati xeelliyaakko qoppidoogaa bessiis. (Doo. 39:8, 9) Qassi I, “Taani waatada hagaa mala daro iitabaa hanada Xoossaa bolli nagaraa oottoo?” yaagidi PHoxiifaara machcheeyyo zaaridoogee I Xoossaagaadan qoppiyoogaa bessees. Nuuni shin? Nenaara oottiya uri laambbeechchiyoogaa doommiis gaada qoppa. Woy qassi pokkobawu denttettiya kiitaa woy misiliyaa ne silkkiyan kiittikko shin? Nuuni hegaa malaban Yihoowa qofaa kasetidi tamaaridabanne aagaadan qoppiyaaba, qassi ay oottanaakko kasetidi kuuyidaba gidikko, Yihoowawu ammanettanawu metootokko. w18.11 25 ¶13-14

Amarida eranchchati ha xiqisee, “Taani Godan ufayttada guppana; taani Xoossan ufayttada hinddiriitaadan yuuyana” giyoogaa giidi qoppoosona. Hagee nuussi ubbaassi keehi loꞌꞌo timirtte! Yihooway nuussi sinttappe maalaaliyaabaa immanawu qaalaa geliyoogaa xalla gidennan, I hegaa polanawu oottiiddi deꞌiyoogaakka nuussi yootiis. Imbbaaqooma maxaafaappe nu tamaariyo keehi koshshiyaabay Yihoowan ammanettiyoogaa. (Imb. 2:4) Nuuni (1) nuna hirggissiyaanne qofissiya ubbabaa Yihoowawu yootiiddi, woosan gencciyoogan; (2) Yihoowa Qaalaanne A dirijjitee immiyo ay kaaletokka mintti kaalliyoogan; qassi (3) ammanettidinne danddayan Yihoowa naagiyoogan Yihoowaara dabbotaa minttikko, hegaadan ammanettidi deꞌana danddayoos. Imbbaaqoomi oottidoykka hegaa. I ba maxaafaa azzanuwan doommikkonne, minettidinne ufayttidi wurssiis. Simi yaakko, Yihooway aawadan qoommiyoogee nuussikka siyettana mala, Imbbaaqooma leemisuwaa kaalloos! Ha xuma alamiyan hegaappe aaruwan minttettiyaabaa ay demmana danddayiyoo? w18.11 17 ¶18-19

Yihooway nuna siiqiyoogaa nuuni eranaadan oottiya harabay hagaa: Xoossay ba “Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis.” (Yoh. 3:16) Ba deꞌuwaa nuussi immiyoogan Yesuusikka nuna keehi siiqiyoogaa bessiis! Qassi he siiqoy nuna keehi denttettiyaaba! Haray atto, ‘waayiyaa woy tuggaa’ gidinkka, ‘nuna Kiristtoosa siiquwaappe shaakkana’ danddayennaagaa Xoossaa Qaalay yootees. (Roo. 8:35, 38, 39) Nuuni asatettan, qofan woy ayyaanaaban daafuranaadan oottiya metuwaappe shemppanawu baaxetiyo wode, Kiristtoosi nuna keehi siiqiyoogaa hassayiyoogee nuuni genccanaadan maaddana danddayees. (2 Qor. 5:14) He siiqoy nuuni deꞌanawunne Yihoowawu haggaazanawu koyanaadan oottees. Nuna daafabay, yedetay, unꞌꞌissiyaabay woy hirggissiyaabay gakkikkonne, Yesuusa siiqoy nuuni hidootaa qanxxennaadan oottana danddayees. w18.09 14 ¶8-9

Nuuni tuman hemettanawu, Yihooway yootiyo ubbabaa ekkananne azazettana koshshees. Nuuni nu deꞌuwan tumaa sinttayananne Geeshsha Maxaafay yootiyo maaraadan deꞌana bessees. Daawitaagaadan nuunikka Xoossaa tuman hemettiyoogaa aggennaadan murttana koshshees. Yaatana xayikko, nuuni tumaa gishshawu aggidobaa qoppiyoogaa doommananne ubba qassi hegeetuppe amaridaageeta zaarettidi koyana danddayoos. Nuuni tumaa ubbaa mintti oyqqoos. Nuuni tumaappe awugaa ekkidi awugaa agganaakko doorana danddayennaagaa akeekoos. Nuuni ‘tumatetta ubban’ hemettana bessees. (Yoh. 16:13) Tumaappe loddan loddan wora beenna mala nuuni nu wodiyaa akeekan goꞌettana bessees. Nuuni naagettana xayikko, allaxxiyoogan, ufayttiyoobaa oottiyoogan, Intternneetiyan koyiyoogan woy televizhiiniyaa beꞌiyoogan daro wodiyaa wurssana danddayoos. Hegeeti bala gidana xayikkonne, kase Yihoowawu haggaaziyo wodiyan eta oottana danddayoos. w18.11 10 ¶7-8

Qoppennan nu deꞌoy laamettiyoogee nuuni hirgganaadaaninne unꞌꞌettanaadan oottana danddayees. (Lee. 12:25) He laamettidabay ammananawu nuna metana danddayees. Hegaa mala hanotatun, nuuni waanidi ‘coꞌꞌu gaananne woppu gaana’ danddayiyoo? (Maz. 131:1-3) Metiyaabay deꞌishinkka, ha wodiyan nu qofaa naagiya “Xoossaa sarotettai” nuna woppissiyoogaa beꞌana danddayoos. (Pili. 4:6, 7) Yaatiyo gishshawu, nuuni hirggaa maashiyo wode Yihoowa woossikko, Xoossaa sarotettay nuuni ayyaanaabaa halchchuwaa polanawu yaa murttanaadan oottananne hidootaa qanxxennaadan naagana danddayees. Xoossaa ayyaanay nuuni woppu gaanaadan oottiyoogaa bolli, ayyaanaabaa sinttayanaadan maaddiya xiqiseta hassayanaadan oottees.—Yoh. 14:26, 27. w18.10 27 ¶2; 28 ¶5, 8

Asaa aybippenne aaruwan qohida ubbabaappe kasetiyaabay aybee? Wordduwaa woy qassi issi ura cimmanawu giidi tuma gidennabaa eriiddi yootiyoogaa. Koyro wordduwaa yootiday oonee? Yesuus Kiristtoosi “Xalahe halaqaa” Dabloosa, ‘wordduwawu aawa’ giis. (Yoh. 8:44) I koyro wordduwaa awude yootidee? Hegee hanidoy daro shaꞌu layttappe kase Edene gannatiyaana. Koyro azinaynne machchiyaa, Addaameenne Hewaana eta medhdhidaagee etawu giigissido Gannatiyan ufayttidi deꞌoosona. He wode, Dabloosi kelttiyaa geliis. Eti azazettennan ixxidi hayqqenna mala, “lo77uwaanne iitaa erissiya mittaa teeraappe” meennaadan Xoossay etawu yootidoogaa I erees. Gidikkonne, Seexaanay shooshshaa baggaara Hewaanissi hagaadan giis: “CHii, intte ainnekka haiqqekketa [worddo ubbaappe koyruwaa]; Xoossai hegaa giidoogee, he mittaa teeraa intte miikko, intte aifee dooyettin, lo77uwaanne iitaa Xoossaadan intte eranaagaa i eriyo gishshaassa.”—Doo. 2:15-17; 3:1-5. w18.10 6 ¶1-2

Nu wozanay geeshsha gididi deꞌanaadan, nuuni gawaa geeshsha gidana bessees; qassi geeshshabaa amottana bessees. Nuuni Yihoowawu goynniyo goynoy geeshsha gidanaadan nuuni qoppiyooban geeshsha gidana koshshees. (2 Qor. 4:2; 1 Xim. 1:5) SHin, “ooninne [Xoossaa] be7idi paxa” deꞌennaba gidishin, wozanaa geeshshati waatidi ‘Xoossaa beꞌiyoonaa’? (Kes. 33:20) “Beꞌiyoogaa” giyo Giriiketto qaalay “qofan beꞌiyoogaa, akeekiyoogaa, eriyoogaa” geetettana danddayees. Xoossaa bantta ‘wozanan beꞌiyaageeti’ tumuppe A eriyaageetanne A eeshshaa nashshiyaageeta. (Efi. 1:18) Tumu goynuwaa goynniyaageeti Xoossaa eriyoogaa bolli I etawu oottiyoobaa akeekiyoogan “Xoossaa be7ana” danddayoosona. (Iyy. 42:5) Qassi geeshsha gididi deꞌanawunne ayyo ammanettidi haggaazanawu baaxetiyaageetussi Xoossay immana maalaalissiya anjjuwaa eti ubbatoo bantta ‘wozanan beꞌoosona.’ w18.09 20 ¶13, 15-16

Nuuni eriyo suurebaa oottiyoogee daro anjjuwaa demissees. Aadhdhida eratettawu denddoy era gidikkonne, hegee tumubaa akeekiyoogaappe aadhdhiyaaba. Aadhdhida eratettay nuuni kuuyiyoobaara gayttidaba. Qaacotussikka aadhdhida eratettay deꞌees. Qaacoti boniyan miyoobaa shiishshiyoogan meretan aadhdhida eranchcha gidiyoogaa bessoosona. (Lee. 30:24, 25) ‘Xoossaa aadhdhida eratetta’ gidida Kiristtoosi ubbatoo ba Aawaa ufayssiyaabaa oottees. (1 Qor. 1:24; Yoh. 8:29) Suurebaa kuuyiyoogee hegaa oottiyoogaappe dummatiyoogaa Xoossay erees. Qassi banttana ziqqi oottidi gencciyaageetanne tuma gidiyoogaa eriyoobaa oottiyaageeta I anjjees. (Maa. 7:21-23) Yaatiyo gishshawu, gubaaꞌee ubbati Yihoowawu banttana ziqqi oottidi haggaaziyo soho gidanaadan ubbatoo baaxetite. Nuuni eriyo tumubaa oosuwan peeshshanawu wodeenne danddayay koshshiyaaba gidikkonne, hegee nuna ziqqi oottiyoogaa bessiyaaba; qassi yaatiyoogee haꞌꞌikka sinttappekka ufayssaa demissees. w18.09 7 ¶18

Wottiyoobi baynna asay A halchchuwaa polanawu aara issippe oottanaagaa Medhdhidaagee kasetidi qoppiis. Asay ha wodiyan nagaranchcha gidikkonne, ammanettida asay galla galla Yihoowaara oottana danddayees. Leemisuwawu, Xoossaa Kawotettaa mishiraachchuwaa sabbakiyoogaaninne erissiyo ashkkara oottiyoogan nuuni ‘aara issippe oottoos.’ (1 Qor. 3:5-9) Saluwaanne saꞌaa medhdhida ubbabaa danddayiyaagee xoqqu ootti xeelliyo oosuwaa aara hashetidi oottana danddayiyoogee ay keena gita maatakko qoppa! SHin, nuuni Yihoowaara issippe oottiyo ogee sabbakiyoogaanne erissiyo ashkkara oottiyoogaa xalla gidenna. Nuuni hegaadan oottana danddayiyo hara ogee nu soo asaanne nu mala Kiristtaaneta maaddiyoogaa, imattaa mokkiyoogaa, dirijjitee ootissiyo oosuwaa nu dosan oottiyoogaanne nu haggaazuwaa aassiyoogaa. (Qol. 3:23) SHin, neeni Yihoowawu oottana danddayiyoobaa haratuugaara geeddarssoppa. Issi ura layttay, payyatettay, hanotaynne abbee haraagaappe dummatiyoogaa hassaya. w18.08 23 ¶1-2

Yihooway Imbbaaqoomi wozanappe oychchidobawu zaaruwaa demmanaagaa yootiyoogan minttettiis. I bana hirggissiya ubbabaappe mati woppu gaana. Xoossay hananabaa yootiyaagaa, “Danddaya, tanan ammanetta. Gamꞌꞌiyaaba milatikkokka, taani zaarana!” yaagiis giyoogaa mala. Yihooway ba gelido qaalaa polanawu wodiyaa keeridoogaa Imbbaaqooma hassayissiis. I ba halchchoy polettanaashin Imbbaaqoomi naaganaadan zoriis. Wurssettan, hananabaa yootiyaagee naagidobay polettennan attin azzanenna. Danddayan Yihoowa naagiyoogeenne I nuussi yootiyoobaa mintti kaalliyoogee nuuni yayyennaadan oottananne metoynne waayee deꞌishinkka nu wozanay woppu gaanaadan maaddana. Nuuni Xoossay biron qonccissibeenna “aginaanne wodiyaa” qoppiyoogaa aggidi Yihooway likke ba keerido wodiyan polanaagaa nuuni ammanettana danddayiyoogaa Yesuusi yootiis. (Oos. 1:7) Hegaa gishshawu, nuussi danddayettida ubbabaa Yihoowawu oottanawu nuuyyo deꞌiya wodiyaa loytti goꞌettiyoogan, hidootaa qanxxennan, nu huuphiyaa ziqqi oottidi, ammanuwaaninne danddayan naagoos.—Mar. 13:35-37; Gal. 6:9. w18.11 16 ¶13-14

He wode deꞌiya hara Ayhudatuugaadan, PHeexiroosikka Ayhuda gidennaageeti tuna gi qoppiiddi dicciis. SHin PHeexiroosi he hanotaa wotti yeggi qoppanaadan oottiyaabay merettiis. Leemisuwawu, PHeexiroosi maalaalissiya ajjuutaa beꞌiis. (Oos. 10:9-16) PHeexiroosaagaadan, nuuni nuna loytti qorananne maaduwaa ekkanawu eeno gaana bessees; yaatikko, nu wozanan lagiyoogaa erana danddayoos. Nuuni oottana danddayiyo harabi aybee? Nuuni nu wozanaa aassi dooyikko, lagiyoogaa aggidi siiqana. (2 Qor. 6:11-13) Neeni ne zare, ne qommo, ne sheeshsha, ne biitta asa gidida woy ne qaalaa haasayiya asa xallaara laggetay? Yaanikko, siiquwaa aassa. Nenaara issippe haggaazanaadan woy ne son qumaa maanaadan woy wodiyaa aattanaadan dumma dumma wogan diccidaageeta shoobbiyoogee loꞌꞌo. (Oos. 16:14, 15) Neeni yaatikko, laguwaa ne wozanaappe xayssada siiqoy ne wozanan kumanaadan oottaasa. w18.08 9 ¶3, 6; 10 ¶7

Amarida Yihoowa Markkati alamiyaa eeshshaa minnidi eqettibookkona. Eti mi uyi kaaꞌiyoosan duriyo durssaynne haniyoobay Kiristtaanetussi bessiyaaba gidenna. Eti Intternneetiyan wottiyo eta pootoynne eti xaafiyoobay Kiristtaanetussi bessennaba. Hegaa gishshawu, Yihoowa asaa giddon loꞌꞌo eeshshaara deꞌanawu baaxetiya laggeta eti qohana danddayoosona. (1 PHe. 2:11,12) Alamee “asatettaa amoi, aifen xeellidi qaaqqatiyoogeenne miishshan ceeqettiyoogee” keehi aakkanaadan oottees. (1 Yoh. 2:16) SHin, nuuni Yihoowaba gidiyo gishshawu, “nagara oosuwaanne ha sa7aa amuwaa nuuni agganaadaaninne nu huuphiyaa naagidi, ha sa7an Xoossaa milatidi, xillotettan de7anaadan” nuussi zoree imettees. (Tii. 2:12) Nu haasayay, nu muussaanne ushshaa meezee, nuuni maayiyoobaynne alleeqettiyoobay, oosuwaa nuuni xeelliyo hanotay—oottiyo ubbabay nuuni muleera Yihoowawu sheerettidaageeta gidiyoogaa haratussi qonccissana bessees. w18.07 25 ¶13-14

Nu leemiso ayfee ubbatoo Yihoowa tishshi oottidi xeellikko, haratu mooroy nuna yiilloyenna woy Yihoowaara nu dabbotido dabbotay moorettanaadan oottenna. Nuuyyo Muuseegaadan, Yihoowa dirijjitiyan guutta maati deꞌikko hegee keehi koshshiyaaba. Nuuni ubbay ‘yashshatettaaninne kokkorssan nu atotettaa polanawu oottana’ koshshikkonne, nuna pirddiyo laamettenna issi maari Yihoowawu baynnaagaa nuuni hassayana bessees. (Pili. 2:12) Ubbakka nuuyyo gita maati deꞌikko, daroppe oyshettoos. (Luq. 12:48) SHin nuuni Yihoowa wozanappe siiqikko, nuna aybinne xubbenna woy A siiquwaappe shaakkenna. (Maz. 119:165; Roo. 8:37-39) Ha wayssiya wodiyan, nuuni A sheniyaa akeekana mala, simi nu ayfee ubbatoo “kawotaa araatan saluwan” uttidaagaakko xeello. (Maz. 123:1) Harati oottiyoobay Yihoowaara nu dabbotido dabbotay moorettanaadan mule oottana bessenna. w18.07 16 ¶19-20

Yihoowa asaa qooday gujjiyogaa siyiyoogee keehi ufayssees! Nuuni 2017n Geeshsha Maxaafaa xannaꞌissidoogeetu qooday 10,000,000⁠ppe daro. Hegee tumukka Xoossaa asay ba pooꞌuwaa pooꞌissiyoogaa bessiyaaba! Qassi Godaa Kahuwaa Baalan nuuni mokkido, eranawu koyiya daro miiloone asaa qoppa. Eti yaatiyoogan, Xoossay wozuwaa giigissiyoogan nuna siiqido siiquwaabaa erana danddayoosona. (1 Yoh. 4:9) Kumetta saꞌan deꞌiya Yihoowa asay daro qaalaa haasayees. Gidikkokka, nuuni nu Aawaa Yihoowa issippetettan sabbennaadan hegee diggenna. (Ajj. 7:9) Nu qaalay ayba gidin woy nuuni awan deꞌinkka, nuuni alamiyaa ‘asaa giddon saluwan pooꞌiya xoolintte’ mala. (Pili. 2:15) Nuuni beꞌiyo dichchaynne issippetettay, qassi ubbatoo naagi uttanawu baaxetiyoogee nuuni Yihoowa bonchchissanaadan maaddees. w18.06 21 ¶1-3

Yesuusi ayyaanaabaa haasayiyoobaa ba wozanan wottido gishshawu namisaykka dogettana danddayiyoogaa, I etawu zaaridobay bessees. Haray atto, Samaare maccaasasikka sabbakiyoogee A Aawaa shene, qassi hegee ayyo quma mala. (Yoh 4:32-34) Yaaqoobinne Yohaannisi he timirttiyaa akeekibookkona. Yesuusaara Samaariyaa biittaara kanttiiddi, erissiyo ashkkarati Samaariyan issi qeeri kataman aqanawu koyidosona. Samaariyaa asay eta mokkennan ixxiis; yaatin Yaaqoobinne Yohaannisi hanqqettidi, tamaa saluwaappe wottidi he katamaa xayssanaadan oychchidosona. Yesuusi eta mintti seeriis. (Luq. 9:51-56) He mokkibeenna katamay eta biittaa Galiila katama gidiyaakko Yaaqoobinne Yohaannisi hegaadan hananeeshsha giidi qoppana danddayoos. Asa shenetiyoogee eta ixuwawu gaaso gididaba milatees. Kiitettida Yohaannisi guyyeppe Samaariyaa biittan darosan sabbakidi loꞌꞌo ayfiyaa demmido wode, kase eesuwan hanqqettidoogan yeellatennan aggenna.—Oos. 8:14, 25. w18.06 10-11 ¶12-13

Nuuni Geeshsha Maxaafaa tumaa leemiso hanotan nu xeessan qabattodan qachikko hegaara maayettiya ogiyan deꞌoos; qassi ubba wodekka tumaa haasayoos. Nuuni worddotennay aybissee? Seexaanawu keehi ushachchanaadan oottida issi miishshay wordduwaa gidiyo gishshataassa. Worddoy yootiyaagaakka hegaa ammaniyaagaakka qohees. (Yoh. 8:44) SHin nuuyyo danddayettida peeshshan worddotennaadan naagettoos. (Efi. 4:25) SHin hegee wayssana danddayees. Abigaalo giyo 18 laytta naꞌiyaa, “Ubbatoo, ubba qassi worddotiyoogee iita hanotaappe kessiyaaba gidiyo wode, tumaa haasayiyoogee maaddiyaaba milatennan aggana danddayees” yaagaasu. Yaatin tumaa haasayanawu ayssi baaxetana koshshii? Viktoriyo giyo 23 laytta naꞌiyaa hagaadan gaasu: “Neeni tumaa yootiyoonne ne ammaniyoobawu exatiyo wode, harati nenaara gaaddetana danddayoosona. SHin ubbatoo keehi loꞌꞌo goꞌꞌaa demmaasa: Yayyakka, Yihoowakko kaseegaappe aaruwan shiiqaasa, qassi nena siiqiyaageeti nena bonchchoosona.” Tumukka, “xeessan qabattuwaa gixxiyoogaadan tumatettaa” ubbatoo gixxiyoogee bessiyaaba. w18.05 28 ¶3, 5

Ha wayssiya wodee iiti iiti biyo wode, nuuni ubbay naagi uttana koshshees. Yihooway likke ba keerido wodiyan denddana. (Maa. 24:42-44) Hegee gakkanaashin, ubbatoo danddayan naaga utta. Xoossaa Qaalaa ubba galla nabbaba, qassi woosan minna. (1 PHe. 4:7) Ubbatoo naagi uttiyoogaaninne bantta pooꞌuwaa pooꞌissiyoogan bantta deꞌuwan ufayttiya ishatunne michchotu loꞌꞌo leemisuwaa qoppa. Issi loꞌꞌo leemisoy, Hosppune 15, 2012 Wochiyo Keelan (Amaarattuwaa), sinttaa 18-21n, “Laappun Tammu Layttawu Ayhuda Asa Maayuwaa Oyqqiyoogaa” giya huuphe yohuwan deꞌiyaagaa. Minttettiya oosoynne laggetettay ne deꞌuwan kumo. Hegan neeni keehi ufayttana, qassi neeyyo wodee eesuwan aadhdhidaba milatana. (Efi. 5:16) Nuuni nagaranchcha gidiyoogee Yihoowa ufayssiya ogiyan ayyo haggaazanawu diggennaagaa eriyoogee nu ammanuwaa minttiyaaba. Yaanido gishshawu, Yihooway “imota” gidida attuma asata, gubaaꞌe cimata immidoogaa nashsha. (Efi. 4:8, 11,12) Issi cimay nena oychchanawu yiyo wode, I yootiyo aadhdhida eraaninne zoriyan goꞌetta. w18.06 24-25 ¶15-18

Yesuusi A “siiquwan de7ana” koshshiyoogaa bana kaalliyaageetussi yootiis. Aybissi? Yesuusi erissiyo ashkkara gididi deꞌanawu ubbatoo genccana koshshiyo gishshataassa. Yesuusi genccana koshshiyoogaa qonccissanawu Yohaannisa 15:4-10n deꞌiya qantta qofan “de7ite” giya qaalaa darotoo yootiis. Nuuni Kiristtoosa siiquwan deꞌanawunne an ubbatoo nashettanawu koyiyoogaa waati bessiyoo? Yesuusi azazidobaa oottiyoogaana. Yesuusi I oottidobaa nuuni oottanaadan yootiis; ayssi giikko I, “Taani ta Aawaa azazuwaa naagada a siiquwan de7idoogaadan” yaagiis. Yesuusi nuussi leemiso gidiis. (Yoh. 13:15) Qassi biidi sabbakanaadan Yesuusi azazidobaa azazettiyoogan Xoossaa siiqiyoogaa bessoos; ayssi giikko, Yesuusa azazoti A Aawaa qofaa qonccissoosona. (Maa. 17:5; Yoh. 8:28) Yihoowanne Yesuusa siiqiyoogaa nuuni bessiyo wode, eti nuuni eta siiquwan deꞌanaadan oottoosona. w18.05 18 ¶5-7

Yelagatettan timirttiyaabaa, oosuwaabaanne harabaa kuuyana koshshees. Neeni ne halchchuwaa erikko, loꞌꞌobaa kuuyiyoogee nena metenna. Neeni naatettan loꞌꞌobaa halchchikko, sohuwaara maadettana. Kumetta saꞌan gubaaꞌetun deꞌiya shaꞌan qoodettiya yelagata wozanappe galatiyoogee bessiyaaba. Eti bantta huuphiyaa Yihoowawu hadaraa immidi, bantta deꞌuwan ayyaanaabaa halchchuwaa kaseyoosona. Hegaa mala yelagati ubbaban Yihoowa kaaletuwaa kaalliyoogaa tamaariyo wode bantta deꞌuwan keehi ufayttoosona. Eti so asaa deꞌuwaara gayttidaagan Yihoowa kaaletuwaa kaalloosona. Solomoni hagaadan giis: “Ne polo wozanan GODAA ammanetta; . . . Neeni oottiyo ooso ubban a sinttaya; i nena likke ogiyaa kaalettana.” (Lee. 3:5, 6) Yelagatoo, inttena Yihooway keehippe siiqees! Intte ayyo alꞌꞌo, qassi I inttena naagana, kaalettananne anjjana. w18.04 26 ¶7; 27 ¶9

Kiitettida Yohaannisikka beni Kiristtaane gubaaꞌiyan tuussa mala. Yesuusa haggaazuwaabaa keehi ufayssiya wonggeliyaa I xaafiis. Geeshsha Maxaafaa kifile gidida ha maxaafay Kiristtaaneta xeetan qoodettiya layttawu minttettiis; qassi ha wodiyan nunakka minttettees. Yesuusi siiqoy tumu erissiyo ashkkarata shaakki erissiya malaata gidiyoogaa yootidoogee deꞌiyoy A wonggele xallaana. (Yoh. 13:35) Yohaannisi xaafido heezzu dabddaabbetunkka hara alꞌꞌo tumay deꞌees. Nu nagaraa gaasuwan nuuni azzaniyo wode, “Yesuus Kiristtoosa suuttai nagara ubbaappe nuna ashshees” giyaagaa nabbabiyo wode woppu giyoogee qoncce. (1 Yoh. 1:7) Nuuni nuna ubbatoo mooranchchadan xeellikko, “Xoossai nu wozanaappe gita” giyaagaa nabbabiyo wode nuuni minettana. (1 Yoh. 3:20) “Xoossai siiqo” giidi xaafiday Yohaannisa xaalaala. (1 Yoh. 4:8, 16) I xaafido naaꞌꞌanttonne heezzantto dabddaabbiyan ubbatoo ‘tumatettan deꞌiya’ Kiristtaaneta nashshees.—2 Yoh. 4; 3 Yoh. 3, 4. w18.04 18 ¶14-15