Laappune

Nuuni Doomettaabaa maxaafaa koyro naaꞌꞌu shemppota nabbabiyo wode, Addaameenne Hewaana ha wodiyan asay amo xallaa amottiyo deꞌo, hegeekka hiyyeesatettaappe, yashshaappenne naaquwaappe laꞌa gidiyo deꞌo deꞌidoogaa akeekoos. Koyro azinaynne machchiyaa he wode bantta deꞌuwan qumawu, oosuwawu, harggiyawunne hayquwawu mule hirggokkona. (Doo. 1:27-29; 2:8, 9, 15) Laꞌatettaara gayttidaagan, zawi baynna laꞌatettay deꞌiyoy Xoossaa Yihoowa xallaassa gidiyoogee nuuni hassayana koshshiya waannaba. Aybissi? I ubbabaa Medhdhidaagaanne Ubbaa haariyaagaa gidiyo gishshataassa. (1 Xim. 1:17; Ajj. 4:11) Yaatiyo gishshawu, saluwaaninne saꞌan deꞌiya mereta ubbaa laꞌatettawu zaway deꞌees. Wottido zaway qohennaba, koshshiyaabanne bessiyaaba giidi hegaa polissiyo wurssetta maatay Xoossaa Yihoowaagaa gidiyoogaa eti akeekana bessees. Xoossaa Yihooway koyro medhdhido asatussi oottidobaykka hegaa. w18.04 4 ¶4, 6

Ha wurssetta wodiyan nuuni gencciyoy Yihooway maaddiyo gishshataassa. (2 Qor. 4:7, 8) Yihoowaara dabbotibeenna asatubaa qoppa. A maadoy baynnan ha alamiyan deꞌiyoogee eta keehi metiyoogee qoncce. Yesuusaagaadan, nuuni etayyo qarettoos, qassi “lo77o mishiraachchuwaa” etayyo yootanawu koyoos. Hegaa gishshawu, neeni tamaarissiyoogeeta danddaya. Nuuni loytti eriyo Geeshsha Maxaafaa tumaappe amaridaageeta eti mule qoppennan aggana danddayiyoogaa hassaya. Qassi daroti bantta ammaniyoobaa wozanappe dosoosona. Eti bantta ammanoy banttana bantta so asaa, bantta wogaanne bantta heeraa asaa bagga oottiya keehi koshshiyaabadan xeellana danddayoosona. Asay xoqqu ootti xeelliyo ammanuwaa agganaadan nuuni eta oychchanaappe kasetidi, eti nunaara xannaꞌiyoogaa doommiyo wode erenna, Geeshsha Maxaafaappe tamaariyo “ooratta” tumaa loytti eranaadaaninne siiqanaadan nuuni eta maaddiyoogee koshshana danddayees. Eti bantta kase ammanuwaa agganay nuuni yaatiyo wode xallaana. Asay hegaadan laamettana mala maaddanawu adussa wodiyaa koshshana danddayees.—Roo. 12:2. w19.03 23 ¶10, 12; 24 ¶13

Yihooway ba Naꞌaa siiqiyoogaanne nashshiyoogaa qonccissidoogee nuunikka A leemisuwaa kaallidi, harata minttettana danddayiyo hanotaa koyanaadan hassayissees. (Yoh. 5:20) Issi asi nuuni oottiyo loꞌꞌobawu nuna galatiyoogeenne I nuna siiqiyoogaa bessiyoogee keehi ufayssees. Hegaadankka, gubaaꞌiyan deꞌiya ishanttussinne michchonttussi, qassikka nu soo asaassi siiqoynne minttettoy koshshees. Harata nu galatiyo wode, eta ammanoy minnanaadaaninne eti Yihoowayyo ammanettidi haggaazanaadan maaddoos. Yelidaageeti haratuppe aaruwan bantta naata minttettana bessees. Eti bantta naata wozanappe galatiyoogeenne siiqiyoogaa bessiyoogee, eta naati keehi ufayttanaadan maaddees. “Tana nebai ufaissees.” Ha qaalay Yesuusi ba Aawaa sheniyaa polanaagaa Yihooway ammanettiyoogaa bessees. Yihooway ba Naꞌan hegaadan ammanettiyo gishshawu, Yihooway immido hidootaa ubbaa Yesuusi polanaagaa nuuni kumetta wozanan ammanana koshshees. (2 Qor. 1:20) Nuuni Yesuusa leemisuwaa qoppiyo wode, kaseegaappe aaruwan appe tamaaranawunne A leemisuwaa kaallanawu murttoos.—1 PHe. 2:21. w19.03 8 ¶3; 9 ¶5-6

Nuuni alꞌꞌo imotaa tumu goꞌꞌaa akeekiyoogee, immidaagaa galatanaadan denttettees. Israaꞌeelati Yihooway eta Gibxxe aylletettaappe kessidi immido laꞌatettaa nashshibookkona. Eti laꞌa kiyido amarida aginan Gibxxen kase miyoobaanne uyiyoobaa amottidi, Yihooway immiyooban zuuzummiyoogaa, ubba qassi guyye Gibxxe simmanawu koyiyoogaa doommidosona. Eti ‘molee, paranjja leehee, meeloonee, sunkkuruutoynne tuummoy’ tumu Xoossaa Yihoowawu goynnana mala Xoossay etawu immido laꞌatettaappe aadhdhiyaabadan xeellidosona. Yihooway he asaa bolli keehi hanqqettidoogee maalaaliyaabee? (Qoo. 11:5, 6, 10; 14:3, 4) Nuuni hegaappe gitabaa tamaaroos! Kiitettida PHawuloosi Kiristtaaneti ubbay banttawu Yihooway ba Naꞌaa Yesuus Kiristtoosa baggaara kehatettan immido laꞌatettaa xaasayennaadan zoriis.—2 Qor. 6:1. w18.04 9-10 ¶6-7

Nuuni ubbay hara uri nuna siiqanaadan koyoos. Qassi nuuni ubbay hara asi nuna maara oyqqanaadan koyoos. Nuna asi siiqennabanne nuuyyo suure pirddennaba gidikko, pattennabadaaninne hidooti baynnabadan nuussi siyettana danddayees. Nuuni siiquwaanne tumu pirddaa koyiyoogaa Yihooway erees. (Maz. 33:5) Xoossay nuna keehi siiqiyoogaanne hara asi nuna maara oyqqanaadan I koyiyoogaa nuuni ammanettana danddayoos. Yihooway Muuse baggaara Israaꞌeela deriyawu immido Higgiyaa nuuni loytti xannaꞌiyo wode hegee qonccees. Nuuni Muuse Higgiyaa xannaꞌiyo wode, nuna siiqiya Xoossaa Yihoowawu siyettiyaabaa akeekana. (Roo. 13: 8-10) Yihooway ubbabaa oottanaadan denttettiyay siiqo gidiyo gishshawu nuuni Muuse Higgiyawu denddoy siiqo gaana danddayoos. (1 Yoh. 4:8) Yihooway kumetta Higgiyawu naaꞌꞌu azazoti denddo gidanaadan oottiis; hegeetikka Xoossaa siiqa giyaagaanne ne shooruwaa siiqa giyaagaa. (Wog. 19:18; Zaa. 6:5; Maa. 22: 36-40) Higgiyan deꞌiya 600⁠ppe dariya azazoti ubbay Yihoowa siiquwaabaa nuna tamaarissoosona. w19.02 20-21 ¶1-4

Iyyoobi maccaasaara gayttidaagan bana naagiis. (Iyy. 31:1) I aqo oyqqida asa gidiyo gishshawu, issi uri ba machcheeppe attin, hara maccaasaa mattumaa gaytettawu qaaqqatidi xeellana koshshennaagaa erees. Ha wodiyan, nuuni mattumaara gayttidaagan paacee darido alamiyan deꞌoos. Iyyoobaagaadan, nu aqo lagge gidenna urassi bessenna xeelay nuussi deꞌennaadan naagettiyoo? Qassikka pornograafiyaara gayttidabaa keehippe ixxiyoo? (Maa. 5:28) Nu huuphiyaa galla galla naaganawu hegaadan baaxetikko, nu suuretettaa kaseegaappe aaruwan naagidi deꞌana danddayoos. Iyyoobi aquwaa xeelliyo ogiyankka Yihoowassi azazettiis. Iyyoobi ba duretettan ammanettikko, I gita nagaraa oottiyoogaanne qaxxayettana koshshiyoogaa erees. (Iyy. 31:24, 25, 28) Ha wodiyan, nuuni asay aquwaa keehi xoqqu oottidi xeelliyo alamiyan deꞌoos. Geeshsha Maxaafay nuna zoriyoogaadan nuuni miishshaanne aquwaa maara xeellikko, nu suuretettaa minttidi naagana.—Lee. 30:8, 9; Maa. 6:19-20. w19.02 6 ¶13-14

Yesuusi ba oottido ubban, Yihooway nuna keehi siiqiyoogaadan wottiyoobi baynna ogiyan nuna siiqiis. (Yoh. 15:9; 1 Yoh. 4:8-10) Ubbaappe aaruwan, Yesuusi wozanappe koyidi nu gishshawu ba deꞌuwaa aatti immiis. Nuuni tiyettidaageeta gidin woy ‘hara dorssata’ gidin, he yarshshuwaa baggaara Yihoowaynne A Naꞌay nuna siiqido siiquwan goꞌettoos. (Yoh. 10:16; 1 Yoh. 2:2) Godaa Kahuwawu goꞌettiyoobaakka qoppa; Yesuusi ba erissiyo ashkkarata siiqiyoogaanne etawu qoppiyoogaa hegee bessees. Waatidi? Giigissanawu metenna guuttaban bonchchiyo baalaa Yesuusi essiyoogan bana kaalliya ayyaanan tiyettidaageeta siiqiyoogaa bessiis. Guyyeppe, ayyaanan tiyettida he erissiyo ashkkarati qashettiyoogaa gujjin, dumma dummabay eta gakkishin layttan layttan he baalaa bonchchana koshshiis. (Ajj. 2:10) Eti Yesuusawu azazettidonaa? Ee, azazettidosona! Ha wodiyaa gakkanaassi, tumu Kiristtaaneti Yesuusa hayquwaa hassayanawu baaxetidosona. w19.01 24 ¶13-15

He laꞌatettay worddo haymaanootiyaappe, era xayiyoogaappenne mala ammanuwaappe laꞌa kiyiyoogaara gayttidaba. Qassi I hegaa xallakka gidenna. Nuuni sinttappe “Xoossaa naati ailletettaappe kiyido bonchcho kessaa” yeemuwan naagoos. (Roo. 8:21) ‘Kiristtoosi tamaarissiyoobawu azazettiyoogan’ ha wodiyankka he laꞌatettaa demmana danddayeeta. (Yoh. 8:31) Yaatiyoogan, intte tumatettaabaa tamaariyoogaa xalla gidennan, an deꞌiyoogan ‘tumatettaa erana.’ Ha ceega alamiyan asi loꞌꞌo deꞌo giyoobaykka ammanttenna, qassi guutta wodiyaassa. Wontto hananabaa nuuni erokko. (Yaaq. 4:13, 14) Yaatiyo gishshawu, akeekanchcha gidiyoogaa bessiyaabaa oottidi “tumu de7uwaa,” hegeekka merinaa deꞌuwaa demissiya ogiyan deꞌiyoogee aybippenne loꞌꞌo. (1 Xim. 6:19) Nuuni he ogiyan baanaadan Xoossay giddennaagee qoncce. Nuuni doorana danddayoos. Yihooway inttessi ‘saama’ gidanaadan oottite. (Maz. 16:5) I inttessi immido daro ‘loꞌꞌobaa’ nashshite. (Maz. 103:5) I inttessi daro ‘ufayssaa’ merinawu immana danddayiyoogaa ammanettite.—Maz. 16:11. w18.12 28 ¶19, 21

Aqo deꞌuwaa Yesuusaagaadaaninne Yihoowaagaadan xeellanawu ubba Kiristtaaneti baaxetana koshshees. SHin, asay nagaranchcha gidiyo gishshawu, issoti issoti hegaadan oottennan aggana danddayoosona. (Roo. 7:18-23) Hegaa gishshawu, koyro xeetu layttan issi issi Kiristtaanetu aqo deꞌoy giigennan ixxidoogee nuna garamissana koshshenna. PHawuloosi, “Machchiyaa ba azinaappe shaahettuppu” giikkonne, issi issitoo hegee haniis. (1 Qor. 7:10, 11) Hegaadan shaahettanaadan oottiday aybakko PHawuloosi yootibeenna. Leemisuwawu, machchiyaa paraman shaahettada haranttuwaa gelanaadan gaaso gidiya pokkobaa azinay oottibeenna. PHawuloosi ba azinaappe shaahettida machchiyaa ‘gelennan deꞌana woy ba azinaara sigettana’ koshshiyoogaa yootiis. Yaatiyo gishshawu, haꞌꞌikka eti naaꞌꞌay Xoossaa sinttan issuwaa. Gaaso gidida metoy ayba gidinkka, aqo laggee shaaramuxana xayikko, eta halchchoy sigettanaassa gidana koshshiyoogaa PHawuloosi yootiis. Eti cimata maaduwaa oychchana danddayoosona. w18.12 13 ¶14-15

Ha wodiyan, Xoossay A asay aara dabbotanaadaaninne danddayettida ubban A oosuwaa loytti oottanaadan koyees. (Maa. 28:19, 20; Yaaq. 4:8) Loꞌꞌobaa qoppidi issi issi asay nuuni hegaadan oottennaadan zorana danddayees. Leemisuwawu, kase amarida wodiyan neeni ayyaanaabaa oottiyoogaa issi loꞌꞌo oosoy diggiyaaba gidikkonne, nena ootissiyaagee neeyyo damoozaa gujjidi he oosuwaa immikko shin? Woy qassi neeni tamaare gidikko, gujjada tamaaranawu intte sooppe haahosaa baanawu shoobettidabadan qoppa. Neeni woossananne xannaꞌana, qassi harata zoriyaa oychchada kuuyana koshshiyoy he wodee? Hegaa malaban Yihoowa qofay aybakko haꞌꞌi tamaariyoogeenne aagaadan qoppanawu baaxetiyoogee loꞌꞌo. Yaanikko, hegaa malabay nena gakkikko, hegee neeyyo paace gidennan aggana danddayees. Neeni ayyaanaabaa halchcha uttadasanne ne wozanan murttadasa; attidabay neeni kasetada kuuyidobaa poliyoogaa. w18.11 27 ¶18

Solomoni Israaꞌeela kawo gidiyo wode yelaga. I kawo gidido koyro heeran, Yihooway aymuwan ayyo qonccidi, “Taani neeyyo ai immanau koyai?” yaagiis. Solomoni hagaadan giidi zaariis: ‘Taani guutta naꞌa. Hegaa gishshawu, taani ne asaa ayssanawu taayyo ne ashkkaraayyo akeeka wozanaa imma.’ (1 Kaw. 3:5-10) I azazettiya “wozanaa imma” giidi ashkke gidiyoogaa bessiya oysha oychchiis. Yihooway Solomona ayssi siiqidaakko akeekana danddayoos! (2 Sam. 12:24) Nu Xoossay ha yelaga kawuwan keehi ufayttido gishshawu, I Solomonayyo “aadhdhida eratettaanne akeeka wozanaa” immiis. (1 Kaw. 3: 12) Solomoni ammanettidi deꞌido wode ubban daro anjjuwaa demmiis. I “GODAA Israa7eela Xoossaa sunttaayyo” beeta maqidasiyaa keexxiyo bonchcho maataa demmiis. (1 Kaw. 8:20) I Xoossay ayyo immido aadhdhida eratettan keehi erettiya asa gidiis. Xoossaa ayyaanay denttettin I yootidobay Geeshsha Maxaafan deꞌiya heezzu maxaafatun xaafettiis. Hegeetuppe issoy Leemiso maxaafaa. w19.01 14 ¶1-2

Issi issi asay ba qofaa ooninne laamissanaadan koyenna. Eti, “Ta qoppiyooban oonanne gattenna” yaagoosona. Eti banttawu kuuyiyoogaanne yaatiyoogee bessiyaaba gidiyoogaa qonccissanawu hegaadan geennan aggokkona. Eti banttana harati azazanaadan woy asa ubbaadan hanana mala giddanaadan koyokkona. SHin, nuuni Yihoowaagaadan qoppiyoogee nu huuphen qoppiyo ubbaabaa aggiyoogaa gidennaagaa ammanettana danddayoos. Naaꞌꞌantto Qoronttoosa 3:17y, Yihoowa “ayyaanai de7iyoosan ailletetti baawa” yaagees. Nuuni koyiyoogaadan hananaadan Yihooway nuussi laꞌatettaa immees. Nuuni koyidobaanne nuna ufayssiyaabaa doorana danddayoos. Yihooway nuna medhdhidoy nuuni hegaadan oottanaadaana. Gidoppe attin, nu laꞌatettaa zawi baynnan goꞌettana danddayokko. (1 PHe. 2:16) Likkebaanne likke gidennabaa xeelliyaagan A Qaalan qonccida A qofaa nuuni kaallanaadan Yihooway koyees. w18.11 19 ¶5-6

Tuman aggennan hemettanawu, nuuni aquwaara gayttidabaa bessiyaagaadan oottana koshshees. Nuuni tumaa tamaariyo wode, aquwaabawu oottiyoobay ayyaanaabaappe kaalliyaaba gidiis. Nuuni tuman hemettana mala aquwaabaa aggi bayidoogan ufayttida. SHin takkidi, harati mati yiida elekitronike miishshata shammiyoogaanne aquwaaban haraban goꞌettiyoogaa beꞌana danddayoos. Nuuppe halidabi deꞌiyoobadan qoppana danddayoos. Koshshiyaabay gidana giyoogaa aggidi, aquwaa shiishshanawu ayyaanaaban oottiyoobaa aggiigana danddayoos. Hegaa malabay nuuni Deemaasa hassayanaadan oottees. I “ha wodiyaa sa7aa” dosidoogee kiitettida PHawuloosaara issippe haggaaziyoogaa aggi bayanaadan oottiis. Deemaasi PHawuloosa ayssi aggidi biidee? I ayyaanaaban oottiyoobaappe aquwaabaa aattidi siiqidaakkonne woy qassi PHawuloosaara issippe haggaazana mala bana goꞌꞌiyaabaa aggi bayanawu koyennan ixxidaakkonne Geeshsha Maxaafan odettibeenna. Nuuni zaarettidi aquwaabaa amottin, hegee tumaa siiqiyo siiquwaa xayssanaadan nuuni koyennaagee qoncce. w18.11 10 ¶9

Hewaana A ammanada mittaa ayfiyaa miikko hayqqanaagaa Seexaanay eriyo gishshawu, A worddoy keehi qohiyaaba. Hewaanakka Addaameekka Yihoowawu azazettibookkona, qassi wurssettan hayqqidosona. (Doo. 3:6; 5:5) Hegaappe aaruwan, he nagaraa baggaara “haiqoi asa zare ubbaa gakkiis.” Ubbakka “haiqoi asa ubbaa haariis; harai atto Addaamee Xoossaa higgiyau azazettennan ixxidoogaadan, nagara oottibeennaageetakka haiqoi haariis.” (Roo. 5:12, 14) Nuuni Xoossay halchchidoogaadan wottiyoobi baynna asa gidennaynne merinawu deꞌennay hegaassa. SHin nu deꞌiyo “laittai laappun tamma; woi minnikko, hosppun tamma” xalla; qassi nu deꞌoy ‘metuwaaninne tuggan’ kumiis. (Maz. 90:10) He ubbabay Seexaanaa wordduwaa gaasuwan haniis! Dabloosi oottidobaa xeelliyaagan, “tumatetti aani bainna gishshau,” I tuman minni eqqibeennaagaa Yesuusi qonccissiis. (Yoh. 8:44) Seexaanay ba wordduwan ‘saꞌa ubbaa balettiiddi’ deꞌiyo gishshawu, tumatettay haꞌꞌikka aani baawa. (Ajj. 12:9) Dabloosi nuna balettanaadan nuuni koyokko. w18.10 6-7 ¶1-4

Nuuni haratuura kasetidi sigettiyo wode, ufayttana danddayoos. Erissiyo ashkkaray Yaaqoobi hagaadan giis: “Xillotettaa aifee sarotettaa oottiyaageeti sarotettan zerido zerettaappe beettiis.” (Yaaq. 3:18) Nuuni gubaaꞌiyan woy son issi uraara walaqettiyo wode, sigettanaadan Xoossay maaddana mala woossana danddayoos. Yaatiyo wode, Yihooway neeyyo ba geeshsha ayyaanaa immana, hegee neeni Kiristtaanetuppe koyettiya eeshshaa bessanaadan maaddana, qassi neeni keehi ufayttana. Kasetidi sigettiyoogee keehi koshshiyoogaa Yesuusi hagaadan giidi qonccissiis: “Hegaa gishshau, neeni yarshshiyoosan yarshshishin, ne ishaa naaqqidobai neeyyo hegan hassayettikko, ne yarshshuwaa he sohuwankka yeggabayada ba; kasetada ne ishaara sigettaichcha; hegaappe guyyiyan yaada, ne yarshshuwaa yarshsha.”—Maa. 5:23, 24. w18.09 21 ¶17

Yesuusi ba erissiyo ashkkaratuura aattido wurssetta qammi 30too gidiyaagaa siiquwaa yootiis. I ba erissiyo ashkkarati ‘issoy issuwaara siiqettana’ koshshiyoogaa qonccissiis. (Yoh. 15:12, 17) Eta siiqoy eti tumuppe Kiristtoosa kaalliyoogaa harati eranaadaaninne hegaa akeekanaadan oottiya maalaaliyaaba. (Yoh. 13:35) Yesuusi yootido siiqoy nuuyyo siyettiyaabaa xalla gidenna. Hegee issi uri ba goꞌꞌaa aggi bayiyoogan bessiyo maalaalissiya eeshsha. I hagaadan giis: “Ba shemppuwaa ba laggiyaayyo aattidi immiyoogaappe aadhdhiya siiqoi ooyyookka baawa. Taani inttena azazidobaa ubbaa oottikko, intte ta laggeta.” (Yoh. 15:13, 14) Yihoowa ashkkarati bantta goꞌꞌaa aggi bayiyo tumu siiqoynne eta mino issippetettay ha wodiyan eti Xoossaa asa gidiyoogaa shaakki erissiyaaba. (1 Yoh. 3:10, 11) Yihoowa ashkkarati zariyan, qommuwan, qaalan woy diccido hanotan dumma dumma gidikkonne, eta giddon Kiristtoosaagaa mala siiqoy deꞌiyoogee keehi ufayssiyaaba! w18.09 12 ¶1-2

Yihooway nuuni nu soo asaa maaddanaadan koyees. Leemisuwawu, neeni siiqiyoogeeta miishshan maaddanawu oottana koshshennan aggenna. Daro aayeti bantta guutta naata xeellanawu son takkoosona. Issi issi gastta naati sahettiya bantta aawaa woy aayyiyo maaddana koshshennan aggenna. Hegeeti oottana bessiya ooso. Neessi so asaara gayttidaagan aawatettay deꞌikko, neeni Yihoowawu oottanawu koyiyoogaa keenaa oottana danddayennabadan neessi siyettana danddayees. SHin minna! Neeni ne soo asawu koshshiyaabaa kunttiyo wode Yihooway ufayttees.(1 Qor. 10:31) Neessi so asaara gayttidaagan aawatettay darana xayikko, sahettida ura harggissiya, sahettida, cimida woy haraban metootida ne mala Kiristtaaniyaa maaddana danddayay? Gubaaꞌiyan deꞌiya, maadoy koshshiyoogeeta akeekidi maaddiyoogee loꞌꞌo. Yaatiyoogan, eta woosawu zaaro gidiyaaban Yihoowaara issippe oottana danddayaasa.—1 Qor. 10:24. w18.08 24 ¶3, 5

Yooseefa ishantti A qanaatidi aylletettawu bayzzido wode, ayyo layttay 17 heera. Hegaappe kase, Yooseefa A aaway A ishanttuppe aaruwan siiqees. (Doo. 37:2-4, 23-28) Yooseefi siiqiya ba aawaa Yaaqoobappe haahosan Gibxxen, 13 laytta gidiyaagaa aylletettaaninne qasho keettan genccana koshshiis. Yooseefi hidootaa qanxxennaadaaninne yiillotennaadan aybi maaddidee? Yooseefi qashuwan waayettiiddi, Yihooway A anjjidobaa ubbatoo qoppennan aggenna. (Doo. 39:21; Maz. 105:17-19) Yooseefi sinttappe hananabaa naatettan aymuwan beꞌidobay Yihooway A nashshiyoogaa ammanettanaadankka oottennan waayi aggana. (Doo. 37:5-11) I ba metuwaa Yihoowawu zaari zaaridi yootennan aggenna. (Maz. 145:18) Yooseefi ba waaye ubban Yihooway ‘banaara issippe’ deꞌiyoogaa ba wozanan ammananaadan oottiyoogan, I wozanappe woossido woosaa Yihooway zaariis. w18.10 28 ¶3-4

Nuuni harata xeelliyo xeelaa geellayana danddayiya harabay duretettaa. SHin issi uri dure woy hiyyeesa gidiyoogee nuuni A xeelliyo xeelaa waati geellayana danddayii? Nagaranchcha asaabaa hachchi gallassa xiqisiyan deꞌiya azzanttiyaabaa Solomoni xaafanaadan geeshsha ayyaanay denttettiis. Ha leemisuwaappe nu ay tamaariyoo? Nuuni naagettana xayikko, hiyyeesa ishantta aggidi dure ishanttuura laggetanawu koyana danddayoos. Asawu deꞌiya aquwaa xeellidi etabaa kuuyiyoogee qohiyaaba gidiyoy aybissee? Yaatiyoogee, gubaaꞌee shaahettanaadan oottees. Koyro xeetu layttan issi issi gubaaꞌiyan hegaadan haniis; qassi Yaaqoobi Kiristtaaneti hegaappe naagettanaadan yootiis. (Yaaq. 2:1-4) Ha wodiyan hegaa mala qofay nu gubaaꞌiyaa qohennaadaaninne beꞌiyooban kuuyennaadan nuuni naagettana bessees. w18.08 10 ¶8-10

Yihoowaara dumma dabbotaa dabbotidoogawu nuuni A galatiyoogee nu mala Kiristtaanetuura gattiyaaban nuuni haniyooban qonccees. Etikka Yihoowaba. Nuuni hegaa dogana xayikko, nu ishatussinne michchotussi ubbatoo kehoosinne eta siiqoos. (1 Tas. 5:15) Yesuusi bana kaalliyaageetussi, “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yoh. 13:35) Yihooway ba asay issoy issuwaara haasayiyo wode ‘ezggidi siyiyoogaa’ Milkkiyaasi yootiis. (Mil. 3:16) Yihooway tumukka “baageeta erees.” (2 Xim. 2:19) Nuuni oottiyoonne haasayiyo ubbabaa I loytti erees. (Ibr. 4:13) Nuuni nu mala Kiristtaanetussi kehenna wode Yihooway ‘ezggidi siyees.’ Nuuni imattiyoogaa, immiyoogaa, atto giyoogaanne kehiyoogaa issoy issuwawu bessiyo wode, he ubbabaa Yihooway akeekiyoogaa ammanettana danddayoos.—Ibr. 13:16. w18.07 26 ¶15, 17

Yihoowakko shiiqidi deꞌiyoogee nuussi loꞌꞌo. Wolqqan, aadhdhida eratettan, woy siiquwan nu Xoossaappe aadhdhiya ooninne baawa! Nuuni ubbatoo ayyo ammanettanawunne A bagga gidanawu koyiyoogee qoncce. (Maz. 96:4-6) SHin, Xoossawu goynniyaageetuppe issoti issoti hegaadan oottibookkona. Qaayeela hanotaa qoppa. I Yihoowappe attin, hara ay xoossawukka goynniyoogaa yootibeenna. SHin Qaayeela goynoy Xoossaa ufayssibeenna. Qaayeela wozanay iitabaakko baqqiyoogaa Yihooway akeekiis. (1 Yoh. 3:12) Yihooway Qaayeelayyo hagaadan giis: “Neeni lo77obaa oottiyaabaa gidiyaakko, ne som77oi pashkkennee? SHin neeni lo77obaa oottana xayikko, nagarai do7adan ne penggen zuggees; i nena haarana koyees; shin neeni a xoonana bessees.” (Doo. 4:6, 7) Hegee Yihooway Qaayeelayyo, “Neeni ne nagaraappe simmada ta bagga gidada minna eqqikko, taani ne bagga gidana” giidoogaa mala. Gidoppe attin, Qaayeeli zoriyaa siyibeenna. w18.07 17 ¶1, 3; 18 ¶4

Nuuni nu pooꞌuwaa pooꞌissiyo issi ogee mishiraachchuwaa yootiyoogaanne asaa erissiyo ashkkara oottiyoogaa gidiyoogee tuma. (Maa. 28:19, 20) Hegaa bollikka, nuuni Kiristtaanetuppe koyettiyaagaadan deꞌiyoogan Yihoowa bonchchissana danddayoos. Nuuni haasayissiyoogeetinne ogiyaara kanttiyaageetikka nu eeshshaa akeekoosona. Nuuni laggedan pashkki giyoogeenne wozanappe sarotiyoogee nuuni oonakko, qassi ay mala Xoossawu goynniyaakko darobaa qonccissees. Yesuusi ba erissiyo ashkkarata, “Soo geliiddi sarotite” yaagiis. (Maa. 10:12) Yesuusinne I kiittidoogeeti darotoo sabbakiyo heeran asay erenna asa ba soo shoobbiyoogee oorattaba gidenna. Ha wodiyan, darosan hegaa mala meezee baawa. Gidikkokka, neeni issi uraa soo ayssi biidaakko pashkki gaada loꞌꞌo hanotan yootiyoogee, darotoo izaawa qofissidabaa woy I yiillotidobaa zarbbissees. Erettiiddi darotoo ufayssiya hanotan pashkki giyoogee keehi loꞌꞌo. Ishatinne michchoti xuufiyaa wottiyo gaariyaa goꞌettidi dabaaban markkattiyo wodekka hegee loꞌꞌo gidiyoogee beettees. Neeni pashkki gaada sarotiyo wode asay ufayttiyoogaa akeekana danddayaasa. w18.06 22 ¶4-5

Kiitettida PHeexiroosawu kase meeze gididabay Ayhudatu xallaara gayttiyoogaa. SHin Kiristtaaneti asa asappe shaakkana bessennaagaa Xoossay ayyo qonccissi simmin, PHeexiroosi Rooma wotaaddaraa Qornneliyoosawu sabbakiis. (Oos 10:28, 35) Hegaappe simmin, PHeexiroosi Ayhuda gidenna Kiristtaanetuura gaytteesinne etaara qumaa mees. SHin daro layttappe guyyiyan, PHeexiroosi Anxxookiyaa kataman Ayhuda gidenna Kiristtaanetuura qumaa miiddi aggi bayiis. (Gal. 2:11-14) He wode PHawuloosi PHeexiroosawu bessiya seeraa yootiis, ikka he seeraa ekkidoogee qoncce. PHeexiroosi qeeri Isiyan deꞌiya Ayhuda Kiristtaanetussikka Ayhuda gidenna Kiristtaanetussikka ba koyro dabddaabbiyaa xaafiyo wode, ishanttu ubbaa maabaraabaa siiquwan yootiis. (1 PHe. 1:1; 2:17) Kiitettidaageeti “asa ubbaa” siiqiyoogaa Yesuusa leemisuwaappe tamaaridoogee qoncce. (Yoh. 12:32; 1 Xim. 4:10) Eti gamꞌꞌidaba gidikkonne, bantta qofaa laammidosona. Beni Kiristtaaneti issoy issuwaa siiqiyoogan erettoosona. Kiristtaane gidenna asati Kiristtaanetubaa, “Eti issoy issuwaa siiqoosona . . . Haray atto issoy issuwawu giidi hayqqanawukka eeno goosona” yaagiyoogaa, naaꞌꞌantto xeetu layttaa xaafee Terttuuliyaani yootiis. Beni Kiristtaaneti “ooratta meretaa” maayiyoogan asay ubbay Xoossaa sinttan lagge giidi xeellidosona.—Qol. 3:10, 11. w18.06 11 ¶15-16

Koyro xeetu layttan Rooma wotaaddaray tiran wottiyo ola maayotuppe issuwan adussa biratata issuwaa haraa miyyiyaa mayssi mayssi wottidoogee deꞌees. Wotaaddaraa wozanaa woy hara bolla qommuwaa bisoy woy zubbee caddennaadan hegaa mala maayuwaa biratati minni ohettidaakkonne ubbatoo xomoosana koshshees. Hegee Yihooway kessido xillotettaa maaray nu leemiso wozanaa naagiyoogaa bessiya loꞌꞌo leemiso! (Lee. 4:23) Tiran wottiyo birataappe oosettidaagaa appe laafiyaaban issi wotaaddaray laammennaagaadan, nuuni goꞌettanaadan xillotettawu Yihooway kessido maaraa nu qoppiyooban mule laammokko. Nu qofay keehi bala gidiyo gishshawu, nuussi koshshiya naago demissenna. (Lee. 3:5, 6) Yihooway nuussi immido ‘biratati’ nu leemiso wozanaa bolli minni ohettidaakkonne nuuni ubbatoo xomoosoos. Qassi nuuni Xoossaa tumaa keehi siiqiyo wode, ‘tiran wottiyo miishshaa’ maayanawu, hegeekka Xoossay xillotettawu kessido maaraa naaganawu metootokko.—Maz. 111:7, 8; 1 Yoh. 5:3. w18.05 28 ¶3-4, 6-7

Muusee ba xallaa siiqennan kaalettiyaagaa gidiyoogaa deree eriiddi Muuse bolli zuuzummidoy haattaa xayuwaa xallaana gidennan, saamettanaadan oottiday A balaa giidikka qoppido gishshataassa. (Qoo. 20:1-5, 9-11) Muusee keehi hanqqettidi ba ashkketettaa aggibayiis. Muusee Yihooway azazidoogaadan shuchchaassi haasayiyoogaa aggidi, asawu keehi hanqqettidi I maalaalissiyaabaa oottanaagaa etawu yootiis. Hegaappe simmidi, I shuchchaa naaꞌꞌutoo shocin daro haattay shuchchaappe pulttiis. I hanqqettidonne otorettido gishshawu gita balaa baliis. (Maz. 106:32, 33) Muusee guutta wodiyawu ashkketettaa xayidoogee, I Hidootaa Biittaa gelennaadan A diggiis. (Qoo. 20:12) Ha leemisuwaappe nuuni keehi koshshiyaaba tamaaroos. Koyruwan, nuuni awudekka ashkke gidanawu baaxetana bessees. Nu ashkke gidanawu baaxetiyoogaa guutta wodiyawu aggikko, sohuwaarakka otoruwan maara gidennabaa oottananne haasayana danddayoos. Naaꞌꞌanttoy, unꞌꞌoy nuna gakkiyo wode ashkke gidiyoogee metana danddayiyo gishshawu, unꞌꞌetti uttidikka nuuni ashkke gidanawu baaxetana koshshees. w19.02 12-13 ¶19-21

Sabbakanaadan Yesuusi azazidoogaa naagiyoogee deexxiyaabee? Akkay, deexxenna. Yesuusi woyniyaa leemisuwaa yooti simmidi, Kawotettaabaa sabbakiya nuuni ufayttanaagaa yootiis. (Yoh. 15:11) I ba ufayssay nubaa gidanaagaa yootiis. Waanidi? Yesuusi bana woyniyaa anuwan, ba erissiyo ashkkarata qassi turaa maran leemisiis. (Yoh. 15:5) Woyniyaa anoy turaa marawu zemppo gidees. Maray anuwaa bollan deꞌido peeshshan, haattaanne koshshiya harabaa appe demmees. Hegaadankka, nuuni Kiristtoosa leemisuwaa kaalliyoogan aara issippetettan deꞌido peeshshan, I ba Aawaa sheniyaa oottidi ufayttiyoogaadan, nuunikka ufayttoos. (Yoh. 4:34; 17:13; 1 PHe. 2:21) Ubba wode 40⁠ppe dariya layttaa haggaazida Haanna, “Taani haggaaza simmada ubbatoo ufayttiyo ufayssay ubbatoo Yihoowawu oottanaadan minttettees” yaagaasu. Nuuni wozanappe ufayttiyoogee metiya heerankka gidin ubbatoo sabbakanaadan wolqqaa immees.—Maa. 5:10-12. w18.05 17 ¶2; 20 ¶14

Ba ishantta minttettiyoogan kiitettida PHawuloosi keehi loꞌꞌo leemiso. Daro eeqatussi goynniya Giriiketussi, Roomatussinne haratussi sabbakanaadan kiitettida PHawuloosi geeshsha ayyaanay denttettin biis. (Gal. 2:7-9) PHawuloosi ha wodiyan Turkke giyoosaa, qassi Giriikenne Xaaliyaa biis. He biittatun deꞌiya Ayhuda gidenna asawu I sabbakiis; qassi Kiristtaane gubaaꞌiyaa essiis. Ha mati Kiristtaane gididaageeta ‘eta biittaa asay wayssido’ gishshawu etawu minttettoy koshshiis. (1 Tas. 2:14) Tasalonqqen deꞌiya mati eqqida gubaaꞌiyawu 50 M.L. heeran PHawuloosi hagaadan giis: “Nuuni Xoossaa woossiyo wode inttena hassayidi, intteyyo ubbaayyo ubba wode Xoossaa galatoos. Nuuni nu Xoossaa, nu Aawaa sinttan ammanuwan intte oottido oosuwaanne, siiquwan intte daafurido daafuraa, qassi . . . gencciyo genccaa ubba wode hassayoos.” (1 Tas. 1:2, 3) I qassi eti issoy issuwaa minttettanaadan hagaadan giis: “Issoi issuwaa minttettitenne maaddite.”—1 Tas. 5:11. w18.04 18-19 ¶16-17

Neeni ne deꞌuwan Yihoowa ufayssanawu ubbatoo qoppiyo wode, abaa haratuyyo yootanawu koyana. Sabbakiyo oosoy keehi eesoyiyaaba gidiyo gishshawu, nuuni hegaa aybippenne kaseyana koshshees. Neeni ubbatoo haggaazanawu halchchana danddayay? Neeni aqinye gidana danddayay? Neeni haggaazuwan darin ufayttennaba gidikko shin? Qassi markkattiyoogan neeni kaseegaappe aaruwan waana qara gidana danddayay? Hegawu naaꞌꞌubay maaddana: Loytta giigetta, qassi neeni eriyoobaa haratuyyo yootanawu mammottoppa. Neeni yaatiyoogee sabbakiyo wode keehi ufayttanaadan oottiyoogan garamettana danddayaasa. Nenaara tamaariyaageeti darotoo oychchiyo oyshaa zaaranawu giigettiyoogan doommana danddayaasa. Yelagati asay darotoo oychchiyo oyshaa zaaranawu giigettana mala maaddiya huuphe yohoti jw.org giyo nu weybsaytiyaaninne hara xuufetun deꞌoosona. Leemisuwawu, “Neeni lagge ayssi oyqqikkii?” giya oyshawu, 10 Oyshatu Zaaruwaa Yelagatu Oyshaa giyo brooshuriyan “Laggeti Asho Gaytotettawu Denttettiyo Wode Waata Eqettoo?” giya huuphe yohoy neeni zaaruwaa giigettanawu maaddana. w18.04 27 ¶10-11

Addaameenne Hewaana koyro daro ogetun laꞌa gidikkonne, etawu wottido zawaykka deꞌees. Hegeetuppe amaridaageeti qoppennan poliyoogeeta gidikkonne zawa. Leemisuwawu, nu koyro aawaynne aayyiyaa paxa deꞌanawu shemppana, maana, xiskkananne hegaa malabaa oottana koshshiyoogaa eroosona. Eti hegeeta oottiyoogaa laꞌatetta diggiyaabadan xeellidonaa? Akkay; ayssi giikko, ubbatoo oottiyo hegaa malabankka eti ufayttanaadan Yihooway oottiis. (Maz. 104:14, 15; Era. 3:12, 13) Addaameenne Hewaana saꞌaa kumanaadaaninne A naaganaadan Yihooway azaziis. He azazoy eta laꞌatetta diggiyaabee? Mule diggenna! Asay bana Medhdhidaagaa halchchuwaa poliyoogan, kumetta saꞌaa nagari baynna asay merinawu deꞌiyoosa oottana mala he higgee imettiis. (Maz. 127:3; Isi. 45:18) Addaameenne Hewaana bantta aqo deꞌuwan merinawu ufayttanaagaa shin. w18.04 4-5 ¶7-8

Nuuni haggaazuwan haasayissiyo asaa danddayikko, eti nu yootiyo Geeshsha Maxaafaa tumaa sohuwaara akeekana woy ekkana giidi naagokko. Leemisuwawu, saꞌan gannatiyan merinawu deꞌana hidootaabaa issi uri akeekanaadan nuuni waati maaddana danddayiyaakko qoppa. Daroti issi uri hayqqiyo wode, simmidi deꞌenna giidi ammanoosona. Woy qassi eti loꞌꞌo asay ubbay saluwaa baana giidi qoppana danddayoosona. Saꞌan merinawu deꞌiyo hidootaabaa asay akeekanaadan issi ishay waati maaddiyaakko ane beꞌoos. Koyruwan, I Doomettaabaa 1:28 nabbabees. Yaatidi, asay awan deꞌanaadan, qassi etassi ay mala deꞌoy deꞌanaadan Xoossay koyidaakko ishay keettaawaa oychchees. Daro asay, “Saꞌan ufayttidi deꞌanaadan I koyees” giidi zaarees. Kaallidi, ishay Isiyaasa 55:11 nabbabees; yaatidi Xoossaa halchchoy laamettidaakkonne oychchees. Darotoo, keettaaway chii laamettibeenna giidi zaarees. Wurssettan, ishay Mazamure 37:10, 11 nabbabees, yaatidi asay sinttappe waananaakko oychchees. I Geeshsha Maxaafaa hegaadan goꞌettidi, loꞌꞌo asay Gannate saꞌan merinawu deꞌanaadan Xoossay haꞌꞌikka koyiyoogaa daro asay akeekanaadan maaddiis. w19.03 24 ¶14-15; 25 ¶19

Nuuni A Naꞌaa qaalaa siyidi azazettanaadan koyiyoogaa Yihooway qonccissiis. Yesuusi mishiraachchuwaa waati sabbakana bessiyaakko I bana kaalliyaageeta siiquwan tamaarissiis, qassi eti naagi uttana mala I zaari zaaridi hassayissiis. (Maa. 24:42; 28:19, 20) Eti I tamaarissidobaa oosuwan peeshshanaadaaninne hidootaa qanxxennaadankka I minttidi yootiis. (Luq. 13:24) Yesuusi bana kaalliyaageeti issoy issuwaara siiqettana, issippetettan deꞌananne A azazuwaa naagana koshshiyoogaa yootiis. (Yoh. 15:10, 12, 13) He zoree Yesuusi koyro zorido wodiyaagaadan ha wodiyankka keehi koshshees. Yesuusi, “Tumaa bagga gidiya ooninne taani giyoogaa siyees” yaagiis. (Yoh. 18:37) Nuuni ‘issoy issuwaabaa danddayiyoonne issoy issuwawu atto yaagiyo’ wode A qaalaa siyiyoogaa bessoos. (Qol. 3:13; Luq. 17:3, 4) “Wodee injjetin injjetana xayin” mishiraachchuwaa mishettidi yootiyoogankka A qaalaa siyiiddi deꞌiyoogaa bessoos.—2 Xim. 4:2. w19.03 10 ¶9-10