Hosppune

Nuuni shin? Nuuni Yihoowaagaadan qoppiyooyye, woy ha alamiyaa asaagaadan qoppiyoo? Nuuni Xoossay koyiyoobaa oottennan waayi aggana. Gidoppe attin, nu qofay shin? Nu qofaynne nu xeelay Yihoowaagaa mala gidanaadan baaxetiyoo? Yaatanawu wozanappe baaxetana koshshees. SHin alamiyaa asaagaadan qoppiyoogee metiyaaba gidenna. Ayssi giikko, alamiyaa ayyaanay ubbasan deꞌees. (Efi. 2:2) Hegaa bollikka, alamiyaagaadan qoppiyoogee darotoo ba xallaa siiqiyoogaa gidiyo gishshawu, cimmana danddayees. Ee, Yihoowaagaadan qoppiyoogee metiyaaba, shin alamiyaagaadan qoppiyoogee aynne metenna. SHin alamee nu qofaa laamissanaadan nuuni eeno giikko, nuuni nu xallaa siiqana, qassi likkebaanne likke gidennabaa nuussi kuuyanawu koyana. (Mar. 7:21, 22) Hegaa gishshawu, nuuni ‘asaagaadan’ gidennan, ‘Xoossaagaadan qoppiyoogee’ keehi koshshiyaaba. w18.11 18 ¶1; 19 ¶3-4

Yihooway dumma dumma wodiyan heezzutoo saluwaappe haasayidoban A nashshidoogee Yesuusa ay keena minttettideeshsha. Yesuusi Yorddaanoosa SHaafan xammaqetti simmin sohuwaara Yihooway qommoora deꞌiyaagaa yootiis. He qaalata siyida hara uri xammaqiya Yohaannisa xalla gidana. Hegaappe simmin, Yesuusi hayqqanaappe issi laytta gidiyaagaa kasetidi, I kiittidoogeetuppe heezzati Yihooway abaa, “Hagee taani siiqiyo tana ufaissiya ta Na7aa; i giyoogaa siyite” yaagishin siyidosona. (Maa. 17:5) Wurssettan, Yesuusi hayqqanaappe amarida gallassaa kasetidi, Yihooway zaarettidi saluwaappe ba Naꞌaa haasayissiis. (Yoh. 12:28) Yesuusi saꞌan deꞌiyo wode, Yihooway ba Naꞌaa nashshiyoogaa waati bessidee? Yesuusi Xoossaa cayidobadan asay A wordduwan mootin kawuyyidi hayqqanaagaa erikkonne, ba sheniyaappe, Yihoowa shenee hananaadan woossiis. (Maa. 26:39, 42) I ba Aawaa xallaanappe attin alamiyan erettanawu koyibeenna gishshawu, ‘yeellaa kari genccidi, mittaa bolli misimaariyan xishettidi hayqqiis.’—Ibr. 12:2. w18.07 10-11 ¶15-16

Yesuusi Godaa Kahuwaa baalaa essi simmidi, I keehi xala gidiyoogaa bessiis. Waatidi? Yesuusi Xoossaa cayida uradan kawushsha hayqo hayqqanaagaa erikkonne, Aaway I oottanaadan koyiyoobaa eeno giidi ekkiis. (Maa. 26:65, 66) Yihoowa sunttaa bonchchissanawu, Xoossay ubbabaa haariyo maatawu exatanawunne nagaraappe simmiya asay merinaa deꞌuwaa demmiyo ogiyaa dooyanawu Yesuusi wottiyoobi baynna hanotan ammanettidi deꞌiis. Qassi, Yesuusi bana kaalliyaageeti guuttaa takkidi banttana gakkanabawu giigettanaadan oottiis. Yesuusi bana gakkana danddayiya unꞌꞌissiyaabaappe I kiittido ammanettidaageetussi koshshiyaabaa qoppiyoogankka xala gidiyoogaa bessiis. I Yihudaa kessi simmidi essido Godaa Kahuwaa baalay ooratta maachchaa bagga gidana, A kaallana tiyettidaageeti gukkida Yesuusa suuttan goꞌettanaagaa hassayissees.—1 Qor. 10:16, 17. w19.01 22 ¶7-8

Yesuusa Aaway saluwaappe, “Taani ta sunttaa bonchchaas; qassikka gujjada bonchchana” yaagidi zaariis. Yesuusi Yihoowayyo ammanettidi deꞌiyo gita aawatettay bawu deꞌiyo gishshawu keehi unꞌꞌettiis. Yesuusi bana asay meqetti baynna hanotan shocidinne barchchiyaa bessidi woranaagaa erees. (Maa. 26:38) Yesuusayyo ubbabaappe aadhdhiyaabay A Aawaa sunttay bonchchettiyoogaa. Xoossaa cayiis giidi Yesuusa mootidosona, qassi I ba hayqoy Xoossaa sunttaa borissees giidi hirggiis. Yihoowa sunttay cayettiyoogeenne borettiyoogee nunakka Yesuusaagaadan keehi qofissana danddayees. Qassi Yesuusadan nuna naaqoy gakkana danddayees. Woy ixxiyaageeti nubaa yootiyo worddo odoy nuna hirggissana danddayees. Ha worddo odoy Yihoowa sunttaa borissiyoobaa qoppana danddayoos. Hegaa mala wodiyan Yihooway haasayido he qaalay nuussi gita minttetto gidees. Yihooway ba sunttaa bonchissennan awudenne aggenna.—Maz. 94:22, 23; Isi. 65:17. w19.03 11-12 ¶14-16

Yesuusi erissiyo ashkkarati siyidobay etawu ammananawu metiyaaba. Eti Israaꞌeela kawotettaa zaarettidi essana giidi qoppido Yesuusi, I mata wode waayettanaagaanne hayqqanaagaa yootiis. Koyro haasayiday kiitettida PHeexiroosa. I, “Ta Godau, Xoossai nena hegaappe ashsho; hagee ne bolli mulekka yeenna” yaagiis. Yesuusi zaaridi hagaadan giis: “Ha Seexaanau, neeni ta matappe kichcha; neeni asi dosiyoobaa qoppiyoogaappe attin, Xoossai dosiyoobaa qoppenna gishshau, tau xube gidadasa.” (Maa. 16:22, 23; Oos. 1:6) Xoossaa qofay Seexaanay haariyo ha alamiyaa qofaappe dummatiyo issibaa Yesuusi hegaadan giidi qonccissiis. (1 Yoh. 5:19) PHeexiroosi ba xallaa siiqiya alamiyaa asaadan qoppiis. SHin Yesuusi ba Aawaa qofay hegaappe dummatiyoogaa erees. Yesuusi PHeexiroosawu zaaridobay, I alamiyaa qofaa ixxidi Yihoowa qofaa dosiyoogaa bessees. w18.11 18 ¶1-2

Godaa Kahuwawu kumetta saꞌan miilooniyan qoodettiyaageeti shiiqiyo wode Yihooway ay beꞌiyaakko qoppa. I beꞌiyoy daro asay shiqidoogaa xalla gidennan, I shiiqida asaa huuphiyan huuphiyan akeekees. Leemisuwawu, layttan layttan ubbatoo shiiqiyaageeta I beꞌees. Etappe amaridaageeti wolqqaama yedetay gakkishinkka yiyaageeta gidana danddayoosona. Harati hara shiiqota ubbatoo yaana xayikkonne, eti Godaa Kahuwaa bonchchanawu shiiqiyoogaa gita maatadan xeelloosona. Geelladan he shiiquwaabaa eranawu koyidi, Godaa Kahuwaa baalawu biron koyro yiyaageetakka Yihooway akeekees. Godaa Kahuwaa baalawu keehi daro asay shiiqiyoogaa beꞌiyoogee Yihoowa ufayssiyoogee qoncce. (Luq. 22:19) Gidoppe attin, asay yiyo gaasuwaa Yihooway xoqqu ootti xeellees. Nuuni Yihoowappenne I goꞌettiyo dirijjitiyaappe tamaaranawu yeemotiyoo?—Isi. 30:20; Yoh. 6:45. w19.01 26 ¶1-3

Yesuusi ba erissiyo ashkkaratussi hayqqanawu eeno giyoogaa xalla gidennan, ubba gallassi ba koyiyoobaappe etaagaa kaseyidi deꞌiis. Leemisuwawu, I asatettan daafurido woy unꞌꞌettido wodekka bana kaalliyaageetuura gayttiis. (Luq. 22:39-46) Qassi I haratuppe demmana danddayiyoobaa gidennan, haratussi immana danddayiyoobaa ubbatoo ba qofan wottiis. (Maa. 20:28) Nuuni tumu Kiristtaane ishanttu maabaraa yame gidiyo gishshawu, ooratta asay nunaara shiiqanaadan nuussi danddayettida ubban shoobbiyoogan ufayttoos. SHin, ‘nunaara ammanuwan deꞌiyaageeta’ gidikkonne, sabbakiyoogaa woy shiiqiyoogaa aggidaageeta maaddanawu keehi koyoos. (Gal. 6:10) Nuuni eti nu shiiqota shiiqanaadan, ubba qassi Godaa Kahuwaa bonchchanaadan minttettiyoogan nu eta siiqiyoogaa qonccissoos. SHuggidaageeti Yihoowakko simmiyo wode, nuuni Yihoowagaadaaninne Yesuusaagaadan keehi ufayttoos.—Maa. 18:14. w19.01 29 ¶12, 14; 30 ¶15

Yesuusi ba hayquwaa Hassayiyo Baalaa essiyo wode, Irshshoy baynna oyttaanne woyniyaa I goꞌettiis. Yesuusi he naaꞌꞌubati I eta gishshaa sohuwaara yarshsho oottidi immana, wottiyoobi baynna ba ashuwaanne suuttaa bessiyaaba gidiyoogaa ba kiittidoogeetuyyo yootiis. Ha keehi koshshiya ooratta shiiqoy metennaba gidiyoogan I kiittidoogeeti garamettibookkona. Aybissi? Hegaappe aggina kasetidi, Yesuusi Alꞌꞌaazara, Marttonne Mayraamo oychchanawu biidi tamaarissiyoogaa doommiis. Martta he wode deꞌikkonne, bonchcho imattawu daro qumaa giigissiyoogan I qofay shaahettiis. Yesuusi hegaa beꞌido wode, daro qumaa giigissiyoogee ubbatoo koshshennaagaa Martta akeekanaadan maaddiyoogan O kehatettan zoriis. (Luq. 10:40-42) Yesuusi yarshsho gididi hayqqanaappe amarida saatiyaa kasetidi, I ba zoridobaa oosuwan peeshshiis. I Godaa Kahuwawu guuttabaa goꞌettiis. w19.01 20-21 ¶3-4

Yihooway Yesuusa hayquwaappe denttidi ‘keehi xoqqa’ sohuwaa immiyoogaaninne he wode gakkanaashin ooninne demmibeenna mule hayqqana danddayenna deꞌuwaa immiyoogan mule qoppibeenna ogiyan A bonchchiis! (Pili. 2:9; 1 Xim. 6:16) Hegee Yesuusi ammanettidi oottidobaa Yihooway keehi nashshiyoogaa bessiyaaba! Nuuni ha alamiyan nashettanawu koyennaadan maaddanabay aybee? Yihooway baayyo ammanettida ashkkarata awudekka eriyoogaanne issi issitoo qoppibeenna ogetun eta woytiyoogaa hassaya. Nuuni qoppibeenna ayba anjjota sinttappe demmanaakko ooni erii? SHin haꞌꞌissawu ha iita alamiyaa metuwaaninne paaciyan gencciiddi, hegee attanaagaa simi ubbatoo hassayoos. (1 Yoh. 2:17) Nu siiqo Aaway Yihooway ‘nuuni oottidobaanne A sunttaa siiqido siiquwaa doganawu worddanchcha gidenna.’—Ibr. 6:10. w18.07 11 ¶17-18

Yesuusi ba kiittidoogeetuura wurssetta kahuwaa miyo wode issippetettaabay A qofissiis. I etaara woossiyo wode, inne A Aaway issuwaa gididoogaadan I erissiyo ashkkarati ubbay issuwaa gidanaadan koyiyoogaa yootiis. Eta issippetettay Yesuusi A sheniyaa polanaadan Yihooway A saꞌaa kiittidoogaa bessiya gita markka gidana. Siiqoy Yesuusa tumuppe kaalliyaageeta erissiyaabanne eta issippetettaa minttiyaaba gidana. (Yoh. 13:34, 35) Yesuusi issippetettaabaa mintti yootidoogee bessiyaaba. I kiittidoogeetuura wurssetta kahuwaa miido wodiyaagaadan, eti maayettennaagaa woykko issippetettan deꞌennaagaa akeekiis. Haroodeegaadan, eti “bantta ubbaappe ooni gitakko” he wode palamettidosona. (Luq. 22:24-27; Mar. 9:33, 34) Hara wode Yaaqoobinne Yohaannisi, Yesuusi ba Kawotettan, ba miyyiyan etassi xoqqa sohuwaa immanaadan oychchidosona.—Mar. 10:35-40. w18.06 8 ¶1-2

Aqo laggeti deꞌo laytta ubban issippe deꞌana mala eti keehi siiqettanaadan Yihooway koyees. (Maa. 19:3-6) Wodiraa laammiyoogee issi uri siiqennaagaa bessiya keehi wolqqaama danotuppe issuwaa. Tammu Azazotuppe laappunttaagee shaaramuxoppa woy wodiraa laammoppa giyoogee bessiyaaba. (Zaa. 5:18) Hegee “Xoossaa bolli” oottiyo nagara, qassi aqo laggiyawu meqettaa iitiyoogaa bessiyaaba. (Doo. 39:7-9) Wodiraa laammida ura aqo laggee he uri ammanettennan aggidoogan daro layttawu qohettana danddayees. Yihooway naati ufayttanaadaaninne woppu giidi deꞌanaadan koyees. Yelidaageeti bantta naati dicciyo wode koshshiyaabaa kunttanaadaaninne eti Xoossaara dabbotanaadankka maaddana mala Yihooway eta azaziis. Yelidaageeti bantta naati Yihoowa Higgiyaa akeekanaadaaninne A siiqiyoogaa tamaaranaadan maaddana koshshees. (Zaa. 6:6-9; 7:13) Yelidaageeti bantta naata shenehoo giidi woy bessenna ogiyan oyqqana danddayiyo pattennabadan gidennan, Yihooway immido laatadan xoqqu ootti xeellana bessees.—Maz. 127:3. w19.02 21 ¶5, 7

Iyyoobi Xoossay woytanaban hidootaa wottidi ba suuretettaa naagiis. A suuretettaa gishshawu Xoossay assi qoppiyoogaa I ammanees. Metoy A gakkikkonne, Yihooway wurssettan woytanaagaa I ammanettiis. He ammanoy I ba suuretettaa naaganaadan A maaddiis. Iyyoobi nagaranchcha gidikkonne, Yihooway A suuretettan keehi ufayttido gishshawu, daro woytuwaa awu immiis. (Iyy. 42:12-17; Yaaq. 5:11) Iyyoobi ubba hegaappekka aaro woytuwaa demmana. Nu Xoossay laamettibeenna. (Mil. 3:6) I nu suuretettaa keehi nashshiyoogaa hassayikko, maalaalissiya hidootaa nu wozanan wottana danddayoos. (1 Tas. 5:8, 9) Issi issitoo, neeni moozottana danddayikkonne, hegaadan siyettiyoy ne xallaassa gidenna. Kumetta saꞌan deꞌiya, suuretettaa naagiya miilooniyan qoodettiya ammanettidaageetuppe neeni issuwaa gidana. Woranawu yashissikkonne, bantta suuretettaa naagidi deꞌida ammanuwan leemiso gidiya beni wode attuma asaaranne macca asaarakka neeni qoodettana.—Ibr. 11:36-38; 12:1. w19.02 7 ¶15-16

Godaa Kahuwaa bonchchiyo wodee matattiyo wode, nuuni kaallidi deꞌiya oyshata nuna oychchana koshshees: ‘Siiquwaa bessiyoogan nuuni Yesuusa leemisuwaa waati loytti kaallana danddayiyoo? Taani taagaappe aaruwan ta mala Kiristtaanetussi koshshiyaabaa qoppiyaanaa? Taani ta ishanttuppenne michchonttuppe eti oottana danddayiyoobaappe aarobaa naagiyaanaayye eta abbiyaa akeekiyaanaa?’ Nuuni muletoo Yesuusa leemisuwaa kaalliyaageetanne haratussi qarettiyaageeta gidoos. Kiristtoosa hayquwaa hassayiyo baalaa bonchchiyoogee mata wode attana. Yesuusi gita waayiya wode ‘yiyo wode,’ tiyettidaageetuppe attida ‘doorettida asata’ saluwaa efaanawu I shiishshana; qassi Godaa Kahuwaa bonchchiyoogee he wode attana. (1 Qor. 11:26; Maa. 24:31) Godaa Kahuwaa bonchchiyoogee mata wode attiyaaba gidikkonne, bana ziqqi oottiyoogaa, xaliyoogaanne siiqiyoogaa ay asaagaappenne aaruwan bessidoogaa qonccissiya Godaa Kahuwawu giigissiyo guuttabaa Yihoowa asay siiquwan hassayana danddayiyoogee qoncce. w19.01 25 ¶17-19

Nu garssa asatettay keehi koshshiyaaba gidiyoogaa nu bollaa payyatettay waatidi bessiyaakko akeeka. Koyruwan, nu bollay payya gididi deꞌanaadan nuuni bollawu maaddiya qumaa maananne ubbatoo bollaa minttiyaabaa oottana bessees. Hegaadankka, ayyaanaaban payya gididi deꞌanawu, ayyaanaaban nuna maaddiya qumaa maananne Yihoowa ammaniyoogaa ubbatoo bessana koshshees. Nuuni tamaaridobaa oosuwan peeshshiyoogaaninne nu ammanuwaabaa haratuyyo yootiyoogan Yihoowa ammaniyoogaa bessoos. (Roo. 10:8-10; Yaaq. 2:26) Naaꞌꞌanttuwan, nu garssa asatettay sahettikkokka bolla baggaara beettiyaaba xallan nuuni payya giidi qoppana danddayoos. Hegaadankka, nuuni ayyaanaabaa oosuwaa ubbatoo oottiyoogaa gaasuwan nu ammanoy mino giidi qoppana danddayoos; shin iita amoy nu giddon diccana danddayees. (1 Qor. 10:12; Yaaq. 1:14, 15) Seexaanay nuuni aagaadan qoppanaadan oottiyoogan nu qofaa moorana koyiyoogaa nuuni hassayana koshshees. w19.01 15 ¶4-5

Hagaadan nuna oychchana danddayoos: ‘Taani hegaadan oottiyaanaa? Qarettiya Samaariyaa bitanee oottidoogaadan taani oottiyaanaa? (Luq. 10:30-35) Taani waayettiyaageetuyyo maarotaanne kehatettaa bessiya loꞌꞌobaa oottana danddayiyaanaa? Leemisuwawu, cimida Kiristtaaneta, amꞌꞌetanne ayyaanaaban aaway baynna naata maaddana danddayiyaanaa? Taani unꞌꞌettidaageeta “minttettanawu” kasetana danddayiyaanaa?’ (1 Tas. 5:14; Yaaq. 1:27) Gidoppe attin, maariyoogee waati ufayssaa demissii? Nuuni haratussi maarotaa bessiyo wode, immiyoogan ufayttoos. Hegaa bolli, nuuni Yihoowa ufayssiyoogaa eroos. (Oos. 20:35; Ibr. 13:16) Maarotaa bessiya ura Yihooway “a naagidi, paxa wottees. Inne biittaa bollan anjjettidaagaa” woy ufayttiyaagaa gidanaagaa Kawuwaa Daawiti yootiis. (Maz. 41:1, 2) Nuuni haratussi maarotaanne qaretaa bessikko, nuuni Yihoowa maarotaa demmananne merinawu ufayttana.—Yaaq. 2:13. w18.09 19 ¶11-12

Yoshiko giyo ammanettida michchiyaa iitabaa siyaasu. Dottoree A amarida agina xallawu deꞌanaagaa yootiis. A waanadee? Yoshika hachchi gallassa xiqisiyan deꞌiyaagaa hassayawusu. Yaatada, aynne dagammennan, A ba kushiyaa Yihooway oyqqiyo gishshawu yayyennaagaa dottoriyawu yootaas. He xiqisee yootiyo minttettiya qofay nu siiqo michchiyaa Yihoowan muleera ammanettanaadan maaddiis. Wolqqaama metoy gakkiyo wode woppu giidi deꞌanawu he xiqisee nunakka maaddees. Yihooway hegaa Isiyaasa baggaara koyro xaafissidoy guyyeppe omooddettidi Baabiloone baana Ayhudata minttettanaassa. SHin Ayhudatu xalla gidennan, heedeppe hanno gakkanawu deꞌida A asay ubbay goꞌettanaadan Yihooway hegaa xafissiis. (Isi. 40:8; Roo. 15:4) Ha wodiyan, nuuni ‘wayssiya wodiyan’ deꞌiyo gishshawu, Isiyaasa maxaafan deꞌiya minttettiya qofay nuuyyo awudeegaappenne aaruwan koshshees.—2 Xim. 3:1. w19.01 2 ¶1-2

Hegaadan shaahettida naaꞌꞌay haꞌꞌikka eta metoy gakkana. Kiitettida PHawuloosi issippe deꞌana koshshiyo issi gaasuwaa yootiis. “Ammanenna azinai ammaniya machcheera de7idi geeyiis. Qassi ammanenna machchiyaa ba ammaniya azinaara de7ada geeyaasu. Hegee bainnaakko, intte naati tuna; shin ha77i eti geeshsha.” (1 Qor. 7:14) Keehi metiya hanotan, ammanettida daro Kiristtaaneti ammanenna aqo laggiyaara deꞌidosona. Eta aqo laggee guyyeppe Yihoowa Markka gidido wode, eti hegaadan oottidoogan keehi ufayttidosona. (1 Qor. 7:16; 1 PHe. 3:1, 2) Xoossaa ashkkarati aqo deꞌuwaa bonchchanaadan eti naaꞌꞌaykka koyidosona. Ha wodiyan kumetta saꞌan, aqo deꞌuwan ufayttiya daroti Kiristtaane gubaaꞌiyan deꞌoosona. Ufayttiya daro aqo laggeta neeni intte gubaaꞌiyan demmana danddayaasa. Hegeeti bantta machchota siiqiya ammanettida azinatanne bantta azinata bonchchiya, siiqiya machchota; eti ubbay aqo deꞌoy bonchchettidaba gidiyoogaa bessoosona.—Ibr. 13:4. w18.12 14 ¶18-19

Edene giyoogee “Ufayssaa” giyoogaa; qassi he ataakiltte sohoy tumukka ufayssees. He sohoy keehi ufayssees; yan miyo darobay deꞌees; qassi asaynne doꞌay saruwan deꞌees. (Doo. 1:29-31) “Ataakiltte sohuwaa” giyo Ibraawetto qaalay Giriikettuwan paratisos geetetti birshshettees. Maklintokinne Istrongi giigissido Insaykilooppiidee paratisos giyo qaalaabaa hagaadan giis: “Qohiyaabi gakkennaadan direttida, loꞌꞌotettay moorettibeenna, etappe daroti ayfiyaa ayfiya woraa mittati deꞌiyo, xillo haattay goggiyo shaafati deꞌiyo, he shaafatu doonan cofoshuwaa woy dorssaa wudee hemettiyo, aaho, deriyan deꞌiya ataakiltte soho; hegee manddara biya Giriike bitanee qoppido sohuwaa.” (Doomettaabaa 2:15, 16⁠ra gatta xeella) Xoossay Addaamanne Hewaano hegaa mala gannatiyan wottiis; shin eti Xoossawu azazettibeenna gishshawu kiyidosona. Hegaa gishshawu, Gannatee etappenne eta zerettaappe haliis. (Doo. 3:23, 24) Asi deꞌana xayikkonne, he ataakiltte sohoy Nohe wode Bashshaa Haattaa gakkanaassi deꞌidaba milatees. w18.12 3-4 ¶3-5

Yelidaageeti bantta naata loꞌꞌo maaraa tamaarissoosona. Naati banttana yelidaageetuppe tamaaridoogaadan deꞌanawu doorikko, wodeppe zilꞌꞌettennabaa kuuyana danddayoosona. Hegaappe denddidaagan, eti bantta bolli ehaana danddayiyo daro metuwaappenne hirggaappe attana. Yihooway loꞌꞌo aawaadan, ba naati keehi ufayssiya deꞌo deꞌanaadan koyees. (Isi. 48:18) Hegaa gishshawu, I kandduwaabaaninne haratuura gattiyaaban kaallana bessiya maaraa immees. Hegaa malaban nuuni aagaadan qoppanaadaaninne I nashshiyoobaa nashshanaadan nuna shoobbees. Hegee nuna laꞌatetta diggiyaaba gidennan, nu qofaa ooraxissees, xoqqisseesinne aassees. (Maz. 92:5; Lee. 2:1-5; Isi. 55:9) Nuuni hegaadan oottiyo wode, nu dosiyoobaanne loꞌꞌobaa doorana danddayoos; qassi hegee nuuni ufayttanaadan oottana. (Maz. 1:2, 3) Tumukka, Yihoowaagaadan qoppiyoogee goꞌꞌees! w18.11 19-20 ¶7-8

Nuuni tuman aggennan hemettanawu, qohiyaabaa oottanaadan harati giddiyo wode xoonettana bessenna. Nuuni tuman hemettiyoogaa doommiyo wode, nu dabbotay Yihoowa Markka gidenna laggetuuranne so asaara kaseegaappe laamettiis. Issoti issoti nubaa danddayidosona; harati qassi eqettidosona. Nu soo asay, nunaara oottiyaageetinne nunaara tamaariyaageeti yelettido gallassaa woy baalata nuuni etaara bonchchanaadan oottanawu malana danddayoosona. Yihoowa bonchchissenna meeziyaanne baalaa kaallanaadan harati giddiyo wode waanidi eqettana danddayiyoo? Hegaadan oottiyoobaa Yihooway waati xeelliyaakko qoppiyoogan yaatana danddayoos. Asay dosiyo baalatu dendduwaabay nu xuufiyan kiyidaagaa zaarettiyoogee hegawu maaddana danddayees. Hegaa mala baalata ayssi bonchchennaakko Geeshsha Maxaafay yootiyoobaa nuuni hassayiyo wode, nuuni ‘Godaa ufayssiya’ ogiyan hemettiyoogaa ammanettoos. (Efi. 5:10) Yihoowaninne tuma gidida A Qaalan ammanettiyoogee ‘asassi yayyennaadan’ nuna naagees.—Lee. 29:25. w18.11 11 ¶10, 12

Nu hanotay qoppennan laamettiyo wode, keehi hirggidi nu meto xallaa qoppana danddayoos. Yooseefi hegaadan qoppana danddayees. SHin, I ba hanotaa danddayettida keenan loyttanawu kuuyidoogee qoncce; yaatiyoogan Yihoowa anjjuwaa demissiyaabaa oottiis. Yooseefi qashuwan deꞌikkonne, halaqay ayyo immido ay oosonne, PHoxiifaarawu oottidoogaadan minnidi oottiis. (Doo. 39:21, 22) Yooseefaagaadan, nuuni aybanne oottana danddayenna hanotay nuna gakkana danddayees. SHin nuuni danddayanchcha gidikko, qassi nu hanotaa loyttanawu danddayettida keenan minnidi oottikko, Yihoowa anjjuwaa demissiyaabaa oottana. (Maz. 37: 5) Issi issitoo nuuni ‘sirana’ danddayiyoogee tuma; shin nuuni kiitettida PHawuloosi yootidoogaadan mule ‘aggi bayana gookko.’ (2 Qor. 4:8) Nuuni aggennan haggaazikko, Yihooway nunaara gidana. w18.10 29 ¶11, 13

Neeni eriyoonne bonchchiyo asi ne sunttaa dogiyaakko woy ubba nena erennaba gidiyaakko neeyyo aybi siyettanee? Hegaa malabay keehi azzanttana danddayees. Aybissi? Nuuni ubbay asan erettanawu koyanaadan merettido gishshataassa. Nuuni harati nu sunttaa eriyoogaa xalla gidennan, nuuni oonakkonne ay oottidaakkokka eranaadan koyoos. (Qoo. 11:16; Iyy. 31:6) Nu meretan koyiyo hara daro koshshaadan, nashettanawu koyiyo koshshaa nu nagaray moorana danddayees. Nagaray nuuni bessenna sunttan xeesettanawu amottanaadan oottana danddayees. Tumuppe erettananne goynuwaa ekkana bessiya, saluwan deꞌiya nu Aawaa, Xoossaa Yihoowa dogissiya bonchuwaanne sabaa demmanawu amottanaadan Seexaanaa alamee denttettees.—Ajj. 4:11. w18.07 7 ¶1-2

Maatay deꞌiyo asati ‘worddotanaadan’ Seexaanaynne daydanttati oottiyoogan nuuni garamettokko. (1 Xim. 4:1, 2) Haymaanootiyaa kaalettiyaageeti worddotiyoogee hegaa ammaniyaageetu sinttanaa deꞌuwaa qohiyaaba gidiyo gishshawu, hegee keehi iitaba. Issi uri worddo timirttiyaa ekkikko, qassi Xoossay ixxiyoobaa oottikko, hegee merinaa deꞌoy appe halanaadan oottana danddayees. (Hoo. 4:9) Yesuusi ba wode haymaanootiyaa kaalettiyaageeti hegaadan asaa cimmiyoogaa erees. I etawu hagaadan giis: “Lo77o milatiya iitatoo, higgiyaa tamaarissiyaageetoonne Parisaawetoo intte issi uraa ammanttanau abbaaninne sa7an yuuyiyo gishshaunne qassi intte a ammanttiyo wode, he uraa intteegaappe naa77u kushe iitida Gaannabiyau [merinaa xayuwawu] na7a oottiyo gishshau, intteyyo aayye7ana.” (Maa. 23:15) Worddo haymaanootiyaa kaalettiya he asatussi Yesuusi minttidi yootiis. Eti tumukka, ‘wordduwawu aawa gidida, shemppo woriya Dabloosa naata.’—Yoh. 8:44. w18.10 7 ¶5-6

Yesuusi giidobay woygiyoogee? I gujjidi hagaadan giis: “Intteyyo saluwan gita woitoi de7iyo gishshau, ufaittite; hashshu giite; aissi giikko, asai intteppe kase de7ida hananabaa yootiyaageetakka hegaadan waissiis.” (Maa. 5:12) Kiitettidaageeta bukkidi sabbakennaadan azazido wode, eti “yaa7aappe ufaittiiddi kiyidosona.” Waraa seelay eta ufayssibeennaagee qoncce. SHin, “Yesuusa sunttaa gishshau, eti kauyyanau bessiyoogaa Xoossai qoppido gishshau,” eti ufayttidosona. (Oos. 5:41) Ha wodiyan, Yihoowa asay Yesuusa sunttaa gishshawu waayettiyo wode woy eta wolqqaama metoy gakkiyo wodekka ufayssan genccoosona. (Yaaq. 1:2-4) Kiitettidaageetuugaadan, nuunikka gakkiya waayiyan ufayttokko. SHin, nuuni metoy gakkiyo wode Xoossawu ammanettidi deꞌikko, minnidi genccanaadan Yihooway nuna maaddana danddayees. Haymaanootiyaappe denddidaagan yedettishin, son eqqettishin, sahettiiddi woy ceegatettay deꞌishinkka, “ufayttiya Xoossay” nashshiyo wode nuuni ufayttana danddayoos.—1 Xim. 1:11, NW. w18.09 21 ¶18-20

Deꞌoy ‘metuwaaninne tuggan’ kumido gishshawu, ha ‘wayssiya wodiyan’ keehi daro asay hidootaa qanxxanawu malees. (2 Xim. 3:1-5) Layttan layttan 800,000⁠ppe dariya asay, 40 sokonddiyan issi uri, bana barkka worees. Haray atto, issi issi Kiristtaaneti hegaadan unꞌꞌettidi banttana banttarkka woridoogee azzanttiyaaba. Nu ishanttinne michchontti hidootaa qanxxanawu malana xayikkonne, ha wodiyan unꞌꞌettanaadan oottiyaabay darota gakkees, qassi eta siiquwan minttettana koshshees. Amaridaageeta asay yedetteesinne baceessees. Harata asay ooso sohuwan borees woy zigirees. Woy qassi eti keehi daro saatiyaa woy keehi unꞌꞌettidi oottana koshshiyo gishshawu daafuroosona. Haratussi qassi son wolqqaama metoy deꞌees. Eta aqo laggee eta ubbatoo boriya, Yihoowawu haggaazenna ura gidana danddayees. Hegeetuppenne hara metuwaappe denddidaagan, gubaaꞌiyan deꞌiya daroti asatettaaninne qofan qohettoosona. w18.09 13 ¶3, 5

Kiristtaane aawatinne aayeti bantta naati Yihoowawu haggaazanawu halchchanaadan maaddiyoogan aara issippe oottana danddayoosona. Hegaadan oottida daroti bantta attuma naatinne macca naati bantta sooppe haahosan kumetta wodiyaa haggaazuwaa doommiyoogaa guyyeppe beꞌidosona. Issoti issoti misoonaawe gididosona; harati aassiyaageeti keehi koshshiyoosan aqinye gididi oottoosona; harati qassi Beeteelen oottoosona. Haahuwan deꞌiyoogee eti bantta soo asaara koyiyoogaa keenaa gayttennaadan oottana danddayees. Gidoppe attin, bantta goꞌꞌaa aggi bayiya aawatinne aayoti bantta naati he oosuwaa genccidi oottanaadan minttettoosona. Aybissi? Eti bantta naati Xoossaa Kawotettaabaa sinttayiyoogaa eriyoogee eta keehi ufayssees. He aawatuppenne aayotuppe darotussi ba naꞌaa Sameela Yihoowayyo ‘immida’ Hanniigaadan siyettennan waayi aggana. Hegaadan hashetiyoogaa he yelidaageeti gita maatadan xeelliyoogee bessiyaaba. Eti hegaappe dummabaa koyokkona.—1 Sam. 1:28. w18.08 24 ¶4

Yesuusi hegee danddayettennaba gibeenna. I, “Xoossaa kawotettai inttebaa gidiyo gishshau, hiyyeesati intte anjjettidaageeta” yaagiis. (Luq. 6:20) SHin hegee hiyyeesa asi ubbi anjjettidoogaanne Yesuusi tamaarissiyoobaa siyidoogaa bessiyaaba gidenna. Hiyyeesati daroti siyibookkona. Yaanikko, issi ura aquwaa xeellidi I Yihoowaara dabbotido dabbotaabaa kuuyana danddayokko. Yihoowa asaa giddon, dure ishanttinne michchontti deꞌoosona; qassi harati hiyyeesa. SHin eti ubbay Yihoowa siiqoosonanne ayyo wozanappe oottoosona. Geeshsha Maxaafay dureti “de7o Xoossan ammanettanaagaappe attin, aadhdhiya duretettan eti ammanettennaadan” yootees. (1 Xim. 6:17-19) Hegaadankka, Xoossaa asa ubbay dureekka hiyyeesaykka miishshaa siiqenna mala naagettanaadan Xoossaa Qaalay zorees. (1 Xim. 6:9, 10) Nu ayfee dooyettin nu ishantta nuuni Yihoowagaadan xeelliyo wode, etawu aqoy deꞌiyoogaa woy baynnaagaa xallan nuuni etabaa kuuyanawu paacettokko. w18.08 10-11 ¶11-12

Yihooway nuna ba asa oottidi bonchchidoogawu nuuni A galatanawu koyiyoogee tuma. Nu dosan nuna ayyo sheedhdhiyoogan nuuni abaa gidiyoogaa ammaniyoogaa bessiyoogee eratetta gidiyoogaa akeekoos. Nuuni iitabaa minnidi eqettoos. Qassi nu mala Kiristtaanetikka Yihoowaba gidiyoogaa akeekidi, eta siiqoosinne bonchchoos. (Roo. 12:10) Geeshsha Maxaafay Yihooway ‘ba asaa yeggennaagaa’ yootees. (Maz. 94:14) Nuna ayba metoy gakkikkonne, ha mino qaalay polettees. Haray attoshin, hayqoykka Yihooway nuna siiqiyoogaa bessennaadan diggana danddayenna. (Roo. 8:38, 39) ‘Simi nuuni paxa deꞌin woy hayqqin Yihoowassa.’ (Roo. 14:8) Yihooway hayqqida ba dabbotu ubbawu deꞌuwaa immana wodiyaa nuuni yeemotti naagoos. (Maa. 22:32) Nuuni ha wodiyankka daro anjjuwaa demmida. Geeshsha Maxaafay yootiyoogaadan, A ‘Xoossay Yihoowa gidido kawotettay, I baassa oottidi doorido asay anjjettidaagaa.’—Maz. 33:12. w18.07 26 ¶18-19

Timirttiyaa, woy oosuwaa malabaa dooriyoogee asi bawu kuuyiyooba gidiyo gishshawu, issoti issoti bantta kahaa qumꞌꞌennaba gidido peeshshan aybanne doorana danddayiyaabadan qoppoosona. Eti geella miyoobaara gayttidaban PHawuloosi Qoronttoosa Kiristtaanetussi, “Taani ta koyidoogaa hananau danddayiyo ta hanotettaa hara asa zoriya wozanai aissi pirddii?” yaagidoogaa qoppana danddayoosona. (1 Qor. 10:29) Nuuni nu huuphen kuuyana koshshiyoogee tuma, shin nu laꞌatettawu zaway deꞌiyoogaanne nuuni kuuyiyo ubbabay kaalettiyoobi deꞌiyoogaa hassayana koshshees. Hegaa gishshawu, PHawuloosi hachchi gallassa xiqisiyan deꞌiya qofaa yootiis. Nu deꞌuwan ubbaban nu laꞌatettaa goꞌettiyoogaa xeelliyaagan, nuuni dosiyoobaappe aaruwan qoppana koshshiyaabati deꞌiyoogaa akeekanaadan hegee nuna maaddees. w18.04 10 ¶10

Qaayeeladan, ha wodiyan deꞌiya issi Kiristtaanee Yihoowawu goynniyaaba milatiiddikka bala ogiyaa kaallana danddayees. (Yih. 11) Leemisuwawu, issi uri pokkobaa amottana, yaaretana, woy ba mala Kiristtaaniyaa ixxana danddayees. (1 Yoh. 2:15-17; 3:15) Hegaadan qoppiyoogee nagaraa oottanaadan denttettana danddayees. Yaatiiddikka, I loytti haggaazananne gubaaꞌe shiiquwaa ubbatoo shiiqana danddayees. Hara asay nu qofaanne nu eeshshaa erennan aggana danddayees; shin Yihooway ubbabaa beꞌees; qassi nuuni kumetta wozanaappe A bagga gidana xayikko, I erees. (Erm. 17:9,10) Gidikkonne, Yihooway nunan eesuwan hidootaa qanxxenna. Issi uri Xoossaappe haakkanaadan oottiyaabaa oottiyo wode, Yihooway A, ‘Taakko simmaꞌyaagees. Nuuni shugo gididobaara baaxetiyo wodekka, nuuni iitabaa eqettanaadan Yihooway koyees. (Isi. 55:7) Nuuni yaatikko, I nuna maaddanawunne nuuni iita amuwaa xoonana mala koshshiya wolqqaa nuussi immanawu qaalaa geliis.—Doo. 4:7. w18.07 18 ¶5-6