Isiine

Nuuni ‘wayssiya wodiyan’ deꞌoos; qassi ooratta gallassay wonttin saꞌan tumu sarotettay yaana gakkanaashin deꞌoy ubbakka yaa iitana. (2 Xim. 3:1) Yaatiyo gishshawu, ‘Maaduwaanne kaaletuwaa demmanawu awa xeelliyaanaa?’ yaagidi nuna oychchiyoogee loꞌꞌoba. Mazamuriyaa yexxiyaagee maadoy koshshiyo wodiyan nuuni Yihoowakko xeellana bessiyoogaa daro wodeppe kase yootiis. (Maz. 123:1-4) I nuuni Yihoowakko xeelliyoogaa ashkkaray ba godaakko xeelliyoogaara geeddarssiis. I yaagidoogee woygiyoogee? Ashkkaray bana mizananne naagana mala xallawu gidennan, ba goday koyiyoobaa akeekidi hegaa oottanawu ubbatoo akko xeellana koshshees. Hegaadankka, Yihooway nuuni oottanaadan koyiyoobay aybakko akeekanawunne he kaaletuwaa kaallanawu nuuni galla galla Xoossaa Qaalaa pilggana koshshees. Koshshiyo wodiyan Yihooway nuussi qoppanaagaa nuuni ammanettana danddayiyoy hegaa xallaana. w18.07 12 ¶1-2

Yesuusi asaa hanno gakkanawu gakkida qashonne naaqo ubbaappe aadhdhiya “nagara aille” gidiyoogaappe kiyiyoogaabaa yootiis. (Yoh. 8:34) Nagaray nuna iitabaa ootissana danddayiyoogaa xalla gidennan, nuuni loꞌꞌo gidiyoogaa woy oottana danddayiyoogaa eriyoobaa oottennaadankka diggana danddayees. Nuuni hegaadan nagaraa aylle gidida, qassi hegee azzanuwaa, tuggaanne wurssettan hayquwaa kaalettees. (Roo. 6:23) Nuuni nu koyro aawaynne aayyiyaa issi wode demmido tumu laꞌatettaa demmanawu hidootana danddayiyoy nagaraa qashuwaappe birshshettiyo wode xalaalaana. Yesuusi, “intte taani tamaarissiyoogau azazettikko” giidoogee I laꞌa kessanaadan koyettiyaabay woy zaway deꞌiyoogaa bessees. (Yoh. 8:31) Yihoowawu aqida Kiristtaaneti nuna yeggi bayidi, Kiristtoosi erissiyo ashkkarata gididi I tamaarissido zawaa giddon deꞌanawu doorida. (Maa. 16:24) Yesuusi qaalaa gelidoogaadan, nuuni A wozuwaa yarshshuwaa kumetta goꞌꞌaa demmiyo wode, tumuppe laꞌa kiyoos. w18.04 7 ¶14-16

Yihooway ba asawu, ubba qassi issi issitoo eta qofay suure gidenna wodekka etawu siyettiyaabaa akeekees. Yoonaasa hanotaa qoppa. Pirdda kiitaa awaajjanaadan Xoossay Yoonaasa Nanawe kiittiis. Eti bantta nagaraappe simmin, Xoossay eta xayssibeenna. Gidoppe attin, Yoonaasi hegan ufayttibeenna. I Nanawee xayana giidi yootidobay polettennan attido gishshawu, “keehi hanqqettiis.” SHin, Yihooway Yoonaasa danddayiis, qassi I ba qofaa suurissanaadan maaddiis. (Yona. 3:10–4:11) Yihooway A tamaarissidobaa I guyyeppe akeekiis; ubba qassi Yihooway ha taarikiyaa nu goꞌꞌaassi I xaafanaadan oottiis. (Roo. 15:4) Yihooway ba asaayyo oottidobay I ba ashkkaratussi qarettiyoogaa nuuni ammananaadan oottees. I nu ubbaa waayiyaanne tuggaa erees. Nu qofaa, nuussi siyettiyaabaanne nuuyyo danddayettennabaa I akeekees. Qassi I “[nu] wolqqai danddayiyoogaappe aadhdhiya paaciyan [nu] paacettanau koyenna.” (1 Qor. 10:13) Ha qofay ay keena minttettiyaabee! w19.03 16 ¶6-7

Yihoowa goynuwaara gayttidaba xallaa gidennan, Yihoowa asawu ooshshaaranne danobaara gayttidabaakka pirddiyo aawatettay sunttettida cimatussi deꞌiyoogaa Muuse Higgee yootees. Kaallidi deꞌiya leemisota beꞌa. Issi Israaꞌeela asi asa worikko, asay A eesuwaara worenna. A worana bessiyaakkonne kuuyanappe kase A katamaa cimati hanotaa loyttidi qoroosona. (Zaa. 19:2-7, 11-13) Cimati aquwaara gayttidaagan denddiya ooshshaa gidin woy aqo deꞌuwan merettiya ooshshaa gidin, deꞌuwan ubba galla merettiya darobaa pirddoosona. (Kes. 21:35; Zaa. 22:13-19) Cimati suure pirddiyo wodenne Israaꞌeelati Higgiyawu azazettiyo wode, ubbay goꞌettoosona; qassi deree Yihoowa bonchchissees. (Wog. 20:7, 8; Isi. 48:17, 18) Nu deꞌuwan ubbabaa Yihooway xoqqu ootti xeelliyoogaa hegaappe akeekoos. Haratuura gayttidaagan nuuni suurenne siiqiyaageeta gidanaadan I koyees. Qassi nuuni son nurkka deꞌiyo wodekka, haasayiyoobaanne oottiyoobaa I akeekees. w19.02 23 ¶16-18

Unꞌꞌoy gakkiyo wode ashkke gidiyoogee nuna metana danddayees. Hegaa mala wode nuuni haasayiyo qaalay hanqqetissiyaagaanne siyanawu loꞌꞌennaagaa gidana danddayees. Deexo metoy nena gakkiyo wode Yesuusa leemisuwaa hassaya. Yesuusi saꞌan deꞌido wurssetta aginatun daro unꞌꞌoy A gakkiis. A bolli deexo metoy gakkanaagaanne wurssettan hayqqanaagaa I erees. (Yoh. 3:14, 15; Gal. 3:13) I hayqqanawu amarida aginay attidaashin unꞌettidoogaa haasayiis. (Luq. 12:50) Yesuusi hayqqanawu amarida gallassay attidaashin ‘unꞌꞌettaas’ yaagiis. I azazettiyaagaanne ba huuphiyaa ziqqi oottiyaagaa gidiyoogaa ba Aawaa woossido woosaappe erana danddayoos. (Yoh. 12:27, 28) Yesuusi wodee gakkin Xoossaa morkketussi xalan bana aatti immin eti A keehi kawushshidinne wayssidi woridosona. Yesuusa daro metoy gakkikkokka, I ashkketettan Xoossaa sheniyaa poliis. Hegaa gishshawu, Yesuusi metoy gakkiyo wode ashkketettaa bessiyoogan ooppenne aaro leemiso.—Isi. 53:7, 10. w19.02 11 ¶14-15

Nuuni ubbatoo shiiqotun shiiqanawu, metoy gakkishinkka nuuni xala gidiyoogaa bessana koshshennan waayi aggana. Nu ishanttuppenne michchonttuppe amaridaageeti kayyottanaadaaninne hidootaa qanxxanaadan oottiyaabay woy sahoy deꞌishinkka, shiiqoosona. Harati qassi so asaa yameti woy kawotettaa sunttati wolqqaama yedetaa gattishinkka xalidi shiiqoosona. Bantta ammanuwaa gaasuwan qashettida nu ishantta nu leemisoy ay keena maaddiyaakko qoppa. (Ibr. 13:3) Metiyaabay deꞌishinkka nuuni ubbatoo Yihoowawu haggaaziyoogaa eti siyiyo wode, eta ammanoy kaseegaappe yaa minnana; qassi eti kaseegaappe yaa xalana. PHawuloosi Roomen qashettido wode, ba ishantti ammanettidi Xoossawu haggaaziyoogaa siyiyo wode ubban I keehi ufayttiis. (Pili. 1:3-5, 12-14) PHawuloosi qashuwaappe birshshettanaappe guuttaa kasetidi woy birshshetti simmidi sohuwaara, Ibraawe Kiristtaanetussi dabddaabbiya xaafiis. I ammanettida he Kiristtaaneti issippe shiiqiyoogaa mule aggenaadan he dabddaabbiyan minttettiis.—Ibr. 10:25. w19.01 28 ¶9

Yihooway kessido maaraa xaasayidi xeelliyaanne ba xallaa siiqiya makkalanchcha Seexaanay nuuni A mala gidanaadan koyees. I moori uttido asay nu yuushuwan kumanaadan oottees. Nuuni Yihoowa qofan ammanettiyoogaappe asa aadhdhida eratettan ammanettanaadan oottiyoogankka Seexaanay nu wozanaa mooranawu baaxetees. (Qol. 2:8) Seexaanay aassiyo issibaa, hegeekka dure gidiyoogee nu deꞌuwan aybippenne aadhdhana bessees giyoogaa qoppa. Hegaadan qoppiyaageeti dure gidana woy gidennan aggana danddayoosona. Eti dure gidin aggin, banttana qohoosona. Aybissi? Eti halchchuwaa polanawu miishsha demmanawu bichchaariyo gishshawu bantta payyatettaa qohoosona, qassi bantta soo asaara deꞌiya dabbotaa, ubba Xoossaara dabbotido bantta dabbotaa moorana danddayoosona. (1 Xim. 6:10) Nuuni miishshaa suure xeellanaadan aadhdhida eranchcha gidida, saluwan deꞌiya nu Aaway nuna maaddiyo gishshawu galatoos.—Era. 7:12; Luq. 12:15. w19.01 15 ¶6; 17 ¶9

Yihoowa Naꞌay saꞌaa yiidi minttettuwaa xeelliyaagan leemiso gidiyaabaa oottanaappe kasekka, minttettiyoogee koshshiyaaba gidiyoogaa Yihoowawu ammanettida ashkkarati akeekidosona. Asooreti qohanawu denddido wode, Hizqqiyaasi olanchchatu halaqatanne Yihudaa asaa minttettanawu shiishshiis. “Hizqqiyaasi haasayidoban asai minettiis. (2 Odi. 32:6-8) Minttettiyoogaa xeelliyaagan nuuni Iyyoobappe tamaarana danddayoos. Ayyo minttettoy koshshiyaaba gidikkonne, harata waati minttettanaakko tamaarissiis. I, “taani intte sohuwan de7idaba gidiyaakko . . . ta zoriyan taani inttena minttana shin! Ta doonaappe kiyiya haasayaikka inttena minttettana shin!” yaagidi etayyo yootiis. (Iyy. 16:1-5) Wurssettan, Eelihunne Yihooway Iyyooba minttettidosona.—Iyy. 33:24, 25; 36:1, 11; 42:7, 10. w18.04 16 ¶6; 17 ¶8-9

Isiyaasi kasekka Yihooway ‘wolqqaara yaanaagaanne A qesee ayyo haaranaagaa’ qonccissidi, Yihooway ba asaa waati minttanaakko yootiis. (Isi. 40:10) Geeshsha Maxaafay “qesiyaa” giya qaalaa darotoo wolqqaayyo leemisodan goꞌettees. Yaatiyo gishshawu, Yihoowa ‘qesee haarana’ giya qofay Yihooway wolqqaama Kawo gidiyoogaa nuuni hassayanaadan oottees. I aybinne xoonenna ba wolqqan beni wode ba asaa maaddiisinne ashshiis, qassi ha wodiyan banan ammanettiyaageeta ubba wode minttetteesinne naagees. (Zaa. 1:30, 31; Isi. 43:10) Morkketi nuna yedettiyo wode, Yihooway, “Taani nena minttana” giidoogaadan oottees. Ha wodiyan alamiyan issi issi biittan nuuni sabbakennaadan digganawu woy nu dirijjitiyaa oosuwaa teqqanawu morkketi keehi baaxetoosona. Gidikkokka, nuuni hegan daro hirggokko. Nuuni keehi minnanaadaaninne xalanaadan oottiyaabaa Yihooway yootiis. I hagaadan gees: “Nena qohanau oottido ai miishshinne nena qohidi kantti kiyenna.”—Isi. 54:17. w19.01 5-6 ¶12-13

Mehiyawu doꞌawu ayyaanaabaa, hegeekka banttana Medhdhidaagaa eranawu koshshay baawa. SHin nuussi deꞌees. (Maa. 4:4) Neeni Xoossay yootiyoobaa nashshada siyiyo wode, akeekaa, aadhdhida eratettaanne ufayssaa demmaasa. Xoossay ba Qaalaa baggaaranne ‘ammanettida wozannaama ashkkaraa’ goꞌettidi I giigissiyo, gidi palahiya ayyaanaabaa qumaa baggaara neessi ayyaanaaban koshshiyaabaa kunttees. (Maa. 24:45) Ayyaanaaban dumma dumma daro quman nuuni keehi ufayttoos! (Isi. 65:13, 14) Xoossay giigissiyo ayyaanaabaa qumay neeyyo aadhdhida eratettaanne adussi qoppiyoogaa immana; hegeeti nena daro ogiyan naagana danddayoosona. (Lee. 2:10-14) Leemisuwawu, he eeshshati Medhdhidaagee baa giyoogaa mala worddo timirtteta neeni akeekanaadan maaddoosona. Hegeeti miishshaynne aqoy ufayssaa demmanawu keehi koshshiyaaba giyo wordduwaappe nena naagoosona. Qassi eti neeni iita amuwaanne nena qohiya eeshshaa akeekanaadaaninne eqettanaadan maaddoosona. Yaatiyo gishshawu, Xoossay immiyo aadhdhida eratettaanne adussi qoppiyoogaa ubbatoo koyanne xoqqu ootta xeella! w18.12 20 ¶6-7

Nu layttay “mittaa laittaadan aduqqana” wodee yaanee? Issi issi mittati shaꞌan qoodettiya layttaa deꞌoosona. Hegaa keena layttaa deꞌanawu asay payya gidana koshshees. Eti Isiyaasi yootido hanotan deꞌana danddayikko, hegee yeemotti naagidobaa, gannatiyaa demmiyooba gidana! He hiraagay polettana! Qaalaa gelido, nuuni beꞌidobay sinttappe yaana gannatiyaa waati qonccissiyaakko wotta dentta qoppa. Xoossay kumetta saꞌan deꞌiya asaa anjjana. Doꞌan woy doꞌa mala asan ooninne qohettenna. Qooqeti, tulletinne wobbeti paxana. Asay banttawu keettaa keexxananne kattaa zerana. Eti mittaagaappe daro layttaa deꞌana. Ee, hegaa mala wodee matattidoogaa Geeshsha Maxaafay qonccissees. SHin nuuni haasayissiyo issi issi asati ha hiraagati saꞌay gannate gidanaagaa bessokkona gaana danddayoosona. Saꞌay gannate gidanaagaa neeni hidootan naaganaadan oottiyaabi aybee? Hanno gakkanawu deꞌida asa ubbaappe aadhdhiyaagee hegaa ammanettanaadan oottiyaabaa yootiis.—Luq. 23:43. w18.12 5 ¶13-15

Yeletan laattidobaynne kase nuna gakkidabay nu qofaa amarida hanotan laammidoogee tuma. SHin nu qofay ubbatoo laamettana danddayees. Daro baggi, hegaa laammiyay nuuni qoppanawu dooriyooba. Nuuni Yihooway qoppiyo ogiyaabaa wotti dentti qoppiyoogan A qofay likke gidiyoogaa shaakki erana danddayoos. Yaatiyo wode, nuuni issibaa I xeelliyo ogiyan xeellanawu koyoos. SHin nuuni Yihoowaagaadan qoppana mala nu qofaa laammanawu ‘ha saꞌaa asaa milatana’ koshshennaagaa akeeka. Nuuni Xoossaa qofaara maayennabaa qoppiyoogaa aggana bessees. Yaatiyoogee keehi koshshiyoogaa quman leemisana danddayettees. Issi uri bollawu maaddiya qumaa miyoogan kaseegaappe aaruwan payya gidanawu koyana danddayees. SHin I ubbatoo moorettida qumaa guuttaa miikko, hegee ay maaddii? Hegaadan, alamiyaa qofay nu qofaa moorikko, nuuni Yihoowa qofaabaa tamaaranawu baaxetiyoogee aynne maaddenna. w18.11 21 ¶14-15

Ubba galla tumaa maaraadan deꞌanawu wozanappe murtta. Qabatto mala gidida tumaa ne xeessan gixxa. Beni wode, issi wotaaddaraa qabattoy olettiyo wode A naagees. SHin A naagana mala I ba qabattuwaa mintti gixxana koshshees. Qabattoy sholꞌꞌikko darin naagenna. Ayyaanaaban nuussi qabatto mala gidida tumay nuna waatidi naagii? Nuuni qabattuwaadan tumaa mintti gixxikko, hegee nuna bala qofaappe naagiyoogan nuuni loꞌꞌobaa kuuyanaadan maaddees. Nuuni paacettiyo wode, likke gididabaa oottanawu yaa murttanaadan Geeshsha Maxaafaa tumay maaddees. Issi wotaaddaray qabattuwaa gixxennan olawu baanawu qoppennaagaadan, nuuni qabatto mala tumaa sholꞌꞌissenna mala woy aggenna mala murttana bessees. Ubbakka, nuuni tumaa maaraadan deꞌiyoogan A mintti gixxanawu danddayiyo ubbabaa oottoos. w18.11 12 ¶15

Nuuni Xoossaa Qaalan deꞌiya tumaa baaxetennan demmokko. Nuuni hegaa demmananawu koshshiya aybanne aggi bayanawu eeno gaana bessees. Leemiso maxaafaa xaafida eranchchay giidoogaadan, nuuni ‘tumaa shammiichchidi’ woy demmiichchidi, hegaa ‘bayzzennaadan’ woy aggennaadan naagettana bessees. Coo ekkiyoobikka waaga malabaa qanxxissana danddayees. Leemiso 23:23n ‘shamma’ geetettida Ibraawetto qaalay “demma” geetettanakka danddayees. Ha naaꞌꞌu qaalatikka baaxetiyoogaa woy goꞌꞌiya issibaa haraban laammiyoogaa bessoosona. Tumaa shammiyoogaa ha leemisuwan qonccissana danddayoos. “Coo Ekkiyo Muuziyaa” giyo erissoy giyan odettiis giidi qoppoos. He muuzee maalaaliya hanotan nu soo yaanee? Akkay, yeenna. Nuuni giyaa biidi he muuziyaa soo ehaana bessees. He muuzee coo ehiidobee? Ee, shin giyaa baanawu baaxeenne wode koshshees. Hegaadan, tumaa shammanawu nuussi miishshi koshshenna. SHin, nuuni hegaa demmanawu baaxetana bessees. w18.11 4 ¶4-5

Yesuusi PHeexiroosaara, Yaaqoobaaranne Yohaannisaara issippe gita deriyaa kiyanawu eta shoobbiis. He wode eti keehi maalaalissiya ajjuutaa beꞌidosona. Yesuusa somꞌꞌoy awa ayfiyaadan pooꞌiis; A maayoykka pooꞌuwaadan booxxiis. Muusenne Eelaasa leemiso gidiyaageeti Yesuusi matan hayqqana hayquwaabaanne A dendduwaabaa aara haasayiyoogaa doommidosona. (Luq. 9:29-32) Hegaappe simmin pooꞌiya shaaray yinne eta gentti aggiis, qassi shaaraappe Xoossaa qaalaa siyidosona! He ajjuutay Yesuusi sinttappe Xoossaa Kawotettawu Kawo gididi demmana bonchchuwaanne wolqqaa guuttaa bessiis. Hegee Kiristtoosa gakkana wolqqaama metuwaassinne I keehi waayettidi hayqqana wodiyaassi A minttettidoogee qoncce. Qassikka ha ajjuutay Yesuusi erissiyo ashkkaratu ammanuwaa minttiis. Hegee eti banttana gakkana paaciyawunne oottana koshshiyo wolqqaama oosuwawu giigettanaadan maaddiis. Hasttamaa gidiya layttappe guyyiyan kiitettida PHeexiroosi Yesuusi laamettido ajjuutaabaa haasayiis, hegee he wodekka ha ajjuutay A qofan qonccidi beettiyoogaa bessees.—2 PHe. 1:16-18. w19.03 10 ¶7-8

Tumu Kiristtaaneti worddo haymaanootiyaa kaalliyaageetuppe dummatiyo issi ogee aybee? Nuuni ‘tumaa haasayoos.’ (Zak. 8:16, 17) Nuuni etaara erettennaageetussi, issippe oottiyaageetussi, laggetussinne siiqiyoogeetussi gitaban guuttaban tumaa haasayoos. Neeni ne mala laggeta milatanawu koyiya yelaga gidikko shin? Neeni sooninne gubaaꞌiyan geeshsha milatada shin alamiyaa yelagatuura gayttiyo wodenne Intternneetiyan haratuura gayttiyo wode dummabaa haniyoogan naaꞌꞌu qommo deꞌuwaa deꞌennaagaa akeeka. Hegee yelidaageeta, ishanttanne michchontta, qassi Yihoowa worddotiyoogaa. (Maz. 26:4, 5) Nuuni ‘A nu bolla doonaa xallan bonchchiyoonne nu wozanay appe haahuwan deꞌiyo’ wode Yihooway erees. (Mar. 7:6, 7) Leemiso maxaafay, “Nagaranchchata qanaatoppa; shin ubbatoo GODAASSI yayyiyoogaa aggoppa” giyoogaadan nuuni oottiyoogee keehi loꞌꞌo.—Lee. 23:17. w18.10 9 ¶14-15

Xoossaa asay siiquwan dummatidi erettiya, ayyaanaaban so asa mala. (1 Yoh. 4:21) He siiqoy issi issitoo oottiyo gitabaa xallan gidennan, qoodin wurenna, haratussi qoppiyoogaa bessiya haasayaanne oottiyo kehabaa mala, ubbatoo oottiyo guuttabankka qonccees. Nuuni haratussi kehiyoonne qoppiyo wode, ‘Xoossay siiqiyo naatudan A milatoos.’ (Efi. 5:1) Yesuusi wottiyoobi baynna ogiyan ba Aawaa milatiis. I hagaadan giis: “Daafuranchchatoo, deexuwaa tookkiyaageetoo, ubbati taakko haa yiite; taani inttena shemppissana. Taani ashkkenne wozanappe kauyyiyaagaa.” (Maa. 11:28, 29) Nuuni Kiristtoosa leemisuwaa kaallidi ‘hiyyeesatuyyo qoppiyo’ wode, saluwan deꞌiya nu Aawan nashettoosinne gita ufayssaa demmoos. (Maz. 41:1) Nuuni son, gubaaꞌiyaaninne haggaazuwan haratussi qoppiyoogan eta siiqiyoogaa ubbato bessoos. w18.09 28 ¶1-2

Daafabay gakkiyo wode, Xoossaa asay bantta ishantta koshshiyaaban maaddiyoogan Xoossaara oottana danddayoosona. Leemisuwawu, eti qohettidaageeta miishshan maaddoosona. (Yoh. 13:34, 35; Oos. 11:27-30) Hara ogee qassi geeshshiyoogan woy zaarettidi keexxiyoogan maaddiyoogaa. Diꞌoy I keettaa laalido, Poolandde biittaa michchiyaa Gabriꞌela mata gubaaꞌiyaappe ishantti yiidi maaddido wode ufayttaasu. A hagaadan gaasu: “Taani taayyo xayidabaa haasayanawu koyikke; hegee aquwaaba. SHin taani demmido darobaa yootana koyays. He hanotay Kiristtaane gubaaꞌiyaa yara gidiyoogee dumma maatanne keehi ufayssiyaaba gidiyoogaa taani ammanettanaadan oottiis.” Daafabay gakki simmin maaduwaa demmida darotussi hegaadan siyettees. Hegaadan maaddiyoogan Yihoowaara issippe oottiyaageetikka keehi ufayttoosona.—Oos. 20:35; 2 Qor. 9: 6, 7. w18.08 26 ¶12

Nuuni nu wozanaa mintti naaganawu, qohiyaabaa shaakki erananne hegaappe nuna eesuwan naagana koshshees. “Minttada naaga” geetettidi birshshettida qaalay naagiya uri oottiyoobaa nuna hassayissees. Kawuwaa Solomona wode, naagiyaageeti katamaa gimbbiyaa bolli eqqidi naagoosona; qassi eti qohiyaabay yiyoogaa beꞌikko alaahoosona. Hegaa qoppiyoogee Seexaanay nu qofaa moorennaadan teqqanawu ay oottana bessiyaakko akeekanaadan maaddees. Beni wode, naagiyaageeti katamaa penggiyaa naagiya asatuura hashetidi oottoosona. (2 Sam. 18:24-26) Eti morkkee matattiyo wode penggeti gorddettanaadan oottiyoogan katamay naagettanaadan issippe maaddoosona. (Nah. 7:1-3) Geeshsha Maxaafan loohida nu kahay naagiya uradan oottananne Seexaanay nu wozanaa, hegeekka nu qofaa, nuussi siyettiyaabaa, nuna denttettiyaabaa woy nu amuwaa mooranawu baaxetiyo wode nuna yeꞌꞌe gaana danddayees. Qohiyaabay deꞌiyoogaa nu kahay nuuyyo yootiyo wode ubban, hegaappe haakkanawu nuussi danddayettida ubbabaa oottana koshshees. w19.01 17 ¶10-11

Issi uri ba qofaadan woy biittaa wogaadan gidennan, Xoossaa Qaalaa kaallidi yelagatubaa kuuyana bessees. (2 Xim. 3:16, 17) Hegaa mala wogay sunttettana danddayiya ishantti sunttettennaadan diggana danddayees. Issi biittan, gubaaꞌiyawu oottiya gooba ishawu gita aawatettay imettiis. He yelaga ishaa gubaaꞌiyaa cimati I Geeshsha Maxaafan cimatuppe koyettiyaabay odettidaagaa bessiyaagaadan oottiyoogaa maayikkonne, I sunttettanaadan oottibookkona. Gubaaꞌe cimatuppe amarida gasttati he ishay yelaga milatiyo gishshawu cima gidana danddayenna giidi qoppidosona. He ishay yelaga milatiyo gishsha xallawu sunttettibeennaagee azzanttiyaaba. Alamiyan dumma dumma heeran daroti hegaadan qoppiyoogaa irpporttee bessees. Nuuni nu qofan ammanettiyoogaappe Geeshsha Maxaafan ammanettiyoogee keehi koshshiyaaba! Yesuusawu azazettiyoonne beꞌiyooban haratubaa kuuyennan aggiyo ogee hegaa xalla.—Yoh 7:24. w18.08 12 ¶16-17

Imeeliyaaninne moobayliyan kiitaa sohuwaara yeddiyoogee qohiyo harabaykka deꞌees. Nu oosuwaa issi issi biittati shaakkidi woy muleera teqqidosona. Nuna ixxiyaageeti yashissanawu woy nuuni issoy issuwaa ammanennaadan oottanawu giigida oduwaa eriiddi he biittatun yootana danddayoosona. Kase Sooviyeete giyo kawotettan hanidabaa qoppa. KGB giyo, geeman oottiya poliseti erettida amarida ishati Yihoowa asaa aatti immidobadan odettanaadan oottidosona. Daroti he worddo oduwaa ammanido gishshawu, Yihoowa dirijjitiyaappe shaahettidosona. Hegee keehi azzanttiyaaba! Guyyeppe daroti simmidoogee ufayssiyaaba, shin amaridaageeti mule simmibookkona. Markkabee moorettidi bayiyoogaadan eta ammanoy bayiis. (1 Xim. 1:19) He iitabay gakkennaadan nuuni waanidi naagettana danddayiyoo? Iita oduwaa woy hanidoogawu naqaashi baynnabaa yootoppa. Eeyya asa gidoppa. Neeni tumubaa ubbaa eriyaakkonne shaakka. w18.08 4 ¶8

Beni Giriikettuwan kushiyan xaafettidaban malaatata issi mala ogiyan goꞌettokkona. Yaatiyo gishshawu, kaallidi deꞌiya oyshaa oychchana danddayoos: Yesuusi, “Taani neessi tumaa odays, hachchi neeni tanaara Gannatiyan deꞌana” yaagideeyye? Woy qassi I, “Taani neessi tumaa odays hachchi, neeni tanaara Gannatiyan deꞌana” yaagidee? Yesuusi bana kaalliyaageetussi hegaappe kase, “Asa Na7aikka, biitta giddon heezzu gallassaanne heezzu qammaa de7ana” yaagidoogaa hassaya. (Maa. 12:40; 16:21; 17:22, 23; Mar. 10:34; Oos. 10:39, 40) Hegaa gishshawu, Yesuusinne danobaa oottidaagee hayqqido gallassi Gannatiyaa bibeenna. Yesuusi Xoossay A denttana gakkanaassi amarida gallassaa “Si7ooliyan [woy “Duufuwan”]” takkiis. (Oos. 2:31, 32.) Yesuusi I kiittido ammanettidaageeti saluwaa Kawotettan aara issippe deꞌanaagawu etaara maacettidoogaa danobaa oottida hayqqana haniya he bitanee erenna. (Luq. 22:29, 30) Qassi, danobaa oottida he bitanee xammaqettibeenna. (Yoh. 3:3-6, 12) Hegaa gishshawu, Yesuusi gelido qaalay saꞌay gannatee gidiyo wode polettana. w18.12 6 ¶17-18, 20-21

Israaꞌeelati worqqaappe merettida marawu sohuwaara goynnidosona! Israaꞌeelati eriiddi azazettennan aggikkokka, eti haꞌꞌikka banttana Yihoowa bagga giidi qoppiyoogan banttana cimidosona. Aarooni eti marawu goynniyoogaa, “GODAA baalaa gallassa” yaagiis! Yihooway waatidee? I Muusessi asay ‘bantta huuphiyaa tunissiichchidoogaanne I eta azazido ogiyaappe eti eesuwan sherꞌꞌi giichchidoogaa’ yootiis. Yihooway keehi hanqqettidi kumetta deriyaa xayssanawu qoppiis. (Kes. 32:5-10) SHin, Yihooway Israaꞌeelata xayssennan agganawu qofaa qachchiis. (Kes. 32:14) Aarooni eeqaa medhdhikkonne, ba nagaraappe simmidi hara Leewatuura Yihoowa bagga gidiis. Eeqawu goynnida shaꞌan qoodettiyaageeti hayqqidosona; qassi Yihooway ba bagga gididaageeta anjjiis.—Kes. 32:27-29. w18.07 20 ¶13-16

Nuuni erettanawu baaxetana koshshiyo aybippenne aadhdhiyaabay aybee? Hegee asay alamiyaa timirttiyan, zalꞌꞌiyaaninne allaxxiyooban erettanawu koyiyoogaa gidenna. Hegee PHawuloosi hagaadan giidi qonccissidoogaa mala: “Ha77i Xoossaa eridi, ubbakka Xoossan erettiichchidi, laafanne qassi karettida ha ayyaanatukko waanidi simmeetii? Wodhdhi eqqidi, aille gididi, naa77anttuwaa etayyo haarettanau koyeetii?” (Gal. 4:9) Nuuni ubbabaa haariya ‘Xoossan erettiyoogee’ keehi gita maata! I nuuyyo mata dabbo gidanawu koyees. Issi eranchchay giidoogaadan, nuuni “I keha ayfiyan xeelliyoogeeta gidoos.” Yihooway ayyo dabbodan nuna eriyo wode, nu deꞌuwawu halchchettida waannabaa demmoos.—Era. 12:13, 14. w18.07 8 ¶3-4

Nuuni Xoossaa higgiyan goꞌettanawu, he higgeta keehi siiqananne bonchchana bessees. (Amo. 5:15) SHin waatidi hegaadan oottiyoo? Hegawu maaddiya waannabay ubbabaa Yihoowaagaadan xeelliyoogaa tamaariyoogaa. Leemisuwawu, neeni loytta xiskkanawu metootidabadan qoppa. Maanabaa, bollaa minttanawu oottanabaanne ne deꞌuwan laammanabaa haakimee neeyyo yootiis. Hegaadan oottada hegee maaddiyoogaa akeekadasa! Ne deꞌoy giiga gidanaadan haakimee maaddido gishshawu, neeni A keehi nashshennan aggakka. Hegaadankka, nuna Medhdhidaagee nagaray gattiyo qohuwaappe nuuni naagettanaadaaninne loꞌꞌo deꞌuwaa deꞌanaadan maaddiya higgeta immiis. Wordduwaa, iita maqquwaa, wuussaa, pokkobaa oosuwaa, kobaanne iita ayyaanaa oosuwaa xeelliyaagan nuuni Geeshsha Maxaafaa higgiyaa kaallidi waani goꞌettidaakko qoppa. (Lee. 6:16-19; Ajj. 21:8) Yihooway koyiyoobaa oottiyoogan nuuni daro anjjuwaa demmiyo wode, nu wozanan Yihoowanne A ogiyaa kaseegaappe aaruwan nashshoos. w18.06 17 ¶5-6

Yesuusi hayqqanaappe guuttaa kasetidi, I Yerusalaamen saꞌaa kawotettaa essana giidi bana kaalliyaageetuppe amaridaageeti naagiyoogaa akeekiis. I pawunddiyaa leemisuwaa yootidi, he qofaa suurissiis. He leemisoy “gita asi” woykko Yesuusi haahosaa biidi takkana koshshiyoogaa qonccissees. (Luq. 19:11-13, 15) Yesuusi alamiyaaban oossinne exatennaagaakka Rooma biittaa sunttatussi yootiis. PHenxxeniyaa PHilaaxoosi, “Neeni Aihuda kawoo?” yaagidi Yesuusa oychchiis. (Yoh. 18:33) Deriyaa ayssiya he bitanee Yesuusi asaa polotikaaban shabbirana danddayees giidi yayyennan aggenna. Yesuusi ba Kawotettay alamiyaa bagga gidennaagaa PHilaaxoosawu yootiis. (Yoh. 18:36) A Kawotettay saluwaagaa gidiyo gishshawu, I polotikaaban gelenna. I saꞌan oottiyoobay ‘tumatettaayyo markkattiyoogaa’ gidiyoogaa PHilaaxoosawu yootiis. (Yoh 18:37) Yesuusi ba oosuwaa akeekidoogaadan nuuni nu oosuwaa loytti akeekiyo wode, polotikaaban laꞌa kiyanawu koyiyaageetuura aybiininne exatiyaaba milatennaadan naagettoos. Yaatiyoogee metennaba waayi gidana. Yuuyidi xomoosiya issi ishay, “Nu heeran deꞌiya asay laamiyaa daroppe koyees” yaagiis. Gujjidikka hagaadan giis: “Asay ba biittaa siiqiyoogaa doommiis, qassi daroti polotikan laꞌa kiyiyoogan hanotay giigana giidi qoppoosona. Nu ishantti Kawotettaabaa minni sabbakiyoogan bantta issippetettaa naagidoogee ufayssiyaaba. Eti naaquwaanne nuna gakkiya hara metuwaa xayssanaadan Xoossaakko xeelloosona.” w18.06 4-5 ¶6-7

“Eqettiyaagaa” giyo birshshettay deꞌiyo Seexaanaa giya sunttay Ibraawetto Geeshsha Maxaafan heezzu maxaafatu, hegeetikka, 1 Hanidabaa Odiya, Iyyoobanne Zakkaariyaasa xallan deꞌees. Masee yaanaappe kase nu morkkiyaabay odettidabay darennay aybissee? Yihooway Ibraawetto Geeshsha Maxaafan Seexaanaabaanne I oottiyoobaa darobaa yootibeenna. Yihooway he maxaafata xaafissido waanna gaasoy Masiyaa erissanaassanne Xoossaa asaa akko kaalettanaassa. (Luq. 24:44; Gal. 3:24) Hegee polettiininne Masee yin, inne I erissiyo ashkkarati nuuni Seexaanaabaanne aara exatida kiitanchchatubaa eriyoobaappe daruwaa qonccissanaadan Yihooway eta goꞌettiis. Hegee bessiyaaba; ayssi giikko, Yihooway Seexaanaanne A kaalliyaageeta Yesuusa baggaaranne aara haariya tiyettidaageetu baggaara gaacci qolana. (Roo. 16:20; Ajj. 17:14; 20:10) Seexaanaa wolqqawu zaway deꞌees. Yihooway, Yesuusinne ammanettida kiitanchchati nuna maaddoosona. Eti maaddin nuuni nu morkkiyaa eqettana danddayoos. w18.05 22-23 ¶2-4

Yihooway nuuni ayfiyaa ayfiyo wode xallan nuna ba ashkkaradan xeellees. (Maa. 13:23; 21:43) Yaatiyo gishshawu, Yohaannisa 15:1-5n deꞌiya ha leemisuwan Kiristtaaneti ubbay ayfana bessiyo ayfee nuuni tamaarissin ooratta erissiyo ashkkara gidiyaageeta bessiyaaba gidenna. (Maa. 28:19) Hegaa bessiyaaba gidiyaakko, asay siyanawu koyenna heeran sabbakiyo gishshawu erissiyo ashkkara oottanawu danddayibeenna ammanettida Yihoowa Markkati Yesuusa leemisuwan odettida ayfenna turaa mara mala gidana. SHin hegaadan qoppana danddayettenna! Aybissi? Asay Yesuusa kaallanaadan nuuni giddana danddayokko. Qassi Yihooway siiqiya Xoossaa. Nuuni oottana danddayennabaa oottanaadan I oychenna. Yihooway nuna oychiyo ubbabay nuuni oottana danddayiyooba. (Zaa. 30:11-14) Yaatin, nuuni ayfana bessiyo ayfee aybee? He ayfee nuuni ubbay oottana danddayiyo ooso bessiyaaba gidiyoogee qoncce. He oosoy aybee? Hegee Xoossaa Kawotettaa mishiraachuwaa yootiyoogaa.—Maa. 24:14. w18.05 14 ¶8-9

Ha wodiyan pasttere woy qeese geetettiya woy hara bonchcho sunttan xeegettiya, haymaanootiyaa kaalettiya daroti alamiyan deꞌoosona. Koyro xeetu layttan deꞌiya bantta mala asatuugaadan, eti ‘Xoossaa tumatettaa wordduwan laammidi,’ Xoossaa Qaalan deꞌiya ‘tumatettay erettennaadan oottidosona.’ (Roo. 1:18, 25) Eti issitoo attida uri attiichchiis, shemppoy hayqqenna, hayqqida ubbay zaaretti yelettees, qassi attumay attumaara maccay maccaara mattumaa gayttiyoogaanne aqo lagge gidiyoogaa Xoossay xaasayi xeellees giyoogaa mala timirttiyaa tamaarissoosona. Polotikaa asay asaa balettanawu wordduwaa goꞌettees. Gita worddotuppe issoy asay “ubbabai saro; aibikka hanenna” giyo wode biron odettana. SHin he wode “bashshai eti qoppennan eta bolli yaana.” Ha alamiyaa hanotay keehi iita gidiyoogaa xaasayanawu eti yootiyooban nuuni cimettana koshshenna! Yihoowa “gallassai kaisoi qammi yiyoogaadan yaanaagaa [nuuni] loitti” eroos.—1 Tas. 5:1-4. w18.10 7-8 ¶6-8

Nuuni waayissiyaanne sohuwaara azzananaadaaninne hidootaa qanxxanaadan oottiya wodiyan deꞌoos. Yesuus Kiristtoosi nuna minttettanawu tiyettida ba ishanttanne ammanettidi ‘haariyaageeta’ gidida hara dorssata goꞌettees. He gubaaꞌe cimati nu ammanuwawu ‘goda’ gidokkona; shin nu ufayssawu nunaara “issippe oottiyaageeta.” Eti nuuni ufayttanaadaaninne ammanettidi deꞌanaadan maaddanawu koyoosona. (Isi. 32:1, 2; 2 Qor. 1:24) Kiitettida PHawuloosi nuuni kaallana bessiya leemiso gidiyaaba oottiis. I yedetay gakkido Tasalonqqen deꞌiya Kiristtaanetuyyo hagaadan giis: “Inttena siiqido gishshau, Xoossaa wonggeliyaa intteyyo immanaagaa xalaala gidennan, nu de7uwaakka intteyyo immanau giigi uttida; aissi giikko, intte nuuyyo daro lo77o.” (1 Tas. 2:8) Minttettiyaabaa haasayiyoogaa xallay darotoo gidennaagaa qonccissanawu, PHawuloosi Efisoona cimatuyyo hachchi gallassa xiqisiyan deꞌiyaagaa yootiis. w18.04 21-22 ¶6-8

He laꞌatettan ufayttanawunne goꞌettanawu, nuuni ‘Yihoowakko simmana,’ hegeekka A dabbo gidana bessees. (2 Qor. 3:16) Israaꞌeelati bazzuwan deꞌiyo wode banttawu Yihooway oottidobaa ayyaanaa ayfiyan xeellibookkona. Eti Gibxxe aylletettaappe mati kiyidoogaa asatettaaban goꞌettana xallawu qoppidoogan, eta wozanaynne qofay kamettidabanne muumidaba mala gidiis. (Ibr. 3:8-10) Gidoppe attin, Yihoowa ayyaanay demissiyo laꞌatettay asatetta aylletettaappe kiyiyoogaappe keehi aadhdhiyaaba. Asi daafuridi demmana giidi qoppiyo aybippenne aaruwan, Yihoowa ayyaanay nagaraanne hayquwaa aylletettaappe, qassikka worddo haymaanootiyaanne A meeziyaa aylletettaappe kessees. (Roo. 6:23; 8:2) Hegee keehi bonchcho laꞌatetta! Asi qashetti woy aylle gidi uttidikka he laꞌatettan goꞌettana danddayees.—Doo. 39:20-23. w18.04 9 ¶3-5