Tamme

He qofay kiitettidaageeta keehi minttettidoogee qoncce! Eti loytti erana xayikkonne, eta Kaalettiyaagee saꞌan deꞌiyo wodee wuranawu matiis; shin eta maaddiyaabi xayenna. Kawotettaa mishiraachchuwaa yootanaadan azazidobaa polanaadan maaddana mala eti woossiyo woosaa Yihooway ubbatoo zaarana. Qassi hegaappe simmin takkennan, eti maaduwaa demmanawu woossin Yihooway waati zaaridaakko beꞌidosona. (Oos. 4:29, 31) Ha wodiyankka hanotay hegaa mala. Nuuni ayfiyaa ayfiyoogan genccikko, Yesuusawu lagge gidoos. Qassi, nuuni Kawotettaa mishiraachchuwaa sabbakiyo wode xubbiyaabaa xoonanawu maaddana mala woossiyo woosaa Yihooway ubbatoo zaaranaagaa ammanettana danddayoos. (Pili. 4:13) Nu woosawu zaaruwaa demmiyoonne Yesuusa lagge gidiyo gishshawu Yihoowa keehi galatoos! Yihooway immiyo he imotati nuuni ubbatoo ayfiyaa ayfanaadan minttettoosona.—Yaaq. 1:17. w18.05 21 ¶17-18

Ichchashu laytta giddon, Yerusalaamen deꞌiya Ayhuda Kiristtaaneti “Godaa gallassai” matidoogaa, qassi eti bantta shemppuwaa ashshanawu katamaappe baqatanaadan Yesuusi etawu yootido malaataa akeekana. (Oos. 2:19, 20; Luq. 21:20-22) Roomati Yihoowa pirddaa Yerusalaamen polido wode, he Yihoowa gallassay 70 M.Ln. gakkiis. Ha wodiyan, ‘gitanne daroppe yashshiya’ Yihoowa gallassay matidoogaa nuuni ammananaadan oottiya gaasoy deꞌees. (Yuu. 2:11) Hananabaa yootiya Sofonaasi hagaadan giis: “GODAA gita gallassai matiis; matidikka qassi keehippe eesotees.” (Sof. 1:14) He hiraagay ha wodiyawukka hanees. Yihoowa gallassay matidoogaara gayttidaagan PHawuloosi nuuni ‘issoy issuwaara waani siiqettanaakkonne qassi loꞌꞌo oosuwaa waati oottanaakko, issoy issuwawu qoppanaadan’ yootiis. (Ibr. 10:24) Hegaa gishshawu, nu ishanttussi minttettoy koshshiyo wode ubban eta minttettanaadan nuuni kaseegaappe aaruwan etawu qoppana bessees. w18.04 20 ¶1-2

Yihooway ba asay Hidootaa Biittaa gelanaappe kase Yaasa keehi minttettiyaaba yootiis! Yihooway minttettidoy issi uraa xallaa gidennan, ba asaa citankka minttettiyaabaa yootiis. Baabiloonen omooduwan deꞌiya Ayhudata minttettiyoogaa qonccissanawu Yihooway hiraagan hagaadan giis: “Taani nenaara de7iyo gishshau yayyoppa; taani ne Xoossaa gidiyo gishshau dagammoppa. Taani nena minttana; qassi taani nena maaddana. Taani nena ta xooniya ushachcha kushiyan kaafada oiqqana.” (Isi. 41:10) Yihooway beni Kiristtaaneta minttettiis; qassi ha wodiyan deꞌiya Xoossaa asaakka minttettees. (2 Qor. 1:3, 4) Yihooway ba Naꞌaakka minttettiis. Yesuusi xammaqetti simmidi saluwaappe hagaadan giya cenggurssaa siyiis: “Taani siiqiyo ta Na7ai, tana ufaissiyaagee hagaa.” (Maa. 3:17) He qaalay Yesuusi saꞌan haggaazido wode ubban A keehi minttettiis! w18.04 16 ¶3-5

Ha wodiyan daroti Yihooway Addaama azazidobaa nabbabidi, koyidobaa oottiyo laꞌatettay Addaamessi imettibeenna goosona. Eti yaagiyoogan, dooriyo maataa goꞌettiyoogee loꞌꞌobay aybakkonne iitabay aybakko kuuyiyo maataappe aybin dummatiyaakko akeekennaagaa bessoosona. Xoossawu azazettanawu woy agganawu dooriyo laꞌatettay Addaameyyoonne Hewaaniyyo deꞌees. SHin Edene gannatiyan deꞌiya ‘loꞌꞌuwaanne iitaa erissiya mittan’ leemisettidaagaadan, aybi loꞌꞌokkonne aybi iitakko kuuyiyo maatay deꞌiyoy Yihoowa xallaassa. (Doo. 2:9) Yihooway ba azazuwan, Addaameenne Hewaana tumu laꞌatettaa ayba ogiyan goꞌettana koshshiyaakko siiquwan tamaarissiis. Nu koyro aawaynne aayyiyaa azazettennan ixxanawu dooridosona. Addaameenne Hewaana dooridobay guyyeppe etawu loꞌꞌo laꞌatettaa demissidee? Demissibeennaagee azzanttees. Seexaanay demissana giidobaa eta dooroy demissibeenna. w18.04 5-6 ¶9-12

Yihooway waayettiya ba ashkkaratussi coo qarettiyoogaaa xallan aggenna. I eta maaddanawu issibaa oottees. Leemisuwawu, Israaꞌeelati Gibxxen aylletettan waayettido wode, Yihooway eta waayiyaa beꞌidi hegaappe eta shemppissiis. Yihooway Muuseyyo hagaadan giis: ‘Taani ta asay tuggatiyo tuggaa geeshsha beꞌaasinne eti waassiyo waasuwaa siyaas. Taani eta Gibxxe biittaa asatu kushiyaappe ashshanawu wodhdhana.’ (Kes. 3:7, 8) Yihooway ba asawu qarettiyo gishshawu, I aylletettaappe eta laꞌa kessiis. Daro xeetu layttaappe guyyiyan, Hidootaa Biittan Israaꞌeelata morkketi qohidosona. Yaatin, Yihooway waatidee? “Huqqunnainne tuggai darin, eti waassiyoogaa siyidi, [I] etau qarettiis.” Zaaridikka, Yihooway ba asawu qarettiyo gishshawu, eta maaddanawu issibaa oottiis. I Israaꞌeelata morkketuppe ashshanawu daannata kiittiis.—Daan. 2:16, 18. w19.03 15 ¶4-5

Tammu Azazotuppe koyro naaꞌꞌati Israaꞌeelati Yihoowa xallawu aqanaadaaninne eeqa goynuwaappe naagettanaadan yootoosona. (Kes. 20:3-6) He azazoti Yihoowa goꞌꞌanaassi gidennan, A asaa goꞌꞌanawu imettidosona. Eti allaga biittaa eeqata goynnido wode, waayettidosona. SHin, Yihooway A asay ayyo ammanettido wodenne harata suure oyqqido wode eta anjjiis. (1 Kaw. 10:4-9) Yihoowayyo goynnoos giyaageeti I kessido maaraa bonchchenna wodenne A asaa qohiyo wode, Yihoowan gaasoyana koshshenna. Gidoppe attin, Yihooway nuna siiqeesinne nuna naaqoy gakkiyo wode erees. Aayyiyaa ba naꞌawu qarettiyoogaappe aaruwan I nuuni waayettiyo wode qarettees. I eesuwan kelttiyaa gelana xayikkonne, bantta nagaraappe simmennaageeti harata bessenna ogiyan oyqqido gishshawu, I ba keerido wodiyan eta bolli pirddana. w19.02 22 ¶13-15

Godaa Kahuwaappe kasetiya saaminttatun, nu shiiqoti darotoo Yesuusi leemiso gididi oottidobaanne I ba shemppuwaa nu gishshawu aattidi immiyoogan bana ziqqi oottidoogaa loytti qonccissoosona. Nuna metiyaabay deꞌishinkka, nuuni Yesuusi bana ziqqi oottido leemisuwaa kaalloosinne Yihoowa sheniyaa oottoos. I hayqqanaappe kasetiya gallassatun xalido xalatettaa qoppa. I bana ba morkketi mata wode kawushshanaagaa, lissuwan garafanaagaanne woranaagaa loyttidi erees. (Maa. 20:17-19) SHin, I hayqqanawu eeno giis. Wodee gakkin, I banaara Geetesemaanen deꞌiya kiitettida ammanettidaageetussi, “Denddidi hinddite; be7ite, tana aattidi immiyaagee hageeho gakkiis” yaagiis. (Maa. 26:36, 46) Olaa miishshaa oyqqida daro asay Yesuusa oyqqanawu yiido wode, I sinttawu kiyidi, I oonakko yootiis, qassi wotaaddarati kiitettidaageeta yeddanaadan I azaziis. (Yoh. 18:3-8) Yesuusi keehi maalaalissiya xalatettaa bessiis! Ha wodiyan, tiyettida Kiristtaanetinne hara dorssati xala gidiyoogan Yesuusa leemisuwaa kaallanawu baaxetoosona. w19.01 27-28 ¶7-8

Issi misiliyaa medhiya uray loꞌꞌiya dumma dumma qalamiyaa goꞌettidi misiliyaa medhdhees, hegaadankka nuuyyo ashkke gidanawu dumma dumma loꞌꞌo eeshshati koshshoosona. He eeshshatuppe amaridaageeti nu huuphiyaa ziqqi oottiyoogaa, azazettiyoogaanne xalatettaa. Xoossaa sheniyawu haarettana danddayiyay ba huuphiyaa ziqqi oottiya asa xalla. Xoossaa sheniyaappe issoy nuuni ashkke gidanaadaana. (Maa. 5:5; Gal. 5:23) Nuuni Xoossaa sheniyaa oottiyo wode Seexaanay hanqqettees. Nuuni ashkkenne keha gidikkokka, Seexaanaa alamiyaa yame gidida daro asay nuna ixxees. (Yoh. 15:18, 19) Hegaa gishshawu, nuuni Seexaanaa eqettanawu xala gidana koshshees. Ashkke gidenna asi, otorettiyaagaa, hanqquwaa suulliyaagaanne Yihoowassi azazettennaagaa. Hagee Seexaanaa loytti qonccissees. I ashkke asaa ixxiyoogee maalaalissiyaaba gidenna. Ayyo baynna loꞌꞌo eeshshati etayyo deꞌoosona. Ubba eti Seexaanay worddanchcha gidiyoogaa qonccissoosona. Ayssi giikko, Seexaanay aynne giikkonne woy ay oottikkonne, ashkke asati Yihoowawu haggaazennaadan diggana danddayenna.—Iyy. 2:3-5. w19.02 8-9 ¶3-5

Baabiloonen biittan deꞌiya asay yayyanaagaa Yihooway erees. Meedoonanne Parsse biittatu wolqqaama olanchchati Baabiloona biittan woraajjana. Yihooway he olanchchatu baggaara ba asaa Baabiloone omoodduwaappe kessana. (Isi. 41:2-4) Baabiloonetinne hara biittatu asati bantta morkkee matattidoogaa eridi issoy issuwaa, “Minna” yaaiyoogan xalanawu malidosona. Eti hegeeti banttana ashshana giidi hara eeqa xoossatakka medhdhidosona. (Isi. 41:5-7) He wode Yihooway omoodduwan deꞌiya Ayhudata, “Nenoo Israa7eelaa, ta ashkkarau [ne shoorotu mala gidennaagoo] . . . taani ne Xoossaa gidiyo gishshau dagammoppa” yaagidi woppu oottiis. (Isi. 41:8-10) Yihooway, “Taani ne Xoossaa” giidoogaa akeeka. Yihooway he wodekka eti A asa gidiyoogaa, woy qassi I eta dogibeennaagaa yootiyoogan eta minttettiis. I etawu, “Taani inttena tookkananne ashshana” yaagiis. He minttettiya qofay omooddettida Ayhudati minnanaadan maaddidoogee qoncce.—Isi. 46:3, 4. w19.01 4 ¶8

Marqqoosa 1:9-11 Yihooway saluwaappe haasayido heezzu sohotuppe koyruwaa. I, “Taani siiqiyo ta Na7ai nena; tana nebai ufaissees” yaagiis. A Aaway A siiqiyoogaanne an ammanettiyoogaa yootishin siyidoogee Yesuusa ay keena ufayssideeshsha! Yihooway yootidobay Yesuusa xeelliyaagan keehi koshshiya heezzubaa nuussi qonccissees. Koyruwan, Yesuusi A Naꞌaa. Naaꞌꞌanttuwan, Yihooway ba Naꞌaa siiqees. Heezzanttuwan, Yihooway ba naꞌaa nashshees. “Ta Na7ay Nena.” Koyro xaafettido qaalan ha qofay, “Neeni ta Naꞌaa” geetettanakka danddayees. Ha qaalatun, Yihooway ba siiqo Na7ay Yesuusi Banaara ooratta dabbotaa medhdhidoogaa qonccissiis. Yesuusi kase saluwan deꞌiyo wode, Xoossawu naꞌa gidiya ayyaana mereta. SHin, I xammaqettido wode geeshsha ayyaanan tiyettiis. He wode, ayyaanan tiyettida A Naꞌaa Yesuusayyo Xoossay tiyido Kawonne Qeese Ubbatu halaqaa gidanawu saluwaa simmiyo hidootay deꞌiyoogaa Xoossay yootiis. (Luq. 1:31-33; Ibr. 1:8, 9; 2:17) Yesuusi xammaqettiyo wode, A Aaway “Ta Na7ay nena” giidoogee aybissakko qoncce.—Luq. 3:22. w19.03 8 ¶3-4

Iita zoree daro wodiyaa takkiis. Asaa iita zoriyaa koyro zoriday Seexaanaa. Hewaananne I azinay bantta sheniyaadan deꞌikko, ufayttana giidi I eta zoriis. (Doo. 3:1-6) Seexaanaa qofay I ba xallaa siiqiyoogaa bessiyaaba. Addaameenne Hewaana, qassi sinttappe eta zerettay Yihoowayyo goynniyoogaa aggidi, baayyo haarettanaadaaninne goynnanaadan I koyiis. SHin etawu deꞌiya ubbabaa, hegeekka issuwaa issuwaassi, loꞌꞌiya ataakiltte sohuwaanne merinawu deꞌana danddayiya wottiyoobi baynna asatettaa etassi immiday Yihoowa. Addaameenne Hewaana azazettennan ixxidi, Xoossaappe haakkidoogee azzanttiyaaba. Neeni eriyoogaadan, eta gakkidabay keehi azzanttiyaaba. Mittaappe duxxida ciishshaadan, eti loddan loddan cimidi hayqqidosona. Nagaraa qanggettay eta naatakka qohiis. (Roo. 5:12) Gidikkonne, daro asay haꞌꞌikka Xoossawu haarettanawu koyenna. Eti bantta shenedan deꞌanawu koyoosona. (Efi. 2:1-3) Hanidabay hachchi gallassa xiqisiyan deꞌiya qofay tuma gidiyoogaa bessees. w18.12 20 ¶3-4

Kiitettida PHawuloosi Ibraawettonne Giriiketto qaalaa eriya tamaarida asa. (Oos. 5:34; 21:37, 39; 22:2, 3) SHin maaraara gayttidaban I alamiyaa eratettaa kaallibeenna. I kuuyiyooban Xoossaa Qaalaa kaalliis. (Oos. 17:2; 1 Qor. 2:6, 7) Hegaappe denddidaagan, PHawuloosi haggaazuwan murutabaa oottiisinne merinaa woytuwaa demmanaagaa naagiis. (2 Xim. 4:8) Xoossaa qofay ha alamiyaa qofaappe keehi aadhdhiyoogee qoncce. A qofaadan deꞌiyoogee nuuni keehi ufayttanaadaaninne nuussi keehi injjetanaadan oottees. SHin Yihooway nuuni aagaadan qoppanaadan giddenna. ‘Ammanettida wozannaama ashkkaray’ woy cimatikka nuna giddana danddayokkona. (Maa. 24:45; 2 Qor. 1:24) Kiristtaaneti ubbay bantta qofay Xoossaagaara maayanaadan oottana bessees. Nuuni hegaadan waati oottana danddayiyoo? w18.11 20-21 ¶12-13

Xoossay Ba asay bantta biitti simmoogaappe guyyiyan eti qohiya iitabaa eqettana koshshennaagaa, qassi doꞌay woy doꞌaa mala asay banttana qohees giidi yayyana koshshennaagaa Isiyaasa baggaara kasetidi yootiis. Yelagatakka cimatakka hirggissiyaabi baawa. (Isi. 11:6-9; 35:5-10; 51:3) Israaꞌeela biittaa xalla gidennan, kumetta saꞌay “abbai haattan kumiyoogaadan, . . . GODAA eriyoogan” kumanaagaakka Isiyaasi yootiis. Omooduwaappe simmiyaageeta doꞌay woy asay qohennaagaa Isiyaasi gujjidi yootiis. Eta biittan Edene ataakiltte sohuwaagaadan daro haattay goggiyo gishshawu, yan gidi palahiya kattay mokkanaagaa I yootiis. (Doo. 2:10-14; Erm. 31:12) He hiraagay polettiyoy hegaa xallaanee? Omooduwaappe simmiyaageeti maalaalissiya ogiyan paxidoogaa bessiya naqaashi baawa. Leemisuwawu, qooqetu ayfee xeellibeenna. Hegaa gishshawu, asay saho ubbaappe sinttappe paxanaagaa Xoossay qonccissiis. w18.12 5 ¶11-12

Tuman hemettiyoogee nuuni merinawu kaallanawu qoppiyoobanne aggennan oottiyooba. Nuuni ubbatoo tuman hemettanawu waatidi kaseegaappe aaruwan murttana danddayiyoo? Xoossaa Qaalaa alꞌꞌo tumaa aggennan xannaꞌanne wotta denttada qoppa. Xoossaa Qaalaa alꞌꞌo tumaa ubbatoo maanawu wodiyaa bazziyoogan tumaa shamma. Yaatiyoogan, neeni tumaa wozanappe nashshananne A mule bayzzenna mala kaseegaappe aaruwan murttana. Leemiso 23:23y, nuuni tumaa shammiyoogaa bolli, “aadhdhida eratettaa, timirttiyaanne [woy seeraanne] akeekaa” shammana koshshiyoogaakka yootees. Era xallay gidenna. Nuuni tumaa ogiyan deꞌana bessees. Nuuni akeekaa demmiyo wode, Yihooway yootiyo ubbabay issoy issuwaara maayiyoogaa akeekoos. Aadhdhida eratettay eridobaa oosuwan peeshshanaadan nuna denttettees. Issi issitoo, tumay nuuni laamettana koshshiyo ginaa bessiyoogan nuna seerees. Hegaa mala kaaletuwaa nuuni kaallana koshshees. A waagay biraappe keehi aaro.— Lee. 8:10. w18.11 9 ¶3; 11 ¶13-14

Neeyyo deꞌiya ubbabaappe keehi alꞌꞌobay aybee? Appe hiraysiyaabaara hegaa laammuutee? Yihoowassi banttana sheedhdhidi ayyo goynniyaageetussi ha oyshatu zaaroy metenna. Nuuyyo deꞌiya ubbabaappe keehi alꞌꞌobay Yihoowaara dabbotido dabbotaa; qassi hegaa nuuni aybiiranne laammokko. Saluwan deꞌiya nu Aawaara dabbotaa minttanaadan maaddida Geeshsha Maxaafaa tumaakka nuuni xoqqu oottidi xeelloos. (Qol. 1:9, 10) Gita Asttamaaree ba Qaalaa, Geeshsha Maxaafan nuna tamaarissiyo ubbabaa qoppa! I keehi koshshiya ba sunttaanne ba ufayssiya eeshshata nuussi qonccissees. I ba Naꞌaa, Yesuusa baggaara siiquwan giigissido, maalaaliya wozuwaa imotaabaa nuussi yootees. Qassi Mase Kawotettaabaa Yihooway nuussi yootees, Gannate gidiya saꞌaa laattanawu hidootanaadan oottiis. Nuuni waani deꞌana bessiyaakko I nuna tamaarissees. Hegeeti nuuni nuna Medhdhidaagaakko shiiqanaadan oottiyo gishshawu, nuuni eta xoqqu oottidi xeelloos. Eti nuuni ufayssiya deꞌuwaa deꞌanaadan maaddoosona. w18.11 3 ¶1-2

Yihoowawu ‘ubbabaykka beettiyoonne qoncciyan deꞌiyo’ gishshawu, cimmiya asay aybanne appe genttana danddayennaagaa nuuni hassayana koshshees. (Ibr. 4:13) Leemisuwawu, Hanaaneenne Saphphiira kiitettidaageeta cimmanawu bantta wozanan qoppidosona. Eti gadiyaa bayzzidi, he miishshaappe amaridaagaa xallaa kiitettidaageetuyyo ehiidosona. He aqo laggeti immiyooban daro keha gididabadan gubaaꞌiyan loꞌꞌo asa milatanawu koyidosona. SHin, Yihooway eti oottidobaa beꞌiis, qassi I bessiyaagaadan eta qaxxayiis. (Oos. 5:1-10) Yihooway wordduwaa waati xeellii? Seexaanaynne A leemisuwaa kaalliya, nagaraappe simmenna iita worddanchchati ubbay “tama abban” olettana. (Ajj. 20:10; 21:8; Maz. 5:6) Yihooway ‘worddotiya asaa mala gidennaagaa’ nuuni eroos. Qassi, “Xoossai worddotanau danddayenna.” (Qoo. 23:19; Ibr. 6:18) Yihooway ‘worddotiya inxxarssaa ixxees.’ (Lee. 6:16, 17) Nuuni an nashettanawu, tumatettawu I kessido maaraadan deꞌana bessees. w18.10 8 ¶10-13

Nena ootissiyaagee worddo haymaanootiyaa baalaa bonchchiyoogaara gayttidabawu miishshaa immanaadan nena oychchiis gaada qoppa. Neeni waatanee? Hegee hanana gakkanaashin naagiyoogaappe, Yihooway hegaa malabaa waati xeelliyaakko haꞌꞌi qoppiyoogee loꞌꞌo. Yaatiyo wode, hegaa malabay merettikko, suurebaa haasayanawunne oottanawu neeni metootakka. Ammanettidi deꞌana koshshiyoogaa kaseti qoppiyoogee eesuwan akkamettanaadan oottiyaabay merettiyo wodekka maaddana danddayees. Nuuni kumetta suuttaa woy suuttawu oyddu waanna kifiletuppe awugaanne akkamuwawu goꞌettennaadan murttikkonne, suuttaara gayttida issi issi akkamuwawu Geeshsha Maxaafay Yihoowa qofaabaa yootiyo maaraa kaallidi nuuni kuuyana koshshees. (Oos. 15:28, 29) Hegaa malabaa hosppitaaliyan qoppiyoogee bessiyaaba gidennaagee qoncce; he wode nuuni keehi sahettana danddayoos, qassi eesuwan kuuyanaadan harati iisettana danddayoosona. Haꞌꞌi neeni loytta pilggana, akkamuwawu neeni koyiyoobaa higgiyaa maaraadan xaafa wottananne ne dottoriyaara haasayana koshshees. w18.11 24 ¶5; 26 ¶15-16

Yihooway ba asaa maaddiyoogaan, eti hirggennaadan oottiyoogaaninne eta morkketuppe naagiyoogan siiqiya henttanchcha mala. Ha alamee xayanawu matido wodiyan deꞌiya nuna hegee keehi minttettees! Yihooway keehi matida iita waayiyaa wodekka hegaadan oottana. (Ajj. 7:9, 10) Hegaa gishshawu, yelaga gidin cima gidin, bollay payya gidin sila gidin, Xoossaa asay iita waayiyaa wode dagammenna woy yashshan maashenna. Eti hegaappe keehi dummatiyaabaa oottana! Eti Yesuus Kiristtoosi hagaadan giidoogaa hassayana: “Intte wozettiyo wodee matiyo gishshau, xoqqu giidi, pude xeellite.” (Luq. 21:28) Googi woy kawotettati issippe denddiyo wodekka eti hegaadan ammanettana. (Hiz. 38:2, 14-16) Xoossaa asay ammanettidi deꞌanay aybissee? Yihooway laamettennaagaa eti eroosona. I nuna Ashshiya, qoppiyaagaanne qarettiyaagaa gidiyoogaa haranttuwaa bessana.—Isi. 26:20 w18.09 26 ¶15-16

Yihooway ha xiqisiyan odido qaalaa siyidi ammanettida Israaꞌeelati ay keena minettidonaashsha! Neeni Yihoowa ashkkara gidiyo gishshawu, Yihooway nenakka wozanappe siiqiyoogaa ammanettana danddayaasa. Geeshsha goynuwaa goynniyaageeta xeelliyaagan Xoossaa Qaalay, “I neeyyo xoonuwaa immiya olanchchaa. I nenan ufaittana” yaagees. (Sof. 3:16, 17) Yihooway ba asaa ayba metoy gakkikkokka, I eta maaddanawunne minttettanawu hagaadan qaalaa geliis: ‘Hashiyan intte toohettana; kiyuwan uttidi intte baalotana. Aayyiyaa ba naꞌaa minttettiyoogaadan, taanikka inttena minttettanna.’ (Isi. 66:12, 13) Siiqiya aayyiyaa ba naꞌaa hashiyan tookkiyoogee woy ba kiyuwan utissiyoogee naꞌaa keehi woppissiyaaba! Yihooway tumuppe bawu goynniyaageeta wozanappe siiqiyoogaa hegaadan qonccissees. Neeni Yihoowawu keehi alꞌꞌonne bonchcho gidiyoogaa mule siroppa.—Erm. 31: 3. w18.09 13 ¶6-7

Beni Israaꞌeela biittaa taarikiyan bantta dosan oottiyaageeti dumma dumma wodiyan koshshidosona. (Kes. 36:2; 1 Odi. 29:5; Nah. 11:2) Ha wodiyan, neeyyo deꞌiya wodiyan, aquwaaninne eran neenikka ne dosan ne ishanttanne michchontta maaddana danddayiyo daro hanotati deꞌoosona. Neeni yaatiyo wode, keehi ufayttananne daro anjjuwaa demmana. Bantta dosan keexxiyaageeti darotoo ooratta laggeta demmoosona. SHiiquwaa Addaraashaa keexxiyo oosuwan 18 layttawu oottida michchee Marji hanotaa qoppa. Daro layttan, A amarida yelaga michchontta loohissaasu. He hanotay issoy issuwaa ayyaanaaban minttettiyo loꞌꞌo oge gidiyoogaa A akeekaasu. (Roo. 1:12) Marjo I deꞌuwan paacciyaabay gakkido wodiyan, keexxiyo oosuwan demmido laggeti O minttettidosona. Hegaa mala keexxiyo oosuwaa ne dosan ootta eray? Neeni issi hiillaa erin aggin, ne dosan oottana danddayaasa. w18.08 25 ¶9, 11

PHawuloosi hegaa xaafiyo wode, Ximootiyoosassi layttay 32 heera gidennan aggenna. SHin, PHawuloosi ayyo gita aawatettaa immiis. He zoree imettido gaasoy ayba gidinkka, he qofay qoncce. Nuuni laytta xallaa xeellidi yelaga ishanttubaa kuuyana bessenna. Yesuusawu layttay 33 gakkanaassi I oottido ubbabaa qoppa. Issi issi wogan asay yelagata bonchchenna. Hegaappe denddidaagan, gubaaꞌiyawu oottiyaagaa woy gubaaꞌe cima gidana danddayiya yelaga ishantti sunttettanaadan oottanawu cimati mammottana danddayoosona. Attuma asi gubaaꞌiyawu oottiyaagaa woy gubaaꞌe cima gididi sunttettana danddayiyo layttay hagaa keena giidi Geeshsha Maxaafay yootennaagaa cimati ubbay hassayana koshshees.—1 Xim. 3:1-10, 12, 13; Tii. 1:5-9. w18.08 11-12 ¶15-16

Loꞌꞌobaa kuuyanawu, nuuni tumubaa erana koshshees. Yaatiyo gishshawu, nuuni nabbabana koshshiya qofaa akeekan doorana bessees. (Pili. 4:8,9) Nuuni ammanettenna oduwaa Interneettiyan beꞌiyoogaaninne hanidoogaa bessiya naqaashi baynna oduwaa imeeliyaaninne moobayliyaa kiitan nabbabiyoogan nu wodiyaa coo xayssana koshshenna. Kaddidaageeti goꞌettiyo websaytiyaappe nuuni keehi naagettana koshshees. Eti Xoossaa asaa bashshiyoogaappenne tumaa geellayiyoogaappe harabaa halchchokkona. Loꞌꞌo gidenna qofay loꞌꞌo gidennabaa kuuyanaadan oottees. Balettiya qofay ne qofaanne wozanaa keehi qohana danddayiyoogaa mule xaasaya xeelloppa. Muuse wode Hidootaa Biittaa xomoosanaadan kiitettida 12 asatuppe 10ti iita oduwaa ehin hanidabaa qoppa. (Qoo. 13:25-33) Eti baynnabaa gujjidi daganttiyaabaa yootidoogee Xoossaa asaa wozanaa maashissiis. (Qoo. 14:6-10) Eti tuma gididabaa akeekiyoogaanne Yihoowan ammanettiyoogaa aggidi, iita oduwaa ammananawu dooridosona. Hegee gita eeyyatetta! w18.08 4 ¶4-5

Daro asawu issi issi loꞌꞌo eeshshati deꞌoosona. Qassi Yihoowayyo goynnennaageeti iitabaa ubbatoo oottennan aggana danddayoosona. Hegaa mala issi issi asaa neeni erennan aggakka. Etaara laggetiyoogee Yihoowaara ne dabbotido dabbotaa waati moorana danddayiyaakko nena oychcha. Eti neeni dabbotaa minttanaadan oottiyoonaa? Eta qofay aybee? Leemisuwawu, eti darotoo paashshiniyaabaa, miishshaabaa, elektiroonike miishshaabaa, wodiyaa aattiyoobaa, woy hara aquwaabaa haasayiyoonaa? Eti darotoo harata boriyoobaa woy pattenna qiriyaa haasayiyoonaa? Yesuusi, “Doonai wozana giddon kumidabaa haasayees” yaagiis. (Maa. 12:34) Ne laggeti Yihoowaara ne dabbotido dabbotaa mooranaagaa neeni akeekikko, etaara darin gayttennan agganawunne danddayettikko, hegaa mala laggetettaa muleera agganawu murtta.—Lee. 13:20. w18.07 19 ¶11

Muuseyyo layttay 80 gidido wode, Yihooway Israaꞌeelata Gibxxe aylletettaappe kessiyo aawatettaa imiis. (Kes. 3:10) Muusee lufatiyoogaa darotoo yootidi eeno geennan ixxiis. SHin, Yihooway maalaalissiyaaba oottiyo wolqqaa immiyoogan A danddayiis. (Kes. 4:2-9, 21) I Ubbaa Danddayiya Xoossaa gidiyo gishshawu, Muusa yashissidi, I eesuwan azazettanaadan oottana danddayees. SHin, Yihooway ashkke gidida ba ashkkaraa minttettida danddayanchchanne keha Xoossaa. Yaatidoogee maaddidee? Ee, keehi maaddiis! Muusee Xoossaa asaa kaalettiyoogan gooba gidiis. Yihooway ayyo ashkke gididoogaadaaninne qoppidoogaadan, ikka haratuyyo hegaa mala gidanawu baaxetiis. Neeyyo amarida aawatettay deꞌikko, ne aawatettaa garssan deꞌiyaageetuyyo qarettiyoogan, kehiyoogaaninne eta danddayiyoogan Yihoowa leemisuwaa kaalliyoogee keehi koshshiyaaba! (Qol. 3:19-21; 1 PHe. 5:1-3) Neeni Yihoowanne Muuseppe Aadhdhiyaagaa, Yesuus Kiristtoosa milatanawu baaxetiyo wode, neeni harati nena haasayissanawu yashshennaagaanne minttiyaagaa gidana.—Maa. 11:28, 29. w18.09 24-25 ¶7-10

Neeni issippetettaa minttiya loꞌꞌobawu ne ishatanne michchota denttettanawu murttiyoogee loꞌꞌoba. Neeni yaataydda deꞌikko hegee ufayssiyaaba. Hegaa ‘dooya bessada,’ woykko kaseegaappe gujjada, qassi ubbatoo oottana danddayay? (2 Qor. 6:11-13) Geeshsha Maxaafaa tumaa pooꞌoy ne shooron pooꞌanaadan kaseegaappe aaruwan baaxetiyoogee shin? Neeni kehabaa haasayiyoogeenne oottiyoogee issi shooroy tumaa dosanaadan oottana danddayees. Nena hagaadan oychcha: ‘Ta shooroti tana waati xeelliyoonaa? Ta keettaanne gibbiyaa geeshshatettan ta shooron loꞌꞌo leemiso gidiyaanaa? Ta huuphen qoppada harata maaddiyaanaa?’ Hara ishatuuranne michotuura haasayaydda eta dabbota, shoorota, etaara oottiyaageeta woy tamaariyaageeta eta kehatettaynne loꞌꞌo eeshshay waati maaddidaakko oychchiyoogee loꞌꞌo. Neeni loꞌꞌobaa siyana danddayaasa.—Efi. 5:9. w18.06 24 ¶13-14

Erissiyo ashkkaraa Isxxifaanoosa shuchchan caddidaageetunne eta mala haratu hanotay hegaa bessees. (Oos. 6:8, 12; 7:54-60) Bantta haymaanootiyawu mishettiyaageeti asa woriyoogaa mala iita danuwaa oottidi eti awu goynnoos giyo Xoossaa higgiyaa kanttiyoogee ayba boozabee! (Kes. 20:13) Eta kahay eta baletti kaalettidoogee qoncce! Kahay maara loohana xayikko hanana danddayiyaabay aybee? Nu kahay goꞌꞌennaba gidennaadan waatidi naagana danddayiyoo? Xoossaa Qaalan deꞌiya higgetinne maarati “tumatettaa tamaarissanau, balaa seeranau, mooruwaa suurissanaunne xillotetta de7uwau zoriyaa immanau maaddoosona.” (2 Xim. 3:16) Hegaa gishshawu, nuuni Geeshsha Maxaafaa minni xannaꞌiyoogee, I yootiyoobaa wotti dentti qoppiyoogeenne hegaa oosuwan peeshshiyoogee nu kahay Xoossaa qofaa keehi akeekidi nuna loytti kaalettanaadan maaddana danddayees. Yihoowa higgetinne maarati nu kahaa loohissanawu nuna waati maaddiyaakko ane beꞌoos. w18.06 16-17 ¶3-4

Rooma wotaaddarati beni goꞌettiyo bisoy 50 santi meetire aduqqees. He wotaaddarati bantta bisuwaara galla galla meezetiyo gishshawu, A loytti goꞌettoosona. PHawuloosi Xoossaa Qaalaa Yihooway nuussi immido bisuwaara geeddarssiis. SHin nuuni nu ammanuwawu exatiyo wode woy nu qofaa suurissiyo wode, hegaa loytti goꞌettiyoogaa tamaarana koshshees. (2 Qor. 10:4, 5; 2 Xim. 2:15) Seexaanaanne daydanttata yayyiyo gaasoy baawa. Eti keehi wolqqaama, shin xoonettennaba gidokkona. Qassi eti hayqqoosona. Mati, Kiristtoosa SHaꞌu Layttaa Haaruwaa wode, eti mule qaaxxennaadan qashettana, hegaappe simmin eti xayana. (Ajj. 20:1-3, 7-10) Nuuni nu morkkiya shaakkidi eroos; qassi A maqquwaanne A qofaakka eroos. Yihooway maaddin, nuuni A eqettana danddayoos! w18.05 30-31 ¶19-21

Addaamee shooshshay haasayana danddayennaagaa eriyoogee qoncce. Hegaa gishshawu, I ayyaana meretay shooshshaa baggaara Hewaano haasayissiis giidi qoppennan aggenna. (Doo. 3:1-6) Addaameenne Hewaana he ayyaana meretaabaa aynne erennaba milatoosona. Gidikkokka, Addaamee saluwan deꞌiya ba siiqo Aawaa bolli makkalidi ha ayyaana meretaara exatiis. (1 Xim. 2:14) Sohuwaara, Yihooway Addaamanne Hewaano balettida he iita morkkee wurssettan xayanaagaa yootidi, abaa qonccissiyoogaa doommiis. SHin, shooshshaa baggaara haasayida he ayyaana meretay Xoossaa siiqiyaageeta guutta wodiyawu eqettana danddayiyoogaakka Yihooway yootiis. (Doo. 3:15) Yihooway ba aadhdhida eran ba bolli makkalida he kiittanchchaa sunttaa mule odibeenna. Qassi koyro makkalaappe simmin 2,500 gidiya layttay aadhdhanaashin Xoossay he morkkiyaabaa qonccissiya sunttaa yootibeenna.—Iyy. 1:6. w18.05 22 ¶1-2

Asay siyanawu darin koyenna heeran haggaaziyo gishshawu ne wozanay shuggikko, ne hanotay kiitettida PHawuloosaagaa mala gidana danddayees. I haggaazido 30 gidiya layttan daroti Kiristtoosi erissiyo ashkkara gidanaadan maaddiis. (Oos. 14:21; 2 Qor. 3:2, 3) Gidikkokka, I daro Ayhudati tumu goynuwaa goynnanaadan maaddana danddayibeenna. Ubba daroti PHawuloosa eqettidosonanne yedettidosona. (Oos. 14:19; 17:1, 4, 5, 13) Ayhudati oottido he iitaban PHawuloosawu aybi siyettidee? I, “Taani tumaa haasayais; taani Kiristtoosabaa; . . . Ta wozanan daro qaretainne aggenna qofai de7ees” yaagiis. (Roo. 9:1-3) PHawuloosawu hegaadan siyettidoy aybissee? I sabbakiyoogaakka asaakka keehi siiqiyo gishshataassa. PHawuloosi Ayhudatussi wozanappe qoppees; qassi eti Xoossaa maarotaa ixxis gin azzaniis. PHawuloosaagaadan nuunikka asawu wozanappe qoppiyo gishshawu sabbakoos.—Maa. 22:39; 1 Qor. 11:1. w18.05 13 ¶4-5

Harata minttettiyo aawatettay deꞌiyoogeetussikka minttettoy koshshiyoogaa PHawuloosi yootiis. Roomen deꞌiya Kiristtaanetussi I hagaadan giis: “Taani inttena minttettanau, inttenaara issippe Ayyaanaa imuwaa shaakkana mala, inttena be7anau laamotais. Taani giyoogee, inttekka taakka issi wode minettana. Intte ta ammanuwan, qassi taanikka intte ammanuwan minettana.” (Roo. 1:11, 12) Ee, PHawuloosi harata loytti minttettiis; qassi issi issitoo ayyookka minttettoy koshshiis. (Roo. 15:30-32) Bantta goꞌꞌaa aggi bayidi deꞌiyaageeta galatana koshshees. Minttettoy koshshiyo harati “Godaa ammaniya asaa” ekkanaadan woy gelanaadan yootiya zoriyaa azazettiyo gishshawu aqo oyqqibeenna ishanttanne michchontta. (1 Qor. 7:39) Qassi, yedetaa woy sahuwaa genccidi ammanetti deꞌiya Kiristtaanetussi minttettoy koshshees.—2 Tas. 1:3-5. w18.04 21 ¶3-5