Masqqala

Yesuusi Marttissinne Mayraamissi siyettiyaabaa akeekiis. Eta ishay Alꞌꞌaazari hayqqido gishshawu eti keehi azzanidoogaa beꞌidi, “Yesuusi afuxxiis.” (Yoh. 11:32-35) I yeekkidoy hegaappe simmin ba mata laggiyaara gayttenna gishsha xallaassa gidenna. Yesuusi Alꞌꞌaazara denttanaagaa erees. Yesuusi yeekkidoy Alꞌꞌaazari hayqqidoogee A mata laggeta ay keena azzanttidaakko akeekido gishshataassa. Yesuusi asawu qarettiyoogaa eriyoogee nuna keehi minttettees. Aagaadan wottiyoobi baynna ogiyan nuuni qarettennaagee qoncce. SHin, I haratussi qarettido gishshawu nuuni A siiqoos. I Xoossaa Kawotettawu Kawo gididi haariiddi deꞌiyoogaa eriyoogee nuna minttettees. I mata wode meto ubbaa xayssana. Yesuusi asa gididi saꞌan deꞌido gishshawu, Seexaanaa haaroy ehiido tuggaappenne waayiyaappe asaa ashshanawu ooppenne aaruwan I maaddana danddayees. “Nuuni daafuriyo wode nuuyyo qarettanau” danddayiya Kawoy nuussi deꞌiyoogan nuuni anjjettida.—Ibr. 2:17, 18; 4:15, 16. w19.03 17 ¶12-13

Nuuni harati Xoossaabaa tamaaranaadan maaddikkonne, waannatiya oosuwaa oottiyay nuna gidokko. (1 Qor. 3:6, 7) Asaa baakko ehiyay Yihoowa. Issi uri mishiraachchuwaa siyanaadan woy siyennan ixxanaadan oottiyay A wozanaa hanotaa. (Maa. 13:4-8) Daro asay Yesuusi yootidobaa siyibeennaagaa hassaya; qassi I saꞌan deꞌida ooppenne aadhdhiya gita asttamaare! Hegaa gishshawu, nuuni eta maaddanawu maliyo daro asay mishiraachchuwaa siyennan ixxikko, nuuni hidootaa qanxxana bessenna. Nuuni haggaazuwan asawu siyettiyaabaa akeekiyo wode, ufayssiya ayfiyaa demmana. Sabbakiyo oosuwan nuuni kaseegaappe aaruwan ufayttana. Nuuni immiyoogan beettiya aaro ufayssaa demmana. Qassi “merinaa de7uwaassi” suure koshshay deꞌiyoogeeti mishiraachchuwaa metootennan siyanaadan nuuni oottoos. (Oos. 13:48) Hegaa gishshawu, “oottanau nuuni danddayiyoorin, asa ubbau lo77obaa oottoos.” (Gal. 6:10) He wode, saluwan deꞌiya nu Aawaa bonchchissiyoogan nuuni ufayttana.—Maa. 5:16. w19.03 25 ¶18-19

Kawuwaa Daawiti, “GODAI gita; aaro galatai ayyo bessees” yaagiis. (Maz. 145:3) I Yihoowa siiqiis; qassi he siiqoy I ‘maabaraa shiiquwan’ Xoossaa sabbanaadan denttettiis. Ha wodiyan, nuuni Yihoowa sabbiyo issi ogee Kiristtaane shiiqotun zaariyoogaana. Nu shiiqotun dumma dumma zaaruwaa siyiyoogan nuuni ubbay ufayttoos. Yelaga naati wozanappe zaariyo qantta zaaroy nuna ufayssees. Issi uri tumaa waatidi eridaakko ufayttidi yootiyoogaa siyiyoogee nuna keehi minttettees. Qassi dungguuxa woy nu qaalaa biron tamaariyaageeta gididaageetikka, xalidi zaariyoogaa nuuni nashshoos. (1 Tas. 2:2) Eti baaxetido gishshawu nuuni eta galatiyoogaa waati bessana danddayiyoo? Eti minttettiya zaaruwaa zaarido gishshawu shiiquwaappe simmin eta galatana danddayoos. Nuuni zaariyoogee eta galatiyoogaa bessiyo hara oge. He wode nuuni nu shiiqotun harata minttettiyoogaa xalla gidennan, nuunikka minettoos.—Roo. 1:11, 12. w19.01 8 ¶1-2; 9 ¶6

Tammu asati keehi metiya hanotan deꞌoosona. Eta inchchirichchay oyqqiis; qassi eti paxana giidi hidootan naagokkona. SHin issi gallassi, Gita Asttamaariyaa Yesuusa haahuwan eti beꞌidosona. Yesuusi ubba qommo sahuwaa pattiyoogaa eti siyidosona. Yaatiyo gishshawu, eti bantta qaalaa xoqqu oottidi, “Godaa Yesuusaa, hai nuna maararkkii!” yaagidosona. Tammu asati muleera paxidosona. Yesuusi etassi kehido gishshawu eti ubbay A nashshidoogee qoncce. Gidoppe attin, etappe issoy ba wozanan nashshidi aggibeenna; I Yesuusa nashshiyoogaa yootiis. He paxida Samaariyaa bitanee “ba qaalaa xoqqu oottidi” Xoossaa galatiis. (Luq. 17:12-19) Nuussi kehabaa oottidaageeta Samaariyaa bitaniyaadan galatanawu koyoos. Nashshiyoogan Yihooway nuussi loꞌꞌo leemiso. I hegaadan oottiyo issi ogee bana ufayssiyaageeta anjjiyoogaana. (2 Sam. 22:21; Maz. 13:6; Maa. 10:40, 41) Qassi Geeshsha Maxaafay ‘Xoossay siiqiyo naatudan A milatanaadan’ nuna minttettees. (Efi. 5:1) Hegaa gishshawu, nuuni nashshana koshshiyo waanna gaasoy Yihoowa leemisuwaa kaallanawu koyiyo gishshataassa. w19.02 14 ¶1-2; 15 ¶4

Issi yelagiyaa timirtte keettan baalaa bonchchanaadan minttettin he baalay Xoossaa ufayssennaagaa eriyo gishshawu, A hegaa oottennaagaa bonchchuwan yootaasu. Yayyiya issi yelagay sooppe soo biidi markkattiyo wode Yihoowa Markkata qilliicciya banaara tamaariya naꞌaa demmiis. Ba soo asaassi koshshiyaabaa kunttanawu minnidi oottiya issi bitanee issi gallassi worddobaa woy higgiyaa menttiyaabaa oottana mala A halaqay oychchiis. I ba oosuwaappe yedetettana danddayikkonne, Xoossay ba ashkkarati ammanettiyaageetanne higgiyawu azazettiyaageeta gidanaadan koyiyoogaa yootiis. (Roo. 13:1-4; Ibr. 13:18) Ha heezzu asatuppe ay mala eeshshaa akeekadii? Neeni xalatettaanne ammanettiyoogaa mala amaridabaa akeekana danddayaasa. SHin eti ubbaykka keehi koshshiya issi eeshsha, hegeekka suuretettaa bessidosona. Eti heezzaykka Yihoowassi ammanettiyoogaa bessidosona. Eti Xoossaa higgiyaa phalqqiyaabaa oottennan ixxidosona. Suuretettay loꞌꞌobaa oottanaadan eta denttettiis. Eti ha eeshshaa bessiyo gishshawu Yihooway etan keehi ufayttanaagee qoncce. Nuunikka etaagaadan saluwan deꞌiya nu Aawaa ufayssanawu koyoos. w19.02 2 ¶1-2

Aawu aaya baynnaageetu, amꞌꞌetunne kare biittaa asatu mala banttana naagana danddayennaageeta Higgee dummayidi naagiis. Israaꞌeela daannatuyyo hagaadan odettiis: “Kare biitta asatu pirddaanne aawu aaya bainnaageetu pirddaa geellayoppa; am77ee maayuwaa a tal77idobau gaada oiqqoppa.” (Zaa. 24:17) Deretettan naagiyaabi baynnaageetussi Yihooway qarettiyoogaa bessiis. Eta maara oyqqibeennaageeta I qaxxayiis. (Kes. 22:22-24) Yihooway I aawatettaa immidoogeeti eti heemmiyoogeeta ubbaa siiqanaadan koyees. I mattumaara gayttida danobaa ixxees; qassi ashshiya uri baynnaageeta gujjin, ubbay naagettanaadaaninne suure pirddaa demmanaadan I koyiyoogaa ammanettana danddayoos. (Wog. 18:6-30) Nuna Yihooway suure oyqqiyoogaa nuuni ammanettiyo wode, A kaseegaappe aaruwan siiqoos. Qassi nuuni Xoossaanne I kessido xillotettaa maaraa siiqiyo wode, harata siiqanawunne eta suure oyqqanawu koyoos. w19.02 24-25 ¶22-26

Seexaanaa qofan nuuni qohettennaadan nuna naaganawu waatana danddayiyaakko akeekanawu issi leemisuwaa beꞌa. ‘Nu giddon shaaramuxiyoogeenne tunatetta ubbay mulekka siyettana’ bessennaagaa Yihooway nuna tamaarissiis. (Efi. 5:3) Gidoppe attin, ooso sohuwan woy timirtte keettan nu laggeti shaaramuxiyoogaabaa haasayiyoogaa doommikko nuuni ay oottanee? Naagiyaagee, nu kahay, he qohiyaabaa xeelliyaagan nuna yeꞌꞌe gaana danddayees. (Roo. 2:15) SHin nuuni hegaa siyanee? Nuuni nu laggeti yootiyoobaa siyanawunne eti beꞌiyo misileta beꞌanawu paacettana danddayoos. SHin nuuni harabaa haasayanaadan oottiyoogan woy eta aggidi biyoogan qohuwaappe haakkana koshshees. Balabaa qoppanaadan woy oottanaadan nu laggeti denttettiyoogaa eqettanawu xalatettaa koshshees. Nuuni baaxetiyoogaa Yihooway beꞌiyoogaa ammanettana danddayoos; qassi I Seexaanaa qofaa nuuni eqettanawu koshshiya minotettaanne aadhdhida eratettaa nuuyyo immana.—2 Odi. 16:9; Isi. 40:29; Yaaq. 1:5. w19.01 17-18 ¶12-13

Hanno gakkanawu deꞌida asaappe keehi durenne keehi wolqqaama asa gidida Solomoni issibaa mali beꞌiis. I, “Ane taayyo gita ufaissaa immiyaabi aibakko, qassi de7iyo de7uwaa giddonkka lo77obi aibakko be7ana” yaagiis. (Era. 2:1-10) I keettata keexxiis, ataakiltte sohotanne uttidi shemppiyo sohota giigissiisinne ba koyido ubbabaa oottiis. Hegaappe simmin awu aybi siyettidee? Woppu giidee? Ufayttidee? Nuuni malana koshshenna. Solomoni ba oottido ubbabaa hassayidi hachchi gallassa xiqisiyan deꞌiya qofaa xaafiis. Hegee keehi wolqqaama timirtte! Neeni hegaa wozanan wottuutee? Issi issi asay ba deꞌuwan oottido balabaappenne hegaa gaasuwan gakkida waayiyaappe tamaarees. Ne bolli hegaa malabay gakkanaadan Yihooway koyenna. Neeni I yootiyoobaa siyanaadaaninne ayyo azazettanaadan koyees. Yaatanawu ammanuwaa koshshees; shin neeni ne ammanuwaa gaasuwan oottidoban mule zilꞌꞌettakka. Ee, “A sunttaa gishshawu neeni bessido siiquwaa” Yihooway mule dogenna. (Ibr. 6:10, NW) Yaatiyo gishshawu, ammanuwan mino gidanawu baaxeta; ayssi giikko, saluwan deꞌiya ne Aaway neessi aybippenne loꞌꞌobaa amottiyoogaa neeni akeekana.—Maz. 32:8. w18.12 22 ¶14-15

Ayyaanaabaa qoppiya uri Xoossan ammaneesinne issibaa Xoossaagaadan xeellanawu malees. I kaaletuwaa demmanawu Xoossaakko xeelleesinne awu azazettanawu murttees. (1 Qor. 2:12, 13) Daawiti hegawu loꞌꞌo leemiso. I, “Ta GODAU, ta de7uwaa saamai nena; tana koshshiya ubbaa neeni taassi immaasa” yaagidi yexxiis. (Maz. 16:5) He “saamai” Daawiti baqati attiyo soho oottido Xoossaara dabbotido dabbotaa. (Maz. 16:1) Hegaappe denddidaagan, I, ‘Ta shemppoy ufayttees’ yaagiis. Ee, Xoossawu mata dabbo gidiyoogaappe aaruwan Daawita ufayssiyaabi baawa. (Maz. 16:9, 11) Bantta deꞌuwan ufayssaanne duretettaa koyiyaageeti Daawitaagaadan ufayttokkona. (1 Xim. 6:9, 10) Intte Yihoowan ammaniyoogeenne awu haggaaziyoogee ufayssaanne woppaa demissana. Ammanuwan intte kaseegaappe aaruwan waani minnana danddayeetii? Intte Yihoowa Qaalaa nabbabana, I medhdhido loꞌꞌiyaabata loytti xeellananne I inttena siiqiyoogaa gujjin, A eeshshatubaa qoppana bessees; hegee intte aara wodiyaa aattiyoogaa mala.—Roo. 1:20. w18.12 25 ¶7-8

PHawuloosi aqo deꞌuwaabaa yootidoy beꞌidobaappe denddidi gidenna. He xiqisee Kiristtaaneti bantta aqo deꞌuwaa alꞌꞌobadan, xoqqu oottidi xeellanaadan azazees, ubbakka mintti yootees. Neeni aqo deꞌuwaa, ubba qassi aqo oyqqidaba gidikko, ne aqo deꞌuwaa hegaadan xeellay? Aqo deꞌuwaa bonchchiyoogan, inttessi loꞌꞌo leemiso gidiyaageeti deꞌoosona. Yesuusi aqo deꞌuwaa bonchchiis. Machchiyo yeddiyoogaa xeelliyaagan Parisaaweti Yesuusa oychchido wode, I Xoossay koyro aqo deꞌuwaabaa yootidobaa hagaadan giis: “Hegaa gishshau, issi asi ba aawaanne ba aayyiyo aggi bayidi, ba machcheera issippe de7ees.” Yesuusi gujjidi, “Xoossai issippe gattidoogaa asi shaakkoppo” yaagiis. (Mar. 10:2-12; Doo. 2:24) Hegaa gishshawu, aqo deꞌoy Xoossay doomissidobanne ubbatoo minnidi deꞌana bessiyaaba gidiyoogaa Yesuusi yootiis. Xoossay koyro aqo deꞌuwaa doomissido wode, I Addaameenne Hewaana paraman shaahettana danddayiyoogaa yootibeenna. Issi asi issi ura xallaa ekkanaadan woy gelanaadan Edenen he aqo deꞌuwan maaray eqqiis; qassi eti “naa77ai” duuxxenna issippetettan deꞌoosona. w18.12 10-11 ¶2-4

Nuuni tumaa koyro erido wode, Yihooway nuuppe koyiyoobata azazettiyoogee keehi koshshiyoogaa tamaarida. SHin, nuuni ayyaanaaban dicci dicci biyo wode, Yihoowa qofaabaa, hegeekka I dosiyoobaa, I ixxiyoobaanne dumma dummabaa I xeelliyo ogiyaa kaseegaappe aaruwan tamaaroos. Yihoowaagaadan qoppiyoogaa tamaariyoogee ufayssiyaaba gidikkonne, metiyaaba gidanakka danddayees. Nu bala qofay nuna issi issitoo metana danddayees. Leemisuwawu, shaaramuxiyoogaa, aquwaa siiqiyoogaa, sabbakiyo oosuwaa, bessenna ogiyan suuttaa goꞌettiyoogaa woy harabaa xeelliyaagan Yihoowa qofaa akeekanawu metootana danddayoos. Yaatin, nuuni ay oottana danddayiyoo? Xoossaagaadan qoppiyoogaa waati gujji gujji meezetana danddayiyoo? Nuuni Xoossaa Qaalaa xannaꞌana, A qofaa akeekana, hegaa wotti dentti qoppananne issibaa aagaadan xeellanawu minni oottana koshshees. w18.11 23-24 ¶2-4

Imbbaaqoomi keehi metiyaanne paacciya wodiyan deꞌiis. He wode kobattiya iita asay kumido gishshawu, I keehi azzaniis. Eta iitatettay awude xayanee? Yihooway hegaa giigissennan daro takkidoy aybissee? Imbbaaqoomi beꞌiyoobay A biittaa asay pirddaa geellayiyoogaanne naaqqiyoogaa xalla. I aynne oottana danddayennabadan qoppiis. Hegaa gishshawu, I he xuma wodiyan Yihooway ashshanaadan woossiis. Imbbaaqoomi Yihoowa hegee qofissibeenna giidi qoppiyoogaa doommennan aggenna. Yihooway eesuwaara giigissennaba milatiis. Neeyyookka hegaadan siyetti erii? Imbbaaqoomi Yihoowan ammanettiyoogaa aggidee? I Xoossay qaalaa gelidobaa ammaniyoogaa aggidee? Mule aggibeenna! I ba metuwaanne bana qofissidabaa asassi gidennan Yihoowawu yootidoogee I hidootaa qanxxibeennaagaa bessees. Xoossay keerido wodiyaa, woy qassi hegaa keena waayee A bolli gakkanaadan Yihooway eeno giidoy aybissakko I akeekana danddayenna gishshawu unꞌꞌettidoogee qoncce. w18.11 14 ¶4-5

Moliyaa oyqqiya PHeexiroosinne Inddiraasi ‘asa oyqqiyaageeta’ gidanaadan Yesuusi eta shoobbido wode, eti ‘bantta gitiyaa yeggi bayidoosona.’ (Maa. 4:18-20) Ha wodiyan tumaa tamaariya daroti bantta oosuwaa aggi bayana danddayennaagee tuma. Issi uri oottananne ba soo asawu koshshiyaabaa kunttana koshshees. (1 Xim. 5: 8) SHin, tumaa tamaariyaageeti eti aquwaabaa xeelliyo ogiyaanne eti kaseyiyoobaa issi issitoo laammana bessees. Mariya golfiyaa kaaꞌiyoogan keehi erettidaaro gidada daro miishshaa demmanawu halchchaasu. He wode Mariya Geeshsha Maxaafaa xannaꞌiyoogaa doommaasu. Tumay maaddin ba deꞌuwan laamettidoban A ufayttaasu. Ayyaanaabaanne aquwan duretiyoogaa ubbatoo issippe qoppiyoogee O metanaagaa Mariya akeekaasu. (Maa. 6:24) A ba deꞌuwan ubbatoo golfiyaa kaassan erettanawu, duretanawunne hayttatanawu halchchidoogaa aggabayaasu. A haꞌꞌi aqinye gidada haggaazawusunne “aybippenne aaruwan ufayssiya, loꞌꞌo deꞌo” gaada A yootiyo deꞌuwaa deꞌawusu. w18.11 5 ¶9-10

Yesuusi bawu layttay 30 gidiyo wode, tamaarissiyoogee he oosuwaappe aadhdhiyoogaa eriyo gishshawu, anaaxe miishshata aggi bayiis. Xoossay A ha saꞌaa kiittido issi gaasoy Xoossaa Kawotettaa mishiraachchuwaa yootanaassa gidiyoogaa I yootiis. (Maa. 20:28; Luq. 3:23; 4:43) Yesuusi tamaarissiyoogaa ba deꞌuwan sinttayiis, qassi I banaara harati he oosuwaa oottanaadan koyiis. (Maa. 9:35-38) Nuuni anaaxe waayi gidana; shin nuuni mishiraachchuwaa tamaarissiyaageeta. He oosuwaa Xoossaykka oottiyo gishshawu hegee keehi koshshiyaaba; nuuni ubba ‘Xoossaara issippe oottiyaageeta’ geetettoos. (1 Qor. 3:9; 2 Qor. 6:4) Nuuni ‘Yihoowa qaalay tuma’ gidiyoogaa eroos. (Maz. 119:159, 160) Nuuni haggaazuwan “tumatettaa qaalaa suuretettan” yootanawu koyiyoy hegaassa. (2 Xim. 2:15) Yaatanawu, nuuni Yihoowabaa, Yesuusabaanne Kawotettaabaa tumaa tamaarissanawu goꞌettiyo waanna miishshaa, Geeshshaa Maxaafaa goꞌettiyoogan qara gidanawu ubbatoo baaxetoos. w18.10 11 ¶1-2

Issi azinay baassi huuphe gidida Yesuusi Kiristtoosa leemisodan xeelliyo wode, A machchiyaa A wozanappe ‘bonchchanaadan’ I maaddees. (Efi. 5:22-25, 33) A ba azinaa bonchchiyoogee ayyo qoppanaadan O denttettana. Aawaynne aayyiyaa issoy issuwawu qoppiyo wode, bantta naatussi loꞌꞌo leemiso gidoosona. Eti bantta naati haratussi qoppanaadaaninne kehanaadankka tamaarissana koshshees. Leemisuwawu, naati SHiiquwaa Addaraashan woxerettennaadan aawaynne aayyiyaa tamaarissana danddayoosona. Issippe wodiyaa aattiyoosan qumawu salppido salppiyan naati banttappe cimata kaseyanaadan eta yelidaageeti yootana danddayoosona. Issi naꞌi geella penggiyaa dooyiyoogaa mala nuussi qoppiyoogaa bessiyaabaa oottiyo wode, nuuni he naꞌaa galatana bessees. Yaatiyoogee naꞌaa ufayssees; qassi I “ekkiyaagaappe immiyaagee” keehi ufayttiyoogaa eranaadan maaddees.—Oos. 20:35. w18.09 29 ¶5-6

Haariiddi deꞌiya nu Kawoy Yesuus Kiristtoosi immiyo kaaletoy nuna haꞌꞌikka sinttappekka maaddees. Yaatiyo gishshawu, mati laamettidabaa meezetiyoogan demmido goꞌꞌan ufayttoos. Gubaaꞌiyaa shiiquwaara woy haggaazuwaara gayttidaagan laamettidabay nena waati goꞌꞌidaakko intte soo asaa goynuwan tobbiyoogee nena minttettana danddayees. Yihoowa dirijjitee kessiyo kaaletuwaa kaalliyoogee goꞌꞌiyo darobaa nuuni hassayikko, he kaaletuwaa kaallanawu metootokko, qassi ufayttoos. Attamiyo xuufeta poxxidoogee miishshaa qoraphphanaadan oottiyoogaa nuuni akeekoos; qassi ooratta tekinolojiyaa goꞌettiyoogee Kawotettaa oosuwaa kumetta saꞌan aassanaadan maaddees. Hegaa gishshawu, elekitronikiyan giigida xuufeta, muuziqaanne biiduwaa danddayettida keenan kaseegaappe loytti goꞌettiyaageeta gidoos. Yaatiyoogan, dirijjitiyaa aquwaa Kiristtoosaagaadan akeekan goꞌettanawu qoppiyoogaa bessoos. Nuuni Kiristtoosa kaaletuwaa wozanappe kaalliyo wode, haratu ammanoynne nu issippetettay minnanaadan oottoos. w18.10 25-26 ¶17-19

Nuuni Xoossaagaadan qarettiyo wode, unꞌꞌettida ura woosaa Xoossay zaariyo oge gidana danddayoos. (2 Qor. 1:3-6) SHin ayyaanaaban neessi ishanne michcho gididaageeti wottiyoobi baynna asa gidanaadan naagoppa. Eta bessiyaagaadan xeella. Ne ishantta bali baynna asadan xeelliyoogee bessennaba, qassi hegee neeni azzananaadan oottana. (Era. 7:21, 22) Yihooway ba ashkkaratuppe koyiyoobay bessiyaaba gidiyoogaa hassaya. Nuuni A leemisuwaa kaallikko, haratu balaa danddayanawu giigettidaageeta gidana. (Efi. 4:2, 32) Eti bessiyaagaa keena oottennabadan qoppanaadan oottiyoogaappe, eti oottiyooban eta galata. Hegee eta minttettana danddayees. Harata wozanappe galatiyoogee eti siiquwan minnanaadan oottananne eti bantta geeshsha goynuwan keehi ufayttiyoobaa demmanaadan maaddana danddayees. Haratuura geeddarssidi azzanttiyoogaappe hegaadan oottiyoogee keehi loꞌꞌoba.—Gal. 6:4. w18.09 16 ¶16-17

Xoossay azazidobaa oottiyoogee Yesuusawu ayyaanaabaa quma. Hegee aybin quma malee? Nuuni loꞌꞌo qumaa miidi ufayttiyoogaadaaninne nu bollay minniyoogaadan, nuuni Xoossaa sheniyaa poliyo wode nu wozanay minnees, qassi nu ammanoy merinaa deꞌuwaa demissiyaagaa keena minnees. Aadhdhida eratettay Xoossay azazidobaa oosuwan peeshshiyoogaa. (Yaaq. 3:13) Aadhdhida eratettaa woytuwaa demmanawu baaxetiyoogee bessiyaaba. “Neeni demmanau amottiyo ubbai aadhdhida eratettaara likkettenna. . . . I bana oiqqiyaageetussi de7o mitta; a mintti oiqqiya ubbatikka anjjettidaageeta.” (Lee. 3:13-18) Yesuusi, “Intte hegaa eridi oottiyaabaa gidikko anjjettidaageeta” woy ufayttiyaageeta yaagiis. (Yoh. 13:17) Erissiyo ashkkarati Yesuusi azazidobaa ubbatoo oottikko, eti merinawu ufayttana. Eti I tamaarissidobaanne A leemisuwaa kaallidoy azazido he wode xallaana gidenna. Eti bantta deꞌuwan hegaadan oottidosona. w18.09 4 ¶4-5

Koyro azinaynne machchiyaa Edene gannatiyan banttarkka deꞌikkokka, eti harata goꞌꞌiyaabaa qoppanaadan Xoossay azazuwaa etawu immiis. Yihooway Addaamanne Hewaano anjjiis; qassi eti corattanaadan, saꞌaa kumanaadaaninne haaranaadan yootiis. (Doo. 1:28) Xoossay I medhdhido meretaa goꞌꞌiyaabaa qoppidoogaadan, Addaameenne Hewaana biron yelettibeenna bantta naata ufayssiyaabaa qoppana bessees. Addaamenne Hewaani zerettay kumetta saꞌaa gannate oottanawu issippe oottanaadan I koyiis. Hegee gita ooso! Wottiyoobi baynna attuma asatinne macca asati kumetta saꞌaa Gannate oottiyoogee Yihooway ba halchchidobaa poliyo wode aara wozanappe hashetiyoogaa giyoogaa; yaatiyoogan eti A shemppo sohuwaa gelana. (Ibr. 4:11) He oosoy ay keena woppissiyaabanne ufayssiyaaba gidanaakko qoppa! Harata goꞌꞌiyaabaa minni oottiyoogee etawu gita anjjuwaanne woppaa demissana. w18.08 18 ¶2; 19-20 ¶8-9

Ne sunttaa mooridi nena asi mootiyaakko shin? Yesuusanne xammaqiya Yohaannisa hegaa mala metoy gakkiis. (Maa. 11:18,19) Worddo oduwaa siyidi Yesuusi waatidee? I shatimmana giidi ba wodiyaanne wolqqaa ubbaa wurssibeenna. SHin I oottidonne tamaarissido tumubaa asay akeekanaadan minttettiis. Yesuusi yootidoogaadan, “aadhdhida eratettai ba oosuwan tuma gididi beettees.” Nuuni tamaarana bessiya goꞌꞌiyaabay hegan deꞌees. Issi issitoo asay nubaa yootiyoobay bessennaba woy bore gidana danddayees. Nuuni suure pirdda demmanawunne moorettida nu sunttaa geeshshanawu issibaa oottanawu keehi koyennan aggokko. SHin nuuni oottana danddayiyoobay deꞌees. Issi uri nubaa worddobaa yootikko, hegaa ooninne ammanennaadan oottiya deꞌo deꞌana danddayoos. Yesuusa deꞌoy bessiyoogaadan, nuuni suure Kiristtaane gididi deꞌiyo deꞌoy muleera tuma gidennanne worddo mooto gidida oduwaa qucci geeshshana danddayees. w18.08 6 ¶11-13

Azazettibeenna asatubaa hegeekka, Qaayeelabaa, Solomonabaanne Siinaa Deriyaa matan deꞌiya Israaꞌeelatubaa yootiya Geeshsha Maxaafaa taarikee issi mala gidiyoobay deꞌees. He asati bantta ‘nagaraappe simmidi’ laamettana danddayoosona shin. (Oos. 3:19) Balabaa oottidaageetun Yihooway sohuwaara hidootaa qanxxenna. Yihooway Aaroonawu atto giis. Ha wodiyan, Yihooway Geeshsha Maxaafaa baggaara, Geeshsha Maxaafaa qofay deꞌiyo xuufetu baggaara woy nu mala Kiristtaaneti kehatettan yootiyo zoriyaa baggaara nuuni akeekanaadan oottana danddayees. Nuuni he zoriyaa oosuwan peeshshiyo wode, Yihooway nuna maariyoogaa ammanettoos. Yihooway aaro kehatettaa bessiyo gaasoy deꞌees. (2 Qor. 6:1) Hegee nuuni ‘nagara oosuwaanne ha saꞌaa amuwaa agganaadan’ oottees. (Tiitu 2:11-14) Ha wurssetta gallassan, nuuni Yihoowawu ammanettiyoogee paacettanaadan oottiyaabay ubbatoo gakkees. Yaatikko, Yihoowa bagga gididi deꞌanawu murttoos! w18.07 21 ¶20-21

Nuuni alamiyan erettiyoogaappe, Yihoowan erettana mala koyanawu murttidoogan waanidi yaa minnana danddayiyoo? Yaatanawu, nuuni naaꞌꞌu gitabaa hassayana koshshees. Koyruwan, Yihooway baassi ammanettidi oottiyaageeta awudenne erees. (Ibr. 6:10; 11:6) I ba ashkkarata ubbaa wozanappe nashshees, qassi ayyo ammanettidaageeta yeggi aggiyoogaa “worddanchcha” gidiyoobadan xeellees. I “xillotu ogiyaa erees”; qassi paaciyaappe eta waati ashshanaakkokka erees. (Maz. 1:6; 2 PHe. 2:9) Naaꞌꞌanttuwan, Yihooway nuna eriyoogaa, nuuni mule qoppibeenna ogetun bessana danddayees. Asa bessana xallawu loꞌꞌobaa oottiyaageeti Yihoowappe ayba woytonne demmennaagee odettiis. Aybissi? Eti bantta kumetta woytuwaa ekkidosona. (Maa. 6:1-5) Gidoppe attin, eti haratussi oottido loꞌꞌobay erettibeenna asata ba Aaway ‘geeman beꞌiyoogaa’ Yesuusi yootiis. Yihooway he oosota akeekees, qassi ubbaassi bessiya woytuwaa immees. w18.07 9 ¶8, 10

PHeexiroosi baayyo Xoossay yootana koyidobaa akeekibeenna. He wode, Qornneliyoosi kiittido asati gakkidosona. PHeexiroosi geeshsha ayyaanaappe kaaletuwaa ekki simmidi, kiitaa ehiida asatuura Qornneliyoosa soo biis. PHeexiroosi beꞌidoba xallan kuuyidaba gidiyaakko, I mule Qornneliyoosa soo gelenna. Ayhudati Ayhuda gidenna asa soo gelokkona. PHeexiroosi lagiiddi aybissi biidee? PHeexiroosi beꞌido ajjuutaynne geeshsha ayyaanay minttettidoogee A denttettiis. PHeexiroosi Qornneliyoosi yootiyoobaa siyi simmidi hagaadan giis: “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa galatiyoogaa taani tumu akeekaas.” (Oos. 10:34, 35) PHeexiroosi keehi maaddiya oorattabaa akeekido gishshawu ufayttiis! w18.08 9 ¶3-4

Nuuni Xoossay ixxiyo oosuwaakko shiiqennan deꞌana danddayoos. SHin, Geeshsha Maxaafan dumma azazoy baynna hara oosoti woy deꞌo ogeti deꞌoosona. Hegaa malaban Xoossay koyiyoobaanne A ufayssiyaabaa waatidi erana danddayiyoo? Geeshsha Maxaafan loohida nu kahay hegaa mala hanotan maaddees. Geeshsha Maxaafan loohida nu kahawu kaaleto gidiya maarata Yihooway nuussi siiquwan immiis. I, “Taani GODAI, ne Xoossai, nena maaddiyaabaa tamaarissiyaagaa. Neeni baanau bessiya ogiyankka nena kaalettiyai tana” yaagees. (Isi. 48:17, 18) Geeshsha Maxaafaa maaraabaa nu wozanan qoppiyoogee, nu kahaa suurissees, kaaletteesinne giigissees. Hegee qassi nuuni loꞌꞌobaa kuuyanaadan maaddees. Maaray qoppanabawu woy oottanabawu baaso gidiya keehi koshshiya tuma woykko kaaleto. Issi maaraa akeekanawu higgiyaa Immidaagaa qofaanne I higgeta immido gaasuwaa akeekana koshshees. w18.06 17 ¶5; 18 ¶8-10

‘Heeroodisa bagga’ gidida, he yohuwaa denttida asati Yesuusi he giiray bessennaba giikko, asay makkalanaadan denttettees giidi A mootana danddayoos giidi qoppidosona. Qassi Yesuusi giirana koshshees giikko, A kaalliyaageeti Ayyo exatennan aggana danddayoosona. Yesuusi giiraaban oossinne exatibeenna. I, “Qeesaaraagaa Qeesaarassi, Xoossaagaa Xoossaassi immite” yaagiis. (Maa. 22:21) Giiraa shiishshiyaageeti balibakkiyoogaa Yesuusi erees. SHin I keehi koshshiya yohuwaappe, tumuppe shemppissana Xoossaa Kawotettaappe, ba qofaa sherꞌꞌi oottanawu koyibeenna. Yaatiyoogan, I bana kaalliya ubbatussi leemiso gidiis. Issi qofay ay keena likke woy suure milatikkonne eti polotikaaban gelana koshshenna. Kiristtaaneti Xoossaa Kawotettaanne A xillotettaa koyoosona. Eti yaatoosonappe attin, suure gidenna issi issibaa denttidi palamettokkona woy naaquwaa eqettokkona. (Maa. 6:33) Daro Yihoowa Markkati kase banttawu polotikaaban deꞌiya mino qofaa aggidosona. w18.06 6 ¶9-11

Seexaanay ammanettibeenna kiitanchchata pokkobaa ootissana xallawu gidennan, asaa haariyo maataa immanawukka paaccennan waayi aggana. A halchchoy yaana geetettida ‘maccaasee zerettay’ yiyoogaa digganaassa gidennan aggenna. (Doo. 3:15) I ay qoppinkka, Yihooway Bashshaa Haattaa ehiyoogan A halchchuwaa ubbaa halissiis; hegee he wode Seexaanaynne makkalida kiitanchchati koyidobay hanennaadan teqqiis. Pokkobaa cimuwaa woy babaa xallaa qoppiyoogaa qohuwaa mule xaasaya xeelloppa. Seexaanaara exatida kiitanchchati Xoossaa sinttan keehi daro wodiyawu oottidosona. SHin, daroti iitabaa amottidosonanne he amoy etawu keehi wolqqaamiis. Hegaadankka, Xoossaa dirijjitiyawu saꞌaa baggan nuuni daro layttaa haggaazennan aggokko. SHin, ayyaanaaban ha geeshshasan deꞌishin nu wozanay iitabaa amottana danddayees. (1 Qor. 10:12) Nu wozanaa ubbatoo qoriyoogee, pokkobaa qoppennan aggiyoogeenne otoruwaa teqqiyoogee keehi koshshiyaaba!—Gal. 5:26; Qol. 3:5. w18.05 25 ¶11-12

Ayhudati Kawotettaa mishiraachuwaa siyennan ixxin PHawuloosi azzaniis. Gidikkokka, I etaban hidootaa qanxxibeenna. I Ayhudatuban bawu siyettiyaabaa Roome Kiristtaanetussi xaafido dabddaabbiyan woygidaakko akeeka: “Taani Israa7eela asaayyo ta kumetta wozanaappe amottiyoogeenne Xoossaa woossiyoogee eti attanaassa; aissi giikko, eti Xoossau oottanau keehi koyiyoogaa taani markkattais; shin eti Xoossau oottanau keehi koyiyo koshshai tumu eratettaappe gidenna.” (Roo. 10:1, 2) Koyruwan, PHawuloosi aggennan Ayhudatussi aybissi markkattidaakko yootiis. I ba ‘kumetta wozanaappe amottiyoogee’ hegawu denttettidoogaa yootiis. I amarida Ayhudati attanaadan wozanappe koyiis. (Roo. 11:13, 14) Naaꞌꞌanttuwan, PHawuloosi etawu ‘Xoossaa woossiyoogaa’ yootiis. Ayhudati Kawotettaa mishiraachchuwaa siyidi ekkanaadan Xoossay maaddana mala I wozanappe woossiis. Heezzanttuwan, PHawuloosi gujjidi, “eti Xoossau oottanau keehi koyiyoogaa” yootiis. I asay Yihoowawu haggaazana danddayiyoogaa bessiya eta loꞌꞌo hanotaa akeekiis. Wozanaa koshshay likkebaa gidiyoogee suure asay mishettidi Kiristtoosa kaallanaadan oottanaagaa PHawuloosi loytti erees. w18.05 13 ¶4; 15-16 ¶13-14

Nuuni ubbay haratuyyo ‘koshshiyaabaa’ eranawu akeekanchcha gidana bessees. PHawuloosi Ibraawe Kiristtaaneta hagaadan zoriis: “Intte arggaacida kushiyaanne intte daafurida gulbbataa minttettite. Wobbiya tohoi paxanaappe attin, burqqenna mala, sitta ogiyan hemettite.” Nuuni haratu kushiyaanne gulbbataa minttettana danddayoos. (Ibr. 12:12, 13) Yelagata gujjin, nuuni ubbay haasayiyooban issoy issuwaa minttettana danddayoos. PHawuloosi ha zoriyaa zoriis: “Kiristtoosan intte de7iyo de7oi inttena gasttissii? A siiqoi inttena minttettii? Geeshsha Ayyaanaara intteyyo issippetettai de7ii? Intte issoi issuwaayyo keheetiinne qaretteetii? Yaatikko, intte qofan, siiquwan, wozanaaninne qofaa poluwan issuwaa gididi, tana wurssi ufaissite. Inttena siiqiyoogan woikko ceeqettanau koyiyo hada amuwan issibaanne oottoppite; shin issoi issuwaappe gitatais yaagidi qoppennan, issoi issuwaayyo intte huuphiyaa kaushshite. Qassi issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Pili. 2:1-4. w18.04 22 ¶10; 23 ¶12

Yihooway nuna Yesuusa baggaara nagaraanne hayquwaa aylletettaappe kessido tumu gaasoy nuuni “Xoossaa ailledan” ayyo aqidi deꞌanaadaana. Nu laꞌatettaa bessenna ogiyan goꞌettidi zaarettidi alamiyaabaa qaaqqawunne amuwawu aylle gidenna mala naagettanaadan keehi maaddiyaabay ayyaanaabaa oosuwan sheekkiyoogaa. (Gal. 5:16) Leemisuwawu, Nohanne A soo asaa qoppa. Eti kobaynne pokkobaa haniyoogee kumido alamiyan deꞌidosona. SHin eti bantta yuushuwan deꞌiya asay qaaqqatiyoobaanne oottiyoobaa qullibookkona. Eti hegaadan hananawu waani danddayidonaa? Eti Yihooway banttassi immido, markkabiyaa keexxiyo, banttassinne mehiyawu doꞌawu miyoobaa dagayiyoonne harati naagettanaadan yootiyo oosuwaa minnidi oottidosona. “Nohee ubbabaakka Xoossai azazidoogaadan oottiis.” (Doo. 6:22) Hegee ay demissidee? Noheenne A soo asay he alamee xayiyo wode attidosona.—Ibr. 11:7. w18.04 10 ¶8; 11 ¶11-12

Seexaanaynne dayddanttati “sa7a ubbaa” balettanawu kawotettatu xalla gidennan, worddo haymaanootiyaanne zalꞌꞌe dirijjitiyaakka goꞌettoosona. (Ajj. 12:9) Seexaanay worddo haymaanootiyaa baggaara Yihoowabaa wordduwaa yootees. Qassi, Dabloosi bawu danddayettida keenan daro asaappe Xoossaa sunttaa genttanawu murttidaba milatees. (Erm. 23:26, 27) Hegaappe denddidaagan, Xoossawu wozanappe goynnoos giidi qoppiyaageeti cimettidi daydanttatussi goynnoosona. (1 Qor. 10:20; 2 Qor. 11:13-15) Seexaanay zalꞌꞌe dirijjitetu baggaarakka wordduwaa yootees. Leemisuwawu, ha alamee darotoo daro ufayssaa demissiya keehi loꞌꞌobay miishshaanne daro aquwaa shiishshiyoogaa giidi asaa tamaarissees. (Lee. 18:11) He wordduwaa ammaniyaageeti bantta deꞌo layttan Xoossaassi gidennan, “miishshaassi” haarettoosona. (Maa. 6:24) Takkidi, aquwaa siiqiyoogee eti Xoossaa siiqennaadan oottees.—Maa. 13:22; 1 Yoh. 2:15, 16. w18.05 23 ¶6-7