Xiqimita

Nuuni Yihoowaagaadaanne Yesuusaagaadan asaa wozanaabaa erana danddayokko. SHin, haratuyyo siyettiyaabaanne etawu koshshiyaabaa akeekanawu baaxetana danddayoos. (2 Qor. 11:29) Nuuni bantta xallaa siiqiya alamiyaa asaadan hanokko; nuuni ‘nu huuphe xalaalaa goꞌꞌiyaabaa koyiyoogaappe issoi issuwaa goꞌꞌiyaabaa koyanawu’ baaxetoos. (Pili. 2:4) Gubaaꞌiyaa cimati haratuyyo siyettiyaabaa akeekana koshshees. Eti heemmanaadan banttawu imettida dorssatuban oyshettanaagaa eroosona. (Ibr. 13:17) Cimati bantta ishanttanne michchontta maaddanawu qarettana koshshees. Cimati haratussi siyettiyaabaa akeekiyoogaa waatidi bessana danddayiyoonaa? Haratussi siyettiyaabaa akeekiya cimay ba gubaaꞌiyan deꞌiya ishanttuuranne michchonttuura wodiyaa aattees. I oyshata oychchees, yaatidi eti wozanappe yootiyoobaa danddayan ezggees. Ubba qassi, he alꞌꞌo dorssatuppe issoy ba wozanaabaa yootanawu koyidi, gaanabay ixxin metootiyo wode I danddayan ezggiyoogee koshshiyaaba. (Lee. 20:5) Issi cimay ishanttuura wodiyaa aattikko, eti kaseegaappe aaruwan an ammanettoosona, aara dabbotoosonanne siiqettoosona.—Oos. 20:37. w19.03 17 ¶14-17

Nashshiyoogee loꞌꞌo qumaa mala; qumaa issippe miyo wode keehi ufayssees. Nuuni oottidobaa gishshawu harati galatiyo wode, nuuni ufayttoos. Nuuni galatiyo wode, harati ufayttanaadan oottoos. Nu nashshiyo uri I nuussi oottidobay nuna maaddidoogaa woy nuussi koshshiyaabaa immidi maaddidoogaa erees. Hegaappe denddidaagan, nunaaranne aara deꞌiya dabbotay minnees. Hachchi gallassa xiqisee giyoogaadan, galatiyoogee xoqqu ootti xeelliyooba. Biraa bolli tigido worqqaa alleeqoy ay keena loꞌꞌiyaakko qoppa! Hegee keehi maaddiyaaba gidanaagaa qoppa! He imotay neessi imettiyaakko neeyyo aybi siyettanee? Neeni harata galatiyoogee hegaadan maaddiyaaba gidana danddayees. Hagaa qoppa: Worqqaa alleeqoy keehi daro wodiyawu deꞌana danddayees. Hegaadan, neeni galatiyoogee hassayettiyaaba gidana danddayees; qassi neeni galatido uri ba deꞌo laytta ubban hegaa xoqqu oottidi xeellees. w19.02 15 ¶5-6

Aybi loꞌꞌokkonne aybi iitakko maaraa ooni kessana koshshees giidi qoppeetii? Addaameenne Hewaana loꞌꞌuwaanne iitaa erissiya mitta ayfiyaa miido wode, eti Yihoowabaanne I kessido maarata waati xeelliyaakko bantta oosuwa3n qoncciyan bessidosona. Loꞌꞌuwaanne iitaa xeelliyaagan eti banttawu maaraa kessidosona. SHin etappe halidabaa qoppite. Yihoowaara dabbotido dabbotay etappe haliis. Etappe merinaa deꞌoykka haliis, qassi eti nagaraanne hayquwaa bantta naata laatissidosona. (Roo. 5:12) Toophphiyaa mureessay ayyo Piliphphoosi sabbakido wode oottidobaanne Addaameenne Hewaana oottidobaa geeddarssite. Mureessay Yihoowaynne Yesuusi ayyo oottidobaa keehi nashshiyo gishshawu, I sohuwaara xammaqettiis. (Oos. 8:34-38) Nuuni he mureessaagaadan nuna Xoossawu sheedhdhidi xammaqettiyo wode, Yihoowabaanne I kessido maarata waati xeelliyaakko nu oosuwan qoncciyan bessoos. Nuuni Yihoowaynne Yesuusi nuussi oottidobaa gishshawu nashshiyoogaa bessoos. Nuuni Yihoowan ammanettiyoogaanne loꞌꞌuwaanne iitaa xeelliyaagan maaraa kessana koshshiyay A gidiyoogaa akeekiyoogaakka bessoos. w19.03 2 ¶1-2

Xoossaa ashkkarati suuretettaa waatidi bessiyoonaa? Nuuni aggennan Yihoowa wozanappe siiqiyoogaappe denddidaagan, muletoo A ufayssiyaabaa oottiyoogaana. Geeshsha Maxaafan “suuretettaa” geetettidi birshshettida Ibraawetto qaalay kumetta woy polo giyoogaa. Leemisuwawu, Yihoowassi yarshshiyo mehee tilla bollaara deꞌiyaagaa gidana bessiyoogaa yootees. (Wog. 22:21,22) Xoossaa asay ha Higgiyaa naagennan aggidi wobbiyaa, qooqiyaa, tulliyaanne hargganchcha mehiyaa yarshshana koshshenna. Qassi Yihoowassi tilla bollaara deꞌiya woy payya mehiyaa yarshshiyoogee keehi koshshiyaaba. (Mil. 1:6-9) Yihooway tilla bollaara deꞌiyaagaa woy payyaa koyiyoy aybissakko nuuni akeekana danddayoos. Nuuni ataakilttiyaa, maxaafaa, woy hara miishshaa shammiyo wode, moorettidabaa woy paccidabi deꞌiyoobaa shammanawu koyokko. Kumettaa woy payyaa shammanawu koyoos. Yihooway nuuni A kumetta wozanaappe siiqanaadaaninne ayyo polo ammanettanaadan koyees. Hegee kumetta woy polo gidana bessees. w19.02 3 ¶3

Nu wozanaa mintti naaganawu, qohiyaabaa teqqiyoogaa xalla gidennan loꞌꞌobaakka ekkana bessees. Beni gimbbiyan direttida katamaa penggiyaa naagiyaagee morkkee katamaa gelennaadan teqqanawu katamaa penggeta gorddees; shin hara wode kattaanne harabaa katamaa gelissanawu I penggeta dooyees. Penggeti mule dooyettennaba gidikko, kataman deꞌiyaageeti namisettana. Hegaadankka, nuuni Xoossaa qofay nuna ubbatoo maaddanaadan nu wozanaa dooyana koshshees. Geeshsha Maxaafan Yihoowa qofay deꞌiyo gishshawu, nuuni A nabbabiyo wode ubban nu qofaa, nuussi siyettiyaabaanne nuuni oottiyoobaa Yihoowa qofay maaddanaadan eeno goos. Geeshsha Maxaafaa nabbabiyoogan nuuni waani loytti goꞌettana danddayiyoo? Woosay keehi koshshiyaaba. Woosay Xoossaa Qaalan deꞌiya ‘maalaalissiyaabaa beꞌanaadan’ maaddees. (Maz. 119:18) Qassi nuuni nabbabiyoobaa wotti dentti qoppana koshshees. Nuuni woossiyo wode, nabbabiyo wodenne wotti dentti qoppiyo wode Xoossaa Qaalaa ‘nu wozanan wottoos,’ qassi Yihoowa qofaa siiqoos.—Lee. 4:20-22. w19.01 18 ¶14-15

Yihooway nu abbeenne hanotay dumma dumma gidiyoogaa erees; qassi nuuni ayyo yarshshiyo yarshshuwaa I loytti nashshees. I Israaꞌeelatuppe ekkido yarshshota qoppa. Issi issi Israaꞌeelati dorssaa woy deeshshaa yarshshidosona. SHin, hiyyeesa Israaꞌeelati “naa77u haraphpheta buubata, woikko naa77u mara haraphpheta” immana danddayoosona. Issi Israaꞌeela asi naaꞌꞌu kafota immanawu danddayennaba gidikko, Yihooway “issi kilo giraame liiqo xiilliyaa” ekkiis. (Wog. 5:7, 11) Xiilliyaa waagay hirayso gidikkonne, “liiqo xiilliyaa” yarshshuwaa Yihooway nashshees. Keha Xoossay ha wodiyankka hegaadan qoppees. Nuuni qofaa immiyo wode, I nu ubbay Aphiloosadan luxidi haasayiyaageetanne PHawuloosadan yooti ammanttiyaageeta gidanaadan naagenna. (Oos. 18:24; 26:28) Yihooway nuuni nu wolqqa keena qofaa immanaadan koyeesippe attin, nu wolqqappe daruwaa koyenna. Naaꞌꞌu bakkannaa immida amꞌꞌiyo qoppa. A ba danddayido keena ubbaa immido gishshawu, Yihooway O nashshiis.—Luq. 21:1-4. w19.01 8-9 ¶3-5

Nuuni Kiristtoosa kaalliyo gishshawu asan ixettana giidi naagoos. Yesuusi ba erissiyo ashkkarata wurssetta gallassan wolqqaama yedetay gakkanaagaa yootiis. (Maa. 24:9; Yoh. 15:20) Nu morkketi nuna ixxiyoogaappe harabaakka oottanaagaa Isiyaasa hiraagay yootees; eti dumma dumma ola miishshaa nu bolli denttana. Eti nubaa worddobaa yootiiddi tuma milatissananne qohiya yedetaa nu bolli gattana danddayoosona. (Maa. 5:11) Yihooway nu morkketi he ola miishshata nu bolli denttennaadan diggenna. (Efi. 6:12; Ajj. 12:17) Gidikkokka, nuuni yayyana koshshenna. Nu bolli denttiyo ‘ayba miishshinne mule kantti kiyennaagaa’ Yihooway yootiis. (Isi. 54:17) Wolqqaama uushuwaappe goday nuna naagiyoogaadan, Yihooway ‘meqetti baynna asaa hanqquwaappe’ nuna naagees. (Isi. 25:4, 5) Nu morkketi nuna qohiiddi takkiya aybanne oottikko etawu polettenna. (Isi. 65:17) Xoossaa asaa morkketi ubbay “kasekka bainnabaadan hanidi xayana.”—Isi. 41:11, 12. w19.01 6-7 ¶13-16

Yelagatoo, Yihooway laꞌatettaa siiqees; qassi inttekka hegaa siiqanaadan oottiis. SHin, he laꞌatettay inttena naagana mala intte akeekan hegaa goꞌettanaadan I koyees. Pornograafiyaa beꞌiya woy shaaramuxiya, daafaban yeggiya ispporttiyaa oottiya, woy jallissiyaabaa goꞌettiyaanne ushshaa likkiyaappe aattidi uyiya harata intte erennan waayi aggana. Eti guutta wodiyawu ufayttana danddayiyoogee qoncce. SHin he meezeti darotoo asay hargganaadaaninne hayqqanaadan oottoosona, qassi eti amale gidoosona. (Gal. 6:7, 8) Hegaa malabaa oottiya yelagati laꞌa gididabadan qoppana danddayikkonne, laꞌa gidokkona. (Tii. 3:3) Gidoppe attin, Geeshsha Maxaafay yootiyo maarata kaalliyoogaa gaasuwan sahettida aappun asa eray? Yihoowawu azazettiyoogee nuuni payya gidanaadaaninne laꞌa gidanaadan oottiyoogee qoncce. (Maz. 19:7-11) Qassi neeni Xoossay kessido wottiyoobi baynna higgetussinne maaratussi azazettiyoogan ne laꞌatettaa akeekan goꞌettiyo wode, neeni aawatettay imettiyo asa gidiyoogaa Xoossawukka nena yelidaageetussikka bessaasa. Geeshsha Maxaafay, “Xoossaa naati ailletettaappe kiyido bonchcho kessaa” yaagiyo, wottiyoobi baynna laꞌatettaa, Xoossay baayyo ammanettidi haggaaziyaageetuyyo wurssettan immanawu halchchiis.—Roo. 8:21. w18.12 22-23 ¶16-17

Addaame nagaray darobay laamettanaadan oottiis. Hegeetuppe issoy aqo deꞌoy qohettanaadan oottiya hayquwaa. Kiitettida PHawuloosi Kiristtaaneti Muuse Higgiyaa garssan deꞌennaagaa qonccissiyo wode yootidobaappe nuuni hegaa akeekana danddayoos. I aqo laggeta shaakkiyay hayqo gidiyoogaanne paxa deꞌiya aqo laggee hegaappe simmin aqo oyqqana danddayiyoogaa qonccissiis. (Roo. 7:1-3) Xoossay Israaꞌeelatussi immido Higgee aqo deꞌuwaabaa loytti qonccissees. Xoossay Israaleelatussi Higgiyaa immanaappe kasekka deꞌiya dawuttiyo meezee Higgiyan paqqadettiis. Gidoppe attin, dawuttiyoogee qohuwaa gattennaadan Higgee teqqees. Leemisuwawu, Israaꞌeela asi ashkkariyo ekkidi guyyeppe hara machchiyo ekkikko, I koyro machcheeyyo qumaa, maayuwaanne aqo deꞌuwan koshshiyaabaa diggana bessenna. I O naaganaadaaninne iyyo qoppanaadan Xoossay koyees. (Kes. 21:9, 10) Nuuni ha wodiyan Muuse Higgiyaa kaallokko; shin aqo deꞌuwaa Yihooway xoqqu oottidi xeelliyoogaa hegaappe akeekana danddayoos. Hegee intte aqo deꞌuwaa xoqqu ootti xeellanaadan maaddennee? w18.12 10 ¶3; 11 ¶5-6

Imbbaaqoomi bana hirggissiyaabaanne qofissiyaabaa Yihoowawu yooti simmidi, Yihooway woyganaakko qoppennan aggenna. Yihooway qarettiyaanne qoppiya Aawa gidiyo gishshawu, I wozanappe magannidobawu A seeribeenna. Imbbaaqoomi waayettidoogaanne maaduwawu woossidoogaa I eriis. Makkalanchcha Ayhudatuyyo odidoban, mati hananabaa Yihooway Imbbaaqoomawu yootiis. He iita wodiyaa wurssettay matattidoogaa Yihooway koyro odidoy Imbbaaqoomassa gidennan aggenna. Yihooway giigissana haniyoogaa Imbbaaqoomawu yootiis. He makkalanchchanne iita yeletay qaxxayettana wodee keehi matiis. Yihooway “intte wodiyan” giyoogan, hananabaa yootiyaagee paxa deꞌishin woy A wode deꞌiya asay paxa deꞌishin he pirddaa ehaanaagaa yootiis. Yihooway zaaridobay Imbbaaqoomi mule qoppibeennaba. Ayyo danddayettennan ixxin woossidoogawu hagee zaaroo? Yihooway ayyo yootidobay Yihudan waayee yaa gujjanaagaa bessees. w18.11 15 ¶7-8

Xoossay “asai ubbai attanaadaaninne tumatettaa eranaadan” koyees. (1 Xim. 2:4) Hanno gakkanawu tumaa eribeenna ubba qommo asaara gayttidaagan ne xeelay aybee? Kiitettida PHawuloosi Xoossaabaa guuttabaa eriyaageeta Ayhuda woosa keettan koyikkonne, I yootidoy Ayhuda asaa xallaassa gidenna. I eeqawu goynniyaageetussikka sabbakiis. PHawuloosi misoonaawe oosuwawu koyro biido wode, Barnnaabaasaara Lisxxira katamaa biis. Yan deꞌiya Liqaaꞌooniyaa biittaa asay PHawuloosinne Barnnaabaasi asappe aadhdhiyaabadan qoppidi yayyidosona; qassi Diyaanne Hermmeesa giyo bantta eeqatu sunttan eta xeesidosona. PHawuloosinne Barnnaabaasi sabettido gishshawu ufayttanawu paacettidonaa? Hegee eti hegaappe kase biidi xomoosido naaꞌꞌu katamatun eta gakkida yedetaappe shemppanaadan oottiyaaba milatanddee? Eti hegee mishiraachchuwaa yootanawu maaddana danddayiyaabadan qoppidonaa? Akkay! Eti bantta maayuwaa pooshshidi asaa giddo woxxiiddi, “Hagaa aissi ootteetii? Nuunikka inttenadan merettida asa” yaagidi sohuwaara eqettidosona.—Oos. 14:8-15. w18.09 4-5 ¶8-9

Tumaa ekkanawunne Geeshsha Maxaafay yootiyo kandduwaa maaraadan deꞌanawu nuuni qoppiyoobaaninne oottiyooban laamettanawu eeno gaana bessees. He laamettiyoobaa xeelliyaagan PHeexiroosi woygidaakko akeeka. I, “Xoossau azazettite; intte kase erennan amottido amuwaa kaalloppite. SHin . . . intte ooso ubban geeshsha gidite” yaagiis. (1 PHe. 1:14-16) Daro asay pokkobaa haniyo Qoronttoosa katamaa asati tumaa shammanawu bantta deꞌuwan keehi laamettidosona. Ha wodiyan, tumaa tamaariyo wode daroti hegaadan laamettoosona. PHeexiroosi hagaadan giidi hegaa qonccissiis: “Aihuda gidenna asai oottanau dosiyoogaa intte oottiiddi, shaaramuxanau qaaqqatiyoogan, amuwan, mattuwan, yettan, ushshan, pokkiya eeqau goinniyoogan, de7ido kase aadhdhida wodee intteyyo gidana.”—1 PHe. 4:3. w18.11 6 ¶13

“Merinaa deꞌuwaassi suure wozanaa koshshay deꞌiyoogeeti” oonakko waati erana danddayiyoo? Koyro xeetu layttaagaadan, he asata demmana danddayiyoy markkattiyoogaa xallaana. Hegaa gishshawu, “Intte geliyo kataman woi qeeri kataman ubban inttena mokkanau ufaittiyai oonakkonne akeekan xomoosite” yaagidi Yesuusi azazidoogaadan nuuni oottana koshshees. (Maa. 10:11) Cimmiya, otorettiya, woy ayyaanaabaa koyenna asay mishiraachchuwaa siyana giidi nuuni naagokko. Nuuni tumanchcha, banttana ziqqi oottiyaanne ayyaanaabaa saamettida asata koyoos. Yesuusi anaaxe gididi geella son goꞌettiyoobaa, penggiyaa gorddiyoobaa, qambbaraa, woy harabaa oottanawu haniya mittaa koyidoogan hegaa leemisana danddayoos. I haniya mittaa demmikko, oosuwawu goꞌettiyo miishshaa ekkidi, ba hiillaa goꞌettananne miishshaa medhdhana danddayees. Wozanaa suure asata erissiyo ashkkara oottanawu baaxetiyo wode, nuunikka hegaa malabaa oottana bessees.—Maa. 28:19, 20. w18.10 12 ¶3-4

Hanotay laamettikkonne aggennan haggaaziyoogan, wonggeliyaa mishiraachchuwaa yootiya Piliphphoosi loꞌꞌo leemiso gidees. Yerusalaamen wolqqaama yedetay denddin Isxxifaanoosi hayqqiis. He wode, Piliphphoosi ooratta haggaazo maataa demmiis. (Oos. 6:1-6) SHin Kiristtoosa kaalliyaageeti laalettido wode, Piliphphoosi aynne oottennan coo uttidi naaganawu koyibeenna. He wode, dariya baggan mishiraachchoy odettibeenna Samaariyaa kataman sabbakanawu I biis. (Maa. 10:5; Oos. 8:1) Piliphphoosi Xoossaa ayyaanay A kaalettiyo soho awanne baanawu eeno giido gishshawu, asay mishiraachchuwaa siyibeenna heeran sabbakanaadan Yihooway A goꞌettiis. Daro Ayhudati Samaariyaa asaa karidosonanne maara oyqqibookkonna. SHin Piliphphoosi eta lagibeenna; qassi etassi mishiraachchuwaa mishettidi yootiis. I ‘yootidobaa daro asay keehi akeekidi siyidoogee’ garamissiyaaba gidenna. (Oos. 8:6-8) Piliphphoosi aggennan haggaazido gishshawu, anne A soo asaa Yihooway keehi anjjiis.—Oos. 21:8, 9. w18.10 30 ¶14-16

Tammu Katamaa giyo biitti Yesuusi biido wode, asay “tullenne duude gidida bitaniyaa Yesuusakko” ehiis. (Mar. 7:31-35) Yesuusi A asaa sinttan pattiyoogaappe “gaxaa kessidi” pattiis. Aybissi? Bitanee tulle gidiyoogee A cora asaa sinttan yeellayana danddayees. Hegaa akeekidi, Yesuusi A hara asi baynnasan pattiis. Nuuni maalaaliyaabaa oottidi pattana danddayennaagee qoncce. SHin, nuuni nu mala Kiristtaanetussi koshshiyaabaanne etawu siyettiyaabaa qoppana danddayoos; qassi yaatana koshshees. Yesuusi tulle bitaniyawu siyettiyaabaa akeekiis; qassi ayyo qoppiyoogaa bessiis. Hegaadan nuunikka cimatuyyoonne sahettiyaageetuyyo qoppiyoogaa bessoos. Kiristtaane gubaaꞌee coo murutatettan gidennan, siiquwan erettees. (Yoh. 13:34, 35) Cimatinne bollay silidoogeeti gubaaꞌe shiiquwaa shiiqanaadaaninne mishiraachuwaa sabbakanaadan eta maaddanawu keehi baaxetana mala he siiqoy nuna denttettees. Eti oottana danddayiyoobay guutta gidikkonne, nuuni eta maaddoos.—Maa. 13:23. w18.09 29-30 ¶7-8

Yihoowa dorssati ubbay wozuwaa yarshshuwaa giigissida ayyoonne Yesuusawu keehi alꞌꞌo. (Gal. 2:20) Ayyaanaaban nuussi ishanne michcho gididaageeta nuuni keehi siiqoos. Qassi nuuni qaretaaninne siiquwan etawu qoppiyoogaa bessana koyoos. Minttettiyaageeta gidanawu, “ane nuuni sarotetta ehiyaabaanne nuna issuwaa issuwaara minttettiyaabaa ubbaa koyoos.” (Roo. 14:19) Sinttappe Gannatiyan azzananaadan oottiyaabi mule baynna wodiyaa nuuni ubbay keehi yeemotti naagoos! He wode sahoy, olay, laattido hayqoy, yedetay, so giddo ooshshaynne azzanoy deꞌenna. SHaꞌu layttay aadhdhi simmin, asay wottiyoobi baynnaagaa gidana. He wode wurssetta paaciyaa aadhdhiyaageeti saꞌan Xoossaa Yihoowa naata gidana, qassi eti “Xoossaa naati ailletettaappe kiyido bonchcho kessaa” kiyana. (Roo. 8:21) Simi nuuni ubbay minttettiya siiquwaa ubbatoo bessoos, qassi he ufayssiya anjjuwaa demmanaadan issoy issuwaa maaddoos. w18.09 14 ¶10; 16 ¶18

Xoossaa Qaalaa xannaꞌiyoogee eesuwan nabbabiyoogaanne xannaꞌanawu maaddiya oyshawu zaaruwaa malaatiyoogaa xalla gidenna. Nuuni xannaꞌiyo wode, xannaꞌiyo xuufee Yihoowabaa, A ogiyaabaanne A qofaabaa nuna ay tamaarissiyaakko qoppoos. Nuuni Xoossay issibaa azaziyoynne haraa diggiyoy aybissakko akeekanawu maloos. Nu deꞌuwaaninne nu qofan ay laammana koshshiyaakkokka qoppoos. Xannaꞌiyo wode ubban ha ubbabaa qoppennan aggana danddayikkonne, amarida wodiyaa, geella xannaꞌiyo saatiyaappe bagga gidiyaagaa nu nabbabidobaa wotti dentti qoppanawu wodiyaa bazziyoogee maaddees (1 Xim. 4:15) Nuuni Xoossaa Qaalaa ubbatoo wotti dentti qoppiyo wode, Yihoowa qofawu wottiyoobi baynnaagaa ammanoos. Nuuni issibaa aagaadan xeelliyoogaa doommoosinne A qofaa maayoos. Nu qofay ‘dummatees,’ qassi nuuni ooratta ogiyan qoppiyoogaa doommoos. (Roo. 12:2) Nuuni Yihoowaagaadan qoppiyoogaa loddan loddan meezetoos. w18.11 24 ¶5-6

PHawuloosi inne amarida A laggeti Kawotettaa tumaa zerettaa zeriyo gishshawunne haattaa ushshiyo gishshawu, eti ‘Xoossaara issippe oottiyoogaa’ yootiis. (1 Qor. 3:6) Ha wodiyan, nuunikka nuuyyo deꞌiya wodiyan, aquwaaninne wolqqan Xoossay immido sabbakiyo oosuwawu nuuyyo danddayettida ubbabaa oottiyo wode, ‘Xoossaara issippe oottiyaageeta’ gidana danddayoos. Hagee keehi gita maata! Sabbakanawunne erissiyo ashkkara oottanawu nu wodiyaanne nu wolqqaa kehatettan immiyoogee daro ufayssaa demissees. Harata Geeshsha Maxaafaa xannaꞌissida daro ishanttinne michchontti yootiyoobay hegaa. Nuuni xannaꞌissiyoogeeti tumaa akeekidi ufayttiyoogaa, ammanuwan minniyoogaa, laamettiyoogaanne haratussi tumaa yootiyoogaa beꞌiyoogee keehi ufayssees. Sabbakanaadan Yesuusi kiittido 70ti loꞌꞌo ayfiyaa demmido gishshawu ‘ufayssan simmido’ wode, ikka keehi ufayttiis.—Luq. 10:17-21. w18.08 20 ¶11-12

Nuuni nu akeekan keehi zemppiyoogee pire gidana danddayees. Nuuni tumubaa wurssi erana xayikkonne, issi hanotaa pilggidi akeekana danddayiyaabadan qoppana danddayoos. Issibaa maara yiggi xeellanawu nuuni metootiyoy nu eeshshay gubaaꞌiyan deꞌiya issi ishaagaappe keehi dummatiyo wode gidana danddayees. Nuuni issoy issuwaara maayettennabaa ubbatoo qoppikko, nu ishaabaa siriyoogaa doommana danddayoos. Yaatiyo gishshawu, nuuni he ishaabaa iita odo siyikko, hegaa ammananawu keehi koyana danddayoos. Hegaappe ay tamaariyoo? Nu ishanttubaa nuuni iitabaa qoppiyoogee issibaa tumu naqaashi baynnan kuuyanaadan oottana danddayees. (1 Xim. 6:4, 5) Amoynne qanaatee nu wozanan tohettennaadan teqqiyoogan, nuuni suure gidennabaa kuuyenna mala naagettana danddayoos. Simi hegaa mala iita qofaa qoppiyoogaappe, nuuni nu ishantta siiqananne etawu coo atto gaana bessiyoogaa akeekiyaageeta gidoos.—Qol. 3:12-14. w18.08 6 ¶15; 7 ¶18

Paxa deꞌiyoogaa gaasuwan asay ubbay Yihoowaba. (Maz. 100:3; Ajj. 4:11) SHin asi deꞌido wode ubban, Xoossay amarida asata citan dummayidi babaa oottiis. Leemisuwawu, Mazamure 135y beni Israaꞌeelen Yihoowawu ammanettidi goynniya asati ‘awu buzo’ gidiyoogaa yootees. (Maz. 135: 4) Qassi, Hooseꞌa maxaafay Israaꞌeela zare gidenna amaridaageeti Yihoowa asa gidanaagaa kasetidi yootiis. (Hoo. 2:23) Yihooway Yesuusaara haaranaageeta dooriiddi Ayhuda gidennaageetakka hegeetun gujjido wode Hooseꞌa hiraagay polettiis. (Oos. 10:45; Roo. 9:23-26) He “geeshsha” deriyaa asati geeshsha ayyaanan tiyettidi saluwan deꞌanawu doorettido gishshawu, dumma hanotan Yihoowassi “buzo asa.” (1 PHe. 2:9, 10) Sinttappe saꞌan merinawu deꞌanawu hidootiya, ha wodiyan deꞌiya Kiristtaanetuppe daroti shin? Yihooway etakka ba ‘asatanne’ ba ‘dooridoogeeta’ yaagees.—Isi. 65:22. w18.07 22 ¶1-2

Tumu Kiristtaaneti asay kehatettan waati immana danddayiyaakko wottiyoobi baynna ogiyan nuna bessida Kiristtoosa milatoosona. (Maa. 20:28) Nuuni, ‘Taani Yesuusa leemisuwaa loytta kaallana danddayiyaanaa?’ yaagidi nuna oychchana danddayoos. (1 PHe. 2:21) Yihooway inne A Naꞌay nuussi wottiyoobi baynna leemiso gididobaa nuuni kaalliyo wode ufayttees. Nuuni asawu qoppiyoogaaninne eta maaddiyo ogiyaa koyiyoogan hegaadan oottoos. Yesuusi bana kaalliyaageeti harata, ubba banttaagaappe dumma wogan diccidaageetakka maaddanawu baaxetanaadan koyiyoogaa Samaare biittaa bitaniyaabaa yootido leemisuwan qonccissiis. (Luq. 10:29-37) Yesuusi Samaare biittaa bitaniyaabaa leemisuwaa yootanaadan denttettida oyshaa hassayay? Issi Ayhuda bitanee, “Ta shooroi oonee?” giidi A oychchiis. Yesuusi zaaridobay nunan Xoossay ufayttanaadan nuuni Samaare biittaa bitaniyaadan kehatettan immanawu eeno gaana koshshiyoogaa bessees. w18.08 19 ¶5-6

Yihooway ba Naꞌawu koshshiyaabaa Mayraama ammanettada kunttidonne A dichchido gishshawu O eriyoogaa ubbatoo bessidee? Ee bessiis. Xoossay A oottidobaynne haasayidobay Geeshsha Maxaafan xaafettanaadan oottiis. Yesuusi haggaazido heezzu layttanne baggan Mayraama aara issippe yuuyana danddayabeennaba milatees. Geella A amꞌꞌe gidada Naazireeten deꞌennan aggukku. Gidoppe attin, A daro maataa demmennan attikkonne, Yesuusi hayqqiyo wode aara deꞌawusu. (Yoh. 19:26) SHin, guyyeppe geeshsha ayyaanay wodhdhido PHenxxaqosxxe gallassaa gakkanaashin, Mayraama Yesuusa kaalliya haratuura Yerusalaamen deꞌawusu. (Oos. 1:13, 14) A he sohuwan deꞌiya haratuura issippe ayyaanan tiyettennan aggukku. Yaanikko, A Yesuusaara issippe saluwan merinawu deꞌiyo maataa demmaasu giyoogaa. Hegee A ammanettada haggaazidoogawu Xoossay immido gita woyto! w18.07 9 ¶11; 10 ¶14

Yesuusi ba haggaazuwaa wode ubban issi issi qofaynne oosoy kaalettiyoobaa I erissiyo ashkkarati akeekanaadan keehi koshshiya tumata tamaarissiis. Leemisuwawu, hanqqoy kobaa denttananne amoy wodiraa laammanaadan oottana danddayiyoogaa I tamaarissiis. (Maa. 5:21, 22, 27, 28) Nuuyyo maara loohida kahay deꞌanaadan maaddana mala, nuuni Xoossaa maaraa kaallana koshshees; qassi yaatidi A bonchchissana koshshees. Issi issiban naaꞌꞌu Kiristtaaneti Geeshsha Maxaafan loohida kahan naaꞌꞌu keehi dummatiyaabata kuuyana danddayoosona. Mattoyiya ushshaa uyiyoogaa qoppa. Darissennan uyiyoogaa Geeshsha Maxaafay diggenna. SHin, daro ushshaa uyennaadaaninne mattottennaadan yootees. (Lee. 20:1; 1 Xim. 3:8) Yaatin, hegee issi Kiristtaanee daro uyana xayikko, I qoppana koshshiya harabi baawa giyoogee? Akkay gidenna. He Kiristtaaniyaa kahaa zilꞌꞌiyaabi xayikkonne, haratu kahaakka I qoppana bessees. w18.06 18 ¶10-11

Yesuusi I erissiyo ashkkarati Parisaawetu, Saduqaawetunne Heeroodisa citaa kaalliyaageetu timirttiyaappe woy eta irshshuwaappe naagettanaadan ba erissiyo ashkkaratussi mintti yootiis. (Maa. 16:6, 12) Asay A kawoyanawu koyoosappe guutta wodee aadhdhin I hegaa yootiis. Haymaanootee polotikaara walahettiyo wode, kobabay sohuwaara denddana danddayees. Yesuusi ba erissiyo ashkkarati hegaa mala hanotan oossinne exatennan deꞌana bessiyoogaa tamaarissiis. Qeese ubbatu halaqatinne Parisaaweti Yesuusa woranawu halchchido gaasoy hegaara gayttidaba. Eti polotikaabaaninne haymaanootiyaaban bantta maatawu hirgganaadan oottiya morkkedan A xeellidosona. Eti, “Nuuni a co77u giidi, aggi bayikko, asai ubbai a ammanana; qassi Roome biittaa asati yiidi, nu Beeta Maqidasiyaanne nu asaa xaissana” yaagidosona. (Yoh. 11:48) Hegaa gishshawu, qeese ubbatu halaqay Qayaafi Yesuusa worissanawu harata denttettiis.—Yoh. 11:49-53; 18:14. w18.06 6-7 ¶12-13

Seexaanaayyo cimmanawu ushachchidabay murunnuwaabaa eranawu koyiyoogaa. Ha wodiyan, I worddo haymaanootiyaa xallan gidennan, allaxxiyoobankka asay daydanttatubaa eranawu koyanaadan oottees. Pilimeti, elektronike kaassatinne hegaa mala harabati iita ayyaanaa oosuwaa ufayssiyaaba milatissoosona. He piriyan gelennaadan nuuni waanidi naagettana danddayiyoo? Allaxxana bessiyaabaanne bessennabaa ubbaa Xoossaa dirijjitee nuussi xaafi giigissanaadan nuuni naagana koshshenna. Nuuni ubbay nu kahay Xoossaa maaraara maayanaadan loohissana koshshees. (Ibr. 5:14) Gidoppe attin, kiitettida PHawuloosi zoridoogaa nuuni oosuwan peeshshikko, loꞌꞌobaa kuuyana danddayoos. Nuna hagaadan oychchana danddayoos: ‘Haraati kaallanaadan taani tamaarissiyo maaraa oosuwan peeshshiyaanaa? Taani xannaꞌissiyoogeeti woy zaarettada oychchiyoogeeti ta allaxxiyoobaa beꞌiyaakko, taani sabbakiyoobaa oosuwan peeshshiyaabadan qoppanee?’ Nuuni haasayiyoobay nu oottiyoobaara maayiyo wode, Seexaanaa piriyan gelennan aggana danddayoos.—1 Yoh. 3:18. w18.05 25 ¶13

Nuuni waanidi PHawuloosa milatana danddayiyoo? Koyruwan, “merinaa de7uwaassi” suure koshshay deꞌiyoogeeta demmanawu wozanappe koyiyoogaa aggennaadan baaxetoos. Naaꞌꞌanttuwan, suuretu wozanaa Yihooway dooyanaadan A mintti woossoos. (Oos. 13:48; 16:14) Aqinye gidada 30 gidiya layttaa haggaazida Silvaana, “Ta moottan issi keettaa baanaappe kase, loꞌꞌobaa qoppanaadan tana maaddana mala Yihoowa woossays” yaagaasu. Suure asata demmanaadan kiitanchchati nuna kaalettana mala nuunikka Xoossaa woossoos. (Maa. 10:11-13; Ajj. 14:6) Aqinye gididi 30⁠ppe dariya layttaa haggaazida Raberti, “Issi ura deꞌuwan haniiddi deꞌiyaabaa eriya kiitanchchatuura oottiyoogee keehi ufayssiyaaba” yaagiis. Heezzanttuwan, asay Yihoowawu haggaazana danddayiyoogaa bessiya loꞌꞌobaa akeekanawu maloos. Karla giyo gubaaꞌꞌe cimay, “Issi asi suure gidiyoogaa bessiya, pashkki giyoogaa, kehatettan xeelliyoogaa, woy wozanappe oychchiyoogaa mala guuttabaa akeekanawu koyays” yaagiis. Ee, nuunikka PHawuloosaagaadan ayfiyaa ayfiyoogan genccana danddayoos. w18.05 15 ¶13; 16 ¶15

Nuuni kase maaddidoogeeti ammanettidi deꞌiyoogaa siyiyoogee nuna ufayssees. Kiitettida Yohaannisi hagaadan giis: “Ta naati tumatettan de7iyoogaa siyiyoogaappe aadhdhidi, tana ufaissiyaabi baawa.” (3 Yoh. 4) Daro aqinyeti eti amarida layttappe kase tumaa eranaadan maaddidoogeetuppe amaridaageeti ammanettidi deꞌiyoogaa eriyoogaaninne ubba qassi aqinye gididi haggaaziiddi deꞌiyoogaa eriyoogan keehi minettana danddayoosona. Azzanida aqinyee kase oottido ufayssiyaaba hassayanaadan oottiyoogee I minettanaadan oottana danddayees. Woradaa xomoosiya daroti etinne eta machchoti gubaaꞌiyaa xomoosi simmin gubaaꞌee galatanawu xaafi kiittidoban keehi minettidoogaa yootoosona. Ammanettidi haggaaziyoogaa gishshawu galatiyo cimatu, misoonaawetu, aqinyetunne Beeteele keettaa asa yaratu hanotaykka hegaara issi mala gidana danddayees. w18.04 23 ¶14-15

Solomoni guyyeppe 700 maccaasata ekkiyoogan azazettennan ixxiis. I ba soo hara 300 kaadumatata ehiis. (1 Kaw. 11:3) A maccaasatuppe daroti Israaꞌeela asa gidokkona; eti worddo xoossatuyyo goynnoosona. Hegaa gishshawu, Solomoni allaga biittaa maccaasata ekkiyoogan Xoossaa higgiyaa azazettennan ixxiis. (Zaa. 7:3, 4) Solomoni Yihoowa higgiyaa loddan loddan azazettennan aggidoogee, I guyyeppe gita nagaraa oottanaadan oottiis. Solomoni Asttaarooto giyo xoosseeyyoonne Kamoosha giyo worddo xoossaayyo yarshshiyoosaa keexxiis. He sohuwan I ba maccaasatuura eeqa xoossatuyyo goynniis. Solomoni I Yihoowa beeta maqidasiyaa keexxido Yerusalaameppe sintta baggaara deꞌiya deriyaa bolli he yarshsho sohota keexxiis! (1 Kaw. 11:5-8; 2 Kaw. 23:13) Solomoni I beeta maqidasiyan ubbatoo yarshshikko, I azazettennaagaa Yihooway xaasayidi xeellees gi qoppidi bana cimmennan aggenna. SHin Yihooway iita oosuwaa mule xaasayi xeellenna. w18.07 18-19 ¶7-9

Seexaanay ne bolli yeddiyo ‘wonddafiyaa tamaappe’ amaridaagee Yihooway neeyyo qoppennanne neeni siiqoy bessiyo asa gidakka yaagidi yootiyo worddobaa. Ido giyo 19 laytta naꞌiyaa pattenna asadan bana xeelliyoogaa agganawu baaxetawusu. A, “Taayyo darotoo Yihooway taakko shiiqennabadaaninne ta Dabbo gidanawu koyennabadan siyettees” yaagawusu. He wonddafiyaa A waatada teqqay? Ida, “SHiiqoti ta ammanuwaa keehi minttoosona” yaagawusu. Gujjadakka hagaadan gaasu: “Taani kase ta yootiyoobaa ooninne siyanawu koyennabadan qoppada, yan uttada qaalakka qaattikke. SHin haꞌꞌi shiiquwawu giigettays, qassi heezzutoo woy oyddutoo zaaranawu malays. Idi hanotay ha gita tumaa qonccissees: Wotaaddaray oyqqiyo gonddalliyaa yesoy liketti uttidaba, shin nu ammanuwaa gonddallee woy darana woy guuxxana danddayees. Hegee nuuni kuuyiyooba. (Maa. 14:31; 2 Tas. 1:3) Nu ammanuwaa minttiyoogee keehi koshshiyaaba! w18.05 29-30 ¶12-14

Qasho keettaa naagiyaagaa xeelay laamettin, I bana maaddanaadan oychchidoy biittay qaaxxi simmiina. (Oos. 16:25-34) Hegaadankka, Geeshsha Maxaafaabaa siyanawu kase koyenna issi issi asay akeekennan keehi azzanttiyaabay gakkiyo wode ba qofaa laammidi maaduwaa koyana danddayees. Leemisuwawu, issi issi asay daro wodiyawu oottido oosuwaappe eti qoppennan kessin azzanana danddayoosona. Harati qassi iita harggee oyqqidoogaa erido gishshawu woy siiqiyo uri hayqqido gishshawu, keehi kayyottana danddayoosona. Eti eranawu koyenna, deꞌuwawu halchchettidabaa xeelliyaagan oychchana danddayoosona. Geella eti, ‘Attanawu taani ay oottana koshshii?’ giidi qoppanakka danddayoosona. Nuuni etaara gayttiyo wode, eti kase siyi erenna ufayssiya hidootaa yootin siyanawu koyennan waayi aggana. Yaatiyo gishshawu, ubbatoo sabbakikko, nuuni yootiyo minttettiyaabaa siyanawu koyiyo wodiyan asay nuna demmana danddayees.—Isi. 61:1. w18.05 19-20 ¶10-12

Ha wodiyan daro asaa qofaa ha alamiyaa xoossay goozi wottiis; qassi eti haymaanootiyaa, miishshaanne deretettaa meeziyaa aylletettan deꞌoosona. (2 Qor. 4:4) Laꞌatettaa Xoossaa Yihoowa eranaadaaninne ayyo goynnanaadan asaa maaddiyoogan Yesuusa leemisuwaa kaalliyoogee nuussi gita maata. (Maa. 28:19, 20) Hegee wayssenna ooso gidenna; qassi paace gidiya darobay deꞌees. Issi issi biittan kaseegaappe daro asay siyanawu koyenna; issoti issoti ubba hanqqettoosona. Nuuni ubbay, ‘Taani ta laꞌatettaa Kawotettaabaa oosuwaa kaseegaappe aaruwan kaafanawu goꞌettana danddayiyaanaa?’ yaagidi nuna oychchana koshshees. Daroti nu wodee eesoyiyoogaa akeekiyoogaanne kumetta wodiyaa haggaazanawu sima deꞌuwaa deꞌiyoogaa beꞌiyoogee minttettiyaaba. (1 Qor. 9:19, 23) Etappe amaridaageeti bantta heeran haggaazoosona; harati qassi aassiyaageeti keehi koshshiyoosaa biidi haggaazoosona. Daroti Yihoowawu hegaadan haggaazanawu bantta laꞌatettaa goꞌettiyoogee ayba ufayssiyaabee!—Maz. 110:3. w18.04 11-12 ¶13-14