Tisaase

Keehi ufayssiya Yesuusa eeshshatuppe issoy nuuni nagaranchcha gidiyoogaa gaasuwan nuna gakkiya metuwaa I akeekiyoogaa. Yesuusi saꞌan deꞌiyo wode, ‘ufayttiyaageetuura ufayttiisinne yeekkiyaageetuura yeekkiis.’ (Roo. 12:15) Leemisuwawu, I erissiyo ashkkarati 70ti sabbakiyo oosuwaa loytti polidi keehi ufayttiiddi simmido wode, Yesuusi ‘geeshsha ayyaanan ufayttiis.’ (Luq. 10:17-21) Hara baggaara qassi, Alꞌꞌaazara siiqiyaageeti I hayqqido gishshawu keehi azzanidoogaa Yesuusi beꞌidi, “ba wozanan daro mishettiis; qassi tookki shemppiis.” (Yoh. 11:33.) Yesuusi wottiyoobi baynna asa gidikkonne, I nagaranchcha asaa maareesinne etawu keehi qarettees. Yaatanawu A maaddidabay aybee? Hegawu A keehi maaddiday I asaa siiqiyoogaa. I ‘asaa naatun ufayttiis.’ (Lee. 8:31) I asaa keehi siiqiyoogee eta qofaa loytti eranaadan oottiis. Kiitettida Yohaannisi, “Asa wozanan aibi de7iyaakko, I ba huuphen erees” yaagiis.—Yoh. 2:25. w19.03 20 ¶1-2

Seexaanay Iyyoobassi deꞌiya ubbabaa xayssiis, A ashkkarata woriisinne A sunttaa mooriis. I Iyyooba soo asaa bolli daro qohuwaa gattiis, I siiqiyo A tammu naata woriis. Yaati simmidi, Iyyoobawu tohuwaappe huuphiyaa gakkanaassi kiyida iita masunttay A sakkanaadan oottiyoogan Iyyooba bollaa qohiis. Iyyooba machchiyaa keehi unꞌꞌettaasunne azzanaasu; I Xoossaa qanggidi hayqqanaadan A minttada yootaasu. Iyyoobi ba huuphen hayquwaa amottikkonne, ba suuretettaa naagidi deꞌiis. Hegaappe guyyiyan Seexaanay A qohanawu hara hiillaa goꞌettanawu maliis. I Iyyooba heezzu laggeta goꞌettiis. Iyyooba oychchanawu biida ha asati daro gallassaa takkikkokka, eti A aynne minttettibookkona. Ubba qassi eti meqetti baynna haasayan A keehi qohidosona. Eti A bolli waayee gakkanaadan oottiday Xoossaa; qassi A suuretettaabay Xoossaa aynne qofissenna giidosona. Eti Iyyoobi he waayee A bolli gakkana bessiyo iita asa gidiyoogaakka yootidosona.—Iyy. 1:13-22; 2:7-11; 15:4, 5; 22:3-6; 25:4-6. w19.02 4 ¶7-8

Issi issi yashshay nuussi loꞌꞌo. Leemisuwawu, nuuni Yihoowa ufayssennabaa oottennaadan yayyana koshshees. Addaameenne Hewaana hegaadan yayyiyaakko, eti Yihoowa bolli makkalokkona shin. Gidoppe attin, eti makkalidosona. Yaati simmin, eta ayfee dooyettin, eti nagaranchcha gidiyoogaa loytti akeekidosona. Eti bantta naata nagaraanne hayquwaa laatissidosona. Eti bantta hanotaa beꞌana woy akeekana danddayiyo gishshawu, bantta kalluwan pokkottidi bantta bollaa kammidosona. (Doo. 3:7, 21) Nuuni Yihoowa ufayssennabaa oottennaadan yayyiyoogee koshshiyaaba gidikkonne, nuuni hayquwaa yashshan maashana koshshenna. Yihooway nuuni merinaa deꞌuwaa demmanaadan ogiyaa giigissiis. Nuuni nagaraa oottidi wozanappe hegaappe simmikko, Yihooway nu nagaraa atto gaana. Nuuni A Naꞌaa wozuwaa yarshshuwan ammaniyo gishshawu, I nuussi atto gaana. Nuuni nu deꞌuwaa Xoossaayyo sheedhdhidi xammaqettiyoogee ammanuwaa bessiyo aybippenne aadhdhiya oge.—1 PHe. 3:21. w19.03 5-6 ¶12-13

Israaꞌeelati galatana bessiyo darobay deꞌees. Yihooway Gibxxetu bolli Tammu Boshaa ehi simmin eti aylletettaappe laꞌa kiyidosona. He wode Xoossay Gibxxe olanchchata ubbaa zoꞌo abban xayssiyoogan eta qohuwaappe ashshiis. Israaꞌeelati Yihoowa sabbanawu xoonuwaa mazamuriyaa yexxiyoogan keehi galatidosona. SHin eti galatiyaageeta gididi deꞌidonaa? Israaꞌeelata hara metoy gakkido wode, Yihooway etawu oottido loꞌꞌoba ubbaa eti sohuwaara dogidosona. Eti guyyeppe galatennaageeta gidiyoogaa bessidosona. (Maz. 106:7) Waatidi? “Israa7eela asaa maabarai ubbai bazzuwan Muuse bollinne Aaroona bolli zuuzummidosona,” hegee Yihoowa bolli zuuzummiyoogaa. (Kes. 16:2, 8) I ba asay galatibeennaagan azzaniis. I guyyeppe, Yaasunne Kaaleebi attin, Israaꞌeela deree ubbay bazzuwan xayanaagaa yootiis.—Qoo. 14:22-24; 26:65 w19.02 17 ¶12-13

Yesuusi A hayquwaa hassayiyo baalay gitaban bonchchettanaadan koyiyoogan asay bessenna ogiyan bana xeellanaadan oottibeenna. I bana kaalliyaageeti guuttabaa giigissidi Godaa Kahuwaa layttan layttan bonchchiyoogan bana hassayanaadan yootiis. (Yoh. 13:15; 1 Qor. 11:23-25) Guuttabaa giigissin bessiya ogiyan Godaa Kahoy bonchchettiyoogee Yesuusi otorettenna asa gidiyoogaa bessees. Saluwan deꞌiya nu Kawoy bana ziqqi oottiyoogee awu deꞌiya maalaalissiya eeshshatuppe issuwaa gidiyoogee nuuni ufayttanaadan oottiyaaba. (Pili 2:5-8) Nuuni nuna ziqqi oottiyoogan Yesuusa waati milatana danddayiyoo? Nu koyiyoobaappe haratuugaa kaseyiyoogan A milatana danddayoos. (Pili. 2:3, 4) Yesuusi saꞌan deꞌido wurssetta qammi hanidabaa qoppa. Yesuusi I guuttaa takkidi waayettidi hayqqanaagaa erees; shin guuttaa takkidi ayyo azzanana, I kiittido ammanettidaageetussi wozanappe qoppiis. Hegaa gishshawu wurssetta qammi I eta tamaarissiisinne minttettiis. (Yoh. 14:25-31) Yesuusi bana ziqqi oottidi, baagaappe aattidi harata goꞌꞌiyaabaa qoppiyoogaa bessiis. I nuussi keehi loꞌꞌo leemiso gidiyaabaa oottiis! w19.01 21 ¶5-6

Qofaa immanawu kushiyaa denttanawu qoppiyo wode ubban neeni yashshaa maasha eray? Yaanikko, hegaadan siyettiyoy ne xallaassa gidenna. Qofaa immiyo wode nuuppe dariya baggati amarida hanotan yayyiyoogee tuma. Hegaadan yayyiyoogee loꞌꞌo malaata gidana danddayees. Hegee neeni ne huuphiyaa ziqqi oottiyoogaanne harata neeppe xoqqu oottada xeelliyoogaa bessees. He eeshshaa Yihooway dosees. (Maz. 138:6; Pili. 2:3) Qassi Yihooway neeni A sabbanaadan, shiiqotun ne ishanttanne ne michchontta minttettanaadankka koyees. (1 Tas. 5:11) I nena siiqiyo gishshawu neessi koshshiya xalatettaa immana. Geeshsha Maxaafay hassayissiyo amaridabaa ane beꞌa. Haasayiyoobaaninne haasayiyo ogiyan nuuni ubbay baliyoogaa Geeshsha Maxaafay yootees. (Yaaq. 3:2) Yihooway nuuni wottiyoobi baynna asa gidanaadan naagenna; qassi nu ishanttinne nu michchontti nuuni wottiyoobi baynna asa gidanaadan naagokkona. (Maz. 103:12-14) Eti nu soo asaa yame; qassi nuna siiqoosona. (Mar. 10:29, 30; Yoh. 13:35) Nuuni issi issitoo zaariyoy zaaranawu qoppidoba gidennaagaa eti akeekoosona. w19.01 8 ¶3; 10-11 ¶10-11

Ha alamiyan, hegee issi issitoo metana danddayees. SHin, hegee danddayettennaba gidenna. Yihooway intte tumuppe injjenne ufayssiya deꞌo deꞌanaadan koyees. Xoossay maaddin, intte intte yelagatettaa laytta xallan gidennan, deꞌo laytta ubban injjetidoogeeta gidana danddayeeta. Leemisuwawu, Israaꞌeelati Hidootaa Biittaa xoonidoogaappe nuuni tamaarana danddayiyoobaa qoppite. Israaꞌeelati Hidootaa Biittaa matido wode, Xoossay eti qara olanchcha gidanaadan woy olawu loohanaadan azazibeenna. (Zaa. 28:1, 2) I eti ba azazuwaa azazettananne banan ammanettana koshshiyoogaa yootiis. (Yaas. 1:7-9) Asa xeelan, he zoree loꞌꞌo milatenna! SHin, ba asay Kanaaneta darotoo xoonanaadan Yihooway oottido gishshawu, hegee aybippenne aadhdhiya zore. (Yaas. 24:11-13) Ee, Xoossawu azazettanawu ammanoy koshshees; qassi ammanoy izaawussi muletoo injjetanaadan oottees. Hegee beni wodekka ha wodiyankka tuma. w18.12 25 ¶3-4

Ha wodiyan issoti issoti Geeshsha Maxaafan deꞌiya issi qofaa kase akeekidobay laamettin xubettidosona. Harati kaddidaageeti woy tumaa eqettiya harati tamaarissiyo worddobaa kallidosona. Hegaappe denddidaagan, issoti issoti Yihoowappenne gubaaꞌiyaappe eriiddi ‘shaahettiyoogaa’ doommidosona. (Ibr. 3:12-14) Eti kiitettida PHeexiroosaagaadan, ammanuwan minnidinne Yesuusan ammanettidi deꞌidaakko keehi loꞌꞌo shin! Harati geella eti waaniyaakko akeekennan tumaa loddan loddan aggidosona. Tumaa loddan loddan aggiya uri shaafaa doonappe loddan loddan haakkiya wolwolo mala. Hegaadan loddan laamettiyoogee loddan loddan ‘wora biyoogaa’ gidiyoogaa Geeshsha Maxaafay yootees. (Ibr. 2:1) Tumaappe wora biya ura hanotay eriiddi tumaappe shaahettiya uraagaappe dummatees; I erennan hegaadan oottees. Gidoppe attin, hegaa mala urawu Yihoowaara dabbotay moorettees; ubba qassi duuxxana danddayees. w18.11 9 ¶5-6

Geeshsha oosuwaa loytta oottanawu gujjada loohanawu keehi koyay? Yaatikko, Kawotettaa Mishiraachuwaa Yootiyaageeti Tamaariyo Timirtte Keettan tamaarana danddayaasa. He timirtte keettay Yihoowawu kumetta wodiyaa haggaaziya kayma ishanttinne michchontti A dirijjitiyan loytti oottana mala loohissees. He timirtte keettan tamaaranawu koyiyaageeti anjjetti simmidi imettiya aybanne oottanawu eeno gaana koshshees. Yihoowawu hegaadan kaseegaappe loytta oottanawu koyay? (1 Qor. 9:23) Nuuni Yihoowa asa gidiyo gishshawu, kehoos, qarettoos, siiqoosinne loꞌꞌo gidiyoogaa bessoos; qassi nuuni haratussi ubba galla qoppoos. Nuuni yaatiyo wode, gita ufayssaanne sarotettaa demmoos. (Gal. 5:22, 23) Ne hanotay ayba gidikkokka Yihoowadan kehatettan immiyoogaaninne aara issippe oottiya ura gidiyoogan ufayttana danddayaasa!—Lee. 3:9, 10. w18.08 27 ¶16-18

‘Issi Kiristtaanee paraman shaahettananne zaarettidi ekkana woy gelana danddayiyo gaasoy deꞌii?’ yaagidi, issi uri oychchana danddayees. Yesuusi giidobaa akeeka: “Ba machchiyo yeddidi, haranniyo ekkiya urai ooninne ba machchen shaaramuxees. Qassi maccaarakka ba azinaappe kiyada hara azinaa gelikko shaaramuxausu.” (Mar. 10:11, 12; Luq. 16:18) Hegaa gishshawu, Yesuusi aqo deꞌuwaa bonchchiyoogeenne haratikka bonchchanaadan koyiyoogee qoncce. Guuttabaa gaasoyidi ammanettida ba machcheeppe (woy ammanettida ba azinaappe) paraman shaahettiyaanne haraa ekkiya woy geliya uri shaaramuxees. Paraman shaahettiyoogaa xallay aqo deꞌuwawu wurssetta gidenna gishshawu, hegee shaaramuxiyoogaa gidiyoogee tuma. Xoossaa sinttan eti naaꞌꞌay haꞌꞌikka “issi asa.” Hegaa bollikka, issi uri mooroy baynnan ba machchiyo yeddiyoogee A shaaramuxanaadan oottiyoogaa Yesuusi yootiis. Waatidi? Azinay yeddido maccaasiyaa he wode miishshaa maaduwaa demmana mala haranttuwaa gelana koshshiyaabadan qoppana danddayawusu. Hegaadan geliyoogee wodiraa laammiyoogaa. w18.12 11 ¶8-9

Imbbaaqoomi Yihoowaara haasayidoogee A wozanaa woppissiis. Yaatiyo gishshawu, Yihooway giigissanaagaa ammanettidi I danddayan naaganawu murttiis. I guyyeppe, “Metuwaa gallassaa taani danddayan naagana” yaagidi, murttidoogaa zaaretti yootiis. (Imb. 3:16) Imbbaaqoomi murttidobaappe nuuni ay tamaariyoo? Koyruwan, nuna ayba metoy gakkikkonne, nuuni Yihoowa woossiyoogaa mule aggana bessenna. Naaꞌꞌanttuwan, nuuni Yihooway ba Qaalaa baggaaranne ba dirijjitiyaa baggaara nuussi yootiyoobaa siyana koshshees. Heezzanttuwan, I ba keerido wodiyan metuwaappe nuna shemppissanaagaa wozanappe ammanettidi, nuuni danddayan Yihoowa naagishshana koshshees. Imbbaaqoomaagaadan, nuuni wozanappe Yihoowaara haasayikko, qassi A danddayan naagiiddi I yootiyoobaa siyikko, nu wozanaykka woppu gaana; hegee nuuni genccanaadan maaddana. Nu hidootay nuuni kaseegaappe aaruwan danddayanaadan oottana; hegee nuna gakkana danddayiya meto ubbay deꞌishinkka nuuni ufayttanaadan maaddana. Saluwan deꞌiya nu Aaway giigissanaagaa nuuni ammanettanaadan hidootay oottees.—Roo. 12:12. w18.11 15-16 ¶11-12

Harata xubiyoogaa Xoossay waati xeellii? Yesuusi hagaadan giis: “Tana ammaniya ha guuttatuppe issuwaa balettiya oonanne, gaacciyo wogga woxaa a qooriyan qachchidi, abban a oliyoogee au keha.” (Mar. 9:42) Harata xubbiyoogaa Yesuusi keehi iitabadan xeellidoogee qoncce! Yesuusi wottiyoobi baynnan ba Aawaa milatiyo gishshawu, issi uri oottido iitabay Yesuusa kaalliya ura xubbiyo wode Yihoowawukka hegaadan siyettiyoogaa ammanettana danddayoos. (Yoh. 14:9) Nuuni Yihoowaagaadaaninne Yesuusaagaadan qoppiyoo? Nuuni oottiyoobay ay qonccissii? Leemisuwawu, nuuni gubaaꞌiyan deꞌiya issota issota yiilloyana danddayiyaabaa woy qassi harati pokkobaa qaaqqatanaadan oottana danddayiyaabaa maayiyoogaa woy aleeqettiyoogaa dosoos giidi qoppoos. Nuuni nu mala Kiristtaaneta siiqiyoogeenne etawu qoppiyoogee nu dooruwaa agganaadan oottanee? w18.11 25 ¶9-10

Nu ubbaassi suuretettay koshshiyoy aybissee? Suuretettay koshshiyo gaasoy Seexaanay Yihoowanne nena mootiyo gishshataassa. Ha makkalanchcha kiitanchchay wordduwaa haasayidi Xoossay iita, ba xallaa siiqiyaagaanne I maara haarennaagaa giidi Yihoowa geeshsha sunttaa mooriis. Addaameenne Hewaana Seexaanawu exatidi Yihoowa bolli makkalidoogee azzanttiyaaba. (Doo. 3: 1-6) Edenen deꞌiyoogee eti Yihoowa loytti siiqana mala oottana danddayees. SHin, Seexaanay mootiyo wode, eta siiqoy kumetta gidenna. Guyyeppe, ‘Xoossaa Yihoowa siiqidi assi ammanettiya asi daanee?’ giya oyshay zaaro demmana koshshiis. Woy qassi, asay suure gididi deꞌana danddayii? Iyyoobaara gayttidaagan ha oyshawu zaaro koshshiis. (Iyy. 1:8-11) I nu mala nagaranchcha asa. I balabaa oottiis. SHin, Yihooway A suuretettaa gishshawu A siiqees. w19.02 3-4 ¶6-7

Xoossaa Kawotettaa tumay A demmiyaageetussi ay keena alꞌꞌobakko qonccissanawu, Yesuusi loꞌꞌo inqquwaa koyidi demmida zalꞌꞌanchchaabaa yootiis. He inqqoy daro alꞌꞌo gidiyo gishshawu, hegaa shammanawu I bawu deꞌiya ubbabaa sohuwaara ‘bayzziis.’ (Maa. 13:45, 46) Hegaadankka, nuuni demmido Xoossaa Kawotettaa tumaynne Xoossaa Qaalaappe nuuni tamaarido hara alꞌꞌo tumay ubbay nuussi keehi alꞌꞌoba gidiyo gishshawu, A demmanawu aggana koshshiyaabaa nu dosan sohuwaara aggi bayida. Nuuni tumaa xoqqu ootti xeelliyo gishshawu, ‘A mulekka bayzzokko.’ (Lee. 23:23) SHin Xoossaa asatuppe amaridaageeti bantta demmido alꞌꞌo tumaa nashshiyoogaa aggidoogeenne bayzzidoogee azanttiyaaba. Nuuni hegaadan oottanawu mule koyokko! Nuuni tumaa wozanappe nashshiyoogaanne A mule bayzzennaagaa bessanawu Geeshsha Maxaafay ‘tumatettan deꞌanaadan’ zoriyoogaa siyana bessees. (3 Yoh. 2-4) Hegaa giyoogee tumaa sinttayoosinne nu deꞌuwan hegaa bessoos giyoogaa. w18.11 9 ¶3

Israaꞌeelati usuppun gallassawu galla galla issitoo katamaa yuuyanaadan, qassi laappuntta gallassi laapputoo yuuyanaadan azazoy imettiisippe attin, Yarkko katamaa olanaadan odettibeenna. Issi issi wotaaddarati, ‘Hagee wodiyaanne wolqqaa coo wurssiyaaba’ giidi qoppana danddayoosona. SHin Israaꞌeelata Kaalettiyaagee Yihooway ba oottiyoobaa erees. I oottidobay Israaꞌeelatu ammanuwaa minttiyoogaa xalla gidennan, eti Yarkko wolqqaama olanchchatuura eqettennaadankka naagiis. (Yaas. 6:2-5) Ha taarikiyaappe nuuni ay tamaarana danddayiyoo? Yihoowa dirijjitee issi issitoo oorattabaa oottiyo gaasuwaa nuuni loytti akeekennan aggana danddayoos. Leemisuwawu, buzo xinaatiyan, haggaazuwaaninne shiiquwan elektronike miishshaa goꞌettiyoogee loꞌꞌo gidennabadan koyro heeran nuuni qoppana danddayoos. Hegeeta goꞌettiyoogee maaddiyoogaa haꞌꞌi akeekennan aggokko. Nuuni koyro siriyaaba gidikkonne, hegaa malaban beettida loꞌꞌobaa beꞌiyo wode, nu ammanoynne nu issippetettay minnees. w18.10 23 ¶8-9

Yesuusi erissiyo ashkkarati Masiyaabaa hegaadan naagidoogee, Galiila asay A kawoyanawu koyanaadan oottidoogee erettidaagaa. Yesuusi haariyaakko A mali deꞌenna giidi eti naagidoogaa qoppana danddayoos. I haasayawu keehi gooba, hargganchchata pattana danddayees, ubba qassi namisettidaageetussi miyoobaa immana danddayees. Yesuusi 5,000 gidiya attuma asata qumaa mizi simmidi, asay koyiyoobaa akeekiis. “Eti yiidi bana oiqqidi, wolqqan kawo oottanau haniyoogaa Yesuusi eridi, barkka deriyaa bolli naa77anttuwaa kiyiis.” (Yoh. 6:10-15) Wonttetta gallassi Galiila Abbaappe hefinttan, asaa koshshay guuttaa zarbbennan aggenna. He wode Yesuusi ba oosuwaa qommoy tumuppe aybakko cora asawu qonccissiis. I yiidoy he deriyaa ayyaanaaban goꞌꞌanaasappe attin ashuwaaban goꞌꞌanaassa gidenna. I etawu, “Merinaa de7o qumau . . . oottiteppe attin, samiya qumau oottoppite” yaagiis.—Yoh. 6:25-27. w18.06 4 ¶4-5

Yesuusi leemiso hanotan dinccettida shombboquwaa woy liiꞌattidi eexxiya muqaaddaa mala gididaageetussi siyettiyaaba akeekees. Hegaappe denddidaagan, I haratussi qoppees; qassi kehanne danddayanchcha. (Mar. 10:14) Yesuusaagaa mala akeekaynne tamaarissiyo eray nuuyyo baynnaagee tuma! SHin nuuni nu moottan deꞌiya asawu qoppana danddayoos; qassi hegaadan oottana bessees. Nuuni eta waatidi, awude qassi ay keena wodiyawu haasayissanaakko qoppana bessees. Ha wodiyan, zalꞌꞌiyaaban, polotikaabaaninne haymaanootiyaaban kaalettiya iitanne meqetti baynna asati daro miiloone asaa naaqqoosonanne qohoosona. (Maa. 9:36) Hegaappe denddidaagan, daro asay yibbaateesinne hidootaa qanxxees. Yaatiyo gishshawu, kehanne qoppiyaageeta gidiyoogaa nuuni haasayanawu dooriyo qaalaaninne shonggan bessiyoogee keehi koshshiyaaba! Daroti nuuni yootiyoobaa siyanawu koyiyoy nuuni Geeshsha Maxaafaa loytti goꞌettiyo gishsha xallaassa gidennan, nuuni wozanappe etawu qoppiyoonne eta bonchchiyo gishshataassa. w18.09 31-32 ¶13-14

Nuuni nuussi ayyaanaaban aybi koshshiyaakko akeekiyoogaa waati bessiyoo? Ayyaanaabaa qumaa miyoogan, ayyaanaabaa nashshiyoogaaninne ufayttiya Xoossawu goynniyoogaa sinttayiyoogan hegaa bessoos. Nuuni yaatikko, nu ufayssay gujjana. Xoossay qaalaa gelidobay sinttappe polettanaagaa nuuni mintti ammanana. (Tii. 2:13) Yihoowaara dabbotaa minttiyoogee ufayttidi deꞌanawu keehi koshshiyaaba. Kiitettida PHawuloosi ayyaanay denttettin hagaadan giis: “Godaara [Yihoowaara] intte de7iyo de7uwan ubba wode ufaittite; taani hagaa gujjadakka gais; ufaittite.” (Pili. 4:4) Nuuni he alꞌꞌo dabbotaa medhdhanawu, Xoossaa aadhdhida eratettaa demmana koshshees. (Lee. 3:13, 18) SHin, ufayttidi deꞌanawu Xoossaa Qaalaa nabbabiyoogaa xalla gidennan, hegaa oosuwan peeshshana koshshees. Nuuni eriyoobaa oottiyoogee koshshiyoogaa Yesuusi hagaadan qonccissiis: “Intte hegaa eridi oottiyaabaa gidikko anjjettidaageeta [woy ufayttiyaageeta.]” (Yoh. 13:17; Yaaq. 1:25) Neeyyo ayyaanaaban koshshiyaabaa kunttanawunne ufayttada deꞌanawu koshshiya waannabay hegaa. w18.09 18 ¶4-6

Eppaafiri ishantta loytti erees; qassi I etawu wozanappe qoppees. I PHawuloosaara issippe ‘qashuwan deꞌiyoogee’ ayyaanaaban haratuyyo koshshiyaabaa qoppennaadan oottibeenna. (Pilm. 23) Qassi I maaddiyaabaa oottiis. Hegee I ba xallaa siiqennan haratussi qoppiyoogaa bessennee? Nunaara Yihoowawu haggaaziyaageetussi woossiyoogee, ubba qassi eta hassayidi eta sunttaa xeegidi woossiyoogee keehi maaddees. (2 Qor. 1:11; Yaaq. 5:16) Neeni sunttaa xeegada etawu woossana danddayiyoogeetubaa qoppa. Gubaaꞌiyan, qassi bantta son daro aawatettay deꞌiyoogeetussi woy gitabaa kuuyana koshshiyoogeetussi woy gita paacee gakkiyoogeetussi daro ishanttinne michchontti Eppaafiradan woossoosona. Hegaa bollikka, siiqiyo uri hayqqidoogeetussi, daafabaaninne olan mata wode qohettidaageetussi, qassi miishshaa metoy gakkidoogeetussi nuuni woossana danddayoos. Nuuni etawu woossana koshshiyoonne hegee maaddana danddayiyo daro ishanttinne michchontti deꞌiyoogee qoncce. w18.09 5-6 ¶12-13

PHawuloosi yootidoogee aquwawu koshshiyaabaa immiyoogaa xalla gidennan, minttettoy, kaaletoynne maadoy koshshiyoogeetussi hegaadan oottiyoogaarakka gayttidaba. (Oos. 20:31-35) Nuuni nu wodiyaa, wolqqaanne nu siiquwaa kehatettan immiyoogee keehi koshshiyaaba gidiyoogaa PHawuloosi yootidobaaninne oottidoban nuna tamaarissiis. Immiyoogee asay ufayttanaadan oottiyoogaa deretettaabaa saynisiyaa xannaꞌiyaageetikka akeekidosona. Issi xuufee yootiyoogaadan, “asay haratussi loꞌꞌobaa ootti simmidi keehi ufayttidoogaa odees.” Harata maaddiyo wode, nuuni deꞌiyoogee keehi goꞌꞌiyaabadan nuuyyo siyettiyoogaa xannaꞌiyaageeti yootoosona. Yaatiyo gishshawu, asay kaseegaappe aaruwan ufayttanawunne payya gidanawu ba dosan oottanaadan issi issi eranchchati yootoosona. Hegee maalaaliyaaba gidenna; ayssi giikko, immiyoogee ufayssiyoogaa nuna siiqiya Medhdhidaagee, Yihooway ubbatoo yootees.—2 Xim. 3:16, 17. w18.08 22 ¶17-18

Isiyaasi nu Godaa Yesuus Kiristtoosabaa yootido hiraagan nuna minttettiis. Yesuusi “ba aifee be7idoban coo pirddenna; woikko ba haittai siyidoban coo kuuyenna” yaagidi, Isiyaasi kasetidi yootiis. “Hiyyeesatuyyo i xilluwan pirddana.” (Isi. 11:3, 4) Hagee minttettiyaaba gidiyoy aybissee? Nuuni geella pirdday kumido alamiyan deꞌiyo gishshataassa. Coo beꞌiyooban nu bolli pirddenna wottiyoobi baynna Daannaa nuuni ubbay yeemotti naagoos! Nuuni asaabaa ubba galla kuuyoos. SHin, nuuni nagaranchcha gidiyo gishshawu, Yesuusaagaadan wottiyoobi baynnabaa kuuyana danddayokko. Nuuni nu ayfee beꞌidobaa kaallanawu koyoos. Gidoppe attin, Yesuusi saꞌan deꞌiyo wode, nuuni ‘tumu pirddaa pirddanaadaanaappe attin, asa somꞌꞌo xeellidi pirddennaadan’ azaziis. Yesuusi nuuni A milatanaadaaninne beettiyaaban haratubaa kuuyennaadan koyiyoogee qoncce. w18.08 8 ¶1-2

Saluwaappe Xoossay haasayishin nuuni siyennaagee qoncce. I xaafetti uttida ba Qaalan, Geeshsha Maxaafan nuussi kaaletuwaa immees. Qassi ‘ammanettida wozannaama ashkkaray’ Yihoowassi oottiyaageetussi ayyaanaaban koshshiya qumaa ubbatoo immana mala Yihoowa ayyaanay denttettees. (Luq. 12:42) Xuufiyan, nu Weybsaytiyan, biidotuuninne cenggurssan giigidabatun, nu ammanuwaa minttanawu maaddiya qoodi baynnabati deꞌoosona. Yihooway ubbabaa haariyoogaanne Seexaanaynne A iita alamee nu bolli gattido ayba qohonne I xayssanaagaa, Yihooway Xaafettida ba qaalan, Geeshsha Maxaafan yootidobay simi nuuni ammanettanaadan ootto. Nuuni Yihooway yootiyoobaa loyttidi siyanawukka simi murttoos. Yaatikko, nuna haꞌꞌi gakkiyaagaa gidin sinttappekka gakkan ayba metuwankka genccidi daanawu danddayoos. Geeshsha Maxaafay, “Xoossai koyiyoogaa oottidi, i intteyyo immana giidoogaa ekkanau genccana koshshees” yaagidi nuna hassayissees.—Ibr. 10:36. w19.03 13 ¶17-18

Israaꞌeela asaa keehi daro layttawu kaalettiday Muusa gidiyo gishshawu, kaalettiyaagaadan Xoossaa asay bana xeellanee giidi Yaasu qoppennan waayi aggana. (Zaa. 34:8, 10-12) Geeshsha Maxaafaara gayttidabaa yootiya issi maxaafay Yaasa 1:1, 2 xeelliyaagan hagaadan gees: “Beni wodekka ha wodiyankka kaalettiyaagee laamettiyoogee issi biittan woppay xayanaadan oottiyaabaappe issuwaa.” Yaasu hirgganaadan oottiyaabi deꞌees. SHin I Yihoowan ammanettiisinne sohuwaara A Kaaletuwaa kaalliis. (Yaas. 1:9-11) I Xoossan coo ammanettibeenna. Geeshsha Maxaafay yootiyoogaadan, Yihooway Yaasanne Ba asaa Israaꞌeelata kiitanchchaa baggaara kaalettiis. He kiitanchchay Qaalaa, Xoossawu bayra Naꞌaa giidi nuuni qoppiyoogee bessiyaaba. (Kes. 23:20-23; Yoh. 1:1) Yaasu eta kaalettanaadan ooratti sunttettidoogaa gaasuwan laamettidabaa meezetanaadan Yihooway Israaꞌeela deriyaa maaddiis. w18.10 22-23 ¶1-4

Yihooway ayyo bantta dosan oottiyaageeta akeekeesinne ba ‘hassayiyo maxaafan’ eta sunttaa xaafees. Nuuni Yihoowa asa gidin I ‘hassayiyo maxaafan’ nu sunttay xaafettiyo wode, nuuppe koyettiyaabay deꞌees. Nuuni ‘Yihoowassi yayyananne A sunttaa bonchchana’ woy wotti dentti qoppana bessiyoogaa Milkkiyaasi yootiis. Nuuni goynniyoogaa keenan oossinne woy aybissinne nuna muleera sheedhdhiyoogee Yihooway nu sunttaa deꞌo maxaafaappe quccanaadan oottana. (Kes. 32:33; Maz. 69:28) Yaatiyo gishshawu, nuna Yihoowawu muleera sheedhdhiyoogee I koyiyoobaa oottanawunne haattan xammaqettanawu qaalaa geliyoogaappe keehi aadhdhiyaaba. He oosoti qantta, qassi sohuwaara aadhdhi bayoosona. Nuuni Yihoowa asa gididi A bagga gidanawu nu deꞌo layttan, haꞌꞌikka sinttappekka ayyo azazettiyoogaa ubbatoo bessana koshshees.—1 PHe. 4:1, 2. w18.07 23-24 ¶7-9

Hegee sohuwaara beettiyaaba gidenna. Hegawu nuuni ubbatoo baaxetana koshshees. Diccidi wozannaama gidanawu eraanne akeekaa gujjana koshshees. Geeshsha Maxaafaa ubba galla nabbabanaadan nuuyyo zoree imettiyoy hegaassa. (Maz. 1:1-3) Neeni yaatanawu halchchadii? Hegaadan nabbabiyoogee neeni Yihoowa higgetanne maarata yuushsha qoppanaadaaninne Xoossaa Qaalaa loytta akeekanaadan maaddana danddayees. Kiristtaanetussi imettida waanna higgee siiquwaa higgiyaa. Yesuusi ba erissiyo ashkkaratussi, “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yoh. 13:35) Yesuusa ishay Yaaqoobi siiquwaa “kawo higgiyaa” yaagiis. (Yaaq. 2:8) PHawuloosi qassi, “siiqiyoogee higge ubbau azazettiyoogaa” yaagiis. (Roo. 13:10) Geeshsha Maxaafay, “Xoossai siiqo” giyo gishshawu siiquwaabaaa hegaadan zirxxi ootti odiyoogee garamissenna.—1 Yoh. 4:8 w18.06 19 ¶14-15

Israaꞌeelati hanqqetissidoy Yihoowa gidikkonne, yiillotiday Muusa. I bana naagibeenna gishshawu, hegee kaalettanabaa qoppennan haasayiis. Muusee harati oottiyoobaa gaasuwan, Yihoowakko xeelliyoogaappe ba ayfiyaa wora zaariis. Muusee koyro hanotan yohuwaa maara oyqqiis. (Kes. 7:6) Gidoppe attin, I makkalanchcha Israaꞌeelatubaa daro layttawu siyiiddi takkidi dafurananne yiillotana danddayees. Muusee Yihoowa waati bonchchanaakko qoppiyoogaa aggidi bawu siyettidabaa qoppideeshsha? Muuse mala ammanettidi hananabaa yootiya uri wora simmananne xubettana danddayikko, nuuni hegaadan hanana danddayoos. Muuseegaadan, nuunikka Yihooway nuussi immana giido biittaa, ooratta alamiyaa gelanawu mati uttida. (2 PHe. 3:13) Nu giddoppe ooninne he dumma maatay baappe halanaadan koyenna. SHin nu halchchuwaa polanawu nuuni ubbatoo Yihooway dosiyoobaa oottanawu koyiyoogan A tishshi oottidi xeellana koshshees.—1 Yoh. 2:17. w18.07 15 ¶14-16

Asi bawu koyennabaa oottanaadan Seexaanay wolqqanttana danddayenna. (Yaaq. 1:14) Daroti erennan Seexaanaa halchchuwaa poloosona. SHin eti ubbay tumaa eri simmidi, oossi oottanaakko dooroosona. (Oos. 3:17; 17:30) Nuuni Xoossaa sheniyaa polanawu murttikko, Xoossaayyo ammanettennaadan Seexaanay nuna oottana danddayenna. (Iyy. 2:3; 27:5) Seexaanaynne dayddanttati danddayenna harabaykka deꞌees. Leemisuwawu, eti issi ura wozanaabaa woy I qoppiyoobaa erana danddayiyoogaa bessiyaabi Geeshsha Maxaafan baawa. Hegaa eriyaageeti Yihoowanne Yesuusa xalla. (1 Sam. 16:7; Mar. 2:8) Nuuni Xoossay koyiyoobaara maayiyaabaa haasayanawunne oottanawu danddayettida ubbaa oottikko, Seexaanay aggenna qohuwaa nu bolli gattanaadan Yihooway eeno geennaagaa ammanettana danddayoos. (Maz. 34:7) Nuuni nu morkkiyaa shaakki erana koshshees, shin ayyo yayyana koshshenna. Nagaranchcha asatikka Yihooway maaddin Seexaanaa xoonana danddayoosona. Nuuni A eqettikko, I nuuppe baqatana.—Yaaq. 4:7; 1 PHe. 5:9. w18.05 26 ¶15-17

Neeni issi koshshiyaabawu haaho katamaa baanawu halchchidabadan qoppa. He sohuwaa gakkanawu otobisiyan manddarada baana koshshees. Otobisee eqqiyoosan, daro otobisee deꞌees. Neeni halchchidobaa, hegeekka ne koyiyoosaa biya otobisiyaa demmanaagaa hassayiyoogee keehi loꞌꞌoba. Harasaa biya otobisiyan geliyoogee neeni erenna sohuwaa baanaadan oottees. Hegaadan yelagati ha wodiyan otobisiyan gidennan, bantta deꞌuwan manddarana koshshees. Eti kuuyiyoobaynne eta gakkiyaabay issi issitoo etawu kirqqi gaanaadan oottana danddayees. Yelagatoo, intte intte deꞌuwan awu baana koyiyaakko erikko, intte dooranabaa metootennan aggana danddayeeta. Neeni ne deꞌuwan Yihoowa ufayssanawu halchchay? Hegaa giyoogee nuuni ay tamaaranaakko, woy ay oottanaakko, woy aqo oyqqanawu woy oyqqennan agganawu, qassi naata yelanawu woy yelennan agganawu nu deꞌuwan kuuyiyo ubbaban A zoriyaa kaallana bessees giyoogaa. Qassi hegaa giyoogee ayyaanaaban halchchidobawu baaxetiyoogaa giyoogaa. Yihoowawu ubbatoo haggaaziya yelagati I bantta deꞌuwaa anjjanaagaa ammanettana danddayoosona. w18.04 25 ¶1-3

Yofttaahee ba shiiqettidobaa gattidi ba geelaꞌo naꞌiyaa deꞌo laytta ubban Seelon deꞌiya beeta maqidasiyan oottanaadan yeddiis. (Daan. 11:30-35) Hegee Yofttaahessi deexiyaaba gidikkonne, ba aaway kuuyidobaa polanawu ba dosan eeno giida A naꞌeeyyookka keehi deexxiyaaba gidana danddayees. (Daan. 11:36, 37) A azinaa geliyoogaa, naata yeliyoogaa, so asaa sunttaa xeesissiyoogaanne laataa agga bayaasu. O keehi minttettana koshshees. Geeshsha Maxaafay hagaadan gees: “Hagee Israaꞌeela biittan meeze gidiis: Israaꞌeelatu yelaga macca naati Galaꞌaadiyaa Yofttaahe naꞌiyo galatanawu layttan layttan oyddu gallassaa boosona.” (Daan. 11:39, 40, NW) Aqo oyqqibeenna gishshawu ‘Godaa oosuwaa’ minni oottiya Kiristtaaneta nuuni galatananne minttettana bessees.—1 Qor. 7:32-35. w18.04 17 ¶10-11

Daro kiitanchchati Seexaanaara makkalidosona. Bashshaa Haattaappe kase, Seexaanay etappe amaridaageeti asaa macca naatuura pokkobaa oottanaadan cimmiis. Geeshsha Maxaafay, miimminttee saluwaa xoolinttetuppe heezzantto kushe gidiyaagaa dafidi oliyoogaa bessiya leemisuwan hegaa qonccissees. (Doo. 6:1-4; Ajj. 12:3, 4) He kiitanchchati Xoossaa keettaa asa gidiyoogaa aggido wode, Seexaanay eta haaranaadan eeno giidosona. Nuuni he makkalanchcha kiitanchchati darajjayettibeennabadan qoppana koshshenna. Seexaanay bana kawo kessidi Xoossaa Kawotettaa qullidi kawotettaa essiis. Ayyaana alamiyan Seexaanay daydanttata haariyaageeta ootti darajjayidi, alamiyaa haariyo maataa etawu immiis. (Efi. 6:12) Seexaanay ayyaana alamiyan deꞌiya ba dirijjitiyaa baggaara asaa kawotettaa ubbaa haarees. w18.05 23 ¶5-6

Xoossay issi issitoo aawadan seeriyoogee I nuna siiqiyoogaa qonccees. Daawiti hegaa mala keha zoriyaa ekkiis. I Xoossaa qofaa wotti dentti qoppiis; I hegaa ba qofa oottiis. I Xoossaa qofay bana laammanaadan oottiis, hegaa giyoogee he qofay I loꞌꞌo asa gidanaadan oottiis giyoogaa. Intte ammanuwan hegaadan oottikko, inttekka kaseegaappe aaruwan Xoossaa siiqananne ayyo azazettanawu koyana. Intte ayyaanaabankka kayma gidana. Kirstino giyo michchiyaa hagaadan gaasu: “Taani pilggiyo wodenne nabbabidobaa wotta dentta qoppiyo wode, hegaa Yihooway taassi xaafissidobadan tawu siyettees!” Intte ayyaanaabaa qoppikko, ha alamiyaanne sinttappe A gakkanabaa Xoossaagaadan xeellana. Yihooway inttessi ha maalaalissiya eraanne akeekaa immees. Aybissi? Deꞌuwan keehi koshshiyaabay aybakko intte eranaadan, loꞌꞌobaa kuuyanaadaaninne aynne yayyennan sinttanaa wodiyaa hidootan naaganaadan I koyees!—Isi. 26:3. w18.12 26 ¶9-10