Tisaase

Nuuni Geeshsha Maxaafay yootiyo issibaa akeekanawu issi issitoo metootana danddayoos, woy qassi nuuni koyidoogaadan Yihooway nu woosaa zaarennan aggana danddayees. Hegee nuuni siranaadan oottana danddayees. Nuna sirissiyaabaa coo aggi bayikko, hegee nu ammanoy shugganaadaaninne Yihoowaara nuussi dabbotay moorettanaadan oottana danddayees. (Yaaq. 1:7, 8) Ubba qassi hegee nuuni nu hidootaa laamotan naagiyoogaa agganaadan oottana danddayees. Kiitettida PHawuloosi nu hidootay markkabiyaa oyqqiya qaaxxenna birataa mala gidiyoogaa yootiis. (Ibr. 6:19) He biratay markkabee beetan yaanne haanne shocettennaadaaninne zaallaara domꞌꞌettennaadan teqqees. SHin markkabiyaara I ohettido sanssalatay duuxxikko, he biratay maaddenna. He sanssalatay shiyikko minnennaagaadan, siree nu ammanoy minnennaadan oottees. Yaanin nuna metoy gakkiyo wode, Yihooway qaalaa gelidobaa polanaagaa ammanennan aggana danddayoos. Nu ammanoy bayikko, nu naagiyo hidootikka deꞌenna. Hegaadan haniya uri mulekka waayi ufayttana! w21.02 30 ¶14-15

Abrahaami ba soo asaara Uurappe kiyidi biyo wode awu layttay 70ppe darennan aggenna. (Doo. 11:31–12:4) Issi xeeta gidiya layttawu, I Kanaane biittan issisaappe harasaa biiddi dunkkaaniyan deꞌiis. Abrahaami hayqqiyo wode awu layttay 175. (Doo. 25:7) SHin I hemettido biittaa A zaretuyyo immanawu Yihooway gelido qaalaa polishin beꞌibeenna. Qassi katamaa, woy Xoossaa Kawotettaa beꞌanawu I daro wodiyaa deꞌibeenna. Gidikkonne, Abrahaami “lo77o ceeggidi” hayqqidoogee odettiis. (Doo. 25:8) Abrahaami daro metota genccana koshshikkonne, ammanuwan mino gididi deꞌiisinne Yihoowa ufayssan naagiis. I genccidoy aybissee? Abrahaami deꞌido wode ubban, Yihooway A naagido gishshataassanne ba dabbodan xeellido gishshataassa. (Doo. 15:1; Isi. 41:8; Yaaq. 2:22) Abrahaamaagaadan, nuuni loꞌꞌo baasuwan keexettida katamaa naagiiddi deꞌoos. (Ibr. 11:10) SHin nuuni naagiyoy keexxanaassa gidenna. Xoossaa Kawotettay 1914n eqqiis, qassi saluwan haariiddi deꞌees. (Ajj. 12:7-10) Gidoppe attin, he Kawotettay kumetta saꞌaa haariyo wodiyaa nuuni naagoos. w20.08 4-5 ¶11-12

Harati yootiyoobaa loytti ezgganawu, nuuni nuna ziqqi oottananne danddayanchcha gidana koshshees. Hegawu baaxetiyoogee keehi koshshiyo heezzu gaasoti deꞌoosona. Koyruwan, sohuwaara asaabaa hanennabaa darin qoppokko. Naaꞌꞌanttuwan, nuuni nu ishawu siyettiyaabaanne I issibaa oottiyo gaasuwaa akeekana danddayoos, qassi nuuni awu keehi qarettanaadan hegee maaddana. Heezzanttuwan, nuuni nu ishay haasayanaadan oottiyo wode, I ba hanotaa akeekana danddayees. Issi issitoo issi uri haasayana gakkanaashin bawu siyettiyaabaa loytti akeekenna. Nu ishanttuppenne michchonttuppe amaridaageeti banttana kase gakkidabaa gaasuwan woy bantta eeshshaa gaasuwan bantta qofaa yootanawu metootoosona. Eti yayyennan bantta qofaa nuuyyo yootanawu gamꞌꞌana danddayoosona, shin etawu tumuppe siyettiyaabaa nuuni akeekana danddayiyoy eti hegaa yootiyo wode xallaana. Nuuni danddayanchcha gidiyoogan Yihoowa milatikko, eti nunan ammanettana danddayoosona. Eti banttawu siyettiyaabaa yootanawu koyiyo wode, nuuni eti yootiyoobaa loytti ezggana koshshees. w20.04 15-16 ¶6-7

Darotoo moleti deꞌiyo heeray eti dosiyo haattaynne daro qumay beettiyo sohuwaana. Hegaa gishshawu, moliyaa oyqqanawu biya uri biyo wodiyaa eriyoogee keehi koshshiyaaba. Pasifikke haruuruwan deꞌiya issi misoonaawee moliyaa oyqqanawu injjetiya saatee deꞌiyoogaa akeekiis. He heeran deꞌiya Yihoowa Markkay, moliyaa oyqqanawu banaara issippe baanaadan A shoobbiis. He misoonaawee, “Taani wontto maallado heezzu saatiyan nenaara gayttana” yaagiis. He ishay zaaridi, “Neeni erabeykka. Nuuni moliyaa oyqqanawu nuussi injjetiya saatiyan gidennan, molee beettiyo saatiyan oyqqanawu boos” yaagiis. Hegaadankka asaa oyqqiya, Yesuusi erissiyo ashkkarati asay deꞌiyo sohuwaanne eta demmana danddayiyo saatiyan boosona. Leemisuwawu, Yesuusa kaalliyaageeti beeta maqidasiyaaninne Ayhuda woosa keettan, sooppe soo, qassi giyan sabbakidosona. (Oos. 5:42; 17:17; 18:4) Nuunikka nu heeran deꞌiya asaa meeziyaa erana koshshees. Nuuni darotoo asaa awan, qassi awude demmidi sabbakana danddayiyaakko eranawu, nu halchchuwaa laammanawu eeno gaana koshshees.—1 Qor. 9:19-23. w20.09 4 ¶8-9

Nuuni Yesuusaara dabbotido dabbotaa minttiyo issi ogee Yihoowa dirijjitee giigissidobaa hashetidi oottiyoogaana. Nuna heemmanaadan sunttettidaageetuura nuuni hashetidi oottiyo wode, gubaaꞌiyawu huuphe gidida Yesuusawu mata lagge gidoos. (Efi. 4:16) Leemisuwawu, SHiiquwaa Addaraashata ubbaa loytti goꞌettanawu baaxetiiddi deꞌoos. Amarida gubaaꞌeti hara gubaaꞌetuura walahettidosona. Hegaadan giigissido gishshawu daro miishshaa qoraphphida. SHin hegaappe denddidaagan, aassiya amaridaageeti ooratta hanotaa meezetana koshshiis. Ha ammanettida aassiyaageeti daro layttawu issi gubaaꞌiyan haggaazido gishshawu, yan deꞌiya ishanttuuranne michchonttuura mata lagge gidennan waayi aggana. Gidoppe attin, eti hara gubaaꞌiyan haggaazanaadan shoobettidosona. Giigissidobaa ha ammanettida erissiyo ashkkarati hashetidi oottiyoogaa Yesuusi beꞌiyo wode keehi ufayttees! w20.04 24 ¶14

Huuphessa kawoynne tohossa kawoy alamiyan keehi wolqqaama kawotetta gidanawu koyiyo gishshawu eti issoy issuwaara olettana. Leemisuwawu, Naaꞌꞌantto Alamiyaa Olaappe simmin Sooviyeete kawotettay Awurooppaappe dariya baggaa haariyoogaa doommiis. Hegaa gishshawu, tohossa kawoy huuphessa kawuwaa eqettanawu ba olanchchata hara biittatu olanchchatuura walakkanawu maayettiis. He dirijjitee Huuphessa Atlantike Maachchaa Dirijjitiyaa geetettees. Huuphessa kawoynne tohossa kawoy keehi wolqqaama olaa miishshata ootissanawu maliyoogankka daro miishshaa kessoosona. Eti Afirkkan, Isiyaaninne Laatine Amarkkan issoy issuwaa morkketa olan maaddiyoogankka issoy issuwaara olettidosona. Mata wodeppe haa simmin, Raasheenne aara hashetiya kawotettati kumetta alamiyan keehi wolqqaamidosona. Eti komppiyuteriyaa goꞌettiyoogankka tohossa kawuwaara olettoosona. He kawoti bantta miishshaa xayssiyaanne bantta kawotettaa qohiya komppiyuteriyaa prograamiyaa goꞌetteeta giidi eti issoy issuwaa mootoosona. Qassi Daaneeli kasetidi yootidoogan, huuphessa kawoy Xoossaa asaa qohiiddi deꞌees.—Dane. 11:41. w20.05 13 ¶5-6

Yihooway hananabaa yootiya Isiyaasa wode, “Aayyiyaa ba xanttiyo na7aa doganau danddayaiyye?” giidi oychchiis; yaatidi ba asawu, “Geelladan a dogiyaakkokka, taani nena dogikke!” yaagiis. (Isi. 49:15) I darotoo issi aayeera bana geeddarssenna. SHin, hagan geeddarssiis. Yihooway ba ashkkarata keehi siiqiyoogaa qonccissanawu aayeenne naꞌaa gidduwan deꞌiya mino siiquwaa goꞌettiis. Daro aayetussi Hasminiigaadan siyettees. A, “Neeni naꞌa dichchiyo wode, deꞌo laytta ubban takkiya dumma dabbotaa medhdhaasa” yaagaasu. Yihooway ba ashkkaratuppe issoy sabbakiyoogaanne shiiquwaa shiiqiyoogaa aggiyo wode erees. Yihoowawu haggaaziyoogaa aggida alꞌꞌo ishanttuppenne michchonttuppe daroti gubaaꞌiyawu simmiyo wode nuuni keehi ufayttoos! Yihooway eti simmanaadan koyees; qassi nuunikka koyoos.—1 PHe. 2:25. w20.06 18 ¶1-3

Aybippenne aaruwan goꞌꞌiyaabati ayfiyan beettana danddayokkona. Yesuusi Maatiyoosa shemppo 5-7n haasayidoban miishshaappe keehi aadhdhiya saluwaa aquwaabaa yootiis. Yaatidi I hagaadan giis: “Ne wozanai ne miishshai de7iyoosan de7ana.” (Maa. 6:19-21) Nuuni issibaa keehi goꞌꞌiyaabadan xeellikko, hegaa demmanawu baaxetoos. Nuuni Xoossaa sinttan loꞌꞌo sunttay deꞌiyoogeeta gidiyoogan ‘saluwan miishshaa dagayoos.’ He miishshay mule xayana woy wuuqettana danddayennaagaa Yesuusi yootiis. Kiitettida PHawuloosi nuuni ‘beettennabaa xeellanaadan’ zoriis. (2 Qor. 4:17, 18) Nuuni Xoossay ehaana ooratta alamiyan demmana loꞌꞌobati ubbay he beettenna aqo. Ayfiyan beettenna ha imotatu gishshawu nuuni Yihoowa galatiyoo? w20.05 26 ¶1-2

Diifee carshshay diccanaadan oottiyoogaadan, Muusee Israaꞌeelata tamaarissidobay eta ammanoy minnanaadaaninne eti minettanaadan oottiis. Nuuni hegaadan tamaarissanawu waatana danddayiyoo? Nuuni sooppe soo woy dabaaban haggaaziyo wode, Yihoowa giyo, Xoossaa buzo sunttaa asaa bessanawu Geeshsha Maxaafaa goꞌettana danddayoos. Nuuni Yihooway bonchchettanaadan oottiya keehi ufayssiya xuufeta, maaddiya biidota, qassi nu websaytiyan deꞌiyaabata eta shoobbana danddayoos. Ooso sohuwan, timirtte keettan woy oge biyo wode nuuni siiqiyo Xoossaabaanne I ay mala Xoossakko yootana danddayoos. Nunaara gayttiyaageetussi Yihooway asawunne saꞌawu halchchidobaa yootiyo wode, Yihoowa xeelliyaagan nu yootiyoobay etawu muleera oorattaba gidana danddayees. Siiqiya nu Aawaabaa haratussi tumaa yootiyo wode, nuuni Yihoowa sunttay geeyanaadan maaddoos. Qassi asay abaa daro worddota tamaaridoogaa akeekanaadan eta maaddoos. Nuuni Geeshsha Maxaafaappe asaa tamaarissiyoobay eti tamaarana danddayiyo keehi woppissiyaaba.—Isi. 65:13, 14. w20.06 10 ¶8-9

Yihoowakko simmanawu koyiyaageeta maaddanawu nuussi koshshiya eeshshati aybee? Sooppe aggidi biida naꞌaabaa Yesuusi yootido leemisuwaappe nuuni tamaarana danddayiyo amaridabaa akeeka. (Luq. 15:17-24) Naꞌay keehi eeyya gidiyoogaa wurssettan akeekidi soo simmanawu kuuyiis. Aaway ba naꞌaa demmidi woxxi biidi, qarettidi A qoommido gishshawu naꞌay ba aaway bana siiqiyoogaa eriis. Naꞌay kahan zilꞌꞌettido gishshawu, ba aawawu naꞌa geetettana bessennabadan awu siyettiis. Naꞌay bawu siyettiyaabaa ba aawawu yootido gishshawu aaway ba naꞌawu qarettiis. Yaatidi aaway ba naꞌay soo simmidoogan ufayttidoogaa bessanawu issi issibaa oottiis. Aaway A siiqiyo naꞌadan oyqqiis. Hegaa bessanawu aaway gibiraa giigissiis, qassi ba mooruwan zilꞌꞌettidi simmida naꞌawu ubbaappe loꞌꞌiya maayuwaa ehiissiis. Yihooway he leemisuwan odettida aawaa mala. Ayyaanaaban shuggida nu ishanttanne michchontta I siiqees, qassi eti baakko simmanaadan koyees. Yihoowa leemisuwaa kaalliyoogan, simmanaadan nuuni eta maaddana danddayoos. Yaatanawu, nuuni danddayanchcha, qarettiyaageeta, maariyaageetanne siiqiyaageeta gidana koshshees. w20.06 25-26 ¶8-9

Issoti issoti tumaa “ufaissan” ekkanaagaa Yesuusi yootiis; shin metoy gakkiyo wode eta ammanoy laafana. (Maa. 13:3-6, 20, 21) Eti Yesuusa kaalliyo wode yedetaynne metoy gakkanaagaa akeekennan aggana danddayoosona. (Maa. 16:24) Woy Kiristtaaneta metoy mule gakkennabadan woy Xoossay eta metuwaa ubbatoo qaariyaabadan qoppana danddayoosona. SHin ha alamiyan wayssiyaabay deꞌana. Issi issibay nu deꞌoy laamettanaadaaninne nu kaseegaadan ufayttennaadan oottana danddayees. (Maz. 6:6; Era. 9:11) Nu ishanttuppenne michchonttuppe daroti banttawu pilggidi eti tuman deꞌiyoogaa ammanidosona. Nuuni hegaadan giyoy aybissee? Issi ishay woy michchiyaa eta qohikkokka woy Kiristtaanetuppe koyettenna eeshshaa bessikkokka eta ammanoy mino. (Maz. 119:165) Eta paacee gakkiyo wode ubban, eta ammanoy minneesippe attin shuggenna. (Yaaq. 1:2-4) Nuuni hegaa mala ammanuwaa minttana koshshees. w20.07 8 ¶1; 9 ¶4-5

Geeshsha Maxaafaa nabbabiyoogaa doommanaappe kase, nabbabiyoobaa akeekanaadan maaddana mala Yihoowa woossa. Leemisuwawu, neeni oottanabaa kuuyanawu maaddana danddayiya maarata Geeshsha Maxaafaappe demmanaadan maaddana mala Yihoowa oychcha. (Pili. 4:6, 7) Qoppana danddayiyo maalaalissiya imotaa Yihooway nuussi immiis. Geeshsha Maxaafan deꞌiya taarikee neeyyo kaseppe aaruwan qonccanaadan haniiddi deꞌiyaabaanne ne nabbabiyoobay nena gakkidabadan qoppa. He taarikee odiyo uri beꞌiyoobaa beꞌanawu woy awu siyettiyaabay neeyyookka siyettanaadan oottanawu mala. Yaatada wotta dentta qoppa. Wotti dentti qoppiyoogaa giyoogee neeni nabbabiyoobaa loytta qoppiyoogaa, qassi hegee ne deꞌuwaara waani gayttiyaakko akeekiyoogaa giyoogaa. Yaatiyoogee ne nabbabiyo qofaa haraara gattanawunne loytta akeekanawu maaddees. Geeshsha Maxaafaa nabbabidi wotti dentti qoppennan aggiyoogee carqqiyaa sikkennan coo qanxxerettidi xaraphpheezan wottidi xeelliyoogaa mala. Wotti dentti qoppiyoogee nuuni kumetta qofaa akeekanaadan maaddees. w21.03 15 ¶3-5

Kiitettida PHawuloosi kasebaa hassayidi taani mino Kiristtaane gidennaakko, qashettikke shin giidi qoppana danddayees. Isiyaa awuraajjan A yeggi bayidi biida asatun I yiillotana danddayees; qassi hara ba laggetun ammanettiyoogaa aggana danddayees. SHin PHawuloosi mule hegaadan oottibeenna. PHawuloosi I mata wode hayqqanaagaa erikkokka, Yihooway bonchchettanaadan oottiyoogee keehi koshshiyaabaa gidiyoogaa dogibeenna. Qassi I harata waati minttettanaakko ubbatoo qoppiis. I ubbatoo woossiyoogan Yihoowan ammanettiis. PHawuloosi bana aggi bayidi biida ishanttubaa ubbatoo qoppibeenna. Ba laggeti bana siiquwan maaddido gishshawu eta keehi galatiyoogaa yootiis. Hegaa bollikka, PHawuloosi Xoossaa Qaalaa aggennan xannaꞌiis. (2 Xim. 3:16, 17; 4:13) Ubbaappe aaruwan, Yihoowaynne Yesuusi A siiqiyoogaa wozanappe ammanettiis. w21.03 18 ¶17-18

Xeetu layttaappe guyyiyan, worddo Kiristtaaneti daroti Kiristtaane gubaaꞌiyaa gelidosona. Eti worddo haymaanootiyaa qofaa tamaarissidosonanne Xoossaa Qaalan deꞌiya tumaa genttidosona. He wodiyaappe doommidi 1870 heera gakkanawu, Xoossaayyo saꞌan dirijjitee baawa. Worddo Kiristtaaneti goshshan deꞌiya zardduwaadan keehi daridosona. Hegaappe denddidaagan, tumu Kiristtaaneti oonakko eranawu keehi metiis. (Maa. 13:36-43) He hanotaa akeekiyoogee keehi koshshiyoy aybissee? Huuphessa kawoynne tohossa kawoy 100 layttaappenne 1870 layttaappe gidduwan haarida kawotettata gidana danddayennaagaa Daaneela shemppo 11 bessiyo gishshataassa. He wode Xoossaa asay darajjayettidaagee baynna gishshawu eti qohiyo citay baawa. SHin, huuphessa kawoynne tohossa kawoy 1870 layttaappe simmin takkennan zaarettidi denddanaagaa nuuni naagana danddayoos. w20.05 3 ¶5

Israaꞌeela biittan deꞌiya mokkiyaaba ubbaa booliyaa wudee maanaagaa Yuuꞌeeli kasetidi yootiis. (Yuu. 1:4) He hiraagay Yihoowa asay aybinne essana danddayenna booliyaa wudiyaadan aggennan sabbakiyoogaa xeelliyaagan kasetidi odettidaba giidi nuuni daro layttawu akeekida. Ha oosoy he “biittan” woy haymaanootiyaa kaalettiyaageetu aawatettaa giddon deꞌiya asaa bolli wolqqaama qohuwaa gattees giidi nuuni akeekida. SHin, nuuni kumetta hiraagaa yuushshi qoppiyo wode, hegaa dumma ginan akeekana koshshiyoogaa eroos. Booliyaa wudiyaa xeelliyaagan Yihooway hagaadan giidi qaalaa gelidobaa akeeka: “Huuphessa baggaara yiida booliyaa taani yedettada, intteppe haassana.” (Yuu. 2:20) Booleti Yesuusi sabbakanawunne erissiyo ashkkara oottanawu azazidoogaa azazettiya Yihoowa Markkata bessiyaaba gidikko, Yihooway eta yedettidi haassanawu qaalaa gelidoy aybissee? (Hiz. 33:7-9; Maa. 28:19, 20) Yihooway yedettidi haassiyoy baassi ammanettidi oottiyaageeta gidennan, A asaa ixxiya ura woy ixxiyaaba gidiyoogee qoncce. w20.04 3 ¶3-5

Yihooway nu woosaa sohuwaara zaaribeenna giidi qoppikko, nuuni ay oottana koshshii? Yaaqoobi nuuni zaari zaaridi Xoossaa ‘woossanaadan’ yootiis. Yihooway nuuni zaari zaaridi oychchin nuna hanqqettenna. Nuna gakkiya paaciyaa genccanawu aadhdhida eratettaa immanaadan nuuni A oychchikko, saluwan deꞌiya nu Aaway “kehatettan” immees. (Maz. 25:12, 13) I nuna gakkiya metuwaa beꞌees, nuuni waayettiyo wode qarettees, qassi nuna maaddanawu keehi koyees. Hegee nuuni ufayttanaadan oottees! Gidoshin, Yihooway nuussi aadhdhida eratettaa waatidi immii? Yihooway ba Qaalaa baggaara immees. (Lee. 2:6) Nuuni he aadhdhida eratettaa demmanawu Xoossa Qaalaanne nu xuufeta xannaꞌana bessees. SHin nu coo xannaꞌiyoogaa xallay gidenna. Nuuni oottanaadan Xoossay yootiyoobaa oottana bessees. Yaaqoobi “Xoossaa qaalaa oottiteppe attin, sissa [xallaa]” siyoppite yaagiis. (Yaaq. 1:22) Nuuni Xoossay zoriyoogaadan oottiyo wode, kaseppe aaruwan eeno giyaanne maariya, qassi saro asa gidoos. (Yaaq. 3:17) He eeshshati nuuni ayba paacee gakkikkonne ufayttiiddi genccanaadan maaddoosona. w21.02 29 ¶10-11

Harati xinaateta maaddiyo wode, eti ayyaanaaban diccidi xammaqettana danddayoosona. Aassiyaageeti ubbay gubaaꞌiyaa asaa qooday gujjanaadan maaddana danddayoosona. Issi aqinyiyaa hagaadan gaasu: “Hagaadan giyo leemiso haasayay deꞌees: Issi naꞌi diccanaadan heeran deꞌiya asa ubbay maaddees. Erissiyo ashkkara oottiyo nu oosoykka hegaara issi mala gaada qoppays; darotoo issi uri tumaa eranaadan gubaaꞌee maaddees.” Hegaa gishshawu, issi naꞌi gastta gidanaadan yelidaageetu, hara dabbotu, so asaa laggetunne timirtte keettan tamaarissiyaageetu ubbaa maadoy koshshees. Eti naꞌaa minttettiyoogaaninne goꞌꞌiyaabaa tamaarissiyoogan maaddana danddayoosona. Hegaadankka, gubaaꞌiyaa ishanttinne michchontti xinaateti ayyaanaaban diccidi xammaqettanaadan maaddanawu eta zorana, minttettananne leemiso gidana danddayoosona. (Lee. 15:22) Xannaꞌissiya uri gubaaꞌiyan deꞌiya harati A xinaatiyaa maaddiyo wode ufayttana koshshiyoy aybissee? Xinaateti ayyaanaaban diccanaadan daroti maaddana danddayiyo gishshataassa. w21.03 8 ¶1-3

Yelaga woy cima gidin, Kiristtaaneti ubbay iitabaa oottiiddi Yihoowawu haggaaziyaaba milatennaadan naagettana bessees. Nuuni pokkobaa oottiiddi tuman deꞌana danddayennaagaa kiitettida Yohaannisi yootiis. (1 Yoh. 1:6) Nuuni Yihooway nunan ufayttanaadan koyikko, nuuni oottiyo ubbabaa Yihooway beꞌiyoogaa muletoo hassayana koshshees. Nuuni geeman oottiyoobaa asay beꞌana xayikkonne, nu oottiyo ubbabaa Yihooway beꞌana danddayees. (Ibr. 4:13) Nuuni alamee nagaraa xeelliyo xeelaa ixxana koshshees. Yohaannisa wode, kaddidaageeti issi uri Xoossay iita giyoobaa oottiiddi aara dabbotidi deꞌana danddayees giidi yootoosona. Ha wodiyan, nuuni hegaa mala xeelay deꞌiyo asaa giddon deꞌoos. Daroti Xoossan ammaniyoogaa yootiyaaba gidikkonne, nagaraa xeelliyaagan Yihooway yootiyoobaa eti ammanokkona. Ubba qassi eti Yihooway mattumaa gaytettaabaa yootiyoobaa ammanokkona. Mattumaa gaytettaa xeelliyaagan Yihooway nagara giyo amaridabati deꞌikkonne, issi uri koyikko hegeeta oottana danddayiyoogaa he asati yootoosona. w20.07 22 ¶7-8

Ayyaanaaban neessi michcho gididaageetussi koshshiyo wodiyan exatay? Kaallidi deꞌiya hanotaa qoppa. Ammanenna azinay deꞌiyo issi michchiyaa shiiqota poꞌissada yiyoogaanne wurosaara biyoogaa aassiya issoti issoti akeekidosona. Eti A issi issitoo ba naata eheennaagaa akeekidosona. Hegaa gishshawu, I azinay naata A shiiquwaa efaanaadan eeno giikkonne, A ehaanawu koyabeennabadan qoppidi O boroosona. SHin, A bawu danddayettida ubbabaa oottiyoogaa eti akeekibookkona. A bawu kessido prograamiyan simerettana danddayukku; qassi ba naatu gishshaa kuuyiyay O gidukku. Neeni A minnada oottaydda deꞌiyo gishshawu O galatiyaabanne A oottaydda deꞌiyo loꞌꞌobaa haratuyyo yootiyaaba gidikko eti O boriyoogaa aggana danddayoosona. Hegaa mala michchontti waati oyqettanaadan Yihooway koyiyaakko cimati eroosona. (Yaaq. 1:27) Yaatiyo gishshawu cimati Yesuusaagaadan bessiyaagaadan qoppana koshshees. Eti higgiyaa kessennan keha gidiyoogaaninne haratu hanotaa akeekiyoogan hegaadan oottana danddayoosona. (Maa. 15:22-28) Cimati maaddanawu baaxetiyo wode, Yihoowaynne A dirijjite michchonttussi qoppiyoogaa eti akeekanaadan maaddoosona. w20.09 24-25 ¶17-19

Hananabaa yootiya Daaneeli ba deꞌo laytta ubban bana ziqqi oottidi deꞌiisinne Yihoowa kaaletuwaa ubbatoo oychchiis. Leemisuwawu, Daaneeli Naabukadanaxoori aymottido aymuwaa birshshanaadan Yihooway A goꞌettido wode, I hegaa ba eran birshshidoogaa yootibeenna. SHin, I bana ziqqi oottidi Yihooway bonchchettanaadaaninne sabettanaadan oottiis. (Dane. 2:26-28) Hegaappe nuuni ay tamaariyoo? Ishantti nu haasayaa dosikko woy nuuni haggaazuwan loꞌꞌo ayfiyaa demmikko, nuuni bonchcho ubbaa Yihoowayyo immana bessees. Yihooway maaddennan nuuni he oosota oottana danddayennaagaa nuna ziqqi oottidi ammanana bessees. (Pili. 4:13) Nuuni hegaadan oottiyo wode, Yesuusa leemisuwaakka kaalloos. Yesuusi Yihoowan ammanettiis. (Yoh. 5:19, 30) I saluwan deꞌiya ba Aawaa maataa ekkanawu mule mali erenna. Piliphphisiyuusa 2:6y Yesuusi “Xoossaa keeni wolqqan gidanau mali be7iyoogaa bessiyaabaadan” qoodibeennaagaa yootees. Yesuusi azazettiya Naꞌa gidido gishshawu, bawu danddayettennabaa akeekiisinne ba Aawaa maataa bonchchiis. w20.08 11 ¶12-13

Deꞌuwawu efiya ogiyan woxxiya amaridaageeti gencciyo metota harati beꞌana danddayokkona, ubba qassi akeekennan aggana danddayoosona. Neeni koyiyoogaa keena Yihoowawu oottennaadan diggiya metoy nena gakkiyaabanne harati ne hanotaa akeekennabadan neeyyo siyettiyaaba gidikko, Mafibosheeta hanotan neeni minettana danddayaasa. (2 Sam. 4:4) I abbiyaa pacaa genccana koshshiis, qassi Kawuwaa Daawiti abaa balan qoppidi A likke gidenna ogiyan oyqqiis. Gidikkonne, I lanccibeenna. I demmido loꞌꞌobaa gishshawu galatiis. Daawiti awu kase kehidobaa gishshawu I galatiis. (2 Sam. 9:6-10) Hegaa gishshawu, Daawiti A bessenna ogiyan oyqqido wode, Mafibosheeti hegaara gayttida ubbabaa yuushshi qoppiis. Daawiti mooridoban I lanccibeenna. Qassi Daawiti oottidobaa gishshawu I Yihoowa amassalibeenna. Mafibosheeti Yihooway sunttido kawuwaa I maaddana danddayiyooban xeelaa wottiis. (2 Sam. 16:1-4; 19:24-30) Mafibosheeti oottido loꞌꞌobaappe nuuni tamaaranaadan Yihooway hegaa Geeshsha Maxaafan xaafissiis.—Roo. 15:4. w20.04 26 ¶3; 30 ¶18-19

Gubaaꞌiyan deꞌiya issoti issoti misoonaawee, dumma aqinye, woy ubba wode haggaaziyaageeta gididi oottanaadan sunttettana danddayoosona. Eti sabbakiyoonne erissiyo ashkkara oottiyo oosuwaa ubba wode oottanawu kuuyidosona. Yihoowawu ubba wode haggaaziya darotussi daro miishshay woy aqoy deꞌana xayikkonne, loꞌꞌobaa etawu Yihooway darobaa immiis. (Mar. 10:29, 30) He alꞌꞌo ishanttanne michchontta nuuni siiqoos; qassi eti gubaaꞌiyaa yarata gidiyo gishshawu keehi galatoos! Gubaaꞌiyan alꞌꞌo gididaageeti sunttettida ishanttunne ubba wode haggaaziyaageetu xallee? Eta xalla gidokkona! Kawotettaa mishiraachchuwaa aassiyaageeti ubbay Xoossawunne gubaaꞌiyawu keehi alꞌꞌo. (Roo. 10:15; 1 Qor. 3:6-8) Ayssi giikko, asay nu Goday Yesuus Kiristtoosi erissiyo ashkkara gidanaadan maaddiyoogee gubaaꞌiyaa waanna halchchotuppe issuwaa. (Maa. 28:19, 20; 1 Xim. 2:4) Xammaqettidaageeta gidin xammaqettibeennaageeta gidin, sabbakiya ubbay he oosoy bantta deꞌuwan aybippenne aadhdhiyaaba gidanaadan baaxetoosona.—Maa. 24:14. w20.08 21 ¶7-8

Ha gallassa xiqisiyan qonccidaagaadan, metoy gakkiyo wode Yesuusi nuna maaddees. Yesuusi yootidobay nuna minttettana danddayees. Aybissi? Genccanawu metiya gallassati deꞌiyo gishshataassa. Leemisuwawu, siiqiyo uri hayqqiyo wode nuuni azzaniyoy amarida galla xallaassa gidennan, daro layttaassa gidana danddayoos. Issoti issoti cimido gishshawu metiya gallassatun deꞌoosona. Harati qassi unꞌꞌettidi keehi metootiyo gallassati deꞌoosona. SHin nu deꞌuwan keehi metiya gallassata gujjin “ubba wode” Yesuusi nunaara deꞌiyoogaa nuuni eriyo gishshawu genccana danddayoos. (Maa. 11:28-30) Xoossaa Qaalay Yihooway ba kiitanchchatu baggaara nuna maaddiyoogaa yootees. (Ibr. 1:7, 14) Leemisuwawu, ‘zare ubbaayyo, dumma dumma biittaa qaala ubbaayyo’ nuuni ‘Kawotettaa mishiraachchuwaa’ sabbakiyo wode kiitanchchati nuna maaddoosona.—Maa. 24:13, 14; Ajj. 14:6. w20.11 13-14 ¶6-7

Nu xinaatee tamaariyoobay Geeshsha Maxaafaappe gidiyoogaa I akeekanaadan koyoos. (1 Tas. 2:13) Hegaadan waati oottana danddayiyoo? I tamaariyoobaa yootanaadan minttetta. Geeshsha Maxaafaa xiqiseta ubbatoo neeni awu qonccissiyoogaappe amaridaageeta I neeyyo qonccissanaadan oychcha. Xoossaa Qaalaa ba deꞌuwan waati oosuwan peeshshanaakko xinaatee akeekanaadan maadda. I nabbabido xiqiseta xeelliyaagan I qoppiyoonne awu siyettiyaabaa yootanaadan maaddanawu oyshata oychcha. (Luq. 10:25-28) Leemisuwawu, hagaadan oychcha: “Yihoowa eeshshatuppe issuwaa akeekanaadan ha xiqisee nena waati maaddidee?” “Ha Geeshsha Maxaafaa tumaappe neeni waana goꞌettana danddayay?” “Neeni tamaaridobaa xeelliyaagan neeyyo aybi siyettii?” Waannabay, I ay keena eridee giyoogaa gidennan, he eridobaa ay keena siiqiinne oosuwan peeshshii giyoogaa. Xannaꞌissiyo wode, Geeshsha Maxaafaa loytta goꞌetta. Tamaarissiyoogan neeni kaseppe qara gidanawu ne huuphiyaa ziqqi oottana koshshees. w20.10 15 ¶5-6

Kawotettaa mishiraachchuwaa sabbakiyo oosoy keerettida wodiyan polettanaagaa nuuni ammanettana danddayoos. Nohe wode hanidabaa qoppa. Yihooway oottiyoobata ubbatoo bessiya wodiyan oottiyoogaa qonccissiis. Yihooway Bashshaa Haattay yaana wodiyaa 120 gidiya layttaappe kase kuuyiis. Daro layttaappe guyyiyan, Nohee markkabiyaa keexxanaadan Yihooway yootiis. Bashshaa Haattay doommanaappe kase, Nohee markkabiyaa 40 woy 50 layttawu minnidi keexxennan aggenna. Yootiyoobaa asay siyennan ixxikkokka, markkabiyaa geliyo wodee Yihooway gakkiis gaana gakkanaashin Nohee sabbakiyoogaa aggibeenna. Hegaappe simmin, “GODAI markkabiyaa penggiyaa gorddiis.” (Doo. 6:3; 7:1, 2, 16) Mata wode, Kawotetta mishiraachchuwaa sabbakiyo oosoy eqqanaadan Yihooway oottana. Hegaappe simmidi, I Seexaanaa alamiyaa xayssana; yaatidi Xoossawu azazettiya asay kumido ooratta alamiyaa ehaana. He wode gakkanaashin, Nohe leemisuwaanne aggennan mishiraachchuwaa sabbakida haratu leemisuwaa kaalliyaageeta gidoos. Sabbakiyo oosuwaa aggennan oottiyaageeta, danddayanchchata, Yihoowaninne I gelido qaalan ammanuwaa minttidi deꞌiyaageeta gidoos. w20.09 13 ¶18-19

Aawatettay deꞌiyo uri baynnaba gidikko, Yihoowa so asay maaray mankkay baynnaagaanne ufayttennaagaa gidana. Leemisuwawu, wurssettan ooni kuuyana bessiyaakko, qassi he kuuyettidabata ooni oottanaakko eriya uri baawa. Xoossay aawatettay deꞌanaadan oottidoy loꞌꞌobaassa gidikko, ha wodiyan daro macca asati banttana bantta azinay huqqunniyaabadan qoppiyoy aybissee? Daro attumaageeti so asaa deꞌuwaa xeelliyaagan Yihooway kessido higgiyaa aggidi asaa wogaa kaalliyo gishshataassa. Woy eti banttana ufayssanawu machchota iita ogiyan oyqqana danddayoosona. Leemisuwawu, issi azinay I ba machcheeppe dariyoogaa bessanawu woy I shugo gidennaagaa harati eranaadan oottanawu O huqqunnidi haarana danddayees. I ba machchiyaa A siiqanaadan wolqqanttana danddayennabadan qoppikkonne, O bawu yayyanaadan oottana danddayees. Qassi hegaadan yashissiyoogaa O haariyo ogedan qoppana danddayees. Hegaadan qoppiyaanne issibaa hegaadan oottiya attumaageeti likke gidennaagee qoncce. Eti maccaasaa bessiyaagaadan bonchchokkona, qassi Yihooway koyiyoobaappe phalqqettiyaaba oottoosona.—Efi. 5:25, 28. w21.02 3 ¶6-7

Neeni issi metuwaa xeelliyaagan hirggiyo wode, Yihooway nena maaddanaadan woossa. Yihooway “asa eratettaa ubbaappe aadhdhiya Xoossaa [sarotettaa]” neessi immiyoogan ne woosa zaarees. (Pili. 4:6, 7) Yihooway ba geeshsha ayyaanaa baggaara neessi sarotettaa immana. (Gal. 5:22) Neeni Yihoowakko woossiyo wode, neessi siyettiya ubbabaa ayyo yoota. Ne metoy aybakko assi yoota; qassi hegaa xeelliyaagan neessi siyettiyaabaa awu qonccissa. He metuwaa xoonana danddayiyo ogee deꞌikko, hegaa eranawu aadhdhida eratettaa demmanawunne hegaa oottana mala wolqqaa demmanawu oychcha. He metuwaa xoonanawu neeni aynne oottana danddayennaba gidikko, darin hirggennaadan Yihooway nena maaddanaadan oychcha. Neeyyo siyettiya ubbabaa woosan yootiyo wode Yihooway ne woosaa waati zaaridaakko neeni guyyeppe loytta akeekana. Ne woosawu sohuwaara zaaruwaa demmana xayikkokka, woossiyoogaa aggoppa. Yihooway neessi siyettiyaabaa neeni wurssada awu yootiyoogaa xalla gidennan, hegaabaa aggennan woossanaadankka I koyees.—Luq. 11:8-10. w21.01 3 ¶6-7

Ha wodiyan gubaaꞌiyan deꞌiya amaridaageeti aqo oyqqidaageetanne naati deꞌiyoogeeta. SHin, aqo oyqqibeenna daro ishanttinne michchonttikka gubaaꞌiyan deꞌoosona. Aqo oyqqibeennaageeta nuuni waati xeellana koshshii? Yesuusi aqo oyqqibeennaageeta waati xeellidaakko beꞌa. Yesuusi saꞌan haggaaziyo wode aqo oyqqibeenna. I aqo oyqqennan deꞌidi kumetta wozanan ba oosuwaa wudidi oottiis. Aqo oyqqiyoogee woy oyqqennan aggiyoogee issi Kiristtaaniyaappe koyettiyaaba giidi Yesuusi mule tamaarissibeenna. SHin, amarida Kiristtaaneti aqo oyqqennan deꞌanawu dooriyoogaa Yesuusi yootiis. (Maa. 19:12) Yesuusi aqo oyqqibeennaageeta bonchchiis. I aqo oyqqibeennaageeti haratuppe guuxxiyaabadan woy etawu issibay pacciyaabadan qoppibeenna. Yesuusaagaadan, kiitettida PHawuloosi haggaaziyo wode aqo oyqqennan deꞌiis. PHawuloosi issi Kiristtaanee aqo oyqqiyoogee bala giidi mule tamaarissibeenna. I hegee issi uri bawu kuuyiyooba gidiyoogaa akeekiis. w20.08 28 ¶7-8

Kiitettida Yohaannisi daro layttaa deꞌido gishshawu ba deꞌuwan ufayssiya darobaa beꞌiis. Ammanuwaa shugissiya daro metotikka A gakkidosona. SHin I ba ishanttanne michchontta siiqanaadan Yesuusi azazidobaa azazettanawu ubbatoo baaxetiis. Hegaappe denddidaagan, Yohaannisi Yihoowaynne Yesuusi A siiqiyoogaanne ay metuwaanne genccanaadan eti wolqqaa immanaagaa ammanettiis. (Yoh. 14:15-17; 15: 9, 10) Yohaannisi ba ishanttanne michchontta siiqiyoogaanne hegaa haasayiyoobaaninne oottiyooban bessennaadan Seexaanaynne A alamee diggana danddayeenna. Nuunikka Yohaannisaagaadan oonanne siiqenna Seexaanay haariyo ha alamiyan deꞌoos. (1 Yoh. 3:1, 10) I nu ishanttanne michchontta siiqiyoogaa nuna digganawu koyikkonne nu paqqadana xayikko, I hegaadan oottana danddayenna. Nuuni nu ishanttanne michchontta siiqanawu qassi eta siiqiyoogaa haasayiyoobaaninne oottiyooban bessanawu murttidaageeta gidoos. Nuuni hegaadan siiqettiyo wode Yihoowa so asaa yara gidiyoogan keehi ufayttana.—1 Yoh. 4:7. w21.01 13 ¶18-19

Seexaanay haariyo ha alamiyan deꞌoy keehi metana danddayees; qassi nuuni issi issitoo waatanaakko erokko. (2 Xim. 3:1) SHin nuuni unꞌꞌettana woy yayyana koshshenna. Yihooway nuna gakkiya metuwaa erees. Nuussi maadoy koshshiyo wode, I ba ushachcha kushiyan nuna oyqqanawu qaalaa geliis. (Isi. 41:10, 13) Yihooway maaddanaagaanne nu metuwaa genccanawu koshshiya wolqqaa Geeshsha Maxaafaappe demmanaagaa ammanettoos. Nu biidotinne cenggurssan giigiya diraamati, qassi “Etaagaadan Ammanite” giya kaalli kaalli kiya huuphe yohoti Geeshsha Maxaafan deꞌiya taarikee neeyyo kaseppe aaruwan qonccanaadan maaddana. Hegeeta beꞌanaappe, siyanaappe woy nabbabanaappe kase, neeni oosuwan peeshshana danddayiyo timirttiyaa demmanaadan Yihooway nena maaddana mala woossa. He taarikee nebaa gaada qoppa. Yihoowawu ammanettida ha ashkkarati oottidobaanne eti metuwaa genccanaadan I waati maaddidaakko wotta dentta qoppa. Yaatada, hegaappe tamaaridobaa ne deꞌuwan oosuwan peeshsha. Yihooway nena maaddiyo gishshawu A galata. Qassi harata minttettiyoonne maaddiyo ogiyaa koyiyoogan galatiyoogaa bessa. w21.03 19 ¶22-23

Intte aqo oyqqidaageetanne naata yelanawu koyiyaageeta gidikko, inttena hagaadan oychchite: Nuuni Yihoowanne A Qaalaa siiqiyaa bana ziqqi oottiya asatu malee? Imota gidida gacino naꞌa dichchanaadan Yihooway nuna dooranee? (Maz. 127:4) Neeni yelidaagaa gidikko, nena hagaadan oychcha: ‘Minni oottiyoogee loꞌꞌo gidiyoogaa ta naata tamaarissiyaanaa?’ (Era. 3:12, 13) ‘Qohuwaappe ta naata naaganawu tawu danddayettida ubbabaa oottiyaanaa?’ (Lee. 22:3) Intte naata gakkana danddayiya meto ubbaappe eta naagana danddayekketa. SHin Geeshsha Maxaafay yootiyo zoriyan waati ammanettanaakko siiquwan eta ubbatoo tamaarissiyoogan banttana gakkiya metuwawu eti giigettanaadan maaddana danddayeeta. (Lee. 2:1-6) Leemisuwawu, intte dabbotuppe issoy Yihoowawu goynniyoogaa aggikko, Yihoowawu ammanettidi deꞌiyoogee keehi koshshiyaaba gidiyoy aybissakko intte naati Xoossaa Qaalaappe akeekanaadan maaddite. (Maz. 31:23) Woy intte siiqiyo uri hayqqikko, intte naati kayyottiyoogaa genccanawunne sarotettaa demmanawu Xoossaa Qaalaa waati goꞌettanaakko bessite.—2 Qor. 1:3, 4; 2 Xim. 3:16. w20.10 27 ¶7