Hidaare

Nuuni Yoonaasa hanotaa xeelliyaagan ubbabaa erenna gishshawu, I ammanettibeennanne azazettibeenna giidi qoppana danddayoos. I Nanawen pirddaa kiitaa yootanaadan Yihooway A azaziis. SHin Yoonaasi azazettiyoogaa aggidi “GODAA sinttaappe baqatidi,” harasaa biya markkabiyan geliis. (Yona. 1:1-3) Nena gidiyaakko Yoonaasi Yihoowawu azazettanaadan A haranttuwaa azazuutee? Ne waaya azazana. SHin, Yihooway azaziyo gaasoy deꞌiyoogaa akeekiis. (Yona. 3:1, 2) Yoonaasi I ay mala asakko ba woosan qonccissiis. (Yona 2:1, 2, 9) Yoonaasi Yihoowakko darotoo woossidoogee qoncce. He woosatuppe issoy, I loꞌꞌo asa gidiyoogaa akeekanaadan nuna maaddees. Kiittidosaa I aggidi baqatikkonne, I bana ziqqi oottiyoogaa, galatiyoogaanne Yihoowayyo azazettanawu wozanappe koyiyoogaa A woosay qonccissees. Yaatiyo gishshawu, Yihooway Yoonaasi balidoban xeelaa wottibeennaagee garamissenna. I A woosaa zaariis, qassi A baggaara hananabaa yootiyoogaa aggibeenna! Cimati ubbaykka zoranaappe kase, hanotaa ‘siyiyoogee’ keehi koshshiyaaba! w20.04 15 ¶4-6

Koyro xeetu layttan deꞌida erissiyo ashkkarati Kiristtaanetu timirttiyaa ammanidosonanne Xoossaa Qaalaa akeekanawu geeshsha ayyaanay maaddanaagaa ammanettidosona. Eti tamaariyoobawu denddoy Geeshsha Maxaafaa gidiyoogaa shaakki eranawu pilggidosona. (Oos. 17:11, 12; Ibr. 5:14) Eti banttawu siyettiyaaba xallan bantta ammanuwaa minttibookkona; qassi bantta mala Kiristtaanetuura laggetiyoogee ufayssiyo gishsha xallawu Yihoowawu haggaazibookkona. SHin, eti bantta ammanuwaa minttidoy “Xoossaabaa suure eraa” demmidoogaana. (Qol. 1:9, 10, NW) Geeshsha Maxaafaa tumay laamettenna. (Maz. 119:160) Leemisuwawu, issi Kiristtaanee nuna yiilloyikko woy gita nagaraa oottikko, Geeshsha Maxaafaa tumay laamettenna. Nuna metoy gakkiyo wodekka he tumay laamettenna. Hegaa gishshawu, nuuni Geeshsha Maxaafaa timirtteta loytti erananne he timirtteti tuma gidiyoogaa shaakki erana koshshees. Nuuni Geeshsha Maxaafay tamaarissiyoobaa mintti ammanikko, meto wodiyankka Yihoowayyo ammanettidi deꞌana. w20.07 9 ¶6-7

Yesuusi nuuni tiyettida ba ishanttuyyo oottiyoobaa baayyo oottiyoobadan xeellees. (Maa. 25:34-40) Nuuni tiyettidaageeta maaddiyo waanna ogee Yesuusi bana kaalliyaageeti oottanaadan azazido erissiyo ashkkara oottiyo oosuwaa kumetta wozanappe oottiyoogaa. (Maa. 28:19, 20) Kumetta saꞌan ha wodiyan oosettiiddi deꞌiya sabbakuwaa oosuwaa Kiristtoosa ishantti oottana danddayiyoy eta ‘hara dorssati’ maaddiyoogaa xallaana. (Yoh. 10:16) Neeni hara dorssatuppe issuwaa gidikko, ha oosuwaa oottiyo wode ubban Kiristtoosa ishanttanne Yesuusa siiqiyoogaa bessaasa. Nuuni Yihoowaynne Yesuusi kaalettiyo oosuwaa maaddanawu miishshaa immiyoogankka eta dabbo gidoos. (Luq. 16:9) Leemisuwawu, qohettidaageeta maaddiyoogaa gujjin, kumetta saꞌan oosettiya oosuwawu miishshaa immana danddayoos. Nuuni nu gubaaꞌiyaanne maadoy koshshiyo nuuni eriyoogeetakka miishshan maaddana danddayoos.—Lee. 19:17. w20.04 24 ¶12-13

Huuphessa kawoy “kase ba maizza aawatu xoossata” kariyoogaa waati bessidee? Sooviyeete kawotettay haymaanooteta muleera xayssanawu koyido gishshawu, etappe maataa muleera wotti ekkanawu maliis. Sooviyeete kawotettay 1918 doomettaa heeran timirtte keettatun Xoossay baawa giidi tamaarissanaadan oottiya azazuwaa kessiis. Huuphessa kawoy ‘qatotu xoossaa waati bonchchidee’? Sooviyeete kawotettay ba olanchchata loohissiyoogaaninne ba wolqqaa minttanawu shaꞌan qoodettiya wolqqaama olaa miishshata medhdhiyoogan keehi daro miishshaa kessiis. Biilooniyan qoodettiya asaa worana danddayiya wolqqaama olaa miishshata huuphessa kawoykka tohossa kawoykka wurssettan shiishshidosona! Huuphessa kawoy tohossa kawuwaara issi keehi koshshiyaabaa issippe oottiis. ‘Eti bashshaa tunatettaa,’ hegeekka Kawotettatu Issippetettaa essidosona.—Dane. 11:31. w20.05 6-7 ¶16-17

Ayyaanaaban shuggidaageeta koyiyoogan ooni maaddana danddayii? Cimata, aqinyetanne shuggidaageetu so asaa gujjin, gubaaꞌiyan deꞌiya aassiyaageeti ubbay ayyaanaaban shuggidaageeta koyiyoogan maaddana danddayoosona. Neeyyo ayyaanaaban shuggida laggee woy dabboy deꞌii? Neeni sooppe soo woy dabaaban haggaazishin ayyaanaaban shuggida uri nenaara gayttikko, neeni waatana koshshii? Biidi he izaawa oychchanaadan I koyikko, A adrashaa woy silkke payduwaa gubaaꞌe cimatussi neeni immanawu koyiyoogaa yoota. Toomaasa giyo gubaaꞌe cimay hagaadan giis: “Koyro, ishanttinne michchontti shuggidaageeti deꞌiyo sohuwaa eriyaakkonne taani eta oychchays. Woy qassi shiiqota shiiqiyoogaa aggida uraa aassiyaageeti hassayiyaakkonne oychchays. Yaatada, taani ayyaanaaban shuggida ishantta woy michchontta oychchanawu biyo wode, eta naatubaanne eta dabbotubaa oychchays. Ayyaanaaban shuggida amaridaageeti bantta naata shiiqota kase ehoosona, qassi he naati kase aassiyaageeta gidennan aggokkona. Yihoowakko simmanaadan etawukka maadoy koshshana danddayees.” w20.06 24 ¶1; 25 ¶6-7

Saꞌan deꞌiya ubba meretatu giddon, kase nuna gakkidabaa hassayiyoogan kandduwaabaa tamaarana danddayiyay asa xalla. Hegaappe denddidaagan, nu qoppiyoobaanne nu deꞌuwaa laammana danddayoos, yaatidi loꞌꞌo asa gidoos. (1 Qor. 6:9-11; Qol. 3:9, 10) Nuuni likke gididabaanne likke gidennabaa giddon deꞌiya dummatettaa akeekanawu nu kahaa loohissana danddayoos. (Ibr. 5:14) Nuuni siiqiyoogaa, qarettiyoogaanne maariyoogaa tamaarana danddayoos. Qassi suure pirddiya Yihoowa milatiyoogaa tamaarana danddayoos. Yihooway nuna kase maaddidonne minttettido ubbabaa nuuni hassayanawu baaxetiyoogee hassayiyo imotaa gishshawu A galatiyoogaa bessiyo ogetuppe issuwaa. Yaatiyoogee, I nuna sinttappekka maaddanaagaa nuuni loytti ammanettanaadan oottees. (Maz. 77:12; 78:4, 7) Hara ogee hara asay nuuyyo oottiyo loꞌꞌobata hassayiyoogaanne eti oottiyoobawu eta galatiyoogaa. Galatiya asay haratuppe aaruwan ufayttana danddayiyoogaa eranchchati akeekidosona. w20.05 23 ¶12-13

Muusee zaallaa kooppuwaa giddo gelidi, ba sinttaara kanttiya Yihoowa bonchchuwaa beꞌiyo wode ayyo aybi siyettidaakko qoppa. Hegee Yesuusi saꞌaa yaanaappe kase ay asinne beꞌidobaappe keehi maalaaliyaaba gidennan aggenna! Muusee kaallidi deꞌiya qaalaa siyidoy kiitanchchaa baggaara gidiyoogee qoncce: “Taani GODAA; taani GODAA; qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa. Taani ta aggenna siiquwaa sha7atussi naagiyaagaa; iitatettaa, makkalaanne nagaraa atto yaagiyaagaa.” (Kes. 33:17-23; 34:5-7) Hachchi gallassa xiqisee yootiyoogaadan, Muusee Yihoowa sunttaa goꞌettido wode he hanotaabaa qoppennan aggenna. Nuuni Yihoowa sunttaabaa qoppiyo wode, Yihooway ay mala Xoossakkokka qoppana koshshees. Nuuni Yihoowa eeshshaabaa, hegeekka A wolqqaabaa, A aadhdhida eratettaabaa, A suure pirddaabaanne A siiquwaabaa qoppana bessees. Hegeetanne hara eeshshata wotti dentti qoppiyoogee kaseegaappe aaruwan A bonchchanaadan nuna denttettana danddayees.—Maz. 77:11-15. w20.06 8-9 ¶3-4

Yesuusi ba erissiyo ashkkarati issoy issuwaara siiqettiyoogan erettanaagaa yootiis. (Yoh. 13:34, 35) SHin nuuyyo mino ammanoy deꞌanaadan hegaappe aadhdhiyaabay koshshees. Nu ammanuwawu denddoy Xoossaa asay Kiristtoosaagaa mala siiquwaa bessiyoogaana xalla gidana bessenna. Aybissi? Ne mala Kiristtaanee, ubba qassi gubaaꞌe cimay woy aqinyee gita nagaraa oottiis gaada qoppa. Woykko issi ishay woy michchiyaa issiban nena qohikko shin? Woy issi uri kaddidaagaa gididi, nuuni tamaariyoobay tuma gidenna giidi yootana danddayees. Hegaa malabay hanikko, neeni xubettada Yihoowayyo haggaaziyoogaa agguutee? Nuuni tamaariyoobay hagaa: Ne ammanoy keexettidoy Xoossaara dabbotido dabbotan gidennan, haratu hanotaa beꞌiyoogaana gidikko, ne ammanoy mino gidenna. Neeni ne ammanuwaa keettaa keexxanawu neeyyo siyettiya laafaa malabata xalla goꞌettiyoogaappe minobatakka goꞌettana bessees. Geeshsha Maxaafay Yihoowabaa tamaarissiyo tumaa neeni pilggada ammanana koshshees.—Roo. 12:2. w20.07 8 ¶2-3

Yihoowakko simmanawu koyiya, ayyaanaaban shuggidaageeta demmanaadan kiitanchchati nuna maaddiyoogaa bessiya, deꞌuwan hanida darobay deꞌees. (Ajj. 14:6) Leemisuwawu, ayyaanaaban shuggida Silviyo giyo Ekuwadoren deꞌiya ishay gubaaꞌiyaa simmanawu bana maaddanaadan Yihooway issi ura kiittana mala woossiis. I woossishin, A karee qoxettiis. Naaꞌꞌu cimati A penggen deꞌoosona. Eti A oychchanawu biido wode, koshshiyaaban A maaddiyoogaa doommidoogan ufayttidosona. Ayyaanaaban shuggidaageeti Yihoowakko simmanaadan nuuni maaddiyoogan keehi ufayttana. Ayyaanaaban shuggidaageeta loytti maaddanawu baaxetiya Salvador giyo aqinyee yootidobaa akeeka: “Taani issi issitoo ufayttada yeekkiyoogaa agganawu metootays. Yihooway Seexaanaa alamiyaappe ba alꞌꞌo dorssata ashshiyoogaanne ha oosuwan taani aara hashetiyo maatay taayyo deꞌiyoogaa qoppiyoogee tana keehi ufayssees.” Neeni ayyaanaaban shuggida ura gidikko, Yihooway nena haꞌꞌikka siiqiyoogaa ammanetta. Yihooway neeni simmanaagaa naageesinne neeni simmiyo wode I ufayssan mokki ekkees. w20.06 29 ¶16-18

Yihooway nu gita ‘asttamaare’ gidiyo gishshawu, nuna tamaarissanawu ba Qaalan leemiso gidiyaageetubaa xaafissiis. (Isi. 30:21) Xoossaa ufayssiya eeshshata bessida asatubaa Geeshsha Maxaafay yootiyo taariketa wotti dentti qoppiyo wode tamaaroos. Hegaa mala loꞌꞌo eeshshata bessennan aggida asatubaappekka tamaaroos. (Maz. 37:37; 1 Qor. 10:11) Kawuwaa Saaꞌoola gakkidabaa qoppa. I yelagatettan ba abbiyaa pacaa eriya asa; ubba I aawatettaa ekkanawu mammottiis. (1 Sam. 9:21; 10:20-22) SHin guyyeppe, I otorettiyaagaa gidiis, qassi I oottana bessenna oosuwaa oottiis. I kawo gididi takkennan he iita eeshshaa bessiyoogaa doommiis. Issitoo, I hananabaa yootiya Sameela naagiyo wode danddayennan aggiis; qassi oottana bessennaba gidiyoogaa eriiddi, xuuggiyo yarshshuwaa shiishshiis. Hegaappe denddidaagan, Saaꞌooli Yihoowan nashettibeenna, qassi wurssettan Yihooway kawotettaappe A diggiis. (1 Sam. 13:8-14) Nuuni naagettanaadan odettida ha leemisuwaappe tamaaridi, nuussi maatay imettibeennabaa oottennan aggikko, akeekanchcha gidoos. w20.08 10 ¶10-11

Yihooway Kiristtoosa baggaara attuma asata “imota” oottidi gubaaꞌiyawu immidoogee tuma. (Efi. 4:8) “Imota” gidida he attuma asati Bolla Gididi Heemmiyaagaa yarata, Bolla Gididi Heemmiyaagaa Maaddiyaageeta, Macara Biiruwaa Konttiyaa yarata, woradaa xomoosiyaageeta, Geeshsha Maxaafaa timirtte keettatun tamaarissiyaageeta, cimatanne gubaaꞌiyawu oottiyaageeta. Ha ishantti ubbay Yihoowa alꞌꞌo dorssata heemmanawunne gubaaꞌiyaa minttanawu geeshsha ayyaanan sunttettidosona. (1 PHe. 5:2, 3) Ishantti dumma dumma oosota oottanaadan Geeshsha ayyaanan sunttettidosona. Kushiyaanne tohuwaa mala dumma dumma bollaa qommoti kumetta bollaa maaddanawu oottiyoogaadan, geeshsha ayyaanan sunttettida ishantti kumetta gubaaꞌiyaa maaddanawu minni oottoosona. Eti haratun sabettanawu baaxetokkona. Yaatiyoogaappe eti bantta ishanttanne michchontta minttettanawu baaxetoosona. (1 Tas. 2:6-8) Bantta koshshaappe haratu koshshaa kaseyiya he ishantta Yihooway nuussi immido gishshawu, A keehi galatoos. w20.08 21 ¶5-6

Sabbakanaadan nuna denttettiya issi gaasoy asay “hirggiyo gishshaunne asaa maaddiyaabi bainna gishshau” Kawotettaa tumabaa tamaaranawu eti keehi koyiyo gishshaassa. (Maa. 9:36) Asay ubbay tumaa eranaadaaninne attanaadan Yihooway koyees. (1 Xim. 2:4) Asay attanaadan sabbakiyo oosoy maaddiyoogaa eriyoogee nuuni sabbakanawu koyanaadan oottana. Nuuni asa shemppuwaa ashshoos. (Roo. 10:13-15; 1 Xim. 4:16) Qassi sabbakiyo oosuwawu nuussi koshshiya miishshati deꞌana bessees. Hegaa bollikka, he miishshata waati goꞌettanaakko erana koshshees. Yesuusi ba erissiyo ashkkarati mishiraachchuwaa waati sabbakanaakko yootiis. Eti ay oyqqanaakko, awan sabbakanaakko, qassi woygidi haasayanaakko I etawu yootiis. (Maa. 10:5-7; Luq. 10:1-11) Ha wodiyan, nuuni loytti sabbakanaadan maaddiya miishshati deꞌiyo, Tamaarissanawu Goꞌettiyo Waanna Miishshata Yihoowa dirijjitee giigissees. Qassi he miishshata waati goꞌettanaakko Yihoowa dirijjitee nuna tamaarissees. He loohissoy nuuni xalatettan sabbakanaadaaninne haggaazuwan qara gidanaadan maaddees.—2 Xim. 2:15. w20.09 4 ¶6-7, 10

Tumaa siyanaadan I maaddidoogeeti aggennan Yihoowawu ammanettidi haggaaziyoogaa kiitettida Yohaannisi siyido wode ay keena ufayttidaakko qoppana danddayay? Eta daro metoy gakkiis; qassi Yohaannisi ba naatudan xeelliyo he ammanettida Kiristtaanetu ammanuwaa minttanawu baaxetiis. Hegaadan, nu naati woy tumaa siyanaadan nuuni maaddidoogeeti bantta huuphiyaa Yihoowawu sheedhdhidi aggennan awu haggaaziyo wode nuuni keehi ufayttoos. (3 Yoh. 3) Yohaannisi 98 M.Ln heeran heezzu dabddaabbeta xaafanaadan Yihoowa geeshsha ayyaanay A denttettiis. Ammanettida Kiristtaaneti Yesuusa ammaniyo bantta ammanuwaa naaganaadaaninne tuman deꞌiyoogaa aggennaadan denttettanaassi he dabddaabbeti xaafettidosona. Worddo asttamaareti gubaaꞌiyan gattiyo qohoy Yohaannisi qofissiis. (1 Yoh. 2:18, 19, 26) He kaddidaageeti Xoossaa eroos giikkonne, eti Yihoowa azazota azazettokkona. w20.07 20 ¶1-3

Nuuni sabbakiyoobaa ammanoos; yaatiyo gishshawu hegaa daro asawu yootanawu nuussi danddayettida ubbabaa oottanawu koyoos. Nuuni Geeshsha Maxaafan deꞌiya Xoossay qaalaa gelidoban ammanettoos. (Maz. 119:42; Isi. 40:8) Ha wodiyan Geeshsha Maxaafaa hiraagay polettidoogaa nuuni beꞌida. Geeshsha Maxaafaa zoriyaa asay bantta deꞌuwan oosuwan peeshshiyo wode eta deꞌoy keehi laamettidoogaa nuuni beꞌida. Ha naqaashay Kawotettaa mishiraachchuwaa asay ubbay siyana koshshiyoogaa kaseegaappe aaruwan nuuni ammananaadan oottees. Nuuni nu sabbakiyo mishiraachuwawu Pultto gidida Yihoowaninne I Kawotettaa Kawo gididi haaranaadan maataa immido Yesuusakka ammanoos. Nuna gakkiya hanotay ayba gidikkonne, ubbatoo Yihooway nuuni naagetti attiyo sohonne nuuyyo wolqqa gidana. (Maz. 46:1-3) Hegaa bollikka, Yesuusi Yihooway immido wolqqaaninne maatan saluwan uttidi sabbakiyo oosuwaa kaalettiiddi deꞌiyoogaa nuuni ammanettoos. (Maa. 28:18-20) Ammanoy Yihooway nu baaxiyaa anjjanaagaa nuuni ammanettanaadan oottees. w20.09 12 ¶15-17

Michchontta paacciyaabay gakkiyo wode, issi issitoo etayyo exatiya uri koshshana danddayees. (Isi. 1:17) Leemisuwawu, issi amꞌꞌiyaa woy paraman shaahettida issi michchiyaa ba azinay kase oottiyo issi issi oosota oottidi maaddiya uraa koyana danddayawusu. Cimida issi michchiyaa dottoriyaa haasayissanawu maaduwaa koyana danddayawusu. Woy Yihoowa dirijjitiyan hara oosuwaa oottiya issi aqinyiyaa darotoo hara aqinyetuugaadan A haggaazenna gishshawu, harati O borikko, iyyo exatiya ura koyana danddayawusu. Yesuusa leemisuwaa ane gujjidi beꞌoos. Yesuusi ayyaanaaban ba michchontta harati bala ogiyan akeekido wode sohuwaara etawu exatiis. Leemisuwawu, Martta Mayraamo borido wode Yesuusi Mayraamiyyo exatiis. (Luq. 10:38-42) Mayraama balabaa kuuyidabadan harati qoppidi O borido wodekka iyyo exatiis. (Mar. 14:3-9) Hegaadan oottanaadan Mayraamo denttettidabaa Yesuusi akeekido gishshawu O galatiis. Ubba qassi kehatettan A oottidobay “sa7a ubban wonggeliyaa mishiraachchuwaa odiyoosan awaanikka” odettana. w20.09 24 ¶15-16

Loꞌꞌo henttanchchay dorssay bayiyo wode erees. Qassi issi dorssay wudiyaappe bayikko, henttanchchay A shocenna. Yihooway baappe amarida wodiyawu haakkida ba ashkkarata maaddiyoogan nuussi loꞌꞌo leemiso gidiyoogaa qoppa. Hananabaa yootiya Yoonaasi bawu imettida oosuwaa aggidi baqatiis. Gidikkonne, Yihooway Yoonaasan hidootaa qanxxibeenna. Loꞌꞌo henttanchchaadan, Yihooway A naagiis; qassi I ba oosuwaa polanawu koshshiya wolqqaa demmanaadan maaddiis. (Yona. 2:7; 3:1, 2) Guyyeppe, asaa deꞌoy alꞌꞌo gidiyoogaa Yoonaasi akeekanaadan maaddanawu Xoossay gosiyaa goꞌettiis. (Yona. 4:10, 11) Hegaappe ay tamaariyoo? Cimati Yihoowawu haggaaziyoogaa aggidaageetun sohuwaara hidootaa qanxxana koshshenna. Cimati issi dorssay wudiyaappe haakkido gaasuwaa akeekanawu baaxetoosona. Qassi he dorssay Yihoowakko simmiyo wode, cimati A siiqiyoogaanne ayyo qarettiyoogaa aggokkona. w20.06 20-21 ¶10-12

Sooviyeete kawotettay 1991n kunddi simmin, A haaruwaa garssan deꞌiya Xoossaa asay amarida wodiyawu laꞌatettaa demmiis. He laꞌatettay “guutta maado” gidanaagaa Daaneeli yootiis. Hegaappe denddidaagan, eti laꞌatettan sabbakana danddayidosona, qassi kase Sooviyeete kawotettaa giddon deꞌiya biittatun aassiyaageetu qooday sohuwaara xeetu shaꞌan qoodettiyaagaa gidiis. SHin unddenna layttaappe simmin, Raasheenne aara hashetiya kawotettati huuphessa kawo gididosona. Issi kawotettay huuphessa kawo woy tohossa kawo gidanawu heezzubata oottana koshshees: (1) Xoossaa asati daroti deꞌiyo biittaa haarana woy eta qohana, (2) eti Yihoowanne A asaa ixxiyoogaa bantta oosuwan bessana, (3) he naaꞌꞌu kawoti wolqqaa bessanawu issoy issuwaa eqettana. Raasheenne aara hashetiya kawotettati sabbakuwaa oosuwaa muleera teqqidi xeetu shaꞌan qoodettiya nu ishanttanne michchontta yedettido wode Xoossaa asaa qohidosona. Hegaadan oottiyoogee eti Yihoowanne A asaa ixxiyoogaa bessees. Qassi eti tohossa kawo gidida Birttaaniyaappenne Amarkkaappe keehi wolqqaamanawu baaxetoosona. w20.05 12-13 ¶3-4

Erissiyo ashkkara oottiyo oosoy tamaarissiyoogaara gayttida ooso gidiyo gishshawu, nuuni tamaarissiyoogan gooba gidanawu koyoos. Nuuni kumetta alamiyan miilooniyan qoodettiya xinaateta xannaꞌissoos. Nuuni Xoossaa Qaalaappe tamaarissiyoobaa dosoos. Hegaa gishshawu, hegaappe darobaa haasayanawu koyana danddayoos. SHin, Wochiyo Keelaa Xinaatiyaa, Gubaaꞌiyaa Geeshsha Maxaafaa Xinaatiyaa, woy issi xinaatiyaa kaalettiyo wodekka gidin kaalettiyaagee darobaa haasayana koshshenna. Xannaꞌissiya ubbay xannaꞌissiyo wode, Geeshsha Maxaafaa loytti goꞌettanawu koyiyo gishshawu, darobaa haasayennaadan naagettana koshshees; qassi issi xiqisiyaa woy huuphe yohuwaa xeelliyaagan eriyo ubbabaa qonccissanawu malana koshshenna. (Yoh. 16:12) Neeni xammaqettiyo wode neeyyo deꞌiya Geeshsha Maxaafaa eraa haꞌꞌi ne eriyoogaara geeddarssa. Xammaqettiyo wode, Geeshsha Maxaafay tamaarissiyo koyro timirtte xallaa erennan aggakka. (Ibr. 6:1) Haꞌꞌi neeni eriyoobaa tamaaranawu daro layttaa ekkiis; yaatiyo gishshawu mati xannaꞌiyoogaa doommida urawu ubbabaa issi kutti yootanawu maloppa. w20.10 14-15 ¶2-4

Yihooway Yesuusawu loꞌꞌo aawaanne aayyiyoo dooriis. (Maa. 1:18-23; Luq. 1:26-38) Mayraama wozanappe yootido Geeshsha Maxaafan xaafettida I qofay A Yihoowanne A Qaalaa keehi siiqiyoogaa qonccissees. (Luq. 1:46-55) Qassi Yooseefi Yihoowa kaaletuwawu azazettidoogee I Xoossawu yayyidoogaanne A ufayssanawu koyidoogaa bessees. (Maa. 1:24) Yihooway Yesuusawu dure gidida aawaanne aayyiyo dooribeennaagaa akeeka. Yesuusi yeleti simmin Yooseefinne Mayraama yarshshido yarshshoy eti hiyyeesa gidiyoogaa bessees. (Luq. 2:24) Qassi etawu laappun woy hegaappe dariya naati deꞌoosona; hegaa gishshawu, etawu daro miishshay woy harabay deꞌennan aggana danddayees. (Maa. 13:55, 56) Yihooway Yesuusa qohuwaappe naagidaba gidikkonne, I ba Naꞌaa meto ubbaappe naagibeenna. (Maa. 2:13-15) Leemisuwawu, Yesuusi Mase gidiyoogaa koyro ammanennan ixxida ba dabbota genccana koshshiis. (Mar. 3:21; Yoh. 7:5) Qassi, Yooseefi hayqqidoy Yesuusi yelagatettan deꞌiyo wode gidennan aggenna; qassi hegee I metootanaadan oottiis. w20.10 26-27 ¶4-6

Metuwaa genccanaadan nena maaddiya ooninne baynnabadan neeyyo siyetti erii? Yihoowayyo ammanettida ashkkarata gujjin, darotuyyo hegaadan siyettiis. (1 Kaw. 19:14) Nena hegaa malabay gakkikko, Yihooway, “Taani nena mulekka yeggikke woikko aggikke” giidi qaalaa gelidoogaa hassaya. Hegaa gishshawu, nuuni ammanettidi, “Godai tana maaddiyaagaa; taani yayyikke” gaana danddayoos. (Ibr. 13:5, 6) Ha qofaa kiitettida PHawuloosi 61 M.L. heeran Yihudan deꞌiya Kiristtaanetussi xaafiis. I yootido he qofay Mazamure 118:5-7n mazamuraawee giidobaa nuna hassayissees. Yihooway A kase darotoo maaddido gishshawu, PHawuloosi mazamuraawiyaagaadan Yihooway bana maaddiyoogaa erees. Leemisuwawu, PHawuloosi naaꞌꞌu layttappe kase Ibraawe Kiristtaanetuyyo xaafido dabddaabbiyan abbaa kanttidi biyo wode wolqqaamaa beetay denddin hayqqiichchidi attidoogaa yootiis. (Oos. 27:4, 15, 20) He wode, woy hegaappe kase layttatunkka, Yihooway PHawuloosa daro ogetun maaddiis. w20.11 12 ¶1-2

Kase deꞌoy keha giidi ubbatoo qoppiyoogee eratetta gidenna giyoy aybissee? Aggidobaa yeemottiyoogee iitabaa dogidi loꞌꞌobaa xallaa hassayanaadan oottana danddayiyo gishshataassa. Leemisuwawu, Israaꞌeelatu hanotaa qoppa. Eti Gibxxeppe kiyi simmidi, yan keehi tuggatido tuggaa sohuwaara dogidosona. Eti kase miido loꞌꞌo qumaa xallaa qoppidosona. Israaꞌeelati hagaadan giidosona: “Nuuni Gibxxe biittan miishsha qanxxennan coo miyo moliyaa hassayeettees; qassi qayye miyo paranjja leehiyaa, zolddo leehe milatiya mal77iya haattai kumido meelooniyaa, adussa paranjja sunkkuruutuwaanne tuummuwaa hassayeettees.” (Qoo. 11:5) SHin eti tumu miishsha qanxxennan coo miidonaa? CHii. Israaꞌeelati keehi tuggatidosona; qassi Gibxxen aylle gididi deꞌiyo wode naaqoy eta gakkiis. (Kes. 1:13, 14; 3:6-9) Gidikkonne, eti guyyeppe he tuggaa dogidi kasebaa yeemottiyoogaa doommidosona. SHin eti Yihooway etawu oottido ufayssiyaabaa aggidi eti kase deꞌido ufayssiya wodiyaa xallaa qoppidosona. Hegan Yihooway ufayttibeenna.—Qoo. 11:10. w20.11 25 ¶5-6

Nu layttay ay keena qanttakkonne qassi ay keena ‘metuwan kumidaakko’ nuuni issi issitoo qoppenna waayi aggana. (Iyy. 14:1) Hegee issi issitoo nuuni hidootaa qanxxanaadan oottees. Beni deꞌida Yihoowa ashkkaratuppe daroti hidootaa qanxxidosona. Amaridaageeti hayqqanawukka koyidosona. (1 Kaw. 19:2-4; Iyy. 3:1-3, 11; 7:15, 16) SHin Yihooway ubbatoo eta minttettiisinne maaddiis. Eta taarikee xaafettidoy nuna minttettanassanne tamaarissanassa. (Roo. 15:4) Yaaqooba naꞌaa Yooseefabaa qoppa. Guutta wodiyaa giddon Yooseefa deꞌoy muleera laamettiis. Hegaappe simmin I bana siiqiya ba aawaa keettan deꞌibeenna. Gibxxe biittan Yihoowa erenna bitaniyawu oottiya pattenna aylle gidiis. (Doo. 37:3, 4, 21-28; 39:1) Hegaappe simmin, PHoxiifaara keettaayyiyaa Yooseefi banaara wolqqan zinꞌꞌanawu maliis gaada wordduwan mootaasu. SHin PHoxiifaari hegee tumakkonne shaakkanawu maliyoogaa aggidi Yooseefa qasho keettan yeggin I sanssalatan qashettiis. (Doo. 39:14-20; Maz. 105:17, 18) Yooseefi hidootaa qanxxanaadan oottiya gaasoy deꞌiyoogee qoncce! w20.12 16-17 ¶1-4

Hegee nuuni woossana koshshiya gitabatuppe issuwaa gidana bessiyoogaa Yesuusi yootiis. SHin Yesuusi giidobay woygiyoogee? Issibaa geeshshiyoogaa giyoogee xillo oottiyoogaa woy A mooriyaabaa diggirggiyoogaa giyoogaa. SHin issi issi asay ‘Yihoowa sunttay kasekka geeshsha, yaatin A sunttay geeyana koshshiyoy aybissee?’ giidi oychchana danddayees. Hegaa zaaranawu issi sunttay ay qonccissiyaakko nuuni qoppana koshshees. Sunttay woraqatan xaafana woy xeegana danddayiyo qaala xalla gidenna. Geeshsha Maxaafay, “Lo77o sunttai daro duretettaappe aadhdhees” giyoogaa akeeka. (Lee. 22:1; Era. 7:1) Sunttay keehi koshshiyoy aybissee? Sunttay an xeegettiya uraabaa harati qoppiyoobaara gayttidaba gidiyo gishshataassa. Hegaa gishshawu, sunttay xaafettiyo ogee, woy qassi sunttay xeegettiyo ogee keehi qofissiyaaba gidenna; keehi qofissiyaabay asay he sunttaa beꞌiyo woy siyiyo wode he sunttaabaa qoppiyoobaa. Asay Yihoowabaa wordduwaa yootiyo wode, eti asay abaa iitabaa qoppanaadan oottoosona. Asay hegaa mala iitabaa beꞌiyo wode Xoossan gaasoyeesinne A sunttaa moorees. w20.06 3 ¶5-7

Nuuni nu metuwaabaa keehi hirggiyo wode harabaa aybanne qoppana danddayokko. Leemisuwawu, nuussi koshshiyaabaa shammana danddayiya miishshi baawa woy sahettananne oosuwaa oottana danddayennan aggana woy oosuwaappe yedetettana giidi hirggana danddayoos. Xoossaa higgiyaa kanttanaadan paacettiyo wode nuuni ammanettennan aggana giidikka hirggana danddayoos. Mata wode Seexaanay haariyo asati Xoossaa asaa qohana, hegaa gishshawu qohoy nuna gakkiyo wode nuuni waatanaakko hirggana danddayoos. Nuuni, ‘Hegeeta xeelliyaagan taani hirggiyoogee balee?’ giidi qoppana danddayoos. Yesuusi bana kaalliyaageetussi “hirggoppite” giidi yootidoogaa nuuni eroos. (Maa. 6:25) Yesuusi hegaadan giidoogee nuuni aybawunne hirggana koshshenna giyoogee? Akkay! Beni wode deꞌida ammanettida Yihoowa ashkkaratuppe amaridaageeti hirggidoogaa hassaya. SHin Yihooway etan ufayttiis. (1 Kaw. 19:4) Yesuusi tumuppe nuna minttettees. Nuussi koshshiyaabawu keehi hirggidi nu deꞌuwan aybippenne aaruwan Yihoowawu haggaaziyoogaa agganaadan I koyenna. w21.01 3 ¶4-5

Issi azinay ba machchiyoonne ba naata oyqqiyo ogiyan Yihoowanne Yesuusa sinttan oyshettees. (1 PHe. 3:7) Yihooway saluwaaninne saꞌan deꞌiya ba so asawu Huuphe gidiyo gishshawu, ba naati waani deꞌana bessiyaakko higgiyaa kessiyoonne he higgee polettanaadan oottiyo aawatettay awu deꞌees. (Isi. 33:22) Yesuusi Kiristtaane gubaaꞌiyawu huuphe gidiyo gishshawu, higgiyaa kessiyoonne he higgee polettanaadan oottiyo aawatettay awukka deꞌees. (Gal. 6:2; Qol. 1:18-20) So asawu huuphe gidida uri Yihoowaagaadaaninne Yesuusaagaadan, ba so asaa xeelliyaagan kuuyiyo aawatettay awu deꞌees. (Roo. 7:2; Efi. 6:4) SHin A aawatettawu zaway deꞌees. Leemisuwawu, I kessiyo higgeti Xoossaa Qaalan deꞌiya maaratuura maayettiyaageeta gidana bessoosona. (Lee. 3:5, 6) Qassi so asawu huuphe gidida issi uri ba so asaa yara gidennaageetussi higgiyaa kessiyo aawatetti ayyo baawa. (Roo. 14:4) Hegaa bollikka, A naati diccidi sooppe kiyiyo wode eti A muletoo bonchchikkonne, I hegaappe simmin etawu huuphe gidenna.—Maa. 19:5. w21.02 2-3 ¶3-5

So asawu huuphe gidida uri ba so asaa siiqiyoogaa bessiyo issi ogee deꞌuwawu koshshiyaabaa etawu kunttiyoogaa. SHin hegaappe keehi aadhdhiyaabay so asay Yihoowaara dabbotidi deꞌanaadan maaddiyoogaa gidiyoogaa I hassayana koshshees. (Maa. 5:3) Yesuusi barchchiyaa mittan kaqettidi hayqqana haniyo wodekka Mayraamissi koshshiyaabaa kunttiya uri deꞌiyaakkonne eranawu koyiis. Yesuusi keehi waayettidikka Mayraamissi koshshiyaabaa kunttanaadan kiitettida Yohaannisa oychchiis. (Yoh. 19:26, 27) So asawu huuphe gidida issi ishawu daro aawatettay deꞌana danddayees. I ba oosuwaa oottiyo wode Yihooway sabettanaadan koyiyo gishshawu minnidi oottana bessees. (Efi. 6:5, 6; Tii. 2:9, 10) Hegaa bollikka, ishanttanne michchontta minttettiyoonne sabbakiyo oosuwan leemiso gidiyoogaa mala aawatettay gubaaꞌiyan awu deꞌana danddayees. Qassi I ba keettaayeeranne ba naatuura Geeshsha Maxaafaa ubba galla xannaꞌiyoogee keehi koshshiyaaba. I eti payya gididi deꞌanaadaaninne ufayttanaadan oottido ubbabaa gishshawunne Yihoowawu mata dabbo gididi deꞌanaadan maaddido gishshawu A keehi galatoosona.—Efi. 5:28, 29; 6:4. w21.01 12 ¶15, 17

Wozannaama machchiyaa oottiyoobata Geeshsha Maxaafay yootees. Leemisuwawu, son oosettiyaabaa kaallawusu, gadiyaa shammawusunne bayzzawusu, qassi minnada zalꞌꞌawusu. (Lee. 31:15, 16, 18) A ba qofaa yootana danddayenna ashkkara mala gidukku. SHin I azinay O ammanetteesinne A yootiyoobaa siyees. (Lee. 31:11, 26) Issi attumaagee ba machchiyo hegaadan bonchchuwan oyqqiyo wode, A ayyo haarettiyoogan ufayttana. Yesuusi darobaa oottikkonne, Yihoowawu haarettiyoogaa kawushshiyaabadan xeellibeenna. (1 Qor. 15:28; Pili. 2:5, 6) Hegaadankka, Yesuusa leemisuwaa kaalliya wozannaama maccaasiyaa ba azinawu haarettiyoogaa kawushshiyaabadan xeellukku. A ba azinaa maaddiyoy A siiqiyo gishsha xallaassa gidennan, waannayada Yihoowa siiqiyoonne bochchiyo gishshataassa. Gidoppe attin, ba azinawu haarettiya issi machchiyaa I azinay Geeshsha Maxaafay yootiyo higgeta woy maarata kanttanaadan O oychchiyo wode, aara hashetukku. w21.02 11 ¶14-15; 12 ¶19

Xoossaa siiqiyoogee Yihoowa ashkkarati ubbatoo yedetaa genccanaadan maaddiis. Leemisuwawu, kiitettidaageeti sabbakiyoogaa agganaadan gita maatay deꞌiyo Ayhuda xoqqa pirdda keettay azazido wode eti Xoossaa siiqiyoogee ‘asawu azazettanaappe Xoossawu azazettanaadan’ oottiis. (Oos. 5:29; 1 Yoh. 5:3) Hegaadan Xoossaa mintti siiqiyoogee meqettaa iitanne wolqqaama kawotettati yedettiyo nu ishantti ammanettidi deꞌanaadankka maaddees. Alamee nuna ixxiyo wode, nuuni ufayttoosippe attin, hidootaa qanxxokko. (Oos. 5:41; Roo. 5: 3-5) Nu soo asay nuna eqettiyoogee genccanawu keehi deexxiyaabatuppe issuwaa gidana danddayees. Nuuni Yihoowabaa tamaaranawu koyiyoogaa eti eriyo wode, nu soo asaappe issoti issoti nuuni cimettidabadan qoppana danddayoosona. Harati nuna gooyidosona giidi qoppana danddayoosona. (Marqqoosa 3:21ra gatta xeella.) Eti ubba nuna qohiya hanotan eqettana danddayoosona. Ha yedetan nuuni maalaalettana koshshenna. Yesuusi hagaadan giis: “Asassi morkketi a so asata gidana.”—Maa. 10:36. w21.03 21 ¶6-7

Neeni aassiya uraara Geeshsha Maxaafaa xannaꞌissiyo wode xinaatee haasayiyo wode loytta ezgga. Yaatada, bessiya wodiyan maaddana danddayaasa. Neeni haasayanaappe kase qoppana bessees. Leemisuwawu, neeni darobaa haasayananne xannaꞌissiyaagee issibaa qonccissiyo wode kelttiyaa gelana bessenna; qassi hara dummatiya qofaa haasayana koshshenna. SHin qantta qofaa yootiyoogan, leemisuwaa woy oyshaa goꞌettiyoogan xannaꞌiyoobay qoncce gidanaadan maaddana danddayaasa. Issi issitoo, xannaꞌiyo qofaa xeelliyaagan darobaa haasayana bessennabadan neeyyo siyettana danddayees. Gidoppe attin, xannaꞌiyaagaa neeni galatiyaabanne awu qarettiyaaba gidikko, I ayyaanaaban diccanaadan loytta maaddana. Nena gakkidabaa etawu yoota. Xinaatiyaa maaddana danddayiyaaba gidikko, neeni tumaa waata siyidaakko, paaciyaa waata xoonidaakko, woy Yihooway nena waati maaddidaakko xinaatiyawu qanttan yootana danddayaasa. (Maz. 78:4, 7) Hegee xinaatee siyana koshshiyaaba gidana danddayees. Hegee A ammanuwaa minttana woy I aggennan ayyaanaaban diccidi xammaqettanaadan minttettana danddayees. w21.03 10 ¶9-10

Nuuni haggaazuwan loꞌꞌo ayfiyaa demmikko, bonchchettana koshshiyay oonee? PHawuloosi Qoronttoosa gubaaꞌiyawu xaafidoban ha oyshaa zaariis; I hagaadan giis: “Taani puutiyaa tokkaas; Aphiloosi haattaa ushshiis; shin Xoossai puutiyaa dichchees. Hegaa gishshau, dichchiyaagee Xoossaa gidaappe attin, tokkiyaageekka haattaa ushshiyaageekka aibanne gidenna.” (1 Qor. 3:6, 7) PHawuloosaagaadan, nuuni haggaazuwan demmido loꞌꞌo ayfiyawu ubbatoo bonchchuwaa Yihoowayyo immana koshshees. Nuuni Xoossaara, Kiristtoosaaranne kiitanchchatuura ‘issippe oottiyo’ maataa gishshawu Yihoowa galatiyoogaa waati bessana danddayiyoo? (2 Qor. 6:1, NW) Haratuyyo mishiraachchuwaa yootanawu danddayettida ubbabaa oottiyoogan hegaa bessana danddayoos. Tumaa zerettaa zeriyoogaa xalla gidennan, haattaakka ushshana bessees. Issi uri eranawu koyikko, nuuni he izaawa zaarettidi haasayissiyo wode Geeshsha Maxaafaa xannaꞌissiyoogaa doommanaadan nuuyyo danddayettida ubbabaa oottanawu koyoos. Geeshsha Maxaafaa xannaꞌiya he izaawu qoppiyo ogeenne ayyo siyettiyaabay laamettanaadan Yihooway maaddiyoogaa nuuni beꞌiyo wode ufayttoos. w20.05 30 ¶14, 16-18