Usuppune

Yihooway baassi goynniyaageeti ubbay ufayttanaadan koyees. I nuussi ubbawu matan deꞌees; qassi nuuni azzaniyo wode woy hidootaa qanxxiyo wode akeekees. (Maz. 145:18, 19) Hananabaa yootiya Eelaasabay Yihoowa ay keena qofissidaakkonne Yihooway A waati maaddidaakko qoppa. He ammanettida bitanee Israaꞌeela taarikiyan keehi iita wodiyan deꞌiis. Israaꞌeelan Yihoowa siiqenna wolqqaama asati ayyo goynniyaageetu bolli yedetaa gattidosona; ubba qassi Eelaasa woranawu koyidosona. (1 Kaw. 19:1, 2) Qassi, Eelaasi Yihooway kiittin hananabaa yootiyaageetuppe ba xallay attidabadan qoppidoogee I keehi hidootaa qanxxanaadan oottennan waayi aggana. (1 Kaw. 19:10) Eelaasa maaddanawu Xoossay sohuwaara issibaa oottiis. Yihooway I kiittin hananabaa yootiyaageetuppe attidaagee A xalla gidennaagaa yootanawu issi kiitanchchaa kiittiis. He kiitanchchay Yihoowawu ammanettidi haggaaziya hara daro Israaꞌeelati deꞌiyoogaa Eelaasawu yootiis. (1 Kaw. 19:5, 18) Yesuusi bana kaalliyaageetuyyo gubaaꞌee so asa mala gidanaagaa kehatettan yootiis. (Mar. 10:29, 30) Qassi saluwan deꞌiya nu Aaway Yihooway baayyo haggaazanawu koyiyaageeta maaddanaagaa yootiis.—Maz. 9:10. w21.06 8-9 ¶3-4

Haymaanooteti tamaarissiyo amarida timirtteti worddo gidiyoogaa nuuni Geeshsha Maxaafaa goꞌettidi qoncciya kessiyo gishshawu, daro asay nu yootiyoobaa siyenna. Xoossay iitata siꞌooliyan qaxxayees giidi haymaanootiyaa kaalettiyaageeti asaa tamaarissoosona. Eti asaa oyqqanawu he worddo timirttiyaa goꞌettoosona. Nuuni siiqiya Xoossaa Yihoowawu goynniyaageeta gidiyo gishshawu, ha timirtteti worddo gidiyoogaa asay akeekana mala maaddoos. Haymaanootiyaa kaalettiyaageeti shemppoy hayqqenna giidikka tamaarissoosona. He timirttee tuma gidiyaakko, ooninne hayquwaappe denddana koshshenna. Hegee Geeshsha Maxaafay tamaarissiyooba gidennaagaa nuuni qonccissoos. Daro haymaanooteti beettenna wolqqay woy Xoossay nuuni oottiyo ubbabaa kasetidi kuuyiis giidi tamaarissikkonne, koyidobaa dooriyo maatay asawu deꞌiyoogaanne eti Xoossawu haggaazanawu doorana danddayiyoogaa nuuni tamaarissoos. Eti worddo asttamaare gidiyoogee qonccanaadan nuuni oottiyo wode haymaanootiyaa kaalettiyaageeti waaniyoonaa? Darotoo, eti keehi hanqqettoosona! Nuuni tumaa siiqikko, Xoossay yootiyoobaa ammanananne azazettana bessees. (Yoh. 8:45,46) Seexaanaa Dabloosadan, nuuni tumaa siyennan ixxokko. Nuuni ammaniyoobaara maayettennabaa aybanne oottokko. (Yoh. 8:44) Yesuusi oottidoogaadan, Xoossay ba asay ‘iitabaa ixxanaadaaninne loꞌꞌobaa minttidi oyqqanaadan’ koyees.—Roo. 12:9; Ibr. 1:9. w21.05 10 ¶10-11

Nuuni otorettiyoogaa woy yaaretiyoogaa akeekikko waatana koshshii? Nuuni laamettana koshshees! Paxa deꞌiiddi Dabloosan ‘oyqqettidaageeti’ kessi ekkana danddayiyoogaa kiitettida PHawuloosi yootiis. (2 Xim. 2:26) Yihooway Seexaanaappe keehi aadhdhiyoogaa mule dogoppa. Yaatiyo gishshawu, nuuni Yihoowa maaduwaa ekkikko, Dabloosi wottiyo piriyaappe woy gitiyaappe kessi ekkana danddayoos. Aybanne otorettennan woy yaaretennan aggiyoogee loꞌꞌo. Nuuni yaatana danddayiyoy Xoossay maaddiyo wode xallaana. Yaatiyo gishshawu, ne qoppiyoobaanne oottiyoobaa qoranaadan maaddana mala ubba gallassi Yihoowa woossa. (Maz. 139:23, 24) Otorettennan woy yaaretennan agganawu neeyyo danddayettida ubbabaa oottanawu baaxeta! SHaꞌan qoodettiya layttawu, Seexaanay shankkatiiddi takkiis. SHin I mata wode qashettana, yaatidi wurssettan xayana. (Ajj. 20:1-3, 10) He gallassaa nuuni yeemuwan naagoos. He wodee gakkanaashin, Seexaanaa piretuppe naagettada deꞌa. Otorettennan woy yaaretennan agganawu baaxeta. Neeni ‘xalahe halaqaa teqqikko, I neeppe baqatana.’ w21.06 19 ¶15-17

Issi uri Geeshsha Maxaafaa tumaa ammaniyo wodenne he tumaa haratussi yootiyo wode Yihooway ufayttees. (Lee. 23:15, 16) Yihooway ba asay ha wodiyan minnidi sabbakiyoogaanne tamaarissiyoogaa beꞌiyo wode keehi ufayttees! Leemisuwawu, 2020 haggaazo layttan, ubbasaa gakkiya harggee kumetta alamiyan deꞌishinkka, 7,705,765 asaa Geeshsha Maxaafaa xannaꞌissida, hegee 241,994 asay bana Yihoowawu sheedhdhidi xammaqettanaadan maaddiis. Qassi mati erissiyo ashkkara gididaageeti xinaateta Geeshsha Maxaafaa xannaꞌissoosonanne daroti erissiyo ashkkarata gidanaadan maaddoosona. (Luq. 6:40) Erissiyo ashkkara gidanaadan nuuni harata tamaarissiyo wode, Yihooway ufayttiyoogaa ammanettana danddayoos. Erissiyo ashkkara oottiyoogee deexo ooso gidikkonne, saluwan deꞌiya nu Aawaa siiqanaadan harata tamaarissiyo oosuwaa Yihooway maaddin nuuni oottana danddayoos. Baa giishin issi ura Geeshsha Maxaafaa xannaꞌissanawu halchchana danddayiyoo? Geeshsha Maxaafaa xannaꞌanaadan nunaara gayttiya ubba asaa oychchanawu injjetiya wodiyaa nuuni ubbatoo goꞌettikko, haniyaabaa beꞌiyoogan maalaalettennan waayi aggana. w21.07 6-7 ¶14-16

Kawuwaa Daawiti beeta maqidasiyaa keexxiyoogan maaddanawu keehi daro miishshaanne bawu deꞌiya aquwaappe keehi alꞌꞌobaa immiis. (1 Odi. 22:11-16) Yihoowa dirijjitee keexxiyo oosuwaa oottanawu nuussi wolqqay baynnaba gidikko, nu danddayettida keenan miishshaa immiyoogan ubbatoo maaddana danddayoos. Qassi nuuni demmidobaappe yelagati goꞌettanaadan maaddana danddayoos. Kiitettida PHawuloosi kehiyoogan leemiso gidiyoogaa qoppa. I misoonaawe oosuwawu biyo wode Ximootiyoosi banaara baanaadan shoobbiis, qassi PHawuloosi sabbakiyoonnne tamaarissiyo hiillata ha yelagaa tamaarissiis. (Oos. 16:1-3) Ximootiyoosi mishiraachchuwaa sabbakiyoogaaninne tamaarissiyoogan gooba gidanaadan PHawuloosi loohissiis. (1 Qor. 4:17) Ximootiyoosi PHawuloosappe tamaaridoogaadan, sabbakanaadaaninne tamaarissanaadan guyyeppe harata loohissiis. w21.09 12 ¶14-15

Erissiyo ashkkaraa Aphiloosappenne kiitettida PHawuloosappe nuuni ay tamaarana danddayiyaakko qoppa. Eti naaꞌꞌaykka Geeshsha Maxaafaa loyttidi eroosona. Eti loytti erettiya asanne gooba asttamaare. Eti naaꞌꞌaykka daroti erissiyo ashkkara gidanaadan maaddidosona. SHin eti issoy issuwaa qanaatibookkona. (Oos. 18:24) Aphiloosi Qoronttoosappe bi simmin, guyye simmanaadan PHawuloosi A mintti woossiis. (1 Qor. 16:12) Aphiloosi mishiraachchuwaa yootiyoogaaninne ba ishantta minttiyoogan ba eraa loꞌꞌobawu goꞌettiis. Qassi Aphiloosi bana ziqqi oottiya asa gidiyoogaa nuuni ammanettana danddayoos. Leemisuwawu, Aqiilinne PHirisqqila “Xoossaa ogiyaa kaseppe sittayidi, ayyo geeshshidi” yootido wode, I yiillotidoogaa Geeshsha Maxaafay yootenna. (Oos. 18:24-28) Aphiloosi oottido loꞌꞌo oosuwaa kiitettida PHawuloosi erees. Gidikkonne, PHawuloosi Aphiloosi baappe aadhdhiyaabadan asay qoppana giidi hirggibeenna. PHawuloosi Qoronttoosan deꞌiya Kiristtaanetuyyo xaafidobaa nuuni nabbabiyo wode, I bana ziqqi oottiya ashkke asa gidiyoogaa akeekana danddayoos.—1 Qor. 3:4-6. w21.07 18-19 ¶15-17

Addaameenne Hewaana eriiddi Xoossawu azazettennan ixxido gishshawu, A soo asa gidiyoogee etappe mule attiis. Eta naati shin? Yihooway asaa siiqiyo gishshawu, eta naatuppe ayyo azazettiyaageeti ba soo asa gidanaadan oottiis. I ba mexi issi Naꞌaa yarshshuwaa baggaara hegaadan oottiis. (Yoh. 3:16) Yesuusa yarshshuwaa gaasuwan, ammanettida 144,000 asata Yihooway ba naata oottiis. (Roo. 8:15-17; Ajj. 14:1) Qassi, miilooniyan qoodettiya harati ammanettidi Xoossaa sheniyaa poliiddi deꞌoosona. Eti 1,000 layttaa wurssetta paaciyaappe simmin Xoossaa soo asa gidana giidi hidootan naagoosona. (Maz. 25:14; Roo. 8:20, 21) Eti ha wodiyankka banttana medhdhida Yihoowa bantta ‘Aawaa’ giidi xeegoosona. (Maa. 6:9) Hayquwaappe denddiyaageetikka Yihooway etappe koyiyoobaa tamaarana. Qassi Yihoowa azazuwaa azazettiyaageeti wurssettan Yihoowa soo asa gidana. w21.08 5 ¶10-11

Kiitettida PHawuloosi haggaazanaadan sunttettiisinne he haggaazuwaa keehi koshshiyaabadan daro layttawu xeelliis. I ‘yaaꞌaaninne keettaappe keettan’ sabbakiis. (Oos. 20:20) Ubba I sabbakana danddayiyo awankka awudekka sabbakiis! Leemisuwawu, I ba laggeta Ateenan naagiyo wode, erettida asati deꞌiyo citawu markkattiis; qassi etappe amaridaageeti siyidosona. (Oos. 17:16, 17, 34) PHawuloosi ‘qashettido’ wodekka, banaara gayttiyaageetussi sabbakiis. (Pili. 1:13, 14; Oos. 28:16-24) PHawuloosi ba wodiyaa loytti goꞌettiis. I harati banaara haggaazanaadan darotoo shoobbiis. Leemisuwawu, I misoonaawe gididi koyro biyo wode, Marqqoosa giyo Yohaannisa, qassi naaꞌꞌantto biyo wode Ximootiyoosa ekkidi biis. (Oos. 12:25; 16:1-4) PHawuloosi he attumaageeti gubaaꞌiyaa waati darajjayanaakko, harata waati minttettanaakko, qassi gooba asttamaare waani gidanaakko eta tamaarissanawu bawu danddayettida ubbabaa oottidoogee qoncce.—1 Qor. 4:17. w22.03 27 ¶5-6

Issoti issoti eti beꞌana danddayiyooba xallaa ammanana bessees giidi qoppiyo gishshawu Medhdhidaagaa ammanokkona. SHin eti beꞌana danddayennabaa ammanoosona, leemisuwawu, carkkoy deꞌiyoogee tuma gidiyoogaa naqaashay bessiyo gishshawu hegaa ammanoosona. Geeshsha Maxaafay yootiyo ammanuwawu naqaasha gididabaakka nuuni beꞌana danddayokko. (Ibr. 11:1) He naqaashaa nu huuphen pilggiyoogee wodiyaanne wolqqaa ekkiyaaba gidiyo gishshawu, daro asay hegaadan pilgganawu baaxetana koyenna. Naqaashaa ba huuphen pilggenna uri Xoossay baawa giidi qoppana danddayees. Xoossay ubbabaa medhdhidoogaa saynisiyaa eranchchatuppe amaridaageeti naqaashaa pilggi simmidi ammanidosona. Koyruwan, amaridaageeti yuniversttiyan meretaabaa mule tamaaribeenna gishshawu, medhdhidaagee baawa giidi qoppennan waayi aggana. SHin haꞌꞌi eti Yihoowabaa erido gishshawu A siiqoosona. Tumuppe, nuuni ay keena tamaaridaageeta gidikkonne, Xoossaa kaseegaappe aaruwan ammanana koshshees. w21.08 14 ¶1; 15-16 ¶6-7

Yihooway maariyoogaa keehi dosiyoogaa nuuni loytti akeekanaadan maaddanawu Yesuusi bayida naꞌaabaa leemisuwaa yootiis. He naꞌay sooppe kiyidi biis, biidi “hegan miishshaa ohettaa mooridi, ba miishshaa laaliis.” (Luq. 15:13) Guyyeppe, pokkobaa oottiyoogaa aggiis, bana ziqqi oottiisinne soo simmiis. A aaway waatidee? Yesuusi hagaadan giis: “I [naꞌay] biron haahuwan de7ishin, a aawai a be7idi, ayyo mishettiis; woxxi qoommidi, a yeriis.” Aaway ba naꞌaa kawushshibeenna. Ba yelaga naꞌawu qarettidi sohuwaara atto giisinne so A mokki ekkiis. Bayida naꞌay gita nagaraa oottidaba gidikkonne I hegaappe simmido gishshawu, A aaway awu atto giis. Leemisuwan qonccida maarida aaway Yihoowa bessiyaaba. Ha ufayssiya ogiyan, Yesuusi ba Aaway wozanappe bantta nagaraappe simmiyaageetussi atto gaanawu eeno giyoogaa qonccissiis.—Luq. 15:17-24. w21.10 8 ¶4; 9 ¶6

Ha wodiyan, haymaanootiyaa kaalettiya daroti bantta maataa goꞌettidi Xoossaa buzo sunttay erettennaadan banttawu danddayettida ubbabaa oottidosona. Eti bantta Geeshsha Maxaafaa birshshettatuppe he sunttaa kessidosona; issi issi hanotatun qassi bantta woosa keettatun Xoossaa sunttaa goꞌettennaadan diggidosona. Xoossaa sunttaa bessiyaagaadan bonchchiyaageeti Yihoowa Markkatu xalaala gidiyoogee qoncce. Hara ay haymaanootetugaappe aaruwan nuuni Xoossaa buzo sunttay ubbasan erettanaadan oottoos! Nuuni Yihoowa Markka gidiyo gishshawu nu sunttaadan deꞌanawu nuussi danddayettida ubbabaa oottoos. (Isi. 43:10-12, NW) Geeshsha Maxaafaa birshshiya harati Yihoowa sunttaa Geeshsha Maxaafaappe kessido sohuwan zaaretti gelissiyoogan he sunttay deꞌiyo Ooratta Alamiyaa Geeshsha Maxaafaa Birshshettaa 240 miilooneppe daruwaa nuuni attamissida. Nuuni 1,000ppe dariya qaalan giigissiyo Geeshsha Maxaafaa qofay deꞌiyo xuufetun Yihoowa sunttaa goꞌettoos! w21.10 20-21 ¶9-10

Maadoy koshshiyo nu mala Kiristtaaneta nuuni maaddiyo wode Yihoowawu goynnoos. Yihooway hiyyeesatussi kehatettan immiya Israaꞌeelata anjjanawu qaalaa geliis. (Zaa. 15:10) Ee, maadoy koshshiyo nu mala Kiristtaaniyaa nuuni maaddiyo wode ubban, Yihooway hegaa baassi imettida imotadan xeellees. (Lee. 19:17) Leemisuwawu, Piliphphisiyuusan deꞌiya Kiristtaaneti qasho keettan deꞌiya PHawuloosawu imotaa kiittido wode, I hegaa “[Xoossay] dosiyo, a ufaissiya yarshsho” yaagiis. (Pili. 4:18) Ne gubaaꞌiyan deꞌiyaageetu hanotaa qoppada nena hagaadan oychcha, ‘Taani maaddana danddayiyo uri deꞌii?’ Nuuni maadoy koshshiyoogeeta maaddanawu nu wodiyaa, nu wolqqaa, nu eraanne nuussi deꞌiyaabaa goꞌettiyoogaa beꞌiyoogan Yihooway ufayttees. Yihooway hegaa nu goynuwaa shaahodan xeellees. (Yaaq. 1:27) Tumu goynuwawu wodeenne baaxee koshshees. SHin hegee deexo gidenna. (1 Yoh. 5:3) Aybissi? Hegaadan oottiyoy Yihoowa, nu ishanttanne michchontta siiqiyo gishshataassa. w22.03 24 ¶14-15

Nu ishanttunne michchonttu metuwaa nuuni qoppikko, etawu qarettoos. Leemisuwawu, keehi sahettiya issi michchiyaa deꞌana danddayawusu. A ba metuwaabaa mule haasayana xayikkonne, issi uri O maaddikko A keehi ufayttana danddayawusu. Nuuni iyyo qumaa kattiyoogan woy I keettaa geeshshiyoogan O maaddana danddayiyoo? Issi ishay oosuwaappe yedetettana danddayees. I oosuwaa demmana gakkanaashin maaddanawu, geella nuuni immiyoogaa yootennan, guutta miishshaa imotadan ayyo immana danddayoos. Nuuni nu ishanttussinne michchonttussi qarettiyoogaa bessanawu eti maaduwaa oychchana gakanaashin naagana koshshenna. Yihoowaagaadan, nuna eti oychchanaappe kase issibaa etawu oottana danddayoos. Nuuni oychchennan I galla galla nuuyyo awaa awaxxissees! Qassi galatiya asatu xalla gidennan, asa ubbay awaappe goꞌettees. Yihooway nuussi koshshiyaabaa immiyoogan, I nuna siiqiyoogaa bessees. Yihooway darin kehanne immiyaagaa gidiyo gishshawu nuuni A keehi siiqoos! w21.09 22-23 ¶12-13

Aggenna Xoossaa siiqoy I atto gaanaadan oottees. Nagaranchcha uri ba nagaraappe simmiyo wodenne ba iita ogiyaa aggiyo wode Yihooway beꞌees; qassi aggenna A siiqoy I atto gaanaadan oottees. Mazamuraawee Daawiti Yihoowabaa hagaadan giis: “I nuna nu nagaraadan oottenna; nu iitatettaadan nuuyyo zaarenna.” (Maz. 103:8-11) Daawiti bana mooranchchadan xeelliyoogee ay keena qohiyaakko bana gakkida azzanttiyaabaappe eriis. SHin Yihooway “atto giyaagaa” gidiyoogaakka I eriis. Yihooway atto gaanaadan oottiyaabay aybee? Hegaa zaaroy hachchi gallassa xiqisiyan deꞌees. Daawiti ba woosan yootidoogaadan, atto gaanaadan Yihoowa woossiya ubbawu I ba aggenna siiquwaa bessiyo gishshawu atto gees. Nuuni nagaraa oottikko nu oottidobawu azzaniyoogee bessiyaaba, ubba qassi loꞌꞌoba. Hegee nuuni maarotaa oychchanaadaaninne laamettanaadan maaddana danddayees. w21.11 5 ¶11-12

Yihooway ba sunttaa dosiyo gishshawu, ooninne hegaa bonchchanaadan koyees. SHin aadhdhida 6,000 layttawu, A sunttay bonchchettibeenna. (Maz. 74:10, 18, 23) Hegee doommidoy Addaameenne Hewaana Xoossay etawu koshshiyaabaa diggiis giidi Dabloosi (“sunttaa mooriyaagee”) mootido wode. (Doo. 3:1-5) He wodeppe doommidi, Yihooway asawu tumuppe koshshiyaabaa diggiis giidi Dabloosi wordduwan mootiis. Yesuusa A Aawaa sunttay bonchchettibeennaagee qofissiis. Saluwaanne saꞌaa haariyo maatay deꞌiyoy Yihoowa xalaala, qassi I haariyo ogee keehi loꞌꞌo. (Ajj. 4:11) SHin Dabloosi kiitanchchatanne asaa cimmanawu maliis, qassi eti Xoossawu haariyo maatay baawa giidi qoppanaadan oottiis. Mata wode ha mootoy mernawu zaaruwaa demmana. Yihoowa haaroy aybippenne aadhdhiyoogaanne saꞌan tumu sarotettaanne woppaa ehaanay A Kawotetta xalla gidiyoogaa ubbay erana. w21.07 9 ¶5-6

Issi uri ba machcheessinne ba naatussi qumay, maayoynne keettay deꞌanaadan koyiyoogee wottin deꞌiyaaba. Nena miishshay metii? Yaatikko, hagee neessi iita wode. SHin neeni ne ammanuwaa minttanawu ha wodiyaa goꞌettana danddayaasa. Yihoowa woossa, qassi Yesuusi Maatiyoosa 6:25-34n yootidobaa nabbabada hegaa wotta dentta qoppa. Ha wodiyan Yihoowa oosuwaa minni oottiyaageetussi koshshiyaabaa I kunttiyoogaa bessiya deꞌuwan hanidabata qoppa. (1 Qor. 15:58) Yaatiyoogee neegaadan metootida harata Yihooway maaddidoogaadan nenakka I maaddanaagaa ne mintta ammananaadan oottana. I neessi koshshiyaabaanne hegaa I waati kunttanaakko erees. Yihooway nena maaddiyoogaa neeni akeekikko, sinttappe nena gakkana wolqqaama paaceta genccanawu maaddiyaagaa keenaa ne ammanoy minnana. w21.11 20 ¶3; 21 ¶6

Wozuwaabaa tamaarissiyoogan daro Kiristtaanetu ammanoy minniis. Yedetay deꞌishinkka eti aggennan sabbakidosonanne bantta deꞌo laytta ubban daro paaceta genccidosona. Kiitettida Yohaannisa hanotaa qoppa. I geella 60ppe dariya layttawu Kiristtoosabaanne wozuwaabaa ammanettidi sabbakiis. Awu layttay 100 heera gidikkonne, Roomaa kawotettay A keehi iita asa gi qoppidi Paaximo giyo haruuruwan qachchiis. I ay bala oottidee? I “Xoossaa qaalaa yootido gishshaunne Yesuusabaa markkatido gishshau” qashettiis. (Ajj. 1:9) Yohaannisi ammanuwaaninne genccan keehi loꞌꞌo leemiso. Ayyaanay kaalettin Yohaannisi xaafido ba dabddaabbiyan I Yesuusa wozanappe siiqiyoogaanne wozuwaa gishshawu galatiyoogaa qonccissiis. I wozuwaabaa woy wozoy demissana danddayiyo loꞌꞌobaa 100ppe dariya sohuwan yootiis. (1 Yoh. 2:2) Yohaannisi wozuwaa gishshawu keehi galatidoogee qoncce. w21.04 17 ¶9-10

Bollan qohoy deꞌiyoogeetussi ba asay qarettanaadan Yihooway koyees. Leemisuwawu, Israaꞌeelati tulliyaa qanggennaadan I yootiis. He qanggettay yashissiyoogaa woy abaa iitabaa haasayiyoogaa gidana danddayees. Hegee tulle bitanee keehi qohettanaadan oottees! Abaa haasayiyoobaa I siyana danddayeenna gishshawu I zaarana danddayeenna. Qassi, Xoossay ba ashkkarati ‘qooqiyaa sinttan xubbiyaabaa wottennaadan’ paydo 14n yootiis. Bollan qohoy deꞌiyoogeeta xeelliyaagan issi maxaafay hagaadan gees: “Beni Israaꞌeelan asay eta bolli bessennabaanne meqetti baynnabaa darotoo oottees.” Meqetti baynna uri qooqe ura qohanawu woy A bolli miiccanawu koyiyo gishshawu, A sinttan issibaa wottana danddayees. Hegee keehi iitaba! Paydo 14n deꞌiya higgee bollan qohoy deꞌiyoogeetussi Yihoowa asay qarettana koshshiyoogaa akeekanaadan eta maaddiis. w21.12 8-9 ¶3-4

Yaaqoobi ba ishay ba bolli haꞌꞌikka hanqqettennan aggenna giidi yayyiis. Hegaa gishshawu, he allaalliyaa xeelliyaagan I Yihoowa mintti woossiis. Yaatidi I Eesawawu imotaa kiittiis. (Doo. 32:9-15) Wurssettan, Yaaqoobi Eesawa beꞌido wode, A bonchchiyoogaa bessiis. I Eesawawu issitoo woy naaꞌꞌutoo xalla gidennan, laapputoo ziggiis. Yaaqoobi bana ziqqi oottidi Eesawa bonchchiis, qassi ba ishaara sigettiis. (Doo. 33:3, 4) Yaaqoobi ba ishaara gayttanawu oottidobaappenne ba ishaara gayttido hanotaappe nuuni issibaa tamaaroos. Yaaqoobi bana ziqqi oottidi Yihooway maaddanaadan oychchiis. Yaatidi, I ba ishaara sigettanawu baassi danddayettida ubbabaa oottiyoogan ba woosaara maayettiyaabaa oottiyoogaa bessiis. He ishantti gayttido wode, Yaaqoobi ooni likke, qassi ooni balee giidi ba ishaa Eesawaara palamettibeenna. Yaaqooba halchchoy ba ishaara sigettiyoogaa. Neeni Yaaqooba leemisuwaa kaallana danddayay?—Maa. 5:23, 24. w21.12 25 ¶11-12

Yesuusi ne nagaraa kammanawu hayqqidoogaa neeni qoppiyo wode, ‘Taani he alꞌꞌo imotay bessiyoogaa keena loꞌꞌo asa gidikke’ geennan aggakka. Neeni hegaadan qoppana danddayiyoy aybissee? Nu nagaranchcha wozanay nuuni siiqoy bessenna pattenna asa giidi nubaa qoppanaadan oottidi nuna cimmana danddayees. (1 Yoh. 3:19) Nuuni hegaadan qoppiyo wode, “Xoossai nu wozanaappe gita” gidiyoogaa hassayana koshshees. Yihooway nuna siiqenna woy nuussi atto geenna giidi nu qoppikkonne, Saluwan deꞌiya nu Aaway nuna siiqees, qassi I nuussi atto gaana. Yihooway nuna siiqiyoogaa nuuni ammanana koshshees. Yaatanawu, nuuni A Qaalaa darotoo xannaꞌana, ubbatoo A woossananne ayyo goynniya asaara wodiyaa aattana koshshees. Hageeta oottiyoogee keehi koshshiyoy aybissee? Ufayssiya Yihoowa eeshshatubaa neeni loytta akeekana. I nena siiqiyoogaa neeni akeekana. Neeni Geeshsha Maxaafaabaa ubba galla wotta denttada qoppiyo wode, ne qofaaninne ne wozanan deꞌiya ‘mooruwaa suurissada,’ geeshshabaa qoppanaadan hegee nena maaddana danddayees.—2 Xim. 3:16. w21.04 23-24 ¶12-13

Nu ammanuwaa minttanawu eraa demmiyoogaa xallay gidenna. Nuuni tamaariyoobaa wotti dentti qoppana koshshees. Mazamure 77 xaafidaagaa hanotaa qoppa. I babaaninne ba mala Israaꞌeelatuban Yihooway ufayttenna giidi qoppido gishshawu, unꞌꞌettiis. I hegaadan hirggido gishshawu, qammi xiskkenna. (Paydo 2-8) Yaatin waatidee? I Yihoowawu hagaadan giis: “Neeni oottidobaa ubbaa taani zaara zaarada qoppana; ne wolqqaama oosota ubbaa taani yererana.” (Paydo 12) He mazamuriyaa xaafidaagee Yihooway beni ba asawu oottidobaa loytti eriyoogee qoncce; gidoppe attin I, “Xoossai maariyoogaa dogidee? Ba qaretaakka hanqquwan laammidee?” yaagidi qoppiis. (Paydo 9) Mazamuriyaa xaafidaagee Yihooway oottidobaa, qassi beni wode Xoossay asaa maaridoogaanne etawu qaretidoogaa yuushshi qoppiis. (Paydo 11) Yaatido gishshawu waanidee? I Yihooway ba asaa aggi bayennaagaa ammaniis. (Paydo 15) w22.01 30-31 ¶17-18

Ammanettidi hayqqida attumaageetanne maccaageeta xeelliyaagan Yihoowawu aybi siyettii? I eta zaarettidi beꞌanawu keehi laamotees! (Iyy. 14:15) Yihooway ba dabbuwaa Abrahaama beꞌanawu ay keena laamotiyaakko qoppa. (Yaaq. 2:23) Woy qassi Yihooway “sinttan eqqidi” haasayissido Muuseera zaarettidi haasayanawu ay keena laamotiyaakko qoppa. (Kes. 33:11) Qassi Daawitinne hara mazamuraaweti sabbanawu ufayssiya mazamuriyaa yexxiyoogaa siyanawu I yeemuwan naagees! (Maz. 104:33) Xoossaa dabbo gidida he asati hayqqidaba gidikkonne, Yihooway eta dogibeenna. (Isi. 49:15) I etabaa ubbabaa hassayees. Issi gallassi, I eta hayquwaappe denttana, qassi eti wozanappe woossiyoogaa zaarettidi siyananne eta goynuwaa ekkana. Ne siiqiyo uri hayqqidaba gidikko, ha qofay nena minttettana danddayees. Edenen doommida makkalay giiganaappe kase yaa iiti iiti baanaagaa Yihooway erees. Yihooway ha wodiyan alamiyan deꞌiya iitatettaa, naaquwaanne makkalaa ixxees. w21.07 10 ¶11; 12 ¶12

Nuuni siiqiyo wode wozuwaa gishshawu galatiyoogaakka bessoos. Aybissi? Yesuusi ba deꞌuwaa nu xallawu gidennan, nu ishanttussinne michchonttussikka immido gishshataassa. Yesuusi etawu hayqqanawu eeno giis. Yaatiyo gishshawu, I eta keehi siiqiyoogee qoncce. (1 Yoh. 3:16-18) Nuuni nu ishanttanne michchontta siiqiyoogaa etawu oottiyooban bessoos. (Efi. 4:29, 31–5:2) Leemisuwawu, eti sahettiyo wode woy meretay gattiyo daafaa gujjin eti wolqqaama metota gencciyo wode eta maaddoos. Gidoppe attin, nu mala Kiristtaanee nuna yilloyiyaabaa oottiyo woy haasayiyo wode waatana koshshii? Neeni atto gaanawu issi issitoo metoota eray? (Wog. 19:18) Yaatikko, ha zoriyaa oosuwan peeshsha: “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago. “[Yihooway, NW]” intteyyo atto giidoogaadan, inttekka atto giite.” (Qol. 3:13) Nuuni nu ishawu woy michcheessi atto giyo wode ubban, wozuwaa gishshawu saluwan deꞌiya nu Aawaa tumuppe galatiyoogaa bessoos. w21.04 18 ¶12-13

Nuuni Yihoowayyo minnidi oottiyo gishshawu daroti xammaqettanaadan maaddana danddayoos. SHin nuuni hegaadan oottana danddayiyoy Yihooway nuna maaddiyo gishshataassa gidiyoogaa akeekoos. Gubaaꞌiyan nuuyyo daro aawatettay deꞌikko, gubaaꞌiyan sarotettay deꞌanaadan loytti maaddana danddayiyoogaakka Aphiloosanne kiitettida PHawuloosa hanotaappe tamaaroos. Nuuni issippetettaaninne issoy issuwaara saruwan deꞌanaadan cimatinne gubaaꞌiyawu oottiyaageeti nuna maaddiyo wode keehi ufayttoos. Eti Geeshsha Maxaafaappe zoriyo wode hegaadan oottoosona. Eti haratuppe aadhdhanawu baaxetokkona, shin gubaaꞌiyan deꞌiya ubbay Yesuusawu azazettanaadaaninne A leemisuwaa kaallanaadan maaddoosona. (1 Qor. 4:6, 7) Xoossay immido eray nu ubbaassi deꞌees. Nu oottiyoobay keehi gitaba gidenna giidi qoppennan waayi aggana. SHin guutta gidida daro qunccuutee loꞌꞌiya maayuwaa sikkana danddayiyoogaa hassaya. Nuuni haratuppe aadhdhiyaaba milatanawu mule baaxetennaadan ubbatoo minni oottana koshshees. Qassi gubaaꞌiyan sarotettaynne issippetettay deꞌanaadan nuuyyo danddayettida ubbabaa oottana koshshees.—Efi. 4:3. w21.07 19 ¶18-19

Ne siiqiyo hayqqidaageeti hayquwaappe denddin beꞌanaagaa ammanettana danddayaasa. Yesuusi kayyottiya ba laggeta minttettiyo wode yeekkidoogaappe I hayqqidaageeta denttanawu yeemottiyoogaa akeekoos. (Yoh. 11:35) Kayyottiyaageeta maaddana danddayaasa. Yesuusi Marttiiranne Mayraamiira yeekkiyoogaa xalla gidennan, eti yootiyoobaa siyiisinne eta minttettiis. (Yoh. 11:25-27) Kayyottiyaageetussi nuuni hegaadan oottana danddayoos. Awusttiraaliyan deꞌiya Daana giyo cimay hagaadan giis: “Ta machchiyaa hayqqa simmin tawu maadoy koshshiis. Daro ishanttinne eta machchoti taani yootiyoobaa ubbatoo siyoosona. Eti taani ta azzanuwaa yootanaadan oottidosona, qassi taani yeekkiyo wode eti pokkotibookkona. Taani ta kaamiyaa meeccana, suuqiyaappe shammiyoobaa shammananne qumaa kattana danddayenna wodetun, hegaa mala oosota oottiyoogankka eti tana maaddidosona. Qassi eti tanaara darotoo woossidosona. Eti tumu lagge gidiyoogaanne ‘metuwaa wode maaddanaassi yelettida’ ishantta gidiyoogaa bessidosona.”—Lee. 17:17. w22.01 16 ¶8-9

Yihooway nuussi keehi loꞌꞌobaa qoppees. (Lee. 4:20-22) I ba Qaalaa baggaara, Geeshsha Maxaafaa qofay deꞌiyo xuufiyaa baggaara, woy kayma Kiristtaaniyaa baggaara nuna zoriyo wode, nuna siiqiyoogaa bessees. (Ibr. 12:9, 10) Zoree imettido ogiyaa gidennan, zoriyaa qoppa. Nuuni issi issitoo zoree likke ogiyan imettibeenna giidi qoppana danddayoos. Zoriyaageeti siyanawu ufayssiya ogiyan zoranawu baaxetana koshshees. (Gal. 6:1) SHin zoree imettiyoy nuussa gidikko, zorida uri nuna loꞌꞌo ogiyan zoribeenna giidi nuuni qoppikkokka zoriyan xeelaa wottana koshshees. Nuna hagaadan oychchana danddayoos: ‘Zoree imettido ogiyaa taani dosana xayikkonne, odettidabay tumee? Taani zoriyaa immida ura balaa aggabayada he zoriyan goꞌettana danddayiyaanaa?’ Nuuyyo imettiya zoree ayba gidikkonne, zoriyan goꞌettiyo ogiyaa koyiyoogee loꞌꞌoba. w22.02 12 ¶13-14

Nuuni bala qofaanne iita meezeta xayssiyoogee wode ekkiyaabanne baaxeyiyaaba gidiyoogaa Yihooway erees. (Maz. 103:13, 14) Gidikkonne, Yihooway ba Qaalaa baggaara, ba ayyaanaa baggaaranne ba dirijjitiyaa baggaara nuuni laamettanawu koshshiya aadhdhida eratettaanne wolqqaa nuussi immees; qassi nuna maaddees. Geeshsha Maxaafaa goꞌettada nena loytta qora. Xoossaa Qaalay heregaa mala; neeni qoppiyoobaa, haasayiyoobaanne oottiyoobaa qoranaadan Xoossaa Qaalay nena maaddana danddayees. (Yaaq. 1:22-25) Qassi Yihooway nena maaddanawu ubbatoo giigi uttiis. I nena waati maaddanaakko ooppenne aaruwan erees; I ne wozanan deꞌiyaabaa erees. (Lee. 14:10; 15:11) Hegaa gishshawu, neeni ubbatoo A woossa, qassi A Qaalaa galla galla xannaꞌa. Yihooway kessido maarati keehi loꞌꞌo gidiyoogaa ammana. Nuuni oottanaadan Yihooway oychchiyo ubbabay nuna goꞌꞌees. I kessido maaraadan deꞌiyaageeti banttana bonchchoosona, loꞌꞌo deꞌuwaa deꞌoosonanne keehi ufayttoosona.—Maz. 19:8-11. w22.03 4 ¶8-10

Nuuni goyno sohota keexxiyo wodenne bottokoniyo wode Yihoowawu goynnoos. Xoossaa Dunkkaaniyaanne A giddon wottiyo miishshata oottiyo oosuwaa Yihooway geeshsha oosodan xeelliis. (Kes. 36:1, 4) Ha wodiyankka, SHiiquwaa Addaraashatanne Yihoowa dirijjitee goꞌettiyo hara keettata keexxiyoogaa Yihooway geeshsha oosodan xeellees. Amarida ishanttinne michchontti he oosota oottiyoogan daro wodiyaa aattoosona. Kawotettaa oosuwaa oottiyoogan keehi maaddiyaageeta wozanappe nashshoos. Eti sabbakiyo oosuwaakka oottoosona. Etappe amaridaageeti aqinye gidanawukka koyana danddayoosona. Cimati he minni oottiya ishanttinne michchontti aqinye gidanawu danddayiyo wode aqinye gidanaadan paqqadiyoogan keexuwaa oosuwaa maaddiyoogaa bessana danddayoosona. Nuuni keexuwaa oosuwan gooba gidin woy gidana xayin, nuuni ubbaykka he keettata muletoo geeshshananne loꞌꞌo hanotan oyqqana danddayoos. w22.03 22 ¶11-12