Laappune

Maatiyoosa 25:31-36n Yesuusi yootido ‘dorssati’ saꞌan deꞌanawu hidootiya wurssetta wodiyan deꞌiya xillota bessiyaaba. Kumetta saꞌan sabbakiyoonne erissiyo ashkkara oottiyo oosuwaa Kirsttoosa ishanttuppe attidaageeti polanaadan hara dorssati eta maaddiyoogan ammanettidi oottoosona. (Maa. 24:14; 28:19, 20) Layttan layttan Godaa Kahuwaappe kasetiya saaminttatun, hara dorssati kumetta saꞌan asaa Godaa Kahuwawu shoobbiyo zamachchan minnidi oottiyoogan Kiristtoosa ishantta maaddoosona. Eti Godaa Kahuwawu koshshiya ubbabaakka giigissoosona. Hara dorssati Kiristtoosa ishantta hegaa mala ogetun maaddiyoogan keehi ufayttoosona. Yesuusi he dorssati tiyettida ba ishanttuyyo oottiyoobaa bawu oottidobadan xeelliyoogaa eti eroosona.—Maa. 25:37-40. w22.01 22 ¶11-12

Yesuusa eeshshatanne I harata oyqqido ogiyaa kaallana danddayoos. Leemisuwawu, inchchirichchay oyqqido bitaniyawu, wolqqaama harggiyaa harggida maccaaseessinne siiqiyo uri hayqqidoogeetussi I qarettiis. Nuuni Yesuusa milatiyo wode, Yihoowakka milatoos. (Mar. 1:40, 41; 5:25-34; Yoh. 11:33-35) Nuuni kaseegaappe aaruwan Yihoowa milatiyo wode, akko loytti shiiqoos. Yesuusa kottiyaa kaalliyoogee ha iita alamee nu qofaa shaakkennaadan maaddees. Yesuusi saꞌan deꞌido wurssetta qammi hagaadan giis: “Taani sa7aa xoonaas.” (Yoh. 16:33) Ha iita alamiyaa qofay, halchchoynne oosoy bana shaallanaadan koyennaagaa yootiis. Yesuusi ha saꞌaa kiitettidoy Yihoowaassi exatanaassa gidiyoogaa mule dogibeenna. Nuuni shin? Nu qofay shaahettanaadan oottana danddayiya darobay ha alamiyan deꞌees. SHin, nuuni Yesuusaagaadan Yihoowa sheniyaa oottiyoogan ubbatoo xeelaa wottikko, ha alamiyaa nuunikka “xoonana.”—1 Yoh. 5:5. w21.04 3-4 ¶7-8

Yesuusi “[bana] ammaniya ubbai merinaa de7uwaa [ekkana]” giidi qaalaa gelidoogaa kiitettida PHawuloosi erees. (Yoh. 3:16; Roo. 6:23) Ee, PHawuloosi wozuwaa ammaniyaageetuppe issuwaa. Gita nagaraa oottidaageetikka bantta nagaraappe simmikko, Yihooway etawu atto gaanawu keehi koyiyoogaa PHawuloosi ammanees. (Maz. 86:5) PHawuloosi ba gishshawu Yesuusi hayqqanaadan Xoossay A kiittidoogaa ammaniyo gishshawu, bana Xoossay keehi siiqiyoogaa erees. Galaatiyaa 2:20 wurssettan deꞌiya minttettiya qofaa akeeka. PHawuloosi hagaadan giis: ‘Xoossaa naꞌay tana siiqidi, ta gishshawu ba huuphiyaa immiis.’ PHawuloosi, ‘Taani keehi iita asa gidiyo gishshawu Xoossay tana siiqana danddayenna’ giidi qoppibeenna. I, ‘Yihooway ta ishantta siiqiyo gaasuwaa akeekays, shin I tana siiqana danddayenna’ giidikka qoppibeenna. PHawuloosi Roomen deꞌiya Kiristtaanetussi hagaadan giis: “Nuuni biron nagaranchcha gididi de7ishin, Kiristtoosi nu gishshau haiqqiis.” (Roo. 5:8) Xoossay nuna siiqennaadan diggana danddayiyaabi baawa! PHawuloosi Xoossaa siiqoy ay keena wolqqaamakko erees. Yihooway Israaꞌeelata keehi danddayidoogaa PHawuloosi erees. w21.04 22 ¶8-10

Xannaꞌissiyo wode ne xinaatee Yihoowa siiqanaadan maadda. Waatada? Yihoowa eeshshatubaa ne xinaatee loytti eranaadan maaddana danddayiyo ogiyaa koya. Yihooway bana siiqiyaageeta maaddiya ufayttiya Xoossaa gidiyoogaa ne xinaatee akeekanaadan maadda. (1 Xim. 1:11; Ibr. 11:6) Xinaatee Yihoowa azazota azazettiyoogee A goꞌꞌanaagaa yoota, qassi hegee Yihooway A siiqiyoogaa bessiyaaba gidiyoogaa awu qonccissa. (Isi. 48:17, 18) Ne xinaatee Yihoowa kaseegaappe aaruwan siiqiyo wode, koshshiyaaban laamettanawu I keehi koyana. Nuuni Geeshsha Maxaafaa xannaꞌissiyo uri xammaqettanawu ba goꞌꞌaa aggibayana koshshees. Amarida xinaateti bantta aquwaa aggibayiyoogee koshshana danddayees. Yihoowa siiqennaageetuura laggetiyoogaa aggiyoogee darotussi koshshana danddayees. Harati qassi Yihoowa Markkata ixxiya eta soo asay aggibayidoogeeta gidana danddayoosona. Yesuusi bana kaalliyaageeti azzanana koshshennaagaa yootiis. Yihooway ayyaanaaban so asaa gidida siiqiyaageeta immiyoogan eta woytana.—Mar. 10:29, 30 w21.06 4 ¶8-9

Kiitettida PHawuloosi erissiyo ashkkara oottiyo oosuwaa puutiyaa dichchiyoogaara geeddarssiis; hegee nuuni puutiyaa tokkiyoogaappe aadhdhiyaabaa oottana koshshiyoogaa qonccissees. I Qoronttoosan deꞌiya Kiristtaanetuyyo hagaadan giis: ‘Taani puutiyaa tokkaas; Aphiloosi haattaa ushshiis; hegaa gishshawu intte Xoossaa shooqa.’ (1 Qor. 3:6-9) Nuuni ‘Xoossaa shooqan’ oottiyaageeta. Yaatiyo gishshawu, nuuni sabbakiyo wode puutiyaa tokkoosinne tamaarissiyo wode haattaa ushshoos. SHin, puutiyaa dichchiyaagee Xoossaa gidiyoogaa eroos. Haratuyyo sabbakiyoogeenne tumaa eta tamaarissiyoogee keehi gita maata! Ha oosoy nuuni wozanappe ufayttanaadan oottees. Tasalonqqe kataman deꞌiya daroti erissiyo ashkkara gidanaadan maaddida kiitettida PHawuloosi bawu siyettiyaabaa hagaadan qonccissiis: “Nu Godaa Yesuus Kiristtoosi yiyo wode, nuuni be7ana giidi ufaissan naagiyoogee, woikko nu ufaissai, woikko nuuni ceeqettiyo akiliile oonee? Inttena gidekketiiyye? Aissi giikko, intte nu bonchchonne nu ufaissa.”—1 Tas. 2:19, 20; Oos. 17:1-4. w21.07 3 ¶5; 7 ¶17

Yihooway nuna ubbaa baakko ehiis. (Yoh. 6:44) Hegaa giyoogee woygiyoogaakko qoppa. Yihooway ha alamiyan deꞌiya biilooniyan qoodettiya asaa wozanaa qoriyo wode, I neeni ashkke gidiyoogaanne A siiqiyoogaa akeekiis. Hegee Yihooway xoqqu ootti xeelliyooba. (1 Odi. 28:9) Yihooway nena erees, nebaa akeekeesinne nena siiqees. Hegee keehi minttettiyaaba! Yihooway neeyyo wozanappe qoppees; qassi Kiristtaane gidida ne ishanttussinne michchonttussi ubbawukka qoppees. Hegaa akeekanaadan nuna maaddanawu, Yihoowa issi henttanchchaara Yesuusi geeddarssiis. Xeetu dorssay deꞌiyo wudiyaappe issi dorssay bayikko henttanchchay waatanee? I “uddufun tammanne uddufunaa deriyan yeggi bayidi, he bayidaagaa koyanau” bees. Henttanchchay he dorssaa demmiyo wode, bayido gishshawu A bolli hanqqettenna. I ufayttana. Nuuni hegaappe ay tamaariyoo? Ubba dorssatikka Yihoowawu alꞌꞌo. Yesuusi hagaadan giis: “Saluwan de7iya intte Aawai ha guuttatuppe issoi bayyanaagaakka koyenna.”—Maa. 18:12-14. w21.06 20 ¶1-2

Nuuni ammanttiya nu hidootaanne Xoossay nuna siiqiyo mino siiquwaa wotti dentti qoppiyo wode, nuuni Yihoowa siiqiyo siiqoynne aara dabbotido dabbotay keehi minnees. (Roo. 8:38, 39) Nuuni Yesuusa leemisuwaa kaallanaadan maaddees. (1 PHe. 2:21) Godaa Kahuwaa wode, Yesuusi saꞌan deꞌido wurssetta saaminttabaa, A hayquwaabaanne A dendduwaabaa yootiya Geeshsha Maxaafaa taariketa nabbaboos. Qassi Godaa Kahuwaa bonchchiyo omarssi siyiyo haasayay Yesuusi nuna siiqiyo siiquwaa hassayissees. (Efi. 5:2; 1 Yoh. 3:16) Nuuni Yesuusi ba goꞌꞌaa aggibayidoogaabaa nabbabiyoogeenne hagaa wotti dentti qoppiyoogee ‘I deꞌidoogaadan deꞌanaadan’ nuna denttettees. (1 Yoh. 2:6) Nuuni Xoossaa siiquwan deꞌanawu murttido murttiyaa yaa minttees. (Yih. 20, 21) Nuuni Xoossawu azazettanawu A sunttay geeyanaadan oottanawunne A wozanaa ufayssanawu nuuyyo danddayettida ubbabaa oottiyoogan A siiquwan deꞌoos. (Lee. 27:11; Maa. 6:9; 1 Yoh. 5:3) Nuuni Godaa Kahuwawu shiiqiyoogee Yihoowassi, ‘Taani ne siiquwan merinawu deꞌanawu koyays,’ giyoogaa bessiya ogiyan galla galla deꞌanawu kaseppe aaruwan murttanaadan nuna denttettees. w22.01 23 ¶17; 25 ¶18-19

Koyidobaa dooriyo maataa Yihooway nuussi immiis. Nuuni nu deꞌuwan oottanabaa doorana danddayoos. Siiqiya nu Xoossay nuuni ayyo haggaazanawu dooriyo wode ufayttees. (Maz. 84:11; Lee. 27:11) Koyidobaa dooriyo maataa hara loꞌꞌobata kuuyanawu goꞌettana danddayoos. Nuuni nu koyiyoobaappe haratuugaa kaseyiyoogan Yesuusa leemisuwaa kaallana danddayoos. Issi galla, Yesuusinne I kiittidoogeeti keehi daafurido wode, eti shemppanawu loꞌꞌo gi qoppido sohuwaa biidosona. SHin eti shemppana danddayibookkona. Cora asay etaara gayttidi Yesuusappe tamaaranawu keehi koyiis. Gidoppe attin, Yesuusi yiillotibeenna. Asawu I qarettiis. Yaatiyo gishshawu, Yesuusi waatidee? “Asaa darobaa tamaarissuwaa doommiis.” (Mar. 6:30-34) Nuuni harata maaddanawu nu wodiyaanne wolqqaa goꞌettiyoogan Yesuusa leemisuwaa kaalliyo wode, saluwan deꞌiya nu Aawaa bonchchoos.—Maa. 5:14-16. w21.08 3 ¶7-8

Asaa gujjin ubbabay issi mala gidanaadan Yihooway koyenna. Asaa gujjin, maalaaliya A meretan hegee qoncciis. Nuuni ubbay dumma dumma. Hegaa gishshawu, Yihooway haratuura nena mule geeddarssenna. I neeni tumuppe ay mala asakko erana danddayees. (1 Sam. 16:7) Qassi I ne diccido hanotaa, neeni loytta oottana danddayiyoobaanne danddayennabaa erees. Hegaa bollikka, ne oottana danddayiyoobaappe aarobaa oottanaadan I koyenna. Nuuni aagaadan nuna xeellana koshshees. Yaatikko, nuuni nubaa likkiyaappe aattidi woy keehi guuttidi qoppennan aggiyoogan ‘wozannaama asa’ gidoos. (Roo. 12:3) Harati oottido loꞌꞌobaappe nuuni tamaarana danddayoos. Leemisuwawu, haggaaziyoogan keehi gooba gidida ishaa woy michchiyo nuuni erennan waayi aggana. (Ibr. 13:7) Haggaaziyoogan nuuni kaseppe waani qara gidana danddayiyaakko appe woy ippe tamaarana danddayoos. (Pili. 3:17) SHin issi uray oottido loꞌꞌobaappe tamaariyoogeenne nena aara geeddarssiyoogee dummatees. w21.07 20 ¶1-2

Doꞌaa mehiyaa, maataa mittaanne xoolintteta loytta xeelliyoogan Medhdhidaagaa ne ammaniyo ammanuwaa minttana danddayaasa. (Maz. 19:1) Hegeeta neeni loytta xannaꞌiyoogan, Yihooway Medhdhidaagaa gidiyoogaa loytta ammanana. Neeni meretaabaa xannaꞌiyo wode nuna medhdhidaagaabaa tamaarana danddayiyoobaa yuushsha qoppa. (Roo. 1:20) Leemisuwawu, saꞌan deꞌuwan deꞌiyaabawu koshshiya hoꞌꞌuwaanne pooꞌuwaa awaa ayfiyaappe demmoos. SHin awaa ayfiyaappe kiyiya cararetuppe amaridaageeti qohana danddayoosona. Nuuni he cararetuppe naagettana koshshees. Qassi nuuni naagettida! Waanidi? He qohiya cararetuppe nuna naagiya gaazee biittaa yuushuwan deꞌees. Qohiya carareti wolqqaami wolqqaami biyo wode, teqqiya gaazeekka gujji gujji bees. Hagaa giigissidaagee deꞌiyoogaa, qassi I siiqiyaagaanne ooppenne eran aadhdhiya Medhdhidaagaa gidiyoogaa neeni maayettiyoogee qoncce. w21.08 17 ¶9-10

Issi uri xammaqetti simminkka, nuuni A ubbatoo siiqananne bonchchana bessees. (1 Yoh. 4:20) Nuuni hegaadan waati oottana danddayiyoo? A ammanettiyoogan hegaadan oottana danddayoos. SHin nuuni I issibaa oottido gaasuwaa erana xayikko, I hegaa ba xallaa siiqiyo gishshawu oottiis giidi qoppokko. Nuuni nu ishay nuuppe aadhdhiyaabadan xeelliyoogan A bonchchiyoogaa bessoos. (Roo. 12:10; Pili. 2:3) Tumuppe nuuni asa ubbaa maariyaageetanne etawu kehiyaageeta gidana bessees. Nuuni merinawu Yihoowa soo asa gidanawu koyikko, Xoossaa Qaalay yootiyoobaa nu deꞌuwan oosuwan peeshshana bessees. Leemisuwawu, Yesuusi nuuni nu morkketa gujjin, asa ubbaa maariyaageetanne etawu kehiyaageeta gidana koshshiyoogaa tamaarissiis. (Luq. 6:32-36) Hegaadan oottiyoogee issi issitoo nuna metana danddayees. Yaatikko, nuuni Yesuusaagaadan qoppanawunne oottanawu tamaarana bessees. Nuuni Yihoowayyo azazettanawunne Yesuusa milatanawu nuussi danddayettida ubbabaa oottiyo wode, merinawu A soo asa gidanawu koyiyoogaa saluwan deꞌiya nu Aawawu bessoos. w21.08 6 ¶14-15

Yihoowan ammanetta. Yihooway nuuni an ammanettiyo wodenne nuussi deꞌiya keehi loꞌꞌobaa ayyo immiyo wode loꞌꞌo gidida darobaa nuuyyo oottanawu qaalaa geliis. Yihoowawu minnidi haggaazida darotubaa Geeshsha Maxaafay yootees. Eti ammanettiyoogaa bessiyaabaa ootti simmin, Yihooway eta anjjidoogaa bessiya daro taarikee deꞌees. Leemisuwawu, Abrahaami “au biyaakkonne erennan” ba sooppe kiyi simmin, Yihooway A anjjiis. (Ibr. 11:8) Qassi Yaaqoobi kiitanchchaara baaxeti simmin Yihooway A anjjiis. (Doo. 32:24-30) Israaꞌeela deree Hidootaa Biittaa gelanawu mati uttido wode, qeeseti Yorddaanoosa SHaafaa haattaa gaxaa yedhdhi simmin asay pinniis. (Yaas. 3:14-16) Yihoowan ammanetti baaxetida ha wodiyan deꞌiya Yihoowa Markkatu taarikiyaappekka tamaarana danddayaasa. w21.08 29-30 ¶12-14

Cimida ishanttoonne michchonttoo issibay waani oosettiyaakko intte kase beꞌidobaappe ereeta; shin ooratta hanotaara meezetana koshshiyoogaakka intte akeekeeta. Cimidaageetoo, mati xammaqettidaageetikka harata daro ogiyan maaddana danddayeeta. Yelagati intte deꞌuwan hanidabaa siyiyoogaaninne intte eridobaappe tamaariyoogan ufayttoosona. Intte intte deꞌuwan erido darobaa harata loohissanawu ‘immikko,’ Yihooway inttena keehi anjjana. (Luq. 6:38) Cimidaageetoo, yelagatuura intte keehi dabbotiyo wode inttekka yelagatikka goꞌettana. (Roo. 1:12) Haratussi baynna maaddiyaabay inttessi ubbawu deꞌees. Cimidaageetussi eti bantta deꞌuwan demmido aadhdhida eratettaynne meezee deꞌees. Yelagatussi wolqqaynne minotettay deꞌees. Yelaga uraynne cima uray lagge gididi issippe oottiyo wode, saluwan deꞌiya siiqo Aaway sabettanaadaaninne gubaaꞌiyan deꞌiya ubbay anjjettanaadan oottoosona. w21.09 8 ¶3; 13 ¶17-18

Yesuusi mittaa bolli barchchetidi hayqqidoogee daro Ayhudatussi xube gididoy aybissee? Yesuusi mittaa bolli hayqqidoogee eti A makkalanchchanne nagaranchcha asadan xeellanaadan oottiis; hegaa gishshawu I Mase gidiyoogaa eti ammanennan ixxidosona. (Zaa. 21:22, 23) Yesuusan xubettida Ayhudati I mooroy baynna asa gidiyoogaa, A wordduwan mootidoogaanne naaqqidoogaa ammananawu koyibookkona. Yesuusa bolli pirddanawu shilootan uttidaageeti suure pirddanawu mule koyibookkona. Ayhuda xoqqa pirdda keettaa daannati Yesuusa bolli pirddanawu eesuwaara shiiqidosona; qassi shilootaa higgiyaa eti kaallibookkona. (Luq. 22:54; Yoh. 18:24) Yesuusa mootido mootuwaanne naqaashaa siyi simmidi he daannati suure pirddibookkona. Qassi eti “Yesuusa woranau a bolli worddo markka demmanau koyidosona.” (Maa. 26:59; Mar. 14:55-64) Yesuusi hayquwaappe denddi simmin, likke gidenna pirddaa pirddida he daannati duufoy mela gidido gaasuwaa xeelliyaagan worddobaa yootanaadan A duufuwaa naagiya Rooma wotaaddaratuyyo ‘daro miishshaa immidonona.’—Maa. 28:11-15. w21.05 11 ¶12-13

Ha iita alamiyaa Yihooway awudenne xayssana danddayees. SHin A danddayay nuna keehi maaddiis! Addaameenne Hewaani zareti ubbay yelettiyo wode nagaranchcha. Gidikkonne, Yihooway eta siiqeesinne etawu koshshiyaabaa kunttees, qassi ha iita alamiyaa xayssanawu qaalaa geliis. (1 Yoh. 4:19) Hegaa bollikka, I asay waayettanaadan oottiya ubbabaa xayssana wodiyaa keeri wottiis. He wodee gakkanaashin genccanaadan nunakka Yihoowa siiqoy denttettana koshshees. Gencciyoogan Yihooway keehi loꞌꞌo leemiso. Gencciyoogan Yesuusi ba Aawaa leemisuwaa kaalliis. Yesuusi saꞌan deꞌiyo wode, nu gishshawu iita haasayaa, cashshaanne mittaa bolli barchchetidi hayqqiyoogaa gencciis. (Ibr. 12:2, 3) Gencciyoogan Yihooway leemiso gididoogee Yesuusi genccanaadan minttidoogee qoncce. Hegee nunakka minttana danddayees. w21.07 12-13 ¶15-17

Saluwan deꞌiya nu Aaway ubba galla nuna maarees. (Maz. 103:10-14) Yesuusa kaalliyaageeti nagaranchcha gidikkonne, I etassi maariyoogaanne atto giyoogaa bessiis. Ubba qassi nu nagaray atto geetettana mala I ba shemppuwaa aattidi immanawu eeno giis. (1 Yoh. 2:1, 2) Nuuni issoy issuwawu atto giyo wode nu siiqoy minnees. (Efi. 4:32) Haratussi atto giyoogee issi issitoo keehi deexxana danddayiyoogee qoncce; hegaa gishshawu nuuni atto gaanawu baaxetana koshshees. Issi michchiyaa Wochchiyo Keelan kiyida “Issoy Issuwau Atto Giite” giya huuphe yohoy atto gaanaadan bana maaddidoogaa yootaasu. A hagaadan gaasu: “Haratuyyo atto gaasa giyoogee, eti mooridobaa neeni nashshaasa woykko hegaa gaasuwan gakkidabaa xaasayada xeellaasa giyoogaa gidennaagaa he huuphe yohoy qonccissees. SHin, atto giyoogee hegaa mala mooruwaa gishshawu lancciyaa uluwan oyqqennan aggidi, saro deꞌiyoogaa giyoogaa.” Nuuni nu ishanttanne michchontta atto giyo wode, eta siiqiyoogaa bessoosinne nu Aawaa Yihoowa milatoos. w21.09 23-24 ¶15-16

Yesuusi tumaa siiqees; hegeekka Xoossaabaa tumaanne Xoossay oottana ubbabaa siiqees giyoogaa. Yesuusi deꞌido deꞌoy I tumaa ammaniyoogaa bessees; qassi I harati he tumaa eranaadan oottiis. (Yoh. 18:37) Tumuppe Yesuusa kaalliyaageetikka he tumaa mintti siiqoosona. (Yoh. 4:23) PHeexiroosi Kiristtaanetu haymaanootiyaa, ‘Tumaa ogiyaa’ yaagiis. (2 PHe. 2:2) Beni Kiristtaaneti tumaa mintti siiqiyo gishshawu, tumaara maayettenna haymaanoote timirtteta, wogaanne asa qofaa kaallibookkona. (Qol. 2:8) Hegaadankka ha wodiyan tumu Kiristtaaneti bantta ammanuwaassinne bantta deꞌuwaassi Yihoowa Qaalaa denddo oottidi ‘tuman deꞌanawu’ baaxetoosona. (3 Yoh. 3, 4) Yihoowa Markkati ubbatoo Geeshsha Maxaafan deꞌiya ubbabaa loytti eroos gookkona. Geeshsha Maxaafaa timirttiyaa qonccissiyo ogiyan woy gubaaꞌiyaa darajjayiyo ogiyan issi issitoo baloosona. Bolla Gididi Heemmiyaagee nuuni kase eridobaa woy issibaa oottiyo ogiyaa laammana koshshiyoogaa akeekiyo wode, sohuwaara laammees. w21.10 21-22 ¶11-12

Beni wode, katamaa yuushuwan deꞌiya gimbbeti asaa morkketuppe naagoosona. Gimbbiyaadan, aggenna Yihoowa siiqoy aara nu dabbotido dabbotaa shugissana danddayiya aybippenne nuna naagees. Hegaa bollikka, aggenna Yihoowa siiqoy nuuni akko shiiqanaadan oottees. (Erm. 31:3) Mazamuraawee Daawiti Xoossay ba asaa waati naagiyaakko bessiya hara leemisuwaa goꞌettiis. I hagaadan giis: “Taani qosetta attiyo sohoinne aggenna siiquwaa tana bessiya Xoossai nena.” Daawiti Yihoowabaa hagaadankka yootiis: ‘I taassi aggenna siiquwaa bessiya Xoossaanne ta qatuwaa; I ta miixaanne tana ashshiyaagaa. I ta gonddalliyaanne taani baqatada attiyo soho.’ (Maz. 59:17; 144:2) Daawiti aggenna Yihoowa siiquwaa baqati attiyo sohuwaaranne qatuwaara geeddarissidoy aybissee? Nuuni saꞌan deꞌiyo heeray awanne gidin, Yihoowa ashkkarata gidikko, nu aara dabbotido dabbotay moorettennaadan teqqanawu koshshiya oge ubban I nuna naagees. w21.11 6 ¶14-15

Yesuusinne I erissiyo ashkkarati wolwoluwan biishin eti qoppennan wolqqaama gotee denddiis. Eti bantta ammanuwaa minttana koshshiyoogaa akeekanaadan eta maaddanawu Yesuusi he hanotaa goꞌettiis. (Maa. 8:23-26) Wolqqaama beetay denddin haattay wolwoluwan kumiyo wode, Yesuusi woppu giidi xiskkiis. Erissiyo ashkkarati dagammidi A denttidi nuna ashsha giidi oychchido wode, Goday eta loddan hagaadan oychchiis: “Ha ammanoi paccidoogeetoo, aissi yayyeetii?” Nena wolqqaama metoy gakkiiddi deꞌii? Meretay gattiyo daafabaa gaasuwan neeni waayettaydda deꞌennan aggakka. Woy caddi oyqqiya harggee neeni hidootaa qanxxanaadan oottido gishshawu ay oottanaakko erennan aggana danddayaasa. Neeni issi issitoo unꞌꞌettennan waaya aggana; shin hegee neeni Yihoowan ammanettiyoogaa digganaadan oottoppa. Wozanappe woossiyoogan akko shiiqa. Yihooway nena maaddido kase wodetubaa wotta dentta qoppiyoogan ne ammanuwaa mintta. (Maz. 77:11) I nena mule aggennaagaa ammanettana danddayaasa. w21.11 22 ¶7, 10

Issi uri babaa gidennabaa ekkana xayikko, he azazuwaa azazettiiddi deꞌiyaabadan qoppana danddayees. SHin I hara ogiyan wuuqqana danddayees. Leemisuwawu, ba danbbaynnata cimmanawu likke gidennaban kiliya woy makkiya zalꞌꞌanchchay etappe wuuqqees. Wogaabaa 19:13y hagaadan gees: “Ne shooruwaa sugoppa” woy cimmoppa. Hegaa gishshawu, issi uri zalꞌꞌiyo wode worddotikko he uri wuuqqees. Hosppuntta azazoy wuuqqiyoogee bala gidiyoogaa yootees. SHin Wogaabaa maxaafan loytti qonccidabay nuuni he higgiyan deꞌiya maaraa waati oosuwan peeshshana danddayiyaakko, hegeekka nuuni oottiyo ubbaban waani tumanchcha gidana danddayiyaakko akeekanaadan maaddiis. Worddotiyoogaanne wuuqqiyoogaa Yihooway waati xeelliyaakko wotti dentti qoppiyoogee nuna maaddana danddayees. Nuna hagaadan oychchana danddayoos: ‘Wogaabaa 19:11-13, taani yuushsha qoppiyo wode ta deꞌuwan, ubba qassi ta zalꞌꞌiyo ogiyan laammana koshshiyaabi deꞌiyoogaa akeekiyaanaa?’ w21.12 9-10 ¶6-8

Ubba galla neeni woossiyo wode, ne mooridobaa Yihoowayyo yootada I atto gaanaadan oychcha. Neeni gita nagaraa oottikko, cimatu maadoy neessi koshshees. Eti neeni yootiyoobaa ezggidi Xoossaa Qaalaappe siiquwan nena zorana. Eti nenaara woossana, qassi neeni Yihoowaara zaarettada dabbotana mala Yihooway neessi atto gaanaadan oychchana. (Yaaq. 5:14-16) Qassi hegee, neeni Wozuwaabaa wotta dentta qoppanaadan maaddana. Xoossaa Naꞌay keehi waayettidoogaa qoppiyo wode neenikka azzanennan waaya aggana. SHin neeni Yesuusa yarshshuwaabaa loyttada wotta dentta qoppikko, anne A Aawaa kaseppe aaruwan siiqana. Layttan layttan Yesuusa Hayquwaa Hassayiyo Baalaa bonchchanawu shiiqiyoogaaninne haratikka nunaara shiiqanaadan loytti shoobbiyoogan nuuni wozuwaa kaseegaappe aaruwan nashshana danddayoos. Yihooway nuuni A Naꞌaabaa harata tamaarissiyo gita aawatettaa nuussi immiis! w21.04 18-19 ¶13-16

Yesuusi deriyaa lanqqen deꞌiyo wode daro asay akko yin I oottidobaa qoppa. Yesuusi qamma ubban woossiiddi aqiis. I keehi daafurennan aggenna, shin daro asaa beꞌido wode eta giddon deꞌiya hiyyeesatussinne hargganchchatussi qarettiis. I eta pattiyoogaa xalla gidennan, awudeegaappenne aaruwan minttettiya haasayaa haasayiis; hegee Maatiyoosa shemppo 5-7n deꞌiya haasayaa. (Luq. 6:12-20) Yesuusi barkka takkana koshshido wodekka haratuyyo wodiyaa bazziis. Yesuusi ba laggee Xammaqiya Yohaannisi qooriyaa muucettidoogaa siyido wode awu aybi siyettidaakko qoppana danddayay? Geeshsha Maxaafay hagaadan gees: “Yesuusi hegaa [Yohaannisa hayquwaabaa] siyidi, wolwoluwan gelidi, he sohuwaappe barkka asi bainnasaa biis.” (Maa. 14:10-13) SHin Asi baynna he sohuwaa daro asay appe kasetidi gakkiis. (Mar. 6:31-33) Etawu Xoossaa maadoynne minttettoy koshshiyoogaa Yesuusi akeekido gishshawu eta sohuwaara maaddiis.—Luq. 9:10, 11. w22.02 21 ¶4, 6

Nuuni nu mala Kiristtaaniyaa naaqqidobi deꞌiyoogaa akeekikko, waatana koshshii? Nuuni Yihoowa mintti woossana bessees. Nuuni nu ishaara sigettanaadan I nuna maaddana mala oychchana danddayoos. Nuuni oottanabaakka takki giidi qoppana koshshees. Hagaa mala oyshata nuna oychchana danddayoos: ‘Taani balaas gaanawu, tana ziqqi oottada maarotaa oychchanawunne sigettanawu eeno giyaanaa? Taani ta ishaara woy ta michcheera sigettanawu koyiyoogaa yootikko, Yihoowawunne Yesuusawu aybi siyettii?’ Ha oyshatussi nu zaariyoobay nuuni Yesuusi yootiyoobaa siyanaadaaninne nuna ziqqi oottidi nu mala Kiristtaaniyaara sigettanaadan oottana danddayees. Nuuni nu ishaara sigettanawu biyo wode, nuna ziqqi oottana bessees. (Efi. 4:2, 3) Nuuni qohettida uraara haasayananne I zaarettidi nunaara dabbotanaadan maaddana koshshees. Ne ishaara sigettiyoogee ooni likkekko, qassi ooni balakko eriyoogaappe aadhdhiyaaba gidiyoogaa hassaya.—1 Qor. 6:7. w21.12 26 ¶13-16

Yesuusi Kawotettaa mishiraachchuwaa daro Ayhudati siyanawu koyennaagaa erido gishshawu azzaniis. Hegaappe denddidaagan, Yerusalaame katamay xayana, qassi bashshaappe attiya Ayhudati omooddettana. (Luq. 21:20-24) Yesuusi yootidoogaadan daro asay I yootiyoobaa siyibeennaagee azzanttiyaaba. Neeni deꞌiyo heeran Kawotettaa mishiraachchuwaa daro asay siyii? Neeni tumaa tamaarissanawu baaxetiyo wode, siyanawu koyiyaageeti amaridaageetu xalla gidikko Yesuusi I sabbakido asatussi yeekkidoogaappe neeni ay tamaarana danddayay? Yihooway asawu qoppees. Yesuusi afuxxidoogee Yihooway asawu keehi qoppiyoogaa nuna hassayissees. Yihooway “ooninne ba nagaraappe simmanaadan koyeesippe attin, ooninne xayana mala koyenna.” (2 PHe. 3:9) Nuuni Kawotettaa mishiraachchuwaa asay eranaadan maaddanawu ubbatoo baaxetiyoogan ha wodiyan eta siiqiyoogaa bessoos.—Maa. 22:39. w22.01 16 ¶10-12

Neeni Yihooway ba asawunne neeyyo oottidobaa loytta qoppiyo wode, ne ammanoy minnana. Gidoppe attin, ubbaappe aaruwan, neeni Yihoowa wozanappe siiqana. Neeni Yihoowawu azazettanaadan, A ufayssanawu nena goꞌꞌiyaabaa agga bayanaadaaninne ay paacee gakkinkka genccanaadan, siiqoy hara ay eeshshappekka aaruwan maaddana. (Maa. 22:37-39; 1 Qor. 13:4, 7; 1 Yoh. 5:3) Yihooway siiqiyo A mata dabbo gidiyoogaappe aadhdhiyaabi baa! (Maz. 63:1-7) Woossiyoogee, xannaꞌiyoogeenne wotti dentti qoppiyoogee nu goynuwaa shaaho gidiyoogaa hassaya. Yesuusaagaadan, Yihoowaara haasayanawu hara cenggurssi siyettenna sohuwaa koya. Ne qofaa wora zaariyaabaa digga. Yihooway neeni awu goynniyo wode ne qofay wora beennaadan maaddana mala woossa. Neeni neeyyo deꞌiya wodiyan haꞌꞌi keehi loꞌꞌobaa oottikko, Yihooway ooratta alamiyan merinaa deꞌuwaa neessi woytana.—Mar. 4:24. w22.01 31 ¶18-20

Ne qoppiyooban naageeta. Nuuni qoppiyoobaa oottoos. Gita nagaraa oottanaadan kaalettana danddayiya qofaappe naagettanaadan Yesuusi tamaarissidoy hegaassa. (Maa. 5:21, 22, 28, 29) Nuuni saluwan deꞌiya nu Aawaa ufayssanawu koyiyoogee qoncce. Hegaa gishshawu, nuuni iita qofaa qoppiyo wode hegaa sohuwaara eqettiyoogee keehi koshshiyaaba! Yesuusi hagaadan giis: “Doonappe kiyiyaabai wozanappe kiyees; asa tunissiyaabai hegaa malaa.” (Maa. 15:18) Ee, nu haasayay nu wozanaa qofaa loytti qonccissees. Yaatiyo gishshawu nena hagaadan oychcha: ‘Tumaa haasayiyoogee tana qohiyaaba gidikkokka, taani worddotennan aggiyaanaa? Taani aqo oyqqidaba gidikko, mattuman taappe dummatiya uraa lambbeechcheennan agganawu naagettiyaanaa? Taani pokkobaa haasayennaadan loytta naagettiyaanaa? Issi uri tana yiilloyiyo wode taani woppu gaada zaariyaanaa?’ He oyshata xeelliyaagan loytti qoppiyoogee maaddiyoogaa neeni akeekana. Hegaadankka, cashshaa, wordduwaanne pokkobaa haasayiyoogaa agganawu neessi danddayettida ubbabaa oottikko, ceega asatettaa metootennan xayssana danddayaasa. w22.03 5 ¶12-14

Hara uri banttana zoranaashin naagiyoogaa aggidi zoriyaa oychchiyaageeti oychchennaageetuppe aaruwan loꞌꞌobaa kuuyoosona. Yaatiyo gishshawu zoriyaa oychchiyaageeta gidoos. Nuuni nu mala Kiristtaaneta zoriyaa oychchana danddayiyoy awudee? Amarida hanotata qoppa. (1) Issi michchiyaa meeze deꞌiyo aassiyaara banaara xannaꞌissanaadan oychchawusu, qassi A waanada qara asttamaare gidana danddayiyaakko guyyeppe zoriyaa oychchawusu. (2) Aqo oyqqabeenna issi michchiyaa, maayuwaa shammanawu koyido gishshawu, maayuwaa dooriyoogaara gayttidaagan A kayma michchiyaa ba qofaa yootanaadan oychchawusu. (3) Issi ishay bawu imettida koyro dere haasayaa haasayanaadan maddabettiis. I haasayaa haasayiyo meeze deꞌiyo uri ba haasayaa loytti siyanaadaaninne, giigissana danddayiyoobaa bawu yootanaadan oychchees. Daro layttawu haasayaa haasayida ishaykka haasayaa haasayiyoogan gooba gidida uraa zoriyaa oychchidi baassi imettida zoriyaa oosuwan peeshshana danddayees.—Lee. 19:20. w22.02 13 ¶15-17

Yihooway Yesuusi saꞌan deꞌiyo wode ubban A siiqidoogaadan, nunakka siiqees. (Yoh. 5:20) I Yesuusawu ayyaanaaban, qofaaninne asatettan koshshiya ubbabaa kunttiis. Qassi Yihooway ba Naꞌaa siiqiyoogaanne A nashshiyoogaa yootiis. (Maa. 3:16, 17) Yesuusi saluwan deꞌiya siiqiya ba Aaway muletoo banaara deꞌiyoogaanne bana maaddiyoogaa eriyo gishshawu, I barkka attidabadan mule qoppi erenna. Yesuusaagaadan nuuni ubbay Yihoowa siiquwaa daro ogiyan beꞌida. Ane hagaa qoppa: Yihooway nuuni A dabbo gidanaadan oottiis; qassi nuuni ufayttanaadan oottiyaanne unꞌꞌettiyo wode nuna minttettiya siiqiya daro ishanttanne michchontta I nuussi immiis. (Yoh. 6:44) Qassi Yihooway nuuni ammanuwan minnidi deꞌanaadan koshshiya ubbabaa nuussi immees. Ubba qassi nuussi deꞌuwawu koshshiyaabaa demmanaadan I nuna maaddees. (Maa. 6:31, 32) Yihooway nuna siiqiyo siiquwaa wotti dentti qoppiyo wode, nuuni A kaseppe aaruwan siiqoos. w21.09 22 ¶8-9

Neeni Yihoowa Markkatuura Geeshsha Maxaafaa xannaꞌiyoogaa doommanaappe kase ne deꞌoy ay malee? Nuuppe daroti hegaabaa qoppanawu koyokko. Nu qofaynne nu eeshshay ha alamee likkebaanne likke gidennabaa xeelliyaagan yootiyoobaa milatana danddayees. Yaatikko, nuuni ‘demmana giidi ufayssan naagi uttidobi baynnaninne Xoossi baynnan deꞌida.’ (Efi. 2:12) SHin neeni Geeshsha Maxaafaa xannaꞌiyoogaa doomma simmada, nena keehi siiqiya Aaway saluwan deꞌiyoogaa akeekadasa. Neeni Yihoowa ufayssanawunne awu goynniya A soo asaa yara gidanawu koyikko, ne deꞌuwaaninne ne qoppiyooban keehi laamettana koshshiyoogaa eradasa. Yihooway likke giidobaa oottananne I bala giidobaappe naagettana koshshiyoogaa tamaaradasa. (Efi. 5:3-5) Nuna medhdhida saluwan deꞌiya nu Aaway Yihooway, ba soo asaa yarati ay oottana koshshiyaakko kuuyiyo maatay awu deꞌees. Qassi nuuni xammaqettanaappe kase, ‘ceega meretaa A oosuwaara nuuppe xayssanawu’ baaxetanaadan I koyees. w22.03 2 ¶1-3

Hara dorssati Godaa Kawuwan oyttaappe maana woy woyniyaappe uyana xayikkonne, shiiqiyoogaaninne bantta hidootaa wotti dentti qoppiyoogan ufayttoosona. Eti Godaa Kahuwaa haasayaa yeemuwan naagoosona, ha haasayaappe dariya baggay Kiristtoosinne aara issippe haariya 144,000 ammanettida asawu SHaꞌu Layttaa Haaruwaa wode oottanabaa qonccissees. Eta Kawoy Yesuus Kiristtoosi haariyo wode, saluwan uttidi haariyaageeti saꞌaa gannate oottiyo oosuwan, qassi asay wottiyoobi baynnaagaa gidanaadan maaddana. Godaa Kahuwaa bonchchanawu shiiqiya miilooniyan qoodettiyaageeti Isiyaasa 35:5, 6; 65:21-23ninne Ajjuutaa 21:3, 4n deꞌiyaagaa mala Geeshsha Maxaafaa hiraagati polettiyo wodiyaa qoppiyoogan keehi ufayttoosona. Etinne eti siiqiyoogeeti ooratta alamiyan deꞌiyaabadan qoppiyoogan, bantta sinttana hidootaanne Yihoowayyo aggennan haggaazanawu murttido murttiyaa yaa minttoosona.—Maa. 24:13; Gal. 6:9. w22.01 21 ¶5-7

Wozoy aybee? Wozoy Addaameppe halidabaa zaaranawu Yesuusi qanxxido waagaa. (1 Qor. 15:22) Nuuyyo wozoy koshshiyoy aybissee? Yihooway suure pirddawu kessido Higgee deꞌuwaa gishshaa deꞌuwaa immanaadan yootiyo gishshaassa. (Kes. 21:23, 24) Wottiyoobi baynna deꞌoy Addaameppe haliis. Xoossaa suure pirddaa polanawu Yesuusi wottiyoobi baynna ba deꞌuwaa immiis. (Roo. 5:17) Hegaa gishshawu, wozuwan ammaniya ubbawu I “Merinaa Aawaa” gidees. (Isi. 9:6; Roo. 3:23, 24) Yesuusi saluwan deꞌiya ba Aawaanne nuna keehi siiqiyo gishshawu, ba deꞌuwaa yarshshanawu eeno giis. (Yoh. 14:31; 15:13) Yesuusi Yihoowanne nuna keehi siiqido gishshawu, ba deꞌo laytta ubban ammanettidi deꞌanawunne ba Aawaa sheniyaa oottanawu murttiis. Yesuusi hayqqana gakkanaashin ammanettidi deꞌiyoogan hegaadan oottiis. Hegaappe denddidaagan, Yihooway asawunne saꞌawu koyro halchchido halchchoy polettana. w21.04 14 ¶2-3