Tisaase

Yesuusi bana kaalliyaageetuura baassi deꞌiya gaytotetta issi henttanchcha giddooninne A dorssaa giddon deꞌiya gaytotettaara geeddarssiis. (Yoh. 10:14) Hegaadan geeddarssiyoogee bessiyaaba. Dorssati bantta henttanchchaa eroosonanne I yootiyoobaa oottoosona. Issi bitaanne hegaa akeekiis. I hagaadan giis: “Nuuni amarida dorssata pootuwaa denttanawu koyido gishshawu eti nuukko shiiqanaadan oottanawu malida. SHin eti nu qaalaa erenna gishshawu nuukko shiiqibookkona. He wode issi henttanchcha naꞌay yiidi eta xeegin eti A kaallidosona.” He bitanee akeekidobay Yesuusi ba dorssata, hegeekka ba erissiyo ashkkarata xeelliyaagan yootidobaa nuna hassayissees. I hagaadan giis: “Eti ta qaalaa siyana.” SHin Yesuusi saluwan deꞌees. Yaatin I yootiyoobaa nuuni waatidi siyana danddayiyoo? Nuuni I nuna tamaarissidobaa oosuwan peeshshiyo wode, I yootiyoobaa siyoos.—Maa. 7:24, 25. w21.12 16 ¶1-2

Kiitettida PHawuloosi Kiristtaaneta kase keehi yedettiya asa. SHin, I balabaa oottidoogaa guyyeppe akeekido gishshawu, ba qofaanne ba eeshshaa laammanawu koyiis. (1 Xim. 1:12-16) Yihooway maaddin PHawuloosi siiqiya, qarettiyaanne bana ziqqi oottiya cima gidiis. I ubbatoo ba balaa qoppiyoogaa aggidi, Yihooway ayyo atto gaanaagaa ammaniis. (Roo. 7:21-25) I aybanne moorikke giidi qoppibeenna. I Kiristtaanetuppe koyettiya eeshshay deꞌiyoogaa gidanawu mintti baaxetiisinne Yihoowa oosuwaa polanawu A maadoy koshshiyoogaa bana ziqqi oottidi ammanettiis. (1 Qor. 9:27; 2 Qor. 4:7 ) Cimati sunttettidoy eti wottiyoobi baynnaageeta gidiyo gishshataassa gidenna. Gidoppe attin, Yihooway eti bantta balaa ammanaadaaninne Kiristtaanetuppe koyettiya eeshshati deꞌiyoogeeta gidanaadan koyees. (Efi. 4:23, 24) Issi cimay Geeshsha Maxaafaa goꞌettidi bana qoriyoogan giigissana koshshiyaabaa giigissana bessees. Yaatikko, I ufayttanaadaaninne loꞌꞌo cima gidanaadan Yihooway A maaddana.—Yaaq. 1:25. w22.03 29-30 ¶13-15

Nuuni nu mala Kiristtaaniyaa bolli pirddiyoogaa akeekikko, waatana koshshii? Nuuni nu ishantta siiqana bessiyoogaa hassayana koshshees. (Yaaq. 2:8) Qassi nuuni pirddiyoogaa agganaadan Yihooway nuna maaddana mala A minttidi woossana bessees. Nuuni A bolli pirddiyo uraara issippe wodiyaa aattiyoogan nu woosaara maayettiyaabaa oottana danddayoos. I nunaara haggaazanaadan woy issippe qumaa maanadan shoobbana danddayoos. Nuuni nu ishaa loytti eriyo wode, A loꞌꞌo eeshshaa akeekiyoogan Yihoowanne Yesuusa leemisuwaa kaallanawu baaxetana danddayoos. Yaatiyoogan, pirddoppite giidi zorida loꞌꞌo henttanchchay yootiyoobaa siyoos. Dorssay henttanchchaa qaalaa siyiyoogaadan, Yesuusa kaalliyaageeti A qaalaa siyoosona. Nuuni ‘amarida dorssa wudiyaa’ yara woy ‘hara dorssa’ yara gidin, loꞌꞌo henttanchchay yootiyoobaa ubbatoo siyananne azazettana danddayoos.—Luq. 12:32; Yoh. 10:11, 14, 16. w21.12 19 ¶11; 21 ¶17-18

Robiꞌaami Israaꞌeela kawo gidido wode, A asay A oychchanawu yiis. Eti A aaway Solomoni eta bolli caanido deexobaa I kawushshanaadan oychchidosona. Robiꞌaami loꞌꞌobaa oottiis. I asaayyo woygidi zarana koshshiyaakko Israaꞌeela cimata zoretaa bessiis. He cimati neeni asay oychchidobaa oottikko, eti neeyyo ubbatoo haarettana giidi kawuwaa zoridosona. (1 Kaw. 12:3-7) Robiꞌaami he zoriyan ufayttidaba milatenna, hegaa gishshawu banaara diccida yelagata zoretaa bessiis. I asaayyo toohuwaa yaa deexettanaadan eti zoridosona. (1 Kaw. 12:9-11) Robiꞌaami awugaa zoriyaa kaallana koshshiyaakko Yihoowa oychchana danddayees. SHin I yelagati yootidobaa oottiis. Hegaa gaasuwan Robiꞌaaminne Israaꞌeela asay keehi qohettiis. Issi issitoo nuussi imettiya zoree nuuni siyanawu koyiyoogaa mala gidennan aggana danddayees. SHin he zoree Xoossaa Qaalaappe imettikko, nuuni siyana koshshees. w22.02 9 ¶6

Bana ziqqi oottiyaanne ashkke uri yelagatussi oosuwaa meezee baynnaagaa gidennan, etawu deꞌiya wolqqaa qoppees. I eta banaara keesettiya asadan gidennan, issippe oottiya asadan xeellees. Cimidaageeti yelagata Yihoowa imotadan qoppoosonanne eti oottiyoobaa gishshawu eta galatoosona. Cimidaageetussi wolqqay wuriyo wode, yelagatettaa wolqqay deꞌiyoogeeti oosuwaa oottanawunne gubaaꞌiyaa maaddanawu eeno giyo gishshawu eti galatoosona. Geeshsha Maxaafan ibay odettido Naaꞌooma yelaga uraappe maaduwaa ufayttada ekkiyoogan cima urawu loꞌꞌo leemiso gidawusu. Naaꞌooma ba naꞌay hayqqi simmin, ba naꞌaa machchiyaa Uruta bantta soo asaakko simmanaadan yootaasu. Gidoppe attin, Uruta Naaꞌoomippe shaahettennan ixxada iira Beetaliheeme baasu. Naaꞌooma Uruta banaara biido gishshawunne bana maaddido gishshawu keehi ufayttaasu. (Uru. 1:7, 8, 18) Hegee etawu naaꞌꞌawukka keehi loꞌꞌo! (Uru. 4:13-16) Banttana ziqqi oottiya cimidaageeti Naaꞌoomi leemisuwaa kaalloosona. w21.09 10-11 ¶9-11

Saluwan deꞌiya nu Aaway nuuni ubbay oottana danddayiyoobaa akeekees. Geella, neeni eriyoonne siiqiyo darotuppe aarobaa oottana danddayaasa. Woy neeni cimatettaa, sahuwaa woy so asaa aawatettaa gaasuwan haratuugaa keenaa oottennan aggana danddayaasa. Hidootaa qanxxoppa. (Gal. 6:4) Yihooway neeni oottiyo oosuwaa mule dogenna. Neeni neessi danddayettida keenan wozanappe immikko, I ufayttana. Neeni oottanawu koyiyoobaakka Yihooway erees. Awu oottana danddayiyooban neeni ufayttanaadan I koyees. Yihooway bawu goynniyaageeta metoy gakkiyo wode maaddiyoogaa nuuni eriyo gishshawu woppu giidi deꞌoos. (Isi. 41:9, 10) Ba medhdhido mereta ubbaappe ‘bonchchuwaanne sabaa ekkanawu bessiya’ nu siiqo Aawawu goynniyo wode nuuni ufayttiyoogee qoncce!—Ajj. 4:11. w22.03 24 ¶16; 25 ¶18

Nuuni Yesuusa leemisuwaa kaallanawu koyoos, shin wottiyoobi baynna ogiyan kaallennan aggikko, hidootaa qanxxana koshshenna. (Yaaq. 3:2) Misiliyaa medhdhiyoogaa malabaa tamaariya uri bana tamaarissiyaagaa wottiyoobi baynna ogiyan milatana danddayeenna. SHin tamaaree ba mooruwaappe tamaariyo wodenne ba asttamaariyaa milatanawu bawu danddayettida keena loytti baaxetiyo wode, eraa gujji gujji bees. Hegaadankka, nuuni Geeshsha Maxaafaa xannaꞌiyo wode akeekidobaa oosuwan peeshshikko, nuuyyo deꞌiya shugo miyyiya giigissanawu nuussi danddayettida ubbabaa oottikko, Yesuusa leemisuwaa loytti kaallana danddayoos. (Maz. 119:59) Ha wodiyan alamiyan daro asay bana keehi siiqees. SHin Yihoowa asay hegeetu mala mule gidenna. Yesuusi ba goꞌꞌaa aggi bayidoogee nuna maaddido gishshawu, nuuni A leemisuwaa kaallanawu murttida. (1 PHe. 2:21) Nuuni Yesuusa leemisuwaa kaallanawu nuussi danddayettida ubbabaa oottiyo wode, Yihooway ufayttiyo gishshawu nuunikka ufayttana. w22.02 24 ¶16; 25 ¶18

Yihooway ba Qaalaa Geeshsha Maxaafaa baggaara ha wodiyankka ba asaa kaalettees. Yihooway nuna tamaarissiyoobaa wotti dentti qoppanawu nuuni wodiyaa bazzikko, A kaaletuwaa kaallananne sabbakiyo oosuwaa polana danddayoos. (1 Xim. 4:15, 16) Yihooway ‘ammanettida wozannaama ashkkaraa’ baggaarakka kaaletuwaa immees. (Maa. 24:45) He ashkkaray nuuni loytti akeekenna kaaletuwaa issi issitoo immana danddayees. Leemisuwawu, nuuni nu heeran gakkenna giidi qoppiyo meretay gattiyo daafabaappe attanawu giigettanaadan maaddiya kaaletoti nuussi imettana danddayoosona. Imettida kaaletoy nuuyyo hanenna giidi qoppikko, nuuni waatana koshshii? Nuuni nabbabido Geeshsha Maxaafan deꞌiya taariketa wotti dentti qoppa. Xoossaa asawu loꞌꞌo qofaa milatana xayikkonne, eta shemppuwaa ashshida kaaletoy issi issitoo imettiis.—Daan. 7:7; 8:10. w22.03 18-19 ¶15-16

Yesuusi ba kumetta wozanaappe ammanettidi, hachchi gallassaa xiqisiyan deꞌiya qofaa yootiis. Yesuusi I sinttappe deꞌanay woy agganay Yihooway maaddiina gidiyoogaa erees, qassi ba Aaway bana hassayanaagaa I ammanettees. Yesuusi yootidobaappe nuuni ay tamaariyoo? Ne shemppuwawu hirggissiyaabi gakkikkokka, Yihoowawu ammanettada deꞌa. Yaatanawu, neeni ‘ne polo wozanan Yihoowan ammanettana’ bessees. (Lee. 3:5) Woriya harggee oyqqido Yihoowa Markkaa, Joshuwa giyo 15 laytta naꞌaa hanotaa beꞌa. I Xoossaa Higgiyaara maayenna akkamuwaa akkamettennan ixxiis. I hayqqanaappe guuttaa kasetidi ba aayeessi hagaadan giis: “Taayiloo, taani Yihoowa kushiyaana . . . Taayee, taani aynne sirennan hagaa yootays: Yihooway tana hayquwaappe denttanaagaa geeshshada erays. I ta wozanaa qofaa erees, qassi A taani wozanappe siiqays.” Nuuni ubbay hagaadan giidi nuna oychchana koshshees: ‘Taani hayqqanaadan oottana danddayiyaaban ta ammanoy paacettikko, Yihoowayyo ammanettada deꞌananne I tana hassayanaagaa ammanettana danddayiyaanaa?’ w21.04 12-13 ¶15-16

Yihoowa asay haggaazuwan minettees. Nuuni haratussi sabbakiyo wode asay siyinkka siyana xayinkka ufayttoos. Issoti issoti bantta hanotaa gaasuwan, loytti haggaazana danddayennabadan qoppennan waayi aggana. Neeyyo hegaadan siyettikko, danddayettida keenan neeni oottiyooban Yihooway ufayttiyoogaa hassaya. Nuuppe amaridaageeti sabbakanawu koyikkonne, sooppe kiyanawu danddayennaagaa Yihooway erees. Yaatiyo gishshawu, nuna maaddanawu yiyaageetussi woy dottoretussinne narssetussi sabbakanaadan I nuna maaddana danddayees. Nuuni haꞌꞌi oottiyoobaa kase oottidobaara geeddarissikko, hidootaa qanxxana danddayoos. SHin, Yihooway nuna maaddiyoogaa nuuni akeekikko, nuna gakkiya meto ubbaa ufayssan genccanawu nuussi minotettaa koshshees. Nuuni zeriyo tumaa zerettaappe mokkananne diccana danddayiyaagee awugaakko erokko.—Era. 11:6. w21.05 24-25 ¶14-17

Yaaretiyoogee Kawuwaa Daawiti aquwaa, hayttatiyoogaanne ba morkketa darota xoonidoogaa gujjin, Yihooway awu immidobaa doganaadan oottiis. Daawiti Xoossay immido imotay ‘yootin wurennaba’ giidi nashshiis. (Maz. 40:5) Gidoppe attin, Daawiti Yihooway awu immidobaa issi wode dogiis. Daawitawu daro machchoti deꞌikkonne, I hara asa machchiyo amottiyoogaa doommiis. He maccaasee sunttay Berssaabo, qassi I keettaaway Hiitiyaa Ooriyoona. Daawiti yaaretidi Berssaabiira mattumaa gayttin A shahaaraasu. Daawiti oottidobay keehi iitaba, shin hegaappekka aadhdhiya hara keehi iitabaa oottiis. I Ooriyoona worissiis! (2 Sam. 11:2-15) Daawiti ay qoppidee? I Yihooway hegaa beꞌana danddayennabadan qoppidee? Daawiti Yihoowawu daro layttaa haggaazikkonne, I yaaretidoogee A bolli daro waaye gakkanaadan oottiis. SHin guyyeppe Daawiti ba nagaraa ammanidi he nagaraappe simmidoogee ufayssiyaaba. Yihooway ayyo atto giido gishshawu I ay keena ufayttideeshsha!—2 Sam. 12:7-13. w21.06 17 ¶10

Nuuni Geeshsha Maxaafaa xannaꞌissana danddayennabadan qoppennan waayi aggana. Nuuni issi uraa xannaꞌissanaappe kase nuussi daro eray deꞌana woy gooba asttamaareta gidana koshshees giidi qoppennan waayi aggana. Neeyyo hegaadan siyettikko, neeni issi uraa xannaꞌissana danddayiyoogaa ammanettanaadan maaddiya heezzubata qoppa. Koyroogee, Yihooway neeni harata tamaarissana danddayiyaabadan qoppees. Naaꞌꞌanttoogee, ‘saluwaaninne saꞌan maata ubbay’ deꞌiyo Yesuusi neeni tamaarissanaadan azaziis. (Maa. 28:18) Heezzanttoogee, harati nena maaddanaagaa ammanettana danddayaasa. Yesuusi I yootanaadan ba Aaway tamaarissidoban ammanettiis, qassi neenikka ammanettana danddayaasa. (Yoh. 8:28; 12:49) Hegaa bollikka, Geeshsha Maxaafaa xannaꞌissiyoogaa doomissanawu nena maaddana mala haggaazo citaa kaalettiyaagaa woy gooba aqinyiyaa woykko aassiyaagaa oychchana danddayaasa. Neeni gooba asttamaare gidanawu tamaarana danddayiyo issi ogee he aassiyaageetuppe issi uri Geeshsha Maxaafaa xannaꞌissiyo wode aara xannaꞌissiyoogaa. w21.07 6 ¶12

Ha iita alamiyaa wurssettay keehi matido gishshawu, Yihooway issibaa oottiyo ogiyaa nuuni kaseegaappe aaruwan ammanettana koshshees. Aybissi? Gita waayiyaa wode, akeekanawu woy azazettanawu metiyaaba milatiya kaaletoy nuussi imettana danddayees. Yihooway nuussi huuphiyan huuphiyan yootenna. I saꞌan sunttidoogeetu baggaara kaaletuwaa immana. Hagee imettiya kaaletuwaa siriyo wode, woy ‘Ha kaaletoy tumuppe Yihoowappe yiidabee, woykko aawatettay deꞌiyo ishantti kuuyidobee?’ giidi qoppiyo wode gidenna. Keehi koshshiya he wodiyan neeni Yihoowaaninne A dirijjitiyan ammanettanee? Xoossay saꞌan sunttidoogeeti immiyo kaaletuwaa neeni ha wodiyan xeelliyo ogee he oyshaa zaaruwaa eranaadan maaddana. Nuussi ha wodiyan imettiya kaaletuwaa neeni ammanettada azazettikko, gita waayiyaa wode neeni hegaadan oottana danddayaasa. w22.02 6 ¶15

Geedooninne aara deꞌiya 300 asati olan xoonanaadan Yihooway maaddido gishshawu, eti otorettana danddayoosona shin. Efireema asay Geedoonaara gayttidoy A galatanaassa gidennan, aara ooyettanaassa. (Daan. 8:1) Geedooni eti gitabaa oottanaadan Yihooway eta keehi maaddidoogaa hassayissiis. Asati hegaa siyido wode, “zarbbidosona.” (Daan. 8:3) Xoossaa asaa giddon sarotettay deꞌana mala giidi Geedooni bana ziqqi oottanawu eeno giis. Nuna bonchchissiyaabaa qoppiyoogaa aggidi Yihooway bonchchettanaadan oottiyaaba qoppana koshshiyoogaa Efireema asaa hanotaappe tamaaroos. Nuuni so asawu huuphenne gubaaꞌe cima gidikko, Geedoonappekka tamaarana danddayoos. Nuuni oottidoban issi uri hanqqettikko, I aybissi hanqqettidaakko akeekanawu nu malana koshshees. Qassi I oottido loꞌꞌobawu A galatana danddayoos. Hegaadan oottanawu nuuni nuna ziqqi oottiyaageeta gidana koshshees. SHin nuuni oottidobay likke gidiyoogaa qonccissiyoogaappe aaruwan nu ishanttuura sarotettan deꞌiyoogee keehi koshshiyaaba. w21.07 16-17 ¶10-12

Yihooway nuna ba leemisuwan medhdhiyoogan bonchchiis. Nuuni Xoossaa leemisuwan merettido gishshawu, maalaalissiya A eeshshata bessanawu tamaarana danddayoos. Leemisuwawu, nuuni siiqiyaageeta, qarettiyaageeta, ammanettiyaageetanne xillota gidana danddayoos. (Maz. 86:15; 145:17) Nuuni he eeshshati deꞌiyoogeeta gidiyo wode Yihoowa bonchchoosinne galatoos. (1 PHe. 1:14-16) Nuuni saluwan deꞌiya nu Aawaa ufayssiyaabaa oottiyo wode, keehi ufayttoos. Qassi nuussi Yihoowaagaa mala eeshshati deꞌiyo gishshawu, I ba son deꞌanaadan koyiyo asa mala gidana danddayoos. Yihooway nuuni deꞌanawu loꞌꞌo sohuwaa giigissiis. Yihooway asaa medhdhanaappe daro wodiyaa kasetidi asay deꞌana mala saꞌaa giigissiis. (Iyy. 38:4-6; Erm. 10:12) Yihooway nuussi qoppiyo gishshawunne keha gidiyo gishshawu, nu ufayttanaadan oottiya darobata medhdhiis. (Maz. 104:14, 15, 24) Qassi I ba medhdhidobata wotti dentti qoppidi “hegee lo77o gididoogaa” akeekiis.—Doo. 1:10, 12, 31. w21.08 3 ¶5-6

Sabbakiyoonne erissiyo ashkkara oottiyo aawatettay nuuyyo ubbawu deꞌees. (Maa. 28:19, 20; Roo. 10:14) Ha keehi koshshiya oosuwaa oottiyoogan kaseppe gooba gidanawu koyay? Tamaarissanawu giyo brooshuriyaa xannaꞌa, yaatada neeni eridobaa oosuwan peeshshanaadan maaddiya halchchota halchcha. Xoossaa ufayssiya eeshshati neeyyo deꞌanaadan halchchiyoogee ne halchchana danddayiyo keehi koshshiyaabaappe issuwaa gidiyoogaa dogana bessenna. (Qol. 3:12; 2 PHe. 1:5-8) Nuuni ha wodiyan oottana danddayiyoogaappe aaruwan Yihoowayyo oottanawu koyiyoogee qoncce. Xoossay ehiyo ooratta alamiyan nuuni ayyo loytti haggaazana. He wodee gakkanaashin, nuuyyo danddayettida ubbabaa ha wodiyan oottikko, nuuni keehi ufayttana danddayoos, qassi hidootaa qanxxokko. Ubbaappe aaruwan, ‘ufayttiya nu Xoossaa’ Yihooway bonchchettanaadaaninne sabettanaadan oottana. (1 Xim. 1:11, NW) Yaatiyo gishshawu, nuuyyo deꞌiya maatan ufayttiyaageeta gidoos! w21.08 25 ¶18-20

Nena dichchidaageeti Yihoowa Markkata gidikko, Yihoowabaa neeni naatettaappe doommada tamaarennan waayi aggana. I Medhdhidaagaa gidiyoogaa, ufayssiya eeshshati awu deꞌiyoogaanne I saꞌaa gannate oottanawu koyiyoogaa tamaaradasa.​ (Doo. 1:1; Oos. 17:24-27) SHin daro asay Xoossay deꞌiyoogaa woy I ubbabaa medhdhidoogaa ammanenna. Deꞌoy bawu doommidi muttumurettidabawu loddan loddan laamettiis giidi eti ammanoosona. Hegaadan ammaniyaageetuppe amaridaageeti keehi tamaaridaageeta. Eti Geeshsha Maxaafay likke gidennaagaa saynisee qonccissees goosonanne Medhdhidaagaa ammaniya asay tamaaribeennaagaa, eeyya woy sohuwaara cimettiyaagaa giidi yootoosona. Nuuni Yihoowa Markka gidoosappe ay keena wode gidikkonne, nuuni ubbay nu ammanuwaa minttana koshshees. Yaatikko, Geeshsha Maxaafay yootiyoobay worddo giidi asay odiyo wode nuuni cimettokko.—Qol. 2:8. w21.08 14 ¶1-3

Aabeela, Noha, Abrahaamanne Iyyooba mala ammanettida asati Yihoowa bonchchiyoogaanne siiqiyoogaa bessidosona. Eti Xoossawu azazettidosona, A ammanidosonanne awu yarshshidosona. Eti Yihoowa bonchchanawunne A ufayssiya ogiyan goynnanawu banttawu danddayettida ubbabaa oottidoogee qoncce. Guyyeppe, Yihooway Abrahaama zaretuyyo Muuse Higgiyaa immiis. I koyiyo ogiyan awu goynnanaadan yootiya maaratubaa higgee yootees. Yesuusi hayquwaappe denddi simmin, asay Muuse Higgiyawu azazettanaadan Yihooway koyibeenna. (Roo. 10:4) Kiristtaaneti ooratta higgiyawu, hegeekka “Kiristtoosa higgiyau” azazettoosona. (Gal. 6:2) Eti ha ‘higgiyaa,’ daro higgeta kaalliyoogan gidennan, Yesuusa milatiyoogaaninne I tamaarissidobaa kaalliyoogan azazettana danddayoosona. Ha wodiyankka, Kiristtaaneti Yihoowa ufayssanawunne banttassi ‘shemppo demmanawu’ Kiristtoosa kaallanawu banttawu danddayettida ubbabaa oottoosona.—Maa. 11:29. w22.03 20-21 ¶4-5

Yihooway ba naati yootiyoobaa siyees. I ba Naꞌay saꞌan deꞌiyo wode woossido daro woosaa tumuppe siyiis. Yesuusi ba kiittido 12ta dooriyoogaa mala gitabaa kuuyanawu woossido woosaa Yihooway siyiis. (Luq. 6:12, 13) Yesuusi unꞌꞌettidi woossido woosaakka Yihooway siyiis. Yihuday A aattidi immanaappe kase, Yesuusi matan ba bolli gakkanabaa xeelliyaagan ba Aawaa woossiis. Yihooway Yesuusa woosaa siyiyoogaa xalla gidennan, ba siiqiyo Naꞌaa minttettanawu kiitanchchaakka kiittiis. (Luq. 22:41-44) Ha wodiyan, Yihooway nu woosaakka siyees, qassi hegaa koshshiya wodiyaaninne keehi loꞌꞌo ogiyan zaarees. (Maz. 116:1, 2) Hindde biittan deꞌiya issi michchiyaa Yihooway I woosaa waati zaaridaakko akeekaasu. A keehi unꞌꞌettiyo gishshawu he allaalliyaa xeelliyaagan Yihoowa wozanappe woossaasu. A hagaadan gaasu: “Nuuni unꞌꞌettiyo wode oottana bessiyaabaa xeelliyaagan Uddufune 2019 JW Brodkastingiyaa prograamiyan tawu koshshiyaabay kiyiis. Hegee ta woosaa zaaro.” w21.09 21-22 ¶6-7

Koyro xeetu layttan deꞌida Kiristtaaneti banttawu deꞌiya ubbabaa aggi bayiyoogeenne deꞌuwaa wotti yeggi doommiyoogee etawu ay keena deexxiyaabaakko qoppana danddayay? Banttawu koshshiyaabaa Yihooway kunttanaagaa eti ammanettana koshshiis. SHin eta maaddana danddayiya issibay deꞌees. Roomati Yerusalaame katamaa dooddanaappe ichchashu laytta kasetidi kiitettida PHawuloosi Ibraawe Kiristtaaneta maaddiya zoriya zoriis: “Miishsha siiqoppe inttena naagite; intteyyo de7iyaagee intteyyo gido. Aissi giikko, Xoossai ba huuphen, ‘Taani nena mulekka yeggikke woikko aggikke’ yaagiis. Hegaa gishshau, nuuni xalidi, ‘Godai tana maaddiyaagaa; taani yayyikke. Asi tana ai oottii?’ yaagoos.” (Ibr. 13:5, 6) Roomati woraajjanaappe kase PHawuloosa zoriyaa oosuwan peeshshidaageetuyyo ooratta heeran sima deꞌuwaa meezetanaagee metennaba gidiyoogee qoncce. Etawu koshshiyaabaa Yihooway kunttanaagaa eti ammanettidosona. w22.01 4 ¶7, 9

Nuuni maariya asabaa qoppiyo wode, keha, siiqiya, qarettiyaanne kehatettan immiya asa qoppana danddayoos. Yesuusi Samaare biittaa bitaniyaabaa yootido taarikiyaa hassayana danddayoos. Panggati qohido Ayhuda bitaniyawu ‘kehidi’ woy qarettidi maaddida hara biittaa bitaniyaa hassayoos. Samaare biittaa bitanee qohettida Ayhuda bitaniyawu ‘qarettido’ gishshawu assi koshshiyaabaa siiquwan kunttiis. (Luq. 10:29-37) Ha leemisoy ufayssiya nu Xoossaa eeshshaa, hegeekka maarotaa loytti qonccissees. Xoossay maariyaagaa gidiyo gishshawu I nuna siiqees. qassi I ubba gallassi daro ogiyan nuna maarees. Issi uri maarotettaa bessana danddayiyo hara ogeekka deꞌees. Maariya uri qaxxayettana koshshiya uraa qaxxayennan agganawu kuuyana danddayees. Hegaadan, Yihooway nuna ubbaa maaridoogee qoncce. Mazamuraawee ‘I nuna nu nagaraadan oottennaagaa’ yootiis. (Maz. 103:10) SHin hara wodetun, Yihooway nagaraa oottida uraa minttidi seerana danddayees. w21.10 8 ¶1-2

Yihooway aggenna siiquwaa banaara dabbotaa minttida ba ashkkaratu xallawu bessees. Kawuwaa Daawitinne hananabaa yootiya Daaneeli giidobaappe hegaa akeekana danddayoos. Leemisuwawu, Daawiti hagaadan giis: ‘Nena eriyaageetuyyo ne aggenna siiquwaa bessiyoogaa aggoppa.’ “GODAAYYO yayyiyaageetuyyo aggenna a siiqoi merinaappe merinaa gakkanaassa.” Daaneeli hagaadan giis: ‘Abeet Yihoowawu, nena siiqiyaageetuyyoonne ne azazuwaayyo eeniyaageetuyyo ne aggenna siiquwaa bessiyaagoo.’ (Maz. 36:10, NW; 103:17; Dane. 9:4) Ayyaanaa kaaletuwan xaafettida ha qofaa maaraadan, Yihooway A ashkkarati A eriyo gishshawu, awu yayyiyo gishshawu, A siiqiyo gishshawunne A azazota naagiyo gishshawu etawu aggenna siiquwaa bessees. Yihooway bawu suure ogiyan goynniyaageetu xallawu ba aggenna siiquwaa bessees. Nuuni Yihoowawu haggaaziyoogaa doommanaappe kase, Xoossay ubba asawu bessiyo siiquwaa nuuni beꞌida. (Maz. 104:14) Qassi awu goynniyaageeta gidiyo gishshawu, aggenna A siiquwankka goꞌettoos. w21.11 4 ¶8-9

Nuuni Yesuusi qommoora giidobaa azazettanawu murttida. Ha wodiyan daroti asay keehi dosiyo sabaketi yootiyoobaa siyanawu koyosona. He sabaketa goynniyoogaa keenaa asay keehi nashshees. Daro asay eta woosa keettaa bees, eta maxaafata shammees, qassi eta woy eta dirijjitiyaa maaddanawu daro miishshaa immees. Amarida asay he sabaketi yootiyo ubbabaa ammanees. Woosa keettaa biyaageeti Yesuusi etawu qoncciyaakko hegaadan keehi ufayttana giidi qoppiyoogee metiyaaba! SHin, likke ogiyan Xoossaa goynniyaageeti asa kaallokkona. Nuuni aawatettay deꞌiyoogeeta bonchchikkokka, Yesuusi, “intte ubbai ishantta” giidi qoncciyan tamaarissidobaa azazettoos. (Maa. 23:8-10) Haymaanootiyaa kaalettiyaageeta gidin woy polotikan alamiyaa haariyaageeta gidin nuuni ay asanne goynnokko. Qassi eta halchchuwaa kaafokko. Nuuni polotikan oossinne exatennan deꞌoosinne ha alamiyaa bagga gidokko. Banttana Kiristtaane giya hara haymaanootetuppe nuuni ha ubbaban keehi dummatoos.—Yoh. 18:36. w21.10 20 ¶6-7

Geeshsha gidanawu koyiya ubba Kiristtaaneti eti Xoossaara dabbotido dabbotaappe aybinne woy ooninne aadhdhennaagaa akeekana bessees. Nuuni Yihoowa Markkata gidiyo gishshawu, A geeshsha sunttaa moorana danddayiya aybanne oottennan agganawu murttana koshshees. (Wog. 19:12; Isi. 57:15) Israaꞌeelati Yihoowa bantta Xoossadan ekkidoogaa A higgeta azazettiyoogan bessidosona. Wogaabaa 18:4y hagaadan gees: “Intte ta azazuwaa oottite; ta wogaakka naagite; qassi an biite. Taani, GODAI, intte Xoossaa.” SHemppo 19y Israaꞌeelatussi imettida ‘wogatuppe’ amaridaageetubaa yootees. Leemisuwawu, paydo 5-8, 21, 22y mehiyaa yarshshuwaabaa yootees. Israaꞌeelati he yarshshota ‘Yihoowassi geeshsha gididabaa tunissenna’ ogiyan yarshshana koshshees. He xiqiseta nabbabiyoogee nuuni Yihoowa ufayssanawu koyanaadaaninne Ibraawe 13:15y nuuni oottanaadan yootiyoogaadan, A ufayssiya sabaa yarshshuwaa nuuni yarshshanaadan nuna denttettana koshshees. w21.12 5-6 ¶14-15

Aqo oyqqida yelagati Yihoowan ammanettida haratu hanotaappe ha wodiyan goꞌettana danddayoosona. Amarida aqo laggeti daro layttawu ubba wode haggaazuwaa haggaazidaageeta gidana danddayoosona. Intte halchchuwaa xeelliyaagan intte qoppiiddi deꞌikko, zoriyaa eta oychchite. Hagee intte Yihoowan ammanettiyoogaa bessiyo oge. (Lee. 22:17, 19) Aqo deꞌoy Yihoowa imota gidiyoogaa hassayite. (Maa. 19:5, 6) Aqo oyqqidaageeti he imotan ufayttanaadan I koyees. Aqo oyqqida yelagatoo, intte deꞌuwan intte oottanabaa loytti qoppite. Yihooway intteyyo immido imotaa gishshawu A galatanawu inttessi danddayettida ubbabaa oottite. Woosan Yihoowa haasayissite. Intte hanotawu haniya maarata demmanawu A Qaalaa pilggite. Yaatidi Yihooway immiyo zoriyaa kaallite. Intte Yihoowawu haggaaziyoogaa intte deꞌuwan kaseyikko, ufayssiyaanne woppa deꞌuwaa deꞌanaagaa ammanettana danddayeeta! w21.11 19 ¶16, 18

Yaaqoobi babaa ubbatoo bessiyaagaadan xeelliis. Yaaqoobi Yesuusa isha gidiyo gishshawu woy gita aawatettay awu deꞌiyo gishshawu hara Kiristtaanetuppe aadhdhiyaabadan qoppibeenna. I ba mala Kiristtaaneta “ta siiqo ishatoo” giidi xeesiis. (Yaaq. 1:16, 19; 2:5) I harati bana wottiyoobi baynna asa giidi qoppanaadan oottanawu malibeenna. Nuuni ay tamaariyoo? Nu ubbay nagaranchcha gidiyoogaa hassaya. Nuuni nu tamaarissiyoogeetuppe aadhdhiyaabadan qoppana koshshenna. Aybissi? Nuuni balennabadan nu xinaatee qoppanaadan nuuni oottikko, I wottiyoobi baynna ogiyan Xoossawu azazettana mule danddayikke giidi qoppana danddayiyo gishshawu hidootaa qanxxana danddayees. SHin, Geeshsha Maxaafay yootiyo maarata kaallanawu nuuni metootido wodee deꞌiyoogaanne nu deꞌuwan nuuni laamettanaadan Yihooway nuna waati maaddidaakko yootiyoogee nuuni Geeshsha Maxaafaa xannaꞌissiyo urikka Yihoowawu haggaazana danddayiyoogaa akeekanaadan maaddana. w22.01 11-12 ¶13-14

Nuuni Yesuusaagaadan loytti qoppiyo wode, aagaadan loytti oottoos; qassi aagaa mala eeshshaa loytti bessiyaageeta gidoos. (Ibr. 1:3) Nuuni hagaadan qoppana danddayoos: ‘Yesuusi wottiyoobi baynna asa. Taani wottiyoobi baynna ogiyan A mala gidana danddayikke!’ Neessi hegaadan siyettikko, ha hanotata hassaya. Koyruwan, neeni Yihoowanne Yesuusa leemisuwan merettadasa. Hegaa gishshawu, amarida hanotan neeni eta milatana danddayaasa. (Doo. 1:26) Naaꞌꞌanttuwan, Xoossaa geeshsha ayyaanay saluwan saꞌan aybippenne aadhdhiya wolqqa. Neeni nerkka mule oottana danddayennabaa geeshsha ayyaanaa maaduwan oottana danddayaasa. Heezzanttuwan, neeni ha wodiyan wottiyoobi baynna ogiyan ayyaanaa ayfiyaa ayfanaadan Yihooway naagenna. Saꞌan merinawu deꞌanawu hidootiyaageeti wottiyoobi baynnaageeta gidanaadan nu siiqo Aaway 1,000 layttaa keeriis. (Ajj. 20:1-3) Ha wodiyan nuuni nuussi danddayettida ubbabaa oottanawu baaxetanaadaaninne Yihooway nuna maaddiyoogaa ammanettanaadan I nuuppe koyees. w22.03 9 ¶5-6

Nuuni Yihoowaara dabbotaa minttanaadan maaddiyay woosa xalla gidenna. Nuuni Xoossaa Qaalaa xannaꞌiyoogeenne gubaaꞌe shiiquwaa shiiqiyoogeekka Xoossaara dabbotaa minttanawu maaddees. Neeni xannaꞌiyoonne gubaaꞌe shiiquwaa shiiqiyo wodiyaa loytta goꞌettana danddayiyo ogee deꞌii? Taani, ‘Gubaaꞌe shiiquwan woy xannaꞌanawu maliyo wodiyan harabaa qoppanaadan oottiyay aybee?’ gaada nena oychcha. Ne silkkiyan woy hegaa mala haraban dawalettidabaa woy kiitettidabaa beꞌiyoogee, woy siyiyoogee? Neeni xannaꞌiyo woy gubaaꞌe shiiquwaa shiiqiyo wode harabaa qoppiyoogaa akeekikko, hegan qofaa wottanaadan Yihooway maaddana mala woossa. Nena hirggissiyaabi deꞌikko, hegaa qoppiyoogaa aggada Xoossaa Qaalaa qoppanawu metootana danddayaasa, shin he wode ayyaanaabaa qoppana koshshees. Ne wozanaa xalla gidennan, ‘ne qofaakka’ naagiya sarotettaa demmanawu woossa.—Pili. 4:6, 7. w22.01 29-30 ¶12-14

Kawuwaa Ooziyaani zoriyaa siyennan ixxiis. Yihoowa beeta maqidasiyan qeesetu xalaalay gelanaadan paqqadettiya sohuwaa I geliis, qassi I ixaana cuwayanawu maliis. Yihoowa qeeseti assi hagaadan giidosona: “Ooziyaanaa, neeni GODAAYYO ixaanaa cuwayanau bessakka. Ixaanaa cuwayiyoogee bessiyoi, . . . qeesetu xalaalaassa.” Ooziyaani waatidee? I bana ziqqi oottidi zoriyaa siyidi beeta maqidasiyaappe sohuwaara kiyiyaakko, Yihooway ayyo atto gaana danddayees. SHin, “Ooziyaani . . . hanqqettiis.” I he zoriyaa siyennan ixxidoy aybissee? I kawo gidiyo gishshawu ba koyido ubbabaa oottana danddayays giidi qoppennan waayi aggana. SHin Yihooway hegan ufayttibeenna. Ooziyaani baassi paqqadettibeennabaa oottidoogaa gaasuwan, goga hargge A oyqqiis, qassi I “haiqqana gakkanaashinkka he harggiyaara de7iis.” (2 Odi. 26:16-21) Nuussi deꞌiya maatay ayba gidikkonne, Geeshsha Maxaafaappe imettiya zoriyaa nuuni siyennan ixxikko Yihooway nuna nashshiyoogaa agganaagaa Ooziyaana hanotaappe tamaaroos. w22.02 9 ¶7

“Ceega meretaa” maayida uri iitabaa ubbatoo qoppeesinne oottees. (Qol. 3:9) I ba xallaa siiqiyaagaa, eesuwan yiillotiyaagaa, galatennaagaanne otorettiyaagaa gidana danddayees. I pornograafiyaanne pokkobaa woy makkalabaa bessiya biidota beꞌiyoogan ufayttana danddayees. Awu amarida loꞌꞌo eeshshati deꞌiyoogee qoncce, qassi I haasayiyo woy oottiyo iitaban zilꞌꞌettana danddayees. SHin I ba qofaanne ba oosuwaa laammanawu koyenna. (Gal. 5:19-21; 2 Xim. 3:2-5) Nuuni nagaranchcha gidiyo gishshawu, nuuppe ooninne iita qofaanne amo ubbaa nu wozanaappenne nu qofaappe muleera xayssana danddayokko. Nuuni zilꞌꞌettanaadan oottiyaabaa issi issitoo haasayoos woy oottoos. (Erm. 17:9; Yaaq. 3:2) SHin nuuni ceega asatettaa xayssiyo wode, asatettaa amuwawunne oosuwawu haarettiyoogaa aggoos. Nuuni laamettidi loꞌꞌo asa gidoos.—Isi. 55:7. w22.03 3 ¶4-5

Cimatoo, intte ishanttussinne michchonttussi deꞌiya loꞌꞌo eeshshata akeekite. Eti ubbaykka nagaranchcha; shin eta ubbawu nashshiyo eeshshati deꞌoosona. Cimati issi ishaa woy michchiyo issi issitoo zorana danddayiyoogee qoncce. SHin kiitettida PHawuloosaagaadan, cimati issi uri haasayidonne oottido hanqqetissiyaabaa qoppennan agganawu baaxetana koshshees. Eti he izawu Yihoowa siiqiyo siiquwaa, I Xoossawu haggaaziyoogan genccido genccaanne loꞌꞌobaa oottanawu ayyo deꞌiya minotettaa qoppiyoogee loꞌꞌo. Haratu loꞌꞌo eeshshata qoppiya cimati gubaaꞌiyan siiqoy deꞌanaadan oottoosona. Yihooway intte wottiyoobi baynnaageeta gidanaadan gidennan, ammanettiyaageeta gidanaadan koyiyoogaa hassayite. (1 Qor. 4:2) Xoossay intte ayyo oottiyooban ufayttiyoogaa ammanettana danddayeeta. Yihooway “intte oottido oosuwaanne qassi ammaniyaageeta maaddidoogaaninne ha77ikka maaddiyoogan Xoossaa siiqido siiquwaa” mule dogenna.—Ibr. 6:10. w22.03 31 ¶19, 21