Hidaare

Yihooway nena hara ogetunkka maaddees. Haggaazuwan eqettiya uri gayttiyo wode woppu gaanaadan I nena maaddees. Neeni yootiyoobaa issi uri siyanawu koyiyo wode, haniya xiqisiyaa hassayada goꞌettanaadankka I nena maaddees. Asay neeni yootiyoobaa siyanawu koyenna wodekka aggennan sabbakanaadan I neessi minotettaa immees. (Erm. 20:7-9) Nuuni haggaazanaadan loohissiyoogankka Yihooway ba loꞌꞌotettaa nuussi bessees. Asawu sabbakiyo wode yootiyoobaanne haggaazuwan nuuni he qofaa waati goꞌettana danddayiyaakko saaminttawu gidduwan shiiqiyo shiiquwan tamaaroos. Oorattabaa maliyoogee koyro yashshana danddayees; shin nuuni meezetiyo wode he qofay keehi loꞌꞌo gidiyoogaa akeekana danddayoos. Qassi nuuni kase mule sabbaki erenna ogetun sabbakanaadan gubaaꞌe shiiqotuninne gita shiiqotun tamaaroos. Hageekka nuuni yayyanaadan oottana danddayees, shin nuuni tamaaridoogaadan oottiyo wode Yihooway nuna anjjana. w21.08 27 ¶5-6

Kiitettida PHawuloosi Qoronttoosan deꞌiya Kiristtaanetuyyo xaafido dabddaabbiyan eta mintti zoriis. I he dabddaabbiyaa xaafi simmidi, Tiita etakko kiittiis. Eti A zoriyaa ekkidi oosuwan peeshshidoogaa siyido wode I keehi ufayttiis! (2 Qor. 7:6, 7) Cimati bantta ishanttuuranne michchonttuura wodiyaa aattiyoogan PHawuloosa milatana danddayoosona. Yaatiyo issi ogee, haratuura minttettiyaabaa haasayanawu gubaaꞌe shiiqota kasetidi gakkiyoogaa. Issi ishaa woy michchiyo koshshiyaaban siiquwan minttettiyoogee darotoo amarida daqiiqa xallaa ekkiyaaba. (Roo. 1:12) Qassi PHawuloosa leemisuwaa kaalliya issi cimay ba ishanttunne michchonttu ammanuwaa minttanawunne Xoossay eta siiqiyoogaa yootanawu Geeshsha Maxaafaa goꞌettees. I eta nashshanaadan oottiyaabaa koyees. Issi cimay zorana koshshiyo wode, A zoree Xoossaa Qaalaara maayettiyaagaa gidana bessees. I issibaa geeshshidi yootees, shin issi ishay woy michchiyaa A zoriyaa oosuwan peeshshanaadan I koyiyo gishshawu kehatettan yootees.—Gal. 6:1. w22.03 28-29 ¶11-12

Ha wodiyan, baassi ammanettidi aggennan haggaazana mala ‘ubbaappe aadhdhiya wolqqaa’ Yihooway ba asawu immees. Woossiyoogee minttettees. Kiitettida PHawuloosi nuuni Xoossaa “ubba wode” woossanaadan Efisoona 6:18n yootiis. Nuna maaddiyoogan Xoossay nu woosaa zaarana. Issi issitoo, nu metuwaa genccana danddayennabadan nuussi siyettana danddayees; qassi woygidi woossanaakko erennan aggana danddayoos. SHin nuuyyo siyettiyaabaa yootanawu nu metootiyo wodekka baakko woossanaadan Yihooway nuna shoobbees. (Roo. 8:26, 27) Geeshsha Maxaafaa baggaarakka I nuna minttettees. PHawuloosi wolqqaanne minttettuwaa demmanawu Geeshsha Maxaafaa nabbabiis; qassi nuunikka hegaadan oottana koshshees. (Roo. 15:4) Nuuni Xoossaa Qaalaa nabbabidi hegaa wotti dentti qoppiyo wode, Geeshsha Maxaafay waatidi nuna maaddana danddayiyaakko akeekanaadan Yihooway nuna maaddees.—Ibr. 4:12. w21.05 22 ¶8-10

Tamaarissiyoogee keehi koshshiyaaba gidiyoogaa nuuni eroos, shin erissiyo ashkkara oottiyo oosuwaa nu koyiyoogaa keenaa oottiyoogee nuuyyo deexxana danddayees. Nuuni nu koyiyoogaa keena oottanawu waayi danddayana. Leemisuwawu, aassiya amaridaageeti cimidaageeta woy sahettiyaageeta. Ne hanotay hegaa malee? Yaatikko, nuuni nu moobayliyaa woy hara elektronike miishshata goꞌettidi Geeshsha Maxaafaa xannaꞌissana danddayiyoogaa tamaarida! Hegaa gishshawu, neeni ne son uttada xinaatiyaa doomissananne xannaꞌissana danddayaasa. Harabankka maaddiis. Amaridaageeti Geeshsha Maxaafaa xannaꞌanawu koyoosona, shin nu ishantti sabbakanawu biyo wode darotoo eti son deꞌokkona. Gidoppe attin, eti maallado guuran woy qammi son deꞌennan waayi aggana. He wodiyan Geeshsha Maxaafaa issi uraa xannaꞌissana danddayay? Niqoodimoosi qammi tamaaranawu koyido gishshawu, Niqoodimoosa Yesuusi qammi tamaarissiis.—Yoh. 3:1, 2. w21.07 5 ¶10-11

Xammaqiya Yohaannisi erissiyo ashkkarati Yesuusi erissiyo ashkkarati xoomibeenna gishshawu garamettidosona. Yesuusi I paxa deꞌishin eti xoomiyo gaasoy baynnaagaa yootiis. (Maa. 9:14-17) Gidikkonne, Yesuusa eqettiya Parisaawetinne harati I eta wogaa kaallenna gishshawu A bolli pirddidosona. I Sambbatan hargganchchaa pattido wode eti hanqqettidosona. (Mar. 3:1-6; Yoh. 9:16) Eti Sambbataa Higgiyaa bonchchiyoogan ceeqettidi haasayiyaaba gidikkonne, beeta maqidasiyan asay zalꞌꞌanaadan paqqadiyoogan metoy baawa goosona. Hegaa gishshawu Yesuusi eta eqettido wode eti hanqquwan suullidosona. (Maa. 21:12, 13, 15) Eti bantta xallaa siiqiyaageetanne ammanoy baynnaageeta gidiyoogaa qonccissanawu, Israaꞌeelatu taarikiyaa yootidi Naazireeten deꞌiya Ayhudatu woosa keettan Yesuusi tamaarissido wode keehi hanqqettidosona. (Luq. 4:16, 25-30) Yesuusi oottana bessees giidi eti qoppiyoobaa I oottibeenna gishshawu daro asay Yesuusa eqettiis.—Maa. 11:16-19. w21.05 5-6 ¶13-14

Yaaretiyoogaanne otorettiyoogaa xeelliyaagan nuuni naagettanaadan Yihooway yootiyo ogetuppe issoy, haratu deꞌuwan gakkidabaappe tamaaranaadan minttettiyoogaana. Yaaretiyoogaabaa nuuni qoppiyo wode, Seexaanaa Dabloosa hassayennan waayi aggana. Seexaanay Yihoowa kiitanchchatuppe issuwaa gidido gishshawu, awu daro gita maatay deꞌennan aggenna. SHin I hegaappe aarobaa koyiis. Yihoowa xallawu bessiya goynuwaa I koyiis. Seexaanay nuuni ba mala gidanaadan koyiyo gishshawu, nuuyyo deꞌiyaabaappe aarobaa nu koyanaadan oottanawu malees. I hegaadan oottanawu koyro malidoy Hewaaniira haasayido wodiyaana. Hewaananne I keettaaway issi mittaa teeraa xallaa aggidi “Gannatiyaa mittaa teeraa ubbaappe” maanaadan gidi palahiya qumaa Yihooway siiquwan etawu immiis. (Doo. 2:16) SHin, Hewaana mooppite giido miitta teeraa maana koshshiyaabadan qoppana mala oottiyoogan Seexaanay O cimmiis. Hewaana bawu deꞌiyaaban ufayttabeenna gishshawu, harabaa koyaasu. Hegaappe simmin hanidabaa nuuni eroos. Hewaana nagaraa oottada wurssettan hayqqaasu.—Doo. 3:6, 19. w21.06 14 ¶2-3; 17 ¶9

Addaameenne Hewaana naata yelanaadaaninne saꞌaa loytti oyqqanaadan koyiis. Addaameenne Hewaana azazettidabanne Xoossay etawu yootidobaa oottidaba gidiyaakko, etinne eta zareti Xoossaa soo asa gididi merinawu deꞌana. Addaamessinne Hewaanissi Yihoowa son xoqqa sohoy kase deꞌees. Mazamure 8:5y yootiyoogaadan, Yihooway asaa medhdhidoogaa xeelliyaagan Daawiti hagaadan giis: “A neeni kiitanchchatuppe amaridaagaa ziqqissadasa; bonchchuwaanne gitatettaa akiliiliyaa a huuphiyan wottadasa.” Yihooway asaayyo kiitanchchatuugaa keena wolqqaanne eraa immibeennaagee qoncce. (Maz. 103:20) Gidoppe attin, asay he wolqqaama kiitanchchatuppe ‘amaridaagaa ziqqi gees’ woy guuxxees. Addaameenne Hewaana Yihoowayyo azazettibeennaagaa gaasuwan eti Yihoowa soo asa gidiyoogee attidoogee azanttiyaaba. Hegee eta zaretu bolli wolqqaama metuwaa kaalettiis. SHin Yihooway halchchidobay laamettibeenna. I azazettiya asay merinawu ba naata gididi deꞌanaadan koyees. w21.08 2-3 ¶2-4

Ha wodiyan, Yihoowa Markkatuppe darota yedetay gakkees. Leemisuwawu, amaridaageeti nu oosoy teqettido biittatun deꞌoosona, qassi ishantti qashettananne ‘deriyaa haariyaageetu sinttaaninne kawotu sinttan eqqana’ danddayoosona, qassi hegee etassi markka gidana. (Maa. 10:17, 18) Hara Yihoowa Markkati hara qommo yedetaa genccoosona. Eti Yihoowawu laꞌatettan goynnana danddayiyo biittan deꞌoosona, shin eti bantta Xoossawu goynnennaadan digganawu murttida so asaa yaratuppe gakkiya yedetaa genccoosona. (Maa. 10:32-36) Darotoo, so asaa yarati nuuni Yihoowawu goynnennaadan nuna wolqqan diggana danddayennaagaa akeekiyo wode eqettiyoogaa aggoosona. Qassi issi issitoo, kase keehi eqettiyaageeti guyyeppe laamettidi gooba Yihoowa Markkata gidoosona. Nena yedetay gakkiyo wode, Yihoowawu oottiyoogaa aggoppa! Xala gida. Yihooway ba geeshsha ayyaanan nena maaddiyo gishshawu, neeni aybanne yayyana koshshenna! w22.03 16 ¶8

Yihooway “karidi xeelliya aifiyaa, worddotiya inxxarssaa, ashkke asata woriya kushiyaa” ixxiyoogaa Geeshsha Maxaafay yootees. (Lee. 6:16, 17) Qassi I “suuttaa gussiyaageetanne cimmiya asata . . . shenetees.” (Maz. 5:6) Yihooway hegaa mala qofaanne oosuwaa keehi ixxiyo gishshawu, Nohe wode saꞌay makkalan kumanaadan oottida iita asata ubbaa I xayssiis. (Doo. 6:13) Qassi mooribeenna bantta aqo laggetuppe paraman shaahettanawu eta kaddidaageeta Yihooway ixxiyoogaa hananabaa yootiya Milkkiyaasa baggaara yootiis. Xoossay eta goynuwaa ixxees, qassi eti oottidobaa gishshawu eta bolli pirddana. (Mil. 2:13-16; Ibr. 13:4) Yihooway nuuni ‘iitabaa ixxanaadan’ koyees. (Roo. 12:9) “Ixxite” giya qaalay shaatettiyoogaa qonccissiyaaba; hegaa giyoogee issibaa keehi ixxiyoogaa, shenetiyoogaa giyoogaa. Yaatiyo gishshawu, Yihooway iita giyoobaa oottanawu qoppiyoogeekka nuna sheneyana bessees. w22.03 4-5 ¶11-12

Saluwan deꞌiya nu Aaway ba Kawotettaa baggaara nuna mata wode daroban anjjana. Ubbatoo Yihoowa naagiyaageeti ha wodiyankka sinttappe yaana ooratta alamiyankka daro anjjota demmana. Xoossaa asay ooratta alamiyaa geliyo wode, ha wodiyan gakkiya unꞌꞌissiyaabaanne metuwaa eti mule genccana koshshenna. Naaqoy muleera xayana, qassi waayekka deꞌenna. (Ajj. 21:4) He wode nuussi gidi palahiyaabay deꞌiyo gishshawu, nuuyyo koshshiyaabaa demmanawu hirggana koshshenna. (Maz. 72:16; Isi. 54:13) Hegee keehi gita anjjo! Yihooway nuuni iita eeshshata agganaadaaninne A ufayssiya eeshshati deꞌiyoogeeta gidanaadan maaddiyoogan, ba haaruwan deꞌana mala nuna ha wodiyan giigissiiddi deꞌees. Hidootaa qanxxoppanne Yihoowayyo oottiyoogaa aggoppa. Nuuni sinttappe keehi loꞌꞌo deꞌuwaa demmana! Keehi loꞌꞌo wodee sinttappe nuna naagiyo gishshawu, Yihooway ba oosuwaa polana gakkanaashin ubbatoo eeno giidi danddayan naagishshiyaageeta gidoos! w21.08 13 ¶17-19

Yihudan deꞌiya Kiristtaaneti kiitettida PHawuloosa dabddaabbee gakkin daro takkennan bantta keettaa, bantta oosuwaanne ammanenna bantta dabbotaa aggidi ‘deriyaakko baqatana’ koshshiis. (Maa. 24:16) He wode eti issoy issuwaa maaddiyoogee keehi koshshiyaaba. Issoi issuwaa maaddanaadan PHawuloosi zorido zoriyaa hegaappe kase eti oosuwan peeshshikko, ooratta deꞌuwaa meezetanawu metootokkona. Nu ishanttinne michchontti banttassi koshshiyaabaa ubbatoo nuussi yootennan aggana danddayoosona. Yaatiyo gishshawu, harati yayyennan haasayissiyo asa gida. Ne gubaaꞌiyan harata maaddanawu ubbatoo giigi uttida ishanttanne michchontta neeni eriyoogee qoncce. Eti nuuni eta metidabadan qoppanaadan oottanawu mule koyokkona. Eti ubbatoo nuna maaddanawu koyiyoogaa nuuni eroos; qassi nuunikka hegaa mala asa gidanawu koyoos! w22.02 23-24 ¶13-15

Mata layttappe ha simmin, daro gubaaꞌeti issippe walahettidosona; hegee amarida gubaaꞌeti hara woradawu laamettanaadan oottiis. Eti nuuni hara gubaaꞌiyaa baanaadan nuna oychchikko, laggetanne so asaa aggidi biyoogee nuuyyo deexxiyaaba gidana danddayees. Cimati aassiya issuwaa issuwaa awa maddabanaakko Yihooway eta kaalettii? Kaalettenna. Qassi hegee nuussi imettiya kaaletuwaa kaalliyoogee nuna metanaadan oottana danddayees. Gidikkonne, cimati hegaa malabaa kuuyiyo wode Yihooway etan ammanettees; nuunikka etan ammanettana koshshees. Cimati kuuyiyoobay nuuni koyiyooba gidenna wodekka, eti kuuyidobaa nuuni maayettana koshshiyoy aybissee? Nuuni maayettiyoogee Xoossaa asaa giddon issippetettay xayennaadan maaddiyo gishshataassa. Cimati kuuyidobaa ubbaykka banttana ziqqi oottidi azazettiyo wode gubaaꞌeti minnoosona. (Ibr. 13:17) Ubbaappe aaruwan, nuussi koshshiyaabaa kunttanaadan Yihooway sunttidoogeetun ammanettidi hashettiyoogan nuuni Yihoowan ammanettiyoogaa bessoos.—Oos. 20:28, NW. w22.02 4-5 ¶9-10

Neeni xammaqettida isha gidikko, haasayaa loytta haasayanawu woy loytta tamaarissanawu baaxetana danddayaasa. Ayssi giikko, neeni nabbabiyoogan, haasayaa haasayiyoogaaninne tamaarissiyoogan gooba gidanawu baaxetikko, ne yootiyoobaa siyiyaageeta loytta maaddana danddayaasa. (1 Xim. 4:15) Haasayaa haasayiyo hanotaa xeelliyaagan Nabbabanawunne Tamaarissanawu Keehippe Minna giyo brooshuriyan odettida ubbabaa xannaꞌanawunne oosuwan peeshshanawu halchcha. Haasayaa haasayiyo hanotaa xeelliyaagan issi eeshshaa xannaꞌada son loytta meezeta, qassi neeni haasayaa haasayiyo wode eridobaa oosuwan peeshsha. “Qaalaa yootiyoogaaninne tamaarissiyoogan” minnidi oottiya zoriyoogan maaddiyaagaa woy hara cimata zoriyaa oychcha. (1 Xim. 5:17) Brooshuriyaappe tamaaridobaa oosuwan peeshshiyoogaa xalla gidennan, ne yootiyoobaa siyiyaageeti bantta ammanuwaa minttanaadan woy eti tamaaridobaa oosuwan peeshshanaadan maaddiyoogaakka loytta qoppa. Yaatiyoogan, neeninne eti kaseppe aaruwan ufayttana. w21.08 24 ¶17

Nuuni harati nuuppe aadhdhiyaabadan xeellikko, eran nuuppe aadhdhiyaageetuura annaacettokko. Qassi nuuni etan ufayttoos. Eti Yihoowayyo haggaaziyoogan bantta eraa A sabbanawu goꞌettikko, keehi ufayttoos. Hegaappe denddidaagan, nuuni ubbay gubaaꞌiyan sarotettaynne issippetettay deꞌanaadan maaddana. Nuuni loytti oottana danddayennabay deꞌiyoogaa akeekikko, issi ishaa woy michchiyo miqqaynnennaadan naagettana danddayoos. Nuuni nuna ziqqi oottikko, hara urappe aadhdhiyoogaa bessanawu baaxetokko. Eran nuuppe aadhdhiyaageetuppe tamaaranawu baaxetoos. Leemisuwawu, gubaaꞌiyan dere haasayaa loytti haasayiya ishaa qoppa. Nuuni I ba haasayaa waati giigettiyaakko A oychchana danddayoos. Issi michchiya qumaa kattiyoogan qara gidikko, qumaa kattiyoogan nuuni qara gidanawu maaddiya zoriyaa O oychchana danddayoos. w21.07 16 ¶8-9

Sambbatan mittaa mixido gishshawu issi Israaꞌeela bitanee hayqqanaadan Yihooway pirddidoogaa Qoodaabaa maxaafay yootees. Hegaappe daro layttay aadhdhi simmin, wodiraa laammidanne asa worissida Kawuwaa Daawitawu Yihooway atto giidoogaa naaꞌꞌantto Sameela maxaafay yootees. (Qoo. 15:32, 35; 2 Sam. 12:9, 13) ‘Asa worissidanne wodiraa laammida Daawitawu Yihooway atto giidi, guutta nagara milatiyaabaa oottida bitanee hayqqanaadan pirddidoy aybissee?’ giidi qoppana danddayoos. Geeshsha Maxaafay issi taarikiyaabaa ubbatoo wurssi yootenna. Leemisuwawu, Daawiti ba oottido nagaraappe wozanappe simmidoogaa nuuni eroos. (Maz. 51:2-4) SHin Sambbataa higgiyaa bonchchibeenna bitanee ay mala asee? I ba oottidoban azzanidee? I Yihoowa higgiyawu kasekka azzazettenee? I kase seeray imettin xaasayi xeellidee woy shenehoo giidee? Geeshsha Maxaafay hegaabaa yootenna. Gidikkonne, nu Xoossay “ba ogiyan ubban xillo” gidiyoogaa eroos.—Maz. 145:17. w22.02 2-3 ¶3-4

Ashkke asi oottana danddayiyoogaappe aaruwaa baappe naagenna. Hegaappe denddidaagan, I ufayttidi deꞌeesinne ubbatoo minni oottees. Ashkke uraa bishkkiliitiyaa toggidi biiddi adussa zarphphiyaa gakkida uraara geeddarssana danddayoos. Bishkkiliitiyaa toggidaagee shaafaa pinnanawu bishkkiliitiyaappe wodhdhana koshshees. I loddan biyaabaa gidikkonne aggennan sinttawu bees. Hegaadan, ashkke uri aggennan Yihoowawu haggaazanawunne harata maaddanawu laamettiyoonne loddu giyo wodee deꞌiyoogaa erees. (Pili. 4:5) Barzzillaaya hanotaa qoppa; Kawuwaa Daawiti Barzzillaayi kawo keetta asa gidanaadan shoobbido wode awu layttay 80. Ashkke gidida Barzzillaayi kawuwaa shoobiyaa ixxiis. Barzzillaayi darobaa oottana danddayennaagaa eriyo gishshawu, ba gishshaa Kimihaama giyo yelagay baanaadan yootiis. (2 Sam. 19:35-37) Barzzillaayaagaadan, oosuwaa yelagati oottanaadan immiyoogan cimidaageeti ufayttoosona. w21.09 10 ¶6-7

Yihoowa siiqiya Aawadan xeellanawu neeni metootadii? Amaridaageeti metootoos. Nu aaway keha gidana xayikko, nuna siiqiya aaway deꞌees giidi qoppiyoogee metana danddayees. Nuuyyo siyettiyaabaa Yihooway loytti eriyoogee keehi minttettiyaaba! I nuukko shiiqanawu koyees. A Qaalay “Xoossaakko shiiqite; ikka inttekko shiiqana” giidi minttettiyoy hegaassa. (Yaaq. 4:8) Yihooway nuna siiqeesinne I ooppenne aadhdhiya Aawa nuussi gidanaagaa yootees. Nuuni kaseegaappe aaruwan Yihoowakko shiiqanaadan Yesuusi nuna maaddana danddayees. Yesuusi Yihoowa loytti ereesinne wottiyoobi baynna hanotan A eeshshaa bessees. Hegaa gaasuwan I hagaadan giis: “Tana be7ida urai Aawaakka be7iis.” (Yoh. 14:9) Nuuni nu Aawaa waati bonchchanaakkonne awu waati azazettanaakko, qassi A azzanttennan an sabettanawunne A ufayssanawu waatana bessiyaakko bayra ishadan Yesuusi nuna tamaarissees. Qassi Yihooway darin kehanne siiqiyaagaa gidiyoogaa nuuni akeekanaadan Yesuusi nuna maaddees. w21.09 21 ¶4-5

Yihoowa asay sarotettan issippe issi tumu Xoossaa goynnees. Cimati gubaaꞌiyaa geeshshatettaa naaganaadan Yihooway etassi gita aawatettaa immiis. Issi Kiristtaanee gita nagaraa oottikko, he uri gubaaꞌiyaa yame gididi deꞌana bessiya bessennaakko cimati kuuyanaadan Yihooway koyees. Qassi he uri ba oottido nagaraa gishshawu wozanappe zilꞌꞌettiyaakkonne cimati erana koshshees. I ba nagaraappe simmaassi giidi yootana danddayees, shin I tumuppe ba oottidobaa ixxii? I he nagaraa zaaretti oottennan agganawu murttidee? Iitatuura laggetiyoogee I nagaraa oottanaadan gaaso gidikko, I etaara laggetiyoogaa agganawu eeno gii? Cimati Yihoowa woossoosona, he yohuwaabaanne Geeshsha Maxaafay yootiyoobaa eti loytti qoppoosona, qassi nagaraa oottida uri ba oottidobaa xeelliyaagan awu siyettiyaabaa eranawu maloosona. Yaatidi eti nagaraa oottida uri gubaaꞌiyaa yame gididi deꞌana bessiya bessennaakko kuuyoosona. Issi issi hanotatun, I bohettana koshshees.—1 Qor. 5:11-13. w22.02 5 ¶11-12

Nuuni xammaqettoosappe amarida gallassa woy daro laytta gidin, nuuni ubbay Yihooway dosiyo eeshshay deꞌiyoogeeta gidanawu koyoos. Nuuni hegaa mala asa gidanawu qoppiyooban naagettana koshshees. Aybissi? Nu eeshshay nuuni qoppiyoobaara darotoo gayttiyo gishshataassa. Nuuni ubbatoo nuna ufayssiyaabaa qoppikko, iitabaa haasayoos woy oottoos. (Efi. 4:17-19) SHin nuuni loꞌꞌobaa qoppikko, nu Aawaa Yihoowa ufayssiyaabaa haasayana woy oottana danddayoos. (Gal. 5:16) SHin, iita qofaa qoppiyoogaa muleera aggana danddayokko. SHin he qofaa polennan agganawu doorana danddayoos. Yihooway ixxiyoobata haasayiyoogaanne oottiyoogaa, nuuni xammaqettanaappe kase aggana koshshees. Hagee ceega asatettaa xayssanawu nuuni oottana koshshiya waannaba. SHin nuuni Yihoowa loytti ufayssanawu ooratta meretaa maayana bessees. w22.03 8 ¶1-2

Gita nagaraa oottida uri tumuppe nagaraappe simmidaakkonne eriyoogee cimata metana danddayees. Waanidi? Cimati wozanan deꞌiyaabaa erana danddayenna gishshawu, bantta ishay ba nagaraa muleera aggidoogaa bessiya naqaashaa demmanawu maloosona. Nagaraa oottida uri qoppiyoobaaninne oottiyooban wozanappe laamettidoogaa eti akeekana koshshees. Nagaraappe tumuppe simmidoogaa bessiyaagaadan laamettanawu he urawu daro wodiyaa ekkana danddayees. Bohettida uri ba nagaraappe tumuppe simmidoogaa bessanawu ubbatoo shiiqota shiiqanaadan, aggennan woossanaadaaninne Geeshsha Maxaafaa xannaꞌanaadan cimati zoriyoobaa oosuwan peeshshana koshshees. I zaarettidi nagaraa oottanaadan A paaccana danddayiyaabaappe naagettanawukka baaxetana koshshees. I Yihoowaara dabbotaa zaarettidi minttanawu baaxetikko, Yihooway awu muleera atto gaanaagaanne I gubaaꞌiyaa simmanaadan cimati A maaddanaagaa ammanettana danddayees. w21.10 6 ¶16-18

Yesuusi Yihoowa keehi siiqiyo gishshawu, saluwan deꞌiyo wodekka saꞌan deꞌiyo wodekka A xalaalawu goynniis. (Luq. 4:8) Ba erissiyo ashkkaratikka Yihoowa xalaalawu goynnanaadan tamaarissiis. Yesuusikka ammanettida I erissiyo ashkkaratikka goynuwawu misiliyaa goꞌettibokkona. Xoossay ayfiyan beettenna gishshawu, ooninne A milatissidi medhdhana danddayenna! (Isi. 46:5) Issoti issoti geeshsha giidi qoppiyo asatu misiliyaa medhdhiyoogaanne eta woossiyoogaa xeelliyaagan shin? Tammu Azazotuppe naaꞌꞌanttoogan hachchi gallassaa xiqisiyan deꞌiya qofaa Yihooway yootiis. Xoossaa ufayssanawu koyiyaageetussi ha xiqisee yootiyoobay qoncce. Beni Kiristtaaneti Xoossaa xalaalawu goynnidoogaa taarikiyaa eranchchati yootoosona. Ha wodiyan Yihoowa Markkati beni Kiristtaanetu leemisuwaa kaalloosona. w21.10 19-20 ¶5-6

Yesuusi koyro xeetu layttan Yihudan deꞌiya Kiristtaanetussi Yerusalaame katamay ‘wotaaddaran direttana’ wode yaanaagaa yootiis. (Luq. 21:20-24) Hegee haniyo wode eti ‘deriyaakko baqatana’ koshshiis. Eti he katamappe kiyikko bantta shemppuwa ashshana, shin eti darobaa aggi baana. Amarida layttappe kase, Wochchiyo Keelay hegaabaa hagaadan giis: “Eti gadiyaanne keettaa aggi biidosona, ubba qassi bantta son deꞌiyaabaa shiishshanawu guyye simmibookkona. Eti Yihooway banttana naaganaagaanne maaddanaagaa ammanettidosona, qassi eti koshshees giidi qoppiyo aybippenne aaruwan A goynuwaa kaseyidosona.” Gujjidikka hagaadan giis: “Nuuni aquwaa xeelliyo ogiyaara gayettidaagan sinttaappe nuna paacciyaabay gakkana danddayees; Nuussi keehi koshshiyay aqooyye, Xoossaa bagga gididaageeti demmana atotettee? Wurssettay gakkiyo wode nuuni metiyaabata gencciyoogeenne issi issibata aggi bayiyoogee koshshana danddayees. Koshshiyaabaa aybanne oottanawu nuuni eeno gaana bessees.” w22.01 4 ¶7-8

Israaꞌeelati Gibxxeppe kiyi simmin darin takkennan, Yihooway Ba sunttaabaanne eeshshatubaa Muusessi yootiis. I hagaadan giis: “Taani GODAA; taani GODAA; qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa. Taani ta aggenna siiquwaa sha7atussi naagiyaagaa; iitatettaa, makkalaanne nagaraa atto yaagiyaagaa.” (Kes. 34:6, 7) Ha ufayssiya qaalatun, Yihooway Ba aggenna siiquwaa xeelliyaagan keehi dummabaa Muusessi yootiis. Hegee aybee? Yihooway babaa qonccissiyo wode aggenna siiquwaa bessiyaagaa xalla gidennaan, ‘aggenna siiqoy daridoogaa’ gidiyoogaakka qonccissiis. He qofay Geeshsha maxaafan hara usuppun sohotun odettiis. (Qoo. 14:18; Maz. 86: 13, 15; 103:8; 106:45; Yona. 4:2) He ubba sohotunkka he qofay qonccissiyoy Yihoowa xallappe attin, asa gidenna. Yihooway Geeshsha Maxaafan bana darotoo hegaadan qonccissiyoogee bessiyaaba. w21.11 2-3 ¶3-4

Qassi aqo oyqqidaageeti kiitettida PHeexiroosa hanotaappenne A machchee hanotaappe tamaarana danddayoosona. Kiitettida PHeexiroosi Yesuusaara koyro gayttoosappe usuppun aginaappe biidi issi laytta gakkanaashin deꞌiya wodiyan gitabaa kuuyiis. PHeexiroosi ba soo asawu koshshiyaabaa kunttanawu moliyaa oyqqiyo oosuwaa oottees. Yaatiyo gishshawu, PHeexiroosi ubba wode A kaallanaadan Yesuusi oychchido wode, PHeexiroosi issibaa kuuyiyo wode ba machcheebaa qoppana koshshiis. (Luq. 5:1-11) PHeexiroosi Yesuusaara baanawunne sabbakanawu kuuyiis. PHeexiroosa keettaayyiyaakka I kuuyidoban maayettidoogee qoncce. Yesuusi hayquwaappe denddi simmin, A PHeexiroosaara amarida wodiyawu manddaridoogaa Geeshsha Maxaafay yootees. (1 Qor. 9:5) A loꞌꞌo Kiristtaane machcho gidiyo gishshawu, PHeexiroosi Kiristtaane azinatanne machchota zorido wode laꞌatettan haasayana danddayidoogee qoncce. (1 PHe. 3:1-7) Eti bantta deꞌuwan Kawotettaabaa kaseyikko, etawu koshshiyaabaa Yihooway immanawu gelido qaalan PHeexiroosikka A keettaayyiyaakka ammanettidoogee tuma.—Maa. 6:25, 31-34. w21.11 18 ¶14

Kiitettida PHawuloosi ba ishantta siiqees. I etawu minni oottiis. (Oos. 20:31) A ishanttinne michchontti A keehi siiqidoy hegaassa. Issi wode, Efisoonan deꞌiya cimati aara haranttuwaa mule gayttennaagaa erido wode ‘yeekkidosona.’ (Oos. 20:37) Hegaadan, minni oottiya cimati bantta ishanttanne michchontta keehi siiqoosonanne eta maaddanawu banttawu danddayettida ubbabaa oottoosona. (Pili. 2:16, 17) Gidoppe attin, cimata issi issitoo metiyaabay gakkees. Hegaa xoonanaadan eta aybi maaddana danddayii? Minni oottiya cimati PHawuloosa hanotaa qoppana danddayoosona. Awu asaagaappe aadhdhiya wolqqi baawa. PHawuloosi suurebaa oottanawu issi issitoo metootida nagaranchcha asa. (Roo. 7:18-20) Qassi A daro metoy gakkiis. SHin PHawuloosi hidootaa qanxxibeenna woy ufayttiyoogaa aggibeenna. Cimati PHawuloosa leemisuwaa kaalliyoogan banttana gakkiya metiyaabaa xoonananne Yihoowawu ufayssan haggaazana danddayoosona. w22.03 26 ¶1-2

Wogaabaa 19:3y Sambbataa bonchchiyoogaabaa yootees. Kiristtaaneti Higgiyaa azazettana koshshenna gishshawu, nuuni saaminttaa Sambbataa bonchchokko. Gidikkonne, Israaꞌeelati Sambbataa bonchchido ogiyaappenne yaatiyoogan eti goꞌettido ogiyaappe nuuni darobaa tamaarana danddayoos. Sambbatay oosuwaappe shemppiyo wodenne Xoossaayyo goynniyo wode. kSambbata gallassan Yesuusi ba yelettido kataman deꞌiya Ayhuda woosa keetti biidoynne Xoossaa Qaalaappe nabbabidoy hegaassa. (Kes. 31:12-15; Luq. 4:16-18) Wogaabaa 19:3n deꞌiya “ta Sambbatatakka bonchchite” yaagidi Xoossay yootido azazoy nu galla galla deꞌuwan Xoossaayyo goynnanawu nuuni wodiyaa bazzanaadan nuna denttettana koshshees. He azazuwaa naaganawu issi issibaa giigissana koshshiyaabadan neeyyo siyettii? Yihoowayyo goynnanawu neeni ubbatoo wodiyaa bazzikko, Yihoowaara neeni dabbotido dabbotay minnana; hegee qassi geeshsha gidanawu keehi koshshiyaaba. w21.12 5 ¶13

Yesuusi saꞌan deꞌiyo wode ubba asaara wodiyaa aattees. I duretuuranne wolqqaama asatuura miis; qassi hiyyeesatuuranne naaqettida asatuurakka daro wodiyaa aattiis. Hegaa bollikka, daro asay ‘nagaranchcha’ giyo asatussi I qarettiis. Otorettiya amarida asati Yesuusi oottidoban xubettidosona. I erissiyo ashkkarata eti hagaadan oychchidosona: “Giiraa ekkiyaageetuuranne nagaranchchatuura intte aissi issippe meetii? Qassi aissi issippe uyeetii?” Yesuusi hegaa hachchi gallassaa xiqisiyan deꞌiyaagaadan giidi zaariis. (Luq. 5:29-31) Masee yaanaappe daro layttaa kasetidi, hananabaa yootiya Isiyaasi alamee A ixxanaagaa yootiis. Hiraagan hagaadan odettiis: “I asan karettiisinne ixettiis; . . . I asi a be7anaappe giidi, ba som77uwaa wora zaariyo asadan karettiis; nuunikka a bonchchibookko.” (Isi. 53:3) Masiyaa eti “asi” beꞌanaappe giyo asadan xeellido gishshawu, koyro xeetu layttan deꞌiya Ayhudati I yootiyoobaa siyana koshshennabadan qoppidosona. w21.05 8-9 ¶3-4

Beni wode deꞌida, amarida Kiristtaaneti zoriyaa sohuwaara oosuwan peeshshokkona. (Yaaq. 1:22) Harati dureta dummayidi xeelloosona. (Yaaq. 2:1-3) Harati qassi bantta inxxarssaa naaganawu metootoosona. (Yaaq. 3:8-10) He Kiristtaanetussi gita metoy deꞌikkonne, eti laamettana danddayiyoogaa Yaaqoobi ammanettiis. I kehatettan qoncce zoriyaa zoriis; qassi laamettanawu maadoy koshshiyoogeeti cimata maaduwaa oychchanaadan I minttettiis. (Yaaq. 5:13, 14) Nuuni ay tamaariyoo? Haratu hanotaa akeekikkonne, etabaa loꞌꞌobaa qoppiyoogaa. Nuuni Geeshsha Maxaafaa xannaꞌissiyo daroti ha zoriyaa oosuwan peeshshanawu metootana danddayoosona. (Yaaq. 4:1-4) Iita meezeta aggiyoogeenne loꞌꞌo eeshshati deꞌiyoogeeta gidiyoogee etawu wode ekkiyaaba gidana danddayees. Nuuni xannaꞌissiyoogeeti giigissana koshshiyoobata yootanawu xala gidana koshshees. Qassi nuuni ubbatoo loꞌꞌobaa qoppiyaageeta gidana koshshees, banttana ziqqi oottiya asata Yihooway baakko ehaanaagaanne eti bantta deꞌuwan laamettanaadan eta maaddanaagaa ammanettoos.—Yaaq. 4:10. w22.01 11 ¶11-12

Yihoowagaadan maariyaageeta gidanawu ubba Kiristtaaneti baaxetoosona. Aybissi? Issi gaasoy harata maarennaageetu woosaa Yihooway siyenna gishshataassa. Nuuppe ooninne Yihooway nu woosaa siyennan ixxanaadan koyokko, yaatiyo gishshawu nuuni maarennaageeta gidenna mala naagettana koshshees. Waayettiya nu mala Kiristtaanee yootiyoobaa siyennan ixxana koshshenna, qassi “metootanchcha uraa waasuwaa” siyanawu ubbatoo giigi uttana bessees. Hegaa gishshawu, ha Geeshsha Maxaafaa xiqisiyaa oosuwan peeshshanawu nuussi danddayettidabaa oottana koshshees: “Asa maaribeenna uraa Xoossai maarennan pirddana.” (Yaaq. 2:13) Nuussi maarotay keehi koshshiyoogaa nu nuna ziqqi oottidi hassayikko, maarotettaa bessiyaageeta gidoos. Ubba qassi nagaraa oottida uri gubaaꞌiyaa simmiyo wode maarotettaa loytti bessanawu koyoos. Nuuni maariyaageeta gidanaadaaninne meqettaa iita gidennaadan naagettana mala Geeshsha Maxaafan etabay odettidoogeetu taarikee nuna maaddana danddayees. w21.10 12 ¶16-17

Yesuusi saꞌan ba haggaazuwaa poliyo wurssetta qammi, woossanawunne wotti dentti qoppanawu asi baynna sohuwaa koyiis. Hegawu, Geetesemaane ataakiltte sohuwaa biis. He wode, Yesuusi woosaara gayttidaagan keehi koshshiya issibaa bana kaalliyaageetussi yootiis. Eti Geetesemaane ataakiltte sohuwaa gakkiyo wode, saꞌay qamma bilahe. Yesuusi ba kiittidoogeeta “naagite” giidi woossanawu biis. (Maa. 26:37-39) SHin, I woossiyo wode eti xiskkidosona. Yesuusi eti xiskkidaageeta beꞌidi, ‘naaganaadaaninne Xoossaa woossiyoogaa’ aggennaadan zaarettidikka etawu yootiis. (Maa. 26:40, 41) I eti keehi unꞌꞌettidoogaanne daafuridoogaa akeekiis. Yesuusi etawu qarettidi, “ashoi daafuranchcha” yaagiis. SHin, Yesuusi woossanawu haranttuwaa naaꞌꞌutoo biidi simmiyo wode, eti woossiyoogaa aggidi xiskkidaageeta demmiis.—Maa. 26:42-45. w22.01 28 ¶10-11