Isiine

Nu siiqo Xoossay nuussi haasayiyo imotaa immiis. SHin, asay haasayiyo imotaa bessenna ogiyan goꞌettiis. Seexaanaa Dabloosi Hewaanissi worddotiis, qassi he worddoy asay nagaranchcha gidanaadan oottiis. (Doo. 3:1-4) Addaamee ba mooruwaa Hewaaninne Yihoowan gaasoyido wode ba inxxarssaa bessenna ogiyan goꞌettiis. (Doo. 3:12) Qaayeeli ba ishaa Aabeela wori simmidi Yihoowassi worddotiis. (Doo. 4:9) Ha wodiyan deꞌiya daro pilimetun amarida iita qaalay deꞌees. Tamaareti timirtte keettan, qassi gasttati ooso sohuwan iita qaalaa siyoosona. Nuuni naagettana xayikko, siyiiddi takkido iita qaalata goꞌettiyoogaa doommana danddayoos. Nuuni Kiristtaane gidiyoogaadan, Yihoowa ufayssana koyiyo gishshawu, iita qaalaa mule goꞌettokko. SHin nuuni haasayiyo imotaa nu Xoossaa sabbanawu loꞌꞌo ogiyan goꞌettana koshshees. w22.04 4 ¶1-3

Yesuusi aquwaabaa bessiyaagaadan xeelliis. I miyoogaaninne uyiyoogan ufayttiis. (Luq. 19:2, 6, 7) Issi wode, haattaa ayfe woyne eessaa oottiis; hegee I oottido maalaalissiyaabatuppe koyroogaa. (Yoh. 2:10, 11) Qassi I hayqqiyo gallassi alꞌꞌo maayuwaa maayiis. (Yoh. 19:23, 24) SHin, Yesuusi ba deꞌuwan aquwaabaa xoqqu ootti xeellibeenna. Nuuni Kawotettaabaa kaseyikko, Yihooway nuussi koshshiyaabaa immanaagaa Yesuusi tamaarissiis. (Maa. 6:31-33) Daroti miishshaa xeelliyaagan Yihooway zorido loꞌꞌo zoriyaa oosuwan peeshshido gishshawu goꞌettidosona. Daaneela giyo aqo oyqqibeenna ishaa hanotaa qoppa. I hagaadan giis: “Taani yelagatettan ta deꞌuwan Yihoowa haggaazuwaa aybippenne kaseyanawu kuuyaas.” Daaneeli ba deꞌuwaa sima oottido gishshawu, daafaban qohettidaageeta maaddiisinne Beeteelen haggaaziis. I gujjidi hagaadan giis: “Yihooway taassi immido anjjotuura ayba miishshikka laggetana danddayenna.” w22.05 21-22 ¶6-7

Nuuni Geeshsha Maxaafaanne Geeshsha Maxaafaa qofay deꞌiyo xuufeta ubbatoo nabbabiyoogan tumaa siiqiyoogaa bessana danddayoos. Nuuni tuman deꞌido wodee ay keena gidikkokka, ubbatoo tamaarana bessiya darobay deꞌees. Xannaꞌanawu baaxetana koshshees, shin yaatiyoogee maaddiyaaba. Nuuppe daroti nabbabanawunne xannaꞌanawu dosokko. SHin tumaa loytti akeekanawu aggennan ‘koyanaadan’ Yihooway nuna minttettees. (Lee. 2:4-6) Nuuni yaatiyaaba gidikko ubbatoo goꞌettoos. Koori Geeshsha Maxaafaa nabbabiyoogaara gayttidaagan issi xiqisiyaa xallaa I wudidi xeelliyoogaa yootiis. I hagaadan giis: “Taani tohossa qofata ubbaa nabbabays, geeddarssanawu imettida xiqiseta xeellays, qassi gujjada pilggays. . . . Hegaadan xannaꞌidoogee taani darobaa eranaadan maaddiis!” Nuuni xannaꞌanawu goꞌettiyoy ha hiillaa woy hara hiillaa gidin, nu wodiyaanne wolqqaa goꞌettidi xannaꞌiyoogan tumaa nashshiyoogaa bessoos.—Maz. 1:1-3. w22.08 17 ¶13; 18 ¶15-16

Yesuusi saꞌan deꞌiyo wode, ba erissiyo ashkkarata meretaa goꞌettidi ba Aawaabaa tamaarissiis. I tamaarissido timirttiyappe issuwa akeeka. Yihooway ubba asaa siiqees. Maatiyoosa 5-7n Yesuusi tamaarissidoban, daro asay keehi koshshiyaabadan qoppenna, awaanne iraa xeelliyaagan ba erissiyo ashkkarata tamaarissiis. Ha naaꞌꞌubatikka nuuni deꞌuwan deꞌanawu keehi koshshiyaabata. Yihooway bawu goynnenna asati awaappenne iraappe goꞌettennaadan diggana danddayees. SHin, I siiqoy denttettin ubba asawu awaanne iraa immees. (Maa. 5:43-45) Nuuni ubba asaa siiqanaadan Yihooway koyiyoogaa Yesuusi ba erissiyo ashkkarata tamaarissanawu awaanne iraa goꞌettiis. Nuuni awa ayfee wulliyoogaa woy iray bukkiyoogaa beꞌidi ufayttiyo wode ubban, Yihooway ubba asaa siiqiyoogaa qoppana danddayoos. A leemisoy, ubba asawu mishiraachchuwaa yootiyoogan nuunikka aagaa mala siiquwaa bessanaadan nuna maaddees. w23.03 17 ¶9-10

Kiitettida Yohaannisi garamettidoy aybissee? Issi mishiriyaa zoꞌo doꞌaa toggaasu. A gita ‘shaaramuxa,’ qassi I sunttay “Gita Baabiloono.” A ‘saꞌan deꞌiya kawotuura shaaramuxaasu.’ (Ajj. 17:1-5) ‘Gita Baabiloona’ oonee? Ha mishiriyaa deriyaa haariyaageetuura shaaramuxidoogaa Ajjuutaa maxaafay yootiyo gishshawu, A polotikaa dirijjitiyaa qonccissiyaaba gidukku. (Ajj. 18:9) Qassi A doꞌaa toggidoogee haariyaageeta ba koyiyoogaadan oottanawu maliyoogaa bessees. Hegaa bollikka, A Seexaanaa alamiyan deꞌiya yaaretiya zalꞌꞌiya dirijjiteta qonccissukku. Eti Ajjuutaa maxaafan harasan ‘saꞌan deꞌiya zalꞌꞌanchchata’ geetettidosona. (Ajj. 18:11, 15, 16) Beni Baabiloona worddo goynuwawu denddo soho. Hegaa gishshawu, Gita Baabiloona worddo goyno ubbaa bessiyaaba gidennan aggukku. A worddo haymaanoote ubbaa xaaxa waaxawusu.—Ajj. 17:5, 18. w22.05 11 ¶14-16

Issi aayyiyaa, ‘Ba naati Yihoowayyo goynnanee?’ gaada issi issitoo qoppiyoogee wottin deꞌiyaaba. Yelidaageeti Seexaanaa alamee bantta naata ay keenaa qohiyaakko eroosona. Hegaa bollikka, bantta naata banttarkka dichchiyoogee woy Yihoowayyo goynnenna azinaara dichchiyoogee daro aayota metiyaaba. Bantta naati Yihoowa siiqanaadan maaddanawu metootiyay bantta aqo laggeti Yihoowayyo haggaazenna yelidaageetu xalla gidokkona. Aawaynne aayyiyaa Yihoowayyo haggaaziyo wodekka, bantta naati Yihoowayyo haggaazanaadan maaddiyoogee etassi metiyaaba gidana danddayees. Ayba hanotankka keehi unꞌꞌettoppite. Yihooway inttena maaddana. So Asaa Goynuwaa wode xannaꞌanawu giigida miishshata waati goꞌettanaakko, meezee deꞌiyo yelida harata oychchana danddayeeta. (Lee. 11:14) Intte naatuura intte haasayiyo wodekka Yihooway inttena maaddana danddayees. Intte naatu qofaanne eta wozanan deꞌiyaabaa intte erana mala Yihooway inttena maaddanaadan woossite..—Lee. 20:5. w22.04 17 ¶4, 7; 18 ¶9

Yesuusi wottiyoobi baynna ogiyan ba Aawaa eeshshaa bessiis. Nuuni Yesuusa loytti eriyo wode kaseegaappe aaruwan Yihoowa loytti siiqana. (Ibr. 1:3) Oyddu Wonggeleta xannaꞌiyoogee Yesuusa loytti eriyo issi oge. Neeni ubba galla Geeshsha Maxaafaa nabbabiyoogaa hanno gakkanawu doommana xayikko, Yesuusabaa yootiya ha taarikiyaa nabbabiyoogan haꞌꞌi doommana danddayaasa. Yesuusabaa yootiya taariketa nabbabiyo wode, A eeshshata loytta akeeka. I harati A haasayissanawu yashshennaagaa; qassi qaretan guutta naata qoommees. (Mar. 10:13-16) Yesuusi kehanne siiqiyaagaa gidiyo gishshawu, erissiyo ashkkarati aynne yayyennan banttawu siyettiyaabaa awu yootoosona. (Maa. 16:22) Yaatiyoogan, Yesuusi saluwan deꞌiya ba Aawaa milatiis. Yihoowaykka harati haasayissanawu yashshennaagaa. Nuuni woosan A haasayissana danddayoos. Nuuni woossiyo wode nuuyyo siyettiya ubbabaa awu yootana danddayoos. I nuna borennaagaa ammanettoos. I nuna siiqees; qassi nuuyyo qoppees.—1 PHe. 5:7. w22.08 3 ¶4-5

Yihooway nuna Medhdhidaagaa gidiyo gishshawu, nubaa ubbabaa erees. Ane hagaa qoppa! I saꞌan deꞌiya ubba asaabaa ubbabaa erees. (Maz. 139:15-17) Hegaa gishshawu, nuna yelidaageetuppe nuuni laattido nagaraa I akeekees. Ubba qassi, I nuussi haꞌꞌi deꞌiyaagaa mala eeshshay deꞌanaadan oottidabaa erees. Yihooway nubaa loytti eriyo gishshawu waatii? Hegee I nuuyyo atto gaanaadan oottees. (Maz. 78:39; Maz. 103:13, 14) Yihooway atto gaanawu keehi koyiyoogaa bessiis. Koyro bitanee, Addaamee oottidobaa gaasuwan nuuni nagaranchcha gidiyoogaanne wurssettan hayqqiyoogaa I erees. (Roo. 5:12) Nuuni nuna woy hara uraa nagaraappenne hayquwaappe ashshanawu aybanne oottana danddayokko. (Maz. 49:7-9) Gidoppe attin, nu siiqo Xoossay qarettido gishshawu nuna laꞌa kessanawu issibaa oottiis. Yohaannisa 3:16y yootiyoogaadan, Yihooway ba mexi issi Naꞌay nu gishshawu hayqqanaadan kiittiis.—Maa. 20:28; Roo. 5:19. w22.06 3 ¶5-6

Nuuni haratuyyo atto giikko, Yihooway nuuyyo atto gaanaagaa I Iyyoobawu yootidoban qonccissiis. He ammanettida bitanee Elifaaza, Bilddaadanne Xoofaara geetettiya heezzu asati haasayido iitaban keehi qohettiis. Iyyoobi eta gishshaa woossanaadan Yihooway awu yootiis. Iyyoobi woossi simmin, Yihooway A anjjiis. (Iyy. 42:8-10) Uluwan lancciyaa oyqqiyoogee qohees. Lanccee deexo tooho mala gidiyo gishshawu, nuuni uluwan lancciyaa oyqqiyoogaa aggidi sarotettan deꞌanaadan Yihooway koyees. (Efi. 4:31, 32 ) ‘Hanqquwaa agganaadaaninne yiilluwaappe teqettanaadan’ I nuna zorees. (Maz. 37:8) Nuuni he zoriyaa kaallikko hegee nuna maaddana. Nuuni issi uraa bolli uluwan lancciyaa oyqqiyo wode, hegee nuna asatettaaninne qofan qohana danddayees. (Lee. 14:30) Nuuni marzziyaa uyikko hegee hara uraa qohennaagaadan, nuuni he uraa bolli uluwan lancciyaa oyqqikko hegee A qohenna. SHin, nuuni haratuyyo atto giyo wode, nuuyyo imotaa immoos. Nuuni sarotettaa demmoosinne aggennan Yihoowawu haggaazoos. w22.06 10 ¶9-10

Birata qophiyaadan nu hidootay nu qofaa naagees, qassi nuuni Yihoowaara dabbotido dabbotaa moorana danddayiya, nubaa xallaa qoppiyoogaappe naagees. (1 Qor. 15:33, 34) Nu hidootay nuuni Yihoowa mule ufayssana danddayokko giidi qoppiyoogaappe naagettanaadankka maaddees. Iyyooba minttettiyaaba milatiya worddo laggee Elifaazi hegaara issi malabaa yootidoogaa hassaya. Elifaazi hagaadan giis: “Asi Xoossaa sinttan geeshsha gidanau danddayii?” I gujjidi Xoossaa xeelliyaagan hagaadan giis: “Be7a, Xoossai ba kiitanchchatunkka ammanettenna; harai atto salotikka a sinttan geeshsha gidokkona.” (Iyy. 15:14, 15) Hegee bulla worddo! Neeni hegaadan qoppanaadan koyiyay Seexaanaa gidiyoogaa hassaya. Neeni ubbatoo hegaadan qoppikko ne hidootay xayanaagaa I erees. Yaatiyo gishshawu, he wordduwaa eqetta. Neeni merinaa deꞌuwaa demmanaadan Yihooway koyiyoogaanne, hegaa demmanaadan I nena maaddanaagaa mule siroppa.—1 Xim. 2:3, 4. w22.10 25-26 ¶8-10

Iyyoobi bana metoy gakkiyoy Yihooway banan ufayttibeenna gishshataassa giidi qoppanaadan Seexaanay koyiis. Leemisuwawu, Seexaanay Iyyooba naati tammay issippe qumaa miiddi deꞌiyo keettaa xayssanawu wolqqaama gotiyaa goꞌettiis. (Iyy. 1:18, 19) Qassi I tamay saluwaappe wodhdhidi Iyyooba mehetu xalla gidennan, mehiyaa heemmiya ashkkaratakka maanaadan oottiis. (Iyy. 1:16) Goteenne tamay saluwaappe yiido gishshawu, hegee Yihoowappe yiis giidi Iyyoobi qoppiis. Hegaappe denddidaagan, Iyyoobi Yihoowa azzanttiyaabaa oottaas giidi qoppiis. Gidoppe attin, Iyyoobi saluwan deꞌiya ba Aawaa qanggibeenna. Loꞌꞌo gidida darobaa Iyyoobi daro layttawu Yihoowappe ekkidoogaa erees. Hegaa gishshawu I loꞌꞌobaa ekkikko, iitabaakka ekkanawu eeno gaana bessees giidi qoppiis. Yaatiyo gishshawu I hagaadan giis: “GODAA sunttai galatetto.”—Iyy. 1:20, 21. w22.06 21 ¶7

Yesuusi bana kaalliyaageetuyyo Yohaannisa 17:14n deꞌiya hegaara issi malabaa yootiis. He hiraagay aadhdhida 100 layttan polettidoogaa nuuni loytti akeekoos. Waani polettidee? Yesuusi 1914n Mase Kawo gididi haariyoogaa doommidi darin takkennan, Seexaanaa saluwaappe duge saꞌawu oliis. Seexaanay saluwaa haꞌꞌi simmana danddayenna; qassi xayana wodiyaa naagiiddi deꞌees. (Ajj. 12:9, 12) SHin I hanno gakkanawu coo uttiigibeenna. Seexaanay keehi hanqqettido gishshawu, Xoossaa asaa qohiiddi deꞌees. (Ajj. 12:13, 17) Seexaanaa alamee awudeegaappekka aaruwan nuna ixxiyoy hegaassa. SHin Seexaanaassinne A kaalliyaageetussi nuuni yayyana koshshenna. Nuunikka kiitettida PHawuloosaagaadan ammanoos. I hagaadan giis: “Xoossai nu bagga gidikko, nuna oonee qohanai?” (Roo. 8:31) Nuuni nu kumetta wozanaappe Yihoowan ammanettoos. w22.07 18 ¶14-15

Yesuusi wurssettaa wodiyan he oosuwawu gidiya oosanchchati deꞌokkona giidi hirggibeenna. Ayssi giikko, mazamuraawee, “Neeni ne morkketuura olettiyo gallassi ne asai eeno gaana” giidi yootido hiraagay polettanaagaa I erees. (Maz. 110:3) Neeni sabbakuwaa oosuwaa oottiyaaba gidikko, Yesuusaaranne ammanettida ashkkaraara hashetaasa, qassi ha hiraagay polettanaadan maaddaasa. Ha oosoy oosettiiddi deꞌiyaaba gidikkokka, metiyaabati deꞌoosona. Kawotettaa mishiraachchuwaa yootiyaageeta gakkiya issi metoy harati eqettiyoogaa. Kaddidaageeti, haymaanootiyaa kaalettiyaageetinne polotikaa asati nu oosuwaabaa darotuyyo wordduwaa yootoosona. He worddo odoy balettin nu dabboti, nu eriyoogeetinne nunaara oottiyaageeti nuuni Yihoowawu haggaazennaadaaninne sabbakennaadan wolqqanttana danddayoosona. Issi issi biittatun, nu morkketi nu ishanttanne michchontta yashissoosona, keehi shocoosona, ubba qassi qachchoosona. w22.07 8 ¶1; 9 ¶5-6

Nuuni ubbatoo Geeshsha Maxaafaa nabbabanawunne nabbabidobaa takki giidi qoppanawu wodiyaa bazzanaadan Yihooway koyees. Nuuni eridobaa oosuwan peeshshiyo wode, nu ammanoy minnees, qassi saluwan deꞌiya nu Aawaakko kaseegaappe aaruwan shiiqoos. Hegaappe denddidaagan, nuna gakkiya metuwaa minnidi genccoos. Yihooway ba Qaalan ammanettiyaageetussi ba geeshsha ayyaanaakka immees. He geeshsha ayyaanay nuuni ay metuwaakka genccanaadan “ubbaappe aadhdhiya [wolqqaa]” nuussi immees. (2 Qor. 4:7-10) Yihooway maaddin, ‘ammanettida wozannaama ashkkaray’ nu ammanuwaa minttananne kaseegaappe aaruwan Yihoowakko shiiqidi deꞌanaadan maaddana danddayiya daro xuufeta, biidotanne muuziqata giigissees. (Maa. 24:45) Unꞌꞌissiya wodiyan issoy issuwaara siiqettanaadaaninne issoy issuwaa minttettanaadan Yihooway ba asaa loohissiis. (2 Qor. 1:3, 4; 1 Tas. 4:9) Nu ishanttinne michchontti metoy nuna gakkiyo wode ammanettidi deꞌanaadan nuna maaddanawu koyoosona. w22.08 12 ¶12-14

Nuuni nu ishanttussinne michchonttussi deꞌiya loꞌꞌo eeshshaa yootiyoogan eti issoy issuwaara dabbotaa minttanaadaaninne loytti siiqettanaadan maaddoos. Issi issitoo kayma Kiristtaanetikka issoy issuwaara ooyettana woy palamettana danddayoosona. Kiitettida PHawuloosi ba mata laggiyaa Barnnaabaasaara ooyettiis. Eti naaꞌꞌantto misoonaawe buussan Marqqoosa banttanaara efanaakko agganaakko maayettibookkona. “Eta gidduwan pala ooshshai” kiyido gishshawu, eti issippe beennan agganawu kuuyidosona. (Oos. 15:37-39) SHin PHawuloosi, Barnnaabaasinne Marqqoosi zaarettidi bantta giddon sarotettay deꞌanaadan oottidosona. PHawuloosi guyyeppe Barnnaabaasabaanne Marqqoosabaa loꞌꞌobaa yootiis. (1 Qor. 9:6; Qol. 4:10) Nuunikka gubaaꞌiyan deꞌiya haratuura merettana danddayiya ay metuwaakka giigissananne etawu deꞌiya loꞌꞌo eeshshan ubbatoo xeelaa wottana koshshees. Nuuni yaatiyoogan, gubaaꞌiyan sarotettaynne issippetettay deꞌanaadan oottoos. w22.08 23 ¶10-11

Nuuni Yihooway kessido xillotettaa maaraadan deꞌanawu baaxetiiddi deꞌikko, haratu bolli pirddiyoogaappenne haratuppe aadhdhays giidi qoppiyoogaappe naagettana koshshees. “Ha sa7aa ubbaa pirddiyaagee” Yihoowa gidiyoogaa nuuni hassayana koshshees. (Doo. 18:25) Haratu bolli pirddiyo maataa Yihooway nuussi immibeenna. Xillo asa gidida Yooseefabaa ane beꞌa. I bana keehi naaqqida asatu bollikka pirddibeenna. A ishantti A dechchidosona, aylletettawu A bayzzidosonanne Yooseefi hayqqiis giidi bantta aawaa ammanttidosona. Daro layttaappe simmin, Yooseefi bantta soo asaara zaarettidi gayttiis. Haꞌꞌi Yooseefi deriyaa hariyaagaa gidiyo gishshawu, ba ishantta meqetti baynna ogiyan pirddananne haluwaa kiyana danddayees. Yooseefa ishantti bantta oottidobawu wozanappe azzanikkokka, I banttana qohana danddayees giidi hirggidosona. SHin Yooseefi etawu hagaadan giis: “Yayyoppite; tana intteyyo Xoossaa giidetiiyye?” (Doo. 37:18-20, 27, 28, 31-35; 50:15-21) Yooseefi pirddaa Yihoowawu aggi bayiis. w22.08 30 ¶18-19

Issi uri wozanappe woossido woosaa Yihooway ne baggaara zaarana danddayiyoogaa eray? Neeni gubaaꞌe cima, gubaaꞌiyawu oottiyaagaa, aqinye woy aassiyaagaa gidin, maaddana danddayaasa. Qassi neeni yelaga gidin gastta, woy isha gidin michcho gidin maaddana danddayaasa. Yihoowa siiqiya issi uri maaduwaa A oychchikko, darotoo cimatunne hara ammanettida ashkkaratu baggaara he uraa nu Xoossay keehi ‘maaddees’ woy minttettees. (Qol. 4:11) Hegaadan Yihoowawunne nu ishanttussi oottiyoogan keehi ufayttoos! Ubbasaa gakkiya harggee denddiyo wode, qassi daafabay woy yedetay gakkiyo wode nuuni nu ishantta maaddananne minttettana danddayoos. Nuuni harata maaddanawu koyana danddayoos, shin nu soo asaa yarati sahettiiddi deꞌikko, yaatiyoogee metiyaaba gidana danddayees. Nu ishantta maaddanawu koyidi nuussi danddayettidabaa oottiyo wode Yihooway ufayttees.—Lee. 19:17. w22.12 22 ¶1-2

Siiqoy ammanettiyaageeta gidanawu keehi maaddiya eeshsha. Yesuusi ubbaappe gitatiya naaꞌꞌu azazoti Yihoowa siiqiyoogaanne nu shooruwaa siiqiyoogaa gidiyoogaa yootiis. (Maa. 22:37-39) Nuuni Yihoowa siiqiyo gishshawu ammanettiyoogaara gayttidaagan A milatana koyoos. Leemisuwawu, nuuni nu ishanttanne michchontta siiqiyoogee eta xuuraa haratussi yootennaadan oottees. Nuuni eta qohiyaabaa, yeellayiyaabaa woy azzanttiyaabaa mule oottanawu koyokko. Ammanettiyaageeta gidanawu nuna ziqqi oottiyoogeekka maaddees. Bana ziqqi oottiya Kiristtaanee issibaa haratuppe kasetidi yootiyoogan harati bana sabbanaadan oottanawu baaxetenna. (Pili. 2:3) I haratussi yootanawu bessenna xuurabaa eriyaabadan harati qoppanaadan oottanawu baaxetenna. Nuna ziqqi oottiyoogee nuuni Geeshsha Maxaafan woy nu xuufetun qonccibeenna issi allaalliyaa xeelliyaagan nu qofaa daro asawu yootiyoogaappe naagettanaadan maaddees. w22.09 12 ¶12-13

Daaneela maxaafan odettida hiraagaa Xoossaa asay loytti akeekanaagaanne “iitatuppe issi urinne” hegaa akeekennaagaa issi kiitanchchay Daaneelawu yootiis. (Dane. 12:10) Ha wodiyan nuuni iitatu bagga gidennaagaa nu oottiyooban bessana koshshees. (Mil. 3:16-18) Yihooway ‘baassi dummatida asadan’ xeelliyo hegeekka, awu alꞌꞌo gididaageeta shiishshiiddi deꞌees. Nuuni etappe issuwaa gidanawu koyiyoogee qoncce. Nuuni keehi ufayssiya wodiyan deꞌoos. SHin hagaappe aaruwan ufayssiyaabay hanana. Mata wode iitati ubbay xayishin nuuni beꞌana. Hegaappe simmin, Yihooway Daaneelawu yootidobay polettiyoogaa nuuni beꞌana: “Gallassatu wurssettan nena gakkiya laataa ekkanau denddana.” (Dane. 12:13) Daaneelinne ne siiqiyo harati “denddana” wodiyaa yeemuwan naagay? Yaatikko, ha wodiyan ammanettada deꞌanawu neeyyo danddayettida ubbabaa ootta; qassi Yihoowa deꞌo maxaafan ne sunttay xayenna hanotan xaafettanaagaa ammanettana danddayaasa. w22.09 24 ¶17; 25 ¶19-20

Ha qofay Hizqqeela minttettennan waayi aggana. Aybissi? Gaasoykka, Muuseenne Isiyaasi Yihooway kiittin hananabaa yootiyaageeta gidanaadan doorettido wode, etawu giidobaara issi malabaa awu giidoogaa Hizqqeeli hassayennan aggenna. (Kes. 3:10; Isi. 6:8) He hananabaa yootiyaageeti banttawu imettida deexxiya oosuwaa polanaadan Yihooway maaddidoogaakka Hizqqeeli erees. Yaatiyo gishshawu, “Taani nena . . . kiittais” giidi Yihooway Hizqqeelawu naaꞌꞌutoo yootidoogee, I Yihoowa maaduwan ammanettanaadan oottiya loꞌꞌo gaaso. Qassi Hizqqeela maxaafan, hagaadan giya qofay daro sohuwan deꞌees: “GODAA qaalai taakko hagaadan yaagiiddi yiis.” (Hiz. 3:16; 6:1) Hizqqeeli Yihooway A kiittidoogaa ammaniis. Qassi, Hizqqeela aaway qeese gidiyo gishshawu, Yihooway hananabaa yootiyaageeta maaddana giidi darotoo yootidoogaa I Hizqqeela tamaarissennan aggenna. Leemisuwawu, Yihooway Yisaaqawu, Yaaqoobawunne Ermmaasawu “Taani nenaara de7ais” giidi yootiis.—Doo. 26:24; 28:15; Erm. 1:8. w22.11 2 ¶3

Addaameenne Hewaana nagaraa oottidoogee eta naati wurssettan hayqqanaadan oottikkonne, Yihooway ba halchchuwaa laammibeenna. (Isi. 55:11) I haꞌꞌikka bawu ammanettida asatussi merinaa deꞌuwaa immanawu halchchi uttiis. Yihooway ba halchchuwaa polanawu yootidobatanne oottidobata akeeka. Yihooway hayqqidaageeta denttidi etawu merinaa deꞌuwaa immanawu qaalaa geliis. (Oos. 24:15; Tii. 1:1, 2) Hayqqidaageeta denttanawu Yihooway keehi koyiyoogaa ammanettida bitanee Iyyoobi erees. (Iyy. 14:14, 15) Asay merinawu deꞌanawu hayquwaappe denddanaagaa hananabaa yootiya Daaneeli erees. (Maz. 37:29; Dane. 12:2, 13) Yesuusa wode deꞌida Ayhudatikka Yihooway ammanettida ba ashkkaratussi “merinaa de7uwaa” immanaagaa eroosona. (Luq. 10:25; 18:18) Yesuusi dendduwaabaa darotoo yootiis, qassi A Aaway A hayquwaappe denttiis.—Maa. 19:29; 22:31, 32; Luq. 18:30; Yoh. 11:25. w22.12 4-5 ¶8-9

Yihooway nuuni akko shiiqanaadan shoobbees. (Yaaq. 4:8) I nu Xoossa, nu Aawanne nu Dabbo gidanawu koyees. I nu woosaa zaareesinne meto wodiyan nuna maaddees. Qassi I ba dirijjitiyaa baggaara nuna tamaarisseesinne naagees. Nuuni Yihoowa woossiyoogan, A Qaalaa nabbabiyoogaaninne hegaa wotti dentti qoppiyoogan Yihoowakko shiiqana danddayoos. Yaatiyoogan, A loytti siiqoosinne nashshoos. Bonchchoynne sabay awu bessees; qassi yaatanawu nuuni keehi koyoos. (Ajj. 4:11) Nuuni Yihoowa loytti eriyo wode, aaninne nuna maaddanawu I immido dirijjitiyan loytti ammanettoos. SHin Dabloosi nuuni Yihoowaaninne A dirijjitiyan ammanettiyoogaa leddan leddan agganaadan oottanawu baaxetees. SHin nuuni A hiillata eqettana danddayoos. Nu ammanoy mino gidikko, qassi Yihoowan loytti ammanettikko, nu Xoossaanne A dirijjitiyaa mule aggokko.—Maz. 31:13, 14. w22.11 14 ¶1-3    

Tumu Kiristtaaneti daroti Ubbaa Haariya Yihoowa siiqiyo gishshawu, bantta laꞌatettaa aggibayidosona; ubba qassi bantta shemppuwaa sheneho giidosona. He tumu Kiristtaaneti Yihoowawu ammanettidi deꞌanawu murttidosona. Eta hanotay Ubbaappe Xoqqiya Xoossawu ammanettidi deꞌido gishshawu, itoone tamaappe attida heezzu Ibraawetuugaa mala. Mazamuraawee Daawiti Xoossaayyo ammanettidi deꞌiyoogee keehi koshshiyoogaa xeelliyaagan hagaadan giis: “GODAI dere asatu bolli pirddees. Abeet GODAU, taayyo ta xillotettaadaaninne ta suuretettaadan pirdda.” (Maz. 7:8) Daawiti gujjidi hagaadan giis: “Suuretettainne tumatettai tana naago.” (Maz. 25:21) Yihoowawu ammanettidi deꞌanawu ubbaappe aadhdhiya ogee, awudenne awu ammanettidi deꞌiyoogaa! Yaatikko, hagaadan giida mazamuraawiyaagaadan nuuyyookka siyettana: “Boree bainnaageetinne GODAA higgiyaadan hemettiyaageeti anjjettidaageeta.”—Maz. 119:1. w22.10 17 ¶18-19

Iyyoobi ba deꞌuwan haasayido haasaya ubbaappe I Xoossaa Yihoowaara haasayido haasayay keehi maalaalissiyaaba. He haasayan, Yihooway ba medhdhido keehi maalaalissiyaabatuppe amaridaageeta Iyyoobi beꞌanaadan yootiis. Hegee Iyyoobi Yihooway aadhdhida eranchcha gidiyoogaa eranaadaaninne ba ashkkaratussi koshshiya ubbabaa I kunttiyoogaa mintti ammananaadan maaddiis. Leemisuwawu, Xoossay mehiyawu doꞌawu koshshiyaabaa kunttiyo gishshawu, ayyookka koshshiyaabaa kunttana danddayiyoogaa Iyyooba hassayissiis. (Iyy. 38:39-41; 39:1, 5, 13-16) Iyyoobi meretatubaa loytti qoppiyoogan, ba Xoossaa eeshshatubaa darobaa tamaariis. Nuunikka Xoossay medhdhidobata loyttidi akeekiyo wode, kaseppe aaruwan abaa erana danddayoos. SHin issi issitoo hegaadan oottiyoogee nuna metana danddayees. Nuuni kataman deꞌiyaaba gidikko, Yihooway medhdhido darobata ubba galla beꞌennan aggana danddayoos. Nuuni gaxariyan deꞌiyaaba gidikkonne, meretaabaa xannaꞌanawu nuuyyo wodee baynnabadan qoppana danddayoos, shin meretaabaa akeekanawu wodiyaa bazziyoogeenne baaxetiyoogee goꞌꞌees. w23.03 15 ¶1-2

Wurssettay yaanaappe kase, ‘biittay wolqqappe qaaxxanaagaanne’ hara daafabati gakkanaagaa Yesuusi yootiis. (Luq. 21:11) Ha wodiyan haniiddi deꞌiyaagaadan ‘makkalay daranaagaakka’ I yootiis. Leemisuwawu, danobaa, makkalaanne shabbirssiyaageeti qohiyoogaa nuuni beꞌoos. (Maa. 24:12) Hegaa mala metoy Yihoowawu goynnenna asatu xallaa gakkana giidi Yesuusi mule yootibeenna. Yihoowawu ammanettidi haggaaziyaageetuppe darotakka hegaa mala daafabay gakkees. (Isi. 57:1; 2 Qor. 11:25) Nuna gakkana danddayiya daafabaa ubbaappe maalaalissiya ogiyan Yihooway nuna naagennaba gidikkonne, nuuni woppu gaanaadan nuussi koshshiya ubbabaa I immana. Nuuni qoppibeennabay gakkiyo wodiyawu kasetidi giigettikko, woppu gaanawu darin metootokko. SHin kasetidi giigettiyoogee nuuni Yihoowan ammanettennaagaa bessiyaabee? CHii. Daafabay gakkiyo wodiyawu kasetidi giigettiyoogee, I nuussi koshshiyaabaa kunttanaagaa nuuni ammaniyoogaa bessiyaaba. Waatidi? Gakkana danddayiya daafabawu nuuni kasetidi giigettanaadan Geeshsha Maxaafay zorees. w22.12 18 ¶9-10

Yooseefi qashuwan deꞌiyo wode, Yihooway Gibxxe kawoy unꞌꞌissiya naaꞌꞌu aymota aymottanaadan oottiis. Yooseefi aymota birshshana danddayiyoogaa kawoy erido wode, kiittidi A xeesissiis. Yihooway maaddin Yooseefi he aymota birshshiis; qassi I zorido maaddiya zoriyan Paarooni maalaalettiis. Yihooway he yelagaara deꞌiyoogaa Paarooni akeekido wode, Gibxxe biitta ubban A kattaa alaafe oottidi sunttiis. (Doo. 41:38, 41-44) Guyyeppe, Gibxxeeninne Yooseefantta so asay deꞌiyo Kanaanen wolqqaama koshay denddiis. Yooseefi bantta soo asay koshaappe attanaadan oottidoogee Masee yaana zaree xayennaadan maaddiis. Yooseefawu ubbabay injjetanaadan oottiday Yihoowa gidiyoogee qoncce. Yooseefa ishantti A woranawu koyikkonne Yihooway ba halchchuwaa polanawu hanotaa laammiis. w23.01 17 ¶11-12

Ba oottiyooban naagettiya uri Yihoowaara dabbotido dabbotaa moorana danddayiya aybanne akeekees; qassi hegaappe naagettanawu baaxetees. Yaatiyoogan, I ubbatoo Xoossaa siiquwan deꞌees. (Lee. 22:3; Yih. 20, 21) Kiitettida PHawuloosi Kiristtaaneti oottiyooban naagettana koshshiyoogaa yootiis. Leemisuwawu, Efisoonan deꞌiya Kiristtaanetussi I hagaadan yootiis: “Intte waani de7iyaakko akeekite; aadhdhida eratettaara de7iya asadan de7iteppe attin, aadhdhida eratetti bainna asadan de7oppite.” (Efi. 5:15, 16) Seexaanay nuuni Yihoowaara dabbotido dabbotaa ubbatoo mooranawu koyiyo gishshawu, nuuni A qohuwaappe naagettanawu ‘Yihooway koyiyoobay aybakko akeekanaadan’ Geeshsha Maxaafay zorees. (Efi. 5:17) Nuuni loꞌꞌobaa kuuyanawu ‘Yihooway koyiyoobay aybakko’ akeekana koshshees. Ubbatoo Xoossaa Qaalaa nabbabiyoogaaninne hegaa wotti dentti qoppiyoogan yaatana danddayoos. Nuuni Yihooway koyiyoobay aybakko loytti akeekiyo wodenne “nuussi Kiristtoosa wozanai” deꞌanaadan baaxetiyo wode, nuuni oottanabaa qoncciyan yootiya higgee baynna wodekka ‘aadhdhida eranchcha’ asadan deꞌana danddayoos.—1 Qor. 2:14-16. w23.02 16-17 ¶7-9

Intte intte keettaa ubbatoo geeshsheetii? Intte ooratta keettaa gelanaappe kase hegaa loytti geeshshennan waayi aggana. SHin intte zaarettidi mule geeshshennaba gidikko aybi hananee? Sohuwaara keettay zaarettidi baanattananne moorettidaban kumana danddayees. Intte keettay ubbatoo geeshsha gidanaadan intte muletoo geeshshana koshshees. Hegaadankka, nuuni ubbatoo nu qofaanne nu eeshshaa laammanawu baaxetana koshshees. Nuuni xammaqettanaappe kase “nu ashuwaanne nu shemppuwaa tunissiya ubbabaappe nu huuphiyaa” geeshshanawu nu deꞌuwan koshshiyaaban laamettanawu minni oottidoogee qoncce. (2 Qor. 7:1) SHin, kiitettida PHawuloosi nuuni ubbatoo ‘ooraxxanaadan’ zorido zoriyaa haꞌꞌi oosuwan peeshshana koshshees. (Efi. 4:23) Ha alamee Yihoowa sinttan nuuni geeshsha gidennaadan oottana danddayees. Nuuni ubbatoo Yihoowa ufayssanawu nu qoppiyoobaa, nu eeshshaanne nu amottiyoobaa muletoo pilggana koshshees. w23.01 8 ¶1-2     

Yesuusi tamaarissiyo wode siyiyoogee ay keena ufayssiyaabakko qoppa. I Geeshsha Maxaafaa xiqiseta darotoo hassayidi yootiis. Yesuusi xammaqetti simmidi geeshsha ayyaanan tiyettido wode, I asa gidanaappe kase oottido ubbabaa hassayiis. I xammaqetti simmidi haasayido koyrobaanne hayqqanaappe kasetidi haasayido amaridabaa Geeshsha Maxaafaappe ekkidi yootiis. (Zaa. 8:3; Maz. 31:5; Luq. 4:4; 23:46) Yesuusi xammaqetti simmin deꞌiya heezzu layttanne baggaa gidiya wodiyan, darotoo asawu Geeshsha Maxaafaappe nabbabiisinne hegaappe ekettida qofaa qonccissiis. (Maa. 5:17, 18, 21, 22, 27, 28; Luq. 4:16-20) Yesuusi ba haggaazuwaa doommanaappe daro layttaa kasetidi, darotoo Xoossaa Qaalaa nabbabiisinne nabbabettishin siyiis. Son Mayraamanne Yooseefi Geeshsha Maxaafaappe ekettida qofaa haasayiyo wode I siyidoogee qoncce. (Zaa. 6:6, 7) Qassi, Yesuusi sambbata ubban bantta soo asaara Ayhuda woosa keettaa bees. (Luq. 4:16) Yan Geeshsha Maxaafay nabbabettiyo wode I loyttidi siyiis. w23.02 8 ¶1-2

Nuuni Yihoowa siiqanaadan oottiya daro gaasoy deꞌees. Leemisuwawu, I ‘deꞌuwaa pultto’ gidiyoogaanne ‘loꞌꞌo imo ubbaanne kumetta woyto ubbaa’ Immidaagaa gidiyoogaa eradasa. (Maz. 36:9; Yaaq. 1:17) Neessi deꞌiya loꞌꞌobay ubbay kehanne siiqiya Xoossay immidoba. Wozoy Yihooway nuussi immido alꞌꞌo imota. Nuuni hegaadan giyoy aybissee? Yihoowaynne Yesuusi keehi siiqettiyoogaa qoppa. Yesuusi hagaadan giis: “Ta Aawai tana siiqees,” qassi ‘taani ta Aawaa siiqays.’ (Yoh. 10:17; 14:31) Eti daro biiloone layttawu issippe deꞌido gishshawu eta dabbotay keehi mino. (Lee. 8:22, 23, 30) Xoossay ba Naꞌay waayettidi hayqqanaadan paqqadido wode ay keena azzanidaakko qoppa. Yihooway nena gujjin, asa ubbaa keehi siiqiyo gishshawu neeninne harati merinawu deꞌanaadan ba siiqiyo Naꞌaa immiis. (Yoh. 3:16; Gal. 2:20) Xoossaa siiqanaadan oottiya, hagaappe aadhdhiya gaasoy baawa. w23.03 4-5 ¶11-13

Nuuni kaddidaageetu timirttiyaa eqettana bessees. PHerggaamoonan deꞌiya amaridaageeti ishanttu giddon issippetettay xayanaadan oottido gishshawu, Yesuusi eta seeriis. (Ajj. 2:14-16) Tiyaaxiroonan deꞌiyaageeti naagettido gishshawu, I eta galatiisinne tumaa eti ‘mintti naaganaadan’ zoriis. (Ajj. 2:24-26) Worddo timirttetun cimettida shugo Kiristtaaneti bantta nagaraappe simmana koshshiis. Ha wodiyan nuuni shin? Yihoowa qofaa phalqqiya ay timirttiyaanne nuuni eqettana bessees. Kaddidaageeti “ammanuwaa bolla doonan ekkidabaa milatana” danddayikkonne, eti ‘A tumu wolqqaa erikke goosona.’ (2 Xim. 3:5) Nuuni Xoossaa Qaalaa xannaꞌiyoogan gooba gidikko, worddo timirtteta akeekanawunne eqettanawu metootokko. (2 Xim. 3:14-17; Yih. 3, 4) Nu goynuwan Yihooway ufayttiyoogaa akeekana koshshees. Nu goynuwan Yihooway ufayttennaadan oottana danddayiyaabaa nuuni oottikko, A ufayssanawu nuuni sohuwaara laamettana koshshees.—Ajj. 2:5, 16; 3:3, 16. w22.05 4 ¶9; 5 ¶11