Naase

Yihooway baassi yayyiyaageetunne ba sunttaa bonchchiyaageetu sunttay ba ‘hassayiyo maxaafan’ xaafettanaadan oottidoy aybissakko qoppana danddayay? Nu haasayay nu wozanan deꞌiyaabaa qonccissees. Yesuusi hagaadan giis: “Doonai wozana giddon kumidabaa haasayees.” (Maa. 12:34) Yihooway A siiqiyaageeti ooratta alamiyan merinawu ufayttidi deꞌanaadan koyees. Nuuni haasayiyo ogee Yihooway nu haggaazuwan ufayttanaadan woy ufayttennaadan oottana danddayees. (Yaaq. 1:26) Xoossaa siiqenna amaridaageeti hanqquwan, meqetti baynna ogiyaaninne otorettiyoogaa bessiya hanotan haasayaana danddayoosona. (2 Xim. 3:1-5) Nuuni eta milatanawu koyokko. Nuuni haasayiyooban Yihoowa ufayssanawu keehi koyoos. SHin nuuni Kiristtaane shiiqotun woy haggaazuwan kehatettan haasayiyaageeta gidikkonne, harati beꞌananne siyana danddayenna wode nu soo asaara meqetti baynna ogiyaaninne siiqennaagaa bessiya ogiyan haasayiyaaba gidikko, Yihooway nunan ufayttanee?—1 PHe. 3:7. w22.04 5 ¶4-5

Tammu kaceenne doꞌay Gita Baabiloono xayssanaadan, Xoossay eta wozanan amuwaa wottana. Ee, Yihooway kawotettati worddo haymaanoote ubbaa xaaxa waaxiyaari bolli denddanaadaaninne O muleera xayssanaadan oottana. Eti hegaadan oottanawu zoꞌo doꞌaa, hegeekka Kawotettatu Issippetettaa goꞌettana. (Ajj. 18:21-24) Hegee nuna waati maaddii? Nuussi “Xoossaa . . . sinttan pokkoi bainna geeshsha ammanoi” deꞌana koshshees. (Yaaq. 1:27) Gita Baabiloonippe yiida worddo timirtteta, eeqaa baalata, iita kanddotanne iita ayyaana oosota nuuni mule kaallana koshshenna! Xoossay asaa I nagaran oychchenna mala nuuni eti ‘ippe kiyanaadan’ ubbatoo etawu yootoos.—Ajj. 18:4. w22.05 11 ¶17; 14 ¶18

Yelidaageetoo, intte naata Yihoowabaanne I intteyyo oottido loꞌꞌobaa tamaarissanawu dumma dumma ogeta koyite. (Zaa. 6:6, 7) Yelidaageetuppe issi uri Yihoowawu goynnenna gishshawu intte naatuura son ubbatoo xannaꞌanawu danddayana xayikko, yaatiyoogee keehippe koshshiyaaba. Kiristtino giyo michchiya hagaadan gaasu: “Yihoowabaa yootanawu taassi deꞌiya injjee keehi guutta gidiyo gishshawu yaatana danddayiyo wode ubban loytta goꞌettays. “Hegaa bollikka, Yihoowa dirijjitiyaabaa, qassi intte ishanttubaanne michchonttubaa loꞌꞌobaa haasayite. Cimata boroppite. Intte etabaa haasayiyoobay intte naati maadoy koshshiyo wode eta haasayissanaadan woy haasayissennaadan oottana danddayees. Son sarotettay deꞌanaadan oottite. Intte azinatanne intte naata siiqiyoogaa ubbatoo bessite. Intte azinatubaa kehatettaaninne bonchchuwan haasayite, qassi intte naati hegaadan oottanaadan loohissite. Yaatiyoogan, Yihoowaabaa tamaaranawu hanotay injjetanaadan ootteeta.—Yaaq. 3:18. w22.04 18 ¶10-11

Efisoona gubaaꞌiyan deꞌiyaageeti daro metoy deꞌishinkka, genccidoogaanne aggennan Yihoowawu haggaazidoogaa Yesuusi etayyo xaafido kiitay qonccissees. Gidikkonne, kase siiqiyo bantta siiquwaa eti aggidosona. Eti zaarettidi siiqana xayikko, eta goynoy Yihoowa ufayssenna. Hegaadan ha wodiyan, nuuni gencciyoogaappe aarobaa oottana koshshees. Nuuni genccana koshshiyo gaasoti deꞌoosona. Nuuni oottiyooban xalla gidennan, hegaa oottiyo gaasuwankka nu Xoossay ufayttees. Nuuni issibaa oottanaadan denddo gididaba I xoqqu ootti xeellees; ayssi giikko, nuuni A loytti siiqiyo gishshawunne sabbiyo gishshawu awu goynnanaadan I koyees. (Lee. 16:2; Mar. 12:29, 30) Nuuni ubbatoo beegottidi deꞌana koshshees. Sarddeesa gubaaꞌiyaa yaratu metoy dumma dumma. Eti Yihoowawu kase haggaazidaba gidikkonne, haꞌꞌi haggaazokkona. Hegaa gishshawu, eti ‘beegottanaadan’ Yesuusi etawu yootiis. (Ajj. 3:1-3) Yihooway nu oosuwaa mule dogenna.—Ibr. 6:10. w22.05 3 ¶6-7

Minnidi oottiyoogee issi uri keehi ufayttanaadan oottiyoogaa Solomoni yootiis. I hegee “Xoossaappe . . . imettida imota” gidiyoogaa yootiis. (Era. 5:18) Solomoni I haasayiyoobay tuma gidiyoogaa eriis. I mino oosanchcha! I keettata keexxiis, woyniyaa turata tokkiis, dumma dumma ataakilttiyaa tokkiyo sohuwaanne haattaa dagayiyo sohuwaa zeeridi giigissiis. I katamatakka keexxiis. (1 Kaw. 9:19; Era. 2:4-6) Yaatanawu I minni oottiis, qassi hegee A ufayssiis. SHin Solomoni tumuppe ufayttanawu hegaappe aadhdhiyaabaa oottana koshshiyoogaa akeekiis. Qassi I Yihoowawu darobaa oottiis. Leemisuwawu, laappun layttan keexetti wurida Yihoowa goynuwawu goꞌettiyo loꞌꞌiyaa beeta maqidasiyaa keexuwaa oosuwaa I kaalli xeelliis! (1 Kaw. 6:38; 9:1) Solomoni darobaa ootti simmidi, issi uri oottana danddayiyo aybippenne aadhdhiyaabay Yihoowawu haggaaziyoogaa gidiyoogaa akeekiis. I hagaadan giis: “Hekko ubbabai odettiis; hegaa gishshau, ubbabau kuushshai hagaa: Xoossaassi yayya; a azazuwaa naaga.”—Era. 12:13. w22.05 22 ¶8

Yihooway coo atto giido asatubaa yootiya daro taarikee Geeshsha Maxaafan deꞌees. Neeni oona hassayay? Kawuwaa Minaasa hassayennan aggakka. He iita bitanee Yihoowa bolli gita nagaraa oottiis. I worddo xoossatuyyo goynniisinne haratikka goynnanaadan minttettiis. I ba naata worddo xoossatuyyo yarshshiis. I Yihoowa geeshsha beetamaqidasiyan eeqa misiletakka essiis. Abaa Geeshsha Maxaafay hagaadan gees: “GODAA sinttan i daro iitabaa oottidi, a hanqqetissiis.” (2 Odi. 33:2-7) Gidoppe attin, Minaasee ba nagaraappe wozanappe simmido wode, Yihooway ayyo coo atto giis. (2 Odi. 33:12, 13) Wodiraa laammiyoogaanne asa woriyoogaa gujjin, Yihoowa bolli gita nagaraa oottida Kawuwaa Daawitabaa neeni qoppennan aggakka. SHin, Daawiti ba oottido nagaraa ammanidi wozanappe ba nagaraappe simmido wode, Yihooway ayyookka coo atto giis. (2 Sam. 12:9, 10, 13, 14) Ee, Yihooway atto gaanawu keehi koyiyoogaa nuuni ammanettana danddayoos. w22.06 3 ¶7

Nu hidootaa mintti naagiyoogee ubbatoo metennaba gidenna. Nuuni Xoossay gelido qaalay polettin beꞌanawu naagiyo wode, danddayanchcha gidennan aggana danddayoos. Yihooway merinawu deꞌiyaagaa gidiyo gishshawu, nuuyyo daro wode milatiyaagee ayyo keehi guutta. (2 PHe. 3:8, 9) I ba gelido qaalaa ubbaappe loꞌꞌo ogiyan polana, shin I hegaa oottiyoy nuuni qoppido wodiyan gidennan aggana danddayees. Xoossay ba gelido qaalaa polanaashin danddayan naagiyo wode, nu hidootaa mintti naaganaadan aybi maaddana danddayii? (Yaaq. 5:7) Nu hidootay polettanaadan oottiyay Yihoowa gidiyo gishshawu, aara dabbotada deꞌa. Nuussi hidootay deꞌanaadan, Yihooway deꞌiyoogaanne I “bana koyiyaageetuyyo woituwaa immiyoogaa” nuuni ammanana koshshees. (Ibr. 11:1, 6) Yihooway deꞌiyoogaa nuuni wozanappe ammanikko, I gelido qaalaa ubbaa polanaagaa loytti ammanettana danddayoos. Nuuni nu hidootaa minttanawu Yihoowa woossana, qassi A Qaalaa nabbabana koshshees. Nuuni Yihoowa beꞌana danddayennaba gidikkonne, kaseegaappe aaruwan akko shiiqana danddayoos. I nu woosaa siyanaagaa ammanettidi, woosan A haasayissana danddayoos.—Erm. 29:11, 12. w22.10 26-27 ¶11-13

Ha hanotaa qoppa. Iyyoobi kayyottido gishshawu, bidinttan uttiis; qassi daro wodiyawu sakettiis. (Iyy. 2:8) Iyyooba laggeti A eeshshaa mooriyaabaa aggennan haasayidosonanne A sunttaa mooranawu malidosona. Metoy awu wolqqaama tooho mala gidiis, qassi ba naati hayqqidoogan I keehi kayyottiis. Koyro heeran, Iyyoobi coꞌꞌu giis. (Iyy. 2:13) SHin banttana Iyyoobawu lagge giya asati Iyyoobi coꞌꞌu giidoogee I Yihoowa aggidoogaa bessees giidi qoppikko, eti balidosona. Iyyoobi geella xoqqu giidi ba worddo laggeta xeelliiddi hagaadan giis: ‘Hayqqana gakkanaassikka taani suure gidiyoogaa aggikke.’ (Iyy. 27:5) Iyyooba daro metoy gakkikkokka, I keehi xalanne mino gidanaadan A maaddidabay aybee? I keehi unꞌꞌettido wodekka, siiqo Xoossay A metuwaa xayssanaagaa hidootan naagiyoogaa mule aggibeenna. I hayqqikkokka, Yihooway A denttanaagaa erees.—Iyy. 14:13-15. w22.06 22 ¶9

Nuuyyo alꞌꞌo imotaa saluwaanne saꞌaa Medhdhidaagee immiis. I nuuni A woossanaadan paqqadiis. Ane hagaa qoppa: Nuuni awudenne, qassi ay doonankka nuuyyo siyettiya ubbabaa Yihoowawu yootana danddayoos. Nuuni hosppitaaliyan zinꞌꞌidi woy qasho keettan deꞌiiddi nu siiqo Aaway nu woosaa siyanaagaa ammanettidi A woossana danddayoos. Ha imotawu nuuni A keehi galatoos. Kawuwaa Daawiti woosaa maataa keehi nashshiis. I Yihoowayyo hagaadan giidi yexxiis: “Ta woosai ixaanaa cuwaadan ne sintti shiiqo.” (Maz. 141:1, 2) Daawita wode, loytti qoppidi giigissido geeshsha ixaanaa, qeeseti tumu goynuwawu goꞌettoosona. (Kes. 30:34, 35) Ixaanaa giigissiyaageeti loytti qoppidi giigissiyoogaadan, Daawiti Yihoowa woossiyo wode woyganaakko loytti qoppidi woossanawu koyiis. Nuunikka hegaadan oottanawu keehi koyoos. Nu woosay Yihoowa ufayssanaadan koyoos. w22.07 20 ¶1-2; 21 ¶4

Yihooway haluwaa kessees. Nuna naaqqida uraa qaxxayiyo maataa Yihooway nuussi immibeenna. (Roo. 12:20, 21) Nuuni ubbabaa erenna gishshawunne nagaranchcha gidiyo gishshawu, Xoossaagaadan suure pirddana danddayokko. (Ibr. 4:13) Qassi, nuuyyo siyettiyaabay nuna balettana danddayiyo gishshawu, nuuni oottana koshshiya suurebaa eranawu issi issitoo metootana danddayoos. Yaaqoobi hagaadan xaafanaadan Yihooway A denttettiis: “Asa hanqqoi Xoossai koyiyo xillotettaa eheenna.” (Yaaq. 1:20) Yihooway suurebaa oottanaagaanne wottiyoobi baynna pirddaa pirddanaagaa nuuni ammanettana danddayoos. Atto giyoogee nuuni Yihoowa suure pirddan ammanettiyoogaa bessees. Yihooway ubbabaa suure pirddiyoogaa nuuni ammanettiyo wode, nagaraa gaasuwan gakkida qoho ubbaa Yihooway xayssanaagaa ammanettiyoogaa bessoos. I qaalaa gelido ooratta alamiyan, nuna azzanttiyaabay mule “hassayettennanne qofettenna.”—Isi. 65:17. w22.06 10-11 ¶11-12

Asay nuna hegaadan ixxiyoogee Yihooway nunan ufayttiyoogaa bessees. (Maa. 5:11, 12) He ubbabawu denttettiyay Dabloosa. SHin, Yesuusi Dabloosappe keehi wolqqaama! Yesuusi maaddin mishiraachchoy saꞌa ubban odettiiddi deꞌees. Hegaa bessiya naqaashaa ane beꞌoos. Nuuni mishiraachchuwaa yootiyo wode nuna gakkiya hara metoy, daro asay haasayiyo qaalay nuugaara issi mala gidennaagaa. Yesuusi kiitettida Yohaannisa bessido ajjuutan ha wodiyan mishiraachchoy he metuwaa xooni kanttanaagaa kasetidi yootiis. (Ajj. 14:6, 7) Waati xoonidee? Kawotettaa mishiraachchuwaa nuuyyo danddayettida keenan daro asay siyanaadan maaddiiddi deꞌoos. Ha wodiyan kumetta saꞌan deꞌiya asay jw.org saytiyan Geeshsha Maxaafaa qofay deꞌiyo xuufeta nabbabana danddayees; ayssi giikko, he xuufeti 1,000​ppe dariya doonatun deꞌoosona! Asaa erissiyo ashkkara oottanawu xannaꞌissiyo Merinawu Ufayttada Deꞌa! giya maxaafay 700​ppe dariya qaalan birshshettanaadan Oosuwaa Kaalettiya Citay paqqadiis! w22.07 9 ¶6-7

Yesuusi asawu qarettees. Kiitettida Maatiyoosi hagaadan giis: “Daro asaa be7idi, heemmiya asi bainna dorssadan asai hirggiyo gishshaunne asaa maaddiyaabi bainna gishshau, asaayyo qarettiis.” (Maa. 9:36) Yihoowawu shin, aybi siyettii? Yesuusi hagaadan giis: “Saluwan de7iya intte Aawai ha guuttatuppe issoi bayyanaagaakka koyenna.” (Maa. 18:14) Hagee keehi ufayssiyaaba! Nuuni Yesuusa loytti eriyo wode, kaseegaappe aaruwan Yihoowa siiqoos. Qassi ne gubaaꞌiyan deꞌiya kayma ishanttuuranne michchonttuura wodiyaa aattiyoogaaninne eta loytta eriyoogan, Yihoowa kaseegaappe aaruwan siiqananne kayma Kiristtaane gidana danddayaasa. Eti ay keena ufayttiyaakko akeeka. Yihoowawu haggaazanawu kuuyidoban eti aynne zilꞌꞌettokkona. Yihoowa haggaazuwan demmido ufayssiyaabaa neessi yootanaadan eta oychcha. Neeni gitabaa kuuyana koshshiyo wode, eta zoriyaa oychcha. ‘Daro zoriyaageeti deꞌikko, saroy deꞌiyoogaa’ hassaya. w22.08 3 ¶6-7

Nuna ubbaa metoy gakkees. SHin nuna metoy gakkiyo wode nuuni mule nurkka deꞌokko. Siiqiya aawadan Yihooway nuna ubbatoo naagees. I nu matan deꞌees, maaduwawu nu mintti woossiyoogaa siyees, qassi nuna maaddees. (Isi. 43:2) Nuuni genccanawu koshshiya ubbabaa kehatettan I nuussi immiyo gishshawu, nuna gakkiya metuwaa genccana danddayiyoogaa ammanettoos. I metiya wodiyan nuna maaddanawu imota gidida woosaa, Geeshsha Maxaafaa, gidi palahiya ayyaanaabaa qumaanne siiqiya ishantta immiis. Saluwan deꞌiya nu Aaway nuna naagiyo gishshawu nuuni A keehi galatoos. “Nu wozanai an ufaittees.” (Maz. 33:21) Yihooway nuna maaddanawu giigissido ubbabaa loytti goꞌettiyoogan, I nuussi siiquwan immidobaa gishshawu A galatiyoogaa bessoos. Xoossaa siiquwan deꞌanawu nuuppe koyettiya ubbabaa nuuni oottana koshshees. Qassi Yihoowawu azazettanawunne A sinttan loꞌꞌobaa oottanawu nuussi danddayettida ubbabaa nuuni oottikko, I nuna merinawu naagana! w22.08 13 ¶15-16

Daroti ha wodiyan oonan ammanettana danddayiyaakko erokkona. Polotikaa asati, saynttisttetinne zalꞌꞌanchchati tumuppe eta maaddanawu baaxetiyaakkonne siroosona. Hegaa bollikka, eti banttana Kiristtaane giya haymaanootiyaa kaalettiyaageeta bonchchokkona. Haymaanootiyaa kaalettiyaageeti Geeshsha Maxaafay yootiyoobaa azazettoos giidi yootiyo gishshawu, asay Geeshsha Maxaafaa ammananawu metootiyoogee garamissiyaaba gidenna. Nuuni Yihoowa ashkkarata gidiyo gishshawu, I ‘tumu Xoossaa’ gidiyoogaanne ubbatoo nuna maaddiyaabaa oottiyoogaa ammanettoos. (Maz. 31:5; Isi. 48:17) Nuuni Geeshsha Maxaafay yootiyooban ammanettana danddayoos. Geeshsha Maxaafaa eranchchay hagaadan giidoogaa nuuni maayettoos: “Xoossay yootidobay mule worddo gidi woy polettennan atti erenna. Xoossaa asay Geeshsha Maxaafaa xaafissida Xoossan ammanettiyo gishshawu, I yootiyoobaa ammanettees.” w23.01 2 ¶1-2

Nuuni nu ishanttinne michchontti Yihoowa mintti ammananaadan oottiyo wode, eta minttettoos. Issota issota ammanennaageeti qilliiccoosona. Amaridaageeti wolqqaama sahuwaa sahettoosona woy harati eta qohidobaa doganawu baaxetiiddi deꞌoosona. Qassi harati adussa wodiyawu ha alamiyaa wurssettaa naagiiddi deꞌoosona. Hegaa mala hanotati ha wodiyan deꞌiya Kiristtaanetu ammanuwaa paaccana danddayoosona. Koyro xeetu laytta gubaaꞌiyan deꞌiyaageeta hegaa mala paacee gakkiis. Kiitettida PHawuloosi Geeshsha Maxaafaa goꞌettidi ba ishanttunne michchonttu ammanuwaa minttiis. Leemisuwawu, Ayhuda haymaanootee Kiristtaanetuugaappe aadhdhees giidi ammanenna so asay yootiyo wode Ayhuda Kiristtaaneti etawu woygi zaaranaakko erennan aggana danddayoosona. PHawuloosi Ibraawen deꞌiyaageetussi xaafido dabddaabbee he Kiristtaaneta keehi minttettidoogee qoncce. (Ibr. 1:5, 6; 2:2, 3; 9:24, 25) Eti ammanenna bantta so asawu woygi zaaranaakko eranawu, PHawuloosi yootido ammanttiya naqaashaa goꞌettana danddayoosona. w22.08 23-24 ¶12-14

Seexaanaa alamiyan deꞌiya asay oonan ammanettana koshshiyaakko erenna. Eti zalꞌꞌanchchatu, deriyaa haariyaageetunne haymaanootiyaa kaalettiyaageetu eeshshan ubbatoo azzanoosona. Qassi daroti bantta laggetun, shoorotuuninne ubba qassi bantta so asaa yaratun ammanettokkona. Hegan nuuni garamettana koshshenna. ‘Wurssetta gallassatun asati zigirssanchchatanne kashi erikke giyaageeta’ gidanaagaa Geeshsha Maxaafay kasetidi yootiis. Hegaa giyoogee asay ammanettana danddayenna ha saꞌaa xoossaa Seexaanaa mala gidana giyoogaa. (2 Xim. 3: 1-4; 2 Qor. 4:4) Nuuni Kiristtaane gidiyo gishshawu Yihoowan ammanettana danddayiyoogaa eroos. I nuna siiqiyoogaanne ba dabbota mule ‘yeggi bayennaagaa’ nuuni ammanoos. (Maz. 9:10) Kiristtoos Yesuusi ba deꞌuwaa nuussi immido gishshawu, aanikka ammanettana danddayoos. (1 PHe. 3:18) Qassi Geeshsha Maxaafay ammanttiya kaaletuwaa yootiyoogaa nuuni nu deꞌuwan beꞌida.—2 Xim. 3:16, 17. w22.09 2 ¶1-2

Wozanappe ufayttiyoogaa giyoogee haꞌꞌissa xallawu siyettiyaabaa bessiyaaba gidenna. Hegee issi uri paxa deꞌido wode ubban ufayttiyoogaa bessiyaaba gidana danddayees. Waanidi? Yesuusi Maatiyoosa shemppo 5ppe 7 gakkanaashin tamaarissidoban hagaadan giis: “Bantta ayyaanan hiyyeesa gididoogaa eriyaageeti anjjettidaageeta.” (Maa. 5:3) Asay banttana Medhdhida Xoossaa Yihoowa eranawu woy ayyo goynnanawu koshshay deꞌanaadan oottidi Xoossay medhdhidoogaa Yesuusi erees. Hegee nuuni ayyaanaaban hiyyeesa gidiyoogaa bessiyaaba. Yihooway ‘ufayttiya Xoossaa’ gidiyo gishshawu, ayyo goynniyaageeti ufayttana danddayoosona. (1 Xim. 1:11, NW) Nuuni ufayttana danddayiyoy metoy baynna wode xallaanee? CHii. Yesuusi Maatiyoosa 5-7 gakkanaashin tamaarissidoban “kayyottiyaageeti” ufayttana danddayiyoogaa yootiis. Qassi, “xillotettaa gishshau yedetettiyaageeti” ufayttana danddayiyoogaa Yesuusi yootiis. (Maa. 5:4, 10, 11) Nuuni ufayttiyoy nuna metoy gakkenna gishshawu gidennan, ayyaanaaban nuussi koshshiyaabaa demmiyoonne Xoossaakko loytti shiiqiyo gishshawu gidiyoogaa Yesuusi tamaarissiis.—Yaaq. 4:8. w22.10 6 ¶1-3

Akeekay issi Kiristtaanee ‘coꞌꞌu gaanawunne haasayanawu’ bessiya wodee awudekko eranaadan maaddees. (Era. 3:7) Issi issi wogatun, “Cincca kanay ulo giddon boccees” giyo haasayay meeze gididaba. Hegaa giyoogee haasayiyoogaappe coꞌꞌu giyoogee loꞌꞌo gidiyo wodee deꞌees giyoogaa. Issi leemisuwaa beꞌa. Meezee deꞌiyo issi cimay gita metoy merettido hara gubaaꞌiyaa darotoo maaddiis. Abaa hara cimay yootidobaa akeeka. “I hara gubaaꞌiyaa xeelliyaagan xuura gididabaa haratussi mule yooti erenna.” He cimay akeekanchcha gidiyo gishshawu, A gubaaꞌiyan deꞌiya hara cimati A bonchchoosona. I bantta xuuraa haratussi yootennaagaa eti ammanettoosona. Ammanettiya asa gidanawu koshshiya harabay gawaa geeshsha gidiyoogaa. Gawaa geeshsha uri ubbatoo tumubaa haasayiyo gishshawu nuuni an ammanettoos.—Efi. 4:25; Ibr. 13:18. w22.09 12 ¶14-15

Daroti aadhdhida eratettiyaa ‘ogiyan xeesiyoogaa’ siyanawu koyokkona. (Lee. 1:20) Geeshsha Maxaafay yootiyoogaadan aadhdhida eratettaa ixxiya heezzu citati deꞌoosona: ‘Akeekay paccidoogeeta,’ ‘qilliicciyaageeta,’ qassi ‘eeyyata.’ (Lee. 1:22-25) ‘Akeekay paccidoogeeti’ siyido ubbabaa ammanoosonanne sohuwaara cimettoosona. (Lee. 14:15) Leemisuwawu, daro miiloone asay haymaanootiyaa kaalettiyaageetun woy polotika asatun cimettiyoogaa qoppa. Amaridaageeti banttana kaalettiyaageetun cimettidoogaa eriyo wode keehi dagammoosona. SHin, Leemiso 1:22n odettida akeekay paccido asati hegaadan deꞌanawu dooriyo gishshawu laamettennan agganawu kuuyoosona. (Erm. 5:31) Eti Geeshsha Maxaafay yootiyoobaa tamaaranawu woy an deꞌiya higgetuyyo azazettanawu koyokkona. Nuuni eriiddi sheneho giya asatu mala gidanawu koyokko.—Lee. 1:32; 27:12. w22.10 19 ¶5-7

Xoossaa dirijjitee nuna qohuwaappe naaganawu kaaletuwaa immees. Qoppibeennabay merettiyo wode cimati nuna maaddanaadan, nu ooratta adrashaa etawu immanaadan darotoo hassayissoy odettees. Nuuni son takkanaadan woy baqatanaadan maaduwaa waati demmanaakko woy waatidi, qassi awude harata maaddanaakko, nuussi kaaletoy imettana danddayees. Nuuni hegawu azazettana xayikko, nu shemppuwaakka, qassi nuna qohuwaappe naagiya cimatu shemppuwaakka daafaban yeggana danddayoos. (Ibr. 13:17) Daafabaa woy deretettan woppay xayiyoogaa gaasuwan bantta keettaa aggidi biida daro ishanttinne michchontti, ooratta hanotaa meezetanawunne Yihoowawu kaseegaappe aaruwan oottanawu banttawu danddayettida ubbabaa oottidosona. Yedetaa gaasuwan harasaa baqatidi biida beni Kiristtaanetuugaadan, eti aggennan ‘qaalaa yootoosona.’ (Oos. 8:4) Sabbakiyoogee eti banttana gakkida metuwaa gidennan, Xoossaa Kawotettaabaa qoppanaadan maaddees. Hegaappe denddidaagan, eti ubbatoo ufayttoosonanne saruwan deꞌoosona. w22.12 19 ¶12-13

Yihooway nuna ubbaa xoqqu ootti xeellees. Yesuusi ba erissiyo ashkkarata mishiraachchuwaa yootanawu kiittanaappe kase, eqettiya asawu eti yayyennaadan maaddiis. (Maa. 10:29-31) I eta minttettanawu Israaꞌeela biittan keehi erettiya siine kafotubaa etawu yootiis. Yesuusi saꞌan deꞌiyo wode he kafoti keehi hirayso. SHin I ba erissiyo ashkkarata hagaadan giis: “Intte Aawai gaana xayikko, he siine kafotuppe issinniyaakka sa7an wodhdhukku.” I gujjidikka hagaadan giis: “Daro siine kafotuppe intte aadhdheeta.” Yihooway ubbaakka xoqqu ootti xeelliyo gishshawu eti yedetaa yayyiyo gaasoy baynnaagaa Yesuusi etawu yootiis. Erissiyo ashkkarati katamaaninne gaxariyan mishiraachchuwaa yootiyo wode siine kafota beꞌidi Yesuusi etawu yootidobaa hassayidoogee qoncce. Yihooway nuna ubbaa xoqqu ootti xeelliyoogaanne neenikka “daro siine kafotuppe” aadhdhiyoogaa guutta kafota beꞌiyo wode ubban hassaya. Yihooway maaddin neeni yedetaa genccanaagaa ammanettana danddayaasa. w23.03 18 ¶12

Issi issitoo so asay eqettiyoogaa woy oosuwaappe yedetettiyoogaa mala metoy nuna gakkees. Daro wodiyawu nuna metoy gakkikko, nuuni hidootaa qanxxananne unꞌꞌettana danddayoos. Seexaanay he wodiyaa goꞌettidi, Yihooway nuna siiqennabadan nuuni qoppanaadan oottees. Metoy nu bolli gakkanaadan oottiyay Yihoowa woy A dirijjitiya giidi nuuni qoppanaadan Dabloosi koyees. Gibxxen deꞌida amarida Israaꞌeelata hagaa malabay gakkiis. Aylletettaappe eta laꞌa kessanawu Yihooway Muusanne Aaroona sunttidoogaa eti koyro ammanidosona. (Kes. 4:29-31) SHin guyyeppe Paarooni eta barchcheyido wode, bantta metuwaa Muusenne Aaroona bolli gaasoyidosona. (Kes. 5:19, 20) Eti Xoossawu ammanettida ashkkaratu bolli gaasoyidosona. Hegee ayba azzanttiyaabee! Adussa wodiyawu nena metoy gakkikko, neeyyo siyettiya ubbabaa woosan Yihoowawu yoota, qassi A maaduwaa koya. w22.11 15 ¶5-6

Yihooway Deꞌuwaa Immidaagaa gidiyo gishshawu asaa hayquwaappe denttiyo wolqqay awu deꞌees. Siraafita biittaa amꞌꞌee naꞌaa hayquwaappe denttanaadan Yihooway hananabaa yootiya Eelaasawu wolqqaa immiis. (1 Kaw. 17:21-23) Guyyeppe, hananabaa yootiya Elssaꞌi Xoossay maaddin SHuneema biittaa maccaasee naꞌaa hayquwaappe denttiis. (2 Kaw. 4:18-20, 34-37) Hegeetinne dendduwaabaa yootiya hara taariketi asaa hayquwaappe denttanawu Yihoowawu wolqqay deꞌiyoogaa bessoosona. Yesuusi saꞌan deꞌiyo wode, hegaadan oottiyo wolqqaa ba Aaway ayyo immidoogaa bessiis. (Yoh. 11:23-25, 43, 44) Ha wodiyan Yesuusi saluwan deꞌees, qassi “maata ubbai saluwaaninne sa7an” ayyo imettiis. Yaatiyo gishshawu, “duufuwan de7iyaageeti” ubbay merinawu deꞌanawu hayquwaappe denddanaadan oottiyoogan ba gelido qaalaa polana danddayees.—Maa. 28:18; Yoh. 5:26-29. w22.12 5 ¶10

Asay Hizqqeeli yootiyoobaa siyennan ixxiyoogan, Yihooway yootiyoobaa siyennan ixxidosona. Hachchi gallassaa xiqisiyan deꞌiya qofay, asay A ixxidoogee Hizqqeeli hananabaa yootiyaagaa gididi oottiyo oosuwaa polibeennaagaa bessiyaaba gidennaagaa I ammanettanaadan oottiis. Qassi Hizqqeeli awaajjido pirdday polettiyo wode, “hananabaa yootiyaagee eta giddon de7iyoogaa” asay eranaagaa Yihooway yootiis. (Hiz. 2:5; 33:33) He minttettiya qofay Hizqqeeli ba haggaazuwaa polanaadan maaddidoogee qoncce. Sabbakanaadan nuna kiittidaagee Yihoowa gidiyoogaa eriyo gishshawu, nuunikka xala gidana danddayoos. “Ta markkata” giidi xeesiyoogan I nuna bonchchiis. (Isi. 43:10) Hegee gita maata! Yihooway Hizqqeelawu, “Yayyoppa” giis; hegaadankka nuna, “Dagammoppite” yaagees. (Hiz. 2:6) Nuna eqettiyaageeta nuuni yayyana koshshennay aybissee? Hizqqeelaagaadan, Yihooway nuna kiittidoogaanne I nuna maaddiyoogaa nuuni eriyo gishshataassa.—Isi. 44:8. w22.11 3-4 ¶4-5

Ha wodiyan ammanettida cimatanne gubaaꞌiyawu oottiyaageeta wozanappe galatoos. Ha ammanettida ishantti nuussi koshshiyaabaa kunttiyo gishshawu Yihoowa keehippe galatoos! SHin nuuni ayba ogetun ammanettiya asa gidiyoogaa bessana danddayiyoo? Nuuni nu ishanttanne michchontta siiqiyo gishshawu, eta payyatettaabawu qoppoos. Gidikkonne, nuuni eta xuuraa naagana koshshees. Koyro xeetu layttaa Kiristtaane gubaaꞌiyan deꞌiya amaridaageeti ‘banttawu bessennabaa haasayiiddi, zigiroosonanne yohon coo geloosona.’ (1 Xim. 5:13) Nuuni eta mala gidanawu mule koyokko. SHin issi uri xuurabaa nuussi yootidi, nuuni hegaa hara asawu odennaadan yootiis gaada qoppa. Leemisuwawu, issi michchiyaa ba sahuwaabaa woy bana gakkida hara metuwaabaa nuussi yootada, hegaa nuuni ooyyoonne odennaadan oychchana danddayawusu. Nuuni A oychchidoogaadan oottana koshshees. w22.09 10 ¶7-8

“Ne qofaa laamma” geetettidi birshshettida Giriiketto qaalay “ne qofaa ooraxissa” geetettidikka birshshettana danddayees. Hegaa giyoogee, nuuni loꞌꞌo gidida amaridabatu xallaa oottana koshshees giyoogaa gidenna. Nuussi danddayettida keenan Yihooway kessido maarawu azazettanawu, nuuni ay mala asakko qoppananne koshshiyaaban laamettana bessees. Nuuni hegaa issitoo gidennan, ubbatoo oottana koshshees. Nuuni wottiyoobi baynna asa gidiyo wode, awudenne Yihoowa ufayssiyaabaa oottana danddayoos. He wodee gakkanawu, nuuni Yihoowa ufayssanawu minni baaxetana koshshees. Nuuni oottanaadan Xoossay koyiyoobaa eranawu nu qofaa laammana koshshiyoogaa PHawuloosi Roome 12:2n yootidoogaa akeeka. Nuuni ha alamiyaagaadan qoppennaadaaninne oottennaadan, nu halchchiyoobaaninne kuuyiyooban ha alamiyaa qofaa gidennan, Xoossaagaadan qoppanawu murttidaakkonne pilggana koshshees. w23.01 8-9 ¶3-4

Nuna gakkiya meto ubbaa Yihooway teqqii? Nu deꞌuwan nuna gakkiya ubbabay loꞌꞌobaassa gidanaadan I oottii? CHii, Geeshsha Maxaafay hegaadan tamaarissenna. (Era. 8:9; 9:11) SHin, nuuni hagaa eroos: Nuna gakkiya metuwaa Yihooway erees; qassi nuuni maaduwawu waassiyo wode hegaa ezggees. (Maz. 34:15; Isi. 59:1) Ubbaappe aaruwan, nuna gakkiya metuwaa genccidi xoonanaadan Yihooway maaddees. Waatidi? Yihooway nuna maaddiyo issi ogee, darotoo koshshiya wodiyan nuna minttettiyoogaana. (2 Qor. 1:3, 4) Neeyyo minttettoy keehi koshshin Yihooway nena maaddido wodiyaa hassayay? Nuna gakkida metoy aggana gakkanaashin, genccanaadan Yihooway waati maaddidaakko darotoo akeekokko. w23.01 17-18 ¶13-15

Ha doꞌay laappun huuphee deꞌiyo doꞌaa milatikkonne, zoꞌo. Hegee ‘doꞌaa misiliyaa’ geetettees, qassi ‘hosppuntta kawodan’ qoncciis. (Ajj. 13:14, 15; 17:3, 8) Yohaannisi he ‘kawoy’ yaanaagaa, simmidi xayanaagaanne guyyeppe zaaretti yaanaagaa yootiis. Hegee Kawotettatu Issippetettaa dirijjitiyaa loytti qonccissees; ha dirijjitee alamiyaa kawotettati koyiyoobaa oottees. Koyro, hegee Kawotettatu Waattaa Maabaraa geetettiis. SHin, Naaꞌꞌantto Alamiyaa Olaa wode hegee xayiis. Guyyeppe, Kawotettatu Issippetettaa geetettidi zaaretti qoncciis. He doꞌati woy kawotettati asay Yihoowanne A asaa eqettanaadan bantta worddo oduwan eta denttettoosona. Yohaannisi eti leemiso hanotan ‘saꞌaa kawota ubbaa’ Armmageedoona olawu, hegeekka ‘Ubbaappe Wolqqaama Xoossaa gita gallassawu’ shiishshanaagaa yootiis.— Ajj. 16:13, 14, 16. w22.05 10 ¶10-11

Yesuusi xaatta maxaafaa nabbabiyoogaa tamaarido wode, Geeshsha Maxaafaa loytti eriyoogaa xalla gidennan, hegaa siiqiisinne hegee bana oosuwawu denttettanaadan eeno giis. Leemisuwawu, Yesuusawu layttay 12 gidido wode beeta maqidasiyan hanidabaa hassaya. Muuse Higgiyaa loytti eriya asttamaareti Yesuusi “immiyo era zaaruwan” garamettidosona. (Luq. 2:46, 47, 52) Nuunikka Geeshsha Maxaafaa ubbatoo nabbabiyo wode Xoossaa Qaalaa loytti erananne siiqana danddayoos. Higgiyaa tamaarissiyaageeta, Parisaawetanne Saaduqaaweta gujjin, Higgiyaa loytti eriyaageetussi Yesuusi yootidobaappe tamaarana danddayoos. Haymaanootiyaa kaalettiyaageeti ubbatoo Geeshsha Maxaafaa nabbabikkonne eti hegaappe goꞌettokkona. Geeshsha Maxaafaappe loytti goꞌettanawu he asati oottibeenna heezzubata Yesuusi yootiis. I he asatuyyo yootidobay, (1) nuuni nabbabiyoobaa akeekanawu, (2) ayyaanaaban alꞌꞌobaa demmanawu, qassi (3) Xoossaa Qaalay nu hanotaa laammanaadan oottanawu maaddoosona. w23.02 8-9 ¶2-3

Nuuni naagettana koshshiya amaridabati lambbeechchiyoogaa, likkiyaappe aattidi uyiyoogaa, likkiyaappe aattidi miyoogaa, harata qohiyaabaa haasayiyoogaa, allaxxanawu makkalabaa beꞌiyoogaa, pornograafiyaanne hegaa malabata. (Maz. 101:3) Dabloosi nuuni Yihoowaara dabbotido dabbotaa ubbatoo mooranawu koyees. (1 PHe. 5:8) Nuuni naagettana xayikko qanaatiyoogee, ammanettennan aggiyoogee, yaaretiyoogee, ixxiyoogee, otorettiyoogeenne uluwan lancciyaa oyqqiyoogee nu wozanan diccanaadan Seexaanay oottana danddayees. (Gal. 5:19-21) Hegeeta xayssanawu nuuni nuussi danddayettida ubbabaa sohuwaara oottana xayikko, hegeeti marzze mala gidida sharafaadan elle diccananne nuna keehi qohana danddayoosona. (Yaaq. 1:14, 15) Akeekennan nuna qohana danddayiya issibay iita asatuura laggetiyoogaa. Nuuni etaara wodiyaa aattiyo asata milatana danddayiyoogaa hassayana koshshees. (1 Qor. 15:33) Nuuni oottiyooban naagettiyaaba gidikko, Yihooway kessido maaraa kaallenna asatuura zuppetiyoogaappe naagettoos. (Luq. 21:34; 2 Qor. 6:15) Qohiyaabaa akeekidi, hegaappe naagettoos. w23.02 16 ¶7; 17 ¶10-11

Neeni Yihoowaabaa loytta tamaarido gishshawu A kaseegaappe aaruwan siiqaasa. Neeni haꞌꞌikka merinawukka Xoossaakko shiiqanawu koyiyoogee qoncce. Qassi yaatana danddayaasa. Neeni A wozanaa ufayssanaadan I kehatettan nena minttettees. (Lee. 23:15, 16) Neeni haasayiyoobaa xallan gidennan, oottiyoobankka hegaa bessana danddayaasa. Neeni deꞌiyo ogee ne tumuppe Yihoowa siiqiyoogaa bessees. Hegee neeni ne deꞌuwan doorana danddayiyo aybippenne aadhdhiyaaba. Neeni Yihoowa siiqiyoogaa waata bessana danddayay? Koyruwan, neeni issi tumu Xoossawu nena sheedhdhidoogaa woosan awu yootaasa. (Maz. 40:8) Hegaappe simmin, nena woosan awu sheedhdhidoogaa daro asaa sinttan xammaqettiyoogan bessaasa. Ne xinqqatee keehi ufayssiyaabanne neeni ne deꞌuwan keehi xoqqu oottada xeelliyooba. Neeni neessi gidennan, Yihoowawu deꞌiyoogaa doommaasa. (Roo. 14:8; 1 PHe. 4:1, 2) Hegee gita kuushsha milatana danddayees, qassi gitaba. Hegee neeni aybippenne aadhdhiya deꞌuwaa deꞌanaadan oottees. w23.03 5-6 ¶14-15