Masqqala

Haasayiyo imotaa nuuni loytti goꞌettiyo wode, Yihoowawu haggaaziyoogaa haratussi bessoos. “Xoossaassi azazettiyaageetuppenne azazettennaageetuppe gidduwan de7iya” dummatettaa harati loytti akeekanaadan maaddoos. (Mil. 3:18) Kimbarli giyo michchee hanotay hegee tuma gidiyoogaa waati qonccissiyaakko beꞌa. Timirtte keettan imettida amarida oosuwaa banaara tamaariyaariira oottanaadan maddabettaasu. Issippe ootti simmin, iira tamaariyaara Kimbarla hara tamaaretuppe dumma gidiyoogaa akeekaasu. A harata xeelliyaagan iitabaa haasayukku, kehatettan haasayawusunne iita qaalaa goꞌettukku. Kimbarliira tamaariyaara keehi garamettaasunne Kimbarliira Geeshsha Maxaafaa xannaꞌiyoogaa guyyeppe doommaasu. Nuuni asay tumaa siyanawu koyanaadan oottiya ogiyan haasayiyo wode Yihooway keehi ufayttees! Nuuni ubbay Yihoowa bonchchissiya ogiyan haasayanawu koyoos. w22.04 5-6 ¶5-7

Yesuusi Magddala giyo katamaappe yiida Mayraamippe laappun xalaheta kessiis. Hegaa nashshiyoogee A Yesuusa kaallanaadaaninne A maaddanaadan oottiis. (Luq. 8:1-3) Mayraama, Yesuusi iyyo oottidobaa keehippe nashshidaba gidikkonne, I sinttappe hegaappe aadhdhiyaabaa iyyo oottanaagaa waaya erana. An “ammaniya ubbai” merinaa deꞌuwaa demmanaadan, I ba shemppuwaa aattidi immana. (Yoh. 3:16) Gidikkonne, Mayraama nashshiyoogaa Yesuusawu ammanettiyoogan bessaasu. Yesuusi kaqettidi waayettiyo wode A Yesuusa matan eqqada anne harata minttettaasu. (Yoh. 19:25) Mayraamanne hara naaꞌꞌu maccaasati, Yesuusi hayqqi simmin A anhaa tiyanawu shittuwaa ehiidosona. (Mar. 16:1, 2) Hayquwaappe denddi simmidi Yesuusi Mayraamiira gayttidi haasayiis. Erissiyo ashkkaratuppe amaridaageetu xallay he maataa demmidosona.—Yoh. 20:11-18. w23.01 27 ¶4

Nuuni Yihoowawu kase haggaazido gishshawu, haꞌꞌi ayyo haggaazana koshshenna giidi qoppana bessenna. Nu abbee kaseegaa mala gidana xayikkonne, nuuni “Godaa oosuwaa” wurssettaa gakkanaashin minni oottanawu beegottidaageeta gidana koshshees.(1 Qor. 15:58; Maa. 24:13; Mar. 13:33) Nuuni minnidi wozanappe goynnana koshshees. Yesuusi Lodooqiyan deꞌiyaageetuyyo kiittido kiitay eta metoy dumma gidiyoogaa qonccissees. Eti bantta goynuwan “bol77o.” Eti shenehoo giyaageeta gidiyo gishshawu, Yesuusi eti ‘metootiya asanne qarettiya asa’ gidiyoogaa yootiis. Eti Yihoowawu keehippe minni goynnana koshshiis. (Ajj. 3:16, 17, 19) Nuuni hegaappe ay tamaariyoo? Nuuni kaseegaadan minni oottana xayikko, Yihoowaynne A dirijjitee nuussi oottido loꞌꞌoba ubbawu nuuni eta loytti galatana koshshees. (Ajj. 3:18) Nuuni Yihoowawu goynniyoogaa kaseyennaadan oottiya ishalo deꞌuwaa ha wodiyan deꞌanawu mule baaxetana koshshenna. w22.05 3-4 ¶7-8

Yihooway daro shaꞌu layttawu issi dumma maxaafaa xaafiiddi takkiis. Ammanettida markka gidida Aabeela sunttaappe doommidi daro sunttay he maxaafan deꞌees. (Luq. 11:50, 51) He wodeppe doommidi Yihooway he maxaafan daro asaa sunttaa xaafiis; qassi ha wodiyan miilooniyan qoodettiya asaa sunttay he maxaafan deꞌees. (Mil. 3:16; Ajj. 3:5; 17:8) Geeshsha Maxaafan he maxaafay ‘deꞌo maxaafaa’ geetettees. Yihoowa wozanappe bonchchiyaageetunne A sunttaa siiqiyaageetu sunttay ha dumma maxaafan deꞌees. Eti merinaa deꞌuwaa demmana danddayoosona. He maxaafan nu sunttay xaafettanaadan koyikko, A Naꞌaa Yesuus Kiristtoosa wozuwaa yarshshuwaa baggaara nuuni Yihoowaara dabbotaa minttana koshshees. (Yoh. 3:16, 36) Nu hidootay saluwan gidin woy saꞌan, nuuni ubbay nu sunttay he maxaafan xaafettanaadan koyoos. w22.09 14 ¶1-2

Ajjuutaa maxaafay ‘gita zoꞌo miimminttiyaabaa’ yootees. (Ajj. 12:3) Ha miimminttee Yesuusaaranne A kiitanchchatuura olaa olettees. (Ajj. 12:7-9) I Xoossaa asaa qoheesinne doꞌatussi woy asaa kawotettatussi maataa immees. (Ajj. 12:17; 13:4) Ha miimminttee oonee? Hegee ‘xalahe halaqaa woykko Seexaanaa giyo beni shooshshaa.’ (Ajj. 12:9; 20:2) I Yihoowa morkke gidida hara ubbata maaddees. Miimminttiyaa bolli aybi gakkanee? Ajjuutaa 20:1-3y issi kiitanchchay Seexaanaa ciimma ollan yegganaagaa yootees. Hegee awu qasho keetta mala. Seexaanay ciimma ollan deꞌiyo wode “sha7u laittai wuranaashin, asa zareta naa77anttuwaa balettenna.” Wurssettan, Seexaanaynne daydanttati ‘dinniyaaninne tama abban’ yegettana. Hegaa giyoogee eti merinawu muleera xayana giyoogaa. Seexaanaynne daydanttati baynna alamiyaa ane qoppa. Hegee keehi ufayssiya wode gidana! w22.05 14 ¶19-20   

Yesuusi minni oottiis. I yelagatettan anaaxe gididi oottiis. (Mar. 6:3) Yesuusa aawaynne aayyiyaa daro naati deꞌiyo bantta soo asawu koshshiyaabaa kunttanawu minni oottiyo wode I eta maaddido gishshawu, eti A galatidoogee qoncce. Qassi wottiyoobi baynna asa gidida Yesuusi anaaxe gididi oottiyo wode daro asay I oottiyoobaa shammanawu koyennan aggenna! Yesuusi ba oosuwan keehi ufayttennan aggenna. SHin, I mino oosanchcha gidikkonne, Yihoowawu haggaazanawu ubbatoo wodiyaa bazziis. (Yoh. 7:15) Guyyeppe, sabbakiyaagaa gidido wode, I yootiyoobaa ezggiyaageeta hagaadan zoriis: “Merinaa de7o qumau, . . . oottiteppe attin, samiya qumau oottoppite.” (Yoh. 6:27) Qassi Yesuusi Maatiyoosa shemppo 5-7 gakkanawu tamaarissidoban hagaadan giis: “Intte huuphessi saluwan miishsha dagayite.” (Maa. 6:20) Xoossaappe yiya aadhdhida eratettay nuuni oosuwaa bessiyaagaadan xeellanaadan nuna maaddees. Nuuni Kiristtaane gidiyo gishshawu ‘loꞌꞌobaa minni oottanaadan’ tamaarida. w22.05 22 ¶9-10

Euniiqa Ximootiyoosayyo loꞌꞌo leemiso gidaasu. I ba aayyiyaa Yihoowa keehi siiqiyoogaa A oottidobaappe akeekidoogeenne A Yihoowayyo haggaaziyoogee A ufayttanaadan oottidoogaa akeekidoogee qoncce. Hegaadan ha wodiyankka, daro aayoti “palamettennan” woy aynne haasayennan bantta soo asay Yihoowayyo haggaazanaadan maaddidosona. (1 PHe. 3:1, 2) Intte hegaadan oottana danddayeeta. Waatidi? Intte Yihoowaara dabbotido dabbotaa kaseyite. (Zaa. 6:5, 6) Daro aayotuugaadan, intte daroban intte goꞌꞌaa aggi bayeeta. Intte intte naatussi asatettaban koshshiyaabaa kunttanawu intte wodiyaa, miishshaanne harabaa immideta, qassi xiskkuwaa xayideta. Gidoppe attin, intte Yihoowaara dabbotido dabbotaa minttanawu wodee xayana gakkanaashin, he koshshiyaabata kunttanawu mule bichchaarana koshshenna. Woossanawu, Geeshsha Maxaafaa buzo xannaꞌanawunne gubaaꞌe shiiqota shiiqanawu ubbatoo wodiyaa bazzite. Yaatiyoogan intte ayyaanaaban minnana, qassi intte soo asaayyoonne haratuyyo loꞌꞌo leemiso gidana. w22.04 16 ¶1; 19 ¶12-13

Asaa bolli waati pirddana koshshiyaakko nuuni kuuyana bessennaagaa eriyoogee keehi woppu gaanaadan oottiyaaba! Yihooway Ooppenne Aadhdhiya Daanna gidiyo gishshawu keehi koshshiya ha oosuwaa maara polana. (Roo. 14:10-12) I likkebawunne likke gidennabawu kessido wottiyoobi baynna maaraara maayettiyaabaa ubbatoo pirddanaagaa nuuni wozanappe ammanettana danddayoos. (Doo. 18:25) I likke gidennabaa mule oottenna! Nagaraa gaasuwan gakkida iitaba ubbaa Yihooway muleera xayssiyo wodiyaa nuuni yeemuwan naagoos. Nuna azzanttiyaabay ubbay he wode muleera xayana. (Maz. 72:12-14; Ajj. 21:3, 4) Hegee mule hassayettenna. He keehi ufayssiya wodee gakkanaashin naagiiddi, Yihooway nuuni atto giyoogan bana milatanaadan oottido gishshawu A keehi galatoos. w22.06 13 ¶18-19

Issi loꞌꞌo daannay higgiyaa loytti erana koshshees. I likkebaanne likke gidennabaa loytti erana koshshees. Issi loꞌꞌo daannay oottana koshshiya harabay aybee? I pirddanaappe kase issi allaalliyaa xeelliyaagan tumu naqaasha ubbaa erana koshshees. Yihooway tuma gidida ubbabaa ubbatoo eriyo gishshawu ooppenne aadhdhiya Daanna. Daanna gidida asatuppe dumma hanotan, Yihooway ubba allaalliyaa xeelliyaagan tumubaa ubbaa awudenne erees. (Doo. 18:20, 21; Maz. 90:8) I asay beꞌiyoobaa woy siyiyoobaa denddo oottidi pirddenna. Issi uri bana yelidaageetuppe laattido eeshshati, I tamaaridobaynne deꞌiyo heeray, qassi awu siyettiyaabaynne I qoppiyoobay I oottiyoobaara waani gayttiyaakko Yihooway loyttidi erees. Yihooway wozanan deꞌiyaabaakka erees. I issi uri issibaa oottidoy aybissakko loytti erees. Yihoowappe aybinne geemmana danddayenna. (Ibr. 4:13) Yaatiyo gishshawu, issi allaalliyaa xeelliyaagan ubbabaa I eriyo gishshawu issi urawu atto gees. w22.06 4 ¶8-9

Seexaanay Iyyooba paaccanawu goꞌettido hiillata nuuni loytti akeekana bessees, ayssi giikko, I ha wodiyan nuna paaccanawukka hegaa mala hiillata goꞌettees. Seexaanay nuuni Xoossaa Yihoowa siiqennabadaaninne nu shemppuwaa ashshanawu Yihoowa aggi bayiyaabadan yootees. Seexaanay Xoossay nuna siiqenna, qassi nuuni Xoossaa ufayssanawu baaxetiyo baaxiyaa I akeekenna giidikka yootees. Seexaanay waatanawu maliyaakko nuuni eriyo gishshawu, A worddota ammanokko. Nuna gakkiya paaciyaa nuuni nubaa eriyo injjedan xeellana koshshees. Iyyooba gakkida paacee, I ba shugo miyyiya eranaadaaninne hegaa giigissanaadan A maaddiis. Leemisuwawu, I kaseegaappe aaruwan bana ziqqi oottana koshshiyoogaa eriis. (Iyy. 42:3) Nuna paacee gakkiyo wode, nuunikka nubaa loytti erana danddayoos. Nuuni nu shugo miyyiya erikko, hegaa giigissanawu baaxetana danddayoos. w22.06 23 ¶13-14

Yihooway nuna maaddanawu qaalaa geliis. Leemisuwawu, Yihooway, “Intte ta markkata” giidi yootanaappe kasetidi hagaadan giis: “Neeni haattaa gidduwaara pinniyo wode, taani nenaara gidana. Neeni shaafatu gidduwaara pinniyo wodekka eti nena muukkokkona. Neeni tamaa giddoora aadhdhiyo wode, xuugettakka; lacoikka nena meenna.” (Isi. 43:2) Issi issitoo, nuuni haggaaziyo wode diꞌuwaa mala daro metotinne tamaa mala keehi deexxiya paaceti nuna gakkana danddayoosona. SHin, nuuni aggennan sabbakanaadan Yihooway nuna maaddana. (Isi. 41:13) Ha wodiyan deꞌiya daro asay nu yootiyoobaa siyenna. SHin, hegee nuuni loytti sabbakibeenna gishshataassa gidenna. Nuuni ammanettidi mishiraachchuwaa yootiyoogan Yihooway ufayttiyoogaa eriyo gishshawu minettoos. Kiitettida PHawuloosi hagaadan giis: “Xoossai huuphiyan huuphiyan a daafuraa keenaa ayyo woitana.”—1 Qor. 3:8; 4:1, 2. w22.11 4 ¶5-6

Ha wodiyan, Geeshsha Maxaafaa hiraagay polettiyoogaa beꞌiiddi deꞌoos. Geeshsha Maxaafay kasetidi yootidoogaadan, “dumma dumma qaalan haasayiya kawotettatu” ubban deꞌiya asay Geeshsha Maxaafaa tumaa woykko ‘geeshsha haasayaa’ tamaariiddi deꞌees. (Zak. 8:23; Sof. 3:9) Yihoowa dirijjitiyan 240 biittatun 8,000,000​ppe dariya asay deꞌees; qassi layttan layttan keehi daro asay xammaqettees! SHin eti “ooratta meretaa” maayidoogee woy eta eeshshay laamettidi loꞌꞌidoogee he qoodaappekka keehi aadhdhiyaaba. (Qol. 3:8-10) Daroti pokkobaa oottiyoogaa, kobattiyoogaa, asaa coo ixxiyoogaanne bantta biittaa keehi siiqiyoogaa aggidosona. Isiyaasa 2:4n, “Hegaappe guyyiyan eti mulekka olaa timirttiyaa tamaarokkona” giya hiraagay polettiiddi deꞌees. Nuuni ooratta meretaa maayanawu baaxetiyo wode, asay Xoossaa dirijjitiyaakko yaanaadan oottoosinne nuna kaalettiya Kiristtoos Yesuusa kaalliyoogaa bessoos. (Yoh. 13:35) Ha ubbabay haniyoy aybissee? Yesuusi nuna koshshiyaagaadan maaddiyo gishshaassa. w22.07 9 ¶7-8

Nuuni Yihoowa woossiyo wode bonchchiyoogaa bessiya ogiyan woossana koshshees. Isiyaasi, Hizqqeeli, Daaneelinne Yohaannisi beꞌido maalaalissiya ajjuutatubaa ane qoppa. Eti ubbaykka, Yihoowa keehi bonchchettida Kawodan qonccissidosona. Isiyaasi, Yihooway “bollaaninne xoqqa araatan uttidaagaa” beꞌiis. (Isi. 6:1-3) ‘Zuullaadan phooliya pooꞌoy’ yuushuwan deꞌiyo saluwaa saragallan Yihooway uttidaagaa Hizqqeeli beꞌiis. (Hiz. 1:26-28) “Merinaasappe De7iyaagee” bootta maayuwaa maayidaagaanne A araataappe tamay lacottiyoogaa Daaneeli beꞌiis. (Dane. 7:9, 10) Qassi, keehi loꞌꞌiyaa maata mera zuullay yuushuwan deꞌiyo araatan Yihooway uttidaagaa Yohaannisi beꞌiis. (Ajj. 4:2-4) Zawi baynna Yihoowa bonchchuwaabaa wotti dentti qoppiyoogee, woosan akko shiiqiyo maalaalissiya maataa nuna hassayissees; qassi bonchchiyoogaa bessiya ogiyan woossana koshshiyoogaakka akeekanawu maaddees. w22.07 20 ¶3

Yelagawu, Seexaanay neeni ayyaanaaban loytta diccennaadan digganawu malees. I yaatiyo issi ogee Geeshsha Maxaafay tamaarissiyo amarida timirtteta siranaadan oottiyoogaana. Leemisuwawu, amarida asay nuuni lodda laamiyan yiido gishshawu Xoossay nuna medhdhibeenna giidi ammanttanawu malana danddayees. Neeni naatettan deꞌiyo wode, hegaabaa waaya qoppana. SHin haꞌꞌi timirtte keettan hegaabaa tamaarana danddayaasa; ne asttamaareti yootiyoobay ammanttiyaaba milatana danddayees. SHin eti Medhdhidaagee deꞌiyaakkonne, eranawu mule waayi baaxetana. Leemiso 18:17n, deꞌiya maaraa hassaya: “Kasetidi daannan mootiya uri baarigaarai yiidi a oichchana gakkanaashin, ubbatonkka he urai xillo milatees.” Neeni timirtte keettan tamaariyo ubbabaa ammaniyoogaappe, Xoossaa Qaalay yootiyoobaa minttada xannaꞌana qassi, nu xuufeta pilgga. w22.08 2 ¶2; 4 ¶8

Nuuni Xoossaa Qaalaappe nabbabiyoobaa akeekanawu koyoos. Yaatana xayikko, nuuni nabbabiyoobaappe goꞌettana danddayokko. Leemisuwawu, “Higgiyaa tamaarissiya” issi bitaniyaara Yesuusi haasayidobaa beꞌa. (Luq. 10:25-29) Merinaa deꞌuwaa demmanawu ay oottana koshshiyaakko bitanee oychchido wode, Xoossaa Qaalaappe zaaruwaa demmanaadan Yesuusi A maaddiis. Yesuusi A hagaadan oychchiis: “Higgiyan xaafettidaagee aibee? Neeni ay akeekay?” He bitanee Xoossaanne shooruwaa siiqiyoogaabaa yootiya xiqiseta odiyoogan likkebaa zaariis. (Wog. 19:18; Zaa. 6:5) SHin he bitanee kaallidi giidobaa akeeka: “Ta shooroi oonee?” He bitanee nabbabidobaa akeekibeennaagaa bessiis. Hegaappe denddidaagan, I he xiqiseta waatidi oosuwan peeshshanaakko eribeenna. Nuuni Geeshsha Maxaafaa akeekanawu Yihoowa maadoy koshshees. Yaatiyo gishshawu, nabbabiyoobaa xallan xeelaa wottanawunne nabbabidobaa oosuwan peeshshanawu maaddanaadan A oychcha. w23.02 9 ¶4-5

“Neeni tumaa waata siyadii?” Ha oyshaa neeni darotoo zaaridoogee qoncce. Nuuni nu mala Kiristtaaniyaara loytti erettanawu koyidi koyro oychchiyo oyshatuppe issoy hagaa. Nu ishanttinne michchontti Yihoowa waati eridaakkonne A siiqidaakko siyiyoogaa dosoos, qassi nuuni Yihoowa Markka gidiyoogaa dosiyoy aybissakko etawu yootiyoogan ufayttoos. (Roo. 1:11) Hegaadan haasayiyoogee, nuuni Yihoowa Markka gidiyoogaa dosiyoy aybissakko ubbatoo qoppanaadan maaddees. Qassi Yihoowa anjjuwaa demissiyaanne an sabettanaadan oottiya ogiyan ubbatoo deꞌanawu murttidaageeta nuuni gidanaadan maaddana. Nuuni tumaa siiqiyo daro gaasoy deꞌees. Ubbaappe aaruwan, tumawu Pultto gidida Xoossaa Yihoowa nuuni siiqoos. I saluwaanne saꞌaa Medhdhida wolqqaama Xoossaa xalla gidennan, saluwan deꞌiya nuussi qoppiya siiqo Aawaa gidiyoogaa A Qaalaa, Geeshsha Maxaafaappe erida.— 1 PHe. 5:7. w22.08 14 ¶1, 3

Kiitettida PHawuloosi ba ishanttinne michchontti “lo77o oosuwaa” oottiyoogan siiquwaa bessanaadan minttettiis. (Ibr. 10:24) I ba ishanttanne michchontta haasayiyooba xallan gidennan, oottiyoobankka maaddiis. Leemisuwawu, Yihudan deꞌiya ba mala Kiristtaaneti koshan qohettido wode, PHawuloosi ba mala Kiristtaanetussi koshshiyaabay gakkanaadan maaddiis. (Oos. 11:27-30) PHawuloosi minnidi sabbakiyaabanne tamaarissiyaaba gidikkonne, asatettan maadoy koshshiyoogeeta ubbatoo maaddiyo ogiyaa koyees. Yaatiyoogan, I ba mala Kiristtaaneti Yihooway etawu koshshiyaabaa kunttiyoogaa ammanettanaadan maaddiis. Ha wodiyan nuunikka nu wodiyaa, wolqqaanne eraa goꞌettidi daafabay gakkidoogeeta maaddanawu nu dosan eeno giikko, nu ishanttunne michchonttu ammanoy minnanaadan oottoos. Kumetta saꞌan oosettiya oosuwawu ubbatoo miishshaa immiyoogankka hegaadan oottana danddayoos. Hageetuuninne hara ogetun, Yihooway eta mule aggennaagaa nu ishanttinne michchontti ammanettanaadan maaddoos. w22.08 24 ¶14

Geeshsha Maxaafay polettida daro hiraagata yootees. He hiraagatuppe amaridaageeti polettanaappe daro xeetu layttaa kasetidi xaafettidosona. He hiraagati polettidoogaa taarikee qonccissees. Geeshsha Maxaafaa hiraagaa xaafissiday Yihoowa gidiyoogaa nuuni eriyo gishshawu hegan garamettokko. Beni Baabiloone katamay kunddanaagaa xeelliyaagan odettida hiraagaa qoppa. Hosppuntta xeetu layttan, wolqqaama gidida Baabiloone katamay oyqettanaagaa hananabaa yootiya Isiyaasi ayyaanay kaalettin kasetidi yootiis. I ubba, he katamaa oyqqana bitaniyaa sunttay Qiiroosa gidiyoogaanne I hegaadan waatidi oottanaakko qonccissidi yootiis. (Isi. 44:27–45:2) Baabiloone katamay wurssettan muleera xayanaagaanne asi deꞌenna soho gidanaagaakka Isiyaasi kasetidi yootiis. (Isi. 13:19, 20) Meedoonatinne Parsseti 539 K.K., Baabiloone katamaa oyqqidosona; qassi he gita katamay deꞌiyo sohoy ha wodiyan asi deꞌenna soho gidiis. w23.01 4 ¶10

Yihooway kumetta saꞌan awu goynniya ba so asaa yara gidanaadan nuna dooriis. Hagee nuuni daro goꞌꞌaa demmanaadan oottiya dumma maata! (Mar. 10:29, 30) Nuugaadan Yihoowa siiqiyaanne bantta deꞌuwan I kessido maaraa oosuwan peeshshanawu banttawu danddayettida ubbabaa oottiya nu ishanttinne michchontti kumetta saꞌan deꞌoosona. Nuuni haasayiyo doonay, wogaynne maayiyoobay etaagaappe dummatana danddayees; shin nuuni etaara koyro gayttiyo wodekka eta siiqoos. Saluwan deꞌiya nu siiqo Aawaa sabbanawunne awu goynnanawu issippe shiiqiyoogaa nuuni keehi dosoos, qassi etaara issippetettan deꞌana koshshees. (Maz. 133:1) Eti nu toohuwaa tookkiyoogan issitoo issitoo nuna maaddoosona. (Roo. 15:1; Gal. 6:2) Qassi Yihoowawu haggaaziyoogan minnanaadaaninne A dabbo gididi deꞌanaadan eti nuna minttettoosona. (Ibr. 10:23-25) Nu morkkiyaa Seexaanaa Dabloosanne A iita alamiyaa minnidi eqettanaadan gubaaꞌee maaddennaakko, woni nuuni waananee! w22.09 2-3 ¶3-4

Nuuni sooshal miidiyaa goꞌettiyo wode nu huuphiyaa naagiyoogee metiyaaba gidana danddayees. Nuuni naagettana xayikko, xuura gididabaa akeekennan daro asawu yootana danddayoos. Nuuni xuura gididabaa issitoo elektronike miishshaa goꞌettidi yeddiichchikko, hegaa harati waati goꞌettiyaakko naagana woy hegee daro qohuwaa gattennaadan teqqana danddayokko. Qassi nu huuphiyaa naagiyoogee eqettiyaageeti nu ishanttanne michchontta qohiyaabaa yootanaadan nuna cimmiyo wode coꞌꞌu gaanaadan maaddees. Nu oosoy teqettido woy muleera digettido biittatun polisee nuna qoriyo wode hegaa malabay hanana danddayees. Nu “doonaa barana” giya maaraa hagaaninne hara hanotatun oosuwan peeshshana danddayoos. (Maz. 39:1) Nuuni nu soo asaa, laggeta, ishanttanne michchontta woy hara oonanne gidin, asa ubbawu ammanettiyaageeta gidana koshshees. Qassi nuuni ammanettiyaageeta gidanawu nu huuphiyaa naagana koshshees. w22.09 13 ¶16

Nuuni wozanappe ufayttanawu Xoossaa Qaalaa nabbabananne xannaꞌana koshshees. Yesuusi, “Asi Xoossai haasayiyo qaala ubban de7anaappe attin, oitta xalaalan de7enna” yaagidoy hegaassa. (Maa. 4:4) Yaatiyo gishshawu alꞌꞌo gidida Xoossaa Qaalaa, Geeshsha Maxaafaa nabbabennan issi gallassaynne aadhdhana bessenna. Yihooway nuna siiqiyo gishshawu, nuuni ufayttidi deꞌanawu ay oottana koshshiyaakko Geeshsha Maxaafaa baggaara nuussi yootiis. I nu deꞌuwawu halchchidobi aybakko erida. Nuuni akko shiiqanawu waatana danddayiyaakko, qassi I nu nagaraa atto gaanaadan nuuni ay oottana koshshiyaakko erida. (Erm. 29:11) Nuuni Geeshsha Maxaafaa xannaꞌiyoogan erido tumay nu keehi ufayttanaadan oottiis! Nena gakkiya metuwaa gaasuwan neeni hidootaa qanxxiyo wode ubban Yihoowa Qaalaa kaseegaappe aaruwan nabbabanne wotta dentta qoppa. w22.10 7 ¶4-6

Nuuni akeekay paccidoogeeta gidennaadan Geeshsha Maxaafay minttettiyo loꞌꞌo gaasoy deꞌees. Nuuni nu deꞌuwan Geeshsha Maxaafay yootiyo maarata oosuwan peeshshiyoogan aadhdhida eratettaa demmoos. Nuuni yaatiyo wode, metuwan gelennaadaaninne loꞌꞌobaa kuuyanaadan Geeshsha Maxaafay nuna keehi maaddiyoogaa akeekana. Hegaara gayttidaagan nuuni laamettiiddi deꞌiyaakkonne nuna qoriyoogee loꞌꞌo. Leemisuwawu, neeni Geeshsha Maxaafaa xannaꞌaasanne shiiqota shiiqaasa, shin nena Yihoowawu sheedhdhada xammaqettabeennaba gidikko, neeni hanno gakkanawu xammaqettabeennay aybissakko qoppana bessees. Neeni xammaqettidaba gidikko, mishiraachchuwaa sabbakiyoogaaninne tamaarissiyoogan kaseegaappe aaruwan qara gidaydda deꞌay? Neeni kuuyiyoobay Geeshsha Maxaafaappe neeni tamaaridobaa oosuwan peeshshiyoogaa bessii? Yesuusaagaadan harata bonchchay? Neeni giigissana koshshiyaabay deꞌikko, ‘akeekay paccidoogeetussi eratettaa immiya,’ Yihoowa hassayissuwaa loytta qoppana koshshees.—Maz. 19:7. w22.10 20 ¶8

Xoossaa ayyaanay keehi wolqqaama gidiyoogaa Hizqqeeli akeekiis. Hizqqeeli ajjuutan beꞌidobay geeshsha ayyaanay wolqqaama kiitanchchata maaddiyoogaanne saluwaa saragallaa irzzoti baanaadan oottiyoogaa I akeekanaadan maaddiis. (Hiz. 1:21) Hizqqeeli waanidee? I hanidobaa hagaadan giis: “Taani hegaa be7ido wode, biittan duge [gufannaas].” Hizqqeeli keehi maalaalettido gishshawu biittan duge gufanniis. (Hiz. 1:28) Guyyeppe, Hizqqeeli he maalaalissiya ajjuutaabaa qoppido wode, Xoossaa ayyaanay maaddin I ba haggaazuwaa polana danddayiyoogaa mintti ammanennan waayi aggana. Yihooway Hizqqeelawu hagaadan giis: “Laa asa na7au, denddada ne gediyan eqqa. Taani neeyyo yootana.” He azazoynne Xoossaa ayyaanay Hizqqeeli saꞌaappe denddanawu koshshiya wolqqaa demmanaadan maaddiis. (Hiz. 2:1, 2) Hegaappe simmin, Hizqqeeli haggaazido wode ubban Xoossaa “kushee” hegeekka, Xoossaa ayyaanay A kaalettiis.—Hiz. 3:22; 8:1; 33:22; 37:1; 40:1. w22.11 4 ¶7-8

Yihooway ba tamaaretuppe guyyeera hemettiyaanne eti baana koshshiya ogiyaa etawu yootiya gooba asttamaariyaa mala gidiyoogaa hananabaa yootiya Isiyaasi yootiis. Ha wodiyan, Xoossaa cenggurssaa nuuppe guyyeera siyoos. Waatidi? Daro wodiyaappe kase Xoossaa ayyaanay denttettin xaafettidabay Geeshsha Maxaafan deꞌees. Yaatiyo gishshawu, nuuni Geeshsha Maxaafaa nabbabiyo wode, nuuppe guyyeera Xoossaa cenggurssaa siyoos giyoogaa mala. (Isi. 51:4) Yihooway nuna tamaarissiyoogaappe waanidi loytti goꞌettana danddayiyoo? Isiyaasi naaꞌꞌubaa yootidoogaa akeeka. Koyruwan, “ogee hagaa.” Naaꞌꞌanttuwan, “an biite.” “Ogee” awugaakko eriyoogaa xallay gidenna. Nuuni ‘an baana’ koshshees. Yihoowa dirijjitee Geeshsha Maxaafaappe qonccissiyoobati, Yihooway nuuppe koyiyoobaa tamaarissoosona. Qassi, tamaaridobaa nuuni oosuwan waatidi peeshshanaakko tamaaroos. Nuuni Yihoowawu haggaaziyo wode metuwaa ufayssan genccanawu naaꞌꞌubatakka oottana koshshees. Yaatiyo wode xallan, Yihooway nuna anjjanaagaa ammanettana danddayoos. w22.11 11 ¶10-11

Yesuusi kiittidoogeetuppe daroti hayqqi simmin sohuwaara, worddo Kiristtaaneti gubaaꞌiyaa gelidosona. (Maa. 13:24-27, 37-39) Eti Yesuusa “kaalliyaageetakka bantta geeduwaa kaalettanau wordduwaa” haasayidosona. (Oos. 20:30) Worddo Kiristtaaneti tamaarissido ‘worddo timirttetuppe’ issoy, Geeshsha Maxaafay yootiyoogaadan Yesuusi “daro asaa nagaraa xayssanawu issitoo” yarshshettibeenna, I darotoo yarshsho gididi hayqqana bessees giidi tamaarissiyoogaa. (Ibr. 9:27, 28) Ha wodiyan daro asay he worddo timirttiyaa ammanees. Eti saaminttan saaminttan, ubba issi issitoo galla galla, Yesuusa yarshshuwaa bonchchanawu woosa keetti boosona; hegee Kaatolike haymaanootiyan, “Qurbbaanaa Siraataa” geetettees. Hara haymaanoote dirijjitiyan deꞌiyaageeti Yesuusa hayquwaa Hassayiyo Baalaa bonchchanawu shiiqiyoy darotoo gidenna; shin Yesuusa yarshshoy eta waati goꞌꞌiyaakko akeekokkona. w23.01 21 ¶5

SHaꞌu Layttaa Haaruwaa wode, Yesuusi hayqqidaageeta denttananne Yihoowawu azazettiya ubbay wottiyoobi baynnaageeta gidanaadan maaddana. Yihooway xillota giidi pirddiyoogeeti “biittaa laattananne yan merinau de7ana.” (Maz. 37:10, 11, 29) ‘Wurssetta morkkee hayqoy xayanaagee’ ufayssiyaaba. (1 Qor. 15:26) Merinaa deꞌuwaa hidootawu denddoy Geeshsha Maxaafaa. He hidootay nuuni ha wayssiya wurssetta gallassatun ammanettidi deꞌanaadan maaddees. SHin Yihoowa ufayssanawu, nuuni merinawu deꞌanawu koyiyoogaappe aadhdhiyaabaa oottana koshshees. Nuuni Yihoowawunne Yesuusawu ammanettidi deꞌiyo waanna gaasoy, eta keehippe siiqiyoogaa. (2 Qor. 5:14, 15) Hegaadan siiqiyoogee nuuni eta milatanaadaaninne nuussi deꞌiya hidootaa haratussi yootanaadan oottees. (Roo. 10:13-15) Nuuni nu xallaa siiqennaageetanne kehiyaageeta gidiyo wode, Yihooway merinawu ba dabbo oottanawu koyiyo asa gidoos. w22.12 6-7 ¶15-16

Nuna yedetay gakkiyo wode nuuni woppu giidi deꞌanaadan maaddiya darobati xayana danddayoosona. Nuuni kaallidi aybi hananeeshsha gi hirggidi unꞌꞌettana danddayoos. Hegee wottin deꞌiyaaba. Gidikkonne, nuuni naagettana koshshees. Yesuusi bana kaalliyaageetuyyo, yedetay eti xubettanaadan oottana danddayiyoogaa yootiis. (Yoh. 16:1, 2) Yesuusi nuna yedetay gakkanaagaa yootido wode, nuuni ammanettidi deꞌana danddayiyoogaakka nuussi yootiis. (Yoh. 15:20; 16:33) Nu oosoy teqettikko woy muleera digettikko, macara biiruwaappenne cimatuppe nuussi kaaletoy imettana danddayees. Hegee nuna naagees, ayyaanaa qumaa ubbatoo demmanaadan oottees, qassi nuussi danddayettida keenan ubbatoo sabbakanaadan maaddees. Imettiya kaaletuwaa azazettanawu neessi danddayettida ubbabaa ootta. (Yaaq. 3:17) Qassi erana bessenna urawu, nu ishanttubaanne michchonttubaa xeelliyaagan xuurabaa mule yootana koshshenna.—Era. 3:7. w22.12 20-21 ¶14-16

Ha wodiyan, Yesuusi ba erissiyo ashkkarati Xoossaa Kawotettaabaa saꞌa ubban sabbakiyo wode eta kaalettees. I ba gelido qaalaa poliis. Gubaaꞌe shiiqotunne nu xuufetu baggaara, mishiraachchuwaa waati sabbakanaakko Yesuusi nuna tamaarissees; qassi he oosuwaa oottanawu koshshiya ubbabaakka I nuussi immees. (Maa. 28:18-20) Nuuni minnidi sabbakiyoogaaninne tamaarissiyoogan, qassi Yihooway ha alamiyaa xayssiyo wodiyaa naagiiddi beegottidi deꞌiyoogan Yesuusi nuuppe koyiyoobaa oottoos. Ibraawe 6:11, 12n deꞌiya zoriyaa oosuwan peeshshiyoogan, “wurssettai gakkanaassi” nu hidootaa mintti oyqqoos. Yihooway ha alamiyaa xayssiyo gallassaanne saatiyaa kuuyiis. He gallassay gakkiyo wode, Yihooway Geeshsha Maxaafan deꞌiya hiraagata ubbaa polana. SHin, nuuni issi issitoo alamiyaa wurssettay gamꞌꞌiis giidi qoppana danddayoos. Gidikkonne, Yihoowa gallassay “gam77enna.” (Imb. 2:3) Simi yaakko, Yihoowakko ‘xeelliyoogan nuna ashshiya Xoossaa naagiyoogaa’ bessanawu murttidaageeta gidoos.—Mik. 7:7. w23.02 19 ¶15-16

Deriyaa huuphiyaa kiyiya issi uraa halchchoy deriyaa xeeraa gakkiyoogaa. I deriyaa kiyiiddi eqqi ekkidi loꞌꞌiyaabata beꞌiyoogan ufayttanaadan oottiya darobati ogiyan deꞌoosona. Hegaadankka, metuwaa genccanaadan Yihooway nena waati maaddidaakko takki gaada qoppanawu wodiyaa bazza. Omarssi omarssi nena hagaadan oychcha: ‘Hachchi Yihooway tana ayba ogiyan maaddidee? Metoy deꞌishinkka genccanaadan Yihooway tana waati maaddidee?’ Yihooway nena maaddanawu oottidobatuppe baa giishin issibaa neeni yootana danddayiyaakkonne akeeka. Metoy neeppe qaarettanaadan neeni woossana danddayiyoogee tuma. (Pili. 4:6) SHin, nuuni haꞌꞌi demmido anjjotakka akeekana bessees. Yihooway nuna minttanawunne genccanaadan maaddanawu qaalaa geliis. Yihooway nena maaddiiddi deꞌiyo gishshawu, ubbatoo A galata. Metiya wodiyaa genccanaadan Yihooway maaddiyoogaa neeni he wode akeekana.—Doo. 41:51, 52. w23.01 19 ¶17-18

Nena hagaadan oychcha: ‘Ha iita alamee mata wode xayanaagaa akeekidoogaa taani ta deꞌuwan bessiyaanaa? Yuniversttiyaa geliyoogaa woy oosuwaa dooriyoogaa xeelliyaagan taani kuuyiyoobay ta deꞌuwan aybippenne aaruwan Yihoowa haggaazuwaa kaseyiyoogaa bessii? Yihooway taassinne ta so asawu koshshiyaabaa kunttanaagaa ammaniyaanaa?’ Yihooway nuuni oottiyo ubbaban A sheniyaara maayettiyaabaa oottanawu baaxetiyoogaa beꞌiyo wode keehi ufayttees. (Maa. 6:25-27, 33; Pili. 4:12, 13) Nuuni ubbatoo nu qofaa qoridi koshshiyaaban laamettana bessees. PHawuloosi Qoronttoosan deꞌiyaageetussi hagaadan giis: “Ammanuwan intte de7iyaakkonne ane inttena qoridi pirddite.” (2 Qor. 13:5) Yaatiyo gishshawu, Yihoowaagaadan qoppanawunne A ufayssanawu koshshiya ubbabaa oottanawu Xoossaa Qaalaa nabbabiyoogan nu qofaa ubbatoo laammana koshshees.—1 Qor. 2:14-16. w23.01 9 ¶5-6