Xiqimita

Nuuni ubbay gubaaꞌe shiiqotun issippe yexxananne loytti giigettidi qofaa yootana danddayoos. Amaridaageeti shiiqotun yexxanawunne qofaa yootanawu metootoosona. Neenikka metootay? Yaatikko, yayyennaadan harata aybi maaddidaakko akeeka. Eti mazamuriyaa yexxiyo wode wozanappe yexxiyoogee maaddiyoogaa akeekidosona. Nuuni nu shiiqotun mazamureta yexxiyo waanna gaasoy Yihoowa sabbiyoogaa. Hegaa gishshawu, shiiquwawu giigettiyo wode, mazamuretakka meezeta;qassi mazamuretu danttoti shiiquwan tamaariyoobaara waani gayttiyaakko akeeka. Qassi neeni qaalatubaa qoppiyo wode, ne loytta yexxiyoogaa woy yexxennaagaa xeelliyaagan darin qoppoppa. Qofaa yootiyoogee issootu isootussi deexxana danddayees. Eta maaddanabay aybee? Ubbatoo qofaa yootanawu baaxeta. Ne zaaroy qantta, qonccenne waanna qofaa qonccissiyaabaa gidana bessiyoogaa hassaya. Gubaaꞌe shiiqotun Yihoowa sabbanawu nu oottiyoobaa I xoqqu oottidi xeellees. w22.04 7-8 ¶12-15

“Maaddiyaagaa” giya qaalay maaduwaa demmanawu waassiya ura maaddanawu woxxiya ura qonccissiyaaba. Yihooway unꞌꞌettida issi ura ashshanawu woxxiyoogaa ane qoppa. Ha qonccissoy Yihooway nuna maaddanawu keehi koyiyoogaa bessiyoogaa neeni maayettanaagee qoncce. Yihoowa maaduwan nuuni metuwaa ufayssan genccana danddayoos. Yihooway nuna maaddiyo amarida ogeti awugeetee? Hegaa zaaruwaa beꞌanawu, Isiyaasa maxaafaa ane beꞌoos. Aybissi? Yihooway Isiyaasayyo qonccissido hiraagatuppe daroti, ha wodiyan Xoossaa ashkkaratussi haniyo gishshataassa. Qassi, nuuni metootennan akeekana danddayiyo ogiyan Isiyaasi Yihoowaabaa darotoo qonccissiis. Isiyaasa shemppo 30y amarida leemisota yootees. He shemppuwan Yihooway ba asaa waati maaddiyaakko qonccissiya keehi loꞌꞌo leemisota Isiyaasi goꞌettiis. Yihooway (1) nu woosaa loytti siyiyoogaaninne zaariyoogan, (2) nuna tamaarissiyoogan, qassi (3) nuna ha wodiyaaninne sinttappe anjjiyoogan maaddiyoogaa Isiyaasi yootiis. w22.11 8 ¶2-3

Yesuusi Samirnneesaaninne Pilaadelifiyan deꞌiya gubaaꞌetussi kiitaa kiittiis. Kiristtaaneti ammanettidi deꞌikko Yihooway eta woytiyo gishshawu, eti yedetaa yayyennaadan I etawu yootiis. (Ajj. 3:10) Nuuni yedetay gakkanaagaa naagananne hegaa genccanawu eeno gaana bessees. (Maa. 24:9, 13; 2 Qor. 12:10) Ha wodiyan “Godaa gallassan,” Xoossaa asaa bolli yedetay gakkanaagaa Ajjuutaa maxaafay yootees. (Ajj. 1:10) Saluwan Xoossaa Kawotettay eqqi simmin sohuwaara olay denddidoogaa Ajjuutaa shemppo 12y yootees. Mikaaꞌeela geetettida bonchchettida Yesuus Kiristtoosinne A olanchchati Seexaanaaranne daydanttatuura olaa olettidosona. (Ajj. 12:7, 8) Hegaappe denddidaagan, Xoossaa morkketi xoonettidoogeenne duge saꞌawu olettidoogee saꞌaaninne an deꞌiyaageetu bolli wolqqaama metoy gakkanaadan oottiis.—Ajj. 12:9, 12. w22.05 5 ¶12-13

Yihoowa pirdday ubbatoo suure. I asa asappe mule shaakkenna. Yihooway issi uray loꞌꞌiyaagaa, dure, hayttatidaagaa, woy daro eray deꞌiyoogaa gidiyo gishsha xallawu mule atto geenna. (1 Sam. 16:7; Yaaq. 2:1-4) Yihooway issibaa oottanaadan ooninne wolqqanttana woy mattaayiyaa awu immana danddayenna. I bawu siyettiyaabaa kaallidi mule kuuyenna. (Kes. 34:7) Yihooway nubaanne nu hanotaa xeelliyaagan ubbabaa eriyo gishshawu ooppenne aadhdhiya Daanna. (Zaa. 32:4) Ibraawettuwan xaafettida Geeshsha Maxaafaa xaafidaageeti Yihoowa maarotay keehi dumma gidiyoogaa akeekidosona. Issi maxaafay yootiyoogaadan eti issi issi hanotatun goꞌettido Ibraawetto qaalay “Xoossay nagaranchchatuyyo atto giyoogaa xallaa qonccissees. He qaalay issi uri hara urawu atto giyoogaa mule qonccissiyaaba gidenna.” Nagaraappe simmida uraa muleera atto giyo maatay deꞌiyoy Yihoowa xalaalaassa. w22.06 4 ¶10-11

Intte intte naata intterkka dichchiyaaba gidikko woy haymaanootiyan issi mala gidenna keettan deꞌiyaaba gidikko, intte oottiyoobay harata minttettiyoogaanne maaddiyoogaa ammanettite. Intte intte naꞌa maaddanawu baaxetiyo baaxiyaa I ekkennan ixxikko shin? Naꞌa loohissiyoogee wode ekkiyaaba gidiyoogaa hassayite. Intte zerettaa zeriyo wode, hegee diccidi ayfiyaa mitta gidaneeshsha giidi issi issitoo qoppana danddayeeta. Intte he mittay ayfanaadan oottana danddayennaba gidikkonne, hegee loytti diccanaadan aggennan haattaa ushsheeta. (Mar. 4:26-29) Hegaadankka, issi aayyiyaa ba naati Yihoowa siiqanaadan baaxetiyo baaxee eta tumuppe maaddaneeshsha gaada issi issitoo qoppana danddayawusu. Intte naati kuuyiyoobaa intte diggana danddayekketa. SHin intte eta loohissanawu inttessi danddayettida ubbabaa aggennan oottikko, eti Xoossaara dabbotanaadan maaddana danddayeeta. w22.04 19-20 ¶16-17

Solomoni Yihoowawu ammanettidi goynnido wode, babaa bessiyaagaadan xeelliis. I yelagatettan, oottana danddayennabay deꞌiyoogaa akeekido gishshawu, kaaletuwaa demmanawu Yihoowa oychchiis. (1 Kaw. 3:7-9) Solomoni ba haaruwaa doomettan, otorettiyoogee keehi qohiyoogaakka akeekiis. Solomoni ba zoriyaa guyyeppe oosuwan peeshshennan aggidoogee azanttiyaaba. I kawoti simmidi amarida wodiyaappe guyyiyan otorettiyoogaa doommidi Xoossaa higgiyawu azazettibeenna. Leemisuwawu, Ibraawe kawuwawu imettida higgetuppe issoy “A wozanaa balettennaadan, kawoi cora maccaasaa ekkoppo” giyaagaa. (Zaa. 17:17) Solomoni he higgiyawu azazettennan ixxidi 700 machchotanne 300 baakkota shiishshiis! (1 Kaw. 11:1-3) Solomoni hegee bana qohenna giidi qoppennan waayi aggenna. SHin Solomoni Yihoowawu azazettennan ixxidoogaappe denddidaagan guyyeppe A iitabay gakkiis.—1 Kaw. 11:9-13. w22.05 23 ¶12

Asay ha wodiyan issi gitabaa kuuyana bessees. Eti saluwaa saꞌaa haariyo maatay deꞌiyo Xoossaa Yihoowawu exataneeyye, awu suutta morkke gidida Seexaanaa Dabloosawu exatanee? Eti naaꞌꞌaappe gidduwan deꞌana danddayokkona. Eti kuuyiyoobay eti merinawu deꞌanaadan woy deꞌennaadan oottana. (Maa. 25:31-33, 46) ‘Gita waayiyaa’ wode, eti attanaagaa woy xayanaagaa erissiya malaatay eta bolli wodhdhana. (Ajj. 7:14; 14:9-11; Hiz. 9:4, 6) Neeni Yihoowa haaruwawu exatanawu doorikko, loꞌꞌobaa kuuyadasa. Neeni haꞌꞌi harati suurebaa kuuyanaadan maaddanawu koyaasa. Ammanettidi Yihoowa haaruwawu exatiyaageeti daro anjjota demmana. Nuuni ha keehi koshshiya tumaa xannaꞌana bessees. Yaatiyoogee aggennan Yihoowawu haggaazanawu nuuni murttido murttiyaa yaa minttana. Hegaa bollikka, nuuni tamaaridobaa harati Yihoowawu haggaazanawu kuuyanaadaaninne aggennan awu haggaazanaadan eta maaddanawu goꞌettana danddayoos. w22.05 15 ¶1-2

Nuuni nu morkketa gidennan, Yihoowa siyana koshshees. Yihooway Iyyoobawu haasayiyo wode Iyyoobi loytti siyiis. Xoossay Iyyoobawu keehi qoppiyoogaa I akeekanaadan maaddanawu amarida oyshata A oychchiis. Iyyoobi bana ziqqi oottidi Yihoowa loꞌꞌotettaa nashshiyoogaa bessiya ogiyan zaariis. I hagaadan giis: “Taani kase nebaa ta haittan siyaas; shin ha77i ta aifiyan nena be7aas.” (Iyy. 42:5) Iyyoobi bidinttan uttido wode he qofaa haasayennan aggenna; qassi A bolla ubban iita masunttay kiyiis. Gidikkonne, Yihooway Iyyooba siiqiyoogaanne an ufayttiyoogaa yootiis. (Iyy. 42:7, 8) Ha wodiyankka, asay nuna cayananne nuuni nuna pattennabadan qoppanaadan oottana danddayees. Eti nu sunttaa woy nu dirijjitiyaa sunttaa moorana danddayoosona. Paacee nuna gakkiyo wode nuuni Yihoowawu ammanettidi deꞌanaagaa Seexaanay eriyoogaa Iyyooba taarikiyaappe tamaaroos. w22.06 24 ¶15-16

Gita Baabiloona xayiyo wode, saluwan deꞌiyaageeti keehi ufayttikkonne, hegaappe aaruwan ufayttanaadan oottiya harabay deꞌees. (Ajj. 19:1-3) Ajjuutaa maxaafay ‘Dorssaa bullachchay’ keehi ufayssiyaaba gidiyoogaa yootees. Armmageedoona olaappe guutta kasetidi 144,000ti ubbay saluwaa baana. SHin, hegee Dorssaa bullachchaa wode gidenna. (Ajj. 21:1, 2) Dorssaa bullachchay Armmageedoona olaappe guyyiyan Xoossaa morkketi ubbay xayi simmin gidana. (Maz. 45:3, 4, 13-17) Dorssaa bullachchan aybi hananee? Aqo deꞌoy attumaageenne maccaara issuwaa gidanaadan oottees. Hegaadankka, Dorssaa bullachchay Kawuwaa Yesuus Kiristtoosinne awu “bullashettiya” 144,000ti issuwaa gidanaadan oottees. Ha bullachchay 1,000 layttawu saꞌaa haarana ooratta kawotettay eqqanaadan oottana.—Ajj. 20: 6. w22.05 17 ¶11-13

Yesuusi wurssettaa wodiyan ayyaanaabaa qumaa giigissanaadan ‘ammanettida wozannaama ashkkaraa’ sunttanaagaa kasetidi yootiis. (Maa. 24:45) Hegaadan haniis. Xoossaa asawunne tumaa siyanawu koyiya asawu “koshshiyo wodiyan” ayyaanaabaa qumaa giigissanaadan, ayyaanan tiyettida amarida asata Yesuusi sunttiis. He asati banttana haratu ammanuwawu goda giidi qoppokkona. (2 Qor. 1:24) SHin Yesuus Kiristtoosi Xoossaa asaa “kaalettiyaagaanne halaqa” gidiyoogaa eti akeekoosona. (Isi. 55:4) Ammanettida wozannaama ashkkaray tumaa siyanawu koyiyaageeti Xoossaa Qaalaa tumaa tamaaranaadan, 1919​ppe doommidi dumma dumma xuufeta giigissiis. Tumaa siyanawu koyiyaageeti Geeshsha Maxaafaa koyro timirtteta eranaadan maaddanawu Zi Harp of God giyo maxaafay 1921n giigiis. Guyyeppe hara xuufetikka giigidosona. Neeni saluwan deꞌiya nu Aawaa eranaadaaninne siiqanaadan nu xuufetuppe awugee maaddidee? w22.07 10 ¶9-10

Yihooway kehiyoogan ooppenne aadhdhees. Neeni awu ay immikkonne, I hegaappe aadhdhiyaabaa neessi zaarettidi ubbatoo immana. (Mar. 10:29, 30) Neeni ha iita alamiyankka ufayssiyaa, goꞌꞌiyaanne giiga deꞌuwaa deꞌanaadan I maaddana. Qassi hagee doometta xalla. Neeni ne siiqo Aawawu merinawu haggaazana danddayaasa. Neeni ne Aawaa siiqiyo siiqoy ubbatoo diccana, qassi neenikka aagaadan merinawu deꞌana. Neeni ne huuphiyaa Xoossawu sheedhdhada xammaqettiyo wode, ne Aawawu tumuppe alꞌꞌo gididabaa immiyo maataa demmaasa. Hanno gakkanawu neeni ufayttiyo loꞌꞌobaa ubbaanne ufayssiya wodiyaa ubbaa I immiis. Neenikka saluwaanne saꞌaa Godawu baynna issibaa awu immana danddayaasa, hegeekka ne dosan awu ammanettada haggaaziyoogaa. (Iyy. 1:8; 41:11; Lee. 27:11) Hagee aybippenne aadhdhiya deꞌo gidiyoogee qoncce. w23.03 6 ¶16-17

Neeni panttatettaa layttan deꞌiyo wode mattumaa gaytettaa koshshay darana danddayees. Qassi issi issitoo harati nena hegawu denttettana danddayoosona. Seexaanay neeni yaatanaadan koyees. Neeni kandduwan geeshsha gidanaadan aybi maaddana danddayii? (1 Tas. 4:3, 4) Neeni Yihoowa woossiyo wode, neeyyo siyettiyaabaa awu yoota. Qassi I nena minttanaadan A oychcha. (Maa. 6:13) Yihooway nena qaxxayanawu gidennan, maaddanawu koyiyoogaa hassaya. (Maz. 103:13, 14) Ne metuwaa nerkka giigissanawu maloppa. Neeni baaxetaydda deꞌiyoobaa nena yelidaageetussi yoota. He allaalliyaabaa haasayiyoogee metana danddayikkonne, yaatiyoogee keehi koshshiyaaba. Geeshsha Maxaafaa nabbabiyoogaaninne hegan deꞌiya maarata wotta dentta qoppiyoogan Yihoowa ufayssiya loꞌꞌobaa metootennan kuuyana danddayaasa. Neeni issibaa xeelliyaagan Yihoowa qofaa akeekiyo gishshawu, ubbaban neeyyo higgiyaa koshshennaagaa akeekana. w22.08 5 ¶10-12

So asawu huuphe gidida Kiristtaanee ba soo asawu deꞌuwaassi koshshiyaabaa kunttiyo aawatettaa xoqqu ootti xeellees. Neeni so asawu huuphe gidikko, ne soo asawu koshshiya qumaa shiishshanawu woy deꞌiyoosaa demmanawu danddayikke gaada hirggennan aggakka. Qassi neeni ne oosuwaappe yedetettikko, hara ooso demmana danddayikke gaada yayyennan waaya aggana. Woy qassi guutta miishshan deꞌiyoogee neeyyo danddayettennaba gaada qoppennan aggakka. Seexaanay daro asay hegaadan yayyiyoogaa gaasuwan Yihoowawu haggaaziyoogaa agganaadan oottiis. Nuuni Yihooway nuna siiqenna, qassi nu soo asawu koshshiyaabaa kunttanaadan nuna maaddenna giidi qoppanaadan oottanawu Seexaanay malees. Hegaappe denddidaagan, nuuni nu oosuwaappe yedetettennan agganawu nuussi danddayettida ubbabaa oottana bessees giidi qoppana danddayoos. Ubba qassi, Xoossaara nu dabbotido dabbotaa moorana danddayiyaabaa oottana danddayoos. w22.06 15 ¶5-6

Nu Xoossay “qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa” gidiyoogaa eroos. (Kes. 34:6) Yihooway suure pirddaa dosees. (Isi. 61:8) Nuuni waayettiyoogaa I beꞌiyo wode azzanees, qassi I meto ubbaa xayssanawu keerido wodiyaa yeemuwan naagees. (Erm. 29:11) Hegee ayba ufayssiyaabee! Nuuni Yihoowa keehi siiqiyo gaasotuppe issoy hagaa. Nuuni tumaa siiqiyo hara gaasoy aybee? Tumay nuna keehi goꞌꞌees. Ane issi leemisuwaa beꞌa. Geeshsha Maxaafay yootiyo tumay nu hidootaara gayttidaba. He biratay markkabee qaaxxennaadan maaddiyoogaadan, Geeshsha Maxaafay yootiyo nu hidootay metoy gakkishinkka nuuni woppu gaanaadan maaddees. Hachchi gallassaa xiqisiyan, kiitettida PHawuloosi tiyettida Kiristtaaneti demmana saluwaa hidootaabaa yootiiddi deꞌees. SHin ha xiqisee, gannate gidida saꞌan merinawu deꞌanawu yeemuwan naagiya Kiristtaanetussikka hanees. (Yoh. 3:16) Merinaa deꞌuwaa hidootaabaa eriyoogee keehi ufayssiyaaba. w22.08 14-15 ¶3-5

Siiqoy ammanettiyoogaara gayttidaba. Koyro Qoronttoosa shemppo 13y nuuni ishanttun ammanettanaadan woy etan zaarettidi ammanettanaadan nuna maaddana danddayiya siiquwaa macarata yootees. (1 Qor. 13:4-8) Leemisuwawu, paydo 4y hagaadan gees: “Siiqoi danddayanchcha. Siiqoi kehees.” Yihooway nuuni A bolli nagaraa oottiyo wodekka nubaa danddayees. Hegaa gishshawu, nu ishantti nuna hanqqettissiyaabaa woy qohiyaabaa haasayikko woy oottikko nuuni eta danddayana bessees. Paydo 5y gujjidi hagaadan gees: “[Siiqoy] yiillotenna. Siiqoi naaqettidobaakka paidenna.” Nu ishantti nuna naaqqidobaa ubbatoo hassayanawu koyokko. Nuuni ‘elle hanqqettana’ koshshennaagaa Eranchchaa 7:9y yootees. Ne ishanttanne nu michchontta Yihooway xeelliyoogaadan xeellanawu baaxeta. Xoossay eta siiqeesinne eta nagaraa qoodenna. Nuunikka hegaadan oottana koshshees. (Maz. 130:3) Eta balan xeelaa wottiyoogaappe eta loꞌꞌo eeshshaa akeekanawu baaxeta.—Maa. 7:1-5. w22.09 3-4 ¶6-7

Daaneela maxaafay wurssetta wodiyan kayan kayan hanana ufayssiyaabata yootees. Leemisuwawu, Mikaaꞌeela geetettida Yesuus Kiristtoosi ‘Xoossaa asaa heemmanawu denddanaagaa’ Daaneela 12:1y yootees. He hiraagay Yesuusi Xoossaa Kawotettaa Kawo gididi saluwan haariyoogaa doommido 1914n polettiyoogaa doommiis. Qassi “kawotetti doommoosappe doommin, he wode gakkanaashin, be7i erenna meto” wode Yesuusi ‘denddanaagaa’ Daaneeli yootiis. He “meto wodee” Maatiyoosa 24:21n odettida ‘gita waayiyaara’ issi mala. He meto wodiyaa wurssettan hegeekka Armmageedoona olaa wode Yesuusi denddana woy Xoossaa asaa ashshana. Ajjuutaa maxaafay hegeeta “daro waayiyaa waayidi” yiida “zawai bainna daro asaa” giidi qonccissees.—Ajj. 7:9, 14. w22.09 21 ¶4-5

Haꞌꞌi deꞌo maxaafan xaafettida sunttay qucettana danddayees. Hegee Yihooway koyro eta sunttaa qucettana danddayiya irssaasiyan xaafidoogaa mala. (Ajj 3:5) Nu sunttay qucettana danddayenna biiriyan he maxaafan xaafettidi ubbatoo deꞌanaakkonne nuuni shaakki erana koshshees. Deꞌo maxaafan eta sunttay xaafettido koyro citan deꞌiyaageeti Yesuusaara saluwan haaranawu doorettidaageeta. Kiitettida PHawuloosi Piliphphisiyuusan deꞌiya, ‘banaara issippe oottiyaageetussi’ yootidoogaadan, Yesuusaara haaranawu doorettida, tiyettidaageetu sunttay deꞌo maxaafan xaafetti uttiis. (Pil. 4:3) SHin eta sunttay he maxaafaappe qucettenna mala eti ubbatoo ammanettidi deꞌana koshshees. Eta bolli wurssetta maatafay wodhdhi simmin, he maxaafan eta sunttay xayenna hanotan xaafettana; hagee eti hayqqanaappe kase woy gita waayee doommanaappe kase haniyaabaa.—Ajj. 7:3. w22.09 14 ¶3; 15 ¶5-6

Neeni hagaa malabaa ootta eray? Neeni dosiyo qumaa issi uri kattiis. SHin maanawu gidiya wodee neessi xayido woy harabaa qoppiyoogan ne qofay shaahettido gishshawu, baariyo wode ubban malꞌꞌuwaa masuhaa shaakkennan aggana danddayaasa. Neeni ma wurssa simmada eesuwan miidoogaa akeekaasa, yaatada malꞌꞌuwaa shaakkaydda leddan miidaba gidarkkinaashsha gaasa. Nuuni Geeshsha Maxaafaa nabbabiyo wodekka hanotay hegaa mala gidana danddayees. Issi issitoo, nuuni Geeshsha Maxaafan deꞌiyaabaa loytti akeekennan eesuwan nabbaboos. Xoossaa Qaalaa nabbabiyo wode takki gaada qoppa. Taarikiyaa beꞌiyaabadaaninne he taarikiyan deꞌiya asati haasayiyo cenggurssaa siyiyaabadan qoppa. Qassi neeni nabbabiyoobaa loytta qoppa. Yaatiyo wode, neeni keehi ufayttana. Ayyaanaabaa qumaa bessiya wodiyan giigissanaadan, Yesuusi ammanettida wozannaama ashkkaraa sunttiis; qassi nuuni ayyaanaabaa qumaa loytti maana danddayoos. (Maa. 24:45) Ammanettida ashkkaray giigissiyo ubbabawu denddoy ayyaanaa kaaletuwan xaafettida Geeshsha Maxaafaa.—1 Tas. 2:13. w22.10 7-8 ¶6-8

Wurssetta gallassatun daro asati qilliicciyaageeta gidanaagaa Geeshsha Maxaafay yootees. (2 PHe. 3:3, 4) ‘Bantta Xoossi baynna amuwaa’ eti kaallanawu koyiyo gishshawu hegaadan oottoosona. (Yih. 7, 17, 18) Nuuni qilliicciyaageeta gidennaadan waani naagettana danddayiyoo? Issi ogee boriyaageetuura laggetennan aggiyoogaana. (Maz. 1:1) Hegaa giyoogee kaddidaageeti yootiyoobaa siyana woy etabaa aybanne nabbabana koshshenna giyoogaa. Nuuni boriyoogaappe qassi Yihoowappenne A dirijjitiyaappe imettiya kaaletuwaa siriyoogaappe naagettana koshshees. Yaatiyo gishshawu, nuna hagaadan oychchana koshshees: ‘Ooratta kaaletoy imettiyo wode, woy kase akeekidobay laamettiyo wode taani ubbatoo amassaliyaanaa? Taani aawatettay deꞌiyoogeetun balaa koyiyaanaa?’ Nuuni yaatiyoogaa sohuwaara aggiyo wode Yihooway nunan ufayttana.—Lee. 3:34, 35. w22.10 20 ¶9-10

Hizqqeeli I haggaaziyo moottan deꞌiya, “morgge zozzanne wozana muume” asatussi sabbakanaadan geeshsha ayyaanay awu wolqqaa immiis. Yihooway Hizqqeelayyo hagaadan giis: “Taani nenakka etaagaadan morgge zozzanne mino oottana. Taani ne som77uwaa salo giyo shuchchaappe aaro minniya shuchchaa oottana. . . . Etayyo yayyoppa; woikko etayyo shabbirettoppa.” (Hiz. 3:8, 9) Yihooway Hizqqeelawu hagaadan giidoogaa mala: ‘Asay morgge zozza gidiyoogee neeni hidootaa qanxxanaadan oottoppo. Taani nena minttana.’ Hegaappe simmin, Xoossaa ayyaanay Hizqqeela I sabbakiyo moottaa efiis. Hizqqeeli, ‘Yihoowa kushee ta bolli minni uttiis’ yaagiis. Hananabaa yootiyaagee xalatettan yootanawu I sabbakanabaa issi saaminttawu loytti tamaarana koshshiis. (Hiz. 3:14, 15) He wode wombbaakko, ‘an ayyaanay gelido’ sohuwaa baanaadan Yihooway awu yootiis. (Hiz. 3:23, 24) Hizqqeeli ba haggaazuwaa doommanawu giigetti uttiis. w22.11 4-5 ¶8-9

Hananabaa yootiya Imbbaaqooma daro metoy gakkiis. Issi wode, Yihooway A siiqiyoogaa I siriis. Hegaa gishshawu, I bawu siyettiya ubbabaa woosan Yihoowawu yootiis. Yihooway ammanettidi awu oottiyaagee wozanappe woossido woosaa siyiis. (Imb. 2:2, 3) Imbbaaqoomi Yihooway ba asaa waati ashshidaakko wotti dentti qoppi simmidi, zaarettidi keehi ufayttiis. Yihooway A siiqiyoogaanne I ay metuwaakka genccanaadan maaddanaagaa ammanettiis. (Imb. 3:17-19) Nuuni ay tamaariyoo? Nena metoy gakkiyo wode, Yihoowa woossa qassi neessi siyettiyaabaa awu yoota. Yaatada I maaddanaadan oychcha. Neeni yaatiyo wode, genccanawu koshshiya wolqqaa Yihooway neessi immanaagaa ammanettana danddayaasa. Qassi, nena I maaddidoogaa akeekiyo wode, neeni kaseegaappe aaruwan an ammanettana. Neeni Yihoowakko shiiqada deꞌanawu maaddiyaabata ubbatoo oottikko, neenikka metoy woy siree Yihoowappe nena shaakkanaadan paqqadakka.—1 Xim. 6:6-8. w22.11 15 ¶6-7

Yesuusinne danobaa oottidi A miyyiyan kaqettida naaꞌꞌu asati, waayiyaappe denddidaagan hayqqana hanoosona. (Luq. 23:32, 33) Danobaa oottida naaꞌꞌu asatikka Yesuusa bolli qilliiccidosona. (Maa. 27:44; Mar. 15:32) SHin etappe issoy ba qofaa laammiis. I hagaadan giis: “Yesuusaa, neeni ne kawotettaa wolqqan yiyo wode, tana dogoppa.” Yaagin Yesuusi hachchi gallassaa xiqisiyan deꞌiya qofaa yootiis. (Luq. 23:39-43) Danobaa oottida bitaniyawu Yesuusi yootidobay, Gannatiyan deꞌoy ay mala gidanaakko nuuni qoppanaadan oottana koshshees. Sarotettay kumido Kawuwaa Solomona haaruwaappe nuuni Gannatiyaa xeelliyaagan issi issibaa erana danddayoos. Geeshsha Maxaafay Yesuusi Solomonappe aadhdhiyoogaa yootees. Yesuusi banaara haariyaageetuura saꞌaa loꞌꞌiya gannate oottanaagaa nuuni ammanettana danddayoos. (Maa. 12:42) ‘Hara dorssati’ Gannatiyan merinawu deꞌanawu ay oottana koshshiyaakko eranawu koyiyoogee qoncce.—Yoh. 10:16. w22.12 8 ¶1; 9 ¶4

Yihooway nuuni akko waassiyo wode siyanaagaanne nu woosaa eesuwan zaaranaagaa Isiyaasi yootiis. I gujjidi hagaadan giis: “I intte waasuwaa siyiyo wode, intteyyo zaaruwaa immana.” Ha minttettiya qofay, nu Aaway maaduwaa koyidi bana oychchiyaageeta maaddanawu keehi koyiyoogaa nuna hassayissees. Hegaa eriyoogee nuuni ufayssan genccanaadan maaddees. Yihooway nu ubbaa woosaa loytti siyees. Nuuni hegaadan giyoy aybissee? Koyro xaafettido doonan qonccidoogaadan, Isiyaasa shemppo 30 koyro shaahuwan Yihooway ba asaa cita xekkan qonccissido gishshawu, “intte” giya qaalay deꞌees. SHin, paydo 19n odettidabay issi asassa. Isiyaasi hagaadan giis: ‘Neeni hagaappe sinttanawu yeekkakka’; ‘I neeyyo tumuppe qarettana’; ‘I neeyyo zaaruwaa immana.’ Yihooway siiqiya Aawa gidiyo gishshawu, nu ubbawu qoppees, qassi nu woosaa loyttidi siyees.—Maz. 116:1; Isi. 57:15. w22.11 9 ¶5-6

Harati eqettishinkka sabbakiyoogeenne tamaarissiyoogee nuuni ufayttanaadaaninne sarotettan deꞌanaadan oottees. Koyro xeetu layttan kiitettidaageeti sabbakennaadan Ayhuda sunttati diggido wode, eti Xoossawu azazettanawu dooridosona. Eti aggennan sabbakido gishshawu ufayttidosona. (Oos. 5:27-29, 41, 42) Nu oosoy teqettikko, nuuni sabbakiyo wode akeekanchcha gidana koshshees. SHin nuuni nuussi danddayettida ubbabaa oottikko, Yihoowa ufayssiyoogaaninne shemppuwaa ashshiya mishiraachuwaa haratussi yootiyoogan beettiya sarotettaa demmana danddayoos. Nuuni keehi wayssiya wodiyan deꞌikkokka, sarotettaa demmana danddayiyoogaa ammanetta. Hegaa mala wodetun, Yihoowa xallay immana danddayiyo sarotettay nuussi koshshiyoogaa nuuni hassayana bessees. Ubbasaa gakkiya harggee, daafabay woy yedetay nena gakkiyo wode an ammanetta. A dirijjitiyaakko matattada deꞌa. Sinttappe nena naagiya ufayssiya wodiyaa qoppa. Neeni yaatikko, ‘sarotettaa Xoossay nenaara gidana.’—Pili. 4:9. w22.12 21 ¶17-18

Nuuni yaatanawu minni oottana koshshees. Harabata gujjin nuuni ixuwaa, yiilluwaanne hanqquwaa agganawu baaxetana koshshees. (Efi. 4:31, 32) Hegee metiyaaba gidana danddayiyoy aybissee? Amarida iita eeshshata aggiyoogee keehi baaxeyiyaaba gidana danddayiyo gishshataassa. Leemisuwawu, issoti issoti “hanqqettiya” asa qassi “elle yiillotiya” asa gidiyoogaa Geeshsha Maxaafay yootees. (Lee. 29:22) Kase hegaa mala iita eeshshay deꞌiyo uri xammaqetti simmidikka laamettanawu aggennan minnidi baaxetiyoogee koshshana danddayees. (Roo. 7:21-23) Laamettanawu nena waayissida eeshshaa xeelliyaagan Yihoowa woossa; I ne woosaa siyanaagaanne nena maaddanaagaa ammanetta. (1 Yoh. 5:14, 15) Yihooway maalaalissiyaabaa oottidi he eeshshaa neeppe xayssana xayikkonne, neeni he eeshshaa agganaadan I neessi wolqqaa immana danddayees. (1 PHe. 5:10) Ceega asatettay zaarettidi yaanaadan oottana danddayiyaabatuppe naagettiyoogan, ne woosaara maayettiyaabaa ootta. Qassi, iitabaa amottoppa.—Pili. 4:8; Qol. 3:2. w23.01 10 ¶7, 9-10

Nuuni siiqiyoogaa bessiyo issi ogee minnidi sabbakiyoogaa. Nuuni nunaara gayttiya asa ubbawu sabbakoos. Issi uri nuuppe zariyan woy yaran dummatiyo gishshawu, nuuni awu yootiyoogaa aggokko. Qassi dure, tamaaridaagaa, hiyyeesaa woy tamaaribeennaagaa gidin, ubbawu sabbakoos. Yaatiyo wode, nuuni Yihoowa halchchuwaara maayettiyaabaa oottoos; I, “asai ubbai attanaadaaninne tumatettaa eranaadan” koyees. (1 Xim. 2:4) Nuuni nu ishanttanne michchontta siiqiyoogankka, Xoossaanne Kiristtoosa siiqiyoogaa bessoos. Metoy eta gakkiyo wode, nuuni etawu koshshiyaabaa kunttoosinne eta maaddoos. Eti siiqiyo uri hayqqiyo wode eta minttettoos, sahettiyo wode eta oychchoos, qassi hidootaa qanxxiyo wode eta minttettoos. (2 Qor. 1:3-7; 1 Tas. 5:11, 14) “Xillo asa woosai wolqqaama oosuwaa” oottiyoogaa nuuni eriyo gishshawu, etawu ubbatoo woossoos.—Yaaq. 5:16. w23.01 28-29 ¶7-8

Keexuwaa oosuwaa oottiya uri wodiyaappe wodiyan qara gidi gidi biyoogaadan, nuunikka issoy issuwaa kaseegaappe aaruwan minttettana danddayoos. Kase metuwaa genccidaageetu hanotaa haratussi yootiyoogan, eti metuwaa gencciyo minotettaa demmanaadan nuuni eta maaddana danddayoos. (Ibr. 11:32-35; 12:1) Nuuni haratuyyo deꞌiya loꞌꞌo eeshshaa yootiyoogan, sarotettaa mooriyaabay merettiyo wode hegaa naaganawu baaxetiyoogan, qassi ooshshay merettiyo wode sigettiyoogan sarotettay deꞌanaadan oottana danddayoos. (Efi. 4:3) Qassi nuuni nu ishanttussinne michchonttussi Geeshsha Maxaafaa tumaa yootiyoogan, koshshiyaaban maaddiyoogaaninne ayyaanaaban shuggidaageeta ubbaa maaddiyoogan eta ubbatoo minttettana danddayoos. Nuunikka nu ishanttunne michchonttu ammanoy minnanaadan oottiyo wode keehi ufayttoos. Keettay daro wodiyaappe guyyiyan moorettees. SHin hegaappe dumma hanotan, ayyaanaaban harata minttettiyoogee merinawu maaddees! w22.08 22 ¶6; 25 ¶17-18

Xoossaa Qaalaa nabbabiyo wode nuussi gelanaadan koyikko, nuussi deꞌana bessiya issi eeshshaa Yesuusi yootiis; hegee akeekaa. (Maa. 24:15) Akeekay aybee? Hegee issi qofay hara qofaara waani gayttiyaakkonne waani dummatiyaakko, qassi loytti qonccibeenna qofaa yiggidi eriyoogaa. Hegaa bollikka, polettiiddi deꞌiya Geeshsha Maxaafaa hiraagata eranawu nuuni akeekanchcha gidana koshshiyoogaa Yesuusi yootiis. Nuuni Geeshsha Maxaafan nabbabiyo ubbabaappe loytti goꞌettanawukka ha eeshshay koshshees. Yihooway ba ashkkaratussi akeekaa immees. Hegaa gishshawu, he eeshshay neessi deꞌanaadan maaddana mala A woosan oychcha. Ne woosaara maayettiyaabaa waata oottana danddayay? Neeni nabbabidobaa wotta dentta qoppa, qassi hegee neeni eriyoobaara waani gayttiyaakko akeeka. Geeshsha Maxaafaappe nabbabidobaa akeeka, qassi hegaa oosuwan peeshshiyo ogiyaa qoppa. (Ibr. 5:14) Neeni akeekan nabbabiyo wode Geeshsha Maxaafaa loytta erana. w23.02 10 ¶7-8

Issi laggee neessi keettaa immidabadan qoppa. He keettay darin loꞌꞌenna, qassi aattees. Gidikkonne, he keettay daro miiloone biraa ekkana danddayees. Neeni he keettaa nashshanaageenne loytta oyqqanaagee qoncce. Hegaadankka, alꞌꞌo gidida deꞌuwaa imotaa Yihooway nuussi immiis. Yihooway ba Naꞌaa nuussi wozo oottidi immiyoogan nu deꞌuwaa keehi xoqqu oottidi xeelliyoogaa bessiis. (Yoh. 3:16) Deꞌuwaa Pulttoy Yihoowa. (Maz. 36:9) Kiitettida PHawuloosikka hegaa ammaniyo gishshawu hagaadan giis: “Nuuni aani paxa de7oosinne de7idi qaaxettoos.” (Oos. 17:25, 28) Yaatiyo gishshawu, deꞌoy Xoossay nuussi immido imota gaana danddayoos. Nuuni paxa deꞌanaadan koshshiyaabaa I siiquwan nuussi immees. (Oos. 14:15-17) SHin Yihooway maalaaliyaabaa oottidi nu deꞌoy takkanaadan oottenna. Nuuni payya gididi deꞌanawunne ubbatoo awu haggaazanawu, nuussi danddayettida ubbabaa oottanaadan I koyees.—2 Qor. 7:1. w23.02 20 ¶1-2

Nuuni Geeshsha Maxaafaa gishshawu Xoossaa Yihoowa keehi galatoos! Ha wodiyan nuna metoy gakkiyo wode waatanaakko eranaadan maaddiya zoriyaa Geeshsha Maxaafay yootees. Yihooway ufayssiya sinttanaa hidootaakka nuussi immiis. Ubbaappe aaruwan, Yihooway Geeshsha Maxaafaa baggaara ba eeshshaa xeelliyaagan darobaa yootiis. Nuuni ufayssiya A eeshshata wotti dentti qoppiyo wode keehi ufayttoos; qassi awu mata dabbo gidanawu koyoos. (Maz. 25:14) Yihooway bana asay eranaadan koyees. Beni wode I aymuwaa, ajjuutaa, ubba qassi kiitanchchatu baggaara haratussi bana qonccissiis. (Qoo. 12:6; Oos. 10:3, 4) SHin ha aymoti, ajjuutati, woy kiitanchchati yootidobati xaafettennaba gidiyaakko, nuuni hageeta xannaꞌana danddayokko. Nuuni eranaadan I koyiyoobaa attuma asati ‘maxaafan xaafanaadan’ Yihooway oottidoy hegaassa. “Xoossaa ogee suure” gidiyo gishshawu, Geeshsha Maxaafaa baggaara I nunaara haasayiyoogee ufayssiyaaba, qassi nuna maaddiyaaba gidiyoogaa ammanettoos.—Maz. 18:30. w23.02 2 ¶1-2

Maaddiya halchchota kessa. Neeni ayyaanaaban mino gidanaadaaninne kaseegaappe aaruwan kayma Kiristtaane gidanaadan maaddiya halchchota kessa. (Efi. 3:16) Leemisuwawu, neeni ubbatoo buzo xinaatiyaa mintta xannaꞌanawunne Geeshsha Maxaafaa nabbabanawu kuuyana danddayaasa. (Maz. 1:2, 3) Woy ubbatoo wozanappe woossanawu baaxetana danddayaasa. Allaxxiyoobaa dooriyoogaara woy wodiyaa goꞌettiyoogaara gayttidaagan neeni naagettana koshshennan aggenna. (Efi. 5:15, 16) Neeni hara asaa maaddiyo wode, kayma Kiristtaane gidana. Leemisuwawu, neeni ne gubaaꞌiyan deꞌiya cimidaageetanne sahettiyaageeta maaddanawu halchchana danddayaasa. Geella, suuqiyaappe issi issibaa shammiyoogan woy elektiroonike miishshata waati goꞌettanaakko bessiyoogan eta maaddana danddayaasa. Neeni haratussi Kawotettaa mishiraachchuwaa yootiyoogankka, eta siiqiyoogaa bessana danddayaasa. (Maa. 9:36, 37) Neessi danddayettiyaaba gidikko, ubba wode haggaazuwan Yihoowawu haggaazanawu halchcha. w22.08 6 ¶16-17