Hidaare

Issi Kiristtaanee iita haasayaa mule haasayana bessenna. Haray atto, nuuni geeman cayennaadankka naagettana bessees. Leemisuwawu, nuuni hara wogan diccida asaabaa, hara qommuwaabaa woy zariyaabaa haasayiyo wode, iitabaa haasayennaadan naagettana koshshees. Qassi, nuuni iitabaa haasayidi harata qohanawu mule koyokko. Harata minttettiya ogiyan haasaya. Harata boriyoogaappe woy amassaliyoogaappe eta galatanawu eesotiyaagaa gida. Israaꞌeelatussi galatanaadan oottiya darobay deꞌikkonne, eti darotoo amassalidosona. Nuuni darotoo amassaliyaageeta gidikko, hegee haratikka amassaliyaageeta gidanaadan oottana danddayees. Wochchiya tammu asati worddo oduwaa ehiidoogee ‘Israaꞌeela asay ubbay Muuse bolli zuuzummanaadan’ oottidoogaa hassaya. (Qoo. 13:31–14:4) SHin nuuni harata galatiyoogee eti ubbay ufayttanaadan maaddana danddayees. Yaatiyo gishshawu, ne ishanttanne michchontta galatiyo ogiyaa koya. w22.04 8 ¶16-17    

Beni wodeppe doommidi Yihooway daro yelagati ba dabbo gidanaadan maaddiis. I intte naati koyiyaaba gidikko, ayyaanaaban diccanaadan etakka maaddana danddayees. (1 Qor. 3:6, 7) Intte naati kumetta wozanaappe Yihoowayyo haggaazana xayikkonne, I eta ubbatoo siiqees. (Maz. 11:4) Eti Yihoowa ufayssanawu koyiyoogaa bessiyo wode, ba dabbo gidanaadan eta maaddanawu koyees. (Oos. 13:48; 2 Odi. 16:9) Intte naatussi maadoy koshshiyo wode, intte likkebaa haasayanaadan I inttena maaddana danddayees. (Lee. 15:23) Woykko gubaaꞌiyan deꞌiya siiqiya ishay woy michchiyaa eta maaddanaadan I denttettana danddayees. Intte naati gita gidi simminkka, Yihooway intte kase tamaarissidobaa eti hassayanaadan eta maaddana danddayees. (Yoh. 14:26) Intte haasayiyooban woy oottiyooban intte naata aggennan loohissikko, Yihooway inttena woytana. w22.04 21 ¶18

Seexaanay hegaappe simmin saluwaa gelana danddayenna gishshawu, saꞌan deꞌiya ayyaanan tiyettida Xoossaa ashkkarata qohees. Eti Xoossaa Kawotettaa gishshaa oottiyaageeta gidiyo gishshawu, ‘Yesuusabaa markkattiyo oosoy’ etawu imettiis. (2 Qor. 5:20; Efi. 6:19, 20) Aawatettay deꞌiyo hosppun ishantta 1918n wordduwan mootidosona, qassi eti ubbay daro wodiyawu qashettanaadan pirddidosona. Hegee, tiyettidaageeti oottiyo oosoy attidoogaa mala. (Ajj. 11:3, 7-11) SHin he tiyettida ishantti Laappune 1919n qashuwaappe birshshettidosona, qassi eta mootido paylee guyyeppe gorddettiis. He ishantti sabbakiyoonne tamaarissiyo oosuwaa minnidi oottiyoogaa sohuwaara doommidosona. Gidoppe attin, hegee Seexaanay Xoossaa asaa qohiyoogaa agganaadan oottibeenna. Seexaanay he wodeppe doommidi Xoossaa asaa ubbaa bolli ‘shaafan’ leemisettida yedetaa gattiis. (Ajj. 12:15) Ee, nuussi ubbawu “danddayainne ammanoi” koshshees.—Ajj. 13:10. w22.05 5-6 ¶14-16

Kiitettida Yohaannisi Yihoowa haaruwawu exatiyaanne merinaa anjjota demmiya naaꞌꞌu citaa ajjuutan beꞌiis. Koyro citaa paydoy 144,000. Eti Yesuusaara saluwan kawotanawu saꞌaappe doorettidosona. Eti aara saꞌaa haarana. (Ajj. 5:9, 10; 14:3, 4) Eti Yesuusaara saluwan Xiyoone Deriyaa bolli eqqidoogaa Yohaannisi ajjuutan beꞌiis. (Ajj. 14:1) Kiitettidaageetu wodiyaappe doommidi hanno gakkanawu, 144,000tu yara gidanawu shaꞌan qoodettiya asay doorettiiddi takkiis. (Luq. 12:32; Roo. 8:17) Gidoppe attin, Yohaannisi etappe attidaageetu woy guuttatu xallay wurssetta gallassatun saꞌan deꞌanaagaa yootiis. (Ajj. 12:17) Tiyettidaageetuppe attidaageeti, ammanettidi hayqqida 144,000tu yara gidida haratuura gayttanawu gita waayiyaa wode saluwaa boosona. Yan eti Xoossaa Kawotettan Yesuusaara haarana.—Maa. 24:31; Ajj. 5:9, 10. w22.05 16 ¶4-5

Yesuusi bana kaalliyaageeti banttabaa bessiyaagaadan xeellanaadan tamaarissiis. I etawu hagaadan giis: “Intte huuphiyan de7iya binnaana ubbaikka qoodan de7ees.” (Maa. 10:30) Ubba qassi nuuni nubaa iitabaa qoppiyaageeta gidikko, ha qofay nuna keehi minttettees. Hegee saluwan deꞌiya nu Aaway nuuyyo loytti qoppiyoogaanne nuna xoqqu ootti xeelliyoogaa bessiyaaba. Yihooway nuuni baassi goynnanaadan eeno giikko, qassi ooratta alamiyan nuuni merinawu deꞌana bessiyaabadan qoppikko, I baliis giidi nuuni qoppana koshshenna. Nuuni nubaa bessiyaagaadan xeellana koshshiyoogaa Wochchiyo Keelay 15 layttappe kase yootiis: “Nuuni otorettiyaageeta gidana gakkanaashin nubaa bessiyaagaappe aaruwan qoppana koshshenna. Qassi nuuni unꞌꞌettana gakkanaashin nuna guutti xeellana koshshenna. Nuuni mino gididobaanne shugo gididobaa akeekiyoogan nubaa bessiyaagaadan qoppanawu baaxetana koshshees.” w22.05 24-25 ¶14-16

Nuuni ubbay gubaaꞌiyaa issippetettaa waati naagana danddayiyoo? Haratuura sarotettan deꞌiyoogaana. (Maa. 5:9; Roo. 12:18) Nuuni ubbatoo haratuura sarotettan deꞌanawu baaxetiyoogan ayyaanaa gannatee keehi loꞌꞌanaadan oottoos. Yihooway ayyaanaa gannatiyan deꞌiya ubbaa geeshsha goynuwawu ehiidoogaa nuuni hassayana koshshees. (Yoh. 6:44) Yihooway keehi alꞌꞌobadan xeelliyo A ashkkaratu giddon sarotettaynne issippetettay deꞌanaadan nuuni minnidi oottiyoogaa I beꞌiyo wode, ay keena ufayttiyaakko qoppa! (Isi. 26:3; Hag. 2:7) Yihooway ba ashkkaratussi loꞌꞌo gidida darobaa immees. Yaatin, nuuni hegeetuppe loytti goꞌettanawu waatana danddayiyoo? Nuuni Geeshsha Maxaafaappe nabbabidobaa loytti qoppana danddayoos. Hegaadan xannaꞌiyoogeenne wotti dentti qoppiyoogee, gubaaꞌiyan deꞌiyaageetuura ‘ishanttudan minttidi siiqettanaadan’ oottiya Kiristtaanetuppe koyettiya eeshshay deꞌiyoogeeta gidanaadan nuna maaddana.—Roo. 12:10. w22.11 12-13 ¶16-18

Yihooway nuuyyo atto giidoogaa nuuni ammanikko, woppaanne geeshsha kahaa gujjin, ‘ayyaanaa minotettaa wodiyaa’ demmoos. Hegaa mala maarotay ‘Yihoowa matappe’ yiyoogaappe attin asappe yaana danddayenna. (Oos. 3:19) Yihooway nuuyyo atto giyoogee nuuni aara zaaretti dabbotanaadan oottees; qassi hegee nuuni nagaraa mule oottibookko giyoogaa mala. Yihooway nuuyyo atto gi simmidi, he nagaraa gaasuwan nuna haranttuwaa mule mootenna woy qaxxayenna. (Isi. 43:25) “Awai mokkiyoosaappe awai wulliyoosai haakkiyoogaadan” Yihooway nu nagaraa haassees. (Maz. 103:12) Yihoowa maarotay keehi gita gidiyoogaa nuuni wotti dentti qoppiyo wode, nuuni A galatoosinne nashshoos. (Maz. 130:4) Yihooway atto gaanawu kuuyiyoy nagaray gita woy guutta gidiyo gishshataassa gidenna. Yihooway issi urawu atto gaanaakkonne kuuyiyo wode, I nuna Medhdhidaagaa, nuuyyo Higgiyaa Immiyaagaanne nu Daanna gidiyoogaadan ba eraa goꞌettees. w22.06 5 ¶12-14

Yihooway bana siiqiya ubbawu ufayssiya hidootaa immiis. I mata wode sahuwaa, kayyuwaanne hayquwaa xayssana. (Ajj. 21:3, 4) I saꞌaa gannate oottanaagaa hidootan naagiya ‘ashkketa’ maaddana. (Maz. 37:9-11) Qassi I nuuni ubbay banaara loytti dabbotanaadan oottana; hegee ha wodiyan nuussi deꞌiya dabbotaappe keehi aadhdhees. Hagee keehi maalaalissiya hidoota! SHin Xoossay qaalaa gelidobati polettanaagaa nuuni ammananaadan oottiyaabay aybee? Yihooway ba gelido qaalaa ubbatoo polees. Hegaa gishshawu, nuuni ‘Yihoowan hidootaa wottanaadan’ oottiya gaasoy deꞌees. (Maz. 27:14, NW) Nu Xoossay qaalaa gelidobata polanaagaa danddayaaninne ufayssan naagiyoogan hegaa bessoos. (Isi. 55:10, 11) Yihooway “bana koyiyaageetuyyo” woytuwaa immanaagaa ammanettiyoogan nuunikka Yihoowawu ammanettidi deꞌiyaageeta gidoos. w22.06 20 ¶1; 25 ¶18

Yihooway nu soo asawu Huuphe, qassi so asawu huuphe gidida ubbay oottanaadan 1 Ximootiyoosa 5:8n I yootidobaa polanaagaa nuuni ammanettana danddayoos. Yihooway nunanne nu soo asaa siiqiyoogaa ammanettikko, nuussi koshshiyaabaa nuuni demmanaagaa ammanettana. (Maa. 6:31-33) Yihooway nuussi koshshiyaabaa kunttanawu koyees, qassi I hegaa siiquwaaninne kehatettan kunttees. I saꞌaa medhdhido wode, nu deꞌuwawu koshshiyaabaa immiyoogaa xalla gidennan, hegaappe aarobaa oottiis. Nuuni ufayttanaadan I saꞌan darobaa medhdhiis. (Doo. 2:9) Issi issitoo nuuyyo koshshiyaaba xallay deꞌikkonne, Yihooway immido gishshawu, nuussi koshshiyaabay deꞌidoogaa hassayana danddayoos. (Maa. 6:11) Yihooway immiyoobay ha wodiyan nuuni aggi bayiyoobaappe keehi aadhdhiyoogaa ubbatoo hassayana koshshees. Qassi sinttappe I nuuyyo merinaa deꞌuwaa immana.—Isi. 65:21, 22. w22.06 15 ¶7-8

Oorattatu xalla gidennan, nuuni ubbaykka Yihoowabaanne Geeshsha Maxaafaa loytti tamaarana koshshees. Kiitettida PHawuloosi, nuuni Geeshsha Maxaafaappe tamaaridobaa oosuwan peeshshiyoogee ‘iitaa kehaa shaakkanaadan’ maaddiyoogaa yootiis. Ha wodiyan daro asay keehi pokkobaa oottiyo gishshawu, Yihooway kessido maaraayyo azazettiyoogee keehi deexxana danddayees. SHin Yesuusi nuuni nu ammanuwaa minttanawu koshshiyaabaa tamaaranaadan oottees. He timirttiyaa Xoossaa ayyaanan xaafettida Geeshsha Maxaafaappe tamaaroos. Yesuusaagaadan, nuunikka bonchchoy bessiyo Xoossaa sunttaa bonchchoos. (Yoh. 17:26) Leemisuwawu, Geeshsha Maxaafaara maayettiya Yihoowa Markkata giyo sunttan 1931​ppe doommidi xeesettanawu kuuyida. Yaatiyoogan, Xoossaa sunttaa keehi xoqqu ootti xeelliyoogaanne saluwan deꞌiya nu Aawaa sunttan erettanawu koyiyoogaa bessida. (Isi. 43:10-12) Hegaa bollikka, Ooratta Alamiyaa Geeshsha Maxaafaa Birshshettan Xoossaa sunttay kase deꞌiyo soho ubban zaarettidi geliis. w22.07 11 ¶11-12

Geeshsha Maxaafaa tumay Xoossaa Kawotettaa mishiraachchuwaarakka gayttidaba. Yesuusi Kawotettaa tumaa moogido keehi alꞌꞌobaara geeddarssiis. Maatiyoosa 13:44n Yesuusi hagaadan giis: “Saluwaa kawotettai goshshan moogido miishsha milatees; issi bitanee he miishshaa demmidi, zaarettidi moogiis; daro ufaittiiddi biidi, baayyo de7iyaabaa ubbaa baizzidi, he goshshaa shammiis.” Bitanee he alꞌꞌobaa woy he miishshaa koyiiddi deꞌennaagaa akeeka. SHin I demmido wode, hegaa babaa oottanawu darobaa aggi bayiis. I bawu deꞌiya ubbabaa bayzziis. Aybissi? He miishshay keehi alꞌꞌoba gidiyoogaa I eriyo gishshataassa. Ha alamee immiyoobay nuuni ha wodiyan Yihoowawu haggaaziyoogan demmiyo ufayssaaranne Xoossaa Kawotettaa haaruwan demmana merinaa deꞌuwaara mule laggetennaagaa nuuni eroos. Yihoowaara dabbotidoogee nuuni aggi bayiyo aybippekka aadhdhiyaaba. “Ubba wode a ufaissiyaabaa” oottiyoogee nuna keehi ufayssees.—Qol. 1:10. w22.08 15 ¶8-9; 17 ¶12

SHaaramuxiyoogee Xoossaa sinttan ‘daro iitaba’ gidiyoogaa Yooseefi waati eridee? Naaꞌꞌu xeetu layttaappe guyyiyan, “shaaramuxoppa” giya Muuse higgee Israaꞌeelatussi imettiis. (Kes. 20:14) SHin shaaramuxiyoogaa Yihooway ixxiyoogaa Yooseefi loytti erees. Leemisuwawu, Yihooway aqo deꞌuwawu giigissidobay issi attumaagee issi maccaaro ekkanaadaana gidiyoogaa Yooseefi erees. Qassi ba mayzza aayyiyo Saaro qohoy gakkana haniyo wode A ba azinawu ammanettada deꞌanaadan Yihooway naaꞌꞌutoo kelttiyaa gelidi naagidoogaa I siyennan aggenna. (Doo. 2:24; 12:14-20; 20:2-7) Yooseefi hegaabaa wotti dentti qoppido wode Xoossaa sinttan likke gididabaanne gidennabaa akeekiis. Yooseefi ba Xoossaa siiqiyo gishshawu, Yihooway kessido xillotettaa maaraakka siiqees, qassi I hegaa kaallanawu murttiis. w22.08 26 ¶1-2

Daaneela 12:2y saluwan deꞌanawu denddiyoogaa woy eqettiyaageeti sabbakiyo oosuwaa essanawu matido 1918​ppe simmin nu oosoy kaseegaappe aaruwan oosettidoogaa bessiyaabadan kase qoppida. SHin ha xiqisee yaana ooratta alamiyan hayqqidaageeti denddanaagaa yootiyoogaa haꞌꞌi nuuni akeekida. He denddoy wurssetta wodee wuri simmin, qassi Armmageedoona olaappe guyyiyan hanana. SHin Daaneela 12:2y yootiyoogaadan “merinaa de7uwau” amaridaageeti hayquwaappe denddana giyoogee woygiyoogee? Hegaa giyoogee 1,000 layttaa wode hayquwaappe denddanaageeti Yihoowanne Yesuusa eriyoogan woy aggennan eriyoogaaninne azazettiyoogan merinaa deꞌuwaa demmana giyoogaa.—Yoh. 17:3. w22.09 21 ¶6-7

Hegaa giyoogee nuuni loꞌꞌo gaasoy baynnan haratun ammanettanaadan Yihooway koyees giyoogaa gidenna; shin eti ammanettiyaageeta gidiyoogaa bessido gishshawu, nuuni etan ammanettanaadan I koyees. Nuuni nu ishanttun ammanettiyoogee wode ekkiyaaba. Yaatin neeni ne ishanttun waata loytta ammanettana danddayay? Eta loytta era. Gubaaꞌe shiiqotun etaara haasaya. Etaara haggaaza. Eti ammanettiyaageeta gidiyoogaa bessanaadan etawu injjiyaa immiyoogan eta danddaya. Neeni loytta erenna issi urawu koyro heeran ne qofaanne neessi siyettiya ubbabaa waaya yootana. Neeni A loytta eriyo wode, neeyyo siyettiyaabaa awu yootanawu koyana danddayaasa. (Luq. 16:10) SHin issi ishay ammanettennaagaa gidikko waatuutee? An hidoota qanxxoppa; shin amarida wodiyawu danddaya. Issi issi ishanttu eeshshay neeni ne ishanttun ammanettiyoogaa agganaadan oottoppo. w22.09 4 ¶7-8

Mikaasa giyo cimay aawatettay deꞌiyo amarida ishantti A keehi naaqqidabadan qoppiis. Gidikkonne, I hanotaa yuushshi qoppanawu baaxetiis; qassi genccanawu geeshsha ayyaanaanne wolqqaa immanaadan Yihoowa woossiis. Qassi I bana maaddana danddayiya qofaa nu xuufetuppe nabbabiis. Nuuni ay tamaariyoo? Issi ishay woy michchiyaa nena naaqqidabadan siyettikko, woppu gaanawunne neessi siyettana danddayiya iita qofaa agganawu baaxeta. He uri hegaadan haasayanaadan woy oottanaadan gaaso gididabaa neeni erennan aggana danddayaasa. Yaatiyo gishshawu, Yihoowa woosan haasayissa; qassi he allaalliyaa hara uraagaadan xeellanawu maaddana mala A oychcha. Ne mala Kiristtaanee nena qohiyaabaa aybanne eriiddi oottennaagaa qoppa, qassi ayyo atto gaanawu baaxeta. (Lee. 19:11) Yihooway ne hanotaa eriyoogaanne genccanawu koshshiya wolqqaa neeyyo immanaagaa hassaya.—Era. 5:8. w22.11 21 ¶5

Yihoowa siiqiyaageetuura laggeta. Neeni kayma Kiristtaane gidanaadan laggeti maaddana danddayoosona. (Lee. 13:20) Haꞌꞌi cima gididi haggaaziya Juuleeni hagaadan giis: “Taani yelagatettan deꞌiyo wode tanaara haggaaziyaageetuura laggetaas. He laggeti minnidi haggaazoosona; qassi haggaazoy ay keena ufayssiyaakko akeekanaadan eti tana maaddidosona. . . . Layttan tanaara lagge gididaageetu xallaara laggetanawu koyido gishshawu, tawu loꞌꞌo laggeti baynnaagaa akeekaas. Qassi, taayyo loꞌꞌo laggeti baynna gaasoy layttan tanaara lagge gididaageetuura xalaalaara taani laggetanawu koyido gishshaassa gidiyoogaa akeekaas.” Gubaaꞌiyan deꞌiya issi uraara wodiyaa aattiyoogee neeni Yihoowaara dabbotido dabbotaa moorana danddayiyoogaa akeekikko waatuutee? Koyro xeetu layttan Kiristtaane gubaaꞌiyan deꞌiya issoti issoti ayyaanaaban shugo gidiyoogaa PHawuloosi eriyo gishshawu, Ximootiyoosi etappe naagettanaadan mintti zoriis. (2 Xim. 2:20-22) Nuuni Yihoowaara dabbotido dabbotay keehi alꞌꞌo. Nuuni Yihoowakko kaseegaappe aaruwan shiiqanawu minni oottido gishshawu he dabbotaa mooriya laggeti nuussi deꞌana bessenna. w22.08 5-6 ¶13-15

Nuuni Xoossaa zoriyaa ixxiya asatu mala gidokko. Xoossaa higgiyaa ubbaa gujjin, Xoossay qoppiyo ogiyaa nuuni tamaariyoogaa dosoos. Azazettiyaageetinne azazettennaageeti demmiyoobaa geeddarssiyoogan he siiquwaa minttana danddayoos. Asay eeyyatettan Yihooway zoriyo loꞌꞌo zoriyaa ixxiyo gishshawu daro metuwan geliyoogaa akeeka. Yaatada, neeni Xoossawu azazettiyo gishshawu ne deꞌoy ay keena giiga gididaakko qoppa. (Maz. 32:8, 10) Yihooway ba aadhdhida eratettaa ubbawu immees, shin hegaa ekkanaadan I oonanne wolqqanttenna. Gidikkonne, Yihooway I yootiyo aadhdhida eratettaa siyennaageetu bolli gakkanabaa yootiis. (Lee. 1:29-32) Eti “bantta oottido oosuwaa aifiyaa maana.” Guyyeppe, eti bantta deꞌido ogiyaa gaasuwan keehi azzanananne waayettana; qassi wurssettan Yihooway eta xayssana. Hara baggaara qassi Yihooway zoriyo loꞌꞌo zoriya siyiyaageetanne hegaa oosuwan peeshshiyaageeta xeelliyaagan I hagaadan giis: “Taani odiyoogaa siyiyaageeti ubbai woppu giidi, saro de7ana; metuwaa hirggaappekka shemppana.”—Lee. 1:33. w22.10 21 ¶11-13

Yihoowayyo yayyiyoogaa giyoogee, A wozanappe bonchchiyo gishshawu A azzanttiya aybippenne naagettiyoogaa giyoogaa. (Lee. 16:6) Yaaniyo gishshawu, likke gididabaanne gidennabaa xeelliyaagan Geeshsha Maxaafan qonccida, Yihooway kessido maarata kaallanawu nuuyyo danddayettida ubbabaa oottoos. (2 Qor. 7:1) Nuuni Yihooway dosiyoobata oottiyaabanne I ixxiyoobata ixxiyaaba gidikko, ha wodiyan keehi ufayttana. (Maz. 37:27; 97:10; Roo. 12:9) Issi uri, likkebaanne likke gidennabaa kuuyiyo maatay Yihoowawu deꞌiyoogaa erana danddayees, shin I Xoossay kessido maaraa kaallanawu murttana koshshees. (Roo. 12:2) Nuuni Yihooway kessido maarata kaalliyoogee aybippenne aadhdhiyoogaa wozanappe ammaniyoogaa oottiyooban bessana danddayoos. (Lee. 12:28) Daawitawu hegaadan siyettido gishshawu, I Yihoowa hagaadan giis: “Neeni tana de7o ogiyaa bessaasa. Taani ne achchan de7in, ta ufaissai polettees; ne ushachcha baggaara ufaissai merinau de7ees.”—Maz. 16:11. w22.10 8 ¶9-10

Yesuusi babaa bessiyaagaadan xeelliisinne bana ziqqi oottiis. I saꞌaa yaanaappe kase, Yihoowayyo haggaaziyo wode maalaalissiya darobaa oottiis. ‘Saluwaaninne saꞌan deꞌiya ubbabay’ Yesuusa baggaara merettiis. (Qol. 1:16) Yesuusi xammaqettiyo wode, I ba Aawaara deꞌido wode oottidobata hassayennan waayi aggana. (Maa. 3:16; Yoh. 17:5) SHin, Yesuusi hegaa hassayido wode otorettibeenna. Qassi, I bana ooppenne xoqqu xoqqu ootti erenna. Yesuusi “asaayyo oottanaunne daro asaa wozanau ta shemppuwaa immanau yiidoogaappe attin, asi tau oottanau yabeikke” giidi saꞌaa yiido gaasuwaa ba erissiyo ashkkaratussi yootiis. (Maa. 20:28) I barkka aynne oottana danddayennaagaakka yootiis. Yesuusi bana keehi ziqqi oottiis! I nuuni kaallana bessiyo loꞌꞌo leemiso. w22.05 24 ¶13

Yihooway atto gaanawu woy geennan agganawu kuuyanaappe kase qoppiyo issibay nagaranchcha uri ba oottidobay bala gidiyoogaa erii erennee giyaagaa. Yesuusi Luqaasa 12:47, 48n hegaa loytti qonccissiis. Issi uri eriiddi Xoossaa ufayssennabaanne iitabaa halchchidi oottikko, I gita nagaraa oottiis. Yihooway he urawu atto geennan agganawu kuuyana danddayees. (Mar. 3:29; Yoh. 9:41) Yaatin, Yihooway nuuyyo atto gaanee? Ee! Ayssi giikko, Yihooway qoppiyoobay nagaraa oottida uri ba nagaraappe tumuppe simmidee, simmibeennee giyaagaa. Nagaraappe simmiyoogee “issi uri qofaa, eeshshaa, woy halchchuwaa” laammiyoogaa qonccissiyaaba. Hegee he uri oottido iitabaa gaasuwan woy I oottana koshshiya likkebaa oottennan aggidoogaa gaasuwan zilꞌꞌettiyoogaanne wozanappe azzaniyoogaa qonccissiyaaba. Ba nagaraappe simmida uri, Yihoowaara dabbotido dabbotay shuggido gishshawunne hegee I iitabaa oottanaadan gaaso gidido gishshawu azzanees. w22.06 5-6 ¶15-17

Nu morkketi Yihoowa dirijjitiyan aawatettay deꞌiyo ishantta xeelliyaagan worddobaa woy likke gidennabaa yootoosona. (Maz. 31:13) Nu ishanttuppe amaridaageeti danobaa oottida asadan oyqettidi qashettidosona. Kiitettida PHawuloosa wordduwan mootidi qachchido wode, koyro xeetu layttan deꞌida Kiristtaaneta hegaa malabay gakkiis. Kiitettida PHawuloosi Roomen qashettido wode amaridaageeti A maaddiyoogaa aggidosona. (2 Xim. 1:8, 15; 2:8, 9) PHawuloosawu aybi siyettidaakko qoppa. I daro metuwaa gencciis, ubba eta gishshawu ba shemppuwaa daafabankka yeggiis. (Oos. 20:18-21; 2 Qor. 1:8) PHawuloosa maaddennan aggida asata milatanawu mule koyokko! Yaatiyo gishshawu, aawatettay deꞌiyo ishantta Seexaanay qohiyo wode nuuni maalaalettana koshshenna. He ishantti Yihoowawu ammanettiyoogaa agganaadan I koyees, qassi nunakka yashissanawu koyees. (1 PHe. 5:8) Ne ishantta ubbatoo maadda, qassi etappe mule shaahettoppa.—2 Xim. 1:16-18 w22.11 16-17 ¶8-11

Danobaa oottida ba nagaraappe simmida, Yesuusa miyyiyan kaqettida bitanee Ayhuda asa gidennan aggenna. Ayhudati issi Xoossawu goynnikkonne, hara dereti daro xoossata ammanoosona. (Kes. 20:2, 3; 1 Qor. 8:5, 6) He danobaa oottidaagee Ayhuda gidennaakko, hachchi gallassaa xiqisiyan deꞌiya qofay, “Neeni xoossatussi yayyikkii?” giya oyshaa gidana danddayees. Yesuusi hara deretussi gidennan, ‘bayida dorssawu, Israaꞌeela asawu’ kiitettiis. (Maa. 15:24) Xoossay hayqqidaageeta denttanaagaa Israaꞌeelatussi qonccissiis. Danobaa oottida, ba nagaraappe simmida bitanee hegaabaa erennan aggenna, qassi I yootidobay Xoossaa Kawotettan haaranaadan Yihooway Yesuusa hayquwaappe denttanaagaa ammaniyoogaa bessees. He bitanee Xoossay akka hayquwaappe denttanaagaa ammanennan aggenna. Ba nagaraappe simmida, danobaa oottida bitanee Ayhuda asa gidiyo gishshawu I Addaamenne Hewaanibaa, qassi Yihooway etawu immido Gannatiyaabaa erees. Yaatiyo gishshawu, he danobaa oottida bitanee, Yesuusi Luqaasa 23:43 yootido Gannatee ha saꞌan keehi loꞌꞌiya soho gidiyoogaa ammanennan aggenna.—Doo. 2:15. w22.12 8-9 ¶2-3

Nuuni sabbakana danddayiyoy Xoossaa ayyaanay nuna maaddiyo gishsha xallaassa. Aybissi? Nuuni sabbakiyo oosuwaa essanaadan Seexaanay nu bolli olaa awaajjido gishshataassa. (Ajj. 12:17) Seexaanay wolqqaama gidiyo gishshawu, nuuni aara olettidi xoonana danddayennabadan daro asay qoppees. SHin, nuuni sabbakiyo oosuwaa oottiyoogan A xooniiddi deꞌoos! (Ajj. 12:9-11) Ayba ogiyan? Nuuni sabbakiyo wode, Seexaanawu yayyennaagaa bessoos. Nuuni sabbakiyo wode ubban Seexaanay xoonettees. Yihooway ba geeshsha ayyaanaa baggaara nuussi wolqqaa immiyoogaanne nunan ufayttiyoogaa akeekana danddayoos. (Maa. 5:10-12; 1 PHe. 4:14) Nuuni haggaaziyo wode nuna gakkiya ay metuwaakka genccanaadan Xoossaa ayyaanay nuussi koshshiya wolqqaa immees. (2 Qor. 4:7-9) Yaatin, nuuni Xoossaa ayyaana ubbatoo demmanawu waatana koshshii? Yihooway nu woosaa siyanaagaa ammanettidi, hegaa demmanawu aggennan woossana koshshees. w22.11 5 ¶10-11

Nuuni nu ishanttuuranne michchonttuura sarotettan deꞌanawu baaxetiyoogan eta siiqiyoogaa bessana danddayoos. Nuuni atto giyoogan Yihoowa leemisuwaa kaallanawu baaxetoos. Yihooway nu nagaraa gishshawu ba Naꞌay hayqqanaadan eeno giis. Yaatiyo gishshawu, nuunikka nu ishanttinne michchontti nuna naaqqiyo wode atto gaanawu eeno gaana koshshees. Yesuusi yootido leemisuwan qonccida iita ashkkaraa mala gidanawu koyokko. A goday ayyo keehi daro acuwaa maarikkokka, I ba mala ashkkaraa guutta acuwaa maarennan ixxiis. (Maa. 18:23-35) Neeni gubaaꞌiyan issi uraara maayettabeennabay deꞌikko, Godaa Kahoy bonchchettanaappe kase, neeni kasetada sarotettaa medhdhana danddayay? (Maa. 5:23, 24) Neeni yaatikko, Yihoowanne Yesuusa keehi siiqiyoogaa bessaasa. w23.01 29 ¶8-9

Neeni ne ishanttussinne michchonttussi koshshiyaabaa erana danddayiyo issi ogee yeellayenna oyshata eta oychchiyoogaa. (Lee. 20:5) Etawu gidiya qumay, xaleenne koshshiya harabay deꞌii? Eti oosuwaappe yedetettidonaa woy keettaa keraa qanxxiyo miishshi etawu baawee? Kawotettay maaddiyaaba gidikko, nuuni hegaa oychchiyoogan maaddanaadan eti koyiyoonaa? Nuuni ubbay harata minttettanaadaaninne maaddanaadan Yihooway koyees. (Gal. 6:10) Sahettida uraa maaddanawu guuttabaa oottikkokka hegee A keehi minttettana danddayees. Issi naꞌi issi ishaa minttettanawu karddiyaa woy misiliyaa medhdhidi kiittana danddayees. Yelaga ishay issi michcheessi suuqiyaappe issi issibaa shammana woy harabaa oottana danddayees. Gubaaꞌiyan deꞌiya harati sahettida issi urawu qumaa kattidi efaana danddayoosona. Koronaa harggiyaa wode darotoo ishanttussinne michchonttussi darobaa oottida cimatussi, issi issi Yihoowa Markkati galatiyoogaa qonccissiya dabddaabbiyaa kiittidosona. ‘Issoy issuwaa minttettanawunne maaddanawu’ nuuppe koyettiyaabaa oottiyoogee keehi ufayssiyaaba!—1 Tas. 5:11. w22.12 22 ¶2; 23 ¶5, 6

Saaduqaaweti Ibraawetto Geeshsha Maxaafan koyro ichchashu maxaafata loytti eroosona; shin ayyaanay kaalettin he maxaafatun xaafettida keehi koshshiya tumaa ammanokkona. Leemisuwawu, hayquwaappe denddiyoogaa xeelliyaagan Saaduqaaweti Yesuusa oychchido wode I woygidi zaaridaakko akeeka. I eta hagaadan oychchiis: “Muuse maxaafan xaafettida xaragettiya buuraabaa odiya sohuwan, Xoossai Muusa, ‘Taani Abrahaama Xoossaa, Yisaaqa Xoossaa, Yaaqooba Xoossaa’ giidoogaa mulekka nabbabibeekketii?” (Mar. 12:18, 26) Saaduqaaweti he qofaa darotoo nabbabidaba gidikkonne, keehi koshshiya Geeshsha Maxaafaa tumaa, hegeekka dendduwaa timirttiyaa ammanennaagaa Yesuusi eta oychchidobay qonccissees. (Luq. 20:38) Nuuni ay tamaariyoo? Nuuni nabbabiyo wode hegaappe tamaarana danddayiyo xiqiseta ubbaa, woy issi Geeshsha Maxaafaa taarikiyaa loytti akeekana koshshees. Nuuni qoncce gididabatu xallaa gidennan, hara alꞌꞌo tumaanne maarata akeekanawu koyoos. w23.02 11 ¶9-10

Ha gallassaa xiqisiyan odettida markkata ubbaa wolqqaama metoy gakkikkokka, eti bantta deꞌo laytta ubban Yihoowawu ammanettidi deꞌidosona. (Ibr. 11:36-40) Eti genccidoogeenne baaxetidoogee hada attidee? Hada attibeenna! Eti Xoossay qaalaa gelidobay ubbay polettishin bantta deꞌuwan beꞌana xayikkonne, Yihoowan hidootaa wottiyoogaa aggibookkona. Qassi eti Yihoowan nashettidoogaa ammanettiyo gishshawu, qaalaa gelidobati polettishin beꞌanaagaa aynne siribookkona. (Ibr. 11:4, 5) Eta taarikee nuuni ubbatoo Yihoowan hidootaa wottanawu murttido murttiyaa yaa minttees. Nuuni ha wodiyan keehi iiti iiti biya alamiyan deꞌoos. (2 Xim. 3:13) Seexaanay Xoossaa asaa paacciyoogaa aggibeenna. Sinttappe nuna gakkana metoy ayba gidikkokka, ‘deꞌo Xoossaappe nuuni ekkana giidi uttidoogaa’ ammanettiyoogan Yihoowawu minnidi oottanawu murttidaageeta gidoos.—1 Xim. 4:10. w22.06 25 ¶17-18

Nu payyatettaa naagidi deꞌanawu nuuni baaxetana koshshiyo issi gaasoy, nuussi danddayettida keenan Yihoowawu haggaazanawu koyiyo gishshataassa. (Mar. 12:30) Yaatiyo gishshawu, nuuni eriyo nu payyatettaa qohana danddayiyaabata oottokko. (Roo. 12:1) Nuuni ay oottikkonne sahettennan attana danddayennaagee qoncce. Deꞌuwaa imotaa nashshiyoogaa saluwan deꞌiya nu Aawaa nuuni bessanawu koyiyo gishshawu, payya gididi deꞌanawu nuussi danddayettida ubbabaa oottoos. Sahoy woy cimatettay nuuni kase oottiyo darobata oottennaadan diggana danddayees. Hegaappe denddidaagan, nuuni unꞌꞌettananne azzanana danddayoos. SHin nu payyatettaa naaganawu nuussi danddayettidabaa oottanawu baaxetana koshshees. Aybissi? Nuuni keehi cimidaba woy sahettiyaaba gidikkokka, Kawuwaa Daawitaagaadan Yihoowa sabbana danddayiyo gishshataassa. Nuuni sahettiyaaba woy cimidaba gidikkokka, nu Xoossawu alꞌꞌo gidiyoogaa eriyoogee keehi minttettiyaaba! (Maa. 10:29-31) Nuuni hayqqikkokka, I nuna hayquwaappe denttanawu laamotees. (Iyy. 14:14, 15) Nuuni paxa deꞌiyo wode, nu payyatettaa naaganawu nuussi danddayettida ubbabaa oottanawu koyoos. w23.02 20-21 ¶3-5

Hara dorssa gidida zawi baynna daro asatu sunttay eti Armmageedoona olaappe aadhdhi simminkka deꞌo maxaafan xaafetti uttanee? Ee. (Ajj. 7:14) Dorssa mala gididaageeti “merinaa de7uwau” baanaagaa Yesuusi yootiis. (Maa. 25:46) Gidikkonne, Armmageedoonappe attiyaageeti sohuwaara merinaa deꞌuwaa demmokkona. SHaꞌu Layttaa Haaruwaa wode, Yesuusi ‘eta heemmananne deꞌo haattaa pulttuwaakko kaalettana.’ Kiristtoosa kaaletuwawu azazettiyaageetunne wurssetta pirddaa wode Yihoowawu ammanettidaageeta geetettidaageetu sunttay deꞌo maxaafan xayenna hanotan xaafettana. (Ajj. 7:16, 17) SHin, deeshsha geetettidaageeti Armmageedoona olan xayana. Eti “merinaa qaxxayuwau” baanaagaa Yesuusi yootiis. (Maa. 25:46) Kiitettida PHawuloosi ayyaanay kaalettin eti “merinaa bashshan” qaxxayettanaagaa yootiis.—2 Tas. 1:9; 2 PHe. 2:9. w22.09 16 ¶7-8

So asay Yihooway medhdhidobata beꞌiiddi issippe wodiyaa aattiyoogan ufayttana danddayoosona. Hegee eti kaseegaappe aaruwan issoy issuwaa siiqanaadan maaddees. Nuuni dosiyoobata oottanaadan Yihooway saꞌan loꞌꞌiya sohota medhdhiis. Daro so asay gaxariyan, deretiya sohuwan woy abbaa doonan issippe meretaa beꞌiiddi ufayttiyoogaa dosees. Xoossay ehaana ooratta alamiyan yelidaageetinne naati Yihooway medhdhidoban awudeegaappenne aaruwan ufayttana. He wode, nuuni mehiyawu doꞌawu yayyokko woy eti nuuyyo yayyokkona. (Isi. 11:6-9) Nuuni Yihooway medhdhidoban merinawu ufayttana. (Maz. 22:26) SHin yelidaageetoo, intte naati meretan ufayttanaadan maaddanawu he wodee gakkanaashin naagoppite. Intte intte naata Yihoowaabaa tamaarissanawu meretaa goꞌettiyo wode, eti Kawuwaa Daawiti giidoogaadan, ‘Abeet Yihoowawu, ne oosuwaa mala oosoy baawa’ gaana danddayoosona.—Maz. 86:8. w23.03 25 ¶16-17