Tisaase

Toophphiyaa biittaa suntta gidida bitanee tumuppe xammaqettanawu giigettidee? Hagaa akeeka: Toophphiyaa bitanee “goinnanau Yerusalaame biis.” (Oos. 8:27) Hegaa gishshawu, I Ayhuda haymaanootiyawu laamettida asa gidennan aggenna. I Yihoowaabaa Ibraawettuwan xaafettida Geeshsha Maxaafaappe tamaaridoogee qoncce. Gidikkonne, I gujjidi tamaaranawu koyiis. Piliphphoosi Toophphiyaa bitaniyaara gayttiyo wode I hananabaa yootiya Isiyaasa xaatta maxaafaa nabbabiiddi deꞌees. (Oos. 8:28) I ubbatoo tamaaranawu koyiis. I Toophphiyaappe keehi haakkiya, Yerusalaamen deꞌiya beetamaqidasiyan Yihoowawu goynnanawu biis. Toophphiyaa bitanee Piliphphoosappe keehi koshshiya amarida tumaa tamaariis; hegeetuppe issoy Yesuusi Mase gidiyoogaa. (Oos 8:34, 35) I kaseegaappe aaruwan Yihoowanne A Naꞌaa siiqiis. I ba deꞌuwan keehi koshshiyaabaa kuuyidi xammaqettiyoogan, Yesuus Kiristtoosa kaalliyaagaa gidiis. Bitanee xammaqettanawu giigettidoogaa Piliphphoosi beꞌidi A xammaqiis. w23.03 8-9 ¶3-6

Nuuni tumaa haasayana xayikko, Yihoowa ufayssana danddayokko. (Lee. 6:16, 17) Ha wodiyan daro asay worddotiyoogaa meeze gididabadan xeelliyaaba gidikkonne, Yihooway hegee bala gidiyoogaa yootiyo gishshawu, nuuni hegaappe naagettana koshshees. (Maz. 15:1, 2) Nuuni worddobaa haasayiyoogaappe naagettiyoogaa xalla gidennan, balabaa eriiddi haratuyyo yootiyoogaappekka naagettoos. Qassi nuuni Zigirennaadan naagettana koshshees. (Lee. 25:23; 2 Tas. 3:11) Haasayay zigirissawu laamettiiddi deꞌiyoogaa neeni akeekikko, hegaa aggada minttettiyaabaa haasaya. Nuuni iita haasayay kumido alamiyan deꞌiyo gishshawu, nu haasayiyoobay Yihoowa ufayssanaadan nuuni mintti baaxetana koshshees. Nuuni haggaazuwan, shiiqotuninne galla galla haasayiyo haasayan loꞌꞌo ogiyan haasayanawu wozanappe baaxetikko, I nuna anjjana. Yihooway ha iita alamiyaa xayssiyo wode, nuuni haasayiyooban Yihoowa bonchchissanawu metootokko.—Yih. 15. w22.04 9 ¶18-20

Yihoowaynne Yesuusi nuna ay keena siiqidaakko qoppiyoogee, nuunikka eta siiqanaadan oottees. (1 Yoh. 4:10) Nuuni Yesuusi nuussi huuphiyan huuphiyan hayqqidoogaa eriyo wode, ubba eta kaseegaappe aaruwan siiqoos. Kiitettida PHawuloosi hegaa akeekiis, qassi ‘Xoossaa Naꞌay tana siiqidi, ta gishshawu ba huuphiyaa immiis’ giidi Galaatiyan deꞌiyaageetussi xaafido wode, nashshiyoogaa qonccissiis. (Gal. 2:20) Yihooway neeni A dabbo gidanaadan wozuwaa baggaara nena baakko ehiis. (Yoh. 6:44) Yihooway nenan loꞌꞌobaa beꞌidi, neeni A dabbo gidanaadan keehi alꞌꞌobaa qanxxidoogaa eriyoogee neeni keehi ufayttanaadan oottennee? Hegee neeni Yihoowanne Yesuusa kaseegaappe aaruwan siiqanaadan oottennee? Yaatiyo gishshawu, nuuni nuna hagaadan oychchana koshshees: ‘He siiqoy taani ay oottanaadan giddii?’ Xoossaanne Kiristtoosa siiqiyoogee, nuuni harata siiqanaadan oottees.—2 Qor. 5:14, 15; 6:1, 2. w23.01 28 ¶6-7

Yihooway ba asay ‘issippe ayyo oottanaadan’ maaddanawu Geeshsha Maxaafaa goꞌettees. Yihooway Geeshsha Maxaafan deꞌiya daro qofaa ashkke asatu xallay akeekana danddayiyo ogiyan xaafissiis. (Luq. 10:21) Ubbasan deꞌiya asay Geeshsha Maxaafaa nabbabana danddayees. SHin Geeshsha Maxaafay yootiyoobaa akeekananne hegaa oosuwan peeshshana danddayiyay ashkke asatu xalla. (2 Qor. 3:15, 16) Geeshsha Maxaafay yootiyo Yihoowa aadhdhida eratettaabaa nuuni tamaarana danddayoos. Yihooway nuna Geeshsha Maxaafaa citan tamaarissiyoogaa xallan gidennan, huuphiyan huuphiyan nuna tamaarisseesinne minttettees. Nuuni ubbay Yihoowa Qaalaa nabbabiyo wode, I nuussi huuphiyan huuphiyan qoppiyoogaa akeekana danddayoos. (Isi. 30:21) Geeshsha Maxaafaa, qassi neessi xaafettidaba milatiya xiqiseta aapputoo nabbabadii? Gidikkokka, Geeshsha Maxaafay daro miiloone asay akeekana danddayiyo ogiyan xaafettiis. Geeshsha Maxaafay neessi koshshiyaabaa bessiya wodiyan waatidi yootana danddayii? Geeshsha Maxaafaa Xaafissidaagee saluwaaninne saꞌan aadhdhida eranchcha gidiyo gishshataassa.—2 Xim. 3:16, 17. w23.02 4-5 ¶8-10

Nuuni tumu Kiristtaaneta gidiyo gishshawu, Yihoowa keehi siiqoos. Nuuni Yihoowa haggaazuwan nuussi danddayettida ubbabaa oottanawu koyoos. SHin nuuni nuussi danddayettida ubbabaa Yihoowawu oottanawu A ufayssiya eeshshati deꞌiyoogeeta, maaddiya hiillata tamaariyaageetanne harata maaddiyo ogeta koyiyaageeta gidiyoogaa mala ayyaanaabaa halchchota nuuni halchchana koshshees. Nuuni Yihoowawu loytti haggaaziyaageeta gidanawu koyiyoy aybissee? Waanna gaasoy, saluwan deꞌiya nu siiqo Aawaa ufayssanawu koyiyoogaa. Yihooway nuuni nu imotaanne eraa awu loytti haggaazanawu goꞌettiyoogaa beꞌiyo wode ufayttees. Hegaa bollikka, nuuni nu ishanttanne michchontta loytti maaddanawu ayyaanaaban diccanawu koyoos. (1 Tas. 4:9, 10) Nuuni tuman deꞌido wodee ay keena gidikkokka, nuuni ubbay ayyaanaaban diccana danddayoos. Nuuni hagaadan waati oottana danddayiyaakko ane beꞌoos. w22.04 22 ¶1-2

Worddo haymaanoote ubbaa xaaxa waaxiya Gita Baabiloono kawotettati mata wode xayssana. Hegee gita waayiyawu doometta gidana. SHin daro asay hegaa gaasuwan Yihoowawu haggaaziyoogaa doommanee? CHii. Ubba qassi, Yihoowawu haggaazenna asay deretun leemisettida ha alamiyaa kawotettatuppenne zalꞌꞌiyaa dirijjitetuppe he wodiyan naaguwaa demmanawu koyanaagaa Ajjuutaa shemppo 6y yootees. He asay Xoossaa Kawotettawu exatenna gishshawu, Yihooway eta morkkedan xeellees. (Luq. 11:23; Ajj. 6:15-17) Ammanettida Yihoowa ashkkarati Xoossawu haggaazennaageetuppe gita waayiyaa wode dummatanaagee tuma. He wode saꞌan Xoossaa Yihoowawu haggaaziyaynne ‘doꞌawu’ exatennan ixxiyay Yihoowa ashkkaratu xalla gidana.—Ajj. 13:14-17. w22.05 16-17 ¶8-9

Xoossaa asay awaajjana koshshiyo kiitay ‘Kawotettaa mishiraachchuwaa’ xalla gidenna. (Maa. 24:14) Eti Ajjuutaa shemppo 8ppe 10 gakkanaashin odettida kiitanchchati oottiyo oosuwaakka maaddana koshshees. He kiitanchchati Xoossaa Kawotettaa eqettiyaageetu bolli gakkana wolqqaama boshaa awaajjoosona. Hegaa gishshawu, Yihoowa Markkati ‘shachchaaninne taman’ leemisettida kiitaa awaajjoosona; qassi hegee Xoossay Seexaanaa alamiyaa bolli pirddido pirddaa qonccissees. (Ajj. 8:7, 13) Asay ba deꞌuwan laamettidi Yihoowa hanqquwaa gallassaappe attanawu wurssettay matidoogaa erana koshshees. (Sof. 2:2, 3) SHin hagee darota ufayssiya kiita gidenna. Hegaa awaajjanawu nuuni xala gidana koshshees. Gita waayiyaa wode, wurssetta pirddaa kiitay keehi wolqqaama.—Ajj. 16:21. w22.05 7 ¶18-19

Naꞌa yelanawu halchchida issi Kiristtaane azinaanne machchee hanotaa qoppa. Naata dichchiyoogaa xeelliyaagan eti daro layttawu daro haasayaa siyennan aggokkona. SHin haꞌꞌi he haasayan odettiya zoree etawu keehi koshshiyaaba. Eti naꞌa yelidi dichchanawu deꞌoosona. Hegee keehi gita aawatetta! Yaatiyo gishshawu, nu deꞌuwan issi issibati laamettiyo wode, amarida xiqiseti nuussi keehi koshshiyaaba. Israaꞌeela kawoti oottanaadan odettidaagaadan, Yihoowawu goynniyaageeti Geeshsha Maxaafaa nabbabiyoynne bantta “de7o laittan ubban” wotti dentti qoppiyoy hegaassa. (Zaa. 17:19) Yelidaageetoo, intte Kiristtaane gidiyoogaadan inttessi imettida gita aawatettaappe issoy intte naata Yihoowabaa tamaarissiyoogaa. SHin nu Xoossaabaa intte eta tamaarissiyoogaappe aadhdhiyaabaa oottanawu koyeeta. Intte naati A wozanappe siiqanaadan eta maaddanawu intte koyeeta. w22.05 26 ¶2-3

Nu oottido nagaraa gishshawu azzaniyoogaa xallay gidenna. Nuuni issibaa oottanawu giigi uttidaageeta gidana koshshees. Yihooway qoppiyo keehi koshshiyaabay issi uri iitabaa oottiyoogaa aggidoogaanne asay deꞌanaadan Yihooway koyiyo ogiyan I deꞌiyoogaa doommidoogaa. (Isi. 55:7) He uri Yihoowa qofaadan deꞌanawu ba qofaa laammana koshshees. (Roo. 12:2; Efi. 4:23) I ba iita qofaanne oosuwaa agganawu murttana bessees. (Qol. 3:7-9) Yihooway nuuyyo atto gaanaadaaninne nagaraappe nuna geeshshanaadan oottiya waannabay nuuni Kiristtoosa yarshshuwan ammaniyo ammanuwaa. Nuuni nu deꞌuwaa laammanawu wozanappe baaxetiyoogaa Yihooway beꞌiyo wode he yarshshuwaa denddo oottidi nuuyyo atto gaana.—1 Yoh. 1:7. w22.06 6 ¶16-17

Addaameenne Hewaana Yihoowa bolli makkaloosappe doommidi asay issoy issuwaa qohees. (Era. 8:9) Leemisuwawu, asay ba maataa harata qohanawu goꞌettees, makkalanchchati iitabaa oottoosona, wolqqaama naati banttanaara tamaariyaageeta timirtte keettan cayoosonanne yashissoosona, qassi amarida asay bantta soo asaakka meqqeti baynna ogiyan oyqqees. Asay asa yayyiyoogee garamissiyaaba gidenna! Seexaanay nuna qohanawu nuuni asaa yayyiyoogaa waati goꞌettanawu malii? Sabbakiyoogaa woy nuuni oottanaadan Yihooway yootido harabaa oottiyoogaa agganaadan, Seexaanay nuuni asaa keehi yayyanaadan oottanawu malees. Seexaanay kawotettati nu oosuwaa muleera digganaadaaninne nuna yedettanaadan oottees. (Luq. 21:12) Seexaanaa alamiyan deꞌiya asay Yihoowa Markkata xeelliyaagan bala qofaanne iita wordduwaa aassees. He wordduwaa ammaniya asay nuna qilliiccana, woy qohanakka danddayees. (Maa. 10:36) Seexaanaa hiillan nuuni garamettana bessii? Bessenna. I hegaa koyro xeetu layttan goꞌettiis.—Oos. 5:27, 28, 40. w22.06 16 ¶10-11

Xillotettaa ogiyaa kaallida ‘darotu’ giddon deꞌanay oonee? Hegeeti hayquwaappe denddana asata, Armmageedoona olaappe attiya asatanne ooratta alamiyan yelettana naata. Saꞌan deꞌiya ubbay 1,000 layttaa wurssettan wottiyoy baynnaagaa gidana. Issi uri wottiyoobi baynna asa gidees giyoogee merinaa deꞌuwaa demmees giyoogaa gidennaagaa nuuni hassayana koshshees. Addaamebaanne Hewaanibaa qoppa. Eti wottiyoy baynna asa gidikkonne merinaa deꞌuwaa demmanaappe kase Xoossaa Yihoowawu azazettana koshshees. SHin eti awu azazettibeennaagee azzanttiyaaba. (Roo. 5:12) SHaꞌu layttaa wurssettan saꞌan deꞌiya wottiyoobi baynna asa gidida ubbay Yihoowa haaruwawu merinawu exatanee? Woy amaridaageeti, wottiyoobi baynna asa gidikkonne ammanettibeenna Addaamenne Hewaani mala gidanee? Ha oyshatussi zaaruwaa demmana koshshees. w22.09 22-23 ¶12-14

Ha wodiyan alamiyan deꞌiya metuwaa ubbaa neeni beꞌiyo wode, saꞌay hagaappe kehana gaada ammananawu metootana danddayaasa. So asay beniigaadan issoy issuwaara siiqettenna. Daro asay kaseegaappe aaruwan makkalanchchanne ba xallaa siiqees. Daroti maatay deꞌiyoogeetun ammanettanawu metootoosona. SHin ha hanotati sinttappe saꞌay kehanaagaa neeni ammananaadan oottana danddayoosona. Aybissi? ‘Wurssetta gallassaa’ xeelliyaagan kasetidi odettida maalaalissiya hiraagaadan asay haniyo gishshataassa. (2 Xim. 3:1-5) Ha hiraagay polettiiddi deꞌiyoogaa kashi erikke gaana danddayiya asi baa. Qassi hegee Kiristtoos Yesuusi Xoossaa Kawotettaa Kawo gididoogaa qonccissees. SHin hagee Xoossaa Kawotettaa xeelliyaagan odettida daro hiraagatuppe issuwaa xalaala. Maayuwaa sikkiyaagee kumetta maayuwaa sikkanawu dumma dumma carqqeta issippe gatti sikkiyoogaadan, dumma dumma hiraagata xannaꞌiyoogee Yihooway keerido wodiyan nuuni deꞌiyoogaa geeshshidi eranaadan nuna maaddana. w22.07 2 ¶1-2

Koronaa harggiyaa wodiyan, gubaaꞌe shiiqota shiiqiyoogaaranne haggaazuwaara gayttidaagan nuuyyo qoncce kaaletoy imettiis. Qassi Intternneetiyaa goꞌettidi gubaaꞌe shiiqota, woradaanne killiliyaa shiiqota shiiqiyoogaa sohuwaara doommida. Qassi dabddaabbiyaa xaafiyoogaanne silkkiyaa dawaliyoogaa xallan haggaaziyoogaa doommida. Yaatin, Yihooway nuuni oottidobaa anjjiis. Daro macara biiroti aassiyaageetu qooday kaseegaappe keehi gujjidoogaa yootidosona. Hegaa bollikka, daro ishanttinne michchontti he wodiyan haggaazuwan keehi loꞌꞌo ayfiyaa demmidosona. Koronaa harggiyaara gayttidaagan, Yihoowa dirijjitee naagettiyoogaa keehi darissiyaabadan issoti issoti qoppana danddayoosona. SHin nuuyyo imettiya kaaletoti keehi maaddiyoogaa darotoo akeekida. Yesuusi Yihoowa asaa siiquwan waati kaalettiiddi deꞌiyaakko nuuni wotti dentti qoppiyo wode, sinttappe aybi haniyaakkonne Yihoowanne I siiqiyo Naꞌay nuna ubbatoo maaddanaagaa ammanettana danddayoos.—Ibr. 13:5, 6. w22.07 13 ¶15-16

Nuuni woosan Yihoowa sabbiyoogaa bolli, I nuussi immiyo maalaalissiyaabatu gishshawu A galatana bessees. Leemisuwawu, keehi loꞌꞌiya ciishshatu gishshawu, zawi baynna malꞌꞌiya qumaa gishshawunne laggetuura aattiyo ufayssiya wodiyaa gishshawu A galatana danddayoos. Nu siiqo Aaway nuuni ufayttanaadan hageetanne hara darobata immees. (Maz. 104:12-15, 24) Ubbaappe aaruwan, Yihooway gidi palahiya ayyaanaabaa qumaa nuussi giigissiyo gishshawunne maalaalissiya hidootay nuussi daanaadan oottido gishshawu A galatoos. Yihooway nuussi oottiyo ubbabaa gishshawu A galatiyoogaa dogana danddayoos. Yaatin neeni hassayanaadan aybi maaddana danddayii? Neeni woossido dumma dummabata xaafananne guyyeppe Yihooway neeni woossidobaa waati zaaridaakko eranawu he xaafidobata zaaretta xeellana danddayaasa. Hegaappe simmin, I nena maaddido gishshawu woosan A galata.—Qol. 3:15. w22.07 22 ¶8-9

Tumaa xannaꞌiyoogaa xallay gidennaagaa nuuni eroos. Nuuni loytti goꞌettanawu tuman deꞌana bessees, hegaa giyoogee nuuni tamaaridobaa nu deꞌuwan oosuwan peeshshana koshshees giyoogaa. Nuuni yaatiyo wode xallan, tumay nuuni keehi ufayttanaadan maaddana. (Yaaq. 1:25) Nuuni tuman deꞌiyoogaa waati shaakki erana danddayiyoo? Nuuni oosuwan peeshshiiddi deꞌiyoobatanne giigissanawu koyiyoobata shaakki eranawu xannaꞌiyoogee loꞌꞌo gidiyoogaa issi ishay yootiis. Kiitettida PHawuloosi hagaadan giis: “Nuuni hanno gakkanaassi de7ido maaraadan, ane sinttau boos.” (Pili. 3:16) ‘Tuman deꞌanawu’ nuuni nuussi danddayettida ubbabaa oottiyoogee ay keena maaddiyaakko takki gaada qoppa! Hegee nu deꞌoy giiga gidanaadan oottiyoogaa xalla gidennan, Yihoowaynne nu mala Kiristtaaneti ufayttanaadankka oottees. (Lee. 27:11; 3 Yoh. 4) Hagee nuuni tumaa siiqanawunne tuman deꞌanawu keehi loꞌꞌo gaaso. w22.08 18-19 ¶16-18

Cimati Yihoowanne Yesuusa siiqiyoogaa waati bessana danddayiyoonaa? Yaatiyo waanna ogee Yesuusa dorssatuyyo qoppiyoogaa. (1 PHe. 5:1, 2) Yesuusi kiitettida PHeexiroosawu ha qofaa loytti qonccissiis. PHeexiroosi Yesuusa heezzutoo kaddi simmidi, Yesuusa siiqiyoogaa qonccissanawu keehi koyiis. Yesuusi hayquwaappe denddi simmidi PHeexiroosa, “Yoona na7au Simoonaa, tana siiqai?” yaagidi oychchiis. PHeexiroosi ba Godaa siiqiyoogaa bessanawu bawu danddayettida ubbabaa oottidoogaa ammanettana danddayoos. Yesuusi PHeexiroosawu hagaadan giis: “Ta dorssata heemma.” (Yoh. 21:15-17) PHeexiroosi ba deꞌo laytta ubban Godaa dorssatuyyo wozanappe qoppiyoogan, Yesuusa siiqiyoogaa qonccissiis. Cimatoo, Yesuusi PHeexiroosawu yootidobaa intte xoqqu ootti xeelliyoogaa waati bessana danddayeetii? Ishanttanne michchontta ubbatoo minttettiyoogaaninne ayyaanaaban shuggidaageeti Yihoowakko simmanaadan maaddiyoogan, Yihoowanne Yesuusa keehi siiqiyoogaa bessana danddayeeta.—Hiz. 34:11, 12. w23.01 29 ¶10-11

Nena gakkiya metuwaa ooninne akeekana danddayenna gaada qoppiyoogaappe naagetta. Hegaadan qoppiyoogee neeni, ‘Ta hanotawu hidooti baa, qassi iita amuwaa eqettanawu tawu wolqqi baa’ gaada qoppanaadan oottana danddayees. Geeshsha Maxaafay hegaappe dummatiyaabaa yootees. Hagaadan gees: “Inttena paacee gakkiyo wode, he paaciyaa i inttena danddayissana. Qassi he paaciyaappe intte kessi ekkiyo ogiyaakka immana.” Yaatiyo gishshawu, iita amoy wolqqaamikkokka, nuuni Yihoowawu ammanettidi deꞌana danddayoos. Yihoowa maaduwan, iitabaa oottiyoogaa aggana danddayoos. Ubbatoo hagaa hassaya: Nuuni nagaranchcha gidiyo gishshawu, iitabaa amottiyoogaa muleera aggana danddayokko. SHin, nuuni iitabaa amottiyo wode, Yooseefi PHoxiifaara machchee matappe eesuwaara woxxidi biidoogaadan, nuuni hegaa sohuwaara eqettana danddayoos. (Doo. 39:12) Neeni iita amuwaa polana koshshenna! w23.01 12-13 ¶16-17

Yihoowawu deꞌiya eeshshatuppe issoy suure pirddaa. (Zaa. 32:4) Suure pirddiya uri darotoo asa asaappe shaakkenna, qassi Yihooway asa asappe shaakkenna. (Oos. 10:34, 35) Geeshsha Maxaafay daro qaalan xaafettidoogee I asa asappe shaakkennaagaa bessiyaaba. Wurssetta wodiyan Geeshsha Maxaafaa tumu ‘eray daranaagaa’ Yihooway yootiis. Daroti hegaa akeekana danddayoosona. (Dane. 12:4) He eray daranaadan oottida issibay Geeshsha Maxaafaynne Geeshsha Maxaafaa qofay deꞌiyo xuufeti birshshettidoogaa, attamettidoogaanne daro asaa gakkidoogaa. Yihoowa asay Geeshsha Maxaafaa kumettaa woy appe amaridaagaa 240​ppe dariya qaalan birshshiis, qassi ooninne miishsha qanxxennan hegaa ekkana danddayees. Hegaappe denddidaagan, wurssettay yaanaappe kase ubba biittan deꞌiya asay ‘Kawotettaa wonggeliyaa mishiraachchuwaa’ siyiiddi deꞌees. (Maa. 24:14) Suure pirddiya nu Xoossay, daro asay A Qaalaa nabbabidi A eranaadan koyees. I hegaadan oottiyoy nuna ubbaa keehi siiqiyo gishshataassa. w23.02 5 ¶11-12

Neeni xillotettaa siiqay? Siiqiyoogee qoncce. SHin nuuni ubbay nagaranchcha gidiyo gishshawu naagettana xayikko, xillotettaa xeelliyaagan ha alamiyaa qofay nuna qohana danddayees. (Isi. 5:20) Ha alamiyan daro asay otorettees, harata borees, woy haratuppe aadhdhays giidi qoppees. SHin hegaa mala eeshshata Xoossay mule dosenna. Yesuusi saꞌan deꞌiyo wode A wodiyan deꞌiya haymaanootiyaa kaalettiyaageeti xillotettaa maaraa banttawu kessido gishshawu, I eta boriis. (Era. 7:16; Luq. 16:15) Yihooway likke giidobaa oottiya uri hara asappe aadhdhays giidi mule qoppenna. Xillotettay ufayssiya eeshsha. Xillotettaa giyoogee Xoossaa Yihoowa sinttan likke gididabaa oottiyoogaa giyoogaa. Geeshsha Maxaafan, “xillotettaa” giya qaalay Yihooway kessido maaraadan deꞌiyoogaa qonccissees. w22.08 27 ¶3-5

Yesuusi ba erissiyo ashkkarati balishinkka etan ammanettiis. (Yoh. 15:16) Yaaqoobinne Yohaannisi Kawotettan dumma sohuwaa demmanawu Yesuusa oychchido wode, eti Yihoowawu haggaaziyoogaa aggana giidi I siribeenna woy kiitettidaageeta gidennaadan diggibeenna. (Mar. 10:35-40) Yesuusi oyqettido qammi erissiyo ashkkarati ubbay A yeggi bayidi baqatidosona. (Maa. 26:56) SHin Yesuusi etan ammanettiyoogaa mule aggibeenna. Eti nagaranchcha gidiyoogaa I loytti erees; gidikkonne I “wurssettai gakkanaassi eta siiqiis.” (Yoh. 13:1) Yesuusi hayquwaappe denddi simmidi, erissiyo ashkkara oottiyoonne ba dorssata heemmiyo gita aawatettaa I kiittido ammanettida 11tussi immiis. (Maa. 28:19, 20; Yoh. 21:15-17) He nagaranchcha asatun I ammanettiyo loꞌꞌo gaasoy deꞌees. Eti ubbaykka hayqqana gakkanaashin ammanettidi haggaazidosona. Nagaranchcha asatun ammanettiyoogan Yesuusi loꞌꞌo leemiso. w22.09 6 ¶12

Yihooway nuna siiqiyoogaanne ubbatoo maaddanaagaa nuuni ammanettikko, Seexaanay nuna yashissenna. Leemisuwawu, keehi unꞌꞌettanaadan oottiya amaridabay Mazamure 118 xaafidaagaa gakkiis. Maatay deꞌiyo amaridaageeta gujjin, awu daro morkketi deꞌoosona (paydo 9, 10). Issi wode, I keehi unꞌꞌettiis (paydo 13). Qassi Yihooway A mintti seeriis (paydo 18). SHin he mazamuraawee hagaadan giis: “Taani yayyikke.” Yihooway A seerikkokka, saluwan deꞌiya ba Aaway A siiqiyoogaa erees. Mazamuraawiyaa gakkida metoy ayba gidikkonne, siiqiya A Xoossay A maaddanawu ubbatoo giigi uttidoogaa ammanettiis. (Maz. 118:29) Yihooway nuna siiqiyoogaa nuuni ammanana koshshees. Yashshiya heezzubata yayyiyoogaa agganaadan hegee nuna maaddana, hegeetikka, (1) nu soo asawu koshshiyaabaa kunttana danddayokko giidi yayyiyoogaa, (2) asa yayyiyoogaa, qassi (3) hayquwaa yayyiyoogaa. w22.06 15 ¶3-4

Nuuni nu deꞌuwan Yihoowa goynuwaa kaseyana koshshees. Yihooway nuna Medhidaagaa gidiyo gishshawu awu goynoy bessees. (Ajj. 4:11; 14:6, 7) Nuuni A ufayssiya ogiyan awu goynniyoogaa kaseyana koshshees; hegee “ayyaanaaninne tumatettan” awu goynniyoogaa giyoogaa. (Yoh. 4:23, 24) Nuuni Xoossaa Qaalan deꞌiya tumaara maayettiya ogiyan awu goynnanawu Xoossaa geeshsha ayyaanay nuna kaalettanaadan koyoos. Nu oosoy teqettido woy muleera digettido heeran nuuni deꞌiyaaba gidikkokka, nu goynuwaa kaseyana koshshees. Yihoowa Markka gidido gishsha xallawu, 100​ppe dariya ishanttinne michchontti ha wodiyan qashettidosona. Gidikkonne, eti woossanawu, xannaꞌanawu, qassi Xoossaabaanne A Kawotettaabaa haratuyyo yootanawu banttawu danddayettida ubbabaa ufayttiiddi oottoosona. Asay nuna boriyo woy yedettiyo wode, hegaa nuuni genccanaadan Yihooway maaddiyo gishshawu ufayttoos; qassi Yihooway nuna woytana.—1 PHe. 4:14. w22.10 9 ¶13

Nuuni oosuwan peeshshiyaaba gidikko nu deꞌoy giiga gidanaadan maaddiya loꞌꞌo zoriya Leemiso maxaafaa baggaara I nuna zorees. He loꞌꞌo zoretuppe naaꞌꞌaa xallaa beꞌa. Koyruwan, neessi deꞌiyaaban ufayttada deꞌa. Leemiso 23:4, 5y hagaadan zorees: “Duretanau daafuroppa. . . . Hegaa mala duretettai . . . qefiyaa kessidi argganttaagaadan, saluwaa paallana.” Gidikkonne, ha wodiyan duretikka hiyyeesatikka miishshaa demmanawu bichchaaroosona. Eti ubbatoo bantta sunttaanne bantta dabbotaa mooriyaabaa, ubba qassi bantta payyatettaa qohiyaabaa oottiyoy hegaassa. (Lee. 28:20; 1 Xim. 6:9, 10) Naaꞌꞌanttuwan, haasayanaappe kasetada qoppa. Nuuni naagettana xayikko, haasayiyooban harata keehi qohana danddayoos. Leemiso 12:18y hagaadan gees: “Akeekennan haasayiyo haasayai cu[b]edan caddees; shin aadhdhida eranchchaa inxxarssai pattees.” Haratu balaa denttidi haasayiyoogaappe naagettiyoogan sarotettay deꞌanaadan oottana danddayoos.—Lee. 20:19. w22.10 21 ¶14; 22 ¶16-17

Hizqqeeli I yootanabaa loytti akeekana bessees. I sabbakiyoobay A denttettana mala I hegaa ammanana koshshees. Hegaappe simmin, maalaalissiyaabay haniis. Hizqqeeli he xaatta maxaafay ‘eessaadan malꞌꞌiyoogaa’ akeekiis. (Hiz. 3:3) Aybissi? Yihooway kiittin hananabaa yootiyo maatay Hizqqeelawu malꞌꞌiyaaba woy keehi ufayssiyaaba. (Maz. 19:8-11) Hizqqeeli hananabaa yootiyaagaa gidanaadan Yihooway A sunttido gishshawu keehi ufayttiis. Guyyeppe, Yihooway Hizqqeelawu hagaadan giis: “Taani neeyyo yootiyo qaalaa ubbaa minttada ezgganne ne wozanan wotta.” (Hiz. 3:10) Hegaadan azaziyoogan, xaatta maxaafay yootiyoobaa hassayanawu baaxetanaadaaninne hegaa loytti qoppanaadan Yihooway Hizqqeelawu yootiis. Hizqqeeli yaatido wode, A ammanoy minniis. Qassi, he xaatta maxaafay I wolqqaama kiitaa asawu yootanawu giigettanaadan oottiis. (Hiz. 3:11) Hizqqeeli Xoossaa qaalaa loytti akeekidonne ammanido wode, sabbakiyoogaa doommanawunne he aawatettaa polanawu giigettiis. w22.11 6 ¶12-14

Dirijjitee laammido issi issibati neeni ammanettiyoogee paacettanaadan oottikko, waatana danddayay? Dirijjitee laammidobata loytta kaafa. Bazzuwan hemettiyo wode, Qahaata yarati maachchaa taabootaa tookkidi asaa ubbaappe sinttawu boosona. (Qoo. 3:29, 31; 10:33; Yaas. 3:2-4) Hegee gita maata! Gidikkonne Israaꞌeelati Hidootaa Biittaa gelido wode issi issibay laamettiis. Taabootaa ubbatoo tookkidi issisaappe harasaa efaana koshshenna. Yaatiyo gishshawu, Solomoni kawo gididi haariyoogaa doommido wode Qahaata yaratuppe amaridaageeti hara oosota oottanaadan sunttettidosona. (1 Odi. 6:31-33; 26:1, 24) Qahaata yarati kase he dumma aawatettan oottido gishshawu zuuzummidoogaa woy hara aawatettaa demmanawu koyidoogaa yootiyaabi baawa. Nuuni ay tamaariyoo? Neessi deꞌiya aawatettaara gayttidaba gidikkonne, Yihoowa dirijjitee laammidobaa wozanappe kaafa. Neeyyo imettida aawatettay ayba gidikkonne ufaytta. Neeni Yihoowawu alꞌꞌo gidanaadan oottiyay neeyyo deꞌiya aawatettaa gidennaagaa hassaya. Yihooway neessi deꞌiya ay aawatettaappekka aaruwan neeni azazettiyoogaa nashshees. w22.11 23 ¶10-11

Henesifooru PHawuloosa koyi demmidi, koshshiyaaban A maaddanawu baaxetiis. Yaatiyoogan, I ba shemppuwaa daafaban yeggiis. Nuuni ay tamaariyoo? Yedetay gakkiiddi deꞌiyo nu ishantta maaddiyoogaa yashshay digganaadan nuuni oottana koshshenna. Nu ishantta maaddanawu nuussi danddayettida ubbabaa oottiyaageeta gidoos. (Lee. 17:17) Nuuni eta siiqananne maaddana koshshees. Raashiyan deꞌiya ishanttinne michchontti qashettida bantta mala Kiristtaaneta maaddanawu waatidaakko beꞌa. Amaridaageeti shilootan eqqido wode, daro ishanttinne michchontti eta kaafanawu pirdda keettaa yiidosona. Nuuni ay tamaariyoo? Aawatettay deꞌiyo ishanttu sunttay moorettikko, eti qashettikko woy yedetettikko yeellatoppa. Etawu woossa, eta so asaa yaratussi qoppiyoogaa bessa, qassi eta maaddiyo hara ogeta koya.—Oos. 12:5; 2 Qor. 1:10, 11. w22.11 17 ¶11-12

Geeshsha Maxaafaa goꞌettidi ishantta minttettiyoogeenne unꞌꞌettidaageeta maaddiyoogee cimatu aawatetta. (1 PHe. 5:2) Cimati daafabay gakkiyo wode, ubba ishanttanne michchontta qohoy gakkibeennaagaa, qassi qumay, maayoynne shemppiyo sohoy etawu deꞌiyoogaa shaakki erana koshshees. Gidikkonne, daafabaappe simmin daro aginawu ishanttussi Geeshsha Maxaafaappe minttettiyoogeenne qofan maaddiyoogee koshshees. (Yoh. 21:15) Macara Biiruwaa Kontte gididi oottiyaanne daafabay gakkin qohettida daro ishanttuuranne michchonttuura gayttida Haaroldi hagaadan giis: “Qohoy gakki simmin hirggiyoogaa aggiyoogee wode ekkiyaaba. Eti kaseegaadan deꞌiyoogaa doommana danddayoosona, shin siiqiyo hayqqidaageeta, xayida alꞌꞌo aqota woy iita hanotata waani kanttidaakko ubbatoo hassayana danddayoosona. Eti hegeeta hassayiyoogee ubbatoo azananaadan oottana danddayees. Hegee etawu ammanoy paccidoogaa bessiyaaba gidennan, wottin deꞌiyaaba.” ‘Yeekkiyaageetuura yeekkite’ giya zoriyaa cimati oosuwan peeshshoosona.—Roo. 12:15. w22.12 22 ¶1; 24-25 ¶10-11

Nuuni loꞌꞌobaa oottanawu baaxetiyo baaxiyan xoonanaadan maaddanawu, Yihooway ba geeshsha ayyaanaa kehatettan immees. Nuuni Xoossaa Qaalaa xannaꞌiyo wode, A ayyaanay nuna kaalettanaadan koyiyoogaa bessoos. Nuuni shiiqota shiiqiyo wodekka, A geeshsha ayyaanaa demmoos. He shiiqotun, nuugaadan loꞌꞌobaa oottanawu baaxetiya ishanttuuranne michchonttuura wodiyaa aattana danddayoos; qassi hegee minttettiyaaba. (Ibr. 10:24, 25; 13:7) Qassi, nuuyyo deꞌiya shugo miyyiya giigissanawu maaddanaadan Yihoowa mintti woossikko, aggennan baaxetanaadan maaddanawu ba geeshsha ayyaanaa I nuussi immana. Yaatiyoogee, iita amuwaa muleera xayssennan aggana danddayikkonne, he iita amuwaa mintti eqettanaadan maaddana. Yihoowaara dabbotaa minttanawu maaddiyaabata nuuni oottiyoogaa doommiyo wode, ayyaanaabaa meezeta ubbatoo oottiyoogeenne aggennan loꞌꞌobaa amottiyoogee keehi koshshiyaaba. w23.01 11 ¶13-14

Geeshsha Maxaafay neeni ne payyatettaa waata naaganaakko woy ay maanaakko odiya maxaafa gidana xayikkonne, hegeeta xeelliyaagan Yihoowa qofay aybakko darobaa yootees. Leemisuwawu, nuuni ‘nu bollaa qohana danddayiyaabata’ digganaadan Geeshsha Maxaafay zorees. (Era. 11:10) Nuuni likkiyaappe aattidi qumaa maana woy ushshaa uyana koshshennaagaa Geeshsha Maxaafay yootees. Hageeti nu payyatettaa qohana, ubba qassi nuuni hayqqanaadan oottana danddayoosona. (Lee. 23:20) Nuuni aybaa qassi ay keenaa maanaakko woy uyanaakko kuuyiyo wode, nu huuphiyaa naagiyaageeta gidanaadan Yihooway koyees. (1 Qor. 9:25) Nuuni yuushshi qoppidi, Xoossay immido deꞌuwaa imotaa nashshiyoogaa bessiyaabaa kuuyana danddayoos. (Maz. 119:99, 100; Lee. 2:11) Leemisuwawu, nuuni miyoobaa xeelliyaagan akeekan doorana danddayoos. Nuuni issi qumaa dosiyaaba gidikkonne, hegaa miyoogee nuuni sahettanaadan oottiyoogaa erikko he qumaa mookko. Nuuni loytti xiskkanawu, ubba wode ispporttiyaa oottanawu, qassi nu bollaanne nu keettaa geeshshatettaa naaganawu baaxetiyaaba gidikko, akeekanchcha gidiyoogaa bessoos. w23.02 21 ¶6-7

Neeni Geeshsha Maxaafaa nabbabiyo wode ayyaanaaban alꞌꞌobaa waata demmana danddayay? Naaꞌꞌantto Ximootiyoosa 3:16, 17y woygiyaakko akeeka: ‘Xoossaa maxaafa ubbay’ (1) tamaarissanawu, (2) seeranawu, (3) mooruwaa suurissanawu, qassi (4) zoranawu maaddees. Neeni darotoo nabbabenna Geeshsha Maxaafaa shaahotuppekka he oyddu maaddiyaabata demmana danddayaasa. He taarikee Yihoowaabaa, A halchchuwaabaa woy Xoossay kessido maaratubaa nena ay tamaarissiyaakko akeekanawu wotta dentta qoppa. Hegee seeranawu waati maaddiyaakko akeeka. Hegaadan oottiyoogan iita amuwaa woy qofaa shaakka eranawunne ixxanawu, qassi Yihoowawu ubbatoo ammanettada deꞌanawu he xiqiseti nena waati maaddiyaakko akeeka. Geella issi uri haggaazuwan yootido bala qofaa suurissanawu he taarikee nena waati maaddiyaakko pilgga. Qassi he xiqisee yootiyo zore ubbay neeni issibaa Yihoowaagaadan qoppanaadan loohissiyoogaa akeeka. Neeni ha oyddubata ubbatoo qoppiyo wode Geeshsha Maxaafaa nibaabiyaappe goꞌettanaadan maaddiya, ayyaanaaban alꞌꞌobaa demmana danddayaasa. w23.02 11 ¶11

Laappun layttaa geetettida wodee wurin Yesuusi Xoossaa Kawotettaa kawo gididi haariyoogaa doommidoogaa Daaneela maxaafan deꞌiya hara hiraagay yootees. Yesuusi awude Kawo gididaakko erana danddayettii? (Dane. 4:10-17) “Laappun laittai” 2,520 layttaa wodiyaa qonccissees. Baabilooneti Yerusalaamen Yihoowa araataappe wurssetta kawuwaa xayssido 607 K.K. he wodee doommiis. Hegee Yihooway ‘maatay deꞌiyo’ Yesuusa Xoossaa Kawotettaa Kawo ootti sunttido 1914 M.Ln, wuriis. (Hiz. 21:25-27) Ha hiraagay nuna waati maaddii? Laappun layttaa xeelliyaagan odettida hiraagaa nuuni akeekiyoogee Yihooway ba gelido qaalaa bessiya wodiyan polanaagaa ammanettanaadan oottees. Yihooway ba keerido wodiyan Yesuusa Kawo oottanawu kuuyiis; qassi he wodee gakkin Yihooway A Kawo oottiis. Hegaa gishshawu, I ba kuuyido wodiyan hara hiraagata ubbaa polanaagaakka nuuni eroos. Ee, Yihoowa gallassay “gam77enna.”—Imb. 2:3. w22.07 3 ¶3-5