Masqqala

Asaa meto ubbaa xayssanaadan Xoossay Yesuusawu wolqqaa immiis. Yesuusi maalaalissiyaabata oottiyoogan, nuuni mule xayssana danddayenna metuwaa I xayssana danddayiyoogaa bessiis. Leemisuwawu, asay metootanaadan gaaso gidida laattido nagaraappe, qassi hegee kaalettido harggiyaappenne hayquwaappe nuna laꞌa kessiyo wolqqay awu deꞌees. (Maa. 9:1-6; Roo. 5:12, 18, 19) Yesuusi oottido maalaalissiyaabati ‘hargge ubbaappe’ pattana, ubba qassi hayqqidaageeta denttana danddayiyoogaa bessoosona. (Maa. 4:23; Yoh. 11:43, 44) Qassi, wolqqaama gotee coꞌꞌu gaanaadan oottiyoonne iita ayyaanata xooniyo wolqqay awu deꞌees. (Mar. 4:37-39; Luq. 8:2) Yihooway ba Naꞌawu hegaa mala gita wolqqaa immidoogaa eriyoogee keehi minttettiyaaba! Nuuni Xoossay ehanawu qaalaa gelidobati A Kawotettaa haaruwan polettanaagaa ammanettoos. Yesuusi saꞌan asa gididi deꞌido wode oottido maalaalissiyaabati I saluwan Xoossaa Kawotettaa Kawo gidiyo gishshawu, kumetta saꞌan hagaappe aaruwan oottanaagaa nuna hassayissoosona. w23.04 3 ¶5-7

Ne gubaaꞌiyan aassiyaageeti daro gidikko, qassi qofaa yootanawu neeni darotoo denttikkokka zaarennan aggikko, hidootaa qanxxana danddayaasa. SHin qofaa yootanawu baaxetiyoogaa aggoppa. Ubba shiiqotun daro qofaa yootanawu giigetta. Yaatikko, neeni doometta heeran zaariyo injjiyaa demmana xayikkonne, guyyeppe zaarana danddayaasa. Neeni Wochchiyo Keelaa Xinaatiyawu giigettiyo wode ubba menttoti huuphe yohuwaara waani gayttiyaakko qoppa. Neeni yaatikko kumetta xinaatiyan yootiyo loꞌꞌo qofaa demmana danddayaasa. Hegaa bollikka, qonccissanawu wayssiya Geeshsha Maxaafaa timirtteti deꞌiyo menttotun qofaa yootanawu giigettana danddayaasa. Aybissi? Amaridaageetu xallay he menttotun qofaa yootanawu koyana danddayiyo gishshataassa. Neeni daro shiiqotunkka qofaa yootiyo injjiyaa demmana xayikko shin? Neeni zaaranawu koyiyo oyshaa kaalettiya ishawu shiiquwaappe kase yoota. w23.04 21-22 ¶9-10

Yooseefi Yihoowa kaaletuwaa sohuwaara azazettidoogee I loꞌꞌo azina gidanaadan maaddiis. Baa giishin heezzu wodetun, A soo asaa xeelliyaagan Xoossay awu kaaletuwaa immiis. Azazettiyoogee deexxiyaaba gidido wodetunkka, I sohuwaara azazettiis. (Maa. 1:20; 2:13-15, 19-21) Yooseefi Xoossay immido kaaletuwaa kaalliyoogan Mayraamo qohuwaappe ashshiisinne iyyo koshshiyaabaa kunttiis. Yooseefi oottidobay Mayraama A kaseegaappe aaruwan siiqanaadaaninne bonchchanaadan maaddidoogaa qoppite! Azinatoo, intte intte soo asawu koshshiyaabaa kunttanawu Geeshsha Maxaafay yootiyo zoriyaa kaalliyoogan Yooseefa milatana danddayeeta. Azazettiyoogee deexiyaaba gidikkokka intte ha zoriyaa oosuwan peeshshiyo wode, intte machchota siiqiyoogaa besseeta; qassi intte aqo deꞌoy minnanaadan ootteeta. Vanuwatu giyoosan deꞌiya aqo deꞌuwan 20​ppe dariya layttaa deꞌida issi michchiyaa hagaadan gaasu: “Ta azinay kaaletuwaa Yihoowa oychchiyo wodenne hegaa oosuwan peeshshiyo wode taani kaseegaappe aaruwan A bonchchays. Taani woppu gaysinne I kuuyidoban ammanettays.” w23.05 21 ¶5

Baabilooneppe Israaꞌeela biittaa simmiya Ayhudati bantta Xoossawu ‘geeshsha asa’ gidana. (Zaa. 7:6) SHin hegaa giyoogee Baabiloone biittaa aggidi kiyidaageeti Yihoowa ufayssanawu laamettana koshshenna giyoogaa gidenna. Baabiloonen yelettida daro Ayhudati, Baabiloonetu qofaanne eti kessido maarata kaallennan aggokkona. Ayhudatuppe koyroogeeti Israaꞌeela biittaa simmin daro layttaappe guyyiyan, Biittaa Haariya Nahimee Israaꞌeelan yelettida naati Ayhuda doonaa erennaagaa akeekidi malaalettiis. (Zaa. 6:6, 7; Nah. 13:23, 24) He naati Xoossaa Qaalay xaafettido Ibraawetto doonaa akeekanawu danddayennaba gidikko, waatidi Yihoowa siiqananne goynnana danddayiyoonaa? (Izi. 10:3, 44) Hegaa gishshawu, Ayhudati gitaban laamettana koshshikkonne, eti tumu goynoy loddan loddan zaarettidi eqqido Israaꞌeela biittan deꞌiyo gishshawu laamettanawu daro metootennan aggana danddayoosona.—Nah. 8:8, 9. w23.05 15 ¶6-7

Nuuni nu halchchuwaa polanawu ay keenaa koyikkokka, woy nu huuphiyaa naagikkokka, hegaa polanawu metootanaadan oottiyaabay deꞌana danddayees. Leemisuwawu, ‘qoppennan gakkiyaabay’ nuuni nu halchchuwaa polanaassi baaxetanawu nuussi koshshiya wodiyaa xayssana danddayees. (Era. 9:12) Unꞌꞌettanaadaaninne wolqqaa xayanaadan oottiya metoy nuna gakkana danddayees. (Lee. 24:10) Nuuni nagaranchcha gidiyo gishshawu, nu halchchuwaa polanawu keehi metootanaadan oottiya mooruwaa moorana danddayoos. (Roo. 7:23) Woy daafurana danddayoos. (Maa. 26:43) Nu halchchuwaa polanawu keehi metootanaadan oottiyaabaa xoonanaadan nuna aybi maaddana danddayii? Ne halchchuwaa polennaadan diggiyaabay merettikko, hegee neeni halchchuwaa polanawu baaxetiyoogaa aggana koshshees giyoogaa gidennaagaa hassaya. Nuna metoy woy waayee darotoo gakkana danddayiyoogaa Geeshsha Maxaafay yootees. SHin, hegee nu halchchuwaa polanawu zaarettidi baaxetana danddayiyoogaa bessees. Waayissiya wodetunkka ne halchchuwaa polanawu ubbatoo baaxetiyoogan Yihoowa ufayssanawu koyiyoogaa bessaasa. Ne halchchuwaa polanawu ne ubbatoo baaxetiyoogaa Yihooway beꞌidi keehi ufayttanaagee qoncce! w23.05 30 ¶14-15

Aqinyetettay issi yelaga ishay dumma dumma asaara waani hashetidi oottanaakko eranaadan maaddees. I demmido miishshaa waati akeekan goꞌettanaakko eranaadaaninne bawu deꞌiyagaappe aaro miishshaa kessennaadankka aqinyetettay maaddees. (Pili. 4:11, 12) Kaafe aqinye gididi haggaaziyogee ubba wode haggaazuwa doommanawu maaddiya, ubba wode aqinye gidanaadan maaddiis. Aqinye gidiyogee keexuwa oosuwa oottiyogaa, woy Beeteelen haggaaziyogaa gujjin, hara ubba wode haggaazuwan haggaazanaadan maaddana danddayees. Ubba ishanttikka galchchaa cima gididi bantta ishanttanne michchontta maaddanawu banttappe koyettiyabaa oottanaassi baaxetana koshshees. He aawatettaa demmanawu baaxetiya issi uri ‘loꞌꞌobaa amottiyogaa’ Geeshsha Maxaafay yootees. (1 Xim. 3:1) Issi ishay koyro galchchawu oottiyagaa gidana koshshees. Galchchawu oottiyageeti cimata daro ogetun maaddoosona. Cimatikka galchchawu oottiyageetikka banttana ziqqi oottidi ishanttanne michchontta maaddoosona, qassi minnidi haggaazoosona. w23.12 28 ¶14-16

Kawuwa Yoosiyaasi awu layttay 16 gidido wode, Yihoowa koyiyoogaa doommiis. I Yihoowabaa eranawunne A sheniyaa polanawu koyiis. Gidikkonne, ha yelaga kawuwawu deꞌoy metiyaaba gidennan aggenna. Worddo goynoy aakkido he wodiyan I tumu goynuwawu exatana koshshiis. Qassi I hegaadan oottiis! Yoosiyaasi awu layttay 20 gidanaappe kase worddo goynuwaa biittaappe xayssiyoogaa doommiis. (2 Odi. 34:1, 2) Intte yelaga gidikkokka Yihoowabaanne ufayssiya A eeshshatubaa gujjidi tamaariyoogan Yoosiyaasa milatana danddayeeta. Intte yaatiyo wode inttena Yihoowawu sheedhdhanawu koyana. Hegee inttena waati maaddanee? Luuka giyo 14 layttan xammaqettida ishay bana Yihoowawu sheedhdhido gallassan hagaadan giis, “Haꞌꞌippe doommada ta deꞌuwan Yihoowa haggaazuwaa kaseyanawunne A ufayssanawu baaxetana.” (Mar. 12:30) Inttekka hegaadan oottanawu koyikko hegee intteyyo gita anjjo gidana! w23.09 11 ¶12-13

Kiitettida PHawuloosi ha dabddaabbiyaa xaafiyo wode, Tasalonqqe gubaaꞌee eqqoosappe issi laytta kumibeenna. Aawatettay deꞌiyo ishanttussi meezee waayi deꞌana; woy eti moorennan aggokkona. Gidikkokka, eti bonchchettana bessees. Gita waayee mati mati biyo wode, nuuni cimati immiyo kaaletuwan haꞌꞌiigaappe aaruwan ammanettiyoogee koshshana danddayees. Waanna biiruwaappenne macara biiruwaappe nuuni kaaletuwaa demmennan aggana danddayoos; yaaniyo gishshawu haꞌꞌi cimata siiqiyoogeenne bonchchiyoogee keehi koshshiyaaba. Hanotay ayba gidikkonne, nuuni eta balaa gidennan, Yihooway Kiristtoosa baggaara ha ammanettida attumaageeta kaalettiiddi deꞌiyoogaa qoppiyoogan akeekanchcha gidoos. Birataa qophee wotaaddaraa huuphiyaa qohuwaappe naagiyoogaadan atotettaa hidootay nu qofaa naagees. Nuuni ha alamee immiyoobay aynne goꞌꞌennaagaa akeekoos. (Pili. 3:8) Nu hidootay nuuni woppu giidi deꞌanaadan maaddees. w23.06 11-12 ¶11-12

‘Eeyya maccaasiyaa’ yootiyoobaa siyiyaageeti I shoobiyaa ekkanawu woy ixxanawu doorana koshshees. Bessenna inddaa gaytettaappe nuuni naagettana koshshiyo loꞌꞌo gaasoy deꞌees. Ha ‘eeyya maccaasiyaa’ hagaadan gidoogee odettiis: “Wuuqqidi uyiyo haattai mal77ees.” (Lee. 9:17) “Wuuqqidi uyiyo haattai” ay qonccissii? Geeshsha Maxaafay azinaynne machchiyaa inddan gayttiyoogaa gazddissiya haattan leemisees. (Lee. 5:15-18) Higgiyaa maaran aqo oyqqida azinaynne machchiyaa inddan gayttiyoogan ufayttana danddayoosona. SHin hegee ‘wuuqqidi uyiyo haattappe’ keehi dummatees. Wuuqqidi uyiyo haattay bessenna inddaa gaytettaa qonccissana danddayees. Kaysoy qosan wuuqqiyoogaadan, pokkobaa oottiya asati hegaa genttanawu maloosona. Eti oottiyoobaa ooninne erennabadan qoppiyaaba gidikko, “wuuqqidi uyiyo haattai” malꞌꞌiyaaba milatana danddayees. Yihooway ubbabaa beꞌiyo gishshawu, eti banttana cimmoosona. Yihoowan sabettennan aggiyoogaappe aaruwan iitabi baawa; hegaa gishshawu he azzanttiyaabay malꞌꞌenna.—1 Qor. 6:9, 10. w23.06 22 ¶7-9

Neeni wozanappe woossennabadan qoppikko woy kaseegaadan ne haggaazuwan ufayttennaba gidikko waatana koshshii? Yihoowa ayyaanay nenan oottennabadan qoppoppa. Nuuni nagaranchcha gidiyo gishshawu nuussi siyettiyabay issi issitoo laamettana danddayees. Neeni Yihoowawu haggaaziyogan kaseegaadan ufayttennaba gidikko, kiitettida Phawuloosa hanotaa qoppa. Phawuloosi Yesuusa leemisuwa kaallanawu baaxetikkokka, koshshiyabaa oottanawu I issi issitoo loytti koyibeennaagaa akeekiis. Phawuloosi issi issitoo loytti koyana xayikkokka, ba haggaazuwa polanawu murttiis giyogaa. Hegaadankka, neeni neeyyo siyettiyabaa xalla qoppada kuuyoppa. Suurebaa oottanawu neeni loytta koyana xayikkokka, yaatanawu murtta. Neeni ubbatoo suurebaa oottikko, ne qofay loddan loddan laamettana danddayees.—1 Qor. 9:16. w24.03 11-12 ¶12-13

Nu ishanttuuranne michchonttuura laggetiyoogaaninne issippe wodiyaa aattiyoogan siiqiyoogaa bessana danddayoos. Darotoo hegee etikka nuna siiqanaadan denttettees. (2 Qor. 6:11-13) Nuuppe daroti diccido hanotaaninne eeshshan dumma gidida ishanttuuranne michchonttuura gubaaꞌiyan issippe shiiqoos. Eta loꞌꞌo eeshshan xeelaa wottiyoogan eta ubbaa kaseegaappe aaruwan siiqana danddayoos. Nuuni harata Yihooway xeelliyo ogiyan xeelliyo wode, eta siiqiyogaa bessoos. Gita waayiyaa wode siiqettiyoogee keehi koshshiyaaba. He waayee doommiyo wode Yihooway nuna waati naaganee? Beni Baabilooneti qohuwaa gattido wode Yihooway ba asay ay oottanaadan azazidaakko akeeka: “Ta asatoo, haa yiite; yiidi intte soo gelidi, kariyaa intte bolli gorddite. GODAA hanqqoi aadhdhana gakkanaassi, guutta wodiyaa inttena qosite.” (Isi. 26:20) Geella gita waayiyaa wode hegaa mala kaaletuwaa kaalliyoogee koshshana danddayees. w23.07 6-7 ¶14-16

Hanotaadan haniya asa gidiyoogaa oottiyooban bessite. Hagaadan inttena oychchite: ‘Asay tana hanotaadan haniyaanne danddayanchcha uradan xeellii? Woy eti tana zozza uradan woykko meqetta iita uradan xeelliyoonaa? Taani harati yootiyoobaa siyada koshshiyo wode eta qofaa maayiyaanaa?’ Nuuni kaseegaappe aaruwan hanotaadan haniya asa gidikko, Yihoowanne Yesuusa loytti milatoos. Nu hanotay laamettiyo wode nuuni hanotaadan hanana koshshees. He laamettiyaabati nuuni mule qoppibeenna metoy nu bolli gakkanaadan oottana danddayoosona. Leemisuwawu, nuuni ubbay qoppennan wolqqaama sahuwaa sahettana danddayoos. Woy ikkonoomiyaara woykko polotikaara gayttidaagan qoppennan laamettiyaabati nuuni keehi metootanaadan oottana danddayoosona. (Era. 9:11) Yihoowa dirijjitee nuuni hara ogiyan woy hara sohuwan haggaazanaadan oychchikko, hegee metiyaaba gidana danddayees. Ha oyddubata nuuni oottikko ooratta hanotaa loytti meezetana danddayoos: (1) ne hanotay laamettidoogaa ammana, (2) kasebaa gidennan sinttanaabaa qoppa, (3) ne deꞌuwan ne demmido loꞌꞌobata ubbaa akeeka, qassi (4) harata maadda. w23.07 21-22 ¶7-8

Hananabaa yootiya Daaneela qachchidi Yerusalaameppe keehi haakkiya Baabiloone efiido wode I yelaga. SHin, Daaneela omooddidaageeti A hanotan maalaalettidoogee qoncce. Eti Daaneela somꞌꞌuwaa xeelliyo wode, I ‘asatettan wottiyoobi baynnaagaanne malanchcha’ gidiyogaa, qassi Yihudaa zariyaappe yiidoogaa akeekidosona. (1 Sam. 16:7) Yaatiyo gishshawu, I kawo keettan oottanaadan eti A loohissidosona. (Dane. 1:3, 4, 6) Daaneela Yihooway siiqidoy I Yihoowawu ammanettiya yelaga gidido gishshataassa. Daaneeli Nohanne Iyyooba mala gidiyogaa Yihooway yootido wode, awu layttay 20 heeraa gidennan aggenna. Yaatiyo gishshawu, Yihooway yelaga Daaneela daro layttawu ammanettidi haggaazida Nohedaaninne Iyyoobadan xillo asadan xeelliis. (Doo. 5:32; 6:9, 10; Iyy. 42:16, 17; Hiz. 14:14) Qassi Daaneeli deꞌido laytta ubban, Yihooway A ubbatoo siiqiis.—Dane. 10:11, 19. w23.08 2 ¶1-2

Neeni issi keettaa shammanawu kuuyiyo wode shammana keettaabaa darobaa eranawu koyanaagee qoncce. Nuuni Geeshsha Maxaafaa nabbabiyo wodenne xannaꞌiyo wode, hegaadan oottana danddayoos. Neeni eesuwan nabbabikko, “Xoossaa qaalaa koiro timirttiyaa” xallaa akeekana danddayaasa. (Ibr. 5:12) Shin issi keettaabaa loytta eranawu so gelana koshshiyogaadan Geeshsha Maxaafaa loytta akeekanawu xannaꞌana koshshees. Geeshsha Maxaafaa xannaꞌanawu keehi loꞌꞌo ogee an deꞌiya qofay issoy issuwara waani gayttiyakko akeekiyogaa. Neeni ammaniyobaanne hegee tuma gidiyogaa neeni ammananaadan oottida gaasuwa akeeka. Xoossaa Qaalan deꞌiya ubbabaa loytti akeekanawu, Geeshsha Maxaafaa tumaa tamaarana koshshees. Kiitettida Phawuloosi ba ishanttinne michchontti tumay “ai keena aahokko, adussakko, xoqqakkonne ciimmakko” eranawu Xoossaa Qaalaa loytti xannaꞌanaadan minttettiis. Yaatikko eti ammanuwan ‘xaphuwa yeddidi minnana.’ (Efi. 3:14-19) Nuunikka yaatana koshshees. w23.10 18 ¶1-3

Geeshsha Maxaafay danddayanchcha gidida daro asatu taarikiyaa yootees. Etabaa xannaꞌiyoogee nena maaddana danddayees. Leemisuwawu, Daawiti sinttappe Israaꞌeela kawo gidanaadan naatettan tiyettikkonne, kawo gidanawu daro layttaa naagana koshshiis. Simooninne Haanna yaana geetettida Masiyaa naagiiddi Yihoowawu ammanettidi haggaazidosona. (Luq. 2:25, 36-38) Hegaa mala taariketa neeni xannaꞌiyo wode kaallidi deꞌiya oyshatussi zaaruwaa koya: Ha bitanee danddayanchcha gidanaadan maaddidabay ayba gidana danddayii? Danddayanchcha gidiyoogan I waani goꞌettidee? Taani A leemisuwaa waana kaallana danddayiyaanaa? Danddayanchcha gidenna asatubaakka xannaꞌiyoogan neeni goꞌettana danddayaasa. (1 Sam. 13:8-14) Nena hagaadan oychchana danddayaasa: ‘Eti danddayanchcha gidennaadan oottidabay aybee? Hegee ay kaalettidee?’ w23.08 25 ¶15

Kiitettida Pheexiroosi ammanettida asa; I Yesuusa kaalliyoogaa aybinne digganaadan oottibeenna. Yesuusi haasayidobaa I erissiyo ashkkarati akeekibeenna wode Pheexiroosi ammanettiyoogaa bessiis. (Yoh. 6:68) Yesuusi qonccissanaadan naagennan woy qonccissanaadan koyennan aggidi daroti A kaalliyoogaa essidosona. SHin Pheexiroosi A kaalliyoogaa aggibeenna. “Merinaa de7uwaa qaalai” Yesuusa xalaalawu deꞌiyoogaa I akeekiis. Yesuusi Pheexiroosinne kiitettida harati A agganaagaa I erees. Shin Yesuusi Pheexiroosi simmanaagaanne ammanettidi deꞌanaagaa aynne sirennan yootiis. (Luq. 22:31, 32) ‘Ayyaanay giigi uttikkonne ashoy daafuranchcha’ gidiyoogaa Yesuusi akeekiis. (Mar. 14:38) Hegaa gishshawu, Pheexiroosi A eriyoogaa kaddi simminkka, Yesuusi an hidootaa qanxxibeenna. Yesuusi hayquwaappe denddi simmidi Pheexiroosawu qoncciis, he wode Pheexiroosi barkka deꞌennan aggenna. (Mar. 16:7; Luq. 24:34; 1 Qor. 15:5) Keehi azzanida Pheexiroosi hegan ay keenaa minettidaakko qoppa! w23.09 22 ¶9-10

Xoossay an ammaniyageetu nagaraa atto gees woy kammees. I etawu muleera atto gees. (Maz. 32:1, 2) Eta ammanuwappe denddidaagan I eta boree baynnanne xillo asadan xeellees. Abrahaami, Daawitinne Xoossawu ammanettidi goynnida harati nagaranchcha gidikkonne xillo geetettidosona. Shin eta ammanuwappe denddidaagan Xoossay eta bali baynna asadan xeelliis, ubba an ammanenna asaara eta geeddarssiyo wode eti boree baynna asa. (Efi. 2:12) Kiitettida Phawuloosi Roome Kiristtaanetuyyo xaafido dabddaabbiyan nuuni Xoossaa dabbo gidanawu nuussi ammanoy deꞌana koshshiyogaa yootiis. Abrahaaminne Daawiti Xoossan ammanido gishshawu, A dabbo gididosona, nuunikka Xoossan ammaniyo gishshawu A dabbo gidana danddayoos. w23.12 3 ¶6-7

Ha wodiyan ubba Kiristtaaneti bantta wodiya, wolqqaanne aquwa goꞌettidi Xoossaa Kawotettawu oottiyogan Yihoowawu yarshshiyo maatay etawu deꞌees. Nuuni Yihoowawu goynnanawu nuussi danddayettida ubbabaa oottiyogan Yihoowawu goynniyo maataa nashshiyogaa bessana danddayoos. Kiitettida Phawuloosi Ibraawe Kiristtaanetuyyo xaafido dabddaabbiya wurssettaa heeran nuuni Yihoowawu goynniyo wode ubbatoo oottana koshshiyabaa yootiis. (Ibr. 10:22-25) Hegeetikka: Yihoowa woossiyogaa, haratussi sabbakiyogaa, gubaaꞌe shiiquwa shiiqiyogaanne ‘Yihoowa gallassay matattiyogaa nuuni beꞌiyo gishshawu’ kaseegaappe aaruwan issoy issuwa minttettiyogaa. Yihoowa kiitanchchay hagaadan giis: “Xoossaayyo goinna.” (Ajj. 19:10; 22:9) Hagee keehi koshshiyogaa qonccissanawu I hagaa naaꞌꞌutoo yootiis. Yihoowa ayyaana beeta maqidesiyanne nu gita Xoossawu goynniyo maataa nashshiyogaa xeelliyagan nuuni tamaarido ubbabaa mule dogennaageeta gidoos! w23.10 29 ¶17-18

Nuuni ubbaykka “issoi issuwaara” siiqettanawu koyoos. Shin Yesuusi “daro asaa siiqoi irxxana” giidi yootidoogaa nuuni hassayiyogee keehi koshshiyaba. (Maa. 24:12) Yesuusi ba erissiyo ashkkaratuppe daroti issoy issuwa siiqiyogaa aggana giidi yootibeenna. Gidikkonne, siiqoy baynna alamiya asaadan hanenna mala nuuni ubbatoo naagettana koshshees. Ha qofaa dogennan ane ha keehi koshshiya oyshaa pilggoos: Nuuni nu ishantta mintti siiqiyakkonne eranaadan nuna aybi maaddii? Nuna issibay gakkiyo wode nuuni oottiyobay nu siiqoy minokkonne shaakki eriyo issi oge. (2 Qor. 8:8) Hegaa mala wodetuppe issuwa kiitettida Pheexiroosi yootiis: “Siiqoi daro nagaraa kammiyo gishshau, ubbabaappe aattidi issoi issuwaara wozanappe siiqettite.” (1 Phe. 4:8) Hegaa gishshawu, nu ishantti baliyo wode woy nuna qohiyo wode, nuuni oottiyobay nu eta siiqiyo siiqoy minokkonne shaakki eranawu nuna maaddees. w23.11 10-11 ¶12-13

Nuuni gubaaꞌiyan deꞌiya amaridaageeta siiqidi harata aggikko, siiquwaa xeelliyaagan Yesuusi yootido azazuwaa azazettana danddayokko. Yesuusaagaadan, nuunikka haratuppe aaruwan amaridaageetuura siiqettana danddayoos. (Yoh. 13:23; 20:2) Nu ishanttinne michchontti ubbay nu soo asaa gidiyo gishshawu, nuuni eta siiqana koshshiyoogaa kiitettida Pheexiroosi nuna hassayissiis. (1 Phe. 2:17) Pheexiroosi nuuni ‘issoi issuwaara minttidi wozanappe siiqettanaadan’ zoriis. (1 Phe. 1:22) Ha sohuwan, ‘minttidi siiqettite’ giya qofay issi urawu siiquwaa bessiyoogee metiyo wodekka A siiqiyoogaa qonccissees. Leemisuwawu, issi ishay nuna yiilloyikko woy naaqqikko shin? Koyro heeran, nuuni siiquwaa bessiyoogaa aggidi, I oottidoogaadan oottanawu koyana danddayoos. Shin haluwaa kiyiyoogee Xoossaa ufayssennaagaa Pheexiroosi Yesuusappe tamaariis. (Yoh. 18:10, 11) Pheexiroosi hagaadan giis: “Iitaa gishshaa iitaa woi cashshaa gishshaa cashshaa zaaroppite; hegaa aggidi, . . . anjjite.” (1 Phe. 3:9) Minttada siiqiyogee, neeni kehanne qoppiya asa gidanaadan ootto. w23.09 28-29 ¶9-11

Issi naꞌi sohuwara dicciyogaa beꞌiyogan nuuni maalaalettoos. Hegawu aynne baaxetana koshshennaba milatana danddayees. Shin, nuuni kayma Kiristtaane gidanawu baaxetana koshshees. (1 Qor. 13:11; Ibr. 6:1) Nuuni kayma Kiristtaane gidanawu Yihoowara mintti dabbotana koshshees. Xoossaa ufayssiya eeshshatinne maaddiya hiillati nuussi deꞌanaadan nuuni baaxetiyo wode, qassi sinttappe demmana aawatettawu giigettiyo wode A geeshsha ayyaanaykka nuussi koshshees. (Lee. 1:5) Yihooway attumaasanne maccaasa medhdhiis. (Doo. 1:27) Attumaasaynne maccaasay bollaa qottan dummatiyogee qoncce, shin eti harabankka dummatoosona. Leemisuwawu, Yihooway attuma asaayyonne macca asaayyo aawatettata immido gishshawu he aawatettata polanawu maaddiya eeshshatinne hiillati etawu koshshoosona.—Doo. 2:18. w23.12 18 ¶1-2

Yesuusi harati ba Aawaa buzo sunttaa goꞌettanaadan koyidee? Ee koyiis. Haymaanootiya kaalettiya amaridaageeti Xoossaa sunttaa xeesiyogee A bonchchennaagaa bessees giidi ammanennan aggokkona; shin Yesuusi Geeshsha Maxaafaara maayettenna hegaa mala qofati I ba Aawaa sunttaa bonchchiyogaa digganaadan mule eeno gibeenna. Gerggesenoona giyo biittan daydanttay oyqqido bitaniya I pattido wode hanidabaa beꞌa. Asay yayyido gishshawunne Yesuusi baanaadan woossido gishshawu, I he biittan takkibeenna. (Mar. 5:16, 17) Gidikkonne, Yesuusi he heeran Yihoowa sunttay erettanaadan koyiis. Hegaa gishshawu, Yesuusi oottidobaa gidennan, Yihooway oottidobaa paxida bitanee haratussi yootanaadan Yesuusi azaziis. (Mar. 5:19) Yesuusi nuuni kumetta saꞌan A Aawaa sunttaa erissanaadan koyees! (Mat. 24:14; 28:20) Nuuni yaatiyo wode, nu Kawuwa Yesuusa ufayssoos. w24.02 10 ¶10

Nuuni ha waayissiya gallassatun Yihoowa dirijjitiya yara gidiyogan tumuppe anjjettida. Ha alamiya hanotay iiti iiti biikkokka, Yihooway nu ishanttunne michchonttu baggaara nuna maaddees. (Maz. 133:1) Nu so asaa duussay ufayssiyagaa gidanaadan maaddees. (Efi. 5:33–6:1) Qassi I nuuni woppu giidi deꞌanaadan nuussi koshshiya akeekaanne aadhdhida eratettaa immees. Shin nuuni ubbatoo Yihoowawu ammanettidi haggaazanawu baaxetana koshshees. Aybissi? Harati haasayiyobay woy oottiyobay nuna yiilloyana danddayiyo gishshataassa. Qassi nuuni balabaa oottiyo wode, ubba he balaa zaari zaaridi oottiyo wode hidootaa qanxxana danddayoos. (1) Nu mala Kiristtaanee nuna yiilloyiyo wode, (2) nu aqo laggee nuna azzanttiyo wode, qassi (3) nuuni balabaa oottidi hidootaa qanxxiyo wode, Yihoowawu ubbatoo haggaazana koshshees. w24.03 14 ¶1-2

Yihoowawu loytti haggaazanawu kuuyida ishanttunne michchonttu deꞌuwan hanidabaa neeni issi issitoo siyaasa. Geella eti Kawotettaa Mishiraachchuwa Yootiyageetu Timirtte Keettan tamaaridosona woy aassiyageeti keehi koshshiyosan haggaazoosona. Neenikka hegaa mala halchchuwa kessikko, hegaa polanawu neessi danddayettida ubbabaa ootta. Yihoowa asay Yihoowassi loytti haggaazanawu koyees. (Oos. 16:9) Neeni haꞌꞌi yaatana danddayennaba gidikko shin? Yihoowawu loytti haggaaziyageetuppe laafiya asadan nena xeelloppa. Neeni wurssettay gakkanaashin gencciyogee keehi koshshiyaba. (Mat. 10:22) Neeni neessi danddayettida keena oottiyo wode Yihooway keehi ufayttiyogaa dogoppa. Hegee neeni haattan muuketta simmadakka Yesuusa aggennan kaallana danddayiyo keehi loꞌꞌo oge.—Maz. 26:1. w24.03 10 ¶11

Nuuni nu nagaraappe zilꞌꞌettidi laamettikko saluwan deꞌiya nu Aaway nuuyyo atto gaanawu qaalaa geliis. (Maz. 86:5) Yaatiyo gishshawu, nuuni oottido nagaran tumuppe zilꞌꞌettikko Yihooway giidobay tuma gidiyogaanne I nuuyyo atto giyogaa ammanettana danddayoos. Yihooway hanotaadan haniyogaa hassaya. Nuuni danddayiyogaappe aarobaa oottanaadan I mule koyenna. Nuussi danddayettida keenan nuuni awu oottiyo ubbabaa I nashshees. Qassi bantta kumetta wozanan Yihoowawu haggaazida Geeshsha Maxaafan etabay odettido asatubaa loytta qoppa. Leemisuwawu, kiitettida Phawuloosabaa qoppa. I unddenna layttawu minnidi oottiis; daro shaꞌu kilo meetiriya manddariisinne daro galchchaa essiis. Shin A deꞌoy laamettin I kaseegaadan sabbakana danddayibeenna; hegaa giyogee Yihooway an ufayttiyogaa aggiis giyogee? Chii. I ubbatoo baassi danddayettida ubbabaa oottiis; qassi Yihooway A anjjiis. (Oos. 28:30, 31) Hegaadankka, nuuni Yihoowawu oottana danddayiyobay laamettana danddayees. Shin Yihooway nuuni awu haggaazanaadan oottida gaasuwa nashshees. w24.03 27 ¶7, 9

Yesuusi Yihoowa woossido woosatun, ba erissiyo ashkkaratussi leemiso gidiis. Yesuusi saꞌan haggaazido wodetun darotoo woossiis. Awu darotoo oosoy dariyo gishshawunne daro asay akko yiyo gishshawu woosawu I wodiyaa bazzana koshshiis. (Mar. 6:31, 45, 46) I barkka deꞌiyoosan woossanawu wodiyaa demmana mala maallado wontti maattan denddees. Baa giishin issi wode, I keehi gitabaa kuuyanaappe kase qamma ubbaa woossiiddi aqiis. (Luq. 6:12, 13) Yesuusi saꞌaa haggaazuwan keehi metiyaabaa polidi hayqqanaappe kase qammi darotoo woossiis. (Maa. 26:39, 42, 44) Nuussi oosoy darikkokka, woossanawu wodiyaa bazzana koshshiyoogaa Yesuusappe tamaaroos. Yesuusaagaadan, nuuni woossanawu wodiyaa bazziyoogee koshshana danddayees. Geellaa nuuni wontti maattan denddana woy guuttaa qamissidi xiskkana danddayoos. Yaatiyo wode, nuuni ha alꞌꞌo imotaa nashshiyoogaa Yihoowawu bessoos. w23.05 3 ¶4-5

Ha xiqisiyan ‘kumiis’ giya qaalaa akeeka. Geeshsha Maxaafaa eranchchay hegee nu bolli “goggiya haatta” mala gidiyogaa yootiis. Ha qofay Yihooway tiyettidaageeta keehi siiqiyogaa bessees! Tiyettidaageeti ‘Xoossay eta siiqiyogaa’ eroosona. (Yih. 1) Kiitettida Yohaannisi ayyaanan tiyettidaageetuyyo siyettiyabaa hagaadan giidi xaafiis: “Nuuni Xoossaa naata geetettidi xeesettana mala, Xoossai nuna ai keenaa siiqidaakkonne be7ite!” (1 Yoh. 3:1) Yaatin Yihooway tiyettidaageetu xallaa siiqii? Chii, Yihooway nu ubbaa siiqiyogaa bessiis. Yihoowa siiquwa loytti qonccissiyabay aybee? Wozuwa. Yihooway yaatiyogan oogaappenne aadhdhiya siiquwa bessiis!—Yoh. 3:16; Roo. 5:8. w24.01 28 ¶9-10

Ha xiqisee Daawiti yayyido wode A maaddida issibaa yootees. I iita hanotan deꞌikkokka, Yihooway sinttappe ayyo oottanabaa loytti qoppiis. Daawiti Yihooway A koshshiya wodiyan ashshanaagaa erees. Hegaa bollikka, Daawiti Israaꞌeelan kawotanaagaa Yihooway yootiis. (1 Sam. 16:1, 13) Yihooway qaalaa gelidobay ubbay polettanaagaa Daawiti ammanettiis. Yihooway neeyyo ay oottanawu qaalaa gelidee? I nuna meto ubbaappe naagees giidi qoppana koshshenna. Shin, ha alamiyan nena gakkana metoy ayba gidikkonne yaana ooratta alamiyan he metuwa Yihooway xayssanaagaa hassaya. (Isi. 25:7-9) Hayqqidaageeta denttanawu, nuna harggiyappe pattanawunne nu morkketa ubbaa xayssanawu nuna Medhdhidaagawu wolqqay deꞌees.—1 Yoh. 4:4. w24.01 6 ¶12-13

Nena Yihoowawu sheedhdhidonne xammaqettido gaasuwaa wotta dentta qoppa. Neeni Yihoowa bagga gidanawu koyido gishshawu hegaadan oottadasa. Neeni tumaa demmidoogaa ammanettanaadan oottidabaa qoppa. Yihoowa loytta erido gishshawu saluwan deꞌiya ne Aawadan A siiqiyoogaanne bonchchiyoogaa doommadasa. Ne ammanuwaa minttadasanne nagaraappe simmadasa. Yihooway ixxiyoobaa oottiyoogaa aggada A ufayssiyaabaa oottiyoogaa doommadasa. Xoossay neeyyo atto giidoogaa erada woppu gaadasa. (Maz. 32:2) Neeni shiiqota shiiqadasanne ne tamaarido ufayssiyaabaa haratuyyo yootiyoogaa doommadasa. Neeni nena Yihoowawu sheedhdhada xammaqettida Kiristtaane gidiyo gishshawu, deꞌuwawu efiya ogiyan haꞌꞌi hemettaydda deꞌaasa; qassi ubbatoo hemettanawu neeyyo danddayettida ubbabaa oottaasa. (Maa. 7:13, 14) Yihoowayyo gelido qaalan minni eqqiyageetanne A azazuwa qaaxxennan azazettiyageeta gidite. w23.07 17 ¶14; 19 ¶19

Nena Yihoowawu sheedhdhiyo wode woossido woosaa wotta dentta qoppiyogan nena gakkiya paace ubbaa eqettanawu wolqqaa demmaasa. Leemisuwawu, neeni hara asaa aqo laggiya lambbeechchay? Lambbeechchennaagee qoncce! Neeni hegaa malabaa oottennan agganawu Yihoowawu qaalaa geladasa. Neeni iita amoy ne wozanan diccennaadan diggikko, wodeppe hegaa agganawu baaxetana koshshenna. Yaatikko ‘nagaranchchatu ogiyappe guyye simmaasa.’ (Lee. 4:14, 15) Yesuusa taarikiya loytti qoppiyogee nuna maaddana danddayees. I ba Aawaa ufayssanawu murttiis. Yesuusaagaadan, neenikka nena awu sheedhdhido Xoossaa ufayssennaba ubbaa sohuwara mintta eqettanawu murtta. (Mat. 4:10; Yoh. 8:29) Metoy nena gakkiyo wode woy balabaa oottanaadan paacettiyo wode neeni oottiyobay Yesuusa aggennan kaallanawu koyiyogaa bessana danddayees. Neeni yaatiyo wode Yihooway nena maaddanaagaa ammanettana danddayaasa. w24.03 9-10 ¶8-10