Xiqimita

Neeni azazettanawu metoota eray? Kawoy Daawitikka metooti erees, yaatiyo gishshawu Xoossaa hagaadan woossiis: ‘Taani neeyyo eeno gaada azazettanaadan tana maadda.’ (Maz. 51:12) Daawiti Yihoowa siiqees. Gidikkokka, Daawiti issi issitoo azazettanawu metootiis, qassi nuunikka azazettanawu metootoos. Aybissi? Koyruwan, nu laattido nagaray nuuni azazettanawu metootanaadan oottees. Naaꞌꞌanttuwan, Seexaanay nuuni aagaadan Yihoowa bolli makkalanaadan ubbatoo baaxetees. (2 Qor. 11:3) Heezzanttuwan, “Xoossaayyo azazettenna asaa ha77i haariya ayyaanaayyo [azazettiya]” makkalanchcha asati kumido alamiyan deꞌoos. (Efi. 2:2) Yaatiyo gishshawu, nuuni Yihoowawunne I maataa immidoogeetuyyo azazettanawu nu shugo miyyiya, Dabloosanne ha alamiya xoonanawu baaxetana koshshees. w23.10 6 ¶1

Yesuusi haattaa woyne eessawu laammido maalaalissiyaabaappe nuuni ay tamaariyoo? Nuna ziqqi oottana koshshiyoogaa tamaaroos. Yesuusi maalaalissiyaabaa oottido gishshawu ceeqettibeenna; I oottido aybiininne mule ceeqetti erenna. SHin I darotoo bana ziqqi oottidi ba Aawaa bonchchiisinne sabbiis. (Yoh. 5:19, 30; 8:28) Nuuni ubba wode nuna ziqqi oottidi Yesuusa leemisuwaa kaallikko, nu oottidoban ceeqettokko. Nunan gidennan, awu oottanaadan nuussi maataa immida nu Xoossan ceeqettiyaageeta gidoos. (Erm. 9:23, 24) Nuuni A bonchchiyoogee bessiyaaba. Nuuni Yihoowa maadoy baynnan loꞌꞌobaa aybanne mule oottana danddayokko. (1 Qor. 1:26-31) Nuuni nuna ziqqi oottikko, haratussi oottido loꞌꞌobaa gishshawu bonchchuwaa ekkana koshshenna. Nuuni oottiyoobaa Yihooway beꞌiyoogaanne nashshiyoogaa eriyo gishshawu ufayttoos. (Maatiyosa 6:2-4​ra gatta xeella; Ibr. 13:16) Nuuni Yesuusaagaadan nuna ziqqi oottiyo wode Yihooway ufayttanaagee qoncce.—1 Phe. 5:6. w23.04 4 ¶9; 5 ¶11-12

Kiitettida PHawuloosi ayyaanay kaalettin Kiristtaaneti harata goꞌꞌiyaabaa koyanaadan minttettiis. Nuuni shiiqotun he zoriyaa waati oosuwan peeshshana danddayiyoo? Nuugaadan, haratikka qofaa yootanawu koyiyoogaa hassayiyoogaana. Hegaabaa ane hagaadan qoppa. Neeni ne laggetuura haasayiyo wode darobaa haasayiyoogan harati haasayennaadan oottay? Hegaadan oottennaagee qoncce! Neeni etikka haasayanaadan koyaasa. Hegaadankka, shiiqotun danddayettida keenan daroti qofaa yootanaadan koyoos. Nu ishanttanne michchontta minttettana danddayiyo keehi loꞌꞌo ogee, eti bantta ammanuwaabaa qonccissanaadan etawu injjiyaa immiyoogaa. (1 Qor. 10:24) Yaatiyo gishshawu, haratikka bantta qofaa yootanaadan, ubbatoo nu qofaa qanttan yootana koshshees. Neeni qanttabaa zaariyo wodekka, daro zaaruwaa yootiyoogaappe naagetta. Neeni menttuwan deꞌiya ubbabaa zaarikko harati zaariyoobay xayana danddayees. w23.04 22-23 ¶11-13

Muletoo harata maaddiyoogee, ubba qassi haggaazuwan maaddiyoogee keehi koshshiyoogaa nuuni hassayana bessees. Nuuni haggaazuwan hanotaadan hanana koshshees. Xoossaa xeelliyaagan dumma dummabaa qoppiyaanne dumma dumma sohuwaappenne wogaappe yiida asawu sabbakoos. Kiitettida Phawuloosi hanotaadan haniya asa, qassi nuunikka A leemisuwaa kaallana danddayoos. Yesuusi Phawuloosa ‘Ayhuda gidenna asaayyo kiitettidaagaa’ gidanaadan sunttiis. (Roo. 11:13) Yaatiyo gishshawu Phawuloosi Ayhudatussi, Giriiketussi, tamaarida asaassi, gaxariyaa asaassi, kawotettaa sunttatussinne kawotussi sabbakiis. Ha dumma dumma asa ubbaa wozanaa denttettiya ogiyan sabbakanawu Phawuloosi “ubba asatuura ubbaban eta mala” gidiis. (1 Qor. 9:19-22) Aara haasayiya asati diccido hanotaanne eti ammaniyoobaa I loytti qoppiis. Hegee I hanotaadan hananaadaaninne Xoossaabaa eranawu koyanaadan oottiya ogiyan ubba asaa haasayissanaadan A maaddiis. Nuuni hanotaadan haniyo wodenne ubba asaa maaddiyo keehi loꞌꞌo ogiyaa qoppiyo wode nuunikka kaseegaappe loytti sabbakana danddayoos. w23.07 23 ¶11-12

Ashkke uri minoppe attin, shugo gidenna. Waayissiyaabay gakkiyo wode woppu gaanawu minotettay koshshees. Ashkketettay ‘ayyaanaa ayfiyaa’ macaratuppe issuwaa. (Gal. 5:22, 23) “Ashkketettaa” geetetti birshshettida Giriiketto qaalay loohida paraa qonccissanawu issi issitoo goꞌettiyo qaala. Ane loohida paraa qoppa. Paray loohidaba gidikkonne, I haꞌꞌikka keehi mino. SHin nuuni kaseegaappe aaruwan ashkkenne mino waani gidana danddayiyoo? Nuuni nu baaxiyan hegaa mala asa gidana danddayokko. Ha loꞌꞌo eeshshay nuussi deꞌanaadan Xoossay nuna maaddana mala A ayyaanaa demmanawu nuuni woossana koshshees. Hegee danddayettiyaaba gidiyoogaa darotu hanotay bessees. Leemisuwawu, nu ishanttuppenne michchonttuppe daroti asay etaara palamettanawu maliyo wode ashkke gidiyoogaa bessidosona. Qassi hegee harati Yihoowa Markkatubaa loꞌꞌobaa qoppanaadan maaddiis.—2 Xim. 2:24, 25. w23.09 15 ¶3

Kiitettida Yohaannisi 24 cimati saluwan Yihoowayyo goynniyoogaa maalaalissiya ajjuutan beꞌiis. Eti Xoossay “bonchchuwaa, sabaanne wolqqaa” ekkanawu bessiyoogaa yootiiddi A sabbidosona. (Ajj. 4:10, 11) Ammanettida kiitanchchatikka Yihoowa sabbiyo daro gaasoy deꞌees. Eti saluwan aara deꞌiyo gishshawu A loytti eroosona. Eti I oottiyooban qonccida A eeshshata akeekoosona. Eti Yihooway oottiyoobaa beꞌiyoogee A sabbanaadan eta denttettees. (Iyy. 38:4-7) Nuunikka nu woosan Yihoowa sabbana koshshees. Nuuni abaa siiqiyoobaanne A bonchchiyo gaasuwaa awu yootiyoogan yaatana danddayoos. Neeni Geeshsha Maxaafaa nabbabiyoonne xannaꞌiyo wode, nena keehi ufayssiya Yihoowa eeshshata akeekanawu mala. (Iyy. 37:23; Roo. 11:33) Yaatada he eeshshata xeelliyaagan neeyyo siyettiyaabaa Yihoowayyo yoota. Qassi nuna, nu ishanttanne michchontta ubbaa maaddiyo gishshawu Yihoowa sabbana danddayoos.—1 Sam. 2:1, 2. w23.05 3-4 ¶6-7

Gita Baabiloona Xoossaa asaa haariyoogee 1919n attiis. He laytti, ‘ammanettida wozannaama ashkkaray’ oosuwaa doommiis; hegaappe denddidaagan ashkke asay ‘Geeshshatettaa Ogiyan’ biyoogaa doommiis. (Maa. 24:45-47; Isi. 35:8) He ogiyaa giigissanawu harati beni oottidobay Yihoowanne A halchchuwaa xeelliyaagan gujjidi tamaaranawu he aaho ogiyan biyoogaa doommida asaa maaddiis. (Lee. 4:18) Qassi eti Yihooway azazidobaara maayettiya ogiyan deꞌidosona. Yihooway ba asay koshshiya ubbaban issi kutti laamettanaadan naagibeenna. I ba asaa loddan loddan geeshshiis. Nu oottiyo ubbaban Xoossaa ufayssiyo wode nuuni keehi ufayttana! Ogee moorettennan takkanaadan ubbatoo oottana koshshiyaabay deꞌees. Daro asay Gita Baabiloonippe kiyana mala “Geeshshatettaa Ogiyaa” oosoy 1919​ppe doommidi hanno gakkanawu oosettiiddi deꞌees. w23.05 17 ¶15; 19 ¶16

Oosuwa Kaalettiya Citaa yarati, Oosuwa Kaalettiya Citaa dumma dumma kontteta maaddiyageeta loohissoosona. Maaddiyageeta gidida ha ammanettida ishantti, dirijjitiyan daro aawatettaa poliiddi deꞌoosona. Kiristtoosa dorssata ubbatoo heemmanawu eti loytti loohidosona. Gita waayiya wurssetta heeran, tiyettidaageetuppe wurssettaageeti saluwa biyo wode, saꞌan deꞌiya Yihoowa asay ubbatoo awu ammanettidi goynnana. Yesuus Kiristtoosi kaalettiyo gishshawu, nuuni Yihoowawu ammanettidi goynniyogaa aggokko. Geeshsha Maxaafay Maagooga Googa giidi xeesiyo issippe denddiya kawotettati he wode Xoossaa asaa qohanawu denddanaagaa nuuni eroos. (Hiz. 38:18-20) Shin hegee eta darin qohenna; qassi eti Yihoowawu haggaaziyogaa agganaadan oottenna. I eta ashshana. Kiitettida Yohaannisi, ‘zawi baynna asa’ gidida Kiristtoosa hara dorssata ajjuutan beꞌiis. Kiitettida Yohaannisi, ha ‘zawi baynna asati’ gita “waayiyaa waayidi yiidaageeta” gidiyogaa yootiis. (Ajj. 7:9, 14) Ee, eti attana! w24.02 5-6 ¶13-14

Nuuni geeshsha ayyaanaa demmanawu waatana danddayiyoo? Hegaa demmanawu woossana, ayyaanaa kaaletuwan xaafettida Xoossaa Qaalaa xannaꞌananne A ayyaanay kaalettiyo dirijjitiyaara hashetana danddayoos. Yaatiyoogee nuuni ‘ayyaanaa ayfiyaa’ ayfanaadan maaddana. (Gal. 5:22, 23) Geeshshabaa qoppiyaanne geeshsha kanddoy deꞌiyo asatu xallaassi Xoossay ba ayyaanaa immees. Nuuni geeshsha gidennabaa qoppiyoogaanne hegaa oottiyoogaa aggennaba gidikko, I ba ayyaanaa immiyoogaa aggees. (1 Tas. 4:7, 8) Nuuni geeshsha ayyaanaa ubbatoo demmanawu ‘hanana giidi yootido qaalaa karana’ koshshenna. (1 Tas. 5:20) “Hanana giidi yootido qaalaa” giyaagee Yihoowa gallassaanne nuuni eesoyiya wodiyan deꞌiyoogaa gujjin, ba geeshsha ayyaanaa baggaara nuussi yootiyo qofaa qonccissees. Yihoowa gallassay woy Armmageedooni nu deꞌiyo wodiyan yeenna giidi qoppana koshshenna. Nuuni ‘Xoossaa milatiyoogaa bessiya oosuwaa’ minni oottiyoogaaninne geeshsha kandduwan deꞌiyoogan he gallassay matan yaana giidi naagiyoogaa woy qoppiyoogaa bessoos.—2 PHe. 3:11, 12. w23.06 12 ¶13-14

Nu elektronike miishshan pornograafiyaa misilee yiikko nuuni Kiristtaane gidiyoogaadan waatana koshshii? Nuuni beꞌiyoogaa sohuwaara aggana koshshees. Nuussi aybippekka aadhdhiyaabay nuuni Yihoowaara dabbotido dabbotaa gidiyoogaa hassayiyoogee yaatanaadan nuna maaddana danddayees. Issi issi misileti pornograafe gidana xayikkonne, nuuni pokkobaa qoppanaadan oottana danddayoosona. Nuuni hegaappe naagettana koshshiyoy aybissee? Nuuni pokkobaa oottiyoogaa qoppanawukka koyenna gishshataassa. (Maa. 5:28, 29) Taylandden deꞌiya Deevida giyo cimay hagaadan giis: “‘Misilee pornograafe gidana xayikkokka, taani hegaa aggennan beꞌikko Yihooway ufayttii?’ gaada tana oychchays. Yaatiyoogee taani loꞌꞌobaa oottanaadan maaddiis.” Yihoowa azzanttiyaabaa oottanawu yayyiyoogee nuuni loꞌꞌobaa oottanaadan maaddees. Xoossaassi yayyiyoogee ‘aadhdhida eratettaassi doometta.’ w23.06 23 ¶12-13

“Soo” giya qaalay gubaaꞌiyaa qonccissiyaaba gidana danddayees. Yihooway nuuni nu ishanttuuranne michchonttuura ubbatoo awu haggaazikko gita waayiyaa wode nuna naaganawu qaalaa geliis. Hegaa gishshawu, nuuni nu ishantta siiqanawu ha wodiyan loytti baaxetana koshshees. Yaatiyoogee nuuni attanaadan oottana danddayees! “GODAA gita gallassai” asa ubbawu keehi waayissiya wode gidana. (Sof. 1:14, 15) Yihoowa asaykka waayettana. SHin nuuni haꞌꞌi giigettikko, woppu giidi deꞌananne harata maaddana. Nuna gakkiya ay metuwaakka nuuni genccana. Nu mala Kiristtaaneti waayettiyo wode, etawu qarettiyoogaaninne koshshiyaabaa kunttiyoogan eta maaddanawu nuussi danddayettida ubbabaa oottana. Qassi nuuni nu ishanttanne michchontta haꞌꞌi siiqikko, sinttappekka siiqana. He wode, daafabaynne waaye ubbay xayido alamiyan merinaa deꞌuwaa immiyoogan Yihooway nuna woytana.—Isi. 65:17. w23.07 7 ¶16-17

Xoossaa Qaalay ammanettida asati mino gidiyogaa darotoo qonccissees. Shin eti ubbatoo mino gidokkona. Leemisuwawu, Kawuwa Daawiti issi issitoo ‘deriyadan mino’ gididabadan qoppiis, shin hara wodetun ‘dagammiis.’ (Maz. 30:7) Xoossaa ayyaanay Samssoonawu gita wolqqaa immiis, shin Samssooni Xoossay awu wolqqaa immennaakko I ‘daafuridi hara asadan hananaagaa’ eriis. (Daan. 14:5, 6; 16:17) Ha ammanettida asati mino gididoy Yihooway etawu wolqqaa immido gishshataassa. Kiitettida Phawuloosikka Yihooway immiyo wolqqay awu koshshiyogaa akeekiis. (2 Qor. 12:9, 10) I harggiis. (Gal. 4:13, 14) I issi issitoo loꞌꞌobaa oottanawu metootiis. (Roo. 7:18, 19) Qassi I issi issitoo unꞌꞌettiisinne ta bolli aybi gakkaneeshsha giidi yayyiis. (2 Qor. 1:8, 9) Gidikkonne, Phawuloosi daafurido wode wolqqaa demmiis. Waatidi? Phawuloosi bana gakkida metota genccanaadan koshshiya wolqqaa Yihooway immido gishshataassa. w23.10 12 ¶1-2

Issi issitoo nuuni nuna pattenna asadan xeelliyo wode Yihooway nuna baakko ehiidoogaa hassayana danddayoos. (Yoh. 6:44) Nuuni nuussi deꞌiyogaa akeekibeenna loꞌꞌo eeshshata I akeekeesinne nu wozanaa loytti erees. (2 Odi. 6:30) Hegaa gishshawu, nuuni alꞌꞌo gidiyogaa I yootiyo wode nuuni an ammanettana danddayoos. (1 Yoh. 3:19, 20) Nuuppe amaridaageeti tumaa eranaappe kase hanno gakkanawu nuna zilꞌꞌana danddayiyabaa oottida. (1 Phe. 4:3) Yihoowayyo ammanettidi haggaaziya harati bantta shugo miyyiya xoonanawu hanno gakkanawu baaxetoosona. Neeni shin? Yihooway neeyyo atto gaana danddayennabadan issi issitoo qoppay? Yaatikko, Yihoowawu ammanettidi haggaaziya haratakka neegaa mala hanotay gakkidoogaa eriyogee nena minttettana danddayees. Leemisuwawu, kiitettida Phawuloosi ba mooruwa qoppidi bana ufayssi baynna asadan xeelliis. (Roo. 7:24) Phawuloosi ba nagaran zilꞌꞌetti laamettidi haattan muukettida asa. Gidikkokka, I bana ‘Yesuusi kiittido ubbaappe laafanne ubbaappe aadhdhiya’ nagaranchcha asadan qonccissiis.—1 Qor. 15:9; 1 Xim. 1:15. w24.03 27 ¶5-6

Kawuwa Yoꞌaashi kuuyido iitabaappe nuuni tamaarana danddayiyo issibay Yihoowa siiqiyaanne A ufayssanawu koyiya asaara laggetana koshshiyoogaa. Eti nuuni loꞌꞌobaa oottanaadan maaddoosona. Nuuni nuuppe bayratiyaageetuura woy kaalotiyaageetuura laggetana danddayoos. Yoꞌaashi ba laggiyaa Yoodaaheppe keehi kaalotiyoogaa hassayite. Laggeta dooriyoogaara gayttidaagan inttena hagaadan oychchite: ‘Eti taani Yihoowa mintta ammananaadan maaddiyoonaa? Xoossay kessido maaraadan deꞌana mala tana minttettiyoonaa? Yihoowabaanne A tumaabaa haasayiyoonaa? Xoossay kessido maarata eti kaalliyoonaa? Tawu zoree koshshiyo wode tana zoriyoonaa?’ (Lee. 27:5, 6, 17) Intte laggeti Yihoowa siiqennaba gidikko, inttena maaddokkona. SHin intte laggeti Yihoowa siiqiyaageeta gidikko, inttena ubbatoo maaddana!—Lee. 13:20. w23.09 9-10 ¶6-7

Giriiketto pitaliyan alifay koyroogaa, qassi omeegay wurssettaagaa. Yihooway I “Alifaanne Omeegaa” gidiyogaa yootidoogee, I issibaa oottiyogaa doommikko polennaadan A teqqana danddayiyabi baynnaagaa nuuni akeekanaadan maaddees. Yihooway Addaamanne Hewaano hagaadan giis: “Yelettite; corattite; ha sa7aa kumitenne haarite.” (Doo. 1:28) He wode, Yihooway saꞌawunne asawu halchchido ba halchchuwa yootiis. Hegee doomettaa woy “Alifaa” giyogaa. Ha halchchoy muleera polettiyo wode, qassi Addaamenne Hewaani zeretta gidida azazettiya asati ha saꞌaa kumidi saꞌaa Gannate oottiyo wode, “Omeegaa” gidana. Yihooway ‘salota, saꞌaanne etan deꞌiya ubbabaa’ medhdhiyogaa wurssi simmidi ba halchchoy polettennan attennaagaa bessiyabaa yootiis. I asawunne saꞌawu halchchidobaa laappuntta gallassaa wurssettan muleera polanaagaa bessees.—Doo. 2:1-3. w23.11 5 ¶13-14

Baabilooneppe Israaꞌeela biyo waayissiya ogee oyddu aginaa gidiyaagaa wurssana danddayikkonne, eti guyye simmiyo wode diggana danddayiyaaba milatiya ay xubiyaanne xayssanawu Yihooway qaalaa geliis. Ammanettida Ayhudati Israaꞌeela biittaa simmiyoogan demmiyo goꞌꞌay eti aggibayiyo aybippekka keehi aadhdhiyoogaa eridosona. Keehi gita anjjoy eta goynuwaara gayttidaba. Baabiloonen Yihoowayyo goynniyo beeta maqidasee baawa. Muuse Higgee yootiyoogaadan Israaꞌeelati yarshshuwaa yarshshana danddayiyo sohoy yan baawa; qassi he yarshshota yarshshanawu qeese gididi oottiyaabi baawa. Hegaa bollikka, he kataman Yihoowa woy I kessido maaraa bonchchiya asaappe worddo xoossatuyyo goynniya asay keehi daro. Hegaa gishshawu, Yihoowa siiqiya daro shaꞌu Ayhudati tumu goynuwaa zaarettidi essanawu bantta biitti simmanawu yeemottidosona. w23.05 14-15 ¶3-4

Nuuni “poo7uwan de7iya asaadan” ubbatoo hemettanawu Xoossaa geeshsha ayyaanaa maadoy nuussi koshshees. Aybissi? Ha shori baynna alamiyan geeshsha gididi deꞌiyogee deexiyaba gidiyo gishshataassa. (1 Tas. 4:3-5, 7, 8) Issibaa Yihoowagaadan xeellenna ha alamiya asaa qofaa eqettanaadan geeshsha ayyaanay nuna maaddana danddayees. Geeshsha ayyaanay nuuni ‘loꞌꞌotettaanne xillotettaa ubbaa’ ayfanaadankka maaddana danddayees. (Efi. 5:9) Nuuni geeshsha ayyaanaa demmana danddayiyo issi ogee woossiyogaa. Yihooway ‘bana woossiyageetussi geeshsha ayyaanaa immanaagaa’ Yesuusi yootiis. (Luq. 11:13) Qassi nuuni Kiristtaane shiiqotun Yihoowa sabbiyo wodekka geeshsha ayyaanaa demmoos. (Efi. 5:19, 20) Xoossaa geeshsha ayyaanay nuna maaddin, nuuni Xoossaa ufayssiya ogiyan deꞌana danddayoos. w24.03 23-24 ¶13-15

Intte kaseegaappe aaruwan danddayanchcha gidanawu koshshii? Yaatikko, hegaassi woossite. Danddayay Geeshsha ayyaanaa ayfiyaa macaratuppe issuwaa. (Gal. 5:22, 23) Yaatiyo gishshawu, nuuni geeshsha ayyaanaa demmanawunne geeshsha ayyaana ayfiyaa ayfanaadan Yihooway nuna maaddana mala woossana danddayoos. Nuuni danddayanchcha gidanawu metootanaadan oottiya hanotay merettiyo wode, danddayanchcha gidanawu maaddana mala geeshsha ayyaanaa demmanawu ‘aggennan woossoos.’ (Luq. 11:13) Issibaa Yihooway xeelliyoogaadan xeellanaadan I nuna maaddanaadankka woossana danddayoos. Nuuni woossi simmidi ubba galla danddayanchcha gidanawu nuussi danddayettida ubbabaa oottana koshshees. Nuuni danddayanchcha gidanawu ubbatoo woossikko, qassi hegaa bessanawu ubbatoo baaxetikko, kase danddayanchcha asa gidana xayikkonne kaseegaappe aaruwan danddayanchcha gidanaadan Yihooway nuna maaddana. Geeshsha Maxaafaa taariketa wotti dentti qoppiyoogeekka maaddees. Danddayanchcha gidida daro asatu taarikiyaa Geeshsha Maxaafay yootees. He taariketa wotti dentti qoppiyoogan nuuni danddayanchcha gidiyoogaa bessiyo ogeta erana danddayoos. w23.08 22 ¶10-11

Yesuusi Yihooway kiitettida Pheexiroosawu koshshiyaabaa kunttanaagaa I ammanettanaadan oottiis. Yesuusi hayquwaappe denddi simmidi, Pheexiroosinne I kiittidoogeeti maalaalissiya ogiyan moliyaa haranttuwaa oyqqanaadan oottiis. (Yoh. 21:4-6) Ha maalaalissiyaabay Yihooway Pheexiroosassi deꞌuwawu koshshiyaabaa kunttana danddayiyoogaa I ammanettanaadan oottidoogee qoncce. ‘Kasetidi Xoossaa Kawotettaa koyiyaageetuyyo’ koshshiyaabaa Yihooway kunttanaagaa Yesuusi yootidoogaa Pheexiroosi hassayennan aggenna. (Maa. 6:33) Ha ubbabay, Pheexiroosi moliyaa oyqqiyo oosuwaa gidennan, ba deꞌuwan sabbakuwaa oosuwaa kaseyanaadan maaddiis. Pheexiroosi 33 M.Ln, Phenxxaqosxxe gallassan xalatettan sabbakiis, qassi hegee daro shaꞌu asati mishiraachchuwaa siyanaadan oottiis. (Oos. 2:14, 37-41) Hegaappe simmin, Samaariyaa asatinne Ayhuda gidennaageeti Kiristtoosa ammananaadan I maaddiis. (Oos. 8:14-17; 10:44-48) Dumma dumma asay gubaaꞌiyaa yaanaadan Yihooway maalaalissiya ogiyan Pheexiroosa goꞌettidoogee tuma. w23.09 20 ¶1; 23 ¶11

Baabilooneti Yerusalaame xayssin naaꞌꞌaa gidiya layttaa heeraappe simmin gidennan aggenna, Baabiloona Kawoy Naabukadanaxoori yashshiya aymuwan gita misiliya beꞌiis. Daaneela gujjin, A aadhdhida eranchchati he aymuwaanne he aymuwaa birshshettaa awu yootanaadan azaziis. Eti yootana xayikko, I eta ubbaa worana. (Dane. 2:3-5) Daaneeli eesuwan issibaa oottana koshshees; hegee xayikko daro asay hayqqana. I “kawuwaakko gelidi, aimuwaa birshshettaa erissanau, baayyo wodee imettana mala woossiis.” (Dane. 2:16) Hegee Daaneeli xalanne ammanoy deꞌiyo asa gidiyogaa bessees. Waatidi? Daaneeli hegaappe kase aymuwaa birshshi eriyoogaa yootiya taarikee baawa. Ba laggeti “saluwaa Xoossai maarotaa etau oottidi, ha xuuraa etau qonccissanau woossana mala” I oychchiis. (Dane. 2:18) Yihooway eta woosaa zaariis. Xoossay maaddin, Daaneeli Naabukadanaxoora aymuwaa birshshiis. Daaneelinne A laggeti hayqqibookkona. w23.08 3 ¶4

Danddayanchcha gidiyoogee demissiyo goꞌꞌaa qoppa. Nuuni danddayanchcha gidiyo wode ufayttoosinne woppu goos. Yaatiyo gishshawu, danddayanchcha gidiyoogee nuuni qofaaninne asatettan payya gidanaadan oottees. Nuuni haratubaa danddayiyo wode, etaara dabbotaa minttoos. Nu gubaaꞌee kaseppe aaruwan issuwaa gidana. Issi uri nuna yiilloyiyo wode eesuwaara hanqqettokko, qassi hanotay yaa iitanaadan oottokko. (Maz. 37:8; Lee. 14:29) Hegaa bollikka, saluwan deꞌiya nu Aawaa milatoosinne kaseegaappe aaruwan akko shiiqoos. Danddayay nuna ubbaa maaddiya keehi loꞌꞌo eeshsha. Danddayanchcha gidiyoogee issi issitoo metiyaaba gidikkonne, Yihooway maaddin nuuni ha eeshshaa ubbatoo bessana danddayoos. Qassi nuuni ooratta alamiyaa danddayan naagiiddi, “GODAA aifeti ayyo yayyiyaanne aggenna a siiquwan ufaissaa oottiya asatu bollaana” gidiyoogaa ammanettana danddayoos. (Maz. 33:18) Nuuni ubbaykka aggennan danddayaa maayanawu murttidaageeta gidoos. w23.08 22 ¶7; 25 ¶16-17

Issi asi bayyo ammanoy deꞌiyogaa yootikkokka, I oottiyobay ayyo ammanoy baynnaagaa qonccissiyogaa Yaaqoobi yootiis. (Yaaq. 2:1-5, 9) Yaaqoobi ‘issi ishaassi woykko michcheessi maayiyobi woy miyobi baynnaagaa’ beꞌidi koshshiyaban maaddibeenna issi uraabaakka yootiis. He uri tawu ammanoy deꞌees giidi yootikkonne, A oosoy awu ammanoy baynnaagaa bessees. (Yaaq. 2:14-16) Ammanuwa oosuwan bessiyogan loꞌꞌo leemiso gidida Raꞌaabibaa Yaaqoobi yootiis. (Yaaq. 2:17, 25) A Yihoowabaa siyaasunne I Israaꞌeelata maaddidoogaa eraasu. (Yaas. 2:9-11) Biittaa wochchiya naaꞌꞌu Israaꞌeela asata hayquwappe ashshiyogan A ba ammanuwa oosuwan bessaasu. Ha nagaranchcha maccaasiya Israaꞌeela asa gidana xayikkonne, Abrahaamaagaadan xillo geetettaasu. Nu ammanuwa oosuwan bessiyogee keehi koshshiyaba gidiyogaa Raꞌaabippe tamaaroos. w23.12 5-6 ¶12-13

Nuuni Kiristtaane gidiyo gishshawu, Geeshsha Maxaafaa koyro timirttetuppe aadhdhiyabaa akeekana koyoos. Xoossaa geeshsha ayyaanay maaddin nuuni ‘Xoossaabaa haray atto geemettida yohuwaa’ erana koyoos. (1 Qor. 2:9, 10) Yihoowakko kaseegaappe aaruwan shiiqanawu halchchada loytta xannaꞌana danddayaasa. Leemisuwawu, I beni wode deꞌida ba ashkkarata siiqiyogaa waati bessidaakko, qassi hegee I nenakka siiqiyogaa waati bessiyakko pilggana danddayaasa. Hegaa bollikka, Israaꞌeelati baassi ay ogiyan goynnanaadan koyidaakko xannaꞌananne ha wodiyan nu awu goynnanaadan I koyiyo ogiyara hegaa geeddarssana danddayaasa. Woy qassi Yesuusi saꞌan deꞌiyo wode, ba deꞌuwaninne haggaazuwan polido hiraagatubaa gujjada xannaꞌana danddayaasa. Yihoowa Markkati Geeshsha Maxaafaa Xannaꞌanawu Maaddiya Xuufiya (Amaarattuwa) goꞌettada he huuphe yohota xannaꞌiyogan keehi ufayttana danddayaasa. Geeshsha Maxaafaa loytta xannaꞌiyogee ne ammanuwa minttananne neeni ‘Xoossaa loytta eranaadan’ maaddana.—Lee. 2:4, 5. w23.10 18-19 ¶3-5

“Wozanappe” giyagawu kiitettida Pheexiroosi goꞌettido qaalay “micciyogaa” qonccissees. Nuuni harata wozanappe siiqiyo wode oottanabaakka xiqisee yootees. Harata wozanappe siiqiyogee nu ishanttu nagaraa kammanaadan maaddees. Darosan gaarettida issi xarapheezaa ane qoppa: Carqqiya miccada he xarapheezaa mayzziyogan, gaarettida issisaa woy naaꞌꞌu sohuwa xalla gidennan darosaa kammana danddayaasa. Hegaadankka, nuuni nu ishanttanne michchontta wozanappe siiqikko, eti baliyo issibaa woy naaꞌꞌubaa xalla gidennan, “daro nagaraa” kammana woy atto gaana danddayoos. Nuuni harata siiqiyo siiqoy, mino gidana koshshees; yaatikko, atto giyogee metiyo wodekka nu mala Kiristtaanetu balaa atto gaana danddayoos. (Qol. 3:13) Nuuni haratussi atto giyo wode nu siiqoy mino gidiyogaanne Yihoowa ufayssanawu koyiyogaa bessoos. w23.11 11-12 ¶13-15

Kawuwaa Yoosiyaasi awu layttay 26 gidido wode beeta maqidasiyaa bottokoniyoogaa doommiis. Bottokoniyo wode, “GODAI Muuse baggaara immido Higgiyaa [Maxaafay]” beettiis. He kawoy hegee nabbabettin siyido wode, hegan xaafettidabaa azazettanawu issi issibaa sohuwaara laammiis. (2 Odi. 34:14, 19-21) Geeshsha Maxaafaa ubbatoo nabbabiyoogaa doseetii? Intte ubba galla hegaa nabbabanawu baaxetennan waayi aggana. SHin yaatiyoogan ufaytteetii? Inttena maaddana danddayiya xiqiseta xaafi oyqqidetii? Yoosiyaasi awu layttay 39 heera gidido wode, I hayqqanaadan oottiya moorobaa oottiis. Kaaletuwaa Yihoowa oychchiyoogaa aggidi banan ammanettiis. (2 Odi. 35:20-25) Nuuni hagaappe tamaariyoobay deꞌees. Nu layttay aappuna gidikkokka woy Geeshsha Maxaafaa xannaꞌido wode ay keena gidikkokka, nuuni Yihoowa ubbatoo koyana bessees. Yaatanawu nuuni ubbatoo A kaaletuwaa demmanawu woossana, A qaalaa xannaꞌananne kayma Kiristtaaneti yootiyo zoriyaa siyana koshshees. Nuuni yaatikko darin moorennan aggananne ufayttana danddayoos.—Yaaq. 1:25. w23.09 12 ¶15-16

Yihoowa siiqidanne awu haggaazida, leemiso gidiya daro maccaasatubaa Geeshsha Maxaafay yootees. Eti ‘kiphatanchchatanne ubbaban ammanettiyageeta’ gidiyogaa bessidosona. (1 Xim. 3:11) Hegaa bollikka michchontti eta leemisuwa kaallana danddayiyo kayma Kiristtaane michchontta bantta galchchan demmana danddayoosona. Yelaga michchonttoo, intte milatana danddayiyo, loꞌꞌo leemiso gidida amarida michchontta ereetii? Eta loꞌꞌo eeshshata akeekite; yaatidi he eeshshata waati bessana danddayiyakko loytti qoppite. Nuna ziqqi oottiyogee kayma Kiristtaanetuppe koyettiya waannabaa. Issi maccaasiya bana ziqqi oottikko Yihoowaranne haratuura loytta dabbotawusu. Leemisuwawu, galchchaa kaalettiyonne so asaa ayssiyo aawatettaa Yihooway oossi immidaakko qonccissido 1 Qoronttoosa 11:3n odettida kaaletuwa Yihoowa siiqiya maccaasiya bana ziqqi oottada kaallawusu. w23.12 18-19 ¶3-5

Issi azinay ba machchiyo siiqanaadan, iyyo koshshiyabaa kunttanaadan, loꞌꞌo lagge gidanaadaaninne Yihoowara dabbotaa minttada deꞌana mala O maaddanaadan Yihooway koyees. Adussi qoppiyogaa, maccaasaa bonchchiyogaanne ammanettiyogaa mala eeshshati intte loꞌꞌo azina gidanaadan maaddana. Intte aqo oyqqi simmidi aawa gidennan aggekketa. Loꞌꞌo aawa gidiyogaara gayttidaagan Yihoowappe ay tamaarana danddayeetii? (Efi. 6:4) Yihooway ba Naꞌaa Yesuusa siiqiyogaanne an ufayttiyogaa qoncciyan yootiis. (Mat. 3:17) Intte aawa gidikko, intte naata siiqiyogaa ubbatoo yootite. Eti oottiyo loꞌꞌobawu eta galatite. Yihoowa leemisuwa kaalliya aawati bantta naati kayma Kiristtaane gidanaadan maaddoosona. Intte so asaanne galchchan deꞌiyageeta siiqiyogan, qassi eta siiqiyogaanne nashshiyogaa bessiyogan he aawatettawu haꞌꞌi giigettana danddayeeta.—Yoh. 15:9. w23.12 28-29 ¶17-18

Nuuni ammanettida Yihoowa ashkkara gidikkokka, hara asaagaadan metootoosinne sahettoos. Hegaa bollikka, Xoossaa asaa ixxiyageeti nuna eqettiyogaa woy nu bolli gattiyo yedetaa gencciyogee koshshana danddayees. Yihooway hegaa mala metoy nu bolli gakkennaadan teqqana xayikkokka, I nuna maaddanawu qaalaa geliis. (Isi. 41:10) Keehi waayissiya wodetunkka Yihooway maaddin nuuni ubbatoo ufayttana, loꞌꞌobaa kuuyananne awu ammanettidi deꞌana danddayoos. Geeshsha Maxaafan ‘Xoossaa sarotettaa’ geetettidabaa Yihooway nuussi immanawu qaalaa geliis. (Pili. 4:6, 7) He sarotettay nuuni aara dabbotaa minttido gishsha xallawu demmiyo woppaa qonccissees. He sarotettay ‘asa eratettaa ubbaappe aadhdhees;’ qassi hegee nuuni qoppana danddayiyogaappekka aadhdhiyaba. Neeni Yihoowa mintta woossa simmada maalaalissiya hanotan woppu ga eray? Neeni woppu giidoy Yihooway neeyyo ‘Xoossaa sarotettaa’ immido gishshataassa. w24.01 20 ¶2; 21 ¶4

Yihoowa siiqiyageeti bantta kumetta wozanaappe A sunttaa sabbanawu koyoosona. Kawuwa Daawiti Yihoowa sunttaa sabbiyogee Yihoowa sabbiyogaa gidiyogaa eriis. Nuuni Yihoowa sunttaa siyiyo wode I ay mala Xoossakko qoppoos; qassi ufayssiya A eeshshatanne maalaalissiya A oosota qoppoos. Daawiti Yihoowa sunttaa geeshsha oottidi xeellanawunne sabbanawu koyiis. I ba ‘kumetta asatettaappe,’ hegeekka kumetta wozanaappe hegaadan oottanawu koyiis. Hegaadankka, Leewati Yihoowa sabbanawu minni oottidosona. Eti yootidobay Yihoowa geeshsha sunttaa bessiyagaa keena loytti sabbana danddayennaagaa banttana ziqqi oottidi ammanidosona. (Nah. 9:5) Eti banttana ziqqi oottidi wozanappe Yihoowa sabbidoogan I ufayttidoogee qoncce. w24.02 9 ¶6

Neeyyo hanennabaa halchchada polennan xayikko, Yihooway nena halchchuwaa polana danddayenna asadan qoppenna. (2 Qor. 8:12) Ne qoppidoogaadan ne halchchuwaa polennaadan diggiyaabay merettiyo wode hegaappe tamaara. Neeni kase polidobaa hassaya. Geeshsha Maxaafay ‘Xoossay neeni oottido oosuwaa doganawu worddanchcha gidennaagaa’ yootees. (Ibr. 6:10) Yaatikko neenikka ne oottidobaa dogana koshshenna. Neeni polaychchido halchchota qoppa. Hegee neeni Yihoowaara dabbotido dabbotay minnidoogaa, abaa haratussi yootidoogaa, woy xammaqettidoogaa gidana danddayees. Neeni kase ayyaanaabaa halchchota halchchada polidoogaadan, haꞌꞌikka ne halchchuwaa polana danddayaasa. Yihooway maaddin neeni ne halchchuwaa polana danddayaasa. Yihooway nena maaddiyoogaa ubbatoo akeekanawu baaxeta, hegee neeni ne halchchuwaa polanawu baaxetiyo wode ufayttanaadan maaddana. (2 Qor. 4:7) Neeni hidootaa qanxxennan aggikko, keehi daro anjjuwaa demmana.—Gal. 6:9. w23.05 31 ¶16-18

Yihooway ba asaa siiqiyogaanne etan ufayttiyogaa bessiyo ogeta koyees. Yesuusi I siiqiyonne A ufayssiya A Naꞌaa gidiyogaa Yihooway qonccissido naaꞌꞌu wodeta Geeshsha Maxaafay yootees. (Mat. 3:17; 17:5) Yihooway nenan ufayttiyogaa neeyyo yootanaadan koyay? Yihooway nuussi saluwappe yootana xayikkonne, Geeshsha Maxaafaa baggaara yootees. Yesuusi Wonggeletun yootidobaa nuuni nabbabiyo wode Yihooway nunan ufayttiyogaa yootishin “siyana” danddayoos. Yesuusi ba Aawaa eeshshaa wottiyobi baynna ogiyan bessiis. Hegaa gishshawu, nagaranchcha gidikkokka ammanettidi bana kaalliyageetun Yesuusi ufayttiyogaa yootidoogaa nuuni nabbabiyo wode, Yihooway nuussi hegaadan giyogaadan qoppana danddayoos. (Yoh. 15:9, 15) Waayee nuna gakkikko Yihooway nunan ufayttiyogaa aggiis giyogaa gidenna. Hegee nuuni Yihoowa ay keena siiqiyakko, qassi an ay keena ammanettiyakko bessanaadan oottees.—Yaaq. 1:12. w24.03 28 ¶10-11