Tana Maara Giyoogee​—Sigettanawu Keehi Maaddees

“TANA maara giyoogee keehi maaddees. Tana maara giyoogee ooshshaa xayssidi sigetissees, deretettaa giddon merettida shaahotettaa xayssees, kawotettati haariyo asaa metuwaa akeekanaadan oottees, qassi asay issoy issuwaara saro deꞌanaadan maaddees.” Washingten Disin, Jiyorjtawun Yunverestiyan erettida xaafenne doonatu wogaa xannaꞌiyaaro gidida Deboora Ta nena hegaadan gaasu.

Wozanappe tana maara giyoogee dabbotettay moorettin sigettanawu darotoo keehi maaddiyoogaa Geeshsha Maxaafay yootees. Leemisuwawu, Yesuusi yootido leemisuwan, ba miishshaa moorida naꞌay soo simmidi aaway atto gaanaadan wozanappe oychchido wode, aaway A ba soo zaaranawu keehippe koyiis. (Luqaasa 15:17-24) Ee, issi uri keehi otorettidi tana maara geennan ixxana bessenna. Wozanappe ashkke gidida asi maarotaa oychchanawu metootenna.

Maarotaa Oychchiyoogawu Deꞌiya Wolqqaa

Beni Israaꞌeelan deꞌida akeekanchcha maccaasiyaa Abigaala mooriday I azinaa gidikkonne A maarotaa oychchidoogee, hegee ay keena koshshiyaabakko bessees. Guyyeppe Israaꞌeela kawo gidida Daawiti ba asaara bazzon deꞌiyo wode, Abigaali azinaa Naabaala wudiyaa naagiis. SHin Daawitaara deꞌiya yelagati Naabaali etawu qumaanne ushshaa immanaadan oychin, Naabaali eta cayidi mela kushe zaariis. Daawiti keehi hanqqettidi, 400 attuma asata ekkidi Naabaalanne A so asaa olanawu biis. Abigaala hegaa siyada, Daawitaara gayttanawu kiyaasu. Yaatada, Daawita beꞌosaara A tohuwan wullaasu. Wullada, hagaadan gaasu: “Hai ta godau, ha mooroi ta xalaalaassa gido! Tana ne ashkkariyo haasayissarkkii; taani ne ashkkariyaa haasayiyoogaa siyarkkii.” Yaagada, hanotaa awu qonccissa simmada, Daawitawu qumaanne ushshaa immaasu. Yaatin, Daawiti hagaadan giis: “Ne soo saro gakka. Taani ne qaalaa siyaas; ne oishaakka ekkaas.”—1 Sameela 25:2-35.

Abigaali ashkketettaynne A ba azinaa iitatettawu maarotaa oychchidoogee I so asaa ashshiis. Daawiti suuttaa gussennaadan bana teqqido gishshawu O ubba galatiis. Daawitanne A asaa naaqiday Abigaalo gidana xayikkokka, ba azinay mooridobawu A oyshettiyaabadan xeellada Daawitaara sigettaasu.

Maarotaa ba dosan oychchiyoogan loꞌꞌo leemiso gidiya hara asi kiitettida PHawuloosa. Issi wode, I bana mootidobawu zaaranawu Sanhedirina giyo, Ayhudatu xoqqa pirdda keettan eqqiis. PHawuloosi yootido tuma gididabawu yiillotida qeese ubbatu halaqaa Hanaanee, A matan eqqida asati PHawuloosa doonaa baqqanaadan azaziis. Yaatin PHawuloosi awu hagaadan giidi zaariis: “Laa ha aannuwan tiyido godau, Xoossaikka nena baqqana. Neeni ta bolli higgiyan pirddanau uttada, higgee bainnan tana baqqana mala azazai?” Hegan deꞌiya asay PHawuloosi cayidoogee qeese ubbatu halaqaa gidiyoogaa ayyo yootin, I, “Ta ishatoo, i qeese ubbatu halaqa gididoogaa taani erabeikke; aissi giikko, ‘Ne deriyaa haariyaagaa bolli iita qaalaa haasayoppa’ geetettidi Xoossaa maxaafan xaafettiis” yaagiis.—Oosuwaa 23:1-5.

Daanna gididi sunttettida uri iitabaa oottana bessennaagaa PHawuloosi yootidobay likke. Gidikkokka, PHawuloosi qeese ubbatu halaqaa bonchchenna giidi asi qoppiyo ogiyan erennan haasayidoogawu maarotaa oychchiis.a PHawuloosi maarotaa oychchidoogee Sanhedirina shanggoy I kaallidi haasayanabaa loytti siyanawu gaaso gidiis. PHawuloosi pirdda keettaa daannati dendduwaa xeelliyaagan maayettennaagaa eriyo gishshawu, asay A mootido gaasoy dendduwaa ammaniyoogaa gidiyoogaa yootiis. Hegaappe denddidaagan, wolqqaama ooshshay denddin, Parisaaweti PHawuloosa bagga gididosona.—Oosuwaa 23:6-10.

Geeshsha Maxaafan deꞌiya ha naaꞌꞌu leemisotuppe ay tamaariyoo? Naaꞌꞌu hanotankka, wozanappe maarotaa oychchidoogee hegaappe simmin loytti haasayanawu maaddiis. Yaatiyo gishshawu, maarotaa oychchiyoogee sigettanaadan maaddana danddayees. Ee, nu balaa akeekidi, mooridobawu maarotaa oychchiyoogee asaara loytti haasayanawu maaddana danddayees.

‘SHin Taani Mooridobi Aybinne Baawa’

Nuuni haasayidoban woy oottidoban issi asi yiillotiyo wode, izaawu danddayennaagaa woy guuttaban lancciyaagaa giidi qoppana danddayoos. SHin Yesuus Kiristtoosi ba erissiyo ashkkarata hagaadan giidi zoriis: “Neeni yarshshiyoosan yarshshishin, ne ishaa naaqqidobai neeyyo hegan hassayettikko, ne yarshshuwaa he sohuwankka yeggabayada ba; kasetada ne ishaara sigettaichcha; hegaappe guyyiyan yaada, ne yarshshuwaa yarshsha.”—Maatiyoosa 5:23, 24.

Leemisuwawu, issi ishay neeni A naaqidobadan qoppana danddayees. Hegaa mala hanotan, neeni A naaqidabadan qoppin agginkka baada ‘kasetada ne ishaara sigettaychchanaadan’ Yesuusi yootiis. Giriiketto xiqisiyan, Yesuusi ha sohuwan goꞌettido qaalay ‘naaꞌꞌu asati walaqetti simmidi sigettana koshshiyoogaa’ bessees. (Vayns Ekispoziteri Dikshineeri of Old end Niwu Testtament Words) Naaꞌꞌu asati nagaranchcha gidiyo gishshawunne baliyo gishshawu, eti walaqettiyo wode naaꞌꞌankka mooroy deꞌana danddayees. Yaatiyo gishshawu, darotoo naaꞌꞌaykka bantta mooruwaa ammanana koshshees.

Waannabay naaqettidaynne naaqiday oonee giyoogaa gidennan, sigettanawu ooni kasetii giyoogaa. Kiitettida PHawuloosi Qoronttoosan deꞌiya Kiristtaaneti banttaagaadan Xoossawu haggaaziya bantta ishantta miishshaaranne hegaadan walaqettidobaara gayttidaagan pirdda keettan mootido wode, “Hegaappe intte naaqettiyoogeenne cimettiyoogee kehenee?” yaagidi zoriis. (1 Qoronttoosa 6:7) Kiitettida PHawuloosi ba ishanttinne michchontti issoy issuwaa pirdda keettan mootanaadan koyenna gishshawu hegaa yootikkokka, ha qoncce maaraa hagaappe akeekoos: Ishanttuura sarotettan deꞌiyoogee ooni balidaakko woy ooni tumakko eriyoogaappe aaruwan koshshiyaaba. Ha maaraa hassayiyoogee nuuni A naaqqidobadan qoppiya uri nuussi atto gaanaadan oychchana mala denttettees.

Wozanappe Gidana Bessees

SHin issi issi asay atto gaanaadan ubbatoo oychchees. Leemisuwawu, Jaappaanen, atto ga giyo birshshettay deꞌiyo, sumimasen giya qaalaa asay darotoo goꞌettees. Asi oottido kehatettawu kushe zaarana danddayenna gishshawu atto gaana mala galatanawukka he qaalaa goꞌettoosona. Asay darobawu he qaalaa zaari zaaridi goꞌettiyo gishshawu, hegaa wozanappe giyaakkonne harati sirana danddayoosona. Hara qaalatuuninne wogatunkka hegaa mala.

Ay doonankka gidin, maarotaa wozanappe oychchiyoogee bessiyaaba. Haasayiyo qaalaynne shonggay nuuni wozanappe azzanidoogaa bessiyaaba gidana koshshees. Yesuusi issi deriyaa bolli ba erissiyo ashkkarata, “Intte, ‘Ee’ woi, ‘CHii’ giite; hageetuppe hara caaqoi xalahe halaqaappe yees” yaagidi tamaarissiis. (Maatiyoosa 5:37) Maarotaa oychchikko, wozanappe oychcha! Issi leemisuwaa beꞌoos: Horophphillee uttiyo sohuwaa gelanaappe kase pattashettanawu kayaa naagishin issi bitaniyaa shanxxay issi maccaasiyo bochchido gishshawu bitanee O maarotaa oychchiis. Amarida daqiiqaappe simmin, eti sinttawu shiiqishin haꞌꞌikka shanxxay O bochchiis. Bitanee zaarettidikka atto gaanaadan bonchchuwan oychchiis. SHanxxay O zaarettidikka bochchin iira deꞌiya hara bitanee maarotaa I oychchidoy wozanappe gidikko, shanxxay haranttuwaa O bochchennaadan naagettana mala awu yootiis. Ee, wozanappe maarotaa oychchikko, he mooruwaa zaaretti oottennan agganawu murttana koshshees.

Nuuni wozanappe tana maara giikko, nuuni mooridoogaa ammanana, atto gaanaadan oychchananne qohidobi deꞌikko giigissana koshshees. Qassi naaqettida urikka ba mooruwan zelꞌꞌettida urawu atto gaana koshshees. (Maatiyoosa 18:21, 22; Marqqoosa 11:25; Efisoona 4:32; Qolasiyaasa 3:13) Nuuni ubbaykka nagaranchcha gidiyo gishshawu, yaatiyoogee darotoo metana danddayees. Gidikkokka, maarotaa oychchiyoogee sigettanawu keehi maaddees.

Maarotaa Oychchana Koshshenna Wodiyaa

Asaara saro deꞌanawu maarotaa oychchiyoogee keehi koshshiyaaba gidikkokka, hegee ubbatoo bessiyaaba gidennaagaa akeekanchcha uri erees. Leemisuwawu, allaallee Xoossawu ammanettiyoogaara gayttidaba gidana danddayees. Yesuusi saꞌan deꞌiyo wode, “bana kaushshiis; haiquwau, ubba harai atto, [mittaa] bolla haiquwaukka azazettiis.” (Piliphphisiyuusa 2:8) I ba waayiyaappe shemppanawu giidi ba ammaniyoobaa gishshawu maaranaadan oychchibeenna. Qassi qeese ubbatu halaqay, “Taani nena de7o Xoossaa sunttan callais; neeni Xoossaa Na7aa Kiristtoosa gidikko nuussi oda” giido wodekka Yesuusi maarotaa oychchibeenna. Yesuusi yeellatidi maarotaa oychchiyoogaappe xalidi, “Neeni ne huuphenkka gaadasa; shin taani intteyyo odais; hagaappe sinttan, intte tana, Asa Na7aa, wolqqaama Xoossaappe ushachcha baggaara uttidaashiininne saluwaa shaaraara yiishin be7ana” yaagidi zaariis. (Maatiyoosa 26:63, 64) Yihoowawu ammanettiyoogee qeese ubbatu halaqaara saarotettaa medhdhiyoogaappe Yesuusawu keehi aaroba.

Kiristtaaneti deriyaa haariya sunttata bonchchoosona. Gidikkokka, eti Xoossawu azazettiyo gishshawunne bantta ishantta siiqiyo gishshawu giidi sunttata maarotaa oychchana koshshenna.—Maatiyoosa 28:19, 20; Roome 13:5-7.

Sarotettaa Mooriyaabi Xayana

Nuuni Addaameppe nagaraa laattido gishshawu, ha wodiyan baloos. (Roome 5:12; 1 Yohaannisa 1:10) Addaamee Medhdhidaagaa bolli makkalido gishshawu wottiyoobi baynna asa gidiyoogee attiis. Gidikkokka, Addaameenne Hewaana koyro nagari baynna asata; haꞌꞌikka Xoossay asaa sinttappe etaagaadan nagari baynnaagaa oottanawu qaalaa geliis. I nagaraanne nagaraa gaasuwan yiidabaa ubbaa muleera xayssana.—1 Qoronttoosa 15:56, 57.

Hegee ay bessiyaabakkonne ane qoppa! Yesuusa aayee naꞌay Yaaqoobi inxxarssaa goꞌettana bessiyo ogiyaa zoriiddi hagaadan giis: “Issi urai ba haasayan mulekka balana xayikko, i bana naaganau danddayiya bali bainna asa.” (Yaaqooba 3:2) Nagari baynna asi ba inxxarssan balenna gishshawu, maarotaa oychchiyo gaasoy deꞌenna. I “bana naaganau danddayiya” asa. Nuuni nagari baynna asa gidanaagee ayba ufayssiyaabee! He wode asaa giddon metoy merettenna. Gidikkokka, he wodee gakkanaashin, nuuni mooriyo wode atto gaanaadan oychchiyoogee sigettanawu keehi maaddees.

[Tohossa qofata]

[Misiliyaa]

PHawuloosa leemisuwaappe ay tamaarana danddayiyoo?

[Misiliyaa]

Ubba asay nagari baynnaagaa gidiyo wode, sarotettaa mooriyaabi deꞌenna