‘Geeshsha Ayyaanay Xoossaabaa Geemettida Yohuwaa Qorees’

“Geeshsha Ayyaanai Xoossaabaa harai atto geemettida yohuwaara ubbaa qorees.”—1 QOR. 2:10.

1. PHauloosi geeshsha ayyaanay ay oottiyoogaa 1 Qoronttoosa 2:10n qonccissidee, woygiya oyshati denddiyoonaa?

YIHOOWA geeshsha ayyaanay oottiyoobaa keehippe nashshoos! Ayyaanay minttettiyaagaa woykko maaddiyaagaa, imota, markkattiyaagaanne nu gishshau gaannatiyaagaa gidiyoogaa Geeshsha Maxaafay yootees. (Yoh. 14:16; Oos. 2:38; Roo. 8:16, 26, 27) Kiitettida PHauloosi geeshsha ayyaanay oottiyo keehippe koshshiya hara oosuwaa: “Geeshsha Ayyaanai Xoossaabaa harai atto geemettida yohuwaara ubbaa qorees” yaagidi qonccissiis. (1 Qor. 2:10) Geemettida ayyaanaabaa tumaa qonccissanau Yihooway ba geeshsha ayyaanaa goꞌettees. He maadoy baynnaakko, Yihoowa halchuwaa xeelliyaagan nuuni ay keenaa akeekana danddayiyoo? (1 Qoronttoosa 2:9-12 nabbaba.) SHin denddiya amarida oyshati: ‘Geeshsha ayyaanay Xoossaabaa geemettida yohuwaa qoriyoy’ ayba ogiyaanee? Yihooway koyro xeetu layttaa M.Ln, o baggaara hegaa qonccissidee? Ha wodiyan ayyaanay he geemettidabata o baggaara, qassi waatidi qorii? yaagiyaageeta.

2. Ayyaanay oottiyo naaꞌꞌu ogeti awugeetee?

² Yesuusi geeshsha ayyaanay oottiyo naaꞌꞌu ogeta yootiis. I hayqqanaappe guuttaa kasetidi, ba kiittidoogeetuyyo: “Geeshsha Ayyaanai, minttettiyaagee [“maaddiyaagee,” NW], Aawai ta sunttan kiittanaagee, inttena ubbabaa tamaarissana. Taani intteyyo odido ubbabaakka inttena hassayissana” yaagiis. (Yoh. 14:26) Yaatiyo gishshau, geeshsha ayyaanay tamaarissiyaagaanne hassayissiyaagaa gididi oottana. Tamaarissiyaagaa gidiyoogan, Kiristtaaneti kase akeekibeennabata akeekanaadan maaddana. Qassi hassayissiyaagaa gidiyoogan, eti tamaaridobaa hassayidi, suure oosuwan peeshshanaadan maaddana.

Koyro Xeetu Layttan

3. ‘Xoossaabaa geemettida yohoy’ loddan loddan qonccanaagaa bessiya, Yesuusi yootidobay aybee?

³ Yesuusi ba erissiyo ashkkarati kase erenna daro tumaa tamaarissiis. Gidikkokka, eti tamaarana koshshiya darobay deꞌees. Yesuusi kiitettidaageetussi: “Taani intteyyo odiyoobai darobai de7⁠ees; shin ha77⁠i intteyyo gelenna. Tumatettaa Ayyaanai yiyo wode, inttena tumatetta ubbaakko efaana” yaagiis. (Yoh. 16:12, 13) Yaatiyo gishshau, ayyaanaaban geemettidabati loddan loddan geeshsha ayyaanaa baggaara qonccanaagaa Yesuusi yootiis.

4. PHenxxaqosxxe gallassi 33 M.Ln, geeshsha ayyaanay tamaarissiyaagaanne hassayissiyaagaa gididoy ayba ogiyaanee?

⁴ PHenxxaqosxxe gallassi 33 M.Ln, “tumatettaa ayyaanai” yiidi, Yerusalaamen shiiqi uttida 120 gidiya Kiristtaanetu bolli wodhiis. Hegaara gayttidaagan beꞌidonne siyido naqaashay deꞌees. (Oos. 1:4, 5, 15; 2:1-4) Erissiyo ashkkarati “Xoossai oottido gita oosuwaa” dumma dumma qaalan yootidosona. (Oos. 2:5-11) He wodee oorattabay qonccana haniyo wode. Hananabaa yootiya Yuuꞌeeli geeshsha ayyaanay gukkanaagaa kasetidi yootiis. (Yuu. 2:28-32) He sohuwan deꞌiyaageeti etappe ooninne qoppibeennabay polettiyoogaa beꞌidosona; qassi kiitettida PHeexiroosi sintta xeera gididi hanettidabaa qonccissiis. (Oosuwaa 2:14-18 nabbaba.) Geeshsha ayyaanay yaatiyoogan, erissiyo ashkkarati beꞌidobay beni hiraagan odettidabaa polo gidiyoogaa PHeexiroosi akeekanaadan oottidi, tamaarissiyaagaa gidiis. PHeexiroosi Yuuꞌeela maxaafaappe xalla gidennan, Daawita mazamuretu naaꞌꞌaappe yootido gishshau, geeshsha ayyaanay hassayissiyaagaakka gidiis. (Maz. 16:8-11; 110:1; Oos. 2:25-28, 34, 35) He sohuwan shiiqida ubbay beꞌidonne siyidobay tumuppekka Xoossaabaa geemettida yoho.

5, 6. (a) PHenxxaqosxxe galla 33 M.Lppe simmin, ooratta maachaara gayttidaagan zaaroy koshshido oyshati awugeetee? (b) He oyshata denttidaageeti oonee, hegee kuuyettidoy ayba ogiyaanee?

⁵ SHin koyro xeetu laytta Kiristtaanetuyyo he wodekka qonccana bessiya darobay deꞌees. Leemisuwau, PHenxxaqosxxe gallassi oosuwan peꞌida ooratta maachaa xeelliyaagan zaaro koshshiya issi issi oyshay deꞌees. Ooratta maachay Ayhudatunne Ayhuda haymaanootiyau laamettidaageetu xallaassee? Ayhuda gidennaageetikka he maachan gujettidi, geeshsha ayyaanan tiyettanee? (Oos. 10:45) Ayhuda gidenna attumaasay qaxxarettanaunne Muuse Higgiyaa naaganau koshshii? (Oos. 15:1, 5) Hageeti keehippe koshshiya oyshata. Ha geemettida yohota qoranau Yihoowa ayyaanaa koshshiis. Gidoshin, he ayyaanay o baggaara hegaa oottanee?

⁶ Zaaro koshshiya ha oyshata ubbaa denttidaageeti aawatetta maatay deꞌiyo ishata. PHeexiroosi, PHauloosinne Barnnaabaasi bollaara heemmiyaagaa shiiquwan, qaxxarettibeenna, Ayhuda gidenna asaara gayttidaagan Yihooway oottidobaa yootidosona. (Oos. 15:7-12) He hanotaa Ibraysxxe Geeshsha Maxaafay yootiyoobaara yiggiyoogaaninne geeshsha ayyaanaa maaduwan, bollaara heemmiyaagee issibaa kuuyiis. Yaatidi, gubaaꞌetussi dabddaabbiyan he kuushshaabaa erissiis.—Oosuwaa 15:25-30; 16:4, 5 nabbaba; Efi. 3:5, 6.

7. Geemettida tumay qonccidoy ayba ogiyaanee?

⁷ Yohaannisi, PHeexiroosi, Yaaqoobinne PHauloosi ayyaanay denttettin xaafidoban hara daro allaalleta qonccissidosona. SHin Kiristtaaneti xaafido Geeshsha Maxaafaa xuufeti xaafetti simmin, hananabaa yootiyoonne maalaalissiya ogiyan qoncciya eratettaa imotay attiis. (1 Qor. 13:8) Ayyaanay tamaarissiyaagaanne hassayissiyaagaa gididi ubbatoo oottanee? Kiristtaaneti Xoossaabaa geemettidabaa qoranaadan i ubbatoo maaddanee? I hegaadan oottanaagaa hiraagay qonccissees.

Wurssetta Wodiyan

8, 9. Wurssetta wodiyan, aadhida eratettan ayyaanaaban ‘pooꞌanay’ oonee?

⁸ Issi kiitanchay wurssetta wodiyaabaa: “Aadhdhida eranchchati, saluwaa poo7⁠uwaadan, qassi darota xillotettaa ogiyaa kaalettidaageeti meri merinau xoolinttiyaadan poo7ana. . . . Eraikka darana” yaagidi kasetidi yootiis. (Dane. 12:3, 4) Aadhida eratettay deꞌiyoogeetinne pooꞌanaageeti oonee? Yesuusi gisttiyaanne zardduwaa leemisuwan hegau xeeraa bessiis. I ‘wodiyaa wurssettaabaa’ yootido wode: “He wode xilloti bantta aawaa kawotettan awa aifiyaadan poo7ana” yaagiis. (Maa. 13:39, 43) Yesuusi “xilloti” ‘kawotettaa naata,’ ayyaanan tiyettida Kiristtaaneta gidiyoogaa qonccissiis.—Maa. 13:38.

⁹ Ayyaanan tiyettida Kiristtaaneti ubbay ‘pooꞌanee’? Ubba Kiristtaaneti sabbakiyoogan, erissiyo ashkkara oottiyoogaaninne shiiquwan issoy issuwaa minttettiyoogan shaahettiyo gishshau, pooꞌoosona gaana danddayettees. Tiyettida Kiristtaaneti hegaadan oottiyoogan leemiso gidoosona. (Zak. 8:23) SHin, hegaa bollankka, geemettida yohoti wurssetta wodiyan qonccana koshshees. He wodee gakkanaashin, Daaneeli xaafido hiraagaa bolli ‘maatafay wodhiis.’ (Dane. 12:9) Ayyaanay ha geemettida yohota waatidi, qassi o baggaara qonccissanee?

10. (a) Geemettida tumaa ayyaanay o baggaara wurssetta gallassatun qonccissii? (b) Yihoowa gita beeta maqidasiyaara gayttida tumay waanidi qonccidaakko yoota.

¹⁰ Nu wodiyan ayyaanaabaa qonccissiyo wodee gakkin, alame yuushuwaa waanna biiruwan deꞌiya, ‘ammanettida wozannaama ashkkaraa’ kalꞌꞌatiya, aawatetta maatay deꞌiyoogeeti kase akeekibeenna geemettida tumaa akeekanaadan geeshsha ayyaanay maaddees. (Maa. 24:45; 1 Qor. 2:13) Giigisso koshshiyaabay deꞌiyo wode, Bollaara Heemmiyaagaa yameti issippe pilggidi issibaa kuuyoosona. (Oos. 15:6) Eti kuuyidobaa, koshshiyaaba gidikko harati ubbay goꞌettana mala xuufiyan kiyanaadan oottoosona. (Maa. 10:27) Takkidi, hara qonccissoy koshshana danddayees; hegaakka aynne qottennan qonccissoosona.—“Ayyaana Beeta Maqidasiyaa Birshshettaa Geeshsha Ayyaanay Qonccissido Ogiyaa” giya saaxiniyaa xeella.

Ha Wodiyan Ayyaanay Oottiyoobaappe Goꞌettiyoogaa

11. Ha wodiyan deꞌiya Kiristtaaneti ubbay geeshsha ayyaanay Xoossaabaa geemettida yohuwaa qonccissiyoogan waanidi goꞌettiyoonaa?

¹¹ Geeshsha ayyaanay Xoossaabaa geemettida yohuwaa qonccissiyoogan, ammanettida ubba Kiristtaaneti goꞌettoosona. Koyro xeetu layttan deꞌida Kiristtaanetuugaadan, nuuni ha wodiyan xannaꞌoosinne geeshsha ayyaanay nuuni akeekanaadan maaddido qofaa hassayidi oosuwan peeshshoos. (Luq. 12:11, 12) Nu xuufiyan kiyida, geemettida ayyaanaabaa tumaa akeekanau nuuni xoqqa timirttiyaa tamaarana koshshenna. (Oos. 4:13) Xoossaabaa geemettida yohuwaa nuuni kaseegaappe aaruwan waatidi akeekana danddayiyoo? Kaallidi deꞌiya amarida qofaa beꞌite.

12. Nuuni geeshsha ayyaanaa demmanau woossana koshshiyoy awudee?

¹² Geeshsha ayyaanaa demmanau woossite. Geeshsha Maxaafaanne an baasettidabaa xannaꞌanaappe kase, geeshsha ayyaanay nuna kaalettanaadan woossana koshshees. Nurkka xannaꞌiyaaba gidin, woy guutta saatiyau xannaꞌiyaaba gidin, nuuni hegaadan oottana koshshees. Nu huuphiyaa kawushshiyoogaa bessiya hegaa mala woosay, saluwan deꞌiya nu Aawaa ufayssiyoogee qoncce. Yesuusi yootidoogaadan, nuuni wozanappe woossiyo wode, Yihooway ba geeshsha ayyaanaa immees.—Luq. 11:13.

13, 14. SHiiquwau giigettiyoogee Xoossaabaa geemettida yohuwaa akeekanau waati maaddii?

¹³ SHiiquwau giigettite. Nuuni ammanettida wozannaama ashkkaraa baggaara “qumaa koshshiyo wodiyan” demmoos. ‘Ashkkaray’ Geeshsha Maxaafan baasettida qofaa qonccissiyoogan, gubaaꞌe shiiqotun xannaꞌiyoobaa giigissiyoogaaninne hegaa xannaꞌiyo prograamiyaa kessiyoogan ba oosuwaa polees. Alame yuushuwan deꞌiya ‘ishanttu’ maabaray issi issibaa xannaꞌanaadan ‘ashkkaray’ yootiyoy, hegaa xeelliyaagan loytti pilggido gishshataassa. (1 PHe. 2:17; Qol. 4:16; Yih. 3) I yootidobaa kaallanau nuuyyo danddayettidabaa ubbaa oottiyo wode, geeshsha ayyaanay yootiyoobaa siyoos.—Ajj. 2:29.

¹⁴ Kiristtaane shiiquwau giigettiyo wode, xiqiseta kessidi nabbabiyoogeenne he xiqiseti qoncciiddi deꞌiya qofaara waanidi gayttiyaakko akeekanau maliyoogee keehippe koshshees. Hegaadan oottiyoogee, nuuni wodiyaappe wodiyan Geeshsha Maxaafaa loytti akeekanau maaddees. (Oos. 17:11, 12) Xiqiseta kessidi nabbabiyoogee eti nu qofaappe xayennaadan oottees; geeshsha ayyaanay qassi nuuni hegaa hassayanaadan maaddees. Hegaa bollikka, nuuni Geeshsha Maxaafaappe xiqisiyaa kessidi nabbabiyoogee, he xiqisiyaa koyiyo wode sohuwaara demmanau maaddana danddayees.

15. Ooratta xuufeta nuuni sohuwaara nabbabana koshshiyoy aybissee, hegaadan waatidi oottana danddayiyoo?

¹⁵ Ooratta xuufiyaa sohuwaara nabbabite. Issi issi xuufeti shiiquwan xannaꞌettennaba gidikkonne, nu goꞌꞌau giigidosona. Asau immiyo maxeetetikka, nuna goꞌꞌanaadan qoppidi giigissidoogeeta. Asay bichaariyo ha alamiyan, nuuni issi uraa woy issibaa darotoo naagoos. Nuuni nabbabibeenna woykko nabbabidi wurssibeenna xuufiyaa oyqqiyaaba gidikko, he saatiyan amaridaagaa nabbabana danddayoos. Issoti issoti hemettiiddi woykko kaamiyan biiddi, duuqettida ooratta xuufiyaa ezggoosona. Loytti pilggidoba gidikkonne, daro asay ufayttidi nabbabanaadan giigida ha xuufeti ubbay ayyaanaabaa nuuni loytti akeekanaunne nashshanau maaddoosona.—Imb. 2:2.

16. Nu qofan merettiya oyshata xaafidi pilggiyoogan ayba goꞌꞌa demmiyoo?

¹⁶ Yererite. Geeshsha Maxaafaa woykko an baasettida xuufiyaa nabbabiyo wode, wodiyaa immidi qoppite. Intte nabbabiyo qofay issoy issuwaara waanidi gayttiyaakko akeekan qoppiyo wode, oyshi merettana danddayees. He oyshata xaafidi haroode pilggana danddayeeta. Nuuni darotoo nuna qofissida allaalliyaa pilggiyo wode, loytti xannaꞌoos. Nuuni hegaadan oottidi akeekidobay, koshshiyo wode goꞌettiyo aqo gidees.—Maa. 13:52.

17. So asaa xinaatiyau woy buzo xinaatiyau ayba prograame kessidetii?

¹⁷ So asaa goynuwau wodiyaa keerite. Nuuni ubbay saaminttan issi omarssaa woy hara wodiyaa, buzo xinaatiyau woy so asaa xinaatiyau keeranaadan Bollaara Heemmiyaagee minttettiis. Gubaaꞌiyaa shiiquwaa prograamee laamettidoogee nuuni he zoriyaa oosuwan peeshshanau maaddees. So Asaa Goynuwaa omarssan ay xannaꞌeetii? Issoti issoti Geeshsha Maxaafaa nabbabidi, oyshay merettanaadan oottiya xiqiseta pilggoosonanne bantta Geeshsha Maxaafan qofaa qanttan xaafoosona. Daro keettaa asay xannaꞌiiddi deꞌiyo allaalliyaa bantta son waatidi oosuwan peeshshanaakko qoppoosona. So asau huuphe gidida issoti issoti so asau koshshees giidi qoppiyo allaalliyaara woykko so asay xannaꞌanau oychidobaara gayttida xuufiyaa dooroosona. Wodiyaappe wodiyan, hara allaalliyaa xannaꞌanau intte koyanaagee qoncce.a

18. Xoossaa Qaalan deꞌiya geemettida tumaa xannaꞌanau nuuni guyye gaana koshshennay aybissee?

¹⁸ Geeshsha ayyaanay maaddiyaagaa gidiyoogaa Yesuusi yootiis. Yaatiyo gishshau, nuuni Xoossaa Qaalaa geemettida tumaa xannaꞌanau guyye gaana koshshenna. He tumay alꞌꞌo gidida ‘Xoossaa eraa’ kifile; nuuni hegaa pilgganaadan shoobettida. (Leemiso 2:1-5 nabbaba.) Hegee “Xoossai bana siiqiyaageetussi giigissidoogaa” xeelliyaagan darobaa qonccissees. “Geeshsha Ayyaanai Xoossaabaa harai atto geemettida yohuwaara ubbaa” qoriyo gishshau, nuuni Yihoowa Qaalaa loytti eranau baaxetiyo wode, he ayyaanay nuna maaddees.—1 Qor. 2:9, 10.

[Tohossa qofata]

Woygada Zaaruutii?

• ‘Xoossaabaa geemettida yohuwaa’ nuuni qoranaadan ayyaanay maaddiyo naaꞌꞌu ogeti awugeetee?

• Koyro xeetu layttan geemettida tumaa geeshsha ayyaanay o baggaara qonccissidee?

• Ha wodiyan issi issi allaalleta geeshsha ayyaanay waatidi qonccissii?

• Ayyaanay oottiyoobaappe goꞌettanau neeni ay oottana danddayay?

[Sinttaa 26n deꞌiya saaxiniyaa]

Ayyaana Beeta Maqidasiyaa Birshshettaa Geeshsha Ayyaanay Qonccissido Ogiyaa

‘Xoossaabaa geemettida yohotun’ koyro xeetu layttan qonccidabaappe issoy gayttiyo dunkkaanee, guyyeppe beeta maqidasee gita gidida ayyaanaabau eesho gidiyoogaa. PHauloosi ‘he tumu dunkkaanee asi essidoogaa gidennan, Xoossay essidoogaa’ gidiyoogaa yootiis. (Ibr. 8:2) Hegee Yesuus Kiristtoosa yarshshuwaaninne i qeese ubbatu halaqaa gidiyoogan nuna baakko shiishshanau Xoossay essido gita ayyaana beeta maqidase.

Yesuusi 29 M.Ln xammaqettin, Yihooway i polo yarshsho gidana mala maayido wode, he ‘tumu dunkkaanee’ eqqiis. (Ibr. 10:5-10) Yesuusi hayquwaappe denddi simmidi ayyaana beeta maqidasiyan, Ubbaappe Aadhiya Geeshsha Sohuwaa gelidi, ba yarshshuwaa waagaa “Xoossaa sinttan” shiishshiis.—Ibr. 9:11, 12, 24.

Kiitettida PHauloosi ayyaanan tiyettida Kiristtaaneti “geeshsha beeta maqidase gidana mala” dicciyoogaa harasan xaafiis. (Efi. 2:20-22) Ha beeta maqidasee PHauloosi guyyeppe Ibraawetussi xaafido dabddaabbiyan qonccida ‘tumu dunkkaaniyaara’ issi malee? Daro wodiyau Yihoowa ashkkarati hegaadaana giidi qoppidosona. Tiyettida Kiristtaaneti saluwan deꞌiya Yihoowa beeta maqidasiyaa ‘shucha’ gidanau saꞌan giigettiiddi takkidabadan issi wode qofettiis.—1 PHe. 2:5.

SHin 1971 heeran, aawatettay deꞌiyo, ammanettida wozannaama ashkkaraa yameti PHauloosi Efisoona maxaafan yootido beeta maqidasee, Yihoowa gita beeta maqidasiyaa gidennaagaa akeekiyoogaa doommidosona. ‘Tumu dunkkaanee,’ hayquwaappe denddida, ayyaanan tiyettida Kiristtaaneta malaatiyaaba gidikko, he dunkkaanee eqqiyoy “Godai yiyo gallassi” eti hayquwaappe denddi simmiina. (1 Tas. 4:15-17) SHin beeta maqidasiyaa xeelliyaagan, PHauloosi: “He Dunkkaanee ha wodiyau leemiso” yaagidi xaafiis.—Ibr. 9:9.

Hageetanne hara xiqiseta akeekan geeddarssiyoogan, ayyaana beeta maqidasee keexettiiddi deꞌennaageenne ayyaanan tiyettida Kiristtaaneti he beeta maqidasiyaa shaaho gidanau giigiiddi deꞌiya ‘shucha’ gidennaagee qoncciis. Hegaappe dumma ogiyan, ayyaanan tiyettida Kiristtaaneti ayyaana beeta maqidasiyaa dabaabaaninne Geeshsha Sohuwan galla galla Xoossau “galataa yarshshuwaa” shiishshoosona.—Ibr. 13:15.

[Sinttaa 27n deꞌiya misiliyaa]

‘Xoossaabaa geemettida yohuwaa’ nuuni kaseegaappe aaruwan waatidi akeekana danddayiyoo?