Aawati Bantta Attuma Naatuura Dabbotaa Waati Minttana Danddayiyoonaa?

“ABBAA, neeni hagaa ubbaa waata eradii?” Ne naꞌay hagaadan nena oychchi erii? I yaagiyo wode, neeni awu aawa gidiyo gishshawu ufayttennan aggakka. SHin ne naꞌay hegaappekka aadhdhidi, ne zoridoogaadan oottidi goꞌettiyo wode, neeni keehi ufayttiyoogee attenna.a—Leemiso 23:15, 24.

SHin daro layttay aadhdhi simminkka, ne naꞌay kaseegaadan nena nashshii? Woy kaseegaadan nashshiyoogaa aggidaba milatii? Naatettaappe doommidi gasttana gakkanaashin neeni ne naꞌaara dabbotaa waata minttana danddayay? Ane koyro hegaara gayttidaagan aawata metiya allaalleta beꞌoos.

Meeze Gidida Heezzu Metota

1. WODIYAA XAYIYOOGAA: Daro biittan, so asawu koshshiyaabaa kunttanawu oottiyaageeti darotoo aawata. Hegaappe denddidaagan, gallassaa giddon eti daro wodiyaa son deꞌokkona. Issi issi heeran qassi aawati bantta naatuura guutta wode xallaa aattoosona. Leemisuwawu, Paranssayen mata wode xannaꞌidobay bessiyoogaadan, he biittan aawati issi gallassan 12ppe guuxxiya daqiiqaa bantta naatuura aattoosona.

QOPPANA BESSIYAABAA: Ne naꞌaara ay keena wodiyaa issippe aattay? Kaalliya issi woy naaꞌꞌu saaminttan, gallassaa giddon ne naꞌaara issippe aattiyo wodee ay keenakko xaafana danddayaasa. Hegee ay keenakko erada neeni garamettennan aggakka.

2. LOꞌꞌO LEEMISO GIDIYA URI BAYNNAAGAA: Issi issi attuma asay naatettan bantta aawatuura wodiyaa issippe aattibookkona. Paranssayen deꞌiya ZHan Mare, “Ta aawaara daro wodiyaa atti erokko” yaagiis. Hegee ZHan Mara waati qohidee? I, “Hegee mule qoppabeenna ogiyan tana qohiis. Leemisuwawu, ta attuma naatuura ulobaa haasayanawu metootays” yaagiis. Hara baggaara qassi, issi issi attumaageeti bantta aawata loytti erikkonne, eta dabbotay loꞌꞌo gidenna. Layttay 43 gidido Filipi hagaadan giis: “Ta aaway tana siiqiyoogaa yooti erenna. Hegaappe denddidaagan, taanikka ta attuma naꞌaa siiqiyoogaa yootanawu keehi baaxetaas.”

QOPPANA BESSIYAABAA: Neeni ne naꞌaa oyqqiyo hanotan ne aaway nena oyqqido ogiyaa kaallay? Neeni ne aawaa loꞌꞌo woy iita leemisuwaa kaalliyoogaa akeekadii? Gidikko, ayba ogiyan?

3. LOꞌꞌO ZORIIYAA DEMMENNAAGAA: Issi issi biittan asay, naata dichchiyoogan aawatu maadoy keehi koshshenna giidi qoppees. Arggo Awurooppan diccida Luki, “Taani diccido heeran, naata dichchiyoogee machchee oosodan xeelettees” yaagiis. Hara wogatun qassi, aawati naata mintti seeriyoogaappe attin haraba oottokkona. Leemisuwawu, ZHorzhi Afirkka biittan dicciis. I hagaadan giis: “Nu wogan aawati naatuura kaaꞌikko, naati eta bonchchokkona giidi asay qoppees; hegaa gishshawu naatuura kaaꞌokkona. Hegaappe denddidaagan, ta naꞌaara kaaꞌanawu darotoo metootays.”

QOPPANA BESSIYAABAA: Intte heeran aawati ay oottanaadan koyettii? Naata dichchiyoogee macca asa oosodan odettii? Aawati bantta attuma naata siiqiyoogaa etawu ubbatoo yootiyoonaayye, hegee aawati oottana koshshennaba giidi asay qoppii?

Neeni aawa gidikko, qassi hageetuppe issi metoy nena gakkikko, ay oottana danddayay? Hagaappe kaallidi deꞌiya qofaa akeeka.

Ne Naꞌay Naatettan Deꞌishin Doomma

Attuma naati yelettoosappe doommidi bantta aawaa milatanawu koyiyaaba milatees. Yaatiyo gishshawu, I nena loytti eranaadan aara wodiyaa aatta. Hegawu ay oottanawu danddayay? Qassi aara issippe aattiyo wodiyaa awude demmana danddayay?

Danddayettiyo wode ubban, ubba galla oottiyoobaa ne naꞌaara issippe ootta. Leemisuwawu, neeni so giddon oottiyo wode ne naꞌaykka maaddanaadan ootta. Keettaa pittiyo wode awukka guutta puxa woy emeren bulꞌꞌiyo wode awukka guutta shalkkiyaa imma. I nashshiyoonne baassi leemiso oottidi xeelliyo ba aawaara oottiyoogan ufayttanaagee erettidaagaa! Hegee neeni oosuwaa eesuwan wurssennaadan oottikkokka, intte giddon deꞌiya dabbotaa minttees; qassi oosuwaa oottiyoogaa I meezetanaadan maaddees. Daro wodiyaappe kase, Geeshsha Maxaafay aawati naatuura issi issibaa oottanaadan, qassi he wodiyan etaara haasayanaadaaninne eta tamaarissanaadan minttettiis. (Zaarettido Wogaa 6:6-9) He zoree haꞌꞌikka keehi maaddees.

Ne naꞌaara issippe oottiyoogaa xalla gidennan, aara kaaꞌanawukka wodiyaa bazza. Aawati bantta naatuura kaaꞌiyoogee naati banttaban ufayttanaadaaninne oorattabaa oottanawu koyanaadan maaddees.

Aaway naꞌaara kaaꞌiyoogee keehi koshshiyo hara gaasoykka deꞌees. Mishel Fiza giyo pilggiyaagee, “Issi naꞌay ba aawaara ulobaa haasayiyoy eti loytti kaaꞌiyo wodiyaanaa” yaagiis. Eti kaaꞌiyo wode, aaway ba naꞌaa siiqiyoogaa yootiyoobaaninne oottiyooban qonccissees. Yaatiyoogan, siiqiyoogaa waati bessanaakkokka ba naꞌaa tamaarissees. Jarmmane biittan deꞌiya Anddire giyo aaway, “Ta naꞌay guuttatettan deꞌiyo wode nuuni darotoo issippe kaaꞌoos. Taani A qoommiyo wode, ikka tana siiqiyoogaa waati bessanaakko meezetiis” yaagiis.

Naati xiskkana haniyo saateekka, aaway ba naꞌaara siiquwaa minttiyo wode. Ubbatoo awu issi taarikiyaa nabbaba; qassi he galla bana ufayssidabaanne qofissidabaa I yootiyo wode ezgga. Neeni yaatiyaaba gidikko, dicciyo wode I ubbatoo nenaara haasayanawu metootenna.

Inttena Naaꞌꞌaakka Ufayssiyaabaa Oottiyoogaa Aggoppite

Issi issi attuma galddoti aaway etaara haasayanawu koyiyo wode, eti haasayanawu koyennaba milatana danddayoosona. Ne naꞌay ne oyshaa zaaranawu koyennaba milatikko, I nenaara aybanne haasayanawu koyennabadan qoppoppa. Neeni I koyiyo ogiyan haasayissanawu malikko, ba wozanaabaa yootana danddayees.

Paranssayen deꞌiya ZHaki, ba naꞌaa ZHeromaara haasayanawu issi issitoo metootiis. SHin I ba naꞌay haasayanaadan giddiyoogaappe, kuwaasiyaa aara kaaꞌiyoogan, I koyiyoobaa issippe oottiis. ZHaki hagaadan giis: “Kuwaasiyaa kaaꞌi simmidi, maatan uttidi guutta wodiyaa shemppoos. He wode darotoo, ta naꞌay bawu siyettiyaabaa yootees. He wode nuuni nurkka deꞌiyo gishshawu, dumma lagge gidida.”

Ne naꞌay ispporttiyaa dosennaba gidikko shin? Anddiree ba naꞌaara xoolinttiyaa xeelliyo wodiyaa hassayees. Hagaadan giis: “Nuuni omarssan karee meeggikkokka oydiyaa kessi uttoos. Yaatidi, hoꞌꞌiya maayuwaa maayidi, shayiyaa uyiiddi, qamman saluwaa xeelloos. Xeelliiddi, xoolintteta Medhdhidaagaabaa haasayoos. Nuna qofissiyaabaanne ufayssiyaabaakka haasayoos. Nuuni haasayennabi baawa gaana danddayays.”—Isiyaasa 40:25, 26.

Ne naꞌay dosiyoobaappe issi issibaa neeni oottana koyennaba gidikko shin? Yaanikko, ne koyennabaa oottiyoogee koshshana danddayees. (Piliphphisiyuusa 2:4) Tohossa Afirkkan deꞌiya Iyani hagaadan giis: “Taani ta naꞌay Vooni dosiyoogaappe aaruwan ispporttiyaa dosays. I qassi horophphilliyaanne kompputeriyaa dosees. Yaatiyo gishshawu, horophphilleti paallishin beꞌanaadan A efiyoogaaninne kompputeriyan horophphilliyaa laaggiyo kaassaa aara kaaꞌiyoogan hegaa taanikka dosanawu malaas. Vooni bawu siyettiyaabaa tanaara haasayanawu koyidoy nuuni ufayssiyaabaa issippe oottiyo gishshataassa gidennan aggenna.”

Ne Naꞌay Baban Ufayttanaadan Maadda

Ne naꞌay guuttatettan deꞌiiddi issi oorattabaa oottiyo wode, “Beꞌa, Abbaa, beꞌa!” gi erii? I haꞌꞌi galddo gidikko, hegaadan oottennan aggana danddayikkokka, I gasttiyo wode neeni aban ufayttiyoogaa erana bessees.

Xoossaa Yihooway ba naatuppe issuwawu oottidobaa akeeka. Yesuusi ba deꞌuwan ootti erenna oorattabaa saꞌan oottanawu giigettido wode, Xoossay, “Taani siiqiyo ta Na7ai, tana ufaissiyaagee hagaa” yaagidi A siiqiyoogaa qonccissiis. (Maatiyoosa 3:17; 5:48) Neeni ne naꞌaa seerananne tamaarissana koshshiyoogee tuma. (Efisoona 6:4) SHin I haasayidonne oottido loꞌꞌobawu A galatana danddayiyo ogeta neeni koyana bessees.

Issi issi attuma asay nashshiyoogaanne siiqiyoogaa yootanawu metootees. Geella eti diccidoy loꞌꞌo oosuwaappe aaruwan balaa qoriya keettaana gidana danddayees. Ne hanotaykka hegaa mala gidikko, ne naꞌay baban ufayttanaadan maaddanawu neeni baaxetana koshshees. Hegaadan waata oottana danddayay? Qommoora abay odettido Luki, darotoo so giddo oosuwaa layttay 15 gidido ba naꞌaa, Manuꞌelaara issippe oottees. Luki hagaadan giis: “Issi issitoo Manuꞌeli issibaa barkka oottanaadaaninne maadoy koshshiyo wode tawu yootanaadan odays. Darotoo I barkka oottidi polees. Hegaadan barkka oottiyo wode, I baban ufayttees. I oottidi poliyo wode taani A galatays. Qassi I qoppidoogaadan awu hanenna wodekka, A daafurawu A nashshays.”

Ne naꞌay gitabaa halchchidi hegaa polanaadan maaddiyoogankka baban ufayttanaadan A maaddana danddayaasa. Ne naꞌay ba halchchidobaa neeni qoppido wodiyan polana xayikko shin? Woy I halchchidobay iita gidana xayikkokka, neeni awu qoppidoogaappe dummatikko shin? Hegaadan gidikko, neeni appe naagiyoobaa zaarettada qoppana koshshennan aggenna. Qommoora abay odettido ZHaki hagaadan giis: “Ta naꞌay polana danddayiyoobaa halchchanaadan maaddanawu malays. SHin hegee I oottanaadan taani koyiyooba xalla gidennan, ikka oottanawu koyiyooba gidiyoogaa akeekanawu malays. Yaatada, I ba halchchidobaa ba danddayido wodiyan polana koshshiyoogaa hassayays.” Neeni ne naꞌaa qofaa siyiyaabaa, I oottidobawu nashshiyaaba, qassi ba balaa giigissanaadan minttettiyaaba gidikko, I ba halchchidobaa polanaadan maaddana danddayaasa.

Issi issitoo intte maayettennan aggana danddayiyoogee tuma. SHin wodeppe, ne naꞌay nenaara siiquwan deꞌanawu koyiyoogee attenna. Woni bana keehi maaddida uraara siiquwan deꞌanawu koyennay oonee?

[Tohossa qofata]