Haꞌꞌikka Sinttappekka Zilꞌꞌettennan Haggaaziyoogaa

1-3. (a) Zilꞌꞌettiyoogaa giyoogee woygiyoogee, hegee nuna ayba ogiyan qohana danddayii? (b) Nuuni PHauloosa leemisuwaappe ay tamaarana danddayiyoo?

DANTTUWAA xaafiya Joon Griinlif Witeri, hanno gakkanau asay haasayido woy xaafido qaala ubbabaappe keehi azzanttiyaagee, “‘Yaanana danddayees shin!’ yaagiyaagaa” giis. Asay kase oottido issibaa hegaappe dumma ogiyan oottidaba gidiyaakko ba deꞌoy hananabaa qoppiyo wode hegaadan gees. “Zilꞌꞌettiyoogaa” giyoogee oottidoban woy oottennan aggidoban azzaniyoogaa woy mishettiyoogaa; hegee “zaarettidi yeekkiyoogaa” geetettanakka danddayees. Nuuni ubbay “yaatarkkinaashsha” giyoobaa oottida. Neeni zilꞌꞌettiyoobi deꞌii?

² Issi issi asati bantta deꞌuwan gita mooruwaa, ubba wolqqaama nagaraa oottidosona. Harati qassi iitabaa oottibeennaba gidikkonne, eti bantta deꞌuwan doorido issi issibay tumuppe loꞌꞌo doorooshsha giidi qoppoosona. Issoti issoti kase mooridobaa qoppiyoogaa aggidosona. Harati qassi ubbatoo, “yaanidaba gideerenneeshsha” yaagoosona. (Maz. 51:3) Neeni hegeetuppe awugeetudan qoppay? Mooridoban ubbatoo seelettennan Xoossaa oosuwan neeni danddayiyo ubbabaa oottanau koyay? Hegaadan oottanau nuuni a leemisuwaappe tamaarana danddayiyo uri deꞌii? Ee, deꞌees; ikka kiitettida PHauloosa.

³ PHauloosi ba deꞌuwan gita balaakka baliis; qassi loꞌꞌo doorokka dooriis. I kase oottidoban zilꞌꞌettidi keehi seelettiis; gidikkokka, Xoossaa oosuwan bau danddayettida ubbabaa minnidi oottiis. Nuuni a leemisuwaappe ay tamaarana danddayiyaakko ane beꞌoos.

PHAULOOSI ZILꞌꞌETTIDO I KASE OOTTIDOBAA

4. Kiitettida PHauloosi kase oottido a zilꞌꞌissidabay aybee?

⁴ PHauloosi yelagatettan Parisaawe gididi deꞌiiddi, i guyyeppe zilꞌꞌettidobaa oottiis. Leemisuwau, i Kiristtoosi erissiyo ashkkarata qareti baynnan yedettiis. Yedettiyaageeti Isxxifaanoosa wori simmin sohuwaara, “Saa7ooli [guyyeppe PHauloosa geetettidaagee] woosa keettaa xaissees; ubbaa keettaa geli gelidi, attumaasaanne maccaasaa goochchi goochchidi, qasho keettaa yeddees” yaagidi Geeshsha Maxaafay yootees. (Oos. 8:3) Albert Barnis giyo Geeshsha Maxaafaa eranchay “xaissees” geetettida Giriike qaalay, Saaꞌooli “mishettidi hanqquwan yedettidoogaa bessiya qaala” yaagiis. Yaatiyo gishshau, Barnisi, “Saaꞌooli woosa keettaa doꞌaadan hanqqettidi yedettiis” yaagiis. Saaꞌooli Ayhuda ammanuwau mishettiya asa gidiyoogaadan, Kiristtaane haymaanootiyaa xayssiyoogaa Xoossay bau immido ooso giidi qoppiis. Yaatiyo gishshau, i Kiristtaaneta qareti baynnan yedettiis; qassi “maccaageetanne attumaageeta” ‘woranau manddiis.’—Oos. 9:1, 2; 22:4.a

5. Saaꞌooli Yesuusi erissiyo ashkkarata yedettiyoogaa aggidi, Kiristtoosabaa sabbakiyaagaa gididoy ayba ogiyaanakko qonccissa.

⁵ Saaꞌooli Damasqqo biidi Yesuusi erissiyo ashkkarata eta sooppe efiidi Yerusalaamen Sanhedirina shilootan essanau halchiis. SHin, i Kiristtaane gubaaꞌiyau Huuphe gididaagaa eqettido gishshau, a halchoy polettibeenna. (Efi. 5:23) Saaꞌooli Damasqqo biishin, Yesuusi aara gayttin, wolqqaama pooꞌoy pooꞌidi a ayfiyaa qooqissiis. Hegaappe simmin, Saaꞌooli bau odettiyaabaa siyana gakkanaassi Damasqqo biidi naaganaadan Yesuusi a kiittiis. Kiittin aybi hanidaakko eroos.—Oos. 9:3-22.

6, 7. PHauloosi kase i azzanttiyaabaa oottidoogaa akeekidoogaa bessiyaabi aybee?

⁶ PHauloosi ba oottidobay bala gidiyoogaa eri simmidi sohuwaara, Kiristtoosi erissiyo ashkkarata yedettiyoogaa aggidi, abaa mishettidi sabbakiyoogaa doommiis. Gidikkokka, guyyeppe ba hanotaabaa hagaadan xaafiis: “Kase taani Aihuda ammanuwan de7iyo wode, waana de7idaakko, intte siyideta; taani Xoossaa woosa keettaa qareti bainnan yedettaasinne xaissanau baaxetaas.” (Gal. 1:13) Hegaappe simmin, Qoronttoosanne Piliphisiyuusa Kiristtaanetuyyo, qassi Ximootiyoosau xaafido wodekka kase i oottido zilꞌꞌissiyaabaa yootiis. (1 Qoronttoosa 15:9 nabbaba; Pili. 3:6; 1 Xim. 1:13) PHauloosi babaa hegaadan xaafido wode ceeqettibeenna; shin hegaa polibeennabadankka hanibeenna. I keehi moorobaa oottidoogaa akeekiis.—Oos. 26:9-11.

⁷ Fredirik W. Farara giyo Geeshsha Maxaafaa eranchay PHauloosi Kiristtaaneta ay keena waayissidaakko nuuni qoppiyo wode, i keehippe azzanidoogaa, qassi harati a ay keena boridaakko nuuni akeekana danddayiyoogaa yootiis. PHauloosi gubaaꞌeta xomoosiyo wode, aara koyro gayttiya ishati a hagaadan geennan aggokkona: ‘PHauloosa giyoy nenee? Neeni nuna yedettidaagaa gidikkii?’—Oos. 9:21.

8. PHauloosi bana Yihoowaynne Yesuusi maaridoogaanne siiqidoogaa waati xeellidee, qassi nuuni hegaappe ay tamaariyoo?

⁸ SHin, PHauloosi kiitettidaagaa gididi oottidoy Xoossaa aaro kehatettaana gidiyoogaa akeekiis. I Geeshsha Maxaafaa xaafida hara oogaappenne aaruwan, ba xaafido 14 dabddaabbetun Xoossaa aaro kehatettaabaa 90too yootiis. (1 Qoronttoosa 15:10 nabbaba.) PHauloosi Xoossay bana maaridoogaa keehi nashshido gishshau, Xoossay assi immido aaro kehatettay hada gidanaadan koyibeenna. Yaatiyo gishshau, i kiitettidaageetu ‘ubbaappe aattidi oottiis.’ Nuuni nu nagaraa paaxidi kase oottido mooruwaa aggikko, Yihooway Yesuusa wozuwaa yarshshuwaa baggaara wolqqaama nagaraakka atto giyoogaa PHauloosa leemisoy bessees. Kiristtoosa yarshshoy banttana goꞌꞌana danddayiyoogaa ammananau metootiyaageeti hagaappe keehi maaddiyaabaa tamaaroosona! (1 Ximootiyoosa 1:15, 16 nabbaba.) PHauloosi Kiristtoosa pala yedettidaba gidikkokka, Xoossaa Naꞌay, ‘Tana siiqidi, ta gishshau, ba huuphiyaa immiis’ yaagiis. (Gal. 2:20; Oos. 9:5) PHauloosi zilꞌꞌissiya harabaa gujjennan Yihoowau haggaaziyo ogiyaa tamaariis. Neenikka hegaa malabaa tamaaradii?

NEENI ZILꞌꞌETTIYOOBI DEꞌII?

9, 10. (a) Issi issi Yihoowa Markkati zilꞌꞌettiyoy aybissee? (b) Kase mooridoban ubbatoo unꞌꞌettiyoogee loꞌꞌo gidennay aybissee?

⁹ Nena zilꞌꞌiyaabaa oottadii? Bessennabaa oottaydda ne wolqqaanne ne wodiyaa coo wurssadii? Harata qohiyaabaa oottadii? Woy qassi neeni zilꞌꞌettiyo harabaykka deꞌana danddayees. Neeni hegaadan qoppiyaaba gidikko, ay oottana danddayay?

¹⁰ Daro asay hegaa qofan sheekkees. Eti wonttin qammin bantta mooruwaabaa qoppiyoogan azzanoosonanne unꞌꞌettoosona. Unꞌꞌettin metoy qaarettii? Aynne qaarettenna! Unꞌꞌettiyoogee wodiyaanne wolqqaa wurssiyaaba. Unꞌꞌettiyoogaappe, loꞌꞌobaa oottiyoogee maaddana danddayees. Neeni naaqqido uraa maarotaa oychada, geella kaseegaadan aara dabbotana danddayaasa. Kaseegaadan moorennaadan, aybissi hegaadan oottidaakko qoppa. Gidikkokka, issi issitoo neeni mooridobay kaalettidoban genccada deꞌana koshshennan waayi aggana. SHin, kase mooridoban unꞌꞌettiyoogee aybanne maaddenna. Hegee neeni Xoossau loyttada haggaazennaadan diggana danddayees.

11. (a) Yihooway nuna maaranaadaaninne siiqanaadan nuuni ay oottana bessii? (b) Geeshsha Maxaafay yootiyoogaadan, nuuni kase mooridoban unꞌꞌettiyoogaa agganau waatana koshshii?

¹¹ Issoti issoti wolqqaama nagaraa oottido gishshau, banttau Xoossaa maarotay bessennabadan qoppoosona. Eti iita nagaraa oottidabadan woy darotoo mooridabadan qoppoosona. SHin, eti kase oottidobay aybanne gidin, bantta nagaraappe simmana, laamettananne Xoossay banttau atto gaanaadan woossana danddayoosona. (Oos. 3:19) Yihooway etakka hara darotuugaadan, maarananne siiqana danddayees. Ba nagaraappe wozanappe simmidi bana kawushshiya uraa Yihooway keha ayfiyan xeellees. “Taani bidinttaaninne baanan uttada paaxais” yaagida Iyyooba Xoossay keha ayfiyan xeelliis. (Iyy. 42:6) Nuuni kase mooridoban unꞌꞌettiyoogaa aggidi woppu giidi deꞌanau ay oottana koshshiyaakko Geeshsha Maxaafay hagaadan gees: “Ba nagaraa genttiya uri aacenna; shin paaxiyaageenne nagaraa aggiyaagee maarettana.” (Lee. 28:13; Yaaq. 5:14-16) Yaatiyo gishshau, nuuni Xoossau paaxana, i nuuyyo atto gaanaadan woossananne nuuni mooridoban zilꞌꞌettiyoogaa bessiyaabaa oottana danddayoos. (2 Qor. 7:10, 11) Nuuni hegaadan oottikko, ‘coo atto giya’ Xoossaappe maarotaa demmana danddayoos.—Isi. 55:7.

12. (a) Nuuni mooridoban unꞌꞌettiyo wode, Daawita loꞌꞌo leemisuwaa kaallana danddayiyoy ayba ogiyaanee? (b) Yihooway zilꞌꞌettidoy ayba ogiyaanee, hegaa eriyoogee nuna waati maaddii? (Saaxiniyaa xeella.)

¹² Woosay Xoossay nuna maaddanaadan oottiya wolqqaamaba. Daawiti Yihooway ba woosaa siyidoogaa ammaniyoogaa ufayssiya mazamuriyan qonccissiis. (Mazamure 32:1-5 nabbaba.) Daawiti nagaraa paaxibeennaagee bana keehi daafurissidoogaa yootiis. Hegee i unꞌꞌettanaadan, oolanaadaaninne hirgganaadan oottiis. Daawiti maarotaa demmanaadaaninne woppu gaanaadan oottiday aybee? I ba nagaraa Xoossau paaxidoogaa. Yihooway Daawita woosaa siyidi i minettanaadan oottiis; qassi i suurebaa oottanaadan maaddiis. Hegaadan, neenikka wozanappe woossiyaaba gidikko, Yihooway ne woosaa siyanaagaa ammanettana danddayaasa. Neeni kase mooridobaa gaasuwan unꞌꞌettiyaaba gidikko, neeyyo danddayettida keenan ne nagaraappe simmidoogaa bessiyaabaa ootta; yaatikko, Yihooway neeyyo atto gaanaagaa ammanetta.—Maz. 86:5.

SINTTANAABAA QOPPA

13, 14. (a) Ha wodiyan nuna qofissiya waannabay ayba gidana koshshii? (b) Haꞌꞌi nu hanotaa yuushshi qoppanaadan denttettana danddayiya oyshati awugeetee?

¹³ Nuuni aadhidabaappe tamaarana danddayiyoogee tuma; shin hegaa qoppiyoogan sheekkana koshshenna. Nuuni ha wodiyan oottiyoobaanne sinttappe oottanabaa qoppana koshshees. Haꞌꞌi nuuni oottiyoobi woy oottennan aggidobi daro layttappe guyyiyan zilꞌꞌettanaadan oottiyaabee? Nuuni sinttappe zilꞌꞌissenna ogiyan haꞌꞌi Xoossaayyo ammanettidi haggaaziyoo?

¹⁴ Gita waayee matiyo wode, kaallidi deꞌiyaagaa mala qofan unꞌꞌettana koyokko: ‘Xoossaa oosuwan hara darobaa oottana danddayiyaanaa shin? Aqinye gidana danddayaydda aybissi aggidanaa? Taani gubaaꞌiyau oottiyaagaa gidanau baaxetennaadan diggiday aybee? Ooratta asatettaa maayanau wozanappe baaxetidana? Taani ooratta alamiyan Yihooway wottanau koyiyo asee?’ Hegaa mala qofan sheekkiyoogaappe, hegaa goꞌettidi nu hanotaa yuushshi qoppiyoogan Yihoowa oosuwan nuuyyo danddayettida ubbabaa oottana koyoos. Yaatana xayikko, nu deꞌoy kaseegaappe aaruwan zilꞌꞌettanaadan oottiyaaba gidees.—2 Xim. 2:15.

OOTTIDO GEESHSHA OOSUWAN MULE ZILꞌꞌETTOPPA

15, 16. (a) Xoossaa oosuwaa kaseyanau daroti aggibayidobay aybee? (b) Nuuni Xoossaa Kawotettaa kaseyanau aggibayidoban zilꞌꞌettana koshshennay aybissee?

¹⁵ Yihoowayyo kumetta wodiyau haggaazanau ba goꞌꞌaa aggibayida uraabaa shin? Geella neeni ne deꞌuwaa sima oottada Kawotettaabaa kaseyanau, loꞌꞌo ooso woy loꞌꞌo zalꞌꞌe aggabayidaba gidana danddayaasa. Geella neeni kumettaa wodiyaa haggaazanau, giishin Beeteelen woy alame yuushuwan keexxiyo oosuwaa oottanau, woradaa xomoosiyaagaa woy misoonaawe gidanau aqo oyqqennan woy oyqqidaba gidikko, naata yelennan deꞌanau kase qofaa qachennan aggakka. Neeni haꞌꞌi cimada, hegaadan qofaa qachido gishshau zilꞌꞌettana koshshii? Neeni aggabayidobay bessennabadan woy hegaa koshshenna wodiyan kuuyidabadan qoppana bessii? Mule hegaadan qoppana koshshenna!

¹⁶ Neeni hegaa kuuyidoy Yihoowa keehippe siiqiyo gishshataassanne au haggaazanau koyiya asaa maaddanau wozanappe koyido gishshataassa. Neeni hegaappe dummabaa oottidaba gidiyaakko, ta deꞌoy loꞌꞌana shin gaada qoppana koshshenna. Neeni kuuyidoban keehi ufayttana danddayaasa! Neeni danddayiyo keenan Yihoowayyo haggaazanau keehi loꞌꞌobaa dooradasa. Neeni assi haggaazanau gaada aggidobaa ubbaa Yihooway dogenna. Neeni sinttappe demmana tumu deꞌuwan, ha wodiyan neeni qoppana danddayiyo aybippenne aadhiya anjjuwaa Yihooway neeyyo immana!—Maz. 145:16; 1 Xim. 6:19.

HAꞌꞌIKKA SINTTAPPEKKA ZILꞌꞌETENNAN HAGGAAZIYO OGIYAA

17, 18. (a) PHauloosi sinttappe keehi zilꞌꞌettennaadan ay oottidee? (b) PHauloosa leemisuwaa ayba ogiyan kaalluutee?

¹⁷ PHauloosi sinttappe ba deꞌuwan keehi zilꞌꞌettennaadan ay oottidee? PHauloosi kase ba oottidoban unꞌꞌettiyoogaa aggidi, ba demmana woytuwau minnidi oottidoogaa yootiis. (Piliphphisiyuusa 3:13, 14 nabbaba.) PHauloosi Ayhuda haymaanootiyaa kaalliyo wode mooridobaa wotti dentti qoppibeenna. Hegaa qoppiyoogaappe, sinttappe merinaa deꞌuwaa woytuwaa demissiyaabaa minnidi oottiis.

¹⁸ Nuuni PHauloosi yootidobaappe ay tamaarana danddayiyoo? Nuuni laammana danddayenna kase oottidoban unꞌꞌettiyoogaappe, sinttappe woytuwaa demmanau warettana koshshees. Nuuni kase mooridobaa dogana danddayokko, shin he mooruwaa qoppiyoogan sheekkana koshshenna. Kase oottidoban unꞌꞌettiyoogaa aggana, haꞌꞌi Xoossau loyttidi haggaazananne sinttappe demmana maalaaliya anjjuwaabaa qoppana danddayoos!