Yesuusi Saaꞌoola Doorees

SSaaꞌooli Xarsseesen yelettida Rooma biitta asa. I Ayhudatu Higgiyaa loytti eriya Parisaawe; qassi Kiristtaaneta ixxees. I Kiristtaane attuma asaanne macca asaa eta sooppe goochi kessidi qasho keettan yeggees. Ubba qassi i cora asay hanqqettidi erissiyo ashkkaraa Isxxifaanoosa shuchan caddidi woriyo wode matan eqqidi xeellees.

SHin Yerusalaamen qashissiyoogaa xallay Saaꞌoolawu gidibeenna. I Damasqqo kataman deꞌiya Kiristtaaneta koyidi qashissanawu qeese halaqay bana yaa kiittana mala oychiis. Saaꞌooli katamaa gakkana matidaashin, qoppennan saluwaappe wolqqaama pooꞌoy a yuushuwan pooꞌin, i saꞌan kunddiis. I hagaadan giya cenggurssaa siyiis: ‘Saaꞌoolaa, tana ayssi yedettay?’ Saaꞌooli, ‘Neeni oonee?’ yaagiis. Yaatin, ‘Taani Yesuusa. Damasqqo ba; baada neeni ay oottana bessiyaakko akeekana’ yaagidi zaariis. Sohuwaara, Saaꞌoola ayfee qooqido gishshawu, asi a kushiyaa oyqqi goochidi katamaa gelissiis.

Damasqqon, Hanaaniyaa giyo Ammanettida Kiristtaanee deꞌees. Yesuusi ayyo ajjuutan, ‘Suure giyo ogiyaa baada, Yihudaa sooni Saaꞌoola giyo bitaniyaa koya’ yaagiis. Hanaanee, ‘Godawu, he bitaniyaabaa ubbabaa taani erays! I ne erissiyo ashkkarata qasho keettan yeggees!’ yaagiis. SHin Yesuusi hagaadan giis: ‘Saaꞌooli daro asaassi mishiraachuwaa sabbakanaadan taani a dooraas. Akko ba.’

Hegaa gishshawu Hanaanee Saaꞌoola demmidi a hagaadan giis: ‘Tayshawu Saaꞌoolaa, ne ayfiyaa dooyanaadan Yesuusi tana kiittiis.’ Sohuwaara, Saaꞌooli zaarettidi xeelliis. I Yesuusabaa tamaaridi a kaalliyaagaa gidiis. Haꞌꞌi muukettidi Kiristtaane gididi, Saaꞌooli ba mala Kiristtaanetuura Ayhuda woosa keettatun sabbakiyoogaa doommiis. Saaꞌooli Yesuusabaa asaa tamaarissiyoogaa beꞌidi Ayhudati ay keena dagammidaakko qoppana danddayay? Eti, ‘Ha bitanee, Yesuusi erissiyo ashkkarata kase yedettiyaagaa gidenneeyye?’ yaagidosona.

Saaꞌooli Damasqqon deꞌiya asawu heezzu laytti sabbakiis. Ayhudati Saaꞌoola ixxiyo gishshawu a woranawu zorettidosona. SHin ishantti he maqquwaabaa eridi i baqatanaadan maaddidosona. Eti a keeshiyan yeggidi dirssaa gimbbiyaa xooꞌiyaara duge wottidosona.

Saaꞌooli Yerusalaame biido wode, yan ishanttuura gayttanawu maliis. SHin eti a yayyidosona. He wode Barnnaabaasa giyo keha erissiyo ashkkaray Saaꞌoola kiitettidaageetukko efiidi, Saaꞌooli tumuppe laamettidoogaa eta ammanttiis. Saaꞌooli Yerusalaamen deꞌiya galchchaara mishiraachuwaa mishettidi sabbakiyoogaa doommiis. Guyyeppe i PHawuloosa geetettiis.