Israaꞌeele Koyro Kawuwaa—Saaꞌoola

SAMEELI bitaniyaa huuphiyan zaytiyaa tigiyaagaa beꞌa. Issi asi kawo gidanau doorettidoogaa bessanau he wode hegaadan oottoosona. Yihooway, Sameeli Saaꞌoola huuphiyan zaytiyaa tiganaadan yootiis. He zaytee keehi sawiya dumma zayte.

Saaꞌooli kawo gidanau danddayiyoobadan qoppibeenna. I Sameelayyo: ‘Taani Israaꞌeele zare ubbaappe laafiya Biniyaama zare. Yaatin, ayssi neeni tana kawo gidaasa yaagay?’ yaagiis. Saaꞌooli gitanne erettida asa malatanau koyibeenna gishshau Yihooway a dosiis. Kawo gidanaadan Yihooway a dooridoykka hegaassa.

SHin Saaꞌooli hiyyeesa woy guutta asa gidenna. Eta soo asay dure; ikka qassi malanchchanne adussa asa. I Israaꞌeelen deꞌiya ooppenne geesaa aduqees! Saaꞌooli keehippe minonne wottankka gattenna asa. Yihooway Saaꞌoola kawo oottidi doorido gishshau asay ufayttiis. Eti ubbay qaalaa xoqqu oottidi: ‘Kawoy daro wodiya deꞌo!’ yaagiyoogaa doommidosona.

Israaꞌeeletu morkketi audeegaappenne aaruwaa minnidosona. Eti haꞌꞌikka Israaꞌeeletu bolli daro metuwa gattiiddi deꞌoosona. Saaꞌooli kawo gididi gamꞌꞌennan, Amoonati etaara olettanau yiidosona. SHin Saaꞌoli daro olanchchata shiishshidi, Amoonata xooniis. Hegee, Saaꞌooli kawo gididoogan asay ufayttanaadan oottiis.

Layttaappe layttay aadhdhi aadhdhi biyo wode, Saaꞌooli Israaꞌeeleta kaalettin, eti bantta morkketa darotoo xoonidosona. Saaꞌoolassi Yonaataana geetettiyaa issi xala naꞌay deꞌees. Yonaataanikka Israaꞌeeleti daro olan xoonanaadan maaddiis. Pilisxxeemati he wodekka Israaꞌeeletu morkketu ubbaappe iittidaageeta. Issi gallassi daro shaꞌan qoodettiya Pilisxxeemati Israaꞌeeletuura olettanau kiyidosona.

Sameeli, Yihoowassi yarshshuwa woykko imotaa i yiidi shiishshana gakkanaashin naaganaadan Saaꞌoolassi yootiis. SHin Sameeli elle yibeenna. Pilisxxeemati olaa doommoosona gi yayyidi, Saaꞌooli kasetidi yarshshuwaa shiishshiis. Sameeli wurssettan yiidi, Saaꞌooli azazettibeennaagaa assi yootiis. Sameeli: ‘Yihooway Israaꞌeeleta haariya hara kawuwaa doorana’ yaagiis.

Takkidi Saaꞌooli haranttuwaakka azazettennan aggiis. Yaatiyo gishshau Sameeli ayyo: ‘Yihoowayyo azazettiyoogee modhdho dorssaa imootaa immiyoogaappe aadhdhees. Neeni Yihoowayyo azazettennan ixxido gishshau, neeni Israaꞌeele kawo gidada deꞌanaadan Yihooway koyenna’ yaagiis.

Nuuni hagaappe loꞌꞌo timirttiyaa demmana danddayoos. Ubbatoo Yihoowayyo azazettiyoogee ay keena koshshiyaabakko bessees. Saaꞌooladan loꞌꞌo asa gidida urikka, laamettidi iita asa gidana danddayiyoogaakka bessees. Iita gidanau nuuni mulekka koyokko; koyiyooyye?