Israaꞌeela Koyro Kawuwaa

Yihoowi Israaꞌeelata kaalettanaadan etassi daannata immiis; shin eti kawo koyidosona. Eti Sameelayyo, ‘Hara kawotetta ubbawu kawoy deꞌees. Nuunikka kawo koyoos’ yaagidosona. Sameeli hegee bala gi qoppido gishshawu, hegaa xeelliyaagan i Yihoowa woossiis. Yihoowi ayyo hagaadan giis: ‘Asay nena ixxibeenna. Eti tana ixxidosona. Taani etawu kawuwaa immana danddayiyoogaa yoota; shin he kawoy etappe darobaa oychana.’ Yaatin asay hagaadan giis: ‘Hegee nuna qofissenna. Nuuni kawo koyoos!’

Saaꞌoola giyo bitanee Israaꞌeela koyro kawo gidanaagaa Yihoowi Sameelayyo yootiis. Saaꞌooli Sameela oychanawu Raama biido wode, Sameeli Saaꞌoola huuphiyan zaytiyaa tigiyoogan i kawo gidanaadan tiyiis.

Guyyeppe Sameeli Israaꞌeelata eta ooratta kawuwaa bessanawu issippe shiishshiis. SHin eti Saaꞌoola demmana danddayibookkona. Aybissakko neeni eray? I miishshatu giddon qosetti uttido gishshataassa. Eti wurssettan Saaꞌoola demmidi a kessi ehiidosona; ehiidi asaa giddon essidosona. Saaꞌooli asa ubbaappe adussa; qassi i keehi loꞌꞌees. Sameeli, ‘Yihoowi doorido bitaniyaa beꞌite’ yaagiis. Asay, ‘Kawoy shemppo gamꞌꞌo!’ yaagiis.

Koyro heeran, Kawuwaa Saaꞌooli Sameeli yootiyoobaa siyiisinne Yihoowawu azazettiis. SHin guyyeppe i laamettiis. Leemisuwawu, Kawoy yarshshuwaa yarshshana bessenna. Issi wode, Sameeli i yaanaashin Saaꞌooli naagishshanaadan yootiis; shin Sameeli sohuwaara yibeenna. Hegaa gishshawu, Saaꞌooli yarshshuwaa yarshshanawu qofaa qachiis. Sameeli waatidee? I, ‘Neeni Yihoowayyo azazettabeykka’ yaagiis. Saaꞌooli ba mooruwaappe tamaaranee?

Hegaappe simmin, Saaꞌooli Amaaleeqa asatuura olaa olettanawu biido wode, Sameeli etappe oonanne paxa ashshennaadan Saaꞌoolayyo yootiis. SHin Saaꞌooli Kawuwaa Agaaga worennan agganawu qofaa qachiis. Yihoowi Sameelayyo, ‘Saaꞌooli tana aggiis; qassi taani yootiyoobaa siyenna’ yaagiis. Sameeli keehi azzanidi, Saaꞌoola, ‘Neeni Yihoowayyo azazettennan ixxido gishshawu, i hara kawuwaa doorana’ yaagiis. Sameeli biishin, Saaꞌooli a oyqqiis; oyqqin Sameela maayuwaa xeeray pooshshettiis. Hegaappe simmin Sameeli Saaꞌoola, ‘Yihoowi kawotettaa neeppe pooshshiis’ yaagiis. Yihoowi bana siiqiyaanne baayyo azazettiya urawu he kawotettaa immana hanees.