Damasqqo Efiya Ogiyan

HEGEE saꞌan zinꞌꞌiday oonakko eray? Hegee Saaꞌoola. I Isxxifaanoosa shuchchan caddida asatu maayuwaa naagidaagaa gidiyoogaa hassaya. He wagagga pooꞌuwaa xeella! Aybi haniiddi deꞌii?

Isxxifaanoosi hayqqi simmin, Yesuusa kaalliyaageeta yedettiyoogan Saaꞌooli sintta xeera gidiis. I issi keettaappe hara keettaa bi biidi, eta goochchi kessidi qasho keetti yeggees. Erissiyo ashkkaratuppe daroti hara katamata baqatidi, yan “mishiraachchuwaa” sabbakiyoogaa doommidosona. SHin Saaꞌooli Yesuusa kaalliyaageeta koyanau hara katamata biis. Haꞌꞌi i Damasqqo biiddi ogiyan deꞌees. SHin kaallidi deꞌiya garamissiyaabi oge bolli haniis:

Qoppennan pooꞌoy saluwaappe Saaꞌoola yuushuwan pooꞌiis. Hagan nuuni beꞌiyoogaadan, i saꞌan kunddiis. Hegaappe: ‘Saaꞌoolaa, Saaꞌoolaa! tana ayssi qohay?’ yaagiyaa issi qaalay siyettiis. Saaꞌoolaara deꞌiya asati pooꞌuwaa beꞌidosonanne cenggurssaakka siyidosona, shin haasayay ay giyabaakkonne shaakkibookkona.

Saaꞌooli: ‘Godau, neeni oonee?’ yaagidi oychchiis.

He qaalay: ‘Taani ne qohiyo Yesuusa’ yaagiis. Yesuusi hegaadan giidoy Saaꞌooli Yesuusa kaalliyaageeta qohiyo wode, Yesuusassi he qohoy bana gakkidabadan siyettiyo gishshataassa.

Saaꞌooli haꞌꞌi: ‘Godau, taani ay oottana mala koyay?’ yaagidi oychchiis.

Yesuusi: ‘Denddada Damasqqo ba. Neeni oottanabi neeyyo yan odettana’ yaagiis. Saaꞌooli denddi eqqidi ba ayfiyaa dooyiyo wode, aynne xeellana danddaybeenna. I qooqiichchiis! Yaatiyo gishshau, aara deꞌiya asati, a kushiyaa oyqqi kaalettidi Damasqqo efiidosona.

Yesuusi Damasqqon deꞌiya ba erissiyo ashkkaratuppe issuwaassi: ‘Hanaaniyau, dendda. Suure giyo ogiyaa baada Yihudaa son Saaꞌoola giyo asa oychcha. I taassi dumma oosanchcha gidanaadan taani a dooraas’ yaagiis.

Hanaanee azazettiis. I Saaꞌoolaara gayttido wode, a bolli ba kushiyaa wottidi: ‘Goday, neeni zaarettada xeellana malanne geeshsha ayyaanay nenan kumana mala, tana kiittiis’ yaagiis. Sohuwaarakka aybakko poqo malay Saaꞌoola ayfiyaappe wodhdhin, i zaarettidi xeellana danddayiis.

Saaꞌooli Ayhuda gidenna daro asau sabbakiyoogan keehippe goꞌꞌiya asa gidiis. I kiitettida PHauloosa gidiis; abaa darobaa tamaarana deꞌoos. SHin koyro, Xoossay PHeexiroosa ay oottanaadan kiittidaakko ane beꞌoos.