Yihooway Nena Maaddanau Xomoosiyoogaa Nashshay?

1, 2. Yihooway nuna wochiyoogee asay kaameeran kaysuwaa wochiyoogaappe dummattiyoy aybiinee?

DARO biittan, asay soo gelidi issi issibaa shammiyo gita suuqiyan zalꞌꞌanchati shaqaxaa wuuqqiya asata wochanau kaameeraa goꞌettoosona. Hegee eti kaysuwaa oyqqidi mootanau maaddees. Hegaa mala kaameeray darosan deꞌiyo gishshau, wuuqqida uri darotoo ohettennan attana danddayenna.

² SHin, asay hegaa mala kaameeraa darosan goꞌettiyoogee nuuni nuna siiqiya Aawaa Yihoowabaa hassayanaadan oottennee? Geeshsha Maxaafay a ayfeti “ubbasaa xeelloosona” yaagees. (Lee. 15:3) Hegee i nuuni a higgiyaa kanttiyaakkonne beꞌana xallau wochees giyoogee? Xoossay nuuni balosaara nuna qaxxayanau wochii? (Erm. 16:17; Ibr. 4:13) Akkay, hegaassa gidenna! Yihooway nuna wochiyoy, i nuna siiqiyo gishshataassanne nuussi qoppiyo gishshataassa.—1 PHe. 3:12.

3. Yihooway nuna siiqiyoogaa bessiyo ichashu ogeti awugeetee?

³ Xoossay nuna siiqiyo gishshau wochiyoogaa akeekanaadan nuna maaddanabay aybee? Yihooway nuna wochiyo ichashu ogeta ane beꞌoos. (1) I nuuni iitabaa oottanaappe kase seerees. (2) Nuuni baliyo wode suurissees. (3) Geeshsha Maxaafaa maaran nuna kaalettees. (4) Metuwan genccanaadan nuna maaddees. (5) Nuuni suurebaa oottiyo wode anjjees.

XOOSSAY XOMOOSIDI NUNA SEEREES

4. Yihooway Qaayeeli nagaraa oottanaappe kase a seeridoy aybissee?

⁴ Ane koyro, nuuni iitabaa oottanau qoppiyo wode Xoossay nuna waati seeriyaakko beꞌoos. (1 Odi. 28:9) Hegaa akeekanau, a yarshshoy ekettennan ixxin, Qaayeeli ‘keehi yiillotido’ wode Yihooway waatidaakko qoppa. (Doomettaabaa 4:3-7 nabbaba.) Qaayeeli ‘loꞌꞌobaa oottanaadan’ Yihooway zoriis. I loꞌꞌobaa oottennaba gidikko, nagaray a ‘penggen zuggidoogaa’ Yihooway yootiis. Qassi Xoossay, “Neeni a xoonana bessees” yaagiis. Xoossay Qaayeeli yootidoba siyin a ‘somꞌꞌoy pashkkana’ mala koyiis. Qaayeeli he seeraa siyiyaakko, Xoossaayyo mata dabbo gididi deꞌana danddayees shin.

5. Yihooway nuna seeriyo ogeti awugeetee?

⁵ Ha wodiyan deꞌiya nubaykka hegaa mala. Yihooway nu wozanaa xeellees; nu qofaynne nu koshshay appe geemmana danddayenna. Nuna siiqiya Aaway nuuni xillotettaa ogiyan baana mala koyees; gidoppe attin, i nuuni kaalliyo ogiyaa agganaadan wolqqanttenna. Nuuni bala ogiyan biyoogaa doommiyo wode, i ba Qaalaa Geeshsha Maxaafaa baggaara nuna seerees. Waatidi? Nuuni galla galla Geeshsha Maxaafaa nabbabiyo wode, darotoo iita qofaa agganaadan maaddiya zoriyaa demmoos. Qassi nu xuufeta nabbabiyo wode, nuuni agganau baaxetin metidabaa waati xoonana danddayiyaakko akeekoos. Gubaaꞌe shiiquwan qassi ubbaykka nuussi koshshiya wodiyan loꞌꞌo zoriyaa demmoos.

6, 7. (a) Miilooniyan qoodettiya asau giigiya xuufeti Xoossay nena siiqiyoogaa bessoosona gaana danddayiyoy aybissee? (b) Yihooway nena siiqiyoogan waata goꞌettana danddayay?

⁶ Yihooway seeriyo he ubba ogee i nuna siiqiyoogaa bessees. Geeshsha Maxaafay, nu xuufetinne gubaaꞌe shiiqoy miilooniyan qoodettiya asaa keehi maaddiyoogee tuma. SHin Yihooway neeni suurebaa oottana mala Geeshsha Maxaafan deꞌiya a seeraa siyanaadan koyees. Hegee Yihooway nena siiqiyoogaa bessiyaaba.

⁷ Nuuni Xoossay seeriyo wode goꞌettanau, i nuuyyo tumuppe qoppiyoogaa erana bessees. Qassi a Qaalan deꞌiya zoriyaa siyidi, Xoossaa ufayssenna qofaa agganau baaxetana bessees. (Isiyaasa 55:6, 7 nabbaba.) I seeriyo wode siyikko, daro metuwaappe attoos. Nuuni balabaa oottikko shin? Siiqiya Aaway he wode nuna waati maaddii?

SIIQIYA AAWAY NUNA SUURISSEES

8, 9. Yihooway ba ashkkaratu baggaara zoriyoobay i nuna keehi siiqiyoogaa waatidi bessii? Leemisuwaa yoota.

⁸ Yihooway nuna suurissiyo wode, i nuna siiqiyoogaa loyttidi akeekana danddayoos. (Ibraawe 12:5, 6 nabbaba.) Issi uri nuna zoriyoogee seeriyoogee nuna ufayssennaagee tuma. (Ibr. 12:11) SHin nuna zoriya uri qoppana bessiyaabaa akeeka. Nuuni Yihoowaara deꞌiya dabbotaa mooriyaabaa ay oottiyaakko i shaakki erana bessees; i nuna siiquwan oyqqana bessees; qassi nuuni Xoossaa ufayssiyaabaa oottanau nu ogiyaa waati suurissanaakko Geeshsha Maxaafaappe bessanau wodiyaa bazzananne baaxetana koshshees. He zoriyau Pulttoy Yihoowa gidiyo gishshau, nuuni siyoos.

⁹ Zoriya asi Xoossaa qofaa waati kaallana danddayiyaakko bessiya issi leemisuwaa ane beꞌoos. Issi ishay tumaa siyanaappe kase pokkobaa bessiya misiliyaa darotoo beꞌees; shin guyyeppe he meeziyaa aggiis. SHin issi issitoo hegaa beꞌanau paacettees. I ooratta moobayliyaa shammido wode, a iita amoy zaarettidi doommiis. (Yaaq. 1:14, 15) I he moobayliyaa goꞌettidi Intternneetiyan pokkobaa beꞌiyoogaa doommiis. Issi gallassi, i gubaaꞌe cima gidida issi ishau ba silkkiyaa garxxiis; cimay he moobayiliyan beꞌidobaappe ishay pokkobaa beꞌiyoogaa akeekiis. He wode cimay a sohuwaara zoriis. Ishay he zoriyaa siyidi, guyyeppe he iita meeziyaa aggiis. Yihooway nuuni geeman oottiyo nagaraa beꞌidi, nuussi aara deꞌiya dabbotay moorettanaappe kase seerana danddayees. Yihooway nuna siiqiyo gishshau a galatoos.

GEESHSHA MAXAAFAA MAARAA KAALLIYOOGAN GOꞌETTOOS

10, 11. (a) Xoossaa kaaletuwaa waatada kaallana danddayay? (b) Yihoowa kaaletuwaa kaalliyoogee eratetta gidiyoogaa issi keettaa asay waati akeekidee?

¹⁰ Mazamuraawee, “Ne zoriyan tana kaalettaasa” yaagidi Yihoowa sabbiis. (Maz. 73:24) Nuuyyo kaaletoy koshshiyo wode, issibaa xeelliyaagan Yihoowa qofay aybakko eranau a Qaalaa nabbabiyoogan a ‘sinttayana’ danddayoos. Geeshsha Maxaafaa zoriyaa siyiyoogee nuna ayyaanaaban goꞌꞌiyoogaa xalla gidennan nuuyyo asatettan koshshiyaabaa kunttanaukka issi issitoo maaddees.—Lee. 3:6.

¹¹ Leemisuwau, issi goshshanchaa keettaa asay Pilippinssen gadiyaa keraa ekkidi yan deꞌees. He son daro naati deꞌiyaaba gidikkokka, azinaynne machiyaa aqinye gididi haggaazoosona. Issi gallassi he gadiyaa goday eti hegaappe denddi baanaadan yootin keehi dagammidosona. He bitanee eta hegaadan giidoy aybissee? Eti ammanettenna asa giidi hara asi au yootido gishshataassa. Ishay ba soo asay awan deꞌanaakko hirggidaba gidikkokka, “Yihooway nuuyyo giigissana. Aybi hanikkokka, i ubba wode nuussi koshshiyaabaa kunttees” yaagiis. Ishaa ammanoy hada attibeenna. Amarida gallassaappe guyyiyan, eti he gadiyaa aggidi baana bessennaagaa akeekidosona. Hanidabay aybee? Yihoowa Markka gidida he keettaa asay asi eta mootikkokka, Geeshsha Maxaafaa maaraa kaallidi, bonchiyoogaa aggennan saruwan deꞌiyoogaa gadiyaa goday akeekiis. Bitanee hegan garamettidi, eti yan deꞌanaadan paqqadiyoogaa xalla gidennan, etau hara gadiyaakka gujjidi immiis. (1 PHeexiroosa 2:12 nabbaba.) Nuuni Geeshsha Maxaafaa maaraa kaallikko, Yihooway nuna meto wodiyankka kaalettanaagee qoncce.

NUUNI METUWAA GENCCANAADAN MAADDIYA DABBUWAA

12, 13. Issoti issoti ‘Xoossay ta waayiyaa beꞌiishsha’ giidi qoppiyo hanotati awugeetee?

¹² Gidoppe attin, issi issitoo metoy daro wodiyau takkana danddayees. Nuuni decenna harggiyaa harggana danddayoos; so asay nuna tumaa gishshau adussa wodiyau ixxana danddayees; woy asay nuna daro wodiyau yedettana danddayees. Qassi eeshshaa dummatettaa gaasuwan gubaaꞌe giddon issi uraara maayettennaagee genccanau keehi wayssiyaaba.

¹³ Leemisuwau, issi uri nena qohiyaabaa haasayana danddayees. Neeni, ‘Hagaa malabay Xoossaa dirijjitiyan hanana bessenna!’ gaana danddayaasa. SHin nena qohida ishau gubaaꞌiyan oottiyo maatay imettiis; qassi harati i loꞌꞌo asa gidiyoogaa yootoosona. Hegaa gishshau, neeni, ‘Hagaadan waanidi hanana danddayii? Yihooway beꞌenneeyye? I coꞌꞌu giyoy aybissee?’ gaana danddayaasa.—Maz. 13:1, 2; Imb. 1:2, 3.

14. Nu ishantti nuna mintti zoranaadan Yihooway paqqadana danddayiyoy aybissee?

¹⁴ Yihooway kelttiyaa gelenna gaasoy deꞌana danddayees. Leemisuwau, neeni hara asi mooridabadan qoppiyaaba gidikkokka, Xoossay hegaa dumma ogiyan xeellana danddayees. He aawu xeelan, neeni qoppidoogaappe aaruwan moorenna aggakka. Neeni qohiya haasayaa giidobi, neeni yuushsha qoppana koshshiyo, neessi bessiya zore gidana danddayees. Bolla Gididi Heemmiyaagaa yara gididi oottida Ishaa Karl Kileyni ba deꞌuwan hanidabaa xaafiyo wode, Ishaa Razerforddi issitoo bana zoridobaa yootiis. Amarida wodiyaappe guyyiyan, Ishaa Razerforddi Ishaa Karla, “Karla ay malee?” giidi loytti sarotiis. SHin Ishaa Karli au lanccidi zuuzummiiddi qooreppe qommo sarotaa sarotiis. Ishaa Razerforddi, Ishaa Karli lanccidoogaa akeekidi, i Dabloosa piriyan gelenna mala naagettanaadan yootiis. Ishaa Karli guyyeppe, “Nuuni issi ishaa bolli lancciyo wode, ubba qassi i zorana bessiyo gishshau zorin lancciyo wode, Dabloosa piriyan gelanau giigettoos” yaagiis.a

15. Metoy gakkiyo wode Yihooway maaddanaashin genccada naaganau metootikko ay akeekiyoogee maaddii?

¹⁵ Nuuni metuwaappe sohuwaara shemppanau koyoos. SHin nuuni danddayancha gidiyoogee keehi maaddees. Leemisuwau, baabure keettan badalaa gaacissanau baada taraa naagiyaabadan qoppa. Badalaa gacissanaashin neeni woqqu saatiyaa naaganaakko erakka. Neeni salettada hara baabure keetti biyaaba gidikko, yan hinkkosaappe daro asay taraa naagana danddayees. Yaatiyo gishshau, yan ubba daro saatiyaa naagana danddayaasa. SHin danddayada koyro biido baabure keettan naagidaaba gidiyaakko, naaꞌꞌantto baabure keettan naagiyo wodiyaappe kasetada gaacissana danddayaasa. Hegaadan, Xoossaa Qaalay yootiyo ogiyaappe kiyennaba gidikko, neeni genccada merinaa deꞌuwaa demmana.

16. Metoy nuna gakkiyo wode Yihooway kelttiyaa gelennan agganau koyiyoy geella aybissee?

¹⁶ Metoy gakkiyo wode Yihooway kelttiyaa gelennan agganau koyiyoy, nuna keehi maaddiyaabaa tamaarissanaassa gidana danddayees. (1 PHeexiroosa 5:6-10) Metuwaa ehiyaagee Xoossaa gidenna. (Yaaq. 1:13) Daro bagga metuwaa ehiyaagee ‘Xalahe halaqaa, ne morkkiyaa.’ Gidikkokka, nuuni ayyaanaaban diccanaadan maaddanau Xoossay nuna gakkiya waayiyaa goꞌettana danddayees. I nu waayiyaa beꞌees; qassi nuussi “qoppiyo gishshau,” waayee “amarida wodiyaa” xallau takkanaadan oottees. Yihooway neeyyo qoppiyoogaanne wurssettay gakkanau genccanaadan nena minttanaagaa ammanetta.—2 Qor. 4:7-9.

XOOSSAA UFAYSSADA ANJJETTA

17. Yihooway asaa wozanaa xomoosiyoy aybissee?

¹⁷ Wurssettan, Xoossay nu wozanaa xomoosiyo keehi minttettiya gaasoy deꞌees. I hananabaa yootiya Hanaana baggaara Kawuwaa Asayyo, “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees” yaagiis. (2 Odi. 16:9) Asi kumetta wozanaappe ammanettennaagaa Xoossay beꞌiis; shin neeni ubba wode suurebaa oottikko, Xoossay nena ‘minttettana.’

18. Neeni oottiyoobaa akeekiya uri baynnabadan qoppiyo wode, Yihoowabaa ay hassayana koshshii? (Ha huuphe yohuwaa doomettan deꞌiya misiliyaa xeella.)

¹⁸ Xoossay nuuni ‘loꞌꞌobaa oottanaadaaninne’ ‘loꞌꞌobaa dosanaadan’ koyees; hegaadan oottikko, i nuuyyo ‘qarettana.’ (Amo. 5:14, 15; 1 PHe. 3:11, 12) Yihooway xillota xeelleesinne eta anjjees. (Maz. 34:15) Leemisuwau, Ibraawe maccaasata maaretissiya Xippaaribaanne Puuhibaa qoppa. Israaꞌeelati Gibxxe biittan aylle gididi deꞌiyo wode, he naaꞌꞌu maccaasati Ibraaweti yeliyo attuma naata woranaadan azazida Paaroonappe aaruwan Xoossau yayyidosona. Eti he naatu shemppuwaa worennan aggidoy Xoossaa yayyido gishshataassa gidiyoogee qoncce. Guyyeppe, Xoossay Xippaariyyoonne Puuhiyyo “eta huuphessi so asaa immiis.” (Kes. 1:15-17, 20, 21) Saꞌaa bollan ubbasaa xeelliya Yihoowa ayfee he asati oottido loꞌꞌobaa beꞌiis. Issi issitoo, nuuni oottiyo loꞌꞌobaa ooninne akeekennabadan qoppana danddayoos. SHin hegaa Yihooway akeekees. I nuuni oottiyo loꞌꞌobaa ubbaa beꞌiyoogaa xalla gidennan, nuna anjjees.—Maa. 6:4, 6; 1 Xim. 5:25; Ibr. 6:10.

19. Issi michiyaa Yihooway a oottiyo loꞌꞌobaa akeekiyoogaa waata eradee?

¹⁹ Osttiriyaa biittan deꞌiya issi michiyaa a minnada oottiyoobaa Xoossay akeekidoogaa eraasu. A Hanggaare biittaa asa gidiyo gishshau, harati haggaaziiddi demmido Hanggaare biittaa qaalaa haasayiya maccaasiyo haasayissana mala i adrashaa immidosona. A sohuwaara he maccaasee soo baasu; shin son asi baawa. A darotoo zaarettada baasu. Issi issitoo asi son deꞌiyoogaa akeekaasu; shin xeesin ooninne koyibeenna. A xuufiyaa, dabddaabbiyaa, ba adrashaanne hegaa malabaa penggen wottada baasu. A issi layttanne bagga gidiya wodiyaa zaaretta boogaappe guyyiyan, issi galla he maccaasiyaa kariyaa doyaasu. He maccaasiyaa pashkki gaada michiyo, “Gela. Neeni ehiidobaa ubbaa nabbabada, nena naagaydda takkaas” yaagaasu. He maccaasiyaa keehi sahettido gishshau asaara gayttana danddayabeykku. SHin micheera gaytta simmada Geeshsha Maxaafaa xannaꞌiyoogaa doommaasu. Ee, michiyaa minnada oottido gishshau Xoossay o anjjiis!

20. Yihooway siiquwan wochiyo gishshau neeyyo aybi siyettii?

²⁰ Yihooway neeni oottiyo ubbabaa beꞌidi, nena anjjana. Xoossay ne balaa qoranau nena xeelliyaabadan qoppoppa. Ubba tumuppe neeyyo qoppiya Xoossaakko neeni kaseegaappe aaruwan shiiqanaadan amottoos!