Ne Deꞌuwan Xoossaa Kushiyaa Beꞌay?
‘Yihoowa kushee a ashkkaratuura deꞌiyoogee erettana.’ —ISI. 66:14.
1, 2. Issi issi asay Xoossaabaa qoppiyoobay aybee?
DARO asati eti oottiyoobay Xoossaa qofissenna giidi qoppoosona. Eti bantta bolli gakkiyaabay Xoossaa darin qofissennabadan xeelloosona. Hidaare 2013n keehi wolqqaama gotee Pilippinsse biittan daro heeraa keehi qohi simmin, issi gita katamaa kantibay, “Xoossay harasaa beennan waayi aggana” yaagiis.
2 Harati qassi eti oottiyoobaa Xoossay beꞌana danddayenna giidi qoppoosona. (Isi. 26:10, 11; 3 Yoh. 11) Eti kiitettida PHawuloosi, ‘Xoossaa eranawu dosennan ixxidosona’ yaagido asatu mala. Hegaa mala asatun “geellatettai, iitatettai, yiiqeenne iita hanotai kumiis.”—Roo. 1:28, 29.
3. (a) Xoossaa xeelliyaagan nuna woygidi oychana danddayiyoo? (b) Geeshsha Maxaafan Yihoowa ‘kushee’ darotoo ay bessii?
3 Nuuni shin? Qommoora denttido asatuugaappe dumma hanotan, nuuni oottiyo ubbabaa Yihooway beꞌiyoogaa eroos. SHin i nuussi qoppiyoogaanne ba kushiyan nuna maaddiyoogaakka akeekiyoo? Hegaa bollikka, nuunikka Yesuusi, “Xoossaa be7ana” giido asatee? (Maa. 5:8) Hegee woygiyaakko akeekanawu, Geeshsha Maxaafan odettida, Xoossaa kushee maaddin beꞌidanne hegaa beꞌennan ixxida asatubaa koyro beꞌana. Hegaappe simmin, ammanuwaa ayfiyan nu deꞌuwan Yihoowa kushiyaa waati beꞌana danddayiyaakko tamaarana. Ha qofaa beꞌiyo wode, Geeshsha Maxaafay Xoossay ba ashkkarata maaddanawunne ba morkketa xoonanawu goꞌettiyo a wolqqaa yootiyo wode, darotoo a ‘kushiyaa’ giyoogaa hassaya.—Zaarettido Wogaa 26:8 nabbaba.
XOOSSAA KUSHIYAA BEꞌENNAN IXXIDOSONA
4. Israaꞌeelatu morkketi Xoossaa kushiyaa beꞌennan ixxidoy aybissee?
4 Beni Israaꞌeelatu taarikiyaa doomettan, Xoossay Israaꞌeelata waati maaddidaakko asay beꞌiisinne siyiis. Yihooway maalaalissiya ogiyan ba asaa Gibxxeppe kessidi, hegaappe simmin daro kawota eti xoonanaadan maaddiis. (Yaas. 9:3, 9, 10) Yorddaanoosappe arggo baggan deꞌiya kawoti ubbay hegaa siyidabanne beꞌidaba gidikkonne, “Yaasanne Israa7eela asaa olanau baanau issippe shiiqidosona.” (Yaas. 9:1, 2) He kawoti olaa doommi uttidikka, Xoossaa kushiyaa beꞌana danddayoosona. Yihooway azazido gishshawu, “Israa7eela asai bantta morkketa xoonana gakkanaashin, awai wullennan takkiis. Aginaikka ba de7iyoosaappe qaaxxibeenna.” (Yaas. 10:13) SHin morkketi “Israa7eelatuura olettanaadan [Yihooway] ba huuphen eta wozanaa muumissiis.” (Yaas. 11:20) Israaꞌeelatu morkketi Xoossay Israaꞌeelatussi olettiyoogaa akeekennan ixxido gishshawu, xoonettidosona.
5. Iita Kawoy Akaabi ammanennan ixxidobay aybee?
5 Guyyeppe, iita Kawoy Akaabi Xoossaa kushiyaa beꞌana danddayiyo darobay haniis. Eelaasi ayyo, “Taani odennan de7ishin, sa7an iri bukkenna woikko xaazi xaazatenna” yaagiis. (1 Kaw. 17:1) Hegaa odissiday Yihoowa gidikkonne, Akaabi siyennan ixxiis. Guyyeppe, Eelaasi ba yarshshuwaa tamay maanaadan woossido wode, saluwaappe tamay wodhishin Akaabi beꞌiis. He wode, Eelaasi Akaaba, “Irai nena beettaa diggennaadan, . . . duge ne soo wodhdha” yaagidi, Yihooway iraa bukissanaagaa yootiis. (1 Kaw. 18:22-45) Akaabi he ubbabay haniyoogaa beꞌikkokka, hegee Xoossaa gita wolqqaa qonccissiyaabaa gidiyoogaa ammanennan ixxiis. Yihoowa kushee oottiyo wode nuuni akeekana bessiyoogaa hagaappenne hagaappe kasetiya leemisuwaappe tamaaroos.
ETI YIHOOWA KUSHIYAA BEꞌIDOSONA
6, 7. Yaasu wodiyan issoti issoti ay akeekidonaa?
6 He iita kawotuppe dumma hanotan, harati qommoora odettidabaa malabay eta gakkikkokka, Xoossaa kushiyaa beꞌidosona. Leemisuwawu, Yaasu wode Israaꞌeelatuura olettida daro kawotettatuppe dumma hanotan, Gabaaꞌoonati Israaꞌeelatuura saruwan deꞌidosona. Aybissi? Eti, “Nuuni ne ashkkarati GODAA ne Xoossaa woriyaa siyidi, . . . yiida. . . . [I] oottidobaa ubbaa nuuni siyida” yaagidosona. (Yaas. 9:3, 9, 10) Israaꞌeelata maaddiyaagee tumu Xoossaa gidiyoogaa eti akeekidosona.
7 Raꞌaabakka Xoossay i wode oottidoban a kushiyaa beꞌaasu. Yihooway ba asaa waati ashshidaakko siya simmada, biittaa wochiya Israaꞌeela asatu naaꞌꞌaayyo a, “GODAI ha biittaa intteyyo immidoogaa, . . . taani erais” yaagaasu. Hegaadan oottiyoogee qohana danddayikkonne, a bananne bantta so asaa Yihooway ashshana danddayiyoogaa ammanaasu.—Yaas. 2:9-13; 4:23, 24.
8. Issi issi Israaꞌeelati Xoossaa kushee oottidobaa waati akeekidonaa?
8 Israaꞌeela iita kawuwaa Akaabaagaappe dumma hanotan, Eelaasi saluwaappe tamay wodhanaadan woossin Yihooway siyidoogaa beꞌida issi issi Israaꞌeelati Xoossaa kushee hegaa oottidoogaa akeekidosona. Yihooway yeddido tamay yarshshuwaa miidoogaa beꞌido wode eti, “GODAA xalaalai Xoossaa!” yaagidosona. (1 Kaw. 18:39) Xoossaa kushiyaa beꞌidoogee etawu qoncce!
9. Nuuni Yihoowanne a kushiyaa ha wodiyan waati beꞌana danddayiyoo?
9 Nuuni beꞌido iita leemisotikka loꞌꞌo leemisotikka, Xoossaa woy a kushiyaa beꞌiyoogee aybakko akeekanaadan nuna maaddoosona. A eriyo wode, a eeshshatanne i oottiyoobaa ‘nu wozanaa i dooyin beꞌiyo’ gishshawu, nuunikka a kushiyaa beꞌana danddayoos. (Efi. 1:18) Nuuni beni wodekka ha wodiyankka Yihooway ba asaa maaddiyoogaa beꞌidaageetu mala gidanawu koyiyoogee qoncce. SHin, Xoossay ha wodiyan asaa maaddiyoogaa bessiyaabi deꞌii?
HA WODIYAN XOOSSAA KUSHIYAA BESSIYAABAA
10. Ha wodiyan Yihooway asaa maaddiyoogaa bessiyaabi aybee? (Ha huuphe yohuwaa doomettan deꞌiya misiliyaa xeella.)
10 Yihooway ha wodiyankka asaa maaddiyoogaa nuuni ammananaadan oottiya darobay deꞌees. Ayyaanaaban Xoossay maaddanaadan issoti issoti waati woossidaakkonne waati maaduwaa demmidaakko bessiyaabaa darotoo siyida. (Maz. 53:2) Alani Pilippinssen issi guutta haruuruwan sooppe soo sabbakiyo wode, aara gayttida maccaasiyaa yeekkiyoogaa doommaasu. I hagaadan giis: “A banaara Yihoowa Markkati gayttanaadan he galla maallado Yihoowa woossaasu. A naatettan Yihoowa Markkatuura Geeshsha Maxaafaa xannaꞌaasu, shin azinaa gelada he haruuruwaa biido wode etappe duuxxaasu.” Xoossay i woosaa eesuwan zaaridoogee a wozanappe garamettanaadan oottiis. Issi laytta giddon, Yihoowayyo bana geppada xammaqettaasu.
Yihooway ha wodiyan ba asa maaddiyoogaa bessiyaabaa akeekay? (Mentto 11-13 xeella)
11, 12. (a) Yihooway ba ashkkarata ayba ogetun maaddii? (b) Xoossay maaddido uraabaa yoota.
11 Xoossaa ashkkaratuppe daroti sijaaraa uyiyoogaa, jallissiyaabaa goꞌettiyoogaa woy pokkobaa beꞌiyoogaa mala amaliyaa agganaadan Xoossay banttana maaddidoogaa beꞌidosona. Issoti issoti hegaa banttarkka agganawu darotoo malikkonne, aggana danddayibeennaagaa yootoosona. SHin, eti Yihooway banttana maaddanaadan woossido wode, i ‘ubbaappe aadhiya wolqqaa’ immin, metiyaabaa xoonidosona.—2 Qor. 4:7; Maz. 37:23, 24.
12 Yihooway ba ashkkarati daroti banttana metiya daroban genccanaadan maaddiis. Leemisuwawu, Pasifikken guutta haruuruwan Kawotettaa Addaraashaanne misoonaawetu keettaa keexxanaadan maddabettido wode, Ema metootaasu. A, “Nuuni guutta hooteeliyan deꞌoos; qassi haattay diꞌꞌiyo ogiyaara ubba gallassi oosuwaa boos” yaagaasu. Hegaa bollikka, a heeraa wogaa meezetana koshshiis; qassi korinttee woy haattay darotoo xayees. Ema gujjada hagaadan gaasu: “Nunaara oottiya michotuppe issinni bolli taani keehi hanqqettidoogee hanotay yaa iitanaadan oottiis. Azzanaydda soo simmaas. Taani deꞌiyo xuma kifiliyan uttada Yihooway tana maaddanaadan wozanappe woossaas.” Korinttee zaarettidi yin, Ema issi Wochiyo Keelan Giiliyaade timirtte keettaappe anjjettiyo prograamiyaabaa yootiya huuphe yohuwan, bana metiya ubbabaa, hegeekka ooratta wogaa, so asaa laamotiyoogaa, erenna asaara laggetiyoogaa malabaa nabbabaasu. A, “He galla qammi Yihooway tana haasayissidabadan tawu siyettiis. Hegee taani ta oosuwaa aggennan oottanaadan denttettiis” yaagaasu.—Maz. 44:25, 26; Isi. 41:10, 13.
13. Kawotettaa mishiraachuwawu ‘mootettidi mintti essanaadan’ Yihooway ba asaa maaddiyoogaa bessiyaabi aybee?
13 Yihoowa Markkati Kawotettaa mishiraachuwawu ‘mootettidi mintti essidoogee’ Yihoowa gita kushee eta maaddiyoogaa bessiyaabaappe issuwaa. (Pili. 1:7) Issi issi kawotettati Xoossaa asay oottiyoobaa muleera teqqanawu malidosona. SHin, Yihoowa Markkati 2000ppe doommidi, Awurooppan Asaa Maataa Pirdda Keettan shatimmido 24 mootuwaa gujjin, xoqqa pirdda keettatun baa giishin 268 mootuwan shatimmidoogaa qoppiyo wode, Xoossaa kushiyaa ooninne teqqana danddayennaagee qoncce.—Isi. 54:17; Isiyaasa 59:1 nabbaba.
14. Xoossay ba asaa maaddiyoogaa bessiya harabay aybee?
14 Kumetta saꞌan Kawotettaa mishiraachuwaa sabbakiyoogee Xoossay maaddiina. (Maa. 24:14; Oos. 1:8) Qassi ha wodiyan Yihoowa asay kumetta saꞌan ishanttu maabaran issippetettan deꞌees. Alamiyaa asay hegaadan oottana danddayenna gishshawu, haratikka, “Xoossai tumu intte giddon de7ees” yaagiyoy aybissakko akeekana danddayoos. (1 Qor. 14:25) Hegaa gishshawu, Xoossay ba asaa maaddiyoogaa bessiya darobay deꞌees. (Isiyaasa 66:14 nabbaba.) Gidoppe attin, neeni shin? Ne deꞌuwan Yihoowa kushiyaa beꞌay?
NE DEꞌUWAN YIHOOWA KUSHIYAA BEꞌAY?
15. Nu deꞌuwan Yihoowa kushiyaa issi issitoo loytti beꞌana danddayennay aybissakko qonccissa.
15 Nu deꞌuwan Xoossaa kushiyaa loytti beꞌennaadan oottana danddayiya issi issibay aybee? Nu deꞌuwan metoy nuna iissana danddayees. Hegaadan haniyo wode, Yihooway nuna kase darotoo maaddidoogaa dogana danddayoos. Kawiyaa Elzzaabeela hananabaa yootiya Eelaasa worissanawu naassido wode, bana Xoossay waati maaddidaakko Eelaasikka guutta wodiyawu dogiis. Geeshsha Maxaafay Eelaasi, “Haiqqanau woossiis” yaagees. (1 Kaw. 19:1-4) I maaduwaanne xalatettaa awuppe demmana danddayii? Yihoowakko xeellana koshshees.—1 Kaw. 19:14-18.
16. Nuuni Iyyoobaagaadan Xoossaa beꞌanawu ay oottana danddayiyoo?
16 Iyyoobi bana qofissiyaaba xallaa qoppido gishshawu, ba hanotaa Xoossaagaadan xeellana danddayibeenna. (Iyy. 42:3-6) Nuunikka Iyyoobaagaadan, Xoossaa beꞌanawu keehi baaxetana koshshennan aggenna. Nuuni hegaadan waati oottana danddayiyoo? Nu metuwaara gayttidaagan Geeshsha Maxaafay yootiyoobaa nuuni wotti dentti qoppana koshshees. Yihooway nuna waati maaddiyaakko nuuni akeekiyo wode, i kaseegaappe aaruwan nuuyyo qoncce gidana. He wode nuunikka Iyyoobaagaadan, “Taani kase nebaa ta haittan siyaas; shin ha77i ta aifiyan nena be7aas” gaana danddayoos.
Yihooway harati a beꞌana mala neeni maaddanaadan oottiiddi deꞌii? (Mentto 17, 18 xeella)
17, 18. (a) Yihooway nuna maaddiyoogaa akeekana danddayiyo ogeti awugeetee? (b) Xoossay ha wodiyan nuna maaddiyoogaa bessiyaabaa yoota.
17 Nuuni Yihoowa kushiyaa waati beꞌana danddayiyoo? Beꞌana danddayiyo amarida leemisoti kaallidi deꞌiyaageeta: Neeni tumaa siyidoy Xoossay tumuppe maaddido gishshaassa gaada qoppana danddayaasa. Neeni gubaaꞌe shiiquwan issibaa siyada, “Hegee tawu koshshiyaaba” ga eray? Woy qassi Yihooway ne woosaa zaarin beꞌennan aggakka. Neeni kaseegaappe aaruwan haggaazanawu qofaa qachada, Yihooway neeyyo ubbabay giiganaadan waati maaddidaakko beꞌada maalaalettennan aggakka. Woy qassi ayyaanaabaa kaseyanawu oosuwaa aggada, “Taani nena mulekka yeggikke” yaagidi Xoossay yootidoogee tuma gidiyoogaa akeekadii? (Ibr. 13:5) Ayyaanaaban beegottidi deꞌiyoogan, Yihooway nuna daro ogiyan waati maaddidaakko akeekana danddayoos.
18 Keeniyaa biittan deꞌiya Saara hagaadan gaasu: “Geeshsha Maxaafaa xannaꞌiyoogaa nashshennabadan taani qoppiyo ta xannaꞌissiyooribaa woossaas. O xannaꞌissiyoogaa aggana koshshiyaakkonne, Yihoowa woossaas. Taani ‘Aminꞌꞌi’ gosaara ta silkkee waassiyoogaa doommiis. Ta xannaꞌissiyoora dawalidoy tanaara gubaaꞌe shiiquwaa baana danddayiyaakkonne tana oychanaassa! Taani keehi garamettaas!” Neenikka akeekancha gidiyoogan, Xoossay nena maaddiyo ogeta beꞌana danddayaasa. Isiyaa biittan deꞌiya Rono giyo michiyaa Yihooway nu deꞌuwan nuna waati maaddiyaakko beꞌiyoogaa tamaarana koshshiyoogaa yootaasu. A gujjada, “SHin hegaa tamaariyo wode, i nuussi ay keena qoppiyaakko eriyoogan maalaalettoos!” yaagaasu.
19. Xoossaa beꞌanawu nuuni oottana bessiya harabay aybee?
19 Yesuusi, “Wozanaa geeshshati anjjettidaageeta; aissi giikko, eti Xoossaa be7ana” yaagiis. (Maa. 5:8) Nuuni waanidi ‘wozanaa geeshsha’ gidana danddayiyoo? Ubbatoo geeshshabaa qoppananne likke gidennabaa aybanne oottennan aggana koshshees. (2 Qoronttoosa 4:2 nabbaba.) Nuuni ayyaanaaban minniyo wodenne suurebaa oottiyo wode, Xoossaa beꞌana danddayiyaageeta gidoos. Yihooway nu deꞌuwan nuna kaafiyoogaa akeekanaadan maaddana danddayiya nu ammanuwaabaa kaalliya huuphe yohuwan pilggana.