Sintta Huuphe Yohuwaa | Geeshsha Maxaafaa AKEEKANA DANDDAYAASA
Geeshsha Maxaafaa Akeekana Bessiyoy Aybissee?
“Geeshsha Maxaafay keehi erettida haymaanoote maxaafa. SHin hegee CHayna biittaa asaa maaddiyaaba gidenna.”—LINO, CHAYNA.
“Taani kaalliyo Hinddu haymaanootiyaa maxaafaakka akeekana danddayikke. Yaatin, Geeshsha Maxaafaa waata akeekana danddayiyaanaa?”—AMITA, HINDDE.
“Geeshsha Maxaafay benibaa gidiyo gishshawu bonchays; qassi keehi daro asawu deꞌiya maxaafa gidiyoogaa siyaas. SHin taani Geeshsha Maxaafaa beꞌa erikke.”—YUMIKO, JAAPPAANE.
Kumetta saꞌan daro asay Geeshsha Maxaafaa keehi bonchees. SHin eti Geeshsha Maxaafaa qofaa eriyoobay deꞌiyaakkokka keehi guutta. Isiyan deꞌiya, miilooniyan qoodettiya asay hegaadan qoppiyoogee erettidaagaa; shin daro asawu Geeshsha Maxaafay deꞌiyo biittatun deꞌiya asatikka hegaadan qoppoosona.
Gidikkokka neeni, ‘Taani Geeshsha Maxaafaa qofaa akeekana koshshiyoy aybissee?’ gaada qoppana danddayaasa. Geeshsha Maxaafaa qofaa akeekiyoogee hagaappe kaallidi deꞌiyaabawu nena maaddana danddayees:
Ufayttadanne woppu gaada deꞌanaadan
So asaara gayttida metuwan genccanaadan
Unꞌꞌissiyaabaa danddayanaadan
Haratuura saruwan deꞌanaadan
Miishshaa bessiyaagaadan oyqqanaadan
Leemisuwawu, Jaappaanen deꞌiya Yoshikibaa qoppa. A Geeshsha Maxaafaa qofay aybakko eranawu koyido gishshawu, nabbabanawu qofaa qachaasu. Yaatada a ay demmadee? A, “Geeshsha Maxaafay taani ta deꞌuwan ufayttanaadaaninne sinttanaabaa loꞌꞌobaa hidootanaadan maaddiis; taani kaseegaadan unꞌꞌettikke” yaagaasu. Qommoora odettida Amitikka Geeshsha Maxaafaa pilgganawu qofaa qachiis. I, “Geeshsha Maxaafay asa ubbawu maaddiyaabaa yootiyoogaa akeekada keehi garamettaas” yaagiis.
Geeshsha Maxaafay miilooniyan qoodettiya asaa deꞌoy laamettanaadan keehi maaddiis. Neenikka Geeshsha Maxaafaa pilgganaadaaninne i nena waati goꞌꞌana danddayiyaakko akeekanaadan minttettoos.