Barneta, Simono, Istananne Kaaleba
Bantta Dosan Eeno Giidosona—Oshiniyan
RENO giyo, layttay 35 heera gidido michiyaa so asay mishettidi haggaaziya Yihoowa Markka gidido keettan Awusttiraaliyan diccaasu. A hagaadan gaasu: “Kawotettaabaa aassiyaageeti keehi koshshiyoosan maaddanawu darotoo biida. Ta aawaynne ta aayyiyaa tana ufayssiyaabaa, garamissiyaabaanne miichiyaabaa oottoosona! Taani naaꞌꞌu naata yelido wode, etikka hegaadan ufayttidi deꞌanaadan koyaas.”
Reni azinay, layttay 37 heera gidido SHenikka ayyaanaaban hegaa malabaa halchiis. I hagaadan giis: “Nuuni naaꞌꞌantto naꞌiyo yeli simmidi, Pasifikke ano abbawu arggo baggan tohossan deꞌiya Tongga giyo haruurotun sabbakanawu bantta wolwoluwan biida so asaabaa Wochiyo Keelan nabbabida.a Kawotettaabaa aassiyaageeti keehi koshshiyoy awaanakko Awusttiraaliyaaninne Niwu Ziilandden deꞌiya Yihoowa Markkatu macara biirota nuuni oychanaadan he huuphe yohoy denttettiis.b Nuuyyo zaari xaafidi, nuuni abaa nabbabido Tongga biitti biidi haggaazanaadan shoobbidosona!”
Jekaba, Reno, Iskayonne SHena
SHeni, Rena, qassi eta naati Jekabinne Iskaya Tonggan issi laytta gidiyaagaa deꞌi simmin, darotoo deree denddin Awusttiraaliyaa simmidosona; shin eti haggaazuwaa aassanawu halchiyoogaa aggibookkona. Eti 2011n, Awusttiraaliyaappe arshsho baggan 1,500 gidiya kilo meetiriyaa haakkidi, Pasifikke abban deꞌiya Norfok Ayland giyo guutta haruuruwan deꞌanawu biidosona. Yaa biidoogee aybin maaddidee? Haꞌꞌi ayyo layttay 14 gidido Jekabi, “Yihooway koshshiyaaban nuna maaddiyoogaa xalla gidennan, nuuni haggaazuwankka keehi ufayttanaadan oottiis!” yaagiis.
SO ASAY ISSIPPE HAGGAAZANAWU BAAXETIYOOGAA
SHenaagaadan, Reniigaadaaninne eta naatuugaadan Yihoowa Markka gidida daro so asati aassiyaageeti keehi koshshiyoosaa biidi haggaazanawu bantta dosan eeno giidosona. Eti baanaadan denttettidabay aybee?
“Daro asay mishiraachuwaa siyanawu koyees. Nuuni eta Geeshsha Maxaafaa aggennan xannaꞌissanawu koyida.”—Barneta
Eta layttay 35 heera gidido Barnetanne Simono giyo azinaynne machiyaa, qassi haꞌꞌi layttay 12nne 9 gidido eta naati Istaninne Kaalebi, Awusttiraaliyan Kiwinslanden, haahuwan deꞌiya Bartawun giyo kataman deꞌanawu biidosona. Barneti hagaadan giis: “Yihoowa Markkati heezzu woy oyddu layttan ubbatoo yan sabbakoosona. Daro asay mishiraachuwaa siyanawu koyees. Nuuni eta Geeshsha Maxaafaa aggennan xannaꞌissanawu koyida.”
Jima, Jaka, Markanne Keereno
Haꞌꞌi layttay etawu 53 heera gidido Markinne Keerena etinne eta heezzu naati Jesika, Jiminne Jaki Norzern Teritori giyoosan alꞌꞌo shucha malabaa bookkiyaageeti deꞌiyo, haahuwan deꞌiya Nilanbay giyoosaa baanaappe kase, Awusttiraaliyan, Sidini giyo katamaa matan daro gubaaꞌiyan haggaazidosona. Marki, “Taani asa siiqiyo gishshawu, gubaaꞌiyaaninne haggaazuwan oottiyo darobay deꞌiyoosaa baanawu koyaas” yaagiis. SHin, Keerena baanawu mammottaasu. A, “SHin, Markinne harati tana minttettin, mala beꞌanawu eeno gaas. Taani biido gishshawu haꞌꞌi keehi ufayttays!” yaagaasu.
Benjaamina, Jedo, Briꞌonne Kareleno
Benjaamini, Karelenanne eta naaꞌꞌu naati qiibati, Jedanne Briꞌa Awusttiraaliyan, Kiwinslande giyoosaappe Indooneezhiyaa guutta haruurotuppe issuwaa gidida Taymer haruuruwan deꞌiya Taymer-Lest giyo guutta biittaa 2011n simmidosona. Benjaamini hagaadan giis: “Karelenanne taani kase Taymer-Lesten dumma aqinye gididi haggaazida. Yan markkattiyoogee keehi ufayssees; qassi ishantti nuna keehi maaddidosona. Yaappe biidoogan keehi azzanida. Nuuni simmidi yaa baanawu murttida. Nu naati yelettido wode, nu halchuwaa haroodessi laammikkokka aggibookko.” Karelena qassi hagaadan gaasu: “Nu naati misoonaawetuura, Beeteele keettaa asaa yaratuuranne dumma aqinyetuura laggetidi ayyaanaaban keehi maaddiyaabaa demmanaadan koyida.”
BAANAWU GIIGETTIYOOGAA
Yesuusi bana kaalliyaageetussi, “Intteppe issi urai shuchcha keettaa keexxanau koyikko, keettaa polanau woqqu miishshaa koshshiyaakko, koiroora uttidi qoodennai oonee?” yaagiis. (Luqaasa 14:28) Hegaadankka, so asay harasaa baanawu qoppikko, loytti halchana koshshees. Qoppana danddayiyoobay aybee?
AYYAANAABAA: Benjaamini hagaadan giis: “Nuuni haratussi oottanawu koyidappe attin, tooho gidanawu koyibookko. Hegaa gishshawu, nuuni baanaappe kase ayyaanaaban minnida. Qassi haggaazuwaaninne gubaaꞌiyan oottiyo haraban kaseegaappe aaruwaa oottida.”
Qommoora abaa denttido Jekabi hagaadan giis: “Nuuni Norfok Ayland giyo haruuruwaa baanaappe kase, aassiyaageeti keehi koshshiyo biitti biidi haggaazida so asaa deꞌuwan hanida darobaa Wochiyo Keelaaninne Beegottite! maxeetiyan nabbabida. Eta baaxeyidabaa, qassi Yihooway eta waati maaddidaakko haasayida.” Layttay 11 gidido a michiyaa Iskaya qassi, “Taani tarkka, qassi ta aawaaranne ta aayyeera darotoo woossaas!” yaagaasu.
SIIQIYOOBAA: Rena hagaadan gaasu: “Taani dosiyo heeran nu so asaa mataaninne nu mata laggetu matan deꞌiyo gishshawu, yan deꞌiyoogee metenna. SHin taani aggabayidobaa qoppiyoogan sheekkiyoogaappe, nuuni biyoogee nu so asaa waati maaddanaakko qoppaas.”
WOGAA: Daro keettaa asay ba biyo ooratta heeraabaa eranawu pilggees. Marki hagaadan giis: “Nilanbay biittaabaa nuuyyo danddayettida keenan darobaa nabbabida. Yan deꞌiya ishantti he biittaa asaabaanne eta wogaabaa nuuni loytti eranaadan he katamaa gaazeexaa kehatettan nuussi kiittidosona.”
Norfok Ayland giyoosaa biida SHeni hagaadan giis: “Ubbabaappe aaruwan, Kiristtaanetuppe koyettiya eeshshay tawu deꞌanaadan baaxetaas. Taani tumancha, ashkke, ammanettiyaagaanne mino oosancha gidikko, awu biittankka asaara maayettana danddayiyoogaa erays.”
METIYAABAN GENCCIYOOGAA
Metiyaabay qoppennan gakkiyo wode qoppana bessiya loꞌꞌobaa hassayiyoogee keehi maaddiyoogaa aassiyaageeti keehi koshshiyoosan loytti haggaazidaageeti yootoosona. Hegeetuppe amaridaagaa ane beꞌoos:
Rena hagaadan gaasu: “Oosuwaa dumma dumma ogiyan oottiyoogaa tamaaraas. Leemisuwawu, abban beetay denddiyo wode, Norfok Aylande haruuruwaa koshshiyaabaa caanida markkabeti gakkana danddayenna gishshawu, shammiyoobi qaxuwatananne alꞌꞌana danddayees. Yaatiyo gishshawu, qumaa kattiyo wode, hanotaadan oottiyoogaa tamaaraas.” I azinay SHeni, “Nu kessiyo miishshay issi saaminttan kessanawu qoppidoogaappe darennaadankka baaxetoos” yaagiis.
Eta naꞌay Jekabi metida harabaa hagaadan giis: “Nu ooratta gubaaꞌiyan nuuppe hara laappun asa xallay deꞌees; eti ubbaykka gastta. Hegaa gishshawu, ta lagge naꞌi baawa! SHin taani gasttatuura haggaazada etaara eesuwan laggetaas.”
Haꞌꞌi 21 laytta naꞌa gidida Jima gakkidabaykka hegaa mala. I hagaadan giis: “Nilanbay biittawu keehi matan deꞌiya gubaaꞌee 725ppe dariya kilo meetiriyaa haakkidi deꞌees; hegaa gishshawu, gita shiiquwaappe goꞌettana danddayiyo ubbabaa goꞌettoos. He sohuwaa kaseti gakkidi nu ishanttuuranne michonttuura wodiyaa aattiyoogan ufayttoos. Nuuni he wodiyaa layttan layttan gitabadan xeelloos!”
“HAGAA YIIDO GISHSHAWU KEEHI UFAYTTAYS!”
Geeshsha Maxaafay, “GODAA anjjoi dure kessees” yaagees. (Lee.10:22) Kumetta saꞌan, aassiyaageeti keehi koshshiyo sohuwaa biida keehi daroti ayyaanaa kaaletuwan xaafettida ha qofay tuma gidiyoogaa beꞌidosona.
Marki hagaadan giis: “Nuuni biidoogan nu naati maadettidoogee nuuni demmido anjjo ubbaappe aadhees. Kawotettaabaa kaseyiyaageetussi Yihooway koshshiyaabaa kunttiyoogaa nu naatu giddon bayratiyaageeti loytti ammanettoosona. Hegee shammidi demmiyooba gidenna.”
SHeni hagaadan giis: “Ta macheeranne ta naatuura kaseegaappe aaruwan siiqettoos. Yihooway etawu oottidobaa eti yootiyoogaa siyiyo wode, taani keehi ufayttays.” A naꞌay Jekabi, “Taani keehi loꞌꞌo wodiyaa aattaas. Nuuni hagaa yiido gishshawu keehi ufayttays!” yaagiis.
a Tisaase 15, 2004 Wochiyo Keelan, sinttaa 8-11n, “‘Asa Siiqiya Haruurotun’ Deꞌiya Xoossaa Dabbotaa” giya huuphe yohuwaa xeella.
b Awusttiraaliyaanne Niwu Ziilandde macara biiroti 2012n Awusttiraalezhiyaa macara biiruwaa geetettidi walahettidosona.