Neeni Erana Koshshiya Taarikiyaa

Geeshsha Maxaafay haymaanoote xuufetuppe dumma. Geeshsha Maxaafadan daro layttawu cora asaa ammanoy minnanaadan oottida hara maxaafi baawa. Qassi asay balaa demmidi boranawu giidi loytti pilggido hegaa mala hara maxaafi baawa.

Leemisuwawu, issi issi eranchchati ha wodiyan deꞌiya Geeshsha Maxaafay koyro xaafettida xuufiyaappe maara koppe oottidoogaa ammanokko giidi yootoosona. Haymaanootiyaabaa xannaꞌiya issi profeeseree hagaadan giis: “Geeshsha Maxaafay koyro xaafettida xuufiyaappe suure koppe oosettidoogaa ammanana danddayokko. Nu kushiyan deꞌiya koppe oottido xuufetun balay kumiis, qassi hegeetuppe daroti koyro xaafettida xuufiyaappe daro layttay aadhdhi simmin koppe oosettidosonanne he xuufiyaappe shaꞌan qoodettiya ogiyan dummatiyoogee qoncce.”

Harati qassi Geeshsha Maxaafay laamettiis giidi tamaarissiya haymaanootiyaa kaalloosona. Leemisuwawu, Fizala aawaynne aayyiyaa Geeshsha Maxaafay geeshsha gidikkonne laamettiis giidi A tamaarissidosona. I hagaadan giis: “Hegaappe denddidaagan, Geeshsha Maxaafaabaa tawu yootanawu koyiya asa ammanikke. Ayssi giikko, etawu koyro xaafettida Geeshsha Maxaafay baawa. Eti oyqqido Geeshsha Maxaafay laamettiis!”

Geeshsha Maxaafay laamettin laamettana xayin hegee nuna keehi qofissana bessii? Kaallidi deꞌiya oyshata qoppa: Geeshsha Maxaafay sinttanaabaa yootiyo minttettiyaabay koyro xaafettida xuufiyan deꞌiyaakkonne neeni erennaba gidikko, hegaa ammanana danddayiyoo? (Roome 15:4) Ha wodiyan deꞌiya Geeshsha Maxaafay balay kumidoogaa gidikko, oosuwaa, so asaa, woy goynuwaa xeelliyaagan keehi koshshiyaabaa kuuyanawu Geeshsha Maxaafaa goꞌettuutee?

Kushiyan beni xaafettida Geeshsha Maxaafay nuuyyo deꞌana xayikkonne, shaꞌan qoodettiya Geeshsha Maxaafaa xannaꞌana danddayoos. Hegeetuppe amaridaageeti galꞌꞌa. Kushiyan beni xaafettida he maxaafay musennan waani attidee, qassi yedetaanne xaafettida qofaa laamanawu asay malidoogaa xoonidi waani attidee? Hegee neeni Geeshsha Maxaafaappe nabbabiyoobaa ammanettanaadan waati maaddana danddayii? He oyshatu zaaruwaa eranawu Geeshsha Maxaafay xayennan waani attidaakko yootiya taarikiyaa loytta nabbaba.