KOYRO SINTTAN DEꞌIYA HUUPHE YOHUWAA
Geeshsha Maxaafay Musennan Attiis
PAACCIYABAA: Geeshsha Maxaafaa koyro xaafidaageetinne duuqqidaageeti Pappiiresiyanne Calaa goꞌettidosona.a (2 Ximootiyoosa 4:13) He miishshati Geeshsha Maxaafaa duussay hirggissanaadan waati oottidonaa?
Pappiiresee pooshettees, booxxees, eesuwan hitees. Beni wode Gibxxebaa xannaꞌiya Richard Parkkiseninne Stefen Kurikee “Issi achcha pappiiresee wurssettan musida golanne sophphe kiyees” goosona. “Minjjidosan issi xaattay buuqqana woykko irxxan wooqqananne eceriyan woykko moogidosan ollattan meetettana danddayee.” Beetti simmin daro pooꞌuwanne irxxaa ekkanaadan oottido pappiireseti eesuwan moorettidosona.
Calay pappiiresiyappe gamꞌꞌees, shin ikka oyqettay moorettikko woykko daro hoꞌꞌoy, irxxay woy pooꞌoy deꞌiyosan wottikko moorettees.b Calaakka paalliya qeeri doꞌati dosoosona. Hegaa gishshawu, Everyday Writing in the Graeco-Roman East, giyo maxaafay beni wode xaafettidabati “dumma qaadaanappe attin musennan attiyo higgee baawa” gees. Geeshsha Maxaafay musidaba gidiyakko, A giddon deꞌiya kiitaykka aara hayqqanashin attiis.
GEESHSHA MAXAAFAY WAANI ATTIDEE? Geeshsha Maxaafan doomettan deꞌiya ichchashu maxaafata xeelliyaagan issi issi kawoy ‘ha higgiyaa duuqqidi bawu ekkanaadan’ Ayhudatu higgee wolqqanttees. (Zaarettido Wogaa 17:18) Hegaa bollikka, duuquwan erettida hiillanchchati cora koppiya kessido gishshawu koyro xeetu layttan K.K. heeran kushiyan xaafettida Geeshsha Maxaafaa kifileti Israaꞌeela biitta ubban deꞌiya Ayhuda woosa keettatun, haray atto haahuwan deꞌiya Maqidooniyaara ubban deꞌoosona! (Luqaasa 4:16, 17; Oosuwaa 17:11) Issi issi keehi ceeggida kushiyan xaafettida Geeshsha Maxaafaa kifileti ha wodiya gakkanawu waani deꞌidonaa.
Maxine Abbaa Xaatta Maxaafata geetettiya kushiyan xaafettida Geeshsha Maxaafaa kifileti urqqaappe merettida xaarotu giddon yeggidi mela heeran gonggolo giddon wottin xeetu layttata deꞌidosona
‘Ayhudatussi Geeshsha Maxaafaa kifileta oyqqida xaattaa xaaruwan woykko otuwan yeggidi minjjiyo meezee deꞌiyoogaa’ Ooratta Maachchaa eranchchay Filip W. Komfort yootees. Kiristtaanetikka he meeziyaa aggibookkona. Hegaappe denddidaagan, issi issi beni wode kushiyan xaafettida amarida Geeshsha Maxaafaa xuufeti urqqaappe merettida xaarotu giddon, xuntta kifiletun, qassikka gonggolotu giddooninne keehi mela sohotun beettidosona.
WURSSETTA AYFIYA: Kushiyan xaafettida shaꞌan qoodettiya Geeshsha Maxaafaa kifileti, ubba issoti issoti 2,000 layttappe daruwaa gamꞌꞌidaageeti ha wodiyan deꞌoosona. Hegaa keena adussa layttaa gamꞌꞌida hegaa keena cora kifileti deꞌiyo hara xuufee baawa.
a Pappiiresee haatta xaphon mokkiya pappiires giyo mittaappe merettiya xaafiyo miishsha. Calay qassi mehiyaa galbbaappe merettees.
b Leemisuwawu, paramay deꞌiyo Amarkkaa Laꞌꞌatettaa Awaajjoy calan xaafettiis. Ha wodiyan 250ppe guuxxiya layttay aadhdhi simmin, sholollidi nabbabanawu coo beettiyo xekkan deꞌees.