KOYRO SINTTAN DEꞌIYA HUUPHE YOHUWAA
Geeshsha Maxaafay Yedetaa Xoonidi Attiis
PAACCIYABAA: Polotikaanne haymaanotiya kaalettiya daroti Geeshsha Maxaafay yootiyoobaara eqettiyaabaa oottidosona. Eti Geeshsha Maxaafay asawu deꞌennaadan, xaafettennaadan woykko birshshettennaadan oottanawu bantta maataa darotoo goꞌettidosona. Naaꞌꞌu leemisota beꞌite:
Qassi 167 .K.K. heeran: Selusiide Kawuwaa Antaykes Epipanesi, Ayhudati Giriiketu ammanuwaa ekkanaadan koyidi Ibraawetto Geeshsha Maxaafaa kifileti ubbay xayanaadan azaziis. Taarikiyaa xaafiya Henerik Gretizi xaafidoogaadan, A oosanchchati “Higgiyaa xaatta maxaafata demmido soho ubban pooshshidosonanne xuuggidosona; qassikka hegaa minnidi pilgganawu koyiyageeta woridosona.”
Qassi 800 layttappe kase heeran: Kaatoolike ammanuwa kaalettiya issi issi asati ammaniya asay katoolike seeraa gidennan, Geeshsha Maxaafay tamaarissiyobaa sabbakido gishshawu yiillotidi, Laatiine doonan xaafettida Mazamure maxaafaappe attin hara Geeshsha Maxaafaa kifiliyaa oyqqida oonanne kaddidaagaa giidi zaggidosona. Issi woosa keettaa maabaray bantta asaayyo hagaadan giidi azazuwa kessiis: “kaddidaageeta sheniyaa mirqqidi, ammanettidi, qassi ubbatoo koyite; ubba keettatanne sirettiya geema sohota ubbaa shankkatite. Kaddida asi beettido keettay xayo.”
Hegan maatafaa wottidi kessida Geeshsha Maxaafaa morkketussi injjetidaba gidiyaakko A giddon deꞌiya kiitay xayana shin attiis.
Williyam Tindeli Ingiliizettuwan birshshido Geeshsha Maxaafay asaa gakkennaadan digettidoogaa xalla gidennan, Geeshsha Maxaafay xuugettiis; qassi Tindelakka 1536n woridosona; shin hegaa mala yedetay deꞌishinkka Geeshsha Maxaafay xayibeenna.
GEESHSHA MAXAAFAY WAANI ATTIDEE? Kawuwaa Antaykes Israaꞌeela biittan wudidi zamachchaa oottiis, shin Ayhuda asay hara cora biittatun deꞌees. Koyro xeetu layttaa M.L. heeran xeetaappe 60 kushiyaappe dariya Ayhudati Israaꞌeela biittaappe kareera harasan deꞌiyoogaa eranchchati yootoosona. He Ayhudati bantta woosa keettatun Geeshsha maxaafaa koppeta minjjidosona; kiristtaaneta gujjin, kaalliya yeletay he Geeshsha Maxaafaa koppeta goꞌettiis.—Oosuwaa 15:21.
Qassi 800 layttappe kase heeran, Geeshsha Maxaafaa dosiya asati yedetaa genccidi Geeshsha Maxaafaa kifileta birshshiyoogaanne duuqqiyogaa aggibookkona. Haray attoshin, 15tta xeetu layttaa baggaa heeran issisaappe harasaa efanawu injjetiya attamo miishshay merettanaappe kasekka, Geeshsha Maxaafaa kifileti 33 gidiya doonatun deꞌana danddayidosona. Hegaappe simmin, Geeshsha Maxaafay maalaalissiya eesuwan birshshettiisinne corattiis.
WURSSETTA AYFIYA: Wolqqaama kawotuppenne baletettida qeesetuppe gakkiya qohoy deꞌishinkka Geeshsha Maxaafay ay maxaafappenne aaruwan cora sohuwaa gakkidanne cora doonatun birshshettida maxaafa. Geeshsha Maxaafay issi issi biittatu higgetanne doonata poshiis, qassikka miilooniyan qoodettiya asaa deꞌuwaa laammiis.