Keehi Ufayssiya Oosuwaa
1. Asay ayyaanaaban paxanaadan oottiyo ayba oosoy ha wodiyan oosettii?
1 Koyro xeetu layttan deꞌidaageeti asay maalaaliya ogiyan paxiyoogaa beꞌidi keehippe ufayttidosona. (Luqaasa 5:24-26) Ha wodiyan, asay ayyaanaaban paxanaadan oottiyo oosuwan ufayttoos. (Ajj. 22:1, 2, 17) Yihoowa Qaalaynne geeshsha ayyaanay asaa deꞌuwaa laammidoogaa qonccissiya temokruwaa nabbabiyoogee ayba ufayssii! SHin ubbaappe aaruwan ufayssiyaagee, dichaa bessiya xinaatiyaa xannaꞌissiyoogan ha oosuwan shaahettiyoogaa.
2. Issi ura tumaa tamaarissiyo wode ayba ufayssa demmana danddayiyoo?
2 Xoossaa sunttay oonee? Metuwaanne tuggaa i aybissi coꞌꞌu giidee? Xoossaa Kawotettay asaa naatussi ay oottanee? Nuuni ha oyshata zaariyoogaa xallan gidennan, xannaꞌiya uray tumaa eriyo wode ufayttiyoogaa beꞌiyoogankka ufayttoos. (Lee. 15:23; Luq. 24:32) Tamaaree dichaa bessiyo wode, Yihoowa sunttaa goꞌettiyoogaa, maayiyoonne alleeqettiyo hanotaa laammiyoogaa, qohiya oosuwaappe haakkiyoogaa, qassi haratuyyo markkattiyoogaa doommana danddayees. I ba huuphiyaa geppidi xammaqettiyo wode, nu ishanne nunaara issippe oottiyaagaa gidees. Hegaa mala tanggo ubbay nuuni ufayttanaadan oottiyaaba.—1 Tas. 2:19, 20.
3. Geeshsha Maxaafaa xinaatiyaa doomissanau bessiya ayba tangguwaa nuuni ekkana koshshii?
3 Hegaadan Oottana Danddayay? Ha keehi ufayssiya oosuwaa oottanau koyiyaaba gidikko, Geeshsha Maxaafaa xinaatiyaa demmanau Yihooway maaddanaadan woossa; qassi ne woosaara moggiyaabaa ootta. (1 Yoh. 5:14) Asa demmana danddayiyo sohuwaaninne wodiyan sabbaka. Injje gidida hanotatu ubban xinaatiyaa doomissanau asaa shoobba. (Era. 11:6) Koshshay deꞌiyo ura demmada tumaa puutiyaa tokkidaba gidikko, haattaa ushshanau zaarettada ba.—1 Qor. 3:6-9.
4. Eesotiyoogee keehippe koshshiyoogaa qoppiyoogan Geeshsha Maxaafaa xinaatiyaa doomissana koshshiyoy aybissee?
4 Xillotettaa namisettiyaanne saamettiya keehi daro asay ha wodiyan deꞌees. He asata Geeshsha Maxaafaa xannaꞌissiyoogan ayyaanaaban etau koshshiyaabaa ooni kunttanee? (Maa. 5:3, 6) Cahaa wodee wurennan deꞌishin, sabbakiyoonne erissiyo ashkkara oottiyo oosoy polettanaadan maaddanau wozanappe koyidi oottiyaageeta gidoos.—Isi. 6:8.